Yesu niye Omwami wa Sapato
(Matayo 12:1-8; Mariko 2:23-28)
6
1 Yinyinga yindi ya Sapato Yesu yali alabiranga mubulime bwa yingano, abechi baabe babuta yingano nebaisirira mumakhono kaabo nebalia. 2 Nebuchwa, balalakho ba Abafarisayo babareeba bari, “Sina sikila nemukhola kali lukano nende amalaka ka Sapato?” 3 Yesu wabakalusia wasunga ari, “Enywe semwasomakho ka Tauti nende ba yali ninabo bakhola lwa bali na yinjala ta? 4 Yengila munju ya Wele wabukula omukati omutakatifu kwa abasaayi bong'ene balichanga. Walia, khandi wakabilakho ba yali ninabo.” 5 Yesu wabasungila ari, “Omwana wa Omundu niye Omwami wa Sapato.”Omundu wa omukhono kwalemala
(Matayo 12:9-14; Mariko 3:1-6)
6 Yinyinga yindi ya Sapato, Yesu yali alechesianga mu sinakoki, omundu walemala omukhono omusacha yesi yalimo. 7 Balalakho ba Abafarisayo nende abechesi ba amalako ka Musa bali balindile balengele Yesu nalamuhonia. Bakhola bario sikila bali benyile basitake Yesu.
8 Yesu yali wumanyile ka bali nibalapaaranga, wasungila omundu wulia ari asinjile abundu wa abandu boosi balamulengela. Omundu wulia wabuukha, wasinjila yaho. 9 Yesu wabareba ari, “Mu Sapato khukhoya kwakhola amalayi naho kwakhola amabi? Khuhonie obulamu bwa omundu naho khwonone?” 10 Kho wachesia chimoni walengela buli omundu, wasungila omundu walemala omukhono ari, “Lungisia omukhono kuukwo.” Walungisia omukhono kwalemala kulia kwahona. 11 Okurima kwatiila Abafarisayo nende abechesi ba amalaka ka Musa, barebana bari, “Yesu wuno khumukhole khuriena?”
Yesu warobola Abarume likhumi na babili
(Matayo 10:1-4; Mariko 3:13-19)
12 Yinyinga yindi Yesu yanina khu esikulu okhusaya, wasaya esilo siosi. 13 Yinyinga yalondakho mabwibwi, walanga abechi baabe boosi warobolamo likhumi na babili wabalanga ari abarume. Kano niko amera kaabo: 14 Simoni, weyalanga ari Petero, nende Andereya wandaye wuwe, Yakopo nende Yohana, Filipo nende Batolomayo. 15 Matayo nende Tomasi, Yakopo wa Alufayo, nende Simoni wa balanganga bari Omuselote. 16 Yuta omwana wa Yakopo nende Yuta Iskarioti wali omuchami.
Yesu welwachila lituli lia abandu
(Matayo 4:23-25)
17 Yesu nende abarume baabe beekha, basinjila abundu wakwalakha wa lituli likali lia abechi baabe nende abandu abakali okhurula Yutea, Yerusalemu nende ebitonye bia Tiro nende Sitoni bili khundulo khwa yinyanja ya Kalilaya. 18 Bali beechile okhumuhulila nende okhuhonisibwa obulwale bwabo. Balia banyasibwangwa nende ebisieno bahonisibwa. 19 Abandu boosi mu lituli bakhaka okhumutilakho, sikila amani ka okhuhonia kamurulangamo nekabahonia.
Amelwacho khu esikulu
(Matayo 5:1-12)
20 Wasuta chimoni walengela abechi baabe, wasunga ari,
“Mubele nende chikhabi enywe muli abamanani,
sikila obwami bwa Wele ne obwenyu.
21 Mubele na chikhabi enywe ba yinjala,
sikila mulekusibwa.
Mubele na chikhabi enywe mulalilanga yisa yino,
sikila mukhachekhe.
22 Mubele na chikhabi enywe ba abandu babiyila
khandi bamwahulanga nibamunyeka,
khulwa Omwana wa Omundu.”
23 Sangala khandi muchachale yinyinga yeneyo sikila esihanwa sienyu mwikulu sibeele esikhongo muno. Sikila kano niko ka abakuka baabo bakholela abang'oosi.
24 “Halali mubeele khusibi enywe muli abayinda,
sikila mwanyola khale sia mwenyanga.
25 Mubeele khusibi enywe mwikure yisa yino,
sikila mukhabe na yinjala
Mubeele khusibi enywe mulachekhanga yisa yino,
sikila mukhabeelele na mulila.
26 Mubeele khusibi enywe ba abandu balakayanga amakhuwa amalayi khu enywe,
sikila abakuka baabo bakholela abang'oosi bario.”
Yanja abasiku baabo
(Matayo 5:38-48; 7:12)
27 “Halali esie endamusungilanga enywe mulambulilanga, yanja abasiku benyu, kholela amalayi yabo bamubiyila. 28 Biita chikhabi balamulamanga, sabila yabo bakhukholelanga amabi. 29 Omundu nakhuupa olukhofi khulusaya, mukalukhasilie olusaya lwa olubeka lundi. Khandi omundu nakhunuula likoti lilio, mulekhele nende lisiati. 30 Helesia buli omundu wukhusaba, khandi okhalondelesia omundu wukhunuula ofundu fufwo ori akhukalusilie ta. 31 Kholela abandu bandi khuli mwesi mwenya mukholelwe.
32 “Kho nemuyanja abandu bamuyanja, bukhala sina bwa munyola? Sikila ba obwoni boosi bayanjanga babayanja. 33 Khandi ne mukholela amalayi yabo bamukholelanga amalayi bukhala siina bwa munyola bukhala siina? Sikila aboni boosi bakholanga bario. 34 Khandi nawikopia abandu mani wenye bakhurunge, malayi sina ka olaba na okholile? Sikila aboni boosi bekopianga ba obwoni basiabwe mani beenya barungwe. 35 Yilali yanja abasiku babo mani obakholele amalayi, khandi obeekopie halali okhubarungisia. Esihanwa sienyu silaba esikhongo. Kano kakhechesie kari enywe abana ba Wele wa mwikulu, sikila wubeele na chimbabasi khu abandu bakhali nende orioo nende ababi boosi. 36 Mube na chimbabasi sikila papa wenyu wubele na chimbabasi.
Okhukhalakila abandi
(Matayo 7:1-5)
37 “Mukhakhalakila abandi tawe, nanywe semulakhalakilwa ta; mukhabiya abandi tawe, nanywe semulabiiywa ta. Beela abandi nanywe mulabeelwa. 38 Haana, nawe olahebwa. Esikelo esilayi, siabasinyile khandi basisikha, sichuule mani siarakikha okhuyombookha, nisio sia bakhakhuwe. Esikelo sia orumikhila khubandi nisio sia Wele akharumikhile khwiwe.”
39 Khandi wabasungila epimbi yino ari “Omubofu anyala wemilila omubofu wundi? Sibalakwa boosi mubwina? 40 Wuleyikanga sanyala okhuba ekulu wa omwechesi ta, yilali buli omundu aleyika wamananya buli esindu abechanga khuli omwechesi wuwe. 41 Sina sikila ewe nolola akhandu akhatiti khakwile mumoni ya wandaayo na solengela esisonono sili mumoni yiyo ta? 42 Onyala okhusunga oriena ori, ‘Wandase lekha ekhurusie akhandu mumoni mumwo,’ na wamwene solengela esisonono sili mumoni yiyo ta. Omuchinia ewe! Rusia esisonono mumoni yiyo mbele, kho olengele obulayi akhandu khali mumoni ya wandaayo.
Omusaala kumanyikhanga na amatunda kakwo.
(Matayo 7:17-20; 12:34-35)
43 “Kubulaho omusaala omulayi kurechangakho amatunda amabi ta, khandi kubulaho omusaala omubi kurechangakho amatunda amalayi. 44 Sikila buli omusala kumanyikhananga nende amatunda kakwo. Sonyala wabuta chinduli okhurula khumunyenya ta, naho sonyala wabuta amasapipu okhurula khumurakaru ta. 45 Omundu omulayi ahananga amalayi okhurula mwibikhilo lia amalayi lili mu mwoyo kukwe, na omumayanu ahananga amamayanu okhurula mwibikhilo lia amamayanu lili mumwoyo kukwe. Sikila alakayanga okhurulana nende amakhuwa kechuule mumwoyo kukwe.
Abombakhi babili ba chinju.
(Matayo 7:24-27)
46 “Sina sikila nemundanga muri ‘Omwami, Omwami,’ na semukhola khuli esie emusungila ta?
47 “Buli omundu wichanga narekeresia amakhuwa kanje mani akhola khuli kasunga, lekha emusungile khuli ali. 48 Wubeele khuli omundu wayaba mani wara omusingi khu olwanda wombakhakho yinju yiye. Lwa emikhura kia amachi amakali kiayikubilisia, siyakwa ta sikila yombakhwa obulayi. 49 Halali, omundu wurekeresianga mani sakhola khuli esunga ta, wubeele khuli omundu wombakha yinju yiye khu omuyekhe. Emikhura kia amachi amakali kiayikubilisia, yatikulukha yawela hasi.”