𖼽𖽺𖾐 𖼺𖽪𖾐 𖼊𖽑𖽺 𖼺𖽦 𖼖𖽡𖾐 𖼷𖽜𖾐 𖼀𖽜𖾐
22
1 𖼇𖽝𖾐 𖼄𖽶𖾐 𖼷𖽜𖾐 𖼐𖽑𖽡𖾐 𖼦𖽑𖽦 \fr 𖼐𖽳 𖼖𖽻𖾐， 2 𖼍𖽡𖾐 𖼄𖽻 𖼈𖽪𖾑 𖼐𖽺𖾐 𖼺𖽪𖾑 𖼷𖽑𖽺𖾐 𖼷𖽑𖽻𖾐 𖼷𖽙𖾐 𖼖𖽙𖾐 𖼷𖽜𖾐 𖼀𖽜𖾐，𖽃𖽔 𖼊𖽺𖾑 𖼳𖽶 𖼄𖽪𖾐 𖼊𖽪𖾐 𖼻𖽜 𖼺𖽺𖾑，𖼽𖽺𖾐 𖼺𖽪𖾐 𖼊𖽑𖽺 𖽂𖽙𖾐 𖼺𖽦 𖼦𖽑𖽙𖾐 𖼊𖽙𖾐．𖼞𖽪𖾐 𖼮𖽡𖽺𖾐，𖼽𖽻 𖼈𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼮𖽡𖽮𖾐．3 𖼹𖽡𖾐 𖼺𖽪𖾐 𖼷𖽑𖽡𖾐 𖼐𖽑𖽡 𖼽𖽚𖾐 𖼠𖽻𖾐 𖼊𖽑𖽺 𖼰𖽡𖽔𖾐 𖼖𖽲𖾑 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐，𖼽𖽚 𖼍𖽕𖾑 𖼄𖽡𖾐．𖼞𖽑𖽶𖾑 𖼮𖽶𖾐，𖼺𖽔 𖼍𖽗𖾑 𖼽𖽻 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼊𖽡 𖼽𖽡𖾐． 4 𖽃𖽔𖾐 𖼺𖽺𖾑，𖼽𖽻 𖼽𖽡𖾐 𖼍𖽡𖾐 𖼄𖽻 𖼈𖽪𖾑 𖼐𖽺𖾐 𖼺𖽡 𖼮𖽡𖾐 𖼦𖽑𖽺𖾐 𖼳𖽪𖾐 𖼺𖽪𖾐 𖼈𖽪𖾑 𖼷𖽪𖾐 𖼞𖽑𖽶𖾑 𖼹𖽻𖾐 𖼖𖽙𖾐 𖼮𖽑𖽻𖾐 𖼷𖽜𖾐 𖼀𖽜𖾐，𖽃𖽔 𖼊𖽺𖾐 𖼂𖽺𖾐 𖼺𖽺𖾑，𖼽𖽺𖾐 𖼺𖽪𖾐 𖼊𖽑𖽺 𖽂𖽙𖾐 𖼰𖽡𖽻𖾐 𖼽𖽻 𖼈𖽳𖾐 𖼊𖽑𖽺 𖼞𖽜 𖼊𖽙𖾐． 5 𖼽𖽻 𖼈𖽳𖾐 𖼦𖽑𖽔𖾐 𖼮𖽶𖾐 𖼖𖽺𖾑，𖼀𖽑𖽨𖾐 𖼽𖽻 𖼊𖽑𖽺 𖼞𖽜 𖼮𖽙𖾐 𖼷𖽜𖾐 𖼀𖽜𖾐 𖼀𖽑𖽢． 6 𖼽𖽚 𖼍𖽕𖾑 𖼽𖽻 𖼈𖽳𖾐 𖼊𖽑𖽺 𖽃𖽺 𖼦𖽑𖽙𖾐，𖼐𖽑𖽡𖾐 𖼦𖽑𖽦 𖼊𖽑𖽡 𖼊𖽝𖾐 𖼰𖽙𖾐 𖼺𖽺𖾑，𖼷𖽑𖽻𖾐 𖼷𖽪𖾐 𖼞𖽑𖽻𖾑 𖼄𖽔 𖼮𖽻𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼺𖽪𖾐 𖼊𖽑𖽺 𖼰𖽡𖽻𖾐 𖼽𖽻 𖼈𖽳𖾐 𖼊𖽑𖽺 𖼞𖽜 𖼊𖽻𖾐．
𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼞𖽳𖾐 𖼷𖽙 𖼊𖽪𖾐 𖼂𖽺𖾐 𖼳𖽡𖽻𖾐 ( 𖼊𖽑𖽹𖾑 26：17-19；𖼞𖽑𖽜14：12-16 )
7 𖼇𖽝𖾐 𖼄𖽶𖾐 𖼷𖽜𖾐 𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼖𖽻𖾐，𖼦𖽑𖽺𖾑 𖼊𖽑𖽡 𖼐𖽑𖽡𖾐 𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼞𖽳𖾐 𖼽𖽻𖾐 𖼻𖽙 𖼺𖽦 𖼖𖽡𖾐 𖼐𖽑𖽡𖾐 𖼦𖽑𖽦 𖼣𖽻𖾐． 8 𖼽𖽺𖾐 𖼺𖽪𖾐 𖼽𖽻 𖼷𖽻𖾐 𖼺𖽪𖾐 𖼂𖽡 𖼍𖽴 𖼐𖽺𖾐 𖼽𖽱𖾐 𖼦𖽕𖾑 𖼊𖽑𖽺 𖼹𖽡𖾐 𖼺𖽺𖾑，𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽡𖾐 𖽃𖽔 𖼐𖽺𖾑 𖼖𖽙𖾐 𖼀𖽙𖾐 𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼞𖽳𖾐 𖼷𖽙 𖼊𖽪𖾐 𖼂𖽺𖾐 𖼳𖽡𖽻𖾐，𖽃𖽔 𖼐𖽺𖾑 𖽂𖽙𖾐 𖼷𖽙 𖼊𖽙𖾐．”
9 𖼽𖽻 𖼈𖽳𖾐 𖼽𖽺𖾐 𖼺𖽪𖾐 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼣𖽙𖾐 𖼈𖽳𖾐 𖼞𖽜 𖽃𖽔 𖼊𖽺𖾑 𖼠𖽻𖾐 𖼂𖽺𖾐 𖼳𖽡𖽻𖾐 𖼽𖽡𖾐 𖼖𖽡𖾐 𖼐𖽺𖾑？”
10 𖼽𖽺𖾐 𖼺𖽪𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼖𖽪𖾐 𖼞𖽑𖽶𖾐 𖼮𖽑𖽡𖾐，𖼷𖽑𖽻𖾐 𖼊𖽑𖽡 𖼽𖽚𖾐 𖽃𖽔𖾐 𖼮𖽡𖽦𖾐 𖼊𖽑𖽡 𖼀𖽡𖽳𖾐 𖼈𖽺𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼷𖽶𖾐 𖼖𖽻𖾐 𖼊𖽻𖾐．𖼐𖽑𖽡𖾐 𖼈𖽳𖾐 𖼽𖽻 𖼠𖽙𖾑 𖼍𖽻𖾐 𖼮𖽑𖽻𖾐，𖼽𖽻 𖼞𖽑𖽙𖾐 𖼊𖽡 𖼽𖽡𖾐 𖼞𖽳𖾐 𖼦𖽑𖽺𖾐 𖼞𖽑𖽶𖾐 𖼽𖽡𖾐 𖼺𖽺𖾑， 11 𖼦𖽑𖽺𖾐 𖼺𖽡 𖼀𖽑𖽙 𖼖𖽙𖾐 𖼀𖽦𖾐 𖼖𖽡𖾐：‘ 𖼳𖽪𖾑 𖼰𖽪𖾐 𖼊𖽻 𖼐𖽙𖾐，𖼺𖽙𖾐 𖼈𖽡𖾐 𖼷𖽙 𖼊𖽻𖾐 𖼞𖽳𖾐 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼐𖽺𖾑？𖼽𖽻 𖼷𖽻𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼞𖽑𖽶𖾑 𖼠𖽻𖾐 𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼞𖽳𖾐 𖼷𖽙𖾐 𖽂𖽙𖾐 𖼷𖽙 𖼊𖽙𖾐．’ 12 𖼽𖽻 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼊𖽑𖽪 𖼄𖽪𖾑，𖼖𖽜𖾐 𖼊𖽑𖽺 𖼂𖽺𖾐 𖼹𖽳𖾐 𖼦𖽑𖽻𖾐 𖼞𖽳𖾐 𖼊𖽑𖽡 𖼠𖽢𖾐 𖼮𖽻𖾐，𖼐𖽑𖽡𖾐 𖼈𖽳𖾐 𖼞𖽑𖽶𖾑 𖼠𖽻𖾐 𖼻𖽦 𖼷𖽙𖾐 𖼂𖽺𖾐 𖼳𖽡𖽻𖾐 𖼖𖽡𖾐．” 13 𖼽𖽻 𖼈𖽳𖾐 𖼽𖽡𖾐 𖼦𖽑𖽙𖾐，𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼄𖽡𖽻 𖼞𖽑𖽶𖾑 𖼽𖽺𖾐 𖼺𖽪𖾐 𖼀𖽦𖾐 𖼖𖽙𖾐 𖼺𖽶𖾑 𖼦𖽑𖽻𖾐．𖽃𖽔𖾐 𖼺𖽺𖾑，𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼞𖽳𖾐 𖼷𖽙 𖼊𖽪𖾐 𖼂𖽺𖾐 𖼀𖽑𖽢 𖼦𖽑𖽻𖾐．
𖼺𖽡 𖼀𖽑𖽙 𖽃𖽔𖾑 𖼂𖽻𖾐 𖼣𖽕𖾑 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼍𖽙𖾑 ( 𖼊𖽑𖽹𖾑 26：20-24，26-29；𖼞𖽑𖽜14：17-21；𖼽𖽱𖾐13：21-30；𖼖𖽧 𖼊𖽑𖽡11：23-25 )
14 𖼄𖽶 𖼮𖽑𖽧 𖼻𖽦 𖼷𖽙 𖼞𖽑𖽶𖾑 𖼮𖽶𖾐，𖼽𖽺𖾐 𖼺𖽪𖾐 𖼐𖽺𖾐 𖼹𖽡𖾐 𖼺𖽪𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼷𖽙𖾐 𖼷𖽙． 15 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖼠𖽻𖾐 𖼰𖽡𖽳𖾐 𖼷𖽶𖾐 𖼄𖽳𖾐 𖽃𖽙𖾑 𖼄𖽺，𖼦𖽑𖽔𖾐 𖼮𖽶𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼞𖽳𖾐 𖼷𖽙𖾐 𖼷𖽙 𖼊𖽡 𖼮𖽑𖽻． 16 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼣𖽙𖾐 𖼠𖽙𖾑 𖼍𖽻𖾐 𖼷𖽑𖽜𖾑 𖼷𖽑𖽜𖾐 𖼻𖽦 𖼷𖽙𖾐 𖼦𖽑𖽺𖾑 𖼄𖽔 𖼷𖽙 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼠𖽻𖾐 𖼞𖽑𖽶𖾐 𖼻𖽦 𖽂𖽙𖾐 𖼷𖽙 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼖𖽙𖾐 𖼮𖽑𖽡𖾐 𖼊𖽻𖾐．”
17 𖼽𖽺𖾐 𖼺𖽪𖾐 𖼺𖽡𖾑 𖼷𖽶𖾐 𖼠𖽚 𖼖𖽻𖾐，𖼊𖽑𖽡 𖼞𖽔𖾐 𖼞𖽜 𖼦𖽑𖽻𖾐，𖼀𖽦𖾐：“𖼐𖽑𖽡𖾐 𖼈𖽳𖾐 𖼺𖽡𖾑 𖼦𖽑𖽺𖾑 𖼮𖽑𖽳 𖼺𖽺𖾑，𖼷𖽙𖾐 𖼖𖽙𖾐 𖼮𖽑𖽻𖾐 𖼀𖽜𖾐 𖼊𖽻𖾐 𖼖𖽡𖾐． 18 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖽃𖽙𖾑 𖼐𖽑𖽡𖾐 𖼮𖽑𖽻𖾐 𖼍𖽪𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼺𖽳 𖼖𖽳 𖼊𖽻𖾐 𖼈𖽡𖾐 𖼦𖽑𖽺𖾑 𖼄𖽔 𖼊𖽻𖾐 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼮𖽑𖽡𖾐 𖼖𖽻𖾐 𖼖𖽙𖾐 𖼳𖽡𖽻𖾐 𖼊𖽻𖾐．”
19 𖼽𖽻 𖼹𖽦𖾑 𖽃𖽔𖾑 𖼂𖽻𖾐 𖼈𖽺𖾐 𖼍𖽪𖾐 𖼖𖽻𖾐，𖼊𖽑𖽡 𖼞𖽔𖾐 𖼞𖽜 𖼦𖽑𖽻𖾐，𖼣𖽕𖾑 𖼀𖽳，𖼷𖽶𖾐 𖼽𖽻 𖼈𖽳𖾐 𖼊𖽑𖽺 𖼞𖽜，𖼀𖽦𖾐：“𖼦𖽑𖽺𖾑 𖼣𖽙𖾐 𖼞𖽶𖾐 𖼮𖽑𖽶 𖼣𖽻𖾐，𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼈𖽪𖾑 𖼠𖽻𖾐 𖼦𖽑𖽙𖾐．𖼣𖽙𖾐 𖼊𖽑𖽺 𖼊𖽡 𖼮𖽑𖽻 𖼦𖽙𖾑 𖼮𖽑𖽡 𖼖𖽡𖾐 𖼖𖽙𖾐 𖼀𖽙𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼖𖽺𖾑 𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐 𖼽𖽡𖾐 𖼖𖽡𖾐．”
20 𖼷𖽙𖾐 𖼷𖽙 𖼦𖽑𖽻𖾐 𖼠𖽙𖾑 𖼍𖽻𖾐，𖼽𖽻 𖼦𖽑𖽔𖾐 𖼖𖽺𖾑 𖼺𖽡𖾑 𖼮𖽑𖽳 𖼍𖽪𖾐 𖼖𖽻𖾐，𖼀𖽦𖾐：“𖼺𖽳 𖼖𖽻 𖼊𖽻𖾐 𖼈𖽡𖾐 𖼦𖽑𖽺𖾑 𖼣𖽙𖾐 𖼞𖽳𖾐 𖼺𖽶 𖼻𖽜 𖼺𖽺𖾑，𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼂𖽺𖾐 𖼀𖽑𖽢 𖼺𖽪𖾐 𖼄𖽳𖾐 𖼷𖽑𖽦𖾐 𖼳𖽸 𖼣𖽻𖾐，𖼺𖽶 𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼊𖽚𖾐 𖼊𖽑𖽧 𖼖𖽻𖾐 𖼺𖽪𖾐 𖼣𖽻𖾐．
21 𖼐𖽦𖾐 𖼄𖽺！ 𖼣𖽙𖾐 𖼊𖽑𖽺 𖼈𖽪 𖼺𖽪𖾐 𖼷𖽑𖽻𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼹𖽪𖾐 𖼹𖽪𖾐 𖼞𖽳𖾐 𖼊𖽑𖽡 𖼊𖽑𖽜 𖼷𖽙𖾐 𖼷𖽙． 22 𖽂𖽙 𖼺𖽙𖾐 𖼂𖽙𖾐 𖼞𖽑𖽙𖾐 𖼍𖽧𖾑 𖼷𖽑𖽦𖾐 𖼖𖽙𖾐 𖼮𖽑𖽻𖾐 𖼷𖽑𖽻𖾐 𖼻𖽙 𖼳𖽶𖾐 𖼦𖽑𖽙𖾐 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼻𖽙 𖼊𖽑𖽺 𖼈𖽪 𖼺𖽪𖾐 𖼞𖽑𖽶𖾑 𖼽𖽚𖾐 𖼈𖽡𖾑 𖼞𖽑𖽙 𖼮𖽻𖾐 𖼊𖽻𖾐．” 23 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼷𖽙𖾐 𖼖𖽙𖾐 𖼊𖽻 𖼐𖽙𖾐，𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖽃𖽔 𖼺𖽺 𖼄𖽡𖽻 𖼦𖽑𖽺𖾑 𖼂𖽺𖾐 𖼊𖽻𖾐 𖼐𖽺𖾑？
𖼹𖽡𖾐 𖼺𖽪𖾐 𖼹𖽦𖾑 𖽃𖽔 𖼺𖽺 𖼈𖽳 𖼺𖽪𖾐 𖼣𖽻𖾐 𖼦𖽻𖾐 𖼊𖽦
24 𖼹𖽡𖾐 𖼺𖽪𖾐 𖼠𖽻𖾐 𖼊𖽑𖽺 𖼹𖽦𖾑 𖼷𖽙𖾐 𖼖𖽙𖾐 𖼦𖽻𖾐 𖼊𖽦 𖼍𖽪𖾐 𖼖𖽻𖾐，𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖽃𖽔 𖼺𖽺 𖼈𖽳 𖼺𖽪𖾐 𖼣𖽻𖾐 𖼀𖽦𖾐． 25 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼞𖽑𖽻𖾐 𖼂𖽻𖾑 𖼀𖽑𖽙 𖼺𖽪𖾐 𖼷𖽑𖽻𖾐，𖼈𖽪𖾐 𖼍𖽦 𖼽𖽻 𖼈𖽳𖾐 𖼊𖽑𖽺 𖼠𖽕 𖼍𖽳𖾐．𖼷𖽶 𖼊𖽺𖾐 𖼻𖽜 𖼽𖽻 𖼈𖽳𖾐 𖼊𖽑𖽺 𖼠𖽕 𖼺𖽪𖾐，𖼽𖽻 𖼈𖽳𖾐 𖼮𖽡 𖼽𖽡𖾑 𖼺𖽡 𖼀𖽑𖽙 𖼰𖽕𖾐． 26 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐 𖼄𖽔 𖼊𖽙𖾐，𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼈𖽳 𖼺𖽪𖾐，𖼞𖽚 𖼀𖽑𖽚𖾐 𖼽𖽳𖾐 𖼺𖽪𖾐 𖼖𖽙𖾐 𖼺𖽶𖾑 𖼖𖽡𖾐；𖼈𖽪𖾑 𖼷𖽪𖾐 𖼂𖽺𖾐 𖼺𖽪𖾐，𖼞𖽚 𖼀𖽑𖽚𖾐 𖼮𖽜𖾐 𖼀𖽑𖽙 𖼖𖽙𖾐 𖼺𖽶𖾑 𖼖𖽡𖾐． 27 𖼊𖽡𖾐 𖼍𖽳𖾐 𖼷𖽙 𖼊𖽻𖾐 𖼺𖽪𖾐 𖼐𖽺𖾐 𖼽𖽻 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐，𖽃𖽔 𖼺𖽺 𖼈𖽳 𖼺𖽪𖾐 𖼣𖽻𖾐 𖼐𖽺𖾑？𖼊𖽡𖾐 𖼍𖽳𖾐 𖼷𖽙 𖼊𖽻𖾐 𖼺𖽪𖾐 𖼈𖽳 𖼄𖽔 𖼣𖽻𖾐 𖼖𖽔？𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼮𖽻𖾐，𖼷𖽑𖽻𖾐 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐 𖼖𖽙𖾐 𖼺𖽶𖾑．
28 𖼣𖽙𖾐 𖼳𖽚𖾑 𖼞𖽑𖽪 𖼠𖽻𖾐 𖼰𖽡𖽳𖾐 𖼞𖽑𖽶𖾐 𖼮𖽻𖾐，𖼻𖽳𖾐 𖼻𖽳𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼺𖽪𖾐 𖼐𖽑𖽡𖾐 𖼈𖽳𖾐 𖼣𖽻𖾐． 29 𖽃𖽔 𖼀𖽙 𖼞𖽳𖾐 𖼠𖽚 𖼽𖽻 𖽃𖽔 𖼊𖽺𖾐 𖼖𖽪 𖼣𖽙𖾐 𖼊𖽑𖽺 𖼄𖽻𖾑，𖼣𖽙𖾐 𖼖𖽺𖾑 𖼞𖽑𖽶𖾑 𖼖𖽙𖾐 𖼺𖽶𖾑 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽻𖾑， 30 𖼐𖽑𖽡𖾐 𖼈𖽳𖾐 𖼞𖽜 𖼣𖽙𖾐 𖼞𖽳𖾐 𖼠𖽚 𖼠𖽻𖾐 𖼞𖽑𖽶𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼻𖽦 𖼷𖽙，𖼦𖽑𖽔𖾐 𖼖𖽺𖾑 𖼳𖽳𖾐 𖼮𖽡𖽺 𖼊𖽑𖽺 𖼊𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼷𖽑𖽡𖾐 𖼐𖽑𖽡 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼳𖽶 𖼊𖽻 𖼐𖽙𖾐 𖼊𖽻𖾐．”
𖼂𖽡 𖼍𖽴 𖼺𖽡 𖼀𖽑𖽙 𖼊𖽑𖽺 𖼄𖽔 𖼵𖽜𖾑 𖼊𖽻𖾐 𖼞𖽳𖾐 𖼺𖽡𖾐 𖼹𖽦𖾑 𖼊𖽻 ( 𖼊𖽑𖽹𖾑26：31-35；𖼞𖽑𖽜14：27-31；𖼽𖽱𖾐13：36-38 )
31 𖼺𖽡 𖼀𖽑𖽙 𖼦𖽑𖽔𖾐 𖼖𖽺𖾑 𖼀𖽦𖾐：“𖼳𖽡𖾐 𖼄𖽴 ，𖼳𖽡𖾐 𖼄𖽴 ！ 𖼺𖽔 𖼍𖽗𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖽂𖽙𖾐 𖼖𖽡𖾐 𖼊𖽡 𖼮𖽑𖽻，𖼳𖽙𖾐 𖼈𖽻 𖼖𖽙𖾐 𖼺𖽶𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼈𖽻 𖼊𖽻𖾐． 32 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼐𖽑𖽡𖾐 𖼖𖽙𖾐 𖼀𖽙𖾐 𖼮𖽑𖽡 𖼮𖽡𖽺𖾐 𖼍𖽳𖾐 𖼦𖽑𖽻𖾐，𖼐𖽑𖽡𖾐 𖼞𖽜 𖼊𖽻 𖼮𖽶𖾐 𖼐𖽑𖽧𖾐 𖼄𖽙𖾐 𖼄𖽔 𖼀𖽑𖽧𖾐 𖼄𖽶𖾑 𖼊𖽻𖾐．𖼐𖽑𖽡𖾐 𖼊𖽡 𖼮𖽑𖽻 𖼀𖽑𖽚𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽧 𖼐𖽑𖽳𖾐 𖼞𖽜 𖼦𖽑𖽡𖽚 𖼻𖽺𖾐 𖼍𖽪𖾐 𖼖𖽻𖾐 𖼖𖽡𖾐．”
33 𖼳𖽡𖾐 𖼄𖽴 𖼂𖽡 𖼍𖽴 𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼰𖽡𖽻𖾐 𖼦𖽑𖽺𖾐 𖼞𖽶𖾐，𖼊𖽑𖽡 𖼊𖽑𖽜 𖼳𖽶𖾐 𖼦𖽑𖽙𖾐 𖼀𖽦𖾐 𖼖𖽺𖾑 𖼣𖽙𖾐 𖼐𖽑𖽧𖾐 𖼺𖽳 𖼺𖽪𖾐 𖼣𖽻𖾐！”
34 𖼽𖽺𖾐 𖼺𖽪𖾐 𖼀𖽦𖾐：“𖼂𖽡 𖼍𖽴 ！ 𖼣𖽙𖾐 𖼀𖽦𖾐 𖼐𖽑𖽡𖾐 𖼖𖽙𖾐 𖼊𖽑𖽧，𖽃𖽙𖾑 𖼄𖽺𖾐 𖼽𖽦𖾐 𖼄𖽔 𖼀𖽶𖾐 𖼺𖽺 𖽃𖽙𖾑 𖼄𖽺，𖼐𖽑𖽡𖾐 𖼺𖽙𖾐 𖼂𖽦𖾑 𖼣𖽙𖾐 𖼊𖽑𖽺 𖼄𖽔 𖼵𖽜𖾑 𖼊𖽻𖾐．”
𖼠𖽻𖾐 𖼰𖽡𖽳𖾐 𖼷𖽶𖾐 𖼄𖽳𖾐 𖼊𖽻𖾐 𖼖𖽙𖾐 𖼀𖽙𖾐 𖼂𖽺𖾐 𖼳𖽡𖽻𖾐
35 𖼽𖽺𖾐 𖼺𖽪𖾐 𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖽃𖽙𖾑 𖼄𖽺 𖼊𖽑𖽙 𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼹𖽡𖾐 𖼊𖽚𖾐 𖼽𖽡𖾐，𖼮𖽡 𖼀𖽑𖽡 𖼰𖽡𖽺𖾐 𖼊𖽪𖾐、 𖼰𖽧𖾑 𖼞𖽑𖽕𖾐、 𖼮𖽑𖽡𖾑 𖼐𖽴𖾐 𖼄𖽔 𖼀𖽶，𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾑 𖼳𖽶 𖼄𖽔 𖼖𖽚 𖼺𖽪𖾐 𖼮𖽻𖾐 𖼷𖽻𖾐 𖼷𖽻𖾐 𖼐𖽺𖾑？” 𖼽𖽻 𖼈𖽳𖾐 𖼀𖽦𖾐：“𖼄𖽔 𖼷𖽻𖾐．”
36 𖼽𖽺𖾐 𖼺𖽪𖾐 𖼀𖽦𖾐：“𖼦𖽑𖽻𖾐 𖼊𖽑𖽻𖾐，𖽃𖽔𖾑 𖼄𖽳𖾐 𖼮𖽡 𖼀𖽑𖽡 𖼰𖽡𖽺𖾐 𖼊𖽪𖾐 𖼮𖽻𖾐 𖼺𖽪𖾐 𖼀𖽶 𖼍𖽳𖾐 𖼖𖽡𖾐，𖼰𖽧𖾑 𖼞𖽑𖽕𖾐 𖼮𖽻𖾐 𖼺𖽪𖾐 𖼖𖽺𖾑 𖼦𖽑𖽺𖾑 𖼻𖽻𖾐 𖼂𖽺𖾐 𖼖𖽡𖾐．𖽃𖽔𖾑 𖼊𖽑𖽙 𖼄𖽔 𖼮𖽻𖾐 𖼺𖽪𖾐，𖼀𖽑𖽡𖽻𖾐 𖼮𖽻 𖼈𖽪 𖼦𖽑𖽙𖾐 𖽃𖽔𖾑 𖼊𖽑𖽙 𖼈𖽳𖾐 𖼽𖽡𖾐 𖼖𖽡𖾐． 37 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，《𖼺𖽡 𖼮𖽡 𖼺𖽪𖾑》 𖼊𖽑𖽺 𖼈𖽝 𖼍𖽳𖾐 𖼀𖽦𖾐：‘ 𖼽𖽻 𖼊𖽑𖽺 𖼀𖽑𖽨 𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼰𖽕𖾐 𖼊𖽻𖾐．’ 𖼄𖽡𖽻 𖼦𖽑𖽺𖾑 𖼊𖽑𖽡 𖼮𖽨𖾐 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼞𖽶𖾐 𖼮𖽑𖽶 𖼊𖽑𖽺 𖼮𖽑𖽻𖾐 𖼀𖽑𖽢 𖼊𖽻𖾐．𖼞𖽪𖾐 𖼮𖽡𖽺𖾐，𖼣𖽙𖾐 𖼖𖽙𖾐 𖼮𖽡 𖼠𖽳𖾐 𖼺𖽪𖾐 𖼄𖽡𖽻 𖼷𖽑𖽜𖾑 𖼷𖽑𖽜𖾐 𖼊𖽚𖾐 𖼊𖽑𖽧 𖼖𖽻𖾐 𖼊𖽻𖾐．”
38 𖼽𖽻 𖼈𖽳𖾐 𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼐𖽦𖾐 𖼄𖽺！ 𖼦𖽑𖽺𖾑 𖼠𖽻𖾐 𖽃𖽔𖾑 𖼊𖽑𖽙 𖼐𖽑𖽡 𖼂𖽻𖾐 𖼮𖽻𖾐 𖼍𖽳𖾐．” 𖼽𖽺𖾐 𖼺𖽪𖾐 𖼀𖽦𖾐：“𖼖𖽚 𖼦𖽑𖽻𖾐！”
𖼽𖽺𖾐 𖼺𖽪𖾐 𖽃𖽔 𖼮𖽑𖽙 𖽂𖽙 𖼰𖽡𖽺𖾐 𖼊𖽑𖽺 𖼍𖽻 𖼠𖽘𖾑 𖼂𖽺𖾐 ( 𖼊𖽑𖽹𖾑 26：36-46；𖼞𖽑𖽜14：32-42 )
39 𖼽𖽺𖾐 𖼺𖽪𖾐 𖼊𖽚𖾐 𖼖𖽻𖾐，𖽃𖽙𖾑 𖼄𖽺 𖼊𖽑𖽙 𖼖𖽙𖾐 𖼺𖽶𖾑 𖽃𖽔 𖼮𖽑𖽙 𖽂𖽙 𖼰𖽡𖽺𖾐 𖼊𖽑𖽺 𖼽𖽡𖾐，𖼷𖽻𖾐 𖼺𖽪𖾐 𖼖𖽺𖾑 𖼽𖽻 𖼠𖽙𖾑 𖼍𖽻𖾐 𖼽𖽡𖾐．
40 𖼞𖽑𖽻𖾑 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼽𖽻 𖼷𖽻𖾐 𖼺𖽪𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼮𖽑𖽡 𖼮𖽡𖽺𖾐 𖼂𖽺𖾐 𖼖𖽡𖾐，𖼦𖽑𖽜𖾐 𖼄𖽶𖾑 𖼮𖽕𖾐 𖼐𖽦𖾐 𖼞𖽑𖽶𖾐 𖼊𖽡 𖼽𖽡𖾐 𖼠𖽸𖾑．”
41 𖽃𖽔𖾐 𖼺𖽺𖾑，𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼞𖽳𖾐 𖼰𖽡𖾑 𖼦𖽑𖽙𖾐，𖽃𖽔 𖼖𖽙𖾐 𖼖𖽚𖾐 𖼄𖽙𖾐 𖼊𖽑𖽡 𖼊𖽝𖾐 𖼷𖽴𖾐 𖼈𖽡𖾐 𖼺𖽺𖾑 𖼰𖽨𖾑 𖼞𖽳𖾐 𖼽𖽡𖾐，𖼮𖽡 𖼹𖽺𖾐 𖼮𖽑𖽡 𖼮𖽡𖽺𖾐， 42 𖼀𖽦𖾐：“𖽃𖽔 𖼀𖽙 𖽃𖽔𖾐！ 𖼐𖽑𖽡𖾐 𖼐𖽑𖽧𖾐 𖼺𖽳 𖼊𖽑𖽡𖾑 𖼣𖽻𖾐，𖼺𖽡𖾑 𖼦𖽑𖽺𖾑 𖼈𖽺𖾐 𖼦𖽑𖽙𖾐 𖼞𖽜．𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼣𖽝 𖼖𖽙𖾐 𖼊𖽑𖽔 𖼮𖽑𖽻𖾐，𖼐𖽑𖽡𖾐 𖼣𖽝 𖼖𖽙𖾐 𖼮𖽑𖽻𖾐 𖼂𖽺𖾐 𖼀𖽑𖽢 𖼍𖽺𖾑 𖼻𖽻𖾐．” 43-44 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼄𖽶 𖼹𖽡𖾐 𖼖𖽦 𖼊𖽑𖽡 𖼽𖽚𖾐 𖼊𖽚𖾐 𖼊𖽑𖽧 𖼖𖽻𖾐，𖽂𖽙 𖼐𖽑𖽡𖾐 𖼖𖽪 𖼽𖽻 𖼊𖽑𖽺 𖼞𖽜．𖼽𖽺𖾐 𖼺𖽪𖾐 𖼦𖽑𖽔𖾐 𖼮𖽶𖾐 𖼮𖽑𖽧𖾐 𖼞𖽪 𖼐𖽙𖾐，𖼠𖽳𖾐 𖼠𖽳𖾐 𖽂𖽙 𖼊𖽑𖽧 𖼄𖽙𖾐 𖼮𖽑𖽡 𖼮𖽡𖽺𖾐，𖼠𖽳𖾑 𖼈𖽡𖾐 𖼺𖽶 𖼂𖽝𖾐 𖼖𖽙𖾐 𖼺𖽶𖾑 𖼷𖽦𖾐 𖼄𖽡𖾑 𖼐𖽦𖾐 𖼊𖽻．
45 𖼮𖽑𖽡 𖼮𖽡𖽺𖾐 𖼂𖽺𖾐 𖼦𖽑𖽻𖾐 𖼺𖽺𖾑，𖼍𖽪𖾐 𖼖𖽻𖾐，𖼽𖽻 𖼷𖽻𖾐 𖼺𖽪𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐 𖼐𖽦𖾐 𖼄𖽡𖽻𖾐，𖼽𖽻 𖼈𖽳𖾐 𖼮𖽑𖽧𖾐 𖼞𖽪 𖼺𖽺𖾑，𖼽𖽦 𖼄𖽦𖾐 𖼠𖽶𖾑 𖼦𖽑𖽻𖾐． 46 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾐 𖼣𖽻𖾐 𖼺𖽺𖾑，𖼽𖽦 𖼄𖽦𖾐 𖼠𖽶𖾑 𖼐𖽺𖾑？𖼍𖽪𖾐 𖼖𖽻𖾐 𖼮𖽑𖽡 𖼮𖽡𖽺𖾐 𖼂𖽺𖾐 𖼖𖽡𖾐，𖼦𖽑𖽜𖾐 𖼄𖽶𖾑 𖼮𖽕𖾐 𖼐𖽦𖾐 𖼞𖽑𖽶𖾐 𖼊𖽡 𖼽𖽡𖾐 𖼠𖽸𖾑．”
𖼽𖽺𖾐 𖼺𖽪𖾐 𖼊𖽑𖽺 𖼵𖽪𖾐 (𖼊𖽑𖽹𖾑26：47-56；𖼞𖽑𖽜14：43-50；𖼽𖽱𖾐18：3-11 )
47 𖼽𖽺𖾐 𖼺𖽪𖾐 𖼊𖽻 𖼂𖽪𖾑 𖼦𖽑𖽺𖾑 𖼊𖽑𖽜𖾐 𖼮𖽻𖾐 𖼺𖽺 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼊𖽑𖽡 𖼷𖽪𖾐 𖼖𖽻𖾐，𖼹𖽡𖾐 𖼺𖽪𖾐 𖼷𖽑𖽡𖾐 𖼐𖽑𖽡 𖼽𖽚𖾐 𖼠𖽻𖾐 𖼊𖽑𖽺 𖼞𖽳𖾐 𖼽𖽚 𖼍𖽕𖾑 𖽃𖽙𖾑 𖼄𖽺 𖼮𖽑𖽻𖾐 𖼺𖽜，𖼽𖽺𖾐 𖼺𖽪𖾐 𖼖𖽙𖾐 𖼐𖽳 𖼖𖽻𖾐，𖼽𖽻 𖼊𖽑𖽺 𖼹𖽮𖾑 𖼊𖽻𖾐． 48 𖼽𖽺𖾐 𖼺𖽪𖾐 𖼽𖽻 𖼖𖽙𖾐 𖼀𖽦𖾐：“𖼽𖽚 𖼍𖽕𖾑 ！ 𖼐𖽑𖽡𖾐 𖼮𖽑𖽻 𖼄𖽦𖾐 𖼹𖽮𖾑 𖼞𖽳𖾐 𖼺𖽙 𖼻𖽜 𖼺𖽺𖾑，𖼷𖽑𖽻𖾐 𖼻𖽙 𖼊𖽑𖽺 𖼈𖽪 𖼖𖽔𖾑？”
49 𖼽𖽻 𖼷𖽻𖾐 𖼺𖽪𖾐 𖼐𖽦𖾐 𖼄𖽡𖽻𖾐，𖼄𖽡𖽻 𖼦𖽑𖽺𖾑 𖼮𖽑𖽻 𖼄𖽔 𖼺𖽶𖾑．𖽃𖽔𖾐 𖼺𖽺𖾑 𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼣𖽙𖾐 𖼈𖽳𖾐 𖽃𖽔𖾑 𖼊𖽑𖽙 𖼈𖽺𖾐 𖼊𖽑𖽝 𖼊𖽙𖾐 𖼊𖽙𖾐 𖼐𖽺𖾑？” 50 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼊𖽑𖽡 𖼽𖽚𖾐 𖼍𖽡𖾐 𖼄𖽻 𖼈𖽳 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽺 𖼊𖽑𖽡 𖽃𖽔𖾑 𖼊𖽑𖽙 𖼊𖽑𖽝，𖼐𖽙𖾑 𖼂𖽻𖾐 𖼽𖽙𖾐 𖼀𖽙 𖼊𖽑𖽝 𖼷𖽑𖽦𖾐 𖼦𖽑𖽙𖾐．
51 𖼽𖽺𖾐 𖼺𖽪𖾐 𖼀𖽦𖾐：“𖼀𖽑𖽨 𖼐𖽙 𖼦𖽻！ 𖼽𖽻 𖼈𖽳𖾐 𖼖𖽙𖾐 𖼮𖽻𖾐！” 𖼽𖽺𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼞𖽳𖾐 𖼐𖽙𖾑 𖼂𖽻𖾐 𖼊𖽑𖽺 𖼄𖽚𖾐，𖼽𖽻 𖼊𖽑𖽺 𖼞𖽪𖾐 𖼞𖽑𖽙 𖼦𖽑𖽻𖾐．
52 𖼽𖽺𖾐 𖼺𖽪𖾐 𖼞𖽑𖽻𖾑 𖼊𖽚𖾐 𖼖𖽻𖾐 𖼽𖽻 𖼊𖽑𖽺 𖼵𖽪𖾐 𖼺𖽪𖾐 𖼍𖽡𖾐 𖼄𖽻 𖼈𖽪𖾑、 𖼺𖽡 𖼮𖽡𖾐 𖼦𖽑𖽺𖾐 𖼳𖽪𖾐 𖼺𖽪𖾐 𖼈𖽪𖾑 𖼷𖽪𖾐 𖼐𖽺𖾐 𖼮𖽳 𖼄𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔𖾑 𖼊𖽑𖽙 𖼐𖽺𖾐 𖼀𖽕𖾑 𖼊𖽪𖾐 𖼈𖽺𖾐 𖼺𖽺𖾑，𖼷𖽝𖾐 𖼀𖽑𖽙 𖼵𖽪𖾐 𖼖𖽙𖾐 𖼺𖽶𖾑 𖼣𖽙𖾐 𖼊𖽑𖽺 𖼵𖽪𖾐 𖼖𖽔？ 53 𖼣𖽙𖾐 𖼊𖽑𖽡 𖼐𖽑𖽡𖾑 𖼊𖽑𖽡 𖼐𖽑𖽡𖾐，𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼮𖽻𖾐，𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖼄𖽔 𖼵𖽪𖾐．𖼦𖽑𖽻𖾐 𖼊𖽑𖽻𖾐，𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼣𖽻𖾐，𖼐𖽦𖾑 𖼐𖽦𖾐 𖼞𖽳𖾐 𖼷𖽶 𖼊𖽺𖾐 𖼄𖽡𖽻 𖼠𖽕 𖼍𖽳𖾐 𖼦𖽑𖽻𖾐．”
𖼂𖽡 𖼍𖽴 𖼺𖽙𖾐 𖼂𖽦𖾑 𖼺𖽡 𖼀𖽑𖽙 𖼊𖽑𖽺 𖼄𖽔 𖼵𖽜𖾑 (𖼊𖽑𖽹𖾑26：57-58，69-75；𖼞𖽑𖽜14：53-54；𖼽𖽱𖾐18：12-18，25-27)
54 𖼽𖽻 𖼈𖽳𖾐 𖼽𖽺𖾐 𖼺𖽪𖾐 𖼊𖽑𖽺 𖼵𖽪𖾐 𖼍𖽡，𖼦𖽳 𖼍𖽡𖾐 𖼄𖽻 𖼈𖽳 𖼞𖽳𖾐 𖽃𖽔𖾑 𖼞𖽑𖽶𖾐 𖼮𖽑𖽡𖾐．𖼂𖽡 𖼍𖽴 𖼄𖽡𖾐 𖼈𖽡 𖼈𖽡 𖼽𖽻 𖼈𖽳𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼽𖽡𖾐． 55 𖼷𖽑𖽻𖾐 𖼊𖽑𖽡 𖼹𖽻𖾐 𖼮𖽡𖽺 𖼞𖽪 𖼠𖽻𖾐 𖼞𖽑𖽶𖾐 𖽃𖽔𖾐 𖼍𖽚𖾑 𖼹𖽶𖾐，𖼷𖽙𖾐 𖼖𖽙𖾐 𖼮𖽑𖽻𖾐 𖼞𖽑𖽻𖾑 𖼊𖽡𖾐 𖽃𖽔𖾐 𖼍𖽚𖾑 𖼠𖽻𖾐，𖼂𖽡 𖼍𖽴 𖼖𖽺𖾑 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼊𖽡𖾐 𖼍𖽳𖾐． 56 𖼮𖽜𖾐 𖼄𖽙𖾐 𖼊𖽑𖽡 𖼽𖽚𖾐 𖼮𖽻𖾐，𖼽𖽻 𖼂𖽡 𖼍𖽴 𖽃𖽔𖾐 𖼍𖽚𖾑 𖼀𖽜𖾐 𖼖𖽜𖾐 𖼞𖽑𖽶𖾐 𖼊𖽡𖾐 𖼍𖽳𖾐 𖼐𖽦𖾐 𖼄𖽡𖽻𖾐．𖽃𖽔𖾐 𖼺𖽺𖾑，𖼷𖽚𖾑 𖼷𖽚𖾐 𖼐𖽦𖾐，𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼖𖽺𖾑 𖼽𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼷𖽪𖾐 𖼣𖽻𖾐．”
57 𖼦𖽑𖽻𖾐 𖼊𖽑𖽻𖾐，𖼂𖽡 𖼍𖽴 𖼵𖽜𖾑 𖼄𖽔 𖼦𖽶𖾐，𖼀𖽦𖾐：“𖼻𖽙 𖼄𖽳！ 𖼣𖽙𖾐 𖼽𖽻 𖼊𖽑𖽺 𖼄𖽔 𖼺𖽝𖾑．”
58 𖼞𖽑𖽙 𖼄𖽙𖾐 𖼠𖽸𖾑 𖼄𖽔 𖼖𖽚 𖼺𖽺，𖼹𖽦𖾑 𖼠𖽳𖾐 𖼖𖽪𖾐 𖼊𖽑𖽡 𖼽𖽚𖾐 𖼽𖽻 𖼊𖽑𖽺 𖼐𖽦𖾐 𖼄𖽡𖽻𖾐，𖼀𖽦𖾐：“𖼐𖽑𖽡𖾐 𖼖𖽺𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼷𖽪𖾐 𖼣𖽻𖾐．” 𖼂𖽡 𖼍𖽴 𖼀𖽦𖾐：“𖼐𖽑𖽡𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼄𖽔 𖼠𖽕𖾐 𖼀𖽦𖾐，𖼣𖽙𖾐 𖼄𖽔 𖼣𖽻𖾐．”
59 𖼊𖽑𖽡 𖼠𖽸𖾑 𖼖𖽚，𖼹𖽦𖾑 𖼠𖽳𖾐 𖼖𖽪𖾐 𖼊𖽑𖽡 𖼽𖽚𖾐 𖼦𖽑𖽔𖾐 𖼮𖽶𖾐 𖼮𖽶𖾐 𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼠𖽕𖾐 𖼰𖽶𖾐 𖼽𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼷𖽪𖾐 𖼣𖽻𖾐．𖼞𖽪𖾐 𖼮𖽡𖽺𖾐，𖼽𖽻 𖼖𖽺𖾑 𖼰𖽡𖽔𖾐 𖼖𖽡𖾑 𖼖𖽡𖾑 𖼺𖽪𖾐 𖼷𖽑𖽻𖾐 𖼣𖽻𖾐．”
60 𖼂𖽡 𖼍𖽴 𖼀𖽦𖾐：“𖼐𖽑𖽡𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼺𖽺𖾑，𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖼀𖽦𖾐 𖼺𖽪𖾐 𖼣𖽻𖾐 𖼣𖽙𖾐 𖼄𖽔 𖼺𖽝𖾑．” 𖼽𖽻 𖼊𖽻 𖼂𖽪𖾑 𖼊𖽑𖽜𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼽𖽦𖾐 𖼀𖽶𖾐 𖼍𖽪𖾐 𖼖𖽻𖾐．
61 𖼺𖽡 𖼀𖽑𖽙 𖼰𖽻𖾐 𖼀𖽑𖽚𖾐 𖼞𖽚 𖼖𖽻𖾐 𖼂𖽡 𖼍𖽴 𖼊𖽑𖽺 𖼐𖽦𖾐 𖼺𖽺𖾑，𖼽𖽻 𖼺𖽡 𖼀𖽑𖽙 𖼀𖽦𖾐 𖼺𖽪𖾐 𖼊𖽻 𖼂𖽪𖾑 𖼊𖽑𖽺 𖼣𖽝 𖼦𖽙𖾑 𖼮𖽑𖽡 𖼍𖽪𖾐 𖼖𖽻𖾐：“𖽃𖽙𖾑 𖼄𖽺𖾐 𖼽𖽦𖾐 𖼄𖽔 𖼀𖽶𖾐 𖼺𖽺 𖽃𖽙𖾑 𖼄𖽺，𖼐𖽑𖽡𖾐 𖼺𖽙𖾐 𖼂𖽦𖾑 𖼣𖽙𖾐 𖼊𖽑𖽺 𖼄𖽔 𖼵𖽜𖾑 𖼊𖽻𖾐．” 62 𖽃𖽔𖾐 𖼺𖽺𖾑，𖼽𖽻 𖼊𖽚𖾐 𖼽𖽡𖾐 𖼐𖽑𖽧𖾐 𖼮𖽑𖽸 𖼣𖽶𖾐 𖼍𖽪𖾐 𖼖𖽻𖾐．
𖼽𖽺𖾐 𖼺𖽪𖾐 𖼊𖽑𖽺 𖼳𖽶 𖼊𖽻 𖼐𖽙𖾐 (𖼊𖽑𖽹𖾑26：59-68；𖼞𖽑𖽜14： 55-65；𖼽𖽱𖾐18：19-24)
63 𖼽𖽺𖾐 𖼺𖽪𖾐 𖼊𖽑𖽺 𖼳𖽪𖾐 𖼺𖽪𖾐 𖼷𖽑𖽻𖾐 𖼽𖽻 𖼊𖽑𖽺 𖼈𖽳𖾐 𖼵𖽶𖾐，𖼽𖽻 𖼊𖽑𖽺 𖼊𖽝， 64 𖼽𖽻 𖼄𖽦𖾐 𖼊𖽪 𖼊𖽑𖽺 𖼀𖽜𖾐 𖼍𖽡 𖼺𖽺𖾑，𖼽𖽻 𖼖𖽙𖾐 𖼊𖽻 𖼐𖽙𖾐 𖼀𖽦𖾐：“𖼐𖽑𖽡𖾐 𖼺𖽡𖾐 𖼻𖽙 𖼣𖽻𖾐，𖼐𖽑𖽡𖾐 𖼀𖽦𖾐 𖼣𖽙𖾐 𖼈𖽳𖾐 𖼖𖽙𖾐 𖼊𖽑𖽧，𖼐𖽑𖽡𖾐 𖼊𖽑𖽺 𖼊𖽝 𖼺𖽪𖾐 𖽃𖽔 𖼺𖽺 𖼣𖽻𖾐 𖼐𖽺𖾑？” 65 𖼽𖽻 𖼈𖽳𖾐 𖼦𖽑𖽔𖾐 𖼖𖽺𖾑 𖼠𖽳𖾐 𖼖𖽪𖾐 𖼊𖽻 𖼂𖽪𖾑 𖼞𖽑𖽙 𖼄𖽙𖾐 𖼊𖽑𖽜𖾐 𖼽𖽻 𖼊𖽑𖽺 𖼐𖽑𖽧𖾐 𖼣𖽡𖽳𖾐．
66 𖼄𖽶 𖼊𖽑𖽡 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼀𖽺 𖼞𖽳𖾐 𖼮𖽳 𖼄𖽻、 𖼍𖽡𖾐 𖼄𖽻 𖼈𖽪𖾑 𖼐𖽺𖾐 𖼺𖽪𖾑 𖼷𖽑𖽺𖾐 𖼷𖽑𖽻𖾐，𖼄𖽳𖾑 𖼄𖽳 𖼷𖽙𖾐 𖼖𖽙𖾐 𖼻𖽶𖾑 𖼖𖽻𖾐．𖼽𖽺𖾐 𖼺𖽪𖾐 𖼊𖽑𖽺 𖼦𖽳 𖼷𖽜𖾐 𖼀𖽜𖾐 𖼦𖽑𖽺𖾐 𖼞𖽑𖽶𖾐 𖼮𖽑𖽡𖾐， 67 𖼽𖽻 𖼖𖽙𖾐 𖼊𖽻 𖼐𖽙𖾐：“𖼐𖽑𖽡𖾐 𖼰𖽡𖾐 𖼍𖽮 𖼣𖽻𖾐 𖼮𖽶𖾐 𖼊𖽑𖽡𖾑 𖼣𖽻𖾐，𖼀𖽦𖾐 𖼣𖽙𖾐 𖼈𖽳𖾐 𖼖𖽙𖾐 𖼊𖽑𖽧 𖼖𖽻𖾐．”
𖼽𖽺𖾐 𖼺𖽪𖾐 𖼀𖽦𖾐：“𖽃𖽔𖾑 𖼄𖽳𖾐 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼦𖽑𖽔𖾐 𖼖𖽺𖾑 𖼊𖽻 𖼮𖽶𖾐 𖼄𖽔 𖼦𖽶𖾐 𖼊𖽻𖾐． 68 𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼊𖽻 𖼐𖽙𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼦𖽑𖽔𖾐 𖼖𖽺𖾑 𖼊𖽻 𖼄𖽔 𖼞𖽑𖽚 𖼊𖽻𖾐． 69 𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼻𖽙 𖽃𖽙𖾑 𖼐𖽑𖽡𖾐 𖼮𖽑𖽻𖾐 𖼍𖽪𖾐，𖼷𖽶 𖼊𖽺𖾐 𖽂𖽙 𖼐𖽑𖽡𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼽𖽙𖾐 𖼀𖽳 𖼊𖽡𖾐 𖼊𖽻𖾐．”
70 𖼽𖽻 𖼈𖽳𖾐 𖼀𖽦𖾐：“𖼦𖽑𖽺𖾑 𖼻𖽻𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼻𖽙 𖼣𖽻𖾐 𖼖𖽔？”
𖼽𖽺𖾐 𖼺𖽪𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼀𖽦𖾐 𖼺𖽪𖾐 𖼣𖽻𖾐 𖼮𖽶𖾐．”
71 𖼽𖽻 𖼈𖽳𖾐 𖼀𖽦𖾐：“𖼠𖽳𖾐 𖼖𖽪𖾐 𖼮𖽨 𖼄𖽡𖽻𖾐 𖼰𖽙𖾐 𖼄𖽔 𖼻𖽻𖾐，𖼽𖽻 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑 𖽃𖽔 𖼐𖽺𖾑 𖼊𖽻 𖼮𖽨 𖼦𖽑𖽻𖾐．