Yesu warobola abalondi baabe ba okhuranga
5
1 Yesu yali wusinjile khundulo khwa yinyanja ya Kenesaretia, alechesianga lituuli lia bandu bali nabechile okhuhulila likhuwa lia Wele. 2 Walengela amaaro kabili khundulo khwa yinyanja, ka abalobi bali nebarulilemo okhucha okhusinga chindimba chaabo. 3 Yesu wenjila muliaro lia Simoni, wamusungila ari alisunde mumachi hatiti. Wekhalamo wachililila okhwechesia lituli lia abandu.4 Yesu neyakhamala okhulakaya wasungila Simoni ari, “Fuka eliaro liche wa amachi kali amakali mani osukune chindimba mumachi olobe ching'eni.”
5 Simoni wasunga ari, “Omwami, khukhalabane esilo siosi halali sekhulobilekho esindu ta. Nebuchwa, sikila ewe wulakaye ndalekhulanga chindimba mumachi.”
6 Lwa bakhola bario batiila ching'eni chingali, chindimba chabo charakikha okhurandukha. 7 Balaanga abasiabwe ba muliaro lindi beeche babayete. Lwa beecha bechusia ching'eni mumaaro kaabo, keenya okhwiyinikha.
8 Lwa Simoni Petero yalengela khu kekholekha, wasikama yimbeli wa Yesu wasunga ari, “Omwami, nosiima rula wa esie endi, esie nibeele omundu wa obwoni.” 9 Sikila niye nende abasie bahuka muno lwa baloba ching'eni chingali chirio. 10 Kali kario khu Yakopo nende Yohana, abana ba Sebetayo, boosi bali abasangi ba Simoni. Yesu wasungila Simoni ari, “Okhaba nende oburi ta, okhurulila bulano olaba omulobi wa abandu.” 11 Lwa batusia amaaro kaabo khundulo khwa yinyanja, balekha buli esindu bamulondakho.
Yesu wahonia omundu wa amakele
(Matayo 8:1-4; Mariko 1:40-45)
12 Olundi, Yesu yali mulukoba lulala, omundu yalimo walwalanga amakele. Wecha wasikama yimbeli wa Yesu wasunga ari, “Omwami, ne oli nende obunyali bwa okhumbonisia, mbonisie.”
13 Yesu wamurakho omukhono mani wasunga ari, “Endakhuhonisia, hona.” Abwene na abwene omundu wulia wahonisibwa amakele.
14 Yesu wamusungila ari, “okhasungilakho omundu yesi yesi amakhuwa kano ta. Nebuchwa, cha wiyechesie yimbeli wa omusaayi, mani orusie esihanwa okhulondekhana nende amalako ka Musa, kho buli omundu amanye ari wuhonile.”
15 Amacheni ka Yesu kalaanda buli abundu, amatuli ka abandu kebunjelesia okhuhulila nayelwacha nende okhuhonisibwa obulwale. 16 Halali niye yebachanga nacha wa bandu bakhali ta kho asaaye.
Yesu wahonia omundu wafwokoya
(Matayo 9:1-8; Mariko 2:1-12)
17 Yinyinga ndala Yesu yali alechesianga, Abafarisayo nende abechesi ba amalaka ka Musa okhurula buli mu esirekere sia Kalilaya, Yutea nende Yerusalemu boosi baliho. Obunyali bwa Omwami bwa okhuhonia abalwale bwa mulikho. 18 Abandu barela omundu wafwokoya nebamuchingile khusisielo bakhaka okhumuyila munju kho bamure yimbeli wa Yesu. 19 Lwa batakha yinjila sikila lituuli liali likali, banina khulusuli basaambula kho bamwikhisia akarikari wa abandu, yimbeli wa Yesu. 20 Lwa Yesu yalengela khuli lisubila liabo liali likali, wasunga ari, “Musaale wanje, obwoni bubwo bubeleelwe.”
21 Abafarisayo nende abechesi ba amalaka ka Musa barakikha okhupaara bari, “Mundu sina wuno wulanyekanga Wele? Abulaho hunyala okhubeela abandu obwoni yilali Wele yeng'ene!”
22 Yesu wamanya ke bali nebalaparanga, wabareba ari, “Sina sikila enywe nemupaara amakhuwa kano mumioyo kienyu? 23 Sindu sina esiangu okhukhola; okhusunga ori, ‘Obwoni bubwo bubeleelwe,’ naho okhusunga ori, ‘Sinjila ochende’? 24 Nebuchwa, endakhola mumanye muri omwana wa omundu wubeele nende obunyali bwa okhubela abandu obwoni.” Kho wasungila omundu wafwokoya ari, “Endakhusungilanga, buukha, bukula esisielo sisio oche yingo.” 25 Abwene na abwene omundu wulia wasinjila yimbeli waabo, wabukula esisieolo sisie wacha yingo nalafumianga Wele. 26 Abandu balia boosi bahuka, bafumia Wele ne liria nebasunga bari, “Bulaano khulengele amakhuwa ka okhuchenya.”
Yesu warobola Lawi
(Matayo 9:9-13; Mariko 2:13-17)
27 Neyakhamala, warula elwanyi walengela omusololi wa emirulo bari Lawi, wikhale abundu wa okhusolola emirulo. Wamusungila ari, “Nondekho.” 28 Naye walekha buli esindu wabuukha wamulondakho.
29 Kho Lawi wamukholela yikhoyo munju mumwe, lituuli lia abasololi bemirulo nende abandu bandi bali bekhale halala ninabo nibalia. 30 Abafarisayo nende abechesi ba amalako beng'ulung'unyila abalondi ba Yesu bari, “Sina sikila enywe namulia nende okhunywa na abasololi ba emirulo nende aboni?” 31 Yesu wabakalusia wasunga ari, “Balia bali abalamu sebenya omusilikhi ta, yilali abalwale nibo beenya omusilikhi. 32 Esie sinayecha okhulaanga baparaanga bari babeele abalungi ta, yilali bamanyile bari babeele aboni kho bekanile.”
Lireebo lia okhwiyima esiakhulia
(Matayo 9:14-17; Mariko 2:18-22)
33 Bamusungila bari, “Abalondi ba Yohana beyimananga esiakhulia buli khase ne basaya, abalondi ba Abafarisayo boosi. Nebuchwa abalondi baabo balichanga buchwa nebanywa buli khase.” 34 Yesu wabasungila ari, “Munyala mwakhola abacheni ba esiselelo baalekha okhulia nibasiili nende omusacha mwene esiselelo? 35 Yinyinga ya omusacha mwene esiselelo akharusibweho, bakharakikhe okhwiyimana esiakhulia.”
36 Khandi wabasungila epimbi yino ari, “Abulaho wunyala okhurandula esilaka khu ngubo yimbia wanabila khu ngubo yikhale ta. Nakhola ario alaba wurandule yingubo yimbia, khandi esilaka silia sesilafwanana nende yingubo yikhale ta. 37 Khandi abulaho wunyala wachukha yindali yindoro mu (omufuko kwa lisielo kwa okhuchingilamo yindali/yindayi) ta. Nakhola ario yindali yindoro yilafwimba yirandule omufuko kulia mani yichichukhe, na aba omufuko kulia kulononokha. 38 Nebuchwa yindali yindoro yichukhwangwa mu mumufuko omuya. 39 Khandi abulaho wunywechanga yindali yiyiile mani yekomba yindoro ta, asunganga ari, ‘Yindali yiyile ne yindayi.’ ”