𖼄𖽳 𖼮𖽑𖽶 𖼄𖽙𖾐 𖼮𖽡 𖼀𖽑𖽡 𖼊𖽻 ( 𖼞𖽑𖽜 12： 41-44 )
21
1 𖼽𖽺𖾐 𖼺𖽪𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼮𖽻𖾐，𖼽𖽻 𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼐𖽦𖾐，𖼷𖽑𖽻𖾐 𖼀𖽻𖾐 𖼀𖽑𖽙 𖼮𖽡 𖼀𖽑𖽡 𖼊𖽻 𖼺𖽺𖾑，𖼮𖽡 𖼀𖽑𖽡 𖼰𖽡𖽺𖾐 𖼊𖽪𖾐 𖼞𖽑𖽶𖾐 𖼰𖽡𖽺𖾐 𖼞𖽳𖾐 𖼄𖽡𖽻𖾐． 2 𖼦𖽑𖽔𖾐 𖼖𖽺𖾑 𖼳𖽚𖾑 𖼺𖽪𖾐 𖼄𖽳 𖼮𖽑𖽶 𖼄𖽙𖾐 𖼊𖽑𖽡 𖼽𖽚𖾐 𖼮𖽡 𖼀𖽑𖽡 𖼻𖽙 𖼐𖽑𖽡 𖼊𖽝𖾐 𖼊𖽻 𖼞𖽑𖽻𖾑 𖼰𖽡𖽺𖾐 𖼞𖽳𖾐 𖼄𖽡𖽻𖾐．3 𖽃𖽔𖾐 𖼺𖽺𖾑，𖼽𖽻 𖼷𖽻𖾐 𖼺𖽪𖾐 𖼖𖽙𖾐 𖼀𖽦𖾐：“𖼣𖽙𖾐 𖼠𖽕𖾐 𖼰𖽶𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼳𖽚𖾑 𖼺𖽪𖾐 𖼄𖽳 𖼮𖽑𖽶 𖼄𖽙𖾐 𖼦𖽑𖽺𖾑 𖼽𖽚𖾐 𖼞𖽑𖽙𖾐 𖼊𖽻 𖼺𖽪𖾐 𖼮𖽡 𖼀𖽑𖽡，𖼠𖽳𖾐 𖼖𖽪𖾐 𖼷𖽑𖽻𖾐 𖼞𖽑𖽙𖾐 𖼊𖽻 𖼺𖽪𖾐 𖼄𖽨𖾐 𖼄𖽔 𖼷𖽑𖽶𖾐 𖼳𖽶 𖼣𖽻𖾐． 4 𖼞𖽪𖾐 𖼮𖽡𖽺𖾐，𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼖𖽺𖾑 𖼽𖽻 𖼄𖽳𖾑 𖼻𖽜 𖼷𖽺 𖼷𖽺𖾐 𖼊𖽻 𖼰𖽡𖽺𖾐 𖼺𖽪𖾐 𖼣𖽻𖾐，𖼄𖽳 𖼮𖽑𖽶 𖼄𖽙𖾐 𖼦𖽑𖽺𖾑 𖼽𖽚𖾐 𖼍𖽺𖾑 𖼊𖽑𖽡 𖼳𖽶 𖼖𖽺𖾑 𖼄𖽔 𖼮𖽻𖾐，𖼽𖽻 𖼄𖽳𖾑 𖼻𖽳𖾐 𖼦𖽑𖽨𖾐 𖼖𖽚𖾐 𖼂𖽚𖾐 𖼖𖽺𖾑 𖼊𖽻 𖼰𖽡𖽺𖾐 𖼦𖽑𖽙𖾐．”
𖼺𖽡 𖼮𖽡𖾐 𖼦𖽑𖽺𖾐 𖼀𖽑𖽧𖾐 𖼄𖽶𖾑 𖼊𖽻𖾐 𖼞𖽳𖾐 𖼺𖽡𖾐 𖼹𖽦𖾑 𖼊𖽻 ( 𖼊𖽑𖽹𖾑 24：1-2；𖼞𖽑𖽜 13：1-2 )
5 𖼷𖽑𖽻𖾐 𖼊𖽑𖽡 𖼹𖽻𖾐 𖼺𖽡 𖼮𖽡𖾐 𖼦𖽑𖽺𖾐 𖼊𖽑𖽺 𖼦𖽑𖽺 𖼺𖽺𖾑，𖼀𖽦𖾐：“𖼦𖽑𖽺𖾑 𖼞𖽑𖽙𖾐 𖼹𖽳𖾐 𖼳𖽶 𖼖𖽚𖾐 𖼄𖽙𖾐 𖼐𖽺𖾐 𖼦𖽑𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽜 𖼺𖽪𖾐 𖼀𖽑𖽶 𖼊𖽴 𖼄𖽡𖽻 𖼐𖽑𖽡 𖼻𖽜 𖼞𖽪𖾐 𖼹𖽳𖾐 𖼺𖽪𖾐 𖼣𖽻𖾐．” 6 𖼽𖽺𖾐 𖼺𖽪𖾐 𖼀𖽦𖾐：“𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼐𖽦𖾐 𖼄𖽡𖽻𖾐 𖼺𖽪𖾐 𖼦𖽑𖽺𖾑 𖼹𖽻𖾐，𖼷𖽑𖽜𖾑 𖼷𖽑𖽜𖾐 𖼖𖽚𖾐 𖼄𖽙𖾐 𖼊𖽑𖽡 𖼊𖽝𖾐 𖼖𖽺𖾑 𖼊𖽑𖽡 𖼊𖽝𖾐 𖼊𖽑𖽺 𖼄𖽔 𖼍𖽦𖾐，𖼄𖽳𖾑 𖼄𖽳 𖼀𖽑𖽧𖾐 𖼹𖽺𖾐 𖼖𖽻𖾐 𖼦𖽑𖽙𖾐 𖼊𖽻𖾐．”
𖼄𖽳𖾑 𖼊𖽺𖾐 𖼐𖽑𖽡𖾐 𖼦𖽑𖽦 𖼞𖽳𖾐 𖽃𖽔𖾐 𖼈𖽧𖾐 ( 𖼊𖽑𖽹𖾑 10：17-22，24：3-14；𖼞𖽑𖽜 13：3-13 )
7 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼽𖽻 𖼖𖽙𖾐 𖼊𖽻 𖼐𖽙𖾐：“𖼳𖽪𖾑 𖼰𖽪𖾐！ 𖼄𖽡𖽻 𖼦𖽑𖽺𖾑 𖼹𖽻𖾐 𖼞𖽑𖽙 𖼊𖽑𖽻𖾐 𖼮𖽻𖾐 𖼊𖽻𖾐 𖼐𖽺𖾑？𖼄𖽡𖽻 𖼦𖽑𖽺𖾑 𖼹𖽻𖾐 𖼊𖽚𖾐 𖼖𖽻𖾐 𖼮𖽻𖾐 𖽃𖽙𖾑 𖼄𖽺，𖽃𖽔 𖼊𖽺𖾑 𖼳𖽶 𖽃𖽔𖾐 𖼈𖽧𖾐 𖼮𖽻𖾐 𖼊𖽻𖾐 𖼐𖽺𖾑？”
8 𖼽𖽻 𖼀𖽦𖾐：“𖼐𖽑𖽡𖾐 𖼈𖽳𖾐 𖼷𖽜𖾐 𖼍𖽳𖾐 𖼖𖽡𖾐，𖼺𖽙𖾐 𖼞𖽜 𖼊𖽑𖽔 𖼇𖽪 𖼀𖽑𖽧𖾐 𖼖𖽡𖾐．𖼞𖽪𖾐 𖼮𖽡𖽺𖾐，𖼷𖽑𖽻𖾐 𖼞𖽑𖽙 𖼄𖽙𖾐 𖼖𖽻𖾐 𖼊𖽻𖾐，𖼣𖽙𖾐 𖼄𖽡𖾐 𖼞𖽻𖾐 𖼀𖽶 𖼺𖽺𖾑，𖼀𖽦𖾐：‘ 𖼣𖽙𖾐 𖼰𖽡𖾐 𖼍𖽮 𖼣𖽻𖾐 ’，𖼦𖽑𖽔𖾐 𖼖𖽺𖾑 𖼀𖽦𖾐：‘ 𖼐𖽑𖽡𖾐 𖼦𖽑𖽦 𖼐𖽳 𖼖𖽻𖾐 𖼦𖽑𖽻𖾐 ’．𖼐𖽑𖽡𖾐 𖼈𖽳𖾐 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼠𖽙𖾑 𖼍𖽻𖾐 𖼊𖽑𖽔 𖼮𖽑𖽻𖾐 𖼽𖽡𖾐． 9 𖼐𖽑𖽡𖾐 𖼈𖽳𖾐 𖼰𖽕𖾑 𖼊𖽝 𖼄𖽡𖽻 𖼐𖽺𖾐 𖼀𖽑𖽚𖾐 𖼊𖽦 𖼄𖽡𖽻 𖼊𖽻 𖼮𖽨 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼊𖽑𖽔 𖼮𖽡𖽮𖾐 𖼞𖽴𖾐．𖼞𖽪𖾐 𖼮𖽡𖽺𖾐，𖼄𖽡𖽻 𖼦𖽑𖽺𖾑 𖼹𖽻𖾐 𖼷𖽑𖽜𖾑 𖼷𖽑𖽜𖾐 𖽃𖽙𖾑 𖼄𖽺 𖼮𖽻𖾐 𖼊𖽻𖾐，𖼄𖽳𖾑 𖼊𖽺𖾐 𖼐𖽑𖽡𖾐 𖼦𖽑𖽦 𖼍𖽺𖾑 𖼐𖽕 𖼊𖽺𖾐 𖼄𖽔 𖼮𖽑𖽡𖾐 𖼺𖽺．” 10 𖼽𖽺𖾐 𖼺𖽪𖾐 𖼹𖽦𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼊𖽑𖽡 𖼳𖽶 𖼀𖽑𖽙 𖼀𖽑𖽚𖾐 𖼠𖽳𖾐 𖼖𖽪𖾐 𖼊𖽑𖽡 𖼳𖽶 𖼀𖽑𖽙 𖼊𖽑𖽺 𖼊𖽝 𖼊𖽦，𖼦𖽑𖽺𖾑 𖼊𖽑𖽡 𖼠𖽚 𖼀𖽑𖽚𖾐 𖼞𖽑𖽶𖾑 𖼊𖽑𖽡 𖼠𖽚 𖼊𖽑𖽺 𖼊𖽝 𖼊𖽦 𖼊𖽻𖾐． 11 𖼷𖽑𖽜𖾑 𖼷𖽑𖽜𖾐 𖼄𖽡𖾐 𖼈𖽳 𖼄𖽙𖾐 𖼖𖽧𖾐，𖼞𖽑𖽙𖾐 𖼮𖽑𖽡𖾐 𖼊𖽪 𖼦𖽑𖽦 𖼄𖽦 𖼈𖽡𖾐 𖼺𖽧 𖼮𖽻𖾐、 𖼐𖽙𖾐 𖼊𖽡𖾐 𖼞𖽑𖽴 𖼊𖽻𖾐，𖼄𖽶 𖼠𖽻𖾐 𖼊𖽑𖽺 𖼮𖽡𖽮𖾐 𖼖𖽕𖾐 𖼖𖽕𖾐 𖼮𖽑𖽻 𖼄𖽔 𖼺𖽶𖾑 𖼳𖽶 𖼄𖽡𖽻 𖼐𖽺𖾐 𖼞𖽑𖽙 𖼣𖽝 𖼰𖽡 𖼄𖽡𖽻 𖼊𖽚𖾐 𖼊𖽑𖽧 𖼖𖽻𖾐 𖼊𖽻𖾐．
12 𖼦𖽑𖽻𖾐 𖼊𖽑𖽻𖾐，𖼄𖽡𖽻 𖼦𖽑𖽺𖾑 𖼹𖽻𖾐 𖼄𖽔 𖼮𖽑𖽡𖾐 𖼺𖽺 𖽃𖽙𖾑 𖼄𖽺，𖼣𖽙𖾐 𖼄𖽡𖾐 𖼖𖽙𖾐 𖼀𖽙𖾐 𖼺𖽺𖾑，𖼷𖽑𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽕 𖼵𖽪𖾐、 𖼮𖽑𖽡𖾐 𖼻𖽸，𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽑𖽙𖾐 𖼻𖽶𖾑 𖼦𖽑𖽺𖾐 𖼞𖽑𖽶𖾐 𖼽𖽡𖾐 𖼳𖽶 𖼊𖽻 𖼐𖽙𖾐，𖼀𖽑𖽨 𖼰𖽡𖽻𖾐 𖼦𖽑𖽺𖾐 𖼞𖽑𖽶𖾐 𖼠𖽶𖾐，𖼦𖽑𖽔𖾐 𖼖𖽺𖾑 𖼵𖽪𖾐 𖼈𖽪𖾐 𖼍𖽦 𖼐𖽺𖾐 𖼷𖽶 𖼄𖽻 𖽃𖽙𖾑 𖼄𖽺 𖼮𖽑𖽡𖽺 𖼽𖽡𖾐 𖼠𖽻𖾐 𖼰𖽡𖽳𖾐 𖼷𖽶𖾐 𖼊𖽻𖾐． 13 𖼞𖽑𖽶𖾑 𖼮𖽶𖾐，𖼞𖽚 𖼀𖽑𖽚𖾐 𖼐𖽑𖽡𖾐 𖼈𖽳𖾐 𖼣𖽙𖾐 𖼖𖽙𖾐 𖼀𖽙𖾐 𖼮𖽨 𖼄𖽡𖽻𖾐 𖽂𖽙𖾐 𖼊𖽚𖾐 𖼊𖽙𖾐． 14 𖽃𖽔𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼄𖽙𖾐 𖼻𖽺𖾑 𖼻𖽺𖾐 𖼮𖽻𖾐 𖼖𖽡𖾐，𖽃𖽙𖾑 𖼄𖽺 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖽃𖽔 𖼊𖽺𖾐 𖼊𖽑𖽜𖾐，𖽃𖽔 𖼊𖽺𖾐 𖼊𖽻 𖼞𖽑𖽚 𖼖𖽡𖾐 𖼣𖽝 𖼳𖽚𖾑 𖼄𖽔 𖼻𖽻𖾐． 15 𖼞𖽪𖾐 𖼮𖽡𖽺𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼊𖽻𖾐 𖼺𖽪𖾐 𖼈𖽪𖾐 𖼺𖽝𖾑 𖼐𖽺𖾐 𖼊𖽻 𖼂𖽪𖾑，𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼞𖽳𖾐 𖼮𖽡𖾐 𖼂𖽦𖾐 𖼞𖽑𖽙𖾐 𖼣𖽻𖾐 𖼺𖽪𖾐，𖼀𖽑𖽚𖾐 𖼊𖽦 𖼦𖽻𖾐 𖼊𖽦 𖼍𖽪𖾐 𖼄𖽔 𖼊𖽙𖾐 𖼳𖽶 𖼣𖽻𖾐． 16 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔 𖼀𖽙 𖽃𖽔 𖼄𖽙𖾐、 𖼈𖽧 𖼄𖽻 𖼐𖽑𖽳𖾐 𖼄𖽻、 𖼐𖽳 𖼦𖽙𖾐 𖼞𖽙𖾐 𖼮𖽑𖽻 𖼖𖽺𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼈𖽪，𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼠𖽻𖾐 𖼞𖽑𖽶𖾐 𖼊𖽑𖽡 𖼹𖽻𖾐 𖼊𖽑𖽺 𖼦𖽹𖾑 𖼳𖽶𖾐 𖼊𖽻𖾐． 17 𖼐𖽑𖽡𖾐 𖼈𖽳𖾐 𖼣𖽙𖾐 𖼄𖽡𖾐 𖼖𖽙𖾐 𖼀𖽙𖾐 𖼺𖽺𖾑，𖼷𖽑𖽻𖾐 𖼄𖽳𖾑 𖼄𖽳 𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽑𖽧𖾐 𖼰𖽴𖾑 𖼊𖽻𖾐． 18 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼈𖽪𖾑 𖼷𖽑𖽜𖾐 𖼊𖽑𖽡 𖼮𖽑𖽡𖾐 𖼖𖽺𖾑 𖼀𖽑𖽧𖾐 𖼦𖽑𖽙𖾐 𖼄𖽔 𖼠𖽸𖾑． 19 𖼐𖽑𖽡𖾐 𖼈𖽳𖾐 𖼻𖽳𖾐 𖼻𖽳𖾐 𖼐𖽑𖽧𖾐 𖼻𖽺𖾐 𖼷𖽳𖾑 𖼊𖽙𖾐 𖼖𖽡𖾐．𖽃𖽔𖾐 𖼺𖽺𖾑，𖼈𖽦𖾐 𖼳𖽨𖾐 𖼰𖽨𖾑 𖽂𖽙𖾐 𖼊𖽙𖾐．”
𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼀𖽑𖽧𖾐 𖼄𖽶𖾑 𖼊𖽻𖾐 𖼞𖽳𖾐 𖼺𖽡𖾐 𖼹𖽦𖾑 𖼊𖽻 ( 𖼊𖽑𖽹𖾑 24：15-21；𖼞𖽑𖽜 13：14-19 )
20 𖼐𖽑𖽡𖾐 𖼈𖽳𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼊𖽑𖽺 𖼄𖽦 𖼀𖽑𖽙 𖼮𖽑𖽢𖾑 𖼰𖽻𖾑 𖼍𖽡 𖼞𖽳𖾐 𖼄𖽡𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼄𖽡𖾐 𖼮𖽡𖽦𖾐 𖼀𖽑𖽢 𖼊𖽻𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼐𖽳 𖼖𖽻𖾐 𖼦𖽑𖽻𖾐 𖼞𖽑𖽶𖾑 𖼺𖽝𖾑 𖼊𖽙𖾐． 21 𖼞𖽑𖽶𖾑 𖼮𖽶𖾐，𖼽𖽚 𖼊𖽑𖽦𖾑 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐，𖼀𖽑𖽻𖾐 𖽂𖽙 𖼰𖽡𖽺𖾐 𖼊𖽑𖽺 𖼊𖽦𖾐 𖼽𖽡𖾐 𖼖𖽡𖾐；𖼖𖽪𖾐 𖼞𖽑𖽶𖾐 𖼮𖽻𖾐 𖼺𖽪𖾐，𖼊𖽚𖾐 𖼖𖽻𖾐 𖼖𖽡𖾐；𖼮𖽑𖽡𖽦𖾐 𖼠𖽻𖾐 𖼞𖽑𖽶𖾐 𖼮𖽻𖾐 𖼺𖽪𖾐，𖼖𖽪𖾐 𖼞𖽑𖽶𖾐 𖼊𖽑𖽔 𖼊𖽡 𖼽𖽡𖾐． 22 𖼞𖽪𖾐 𖼮𖽡𖽺𖾐，𖼦𖽑𖽺𖾑 𖼮𖽙 𖼄𖽳𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼣𖽻𖾐， 《𖼺𖽡 𖼮𖽡𖾐 𖼺𖽪𖾑》𖼊𖽑𖽺 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑 𖼞𖽜 𖼄𖽳𖾑 𖼄𖽳 𖼊𖽚𖾐 𖼊𖽑𖽧 𖼖𖽻𖾐 𖼊𖽻𖾐． 23 𖼞𖽑𖽶𖾑 𖼮𖽶𖾐 𖼐𖽑𖽡𖾐 𖼦𖽑𖽦，𖼄𖽺 𖼊𖽦𖾐 𖼺𖽪𖾐 𖼐𖽺𖾐 𖽃𖽔𖾐 𖼞𖽶𖾑 𖼊𖽑𖽺 𖼀𖽕𖾑 𖼮𖽸𖾐 𖼍𖽻𖾐 𖼍𖽳𖾐 𖼺𖽺 𖼺𖽪𖾐，𖼈𖽡𖾑 𖼞𖽑𖽙 𖼮𖽻𖾐 𖼊𖽻𖾐！ 𖼞𖽪𖾐 𖼮𖽡𖽺𖾐，𖼦𖽑𖽺𖾑 𖼄𖽡𖾐 𖼊𖽺𖾐 𖼈𖽡𖾑 𖼞𖽑𖽙 𖼈𖽳 𖼄𖽙𖾐 𖼷𖽶𖾐 𖼄𖽳𖾐 𖼊𖽻𖾐，𖼦𖽑𖽺𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼀𖽶 𖼻𖽶 𖼮𖽑𖽡𖾐 𖼷𖽶𖾐 𖼄𖽳𖾐 𖼊𖽻𖾐． 24 𖼽𖽻 𖼈𖽳𖾐 𖼊𖽑𖽡 𖼹𖽻𖾐 𖼳𖽶𖾐 𖽃𖽔𖾑 𖼊𖽑𖽙 𖼞𖽑𖽶𖾐 𖼀𖽜 𖼊𖽻𖾐，𖼊𖽑𖽡 𖼹𖽻𖾐 𖼊𖽑𖽺 𖼵𖽪𖾐 𖼞𖽑𖽙𖾐 𖼣𖽻𖾐 𖼠𖽚 𖼞𖽳𖾐 𖼮𖽑𖽡𖾐 𖼽𖽡𖾐 𖼊𖽻𖾐．𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼷𖽑𖽜𖾑 𖼷𖽑𖽜𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼷𖽑𖽻𖾐 𖼞𖽜 𖼐𖽑𖽕𖾐 𖼀𖽑𖽧𖾐 𖼺𖽺𖾑，𖼞𖽑𖽻𖾐 𖼂𖽻𖾑 𖼀𖽑𖽙 𖼷𖽑𖽻𖾐 𖼞𖽜 𖼠𖽕 𖼞𖽳𖾐 𖼐𖽑𖽡𖾐 𖼦𖽑𖽦 𖼀𖽡𖾐 𖼦𖽑𖽻𖾐 𖼖𖽙𖾐 𖼮𖽑𖽡𖾐 𖼊𖽻𖾐．
𖼷𖽑𖽻𖾐 𖼻𖽙 𖼹𖽦𖾑 𖼞𖽚 𖼖𖽻𖾐 𖼞𖽳𖾐 𖽃𖽔𖾐 𖼈𖽧𖾐 ( 𖼊𖽑𖽹𖾑 24：29-31；𖼞𖽑𖽜 13： 24-27 )
25 𖼄𖽶 𖼐𖽑𖽡𖾐、 𖼳𖽨𖾐 𖼀𖽙𖾐、 𖼠𖽳𖾐 𖼻𖽙 𖼖𖽺𖾑 𖼮𖽑𖽻 𖼄𖽔 𖼺𖽶𖾑 𖼳𖽶 𖼄𖽡𖽻 𖼊𖽚𖾐 𖼊𖽑𖽧 𖼖𖽻𖾐 𖼊𖽻𖾐，𖼊𖽺𖾐 𖼊𖽑𖽺 𖼞𖽳𖾐 𖼠𖽚 𖼄𖽳𖾑 𖼄𖽳 𖼖𖽺𖾑 𖼳𖽚𖾑 𖼞𖽑𖽪 𖼮𖽻𖾐，𖼦𖽑𖽔𖾐 𖼖𖽺𖾑 𖼦𖽜𖾐 𖼄𖽙𖾐 𖼈𖽡𖾐 𖼹𖽧𖾑 𖼀𖽶𖾐 𖼮𖽑𖽡𖽪 𖼖𖽙𖾐 𖼀𖽙𖾐 𖼺𖽺𖾑，𖼐𖽑𖽧𖾐 𖼷𖽪 𖼠𖽻𖾐 𖼄𖽺 𖼊𖽻𖾐． 26 𖼄𖽶 𖼠𖽻𖾐 𖼊𖽑𖽺 𖼠𖽳𖾐 𖼻𖽙 𖼠𖽳𖾐 𖼄𖽙𖾐 𖼖𖽺𖾑 𖼐𖽑𖽡𖽻𖾐 𖼍𖽪𖾐 𖼖𖽻𖾐 𖼊𖽻𖾐，𖼷𖽑𖽻𖾐 𖼣𖽝 𖼺𖽺𖾑 𖼞𖽑𖽻𖾑 𖼊𖽺𖾐 𖼊𖽑𖽺 𖼞𖽳𖾐 𖼮𖽑𖽡𖾐 𖼖𖽻𖾐 𖼮𖽻𖾐 𖼺𖽪𖾐 𖼈𖽡𖾑 𖼞𖽑𖽙 𖼈𖽳 𖼖𖽙𖾐 𖼮𖽑𖽡𖾐，𖼮𖽡𖽮𖾐 𖼰𖽡 𖼺𖽺𖾑 𖼳𖽨𖾐 𖼖𖽺𖾑 𖼞𖽶𖾐 𖼮𖽑𖽶 𖼊𖽑𖽺 𖼄𖽔 𖼣𖽴𖾑 𖼦𖽑𖽻𖾐． 27 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼐𖽦𖾐 𖼄𖽡𖽻𖾐 𖼊𖽻𖾐，𖼷𖽑𖽻𖾐 𖼻𖽙 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼮𖽻𖾐，𖼄𖽶 𖼳𖽳𖾐 𖼀𖽡𖾐 𖼦𖽑𖽻𖾐，𖼍𖽡𖾐 𖼮𖽑𖽙𖾐 𖼊𖽑𖽺 𖼊𖽡𖾐 𖼹𖽺𖾐 𖼖𖽻𖾐 𖼊𖽻𖾐． 28 𖼄𖽡𖽻 𖼦𖽑𖽺𖾑 𖼹𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼂𖽺𖾐 𖼳𖽡𖽻𖾐 𖼞𖽜𖾐 𖼺𖽜𖾐 𖼻𖽻𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖽂𖽙𖾐 𖼈𖽳 𖼞𖽑𖽚 𖼖𖽻𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼐𖽳 𖼖𖽻𖾐 𖼦𖽑𖽻𖾐．
𖼮𖽑𖽡 𖼺𖽳 𖼄𖽡 𖼷𖽡𖾐 𖼍𖽻𖾐 𖼊𖽻 ( 𖼊𖽑𖽹𖾑 24：32-35；𖼞𖽑𖽜 13：28-31 )
29 𖼽𖽺𖾐 𖼺𖽪𖾐 𖼹𖽦𖾑 𖼍𖽻𖾐 𖼊𖽻 𖼊𖽑𖽡 𖼊𖽝𖾐 𖼻𖽜 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼮𖽑𖽡 𖼺𖽳 𖼄𖽡 𖼷𖽡𖾐 𖼐𖽺𖾐 𖼞𖽑𖽙𖾐 𖼣𖽻𖾐 𖼳𖽶 𖼺𖽧𖾐 𖼷𖽡𖾐 𖼖𖽙𖾐 𖼐𖽦𖾐 𖼄𖽺！ 30 𖼽𖽻 𖼈𖽳𖾐 𖼞𖽑𖽙 𖼊𖽑𖽻𖾐 𖼀𖽑𖽦 𖼐𖽜𖾐，𖼐𖽑𖽡𖾐 𖼈𖽳𖾐 𖼐𖽦𖾐 𖼄𖽡𖽻𖾐 𖼞𖽑𖽶𖾑 𖼮𖽶𖾐 𖼺𖽝𖾑 𖼊𖽙𖾐，𖼳𖽡𖽺𖾐 𖼞𖽑𖽶𖾐 𖼮𖽑𖽡𖾐 𖼖𖽻𖾐 𖼮𖽻𖾐． 31 𖽃𖽔𖾐 𖼺𖽺𖾑，𖼄𖽡𖽻 𖼦𖽑𖽺𖾑 𖼹𖽻𖾐 𖽂𖽙𖾐 𖼮𖽻𖾐 𖽂𖽙𖾐 𖼊𖽚𖾐 𖼊𖽑𖽧 𖼖𖽻𖾐，𖼐𖽑𖽡𖾐 𖼈𖽳𖾐 𖼐𖽦𖾐 𖼄𖽡𖽻𖾐 𖼞𖽑𖽶𖾑 𖼮𖽶𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼐𖽳 𖼖𖽻𖾐 𖼦𖽑𖽻𖾐 𖼞𖽑𖽶𖾑 𖼺𖽝𖾑 𖼖𖽡𖾐． 32 𖼣𖽙𖾐 𖼠𖽕𖾐 𖼰𖽶𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼦𖽑𖽺𖾑 𖼊𖽑𖽙𖾐 𖼻𖽳𖾐 𖼠𖽚 𖼄𖽔 𖼦𖽑𖽻𖾐 𖼺𖽺，𖼄𖽡𖽻 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼊𖽚𖾐 𖼊𖽑𖽧 𖼖𖽻𖾐 𖼊𖽻𖾐． 33 𖼄𖽶 𖼠𖽻𖾐 𖼄𖽡𖾑 𖼐𖽦𖾐 𖼀𖽑𖽧𖾐 𖼦𖽑𖽙𖾐 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼊𖽻 𖼂𖽪𖾑 𖼀𖽑𖽧𖾐 𖼦𖽑𖽙𖾐 𖼄𖽔 𖼠𖽸𖾑．”
𖼄𖽔 𖼐𖽙 𖼄𖽙𖾐 𖼦𖽙𖾑 𖼮𖽑𖽡 𖼮𖽑𖽡 𖼮𖽡𖽺𖾐 𖼖𖽡𖾐
34 “𖼐𖽑𖽡𖾐 𖼈𖽳𖾐 𖼷𖽜𖾐 𖼍𖽳𖾐 𖼖𖽡𖾐！ 𖼐𖽑𖽡𖾐 𖼈𖽳𖾐 𖼞𖽳𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾑 𖼷𖽙 𖼺𖽳 𖼊𖽻𖾐 𖼦𖽑𖽻𖾑、 𖼮𖽶𖾐 𖼊𖽻𖾐 𖼮𖽶𖾐 𖼽𖽦 𖼐𖽺𖾐 𖼊𖽺𖾐 𖼊𖽑𖽺 𖼐𖽑𖽧𖾐 𖼀𖽙𖾐 𖼞𖽜 𖼞𖽻𖾐 𖼮𖽳 𖼍𖽡 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼷𖽑𖽻𖾐 𖼻𖽙 𖼞𖽚 𖼖𖽻𖾐 𖼞𖽳𖾐 𖼐𖽑𖽡𖾐 𖼦𖽑𖽦，𖼞𖽑𖽶𖾑 𖼣𖽙𖾑 𖼂𖽜𖾑 𖼊𖽻 𖼹𖽺𖾐 𖼖𖽻𖾐 𖼖𖽙𖾐 𖼺𖽶𖾑，𖼐𖽕 𖼊𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼮𖽑𖽡𖾐 𖼖𖽻𖾐 𖼊𖽻𖾐． 35 𖼞𖽪𖾐 𖼮𖽡𖽺𖾐，𖼷𖽑𖽻𖾐 𖼻𖽙 𖼞𖽚 𖼖𖽻𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼞𖽑𖽶𖾑 𖼊𖽺𖾐 𖼊𖽑𖽺 𖼷𖽑𖽻𖾐 𖼊𖽑𖽡 𖼽𖽚𖾑 𖼽𖽚𖾐 𖼞𖽳𖾐 𖼮𖽑𖽡𖾐 𖼖𖽻𖾐 𖼊𖽻𖾐． 36 𖼐𖽑𖽡𖾐 𖼈𖽳𖾐 𖼄𖽔 𖼐𖽙 𖼄𖽙𖾐 𖼦𖽙𖾑 𖼮𖽑𖽡，𖼻𖽳𖾐 𖼻𖽳𖾐 𖼮𖽑𖽡 𖼮𖽡𖽺𖾐 𖼖𖽡𖾐．𖽃𖽔𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼞𖽜 𖼞𖽑𖽙𖾐 𖼊𖽚𖾐 𖼖𖽻𖾐 𖼊𖽻𖾐 𖼺𖽪𖾐 𖼈𖽡𖾑 𖼞𖽑𖽙 𖼦𖽑𖽺𖾑 𖼹𖽻𖾐 𖼊𖽑𖽺 𖼮𖽡𖽪 𖼊𖽜𖾑，𖼷𖽑𖽻𖾐 𖼻𖽙 𖽃𖽙𖾑 𖼄𖽺 𖼮𖽑𖽡𖽺 𖽂𖽙𖾐 𖼦𖽑𖽡𖽚 𖼻𖽺𖾐 𖼊𖽙𖾐．”