Yesu wahonia omukhalabani wa omukhongo wa abasikari
(Matayo 8:5-13; Yohana 4:43-54)
7
1 Neyakhamala okhulakaya kano koosi abandu nebamurekeresia, wenjila mu olukoba lwa Kaperinaumu. 2 Yalimo omukhalabani wa omukhongo wa abasikari yali walwaala akana okhufwa. Omukhongo wuwe wulia yali wamuyanja muno. 3 Lwa omukhongo wulia yahulila amacheni ka Yesu waruma abasakhulu Abayahuti ari bamusabe yeche ahonie omukhalabani wuwe. 4 Lwa batukha wa Yesu yali bamwisaya nebasunga bari, “Omundu wuno yolana obuyeti bubwo. 5 Sikila wayanja yikholo yefu, khandi niye wakhwombakhila sinakoki yefu.”6 Yesu warula wacha ninabo. Lwa yatukha ahambikiti na yinju, Omukhongo wulia waruma abasaale baabe bamusungile bari, “Omwami, lekha okhwinyasia, sikila esie sinoolana ewe okhwinjila munju mwanje ta. 7 Nisio sikilile esie nalekha okhwicha woli. Yilali lakaya buchwa likhuwa, mani omukhalabani wanje alahona. 8 Esie siesi nibeele omundu wuli hasi wa amalaka, nibeele nende abasikari bali hasi wa amalaka kanje. Nesungila mulala endi, ‘Cha,’ nacha, khandi nesungila owundi endi, ‘Yicha,’ nayecha. Nesungila omukhalabani wanje endi, ‘Khola sino,’ nakhola.”
9 Lwa Yesu yahulila amakhuwa kano wahuka, wasiukhana wasungila lituli liali nelimulondilekho ari, “Endamusungilanga endi hata mu Abaisraeli boosi abulamo omundu wa lisubila khulinga wuno ta.” 10 Lwa abandu bali nibarumilwe bakalukha munju, banyola omukhalabani wulia wuhonile.
Yesu wasisimusia omwana wa namulekhwa
11 Ebise bititi nebiakhawa, Yesu wacha mulukoba bari Naini, abechi baabe nende lituli lia abandu liamulondakho.
12 Neyakhembiya asilibwa sia olukoba olwo, abandu bali balarusianga omundu wufwile elwanyi, yali omusiani omutelwa wa namulekhwa. Lituli lia abandu liali lilondile khu namulekhwa wulia. 13 Lwa Omwami yalengela namulekhwa wulia wamukholela esisa, wamusungila ari, “Okhalila ta.”
14 Wecha watila khusisielo sia omulambo, bali nebachingile basingila. Wasunga ari, “Ewe omusiani, endakhusungilanga, buukha!” 15 Omufu wulia wabuukha wekhala khandi warakikha okhulakaya. Yesu wamwakanisia khu maayi wuwe.
16 Oburi bwatila abandu boosi, baakalusilia Wele oluyali nebasunga bari, “Omung'oosi omukhongo wichile mwifwe! Wele wuchendelele abandu baabe!” 17 Amacheni ka Yesu kalaanda musitonye sia Yutea siosi nende mubitonye bindi ebichesa.
Yohana Omupatiisi waruma abechi baabe khu Yesu
(Matayo 11:2-19)
18 Abechi ba Yohana Omupatiisi bamusungila amakhuwa kano. Yohana walanga abechi baabe babili, 19 wabaruma khu Yesu bamurebe bari, “Ewe niwe wakenyekhana wiche naho khulindekho owundi?”
20 Lwa batukha wa Yesu yali basunga bari, “Yohana Omupatiisi wukhurumire khwiwe nareeba ari, ‘Ewe niwe wakenyekhana wiche naho khulindekho owundi?’ ”
21 Ebise bienebio Yesu wahonia abandu obutekhele nende obulwale, wakhuma ebisieno khandi wakhola ababofu barakikha okhulola. 22 Kho wakalusia abechi balia ari, “Kalukhayo musungile Yohana amakhuwa ka mwakhalengala nende okhuhulila: Ababofu balalengelanga, abalema balachendanga, ba amachele balahonisibwangwa, bekala amarwi balahulilanga, abafu balasisimukhanga, khandi abamanani balelwachilwangwa Likhuwa Lilayi. 23 Khandi abiitwe chikhabi wulia wukhali nende lihenda ni nasie.”
24 Abechi ba Yohana nibakharekukha, Yesu wasungila lituli amakhuwa khu Yohana, wasunga ari, “Enywe khuli mwacha musichimi lwa Yohana yaliyo, mwenya mulengele sina? Likhendu lia yimboho yilahuchanga nalisisikha? 25 Ne kakhali kario ta mwacha elwanyi yilia okhulengela sina? Omundu wufwalile chingubo chindayi? Se kali kario ta, abandu bafwalanga chingubo chirio babeele nende limenya lia obuyinda khandi banyolekhanga munju ya abaami! 26 Sungile, mwacha okhulola sina? Omung'oosi? Yee kaabele kario, halali mwalengela wubira omung'oosi. 27 Sikila Yohana niye wa amahandiko kasunganga kari, ‘Endaruma omundu ache yimbeli wuwo akhulombele yinjila.’ ” 28 Yesu watasakho ari, “Endamusungilanga endi, khu abandu boosi bebulwa nende omundu omukhasi abulaho omukhongo khuli Yohana ta. Nebuchwa wuli omutiti mu obwami bwa Wele wubeele omukhongo khumukhila.”
29 Lwa abandu bahulila amakhuwa kano, halala nende abasololi ba emirulo balimo, beyama bari yingila ya Wele ni ya toto, sikila bali bapatisibwa nende Yohana. 30 Halali Abafarisayo nende abechesi ba amalaka ka Musa baloba amakhuwa ka Wele sikila sibali bapatisibwa nende Yohana ta.
31 “Nono endalekhasia nende sina abandu ba eselukho yino? Babeele abandu ba lukano si? 32 Babeele khuli abana bekhaale khusoko nibalangana bari,
‘Khumupiile omulele
mani semukhinile ta.
Khumwimbile olwimbo lwa amasika,
mani semwikhuhulile ta.’ ”
33 “Sikila Yohana Omupatiisi yecha, weyimana okhulia nende okhunywa yindali, mwasunga muri, ‘Wubele nende esisieno.’ 34 Omwana wa Omundu yecha alalichanga ne anywa yindali, na enywe musunganga muri, ‘ Omulianga wubeele hano khandi wubeele omumesi, omusaale wa abasololi ba emirulo nende aboni!’ 35 Nebuchwa obusicha bwechesibwangwa toto okhulondekhana nende limenya lia abandu babukakanga.”
Omukhasi omwoni wabelwa
36 Mulalakho wa Abafarisayo wesaya Yesu ari ache aliekho ewuwe. Yesu wacha munju mumwe wekhala amesa ya esiakhulia nalia. 37 Omukhasi mulala wali omwoni yali mulukoba lulia. Lwa yahulila ari Yesu alalichanga munju mwa Omufarisayo, wecha nende echupa ya amafura ka obukusi bwa ekulu khandi kali kahunya obulayi. 38 Wecha wasinjila yinyuma wa Yesu ahambi na ebilenje bibie, walila amasika nikakwa khubilenje bia Yesu. Mani weeya ebilenje bia Yesu na liswi lilie, wabichunjuna nabibakha amafura kahunya obulayi. 39 Omufarisayo wulia lwa yalengela kano webaasia ari, “Kabanga bari omundu wuno omung'oosi yakhamanyile liiba lia omukhasi wulamutilangakho wuno, sikila omwoni niye.”
40 Yesu wamusungila ari, “Simoni, nibeele nende likhuwa nenya ekhusungile.” Wamukalusia wasunga ari, “Sungile, Omwechesi.”
41 Yesu wasunga ari, “Yaliho omundu wekopianga abandu chisenti, wekopia babili. Mulala wabo yamuwa chitinaria chimia chirano, na owundi yamuwa amakhumi karano. 42 Lwa bakhaywa okhurunga amakobi yako wabalekhela boosi. Khu bandu babili bano, wina wamuyanja muno?” 43 Simoni wamukalusia wasunga ari, “Nembara wayalekhela likobi likali.” Yesu wamusungila ari, “Wulakaye obulayi.” 44 Wasiukhana walengela omukhasi wulia, wasungila Simoni ari, “Wulengela omukhasi wuno? Lwa ninjiile munju mumwo sewumbele amachi nasinga ebilenge bianje ta, nebuchwa omukhasi wuno wusingile ebilenge bianje nende amasika kaake mani wabieya nende liswi lilie. 45 Ewe sewumbele emilembe kia okhuchunjuna ta, nebuchwa okhurula niye nayenjila sewulekhilekho okhuchunjuna ebilenge bianje ta. 46 Ewe sewumbakhilekho amafura kauynya obulayi khumurwe kwanje ta, nebuchwa niye wubakhile ebilenge bianje amafura kaunya obulayi. 47 Niko kakila nekhusungila endi obwoni bubwe obukali bubeelelwe, sikila ayanjile olukali. Wubeelwa matiti ayanjanga hatiti.”
48 Yesu wasungila omukhasi wulia ari, “Wubeelelwe obwoni bubwo.”