𖼂𖽡 𖼖𖽔𖾐 𖼍𖽙𖾐 𖼽𖽺𖾐 𖼺𖽪𖾐 𖼊𖽑𖽺 𖼳𖽶 𖼊𖽻 𖼐𖽙𖾐 ( 𖼊𖽑𖽹𖾑 27：1-2，11-14；𖼞𖽑𖽜 11：1-5；𖼽𖽱𖾐 18：28-38 )
23
1 𖼷𖽑𖽻𖾐 𖼷𖽪𖾐 𖼍𖽪𖾐 𖼖𖽻𖾐，𖼽𖽺𖾐 𖼺𖽪𖾐 𖼊𖽑𖽺 𖼵𖽪𖾐 𖼂𖽡𖾐 𖼽𖽡𖾐 𖼂𖽡 𖼖𖽔𖾐 𖼍𖽙𖾐 𖼷𖽶 𖼄𖽻 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽡𖾐， 2 𖼽𖽻 𖼊𖽑𖽺 𖼍𖽶𖾐 𖼀𖽦𖾐：“𖼣𖽙𖾐 𖼈𖽳𖾐 𖼐𖽦𖾐 𖼄𖽡𖽻𖾐，𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼣𖽙𖾐 𖼈𖽳𖾐 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼇𖽪 𖼀𖽑𖽧𖾐，𖼣𖽙𖾐 𖼈𖽳𖾐 𖼞𖽜 𖼳𖽚𖾐 𖼳𖽕𖾐 𖼞𖽑𖽺 𖼺𖽔 𖼊𖽑𖽺 𖽂𖽙𖾐 𖼞𖽜 𖼄𖽔 𖼊𖽙𖾐，𖼦𖽑𖽔𖾐 𖼖𖽺𖾑 𖼽𖽻 𖼄𖽳𖾑 𖼞𖽚 𖼰𖽡𖾐 𖼍𖽮 𖼣𖽻𖾐、 𖼈𖽪𖾐 𖼍𖽦 𖼣𖽻𖾐 𖼀𖽦𖾐．”3 𖼂𖽡 𖼖𖽔𖾐 𖼍𖽙𖾐 𖼽𖽻 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼽𖽚 𖼊𖽑𖽹𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼣𖽻𖾐 𖼖𖽔？”
𖼽𖽺𖾐 𖼺𖽪𖾐 𖼊𖽻 𖼞𖽑𖽚：“𖼦𖽑𖽺𖾑 𖼐𖽑𖽡𖾐 𖼀𖽦𖾐 𖼺𖽪𖾐 𖼣𖽻𖾐．”
4 𖼠𖽙𖾑 𖼍𖽻𖾐，𖼂𖽡 𖼖𖽔𖾐 𖼍𖽙𖾐 𖼀𖽑𖽚𖾐 𖼍𖽡𖾐 𖼄𖽻 𖼈𖽪𖾑 𖼐𖽺𖾐 𖼷𖽑𖽻𖾐 𖼷𖽪𖾐 𖼖𖽙𖾐 𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼊𖽑𖽺 𖼽𖽺𖾐 𖼮𖽑𖽡𖽪𖾑 𖼊𖽑𖽡 𖼳𖽶 𖼖𖽺𖾑 𖼣𖽙𖾐 𖼮𖽕𖾐 𖼊𖽑𖽧 𖼄𖽔 𖼖𖽻𖾐．”
5 𖼦𖽑𖽻𖾐 𖼊𖽑𖽻𖾐，𖼽𖽻 𖼈𖽳𖾐 𖼠𖽳𖾐 𖼠𖽳𖾐 𖽂𖽙 𖼊𖽑𖽧 𖼄𖽙𖾐 𖼀𖽦𖾐：“𖼽𖽻 𖼽𖽚 𖼊𖽑𖽦𖾑 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼷𖽑𖽻𖾐 𖼊𖽑𖽺 𖼀𖽦𖾐 𖼄𖽪𖾑，𖼷𖽑𖽻𖾐 𖼀𖽺 𖼊𖽑𖽺 𖼇𖽪 𖼀𖽑𖽧𖾐，𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽑𖽺𖾑 𖼠𖽻𖾐 𖼮𖽑𖽡𖾐 𖼖𖽻𖾐．”
𖼳𖽡𖾐 𖼖𖽲𖾑 𖼽𖽺𖾐 𖼺𖽪𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐
6 𖼂𖽡 𖼖𖽔𖾐 𖼍𖽙𖾐 𖼊𖽻 𖼮𖽨 𖼦𖽑𖽻𖾐 𖼺𖽺𖾑，𖼊𖽻 𖼐𖽙𖾐：“𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼰𖽡𖽔𖾐 𖼖𖽡𖾑 𖼖𖽡𖾑 𖼺𖽪𖾐 𖼷𖽑𖽻𖾐 𖼣𖽻𖾐 𖼐𖽺𖾑 𖼄𖽔 𖼣𖽻𖾐？” 7 𖼂𖽡 𖼖𖽔𖾐 𖼍𖽙𖾐 𖼺𖽝𖾑，𖼽𖽺𖾐 𖼺𖽪𖾐 𖼦𖽑𖽺𖾑 𖼳𖽡𖾐 𖼖𖽲𖾑 𖼖𖽦 𖼮𖽡𖽺𖾐 𖼞𖽑𖽶𖾐 𖼊𖽴 𖼺𖽪𖾐 𖼷𖽑𖽻𖾐 𖼣𖽻𖾐．𖽃𖽔𖾐 𖼺𖽺𖾑，𖼽𖽺𖾐 𖼺𖽪𖾐 𖼊𖽑𖽺 𖼦𖽑𖽙𖾐 𖼳𖽡𖾐 𖼖𖽲𖾑 𖼊𖽑𖽺 𖼞𖽜．𖼞𖽑𖽶𖾑 𖼮𖽶𖾐，𖼳𖽡𖾐 𖼖𖽲𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽻𖾐 𖼷𖽻 𖼷𖽶𖾐．
8 𖼳𖽡𖾐 𖼖𖽲𖾑 𖼽𖽺𖾐 𖼺𖽪𖾐 𖼊𖽑𖽺 𖼐𖽦𖾐 𖼄𖽡𖽻𖾐，𖼦𖽑𖽔𖾐 𖼮𖽶𖾐 𖼖𖽺𖾑．𖼞𖽪𖾐 𖼮𖽡𖽺𖾐，𖼽𖽻 𖼽𖽺𖾐 𖼺𖽪𖾐 𖼞𖽳𖾐 𖼄𖽡𖽻 𖼊𖽻 𖼮𖽨 𖼠𖽚，𖽃𖽙𖾑 𖼄𖽺 𖼊𖽑𖽙 𖼹𖽦𖾐 𖼽𖽻 𖼊𖽑𖽺 𖼄𖽡𖽻𖾐 𖼊𖽡 𖼮𖽑𖽻，𖼦𖽑𖽔𖾐 𖼖𖽺𖾑 𖼽𖽻 𖼞𖽜 𖼺𖽡𖾐 𖼂𖽺𖾐 𖼊𖽪𖾐 𖼊𖽑𖽡 𖼊𖽝𖾐 𖼂𖽺𖾐 𖼐𖽦𖾐 𖼖𖽙𖾐 𖼳𖽡𖽻𖾐． 9 𖽃𖽔𖾐 𖼺𖽺𖾑，𖼽𖽻 𖼽𖽺𖾐 𖼺𖽪𖾐 𖼊𖽑𖽺 𖼊𖽻 𖼂𖽪𖾑 𖼞𖽑𖽙 𖼄𖽙𖾐 𖼊𖽻 𖼐𖽙𖾐 𖼦𖽑𖽙𖾐．𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼺𖽪𖾐 𖼊𖽑𖽡 𖼮𖽑𖽡𖽺 𖼖𖽺𖾑 𖼊𖽻 𖼄𖽔 𖼞𖽑𖽚． 10 𖼍𖽡𖾐 𖼄𖽻 𖼈𖽪𖾑 𖼐𖽺𖾐 𖼺𖽪𖾑 𖼷𖽑𖽺𖾐 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼦𖽑𖽡𖽚 𖼍𖽳𖾐，𖼠𖽳𖾐 𖼠𖽳𖾐 𖽂𖽙 𖼊𖽑𖽧 𖼄𖽙𖾐 𖼽𖽻 𖼊𖽑𖽺 𖼍𖽶𖾐． 11 𖼳𖽡𖾐 𖼖𖽲𖾑 𖼐𖽺𖾐 𖼽𖽻 𖼄𖽦 𖼀𖽑𖽙 𖼖𖽺𖾑 𖼽𖽺𖾐 𖼺𖽪𖾐 𖼊𖽑𖽺 𖼐𖽦𖾐 𖼄𖽔 𖼍𖽪𖾐，𖼽𖽻 𖼊𖽑𖽺 𖼮𖽑𖽡𖾐 𖼻𖽸，𖼈𖽡𖾑 𖼂𖽚𖾑 𖼀𖽑𖽡𖽻𖾐 𖼽𖽻 𖼞𖽜 𖼈𖽦 𖼍𖽪𖾐，𖼽𖽻 𖼊𖽑𖽺 𖼦𖽑𖽙𖾐 𖼀𖽑𖽚𖾐 𖼂𖽡 𖼖𖽔𖾐 𖼍𖽙𖾐 𖼞𖽳𖾐 𖼞𖽚 𖼽𖽡𖾐． 12 𖽃𖽙𖾑 𖼄𖽺 𖼊𖽑𖽙 𖼳𖽡𖾐 𖼖𖽲𖾑 𖼐𖽺𖾐 𖼂𖽡 𖼖𖽔𖾐 𖼍𖽙𖾐 𖼷𖽙𖾐 𖼖𖽙𖾐 𖼮𖽡𖾐 𖼂𖽦𖾐 𖼣𖽻𖾐 𖼊𖽑𖽻𖾐，𖼦𖽑𖽔𖾐 𖼖𖽺𖾑 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽻𖾐 𖼍𖽪𖾐 𖼞𖽙𖾐 𖼮𖽑𖽻 𖼀𖽑𖽢 𖼦𖽑𖽻𖾐．
𖼽𖽺𖾐 𖼺𖽪𖾐 𖼊𖽑𖽺 𖼰𖽡𖽻𖾐 𖼷𖽑𖽻𖾐 𖼀𖽺 𖼞𖽜 𖼦𖽑𖽙𖾐 ( 𖼊𖽑𖽹𖾑 27：15-26；𖼞𖽑𖽜 15：6-15；𖼽𖽱𖾐 18：39-19：16 )
13 𖼂𖽡 𖼖𖽔𖾐 𖼍𖽙𖾐 𖼹𖽦𖾑 𖼊𖽑𖽡 𖼂𖽦𖾑 𖼍𖽡𖾐 𖼄𖽻 𖼈𖽪𖾑、 𖼷𖽶 𖼄𖽻 𖼐𖽺𖾐 𖼷𖽑𖽻𖾐 𖼀𖽺 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐， 14 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼊𖽑𖽺 𖼵𖽪𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼮𖽑𖽡𖾐 𖼖𖽻𖾐，𖼐𖽑𖽡𖾐 𖼈𖽳𖾐 𖼀𖽦𖾐 𖼽𖽻 𖼷𖽑𖽻𖾐 𖼀𖽺 𖼊𖽑𖽺 𖼇𖽪 𖼀𖽑𖽧𖾐．𖼣𖽙𖾐 𖼐𖽑𖽡𖾐 𖼈𖽳𖾐 𖼄𖽦𖾐 𖼊𖽪 𖼮𖽑𖽡𖽺 𖼄𖽙𖾐 𖼽𖽻 𖼊𖽑𖽺 𖼳𖽶 𖼊𖽻 𖼐𖽙𖾐 𖼠𖽚，𖼐𖽑𖽡𖾐 𖼈𖽳𖾐 𖼽𖽻 𖼊𖽑𖽺 𖼞𖽑𖽙𖾐 𖼍𖽶𖾐 𖼺𖽪𖾐 𖼽𖽺𖾐 𖼮𖽑𖽡𖽪𖾑 𖼣𖽙𖾐 𖼊𖽑𖽡 𖼳𖽶 𖼖𖽺𖾑 𖼮𖽕𖾐 𖼊𖽑𖽧 𖼄𖽔 𖼖𖽻𖾐． 15 𖼳𖽡𖾐 𖼖𖽲𖾑 𖼖𖽺𖾑 𖼮𖽕𖾐 𖼊𖽑𖽧 𖼄𖽔 𖼖𖽻𖾐 𖼺𖽺𖾑，𖼽𖽻 𖼊𖽑𖽺 𖼦𖽑𖽙𖾐 𖼀𖽑𖽚𖾐 𖼣𖽙𖾐 𖼞𖽳𖾐 𖼞𖽚 𖼖𖽻𖾐．𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽻 𖼳𖽶𖾐 𖼷𖽻 𖼞𖽳𖾐 𖼄𖽡𖽻 𖼂𖽺𖾐 𖼄𖽔 𖼠𖽚 𖼞𖽑𖽶𖾑 𖼺𖽝𖾑 𖼊𖽙𖾐． 16 𖽃𖽔𖾐 𖼺𖽺𖾑，𖼣𖽙𖾐 𖼽𖽻 𖼊𖽑𖽺 𖼊𖽝 𖼦𖽑𖽻𖾐 𖼠𖽙𖾑 𖼍𖽻𖾐，𖼽𖽻 𖼊𖽑𖽺 𖼀𖽑𖽨 𖼦𖽑𖽙𖾐 𖼊𖽻𖾐．” 17 𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼞𖽑𖽙𖾐 𖼷𖽻 𖼞𖽑𖽶𖾑 𖼮𖽶𖾐，𖼂𖽡 𖼖𖽔𖾐 𖼍𖽙𖾐 𖽃𖽙𖾑 𖼄𖽺 𖼊𖽑𖽙 𖼖𖽙𖾐 𖼺𖽶𖾑 𖼰𖽡𖽻𖾐 𖼦𖽑𖽺𖾐 𖼞𖽶𖾐 𖼺𖽪𖾐 𖼊𖽑𖽡 𖼽𖽚𖾐 𖼊𖽑𖽺 𖼀𖽑𖽨 𖼽𖽻 𖼈𖽳𖾐 𖼞𖽜 𖼖𖽡𖾐．
18 𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼷𖽪𖾐 𖼊𖽑𖽡 𖼊𖽑𖽜 𖽃𖽶𖾐 𖼮𖽸 𖼍𖽪𖾐 𖼖𖽻𖾐 𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼊𖽑𖽺 𖼺𖽦 𖼦𖽑𖽙𖾐 𖼖𖽡𖾐，𖼂𖽔𖾐 𖼖𖽔𖾐 𖼂𖽔𖾐 𖼊𖽑𖽺 𖼀𖽑𖽨 𖼣𖽙𖾐 𖼈𖽳𖾐 𖼞𖽜 𖼖𖽻𖾐！” 19 𖼂𖽔𖾐 𖼖𖽔𖾐 𖼂𖽔𖾐 𖼦𖽑𖽺𖾑 𖼖𖽪𖾐 𖼠𖽻𖾐 𖼞𖽑𖽶𖾐 𖼀𖽑𖽚𖾐 𖼊𖽦 𖼐𖽺𖾐 𖼷𖽑𖽻𖾐 𖼺𖽦 𖼺𖽺𖾑，𖼰𖽡𖽻𖾐 𖼦𖽑𖽺𖾐 𖼞𖽶𖾐 𖼄𖽳𖾐 𖼺𖽪𖾐 𖼣𖽻𖾐． 20 𖼂𖽡 𖼖𖽔𖾐 𖼍𖽙𖾐 𖼽𖽺𖾐 𖼺𖽪𖾐 𖼊𖽑𖽺 𖼀𖽑𖽨 𖼦𖽑𖽙𖾐 𖼐𖽑𖽧𖾐 𖼺𖽳 𖼺𖽺𖾑，𖼹𖽦𖾑 𖼊𖽑𖽡 𖼂𖽦𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐 𖼀𖽑𖽪𖾐． 21 𖼞𖽚 𖼀𖽑𖽚𖾐 𖼽𖽻 𖼈𖽳𖾐 𖼮𖽑𖽡𖽪 𖼈𖽳 𖼄𖽙𖾐 𖽃𖽶𖾐 𖼍𖽪𖾐 𖼖𖽻𖾐 𖼀𖽦𖾐：“𖼽𖽻 𖼊𖽑𖽺 𖼳𖽳𖾑 𖼺𖽧𖾐 𖼳𖽡𖽦𖾑 𖼍𖽡！ 𖼽𖽻 𖼊𖽑𖽺 𖼳𖽳𖾑 𖼺𖽧𖾐 𖼳𖽡𖽦𖾑 𖼍𖽡！”
22 𖼂𖽡𖾐 𖼖𖽔𖾐 𖼍𖽙𖾐 𖼺𖽙𖾐 𖼂𖽦𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖼽𖽚𖾐 𖽃𖽔 𖼊𖽺𖾑 𖼳𖽶 𖼊𖽶𖾐 𖼄𖽡𖽻 𖼂𖽺𖾐 𖼠𖽚 𖼐𖽺𖾑？𖼣𖽙𖾐 𖼽𖽻 𖼊𖽑𖽺 𖼳𖽶𖾐 𖼷𖽻 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽑𖽡 𖼳𖽶 𖼖𖽺𖾑 𖼮𖽕𖾐 𖼊𖽑𖽧 𖼄𖽔 𖼖𖽻𖾐．𖽃𖽔𖾐 𖼺𖽺𖾑，𖼣𖽙𖾐 𖼽𖽻 𖼊𖽑𖽺 𖼊𖽝 𖼦𖽑𖽻𖾐 𖼠𖽙𖾑 𖼍𖽻𖾐，𖼽𖽻 𖼊𖽑𖽺 𖼀𖽑𖽨 𖼦𖽑𖽙𖾐 𖼊𖽻𖾐．”
23 𖼦𖽑𖽻𖾐 𖼊𖽑𖽻𖾐，𖼽𖽻 𖼈𖽳𖾐 𖼠𖽳𖾐 𖼠𖽳𖾐 𖼮𖽑𖽡𖽪 𖼈𖽳 𖼄𖽙𖾐 𖼂𖽡 𖼖𖽔𖾐 𖼍𖽙𖾐 𖼊𖽑𖽺 𖼮𖽑𖽻，𖼽𖽻 𖼞𖽜 𖼽𖽺𖾐 𖼺𖽪𖾐 𖼊𖽑𖽺 𖼳𖽳𖾑 𖼺𖽧𖾐 𖼳𖽡𖽦𖾑 𖼍𖽡 𖼖𖽡𖾐．𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽻 𖼈𖽳𖾐 𖼞𖽳𖾐 𖼮𖽑𖽡𖽪 𖼀𖽺𖾐 𖽂𖽙 𖼊𖽙𖾐 𖼦𖽑𖽻𖾐． 24 𖽃𖽔𖾐 𖼺𖽺𖾑，𖼂𖽡 𖼖𖽔𖾐 𖼍𖽙𖾐 𖼽𖽻 𖼈𖽳𖾐 𖼞𖽑𖽙𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼍𖽧𖾑 𖼷𖽑𖽦𖾐 𖼦𖽑𖽙𖾐， 25 𖼽𖽻 𖼈𖽳𖾐 𖼞𖽑𖽙𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼞𖽑𖽻𖾑 𖼀𖽑𖽚𖾐 𖼊𖽦 𖼐𖽺𖾐 𖼷𖽑𖽻𖾐 𖼺𖽦 𖼺𖽺𖾑，𖼰𖽡𖽻𖾐 𖼦𖽑𖽺𖾐 𖼞𖽶𖾐 𖼄𖽳𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼀𖽑𖽨 𖼦𖽑𖽙𖾐，𖼞𖽚 𖼀𖽑𖽚𖾐 𖼽𖽺𖾐 𖼺𖽪𖾐 𖼊𖽑𖽺 𖼰𖽡𖽻𖾐 𖼽𖽻 𖼈𖽳𖾐 𖼄𖽻𖾑，𖼽𖽻 𖼈𖽳𖾐 𖼞𖽜 𖼽𖽻 𖼈𖽳𖾐 𖼐𖽑𖽧𖾐 𖼺𖽳 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐．
𖼽𖽺𖾐 𖼺𖽪𖾐 𖼊𖽑𖽺 𖼳𖽳𖾑 𖼺𖽧𖾐 𖼳𖽡𖽦𖾑 𖼍𖽡 ( 𖼊𖽑𖽹𖾑 27：33-44；𖼞𖽑𖽜 15：21 -32；𖼽𖽱𖾐19 ：17-24 )
26 𖼄𖽦 𖼀𖽑𖽙 𖼽𖽺𖾐 𖼺𖽪𖾐 𖼊𖽑𖽺 𖼦𖽳 𖼊𖽑𖽧 𖼽𖽡𖾐 𖼞𖽑𖽶𖾑 𖼮𖽶𖾐，𖼠𖽪 𖼖𖽡𖾑 𖼐𖽦𖾑 𖼺𖽪𖾐 𖼷𖽑𖽻𖾐 𖼳𖽡𖾐 𖼄𖽴 𖼮𖽑𖽡𖽦𖾐 𖼠𖽻𖾐 𖼮𖽑𖽻𖾐 𖼖𖽻𖾐，𖼽𖽻 𖼈𖽳𖾐 𖼽𖽻 𖼊𖽑𖽺 𖼵𖽪𖾐 𖼍𖽡，𖼺𖽧𖾐 𖼳𖽡𖽦𖾑 𖼀𖽑𖽨 𖼽𖽻 𖼞𖽶𖾐 𖼮𖽑𖽶 𖼊𖽑𖽺 𖼍𖽦𖾐，𖼽𖽻 𖼞𖽜 𖼀𖽶 𖼺𖽺𖾑，𖼽𖽺𖾐 𖼺𖽪𖾐 𖼠𖽙𖾑 𖼍𖽻𖾐 𖼮𖽑𖽻𖾐． 27 𖼷𖽑𖽻𖾐 𖼊𖽑𖽡 𖼷𖽪𖾐 𖼄𖽙𖾐 𖼽𖽺𖾐 𖼺𖽪𖾐 𖼠𖽙𖾑 𖼍𖽻𖾐 𖼮𖽑𖽻𖾐，𖼠𖽻𖾐 𖼞𖽑𖽶𖾐 𖼞𖽳𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼊𖽑𖽡 𖼹𖽻𖾐 𖼽𖽻 𖼖𖽙𖾐 𖼀𖽙𖾐 𖼐𖽑𖽧𖾐 𖼮𖽑𖽸 𖼣𖽶𖾐 𖼦𖽑𖽡𖽻𖾐． 28 𖼽𖽺𖾐 𖼺𖽪𖾐 𖼰𖽻𖾐 𖼀𖽑𖽚𖾐 𖼞𖽚 𖼖𖽻𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼻𖽙 𖼄𖽳 𖽃𖽔𖾐！ 𖼣𖽙𖾐 𖼖𖽙𖾐 𖼀𖽙𖾐 𖼣𖽶𖾐 𖼄𖽔 𖼻𖽻𖾐，𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼻𖽙 𖼄𖽡𖾐 𖼐𖽜𖾐 𖼖𖽙𖾐 𖼀𖽙𖾐 𖼣𖽶𖾐 𖼖𖽡𖾐． 29 𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼖𖽻𖾐 𖼮𖽻𖾐，𖼷𖽑𖽻𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼀𖽦𖾐 𖼊𖽻𖾐：‘ 𖼻𖽙 𖼄𖽡𖾐 𖼐𖽜𖾐 𖼄𖽔 𖼽𖽚𖾐 𖼺𖽪𖾐，𖼄𖽺 𖼊𖽦𖾐 𖼄𖽔 𖼠𖽚 𖼺𖽪𖾐 𖼐𖽺𖾐 𖽃𖽔𖾐 𖼞𖽶𖾑 𖼊𖽑𖽺 𖼀𖽕𖾑 𖼮𖽸𖾐 𖼍𖽻𖾐 𖼄𖽔 𖼠𖽚 𖼺𖽪𖾐 𖼄𖽢 𖼮𖽻𖾐 𖼦𖽑𖽻𖾐．’ 30 𖼞𖽑𖽶𖾑 𖼮𖽶𖾐 𖼮𖽑𖽡𖾐，𖼷𖽑𖽻𖾐 𖽂𖽙 𖼰𖽡𖽺𖾐 𖼄𖽙𖾐 𖼊𖽑𖽺 𖼀𖽦𖾐 𖼊𖽻𖾐：‘ 𖼀𖽜 𖼣𖽙𖾐 𖼈𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖼹𖽺𖾐 𖼖𖽻𖾐 𖼞𖽜！’ 𖽂𖽙 𖼰𖽡𖽺𖾐 𖼻𖽙 𖼊𖽑𖽺 𖼖𖽺𖾑 𖼀𖽦𖾐 𖼊𖽻𖾐：‘ 𖼣𖽙𖾐 𖼈𖽳𖾐 𖼊𖽑𖽺 𖼂𖽡𖾑 𖼍𖽡 𖼞𖽜！’ 31 𖼺𖽧𖾐 𖼠𖽙𖾑 𖼊𖽑𖽺 𖼖𖽺𖾑 𖼽𖽻 𖼈𖽳𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼺𖽪𖾐 𖼣𖽻𖾐，𖽃𖽔𖾑 𖼞𖽶𖾐 𖼺𖽧𖾐 𖼳𖽶𖾐 𖼊𖽑𖽺 𖼠𖽳𖾐 𖼖𖽳𖾐 𖼺𖽺𖾑，𖼽𖽻 𖼈𖽳𖾐 𖽃𖽔 𖼊𖽺𖾐 𖼂𖽺𖾐 𖼊𖽻𖾐 𖼐𖽺𖾑？”
32 𖼽𖽻 𖼈𖽳𖾐 𖼠𖽳𖾐 𖼖𖽪𖾐 𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼐𖽑𖽡 𖼽𖽚𖾐 𖼦𖽳 𖼂𖽻𖾐 𖼖𖽻𖾐，𖼽𖽺𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼳𖽳𖾑 𖼳𖽶𖾐 𖼊𖽻𖾐． 33 𖼽𖽻 𖼈𖽳𖾐 𖼄𖽡𖾐 𖼊𖽺𖾐 𖼊𖽑𖽡 𖼄𖽦𖾐 𖼞𖽳𖾐 𖼮𖽑𖽡𖾐，𖼞𖽑𖽶𖾑 𖼄𖽦𖾐 𖼊𖽑𖽺 𖼈𖽪𖾑 𖼠𖽴𖾐 𖼖𖽴𖾐 𖼄𖽡𖾐 𖼊𖽺𖾐 𖽃𖽶𖾐．𖽃𖽔𖾐 𖼺𖽺𖾑，𖼽𖽺𖾐 𖼺𖽪𖾐 𖼊𖽑𖽺 𖼳𖽳𖾑 𖼺𖽧𖾐 𖼳𖽡𖽦𖾑 𖼍𖽡，𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼊𖽑𖽺 𖼖𖽺𖾑 𖼳𖽳𖾑 𖼍𖽡 𖼦𖽑𖽙𖾐，𖼊𖽑𖽡 𖼽𖽚𖾐 𖼽𖽙𖾐 𖼀𖽳 𖼮𖽻𖾐，𖼊𖽑𖽡 𖼽𖽚𖾐 𖼈𖽳𖾑 𖼀𖽳 𖼮𖽻𖾐．
34 𖼞𖽑𖽶𖾑 𖼮𖽶𖾐，𖼽𖽺𖾐 𖼺𖽪𖾐 𖼀𖽦𖾐：“𖽃𖽔 𖼀𖽙 𖽃𖽔𖾐！ 𖼽𖽻 𖼈𖽳𖾐 𖼊𖽑𖽺 𖼽𖽺𖾐 𖼮𖽑𖽡𖽪𖾑 𖼄𖽡𖽺 𖼞𖽜．𖼞𖽪𖾐 𖼮𖽡𖽺𖾐，𖼽𖽻 𖼈𖽳𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼽𖽻 𖼈𖽳𖾐 𖼄𖽔 𖼺𖽝𖾑．” 𖼄𖽦 𖼀𖽑𖽙 𖼖𖽙𖾐 𖼵𖽪𖾐 𖼺𖽺𖾑，𖼽𖽻 𖼞𖽳𖾐 𖼀𖽑𖽡𖽻𖾐 𖼷𖽑𖽶 𖼊𖽑𖽺 𖼀𖽜𖾐 𖼦𖽑𖽙𖾐．
35 𖼷𖽑𖽻𖾐 𖼷𖽪𖾐 𖼞𖽑𖽶𖾑 𖼠𖽻𖾐 𖼦𖽑𖽡𖽚 𖼐𖽦𖾐．𖼷𖽶 𖼄𖽻 𖼞𖽑𖽶𖾑 𖼹𖽻𖾐 𖼽𖽻 𖼊𖽑𖽺 𖼈𖽳𖾐 𖼵𖽶𖾐 𖼀𖽦𖾐：“𖼽𖽻 𖼠𖽳𖾐 𖼖𖽪𖾐 𖼷𖽑𖽻𖾐 𖼊𖽑𖽺 𖼰𖽨𖾑 𖼠𖽚，𖼽𖽻 𖼰𖽡𖾐 𖼍𖽮 𖼣𖽻𖾐、 𖽂𖽙 𖼺𖽙𖾐 𖼂𖽙𖾐 𖼞𖽑𖽙𖾐 𖼺𖽺𖾐 𖼄𖽳𖾐 𖼺𖽪𖾐 𖼣𖽻𖾐 𖼮𖽶𖾐 𖼊𖽑𖽡𖾑 𖼣𖽻𖾐，𖼽𖽻 𖼞𖽜 𖼽𖽻 𖼄𖽳𖾑 𖼞𖽚 𖼰𖽨𖾑 𖼍𖽳𖾐．” 36 𖼄𖽦 𖼀𖽑𖽙 𖼖𖽺𖾑 𖼽𖽻 𖼊𖽑𖽺 𖼮𖽑𖽡𖾐 𖼻𖽸，𖼽𖽻 𖽃𖽙 𖼄𖽺 𖼮𖽑𖽡𖽺 𖼽𖽡𖾐 𖼺𖽺𖾑，𖼮𖽶𖾐 𖼰𖽡𖽺𖾐 𖼈𖽡𖾐 𖼈𖽺𖾐 𖼽𖽻 𖼞𖽜 𖼊𖽻𖾐， 37 𖼀𖽦𖾐：“𖼐𖽑𖽡𖾐 𖼽𖽚 𖼊𖽑𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼣𖽻𖾐 𖼮𖽶𖾐 𖼊𖽑𖽡𖾑 𖼣𖽻𖾐，𖼽𖽻 𖼄𖽳𖾑 𖼞𖽚 𖼰𖽨𖾑 𖼄𖽺！” 38 𖼽𖽺𖾐 𖼺𖽪𖾐 𖼈𖽪𖾑 𖼊𖽡𖾐 𖼞𖽕 𖼂𖽻𖾑 𖼞𖽳𖾐 𖼺𖽧𖾐 𖼀𖽑𖽡 𖼊𖽑𖽡 𖼊𖽝𖾐 𖼊𖽑𖽦 𖼍𖽡 𖼈𖽝 𖼍𖽳𖾐 𖼀𖽦𖾐：“𖼦𖽑𖽺𖾑 𖼽𖽚 𖼊𖽑𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼣𖽻𖾐．”
39 𖼽𖽺𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼳𖽳𖾑 𖼺𖽪𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼠𖽻𖾐 𖼊𖽑𖽺 𖼞𖽳𖾐 𖼊𖽑𖽡 𖼽𖽚𖾐 𖼽𖽻 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼀𖽦𖾐：“𖼐𖽑𖽡𖾐 𖼰𖽡𖾐 𖼍𖽮 𖼄𖽔 𖼣𖽻𖾐 𖼖𖽔？𖼽𖽻 𖼄𖽳𖾑 𖼞𖽚 𖼐𖽺𖾐 𖼣𖽙𖾐 𖼈𖽳𖾐 𖼊𖽑𖽺 𖼰𖽨𖾑 𖼞𖽜 𖼄𖽺！”
40 𖼠𖽳𖾐 𖼖𖽪𖾐 𖼞𖽑𖽶𖾑 𖼽𖽚𖾐 𖼽𖽻 𖼮𖽑𖽻 𖼂𖽦𖾐 𖼊𖽑𖽺 𖼦𖽑𖽳𖾐 𖼀𖽦𖾐：“𖼐𖽑𖽡𖾐 𖼖𖽺𖾑 𖼊𖽑𖽡 𖼊𖽑𖽜 𖼠𖽻𖾐 𖼰𖽡𖽳𖾐 𖼷𖽶𖾐 𖼄𖽳𖾐 𖼺𖽪𖾐 𖼣𖽻𖾐 𖼺𖽺𖾑，𖼦𖽑𖽔𖾐 𖼖𖽺𖾑 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼄𖽔 𖼮𖽡𖽮𖾐 𖼺𖽺 𖼖𖽔？ 41 𖽃𖽔 𖼐𖽺𖾑 𖼠𖽻𖾐 𖼰𖽡𖽳𖾐 𖼷𖽶𖾐 𖼄𖽳𖾐 𖼷𖽻 𖼺𖽪𖾐 𖼣𖽻𖾐．𖼞𖽪𖾐 𖼮𖽡𖽺𖾐，𖽃𖽔 𖼐𖽺𖾑 𖼦𖽑𖽺𖾑 𖼽𖽻 𖼄𖽳𖾑 𖼰𖽙𖾐 𖼽𖽻 𖼄𖽳𖾑 𖽂𖽙𖾐 𖼺𖽪𖾐 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼍𖽺𖾑 𖼄𖽔 𖼹𖽳𖾐 𖼳𖽶 𖼄𖽡𖽻 𖼊𖽑𖽡 𖼳𖽶 𖼖𖽺𖾑 𖼂𖽺𖾐 𖼄𖽔 𖼠𖽚．” 42 𖼽𖽻 𖼀𖽑𖽚𖾐 𖼽𖽺𖾐 𖼺𖽪𖾐 𖼖𖽙𖾐 𖼀𖽦𖾐：“𖼽𖽺𖾐 𖼺𖽪𖾐 𖽃𖽔𖾐！ 𖼐𖽑𖽡𖾐 𖼈𖽪𖾐 𖼍𖽦 𖽂𖽙𖾐 𖼂𖽺𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼊𖽑𖽺 𖼦𖽙𖾑 𖼮𖽑𖽡 𖼞𖽜．”
43 𖼽𖽺𖾐 𖼺𖽪𖾐 𖼽𖽻 𖼖𖽙𖾐 𖼀𖽦𖾐：“𖼣𖽙𖾐 𖼠𖽕𖾐 𖼰𖽶𖾐 𖼀𖽦𖾐 𖼐𖽑𖽡𖾐 𖼖𖽙𖾐 𖼊𖽑𖽧，𖽃𖽙𖾑 𖼐𖽑𖽡𖾐 𖼹𖽦𖾐 𖼐𖽑𖽡𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼞𖽜𖾐 𖼺𖽜𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼞𖽑𖽶𖾐 𖽂𖽙𖾐 𖼮𖽻𖾐 𖼊𖽻𖾐．”
𖼽𖽺𖾐 𖼺𖽪𖾐 𖼳𖽶𖾐 𖼺𖽦 𖼷𖽑𖽦𖾐 (𖼊𖽑𖽹𖾑27：45-56；𖼞𖽑𖽜15：33-41 )
44 𖽃𖽔𖾑 𖼐𖽑𖽡 𖼞𖽪𖾐 𖽃𖽔 𖼖𖽙𖾐 𖼷𖽑𖽡𖾐 𖼐𖽑𖽡 𖼄𖽦𖾐 𖼊𖽑𖽙 𖼮𖽑𖽻𖾐 𖼺𖽙𖾐 𖼄𖽦𖾐 𖼊𖽑𖽙 𖼖𖽙𖾐 𖼮𖽑𖽡𖾐，𖽃𖽔𖾑 𖼄𖽶 𖼐𖽑𖽡𖾐 𖼐𖽦𖾑 𖼐𖽦𖾐 𖼀𖽑𖽢 𖼦𖽑𖽙𖾐 𖼺𖽺𖾑， 45 𖼄𖽶 𖼊𖽑𖽡 𖼊𖽺𖾐 𖼀𖽜𖾐 𖼄𖽔 𖼖𖽜𖾐 𖼦𖽑𖽻𖾐．𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼰𖽨𖾑 𖼍𖽻𖾑 𖼄𖽳𖾐 𖼖𖽺𖾑 𖼠𖽻𖾐 𖼊𖽑𖽺 𖼄𖽙𖾐 𖼞𖽕 𖼂𖽻𖾑 𖼮𖽑𖽻𖾐 𖼍𖽕𖾑 𖽂𖽚 𖼮𖽑𖽡𖾐，𖼳𖽝 𖼖𖽦𖾑 𖼐𖽑𖽡 𖼀𖽳 𖼀𖽑𖽢 𖼦𖽑𖽙𖾐． 46 𖼽𖽺𖾐 𖼺𖽪𖾐 𖼮𖽑𖽡𖽪 𖼈𖽳 𖼄𖽙𖾐 𖽃𖽶𖾐 𖼀𖽦𖾐：“𖽃𖽔 𖼀𖽙 𖽃𖽔𖾐！ 𖼣𖽙𖾐 𖼈𖽦𖾐 𖼳𖽨𖾐 𖼰𖽡𖽻𖾐 𖼺𖽺𖾑，𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐．” 𖼊𖽻 𖼂𖽪𖾑 𖼦𖽑𖽺𖾑 𖼊𖽑𖽜𖾐 𖼦𖽑𖽻𖾐，𖼖𖽜 𖼊𖽺𖾐 𖼺𖽦 𖼷𖽑𖽦𖾐 𖼦𖽑𖽙𖾐．
47 𖼦𖽑𖽙𖾐 𖼄𖽦 𖼈𖽪𖾑 𖼊𖽑𖽡 𖼽𖽚𖾐 𖼮𖽻𖾐，𖼽𖽻 𖼞𖽑𖽙𖾐 𖼀𖽑𖽢 𖼺𖽪𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳，𖼀𖽦𖾐：“𖼦𖽑𖽺𖾑 𖼠𖽕𖾐 𖼰𖽶𖾐 𖼷𖽑𖽻𖾐 𖼹𖽳𖾐 𖼊𖽑𖽡 𖼽𖽚𖾐 𖼣𖽻𖾐 𖼮𖽶𖾐．” 48 𖼻𖽶𖾑 𖼖𖽻𖾐 𖼄𖽡𖽻 𖼐𖽦𖾐 𖼺𖽪𖾐 𖼷𖽑𖽻𖾐 𖼷𖽪𖾐 𖼖𖽺𖾑 𖼞𖽑𖽙𖾐 𖼀𖽑𖽢 𖼺𖽪𖾐 𖼄𖽡𖽻 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼄𖽳𖾑 𖼄𖽳 𖼐𖽑𖽧𖾐 𖼄𖽙𖾐 𖼰𖽙𖾐 𖼊𖽝 𖼍𖽳𖾐 𖼞𖽚 𖼽𖽡𖾐 𖼦𖽑𖽙𖾐． 49 𖼽𖽺𖾐 𖼺𖽪𖾐 𖼊𖽑𖽺 𖼺𖽝𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼽𖽻 𖼠𖽙𖾑 𖼍𖽻𖾐 𖼄𖽳𖾐 𖼖𖽻𖾐 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐，𖼄𖽳𖾑 𖼄𖽳 𖼄𖽡𖾐 𖼈𖽡 𖼈𖽡 𖼦𖽑𖽡𖽚 𖼍𖽳𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼊𖽑𖽺 𖼐𖽦𖾐．
𖼽𖽺𖾐 𖼺𖽪𖾐 𖼊𖽑𖽺 𖼖𖽧 𖼀𖽳𖾐 𖼞𖽑𖽶𖾐 𖼍𖽡𖾑 ( 𖼊𖽑𖽹𖾑27：57-61；𖼞𖽑𖽜15 ：42-47；𖼽𖽱𖾐18：38-42 )
50 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐，𖼽𖽱𖾐 𖼺𖽴𖾑 𖼄𖽡𖾐，𖼽𖽻 𖼽𖽚 𖼊𖽑𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖽻 𖼷𖽜𖾐 𖼀𖽜𖾐 𖼺𖽪𖾐 𖼊𖽑𖽡 𖼽𖽚𖾐 𖼣𖽻𖾐，𖼐𖽑𖽧𖾐 𖼄𖽙𖾐 𖼹𖽳𖾐、 𖼀𖽳𖾐 𖼈𖽡𖾐 𖼮𖽻𖾐． 51 𖼽𖽻 𖼽𖽚 𖼊𖽑𖽦𖾑 𖼄𖽡𖾐 𖼊𖽺𖾐 𖼽𖽕𖾑 𖼖𖽡𖾑 𖼄𖽔 𖼊𖽑𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼣𖽻𖾐，𖼻𖽳𖾐 𖼻𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼊𖽑𖽺 𖼐𖽦𖾐 𖼳𖽡𖽻𖾐，𖼽𖽻 𖼷𖽑𖽻𖾐 𖼷𖽪𖾐 𖼣𖽝 𖼊𖽪𖾐、 𖼂𖽺𖾐 𖼊𖽪𖾐 𖼖𖽙𖾐 𖼄𖽔 𖼮𖽑𖽻𖾐． 52 𖼽𖽻 𖼽𖽡𖾐 𖼂𖽡 𖼖𖽔𖾐 𖼍𖽙𖾐 𖼊𖽑𖽺 𖼄𖽡𖽻𖾐 𖼺𖽺𖾑，𖼽𖽺𖾐 𖼺𖽪𖾐 𖼞𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖼦𖽙𖾐． 53 𖼽𖽻 𖼽𖽺𖾐 𖼺𖽪𖾐 𖼞𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖼀𖽑𖽡𖾐 𖼹𖽺𖾐 𖼖𖽻𖾐，𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼞𖽑𖽶𖾑 𖼳𖽶 𖼽𖽦 𖼄𖽳𖾐 𖼻𖽜 𖼖𖽧𖾐 𖼍𖽡，𖼀𖽑𖽨 𖼖𖽚𖾐 𖼄𖽙𖾐 𖼊𖽡𖾐 𖼊𖽑𖽺 𖼮𖽑𖽻𖾐 𖼊𖽑𖽪𖾐 𖼊𖽑𖽧 𖼖𖽻𖾐 𖼺𖽪𖾐 𖼖𖽧 𖼀𖽳𖾐 𖼞𖽑𖽶𖾐 𖼍𖽙𖾑，𖼖𖽧 𖼀𖽳𖾐 𖼳𖽸 𖼦𖽑𖽺𖾑 𖼷𖽑𖽻𖾐 𖼄𖽻𖾐 𖼍𖽡𖾑 𖼄𖽔 𖼠𖽚． 54 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼂𖽺𖾐 𖼳𖽡𖽻𖾐 𖼐𖽑𖽡𖾐 𖼣𖽻𖾐，𖼳𖽡𖽻𖾐 𖼐𖽑𖽡𖾐 𖼖𖽺𖾑 𖼮𖽑𖽡𖾐 𖼖𖽻𖾐 𖼮𖽻𖾐．
55 𖼻𖽙 𖼄𖽳 𖼄𖽡𖾐 𖼐𖽜𖾐 𖼊𖽑𖽡 𖼹𖽻𖾐 𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼽𖽺𖾐 𖼺𖽪𖾐 𖼠𖽙𖾑 𖼍𖽻𖾐 𖼖𖽻𖾐，𖼽𖽻 𖼈𖽳𖾐 𖼖𖽺𖾑 𖼽𖽱𖾐 𖼺𖽴𖾑 𖼠𖽙𖾑 𖼍𖽻𖾐 𖼄𖽳𖾐 𖼄𖽳𖾐 𖼽𖽡𖾐，𖼖𖽧 𖼀𖽳𖾐 𖼐𖽺𖾐 𖼽𖽺𖾐 𖼺𖽪𖾐 𖼞𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖽃𖽔 𖼊𖽺𖾐 𖼍𖽙𖾑 𖼺𖽪𖾐 𖼞𖽑𖽶𖾑 𖼐𖽦𖾐 𖼄𖽡𖽻𖾐 𖼦𖽑𖽻𖾐． 56 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼞𖽚 𖼽𖽡𖾐 𖼦𖽑𖽙𖾐，𖼳𖽡𖽻𖾐 𖼄𖽶𖾐 𖼐𖽺𖾐 𖼳𖽡𖽻𖾐 𖼷𖽑𖽳𖾐 𖼂𖽺𖾐 𖼳𖽡𖽻𖾐 𖼀𖽑𖽢．𖼳𖽡𖽻𖾐 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽻 𖼈𖽳𖾐 𖼷𖽑𖽦𖾐 𖼮𖽡𖽺𖾐 𖼖𖽙𖾐 𖼮𖽑𖽻𖾐 𖼳𖽡𖽻𖾐 𖼐𖽑𖽡𖾐 𖼳𖽪𖾐．