𖼽𖽺𖾐 𖼺𖽪𖾐 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 ( 𖼊𖽑𖽹𖾑 28：1-8；𖼞𖽑𖽜16：1-8；𖼽𖽱𖾐 20：1-10 )
24
1 𖼖𖽡 𖼂𖽦𖾑 𖼐𖽑𖽡𖾐，𖼄𖽶 𖼊𖽑𖽡 𖼞𖽑𖽶𖾑 𖼮𖽶𖾐，𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽶𖾑 𖼹𖽻𖾐 𖼞𖽑𖽙𖾐 𖼂𖽺𖾐 𖼳𖽡𖽻𖾐 𖼍𖽙𖾑 𖼺𖽪𖾐 𖼳𖽡𖽻𖾐 𖼷𖽑𖽳𖾐 𖼈𖽺𖾐 𖼖𖽧 𖼀𖽳𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐， 2 𖼖𖽧 𖼀𖽳𖾐 𖼖𖽻𖾑 𖼞𖽪𖾐 𖼷𖽑𖽶 𖼺𖽪𖾐 𖼖𖽚𖾐 𖼄𖽙𖾐 𖼖𖽜𖾐 𖼊𖽑𖽡 𖼀𖽳 𖼍𖽙𖾑 𖼍𖽳𖾐 𖼞𖽳𖾐 𖼄𖽡𖽻𖾐． 3 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼖𖽧 𖼀𖽳𖾐 𖼞𖽑𖽶𖾐 𖼊𖽡 𖼽𖽡𖾐．𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼺𖽪𖾐 𖼺𖽡 𖼀𖽑𖽙 𖼞𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖼰𖽙𖾐 𖼄𖽔 𖼄𖽡𖽻𖾐． 4 𖼽𖽻 𖼈𖽳𖾐 𖼄𖽡𖽻 𖼦𖽑𖽺𖾑 𖼖𖽙𖾐 𖼀𖽙𖾐 𖼞𖽑𖽙 𖼣𖽝 𖼞𖽑𖽶𖾑 𖼮𖽶𖾐，𖼐𖽕 𖼊𖽺𖾐 𖼷𖽑𖽻𖾐 𖼐𖽑𖽡 𖼽𖽚𖾐 𖼽𖽻 𖼈𖽳𖾐 𖼀𖽙 𖼮𖽑𖽶𖾐 𖼦𖽑𖽡𖽚 𖼍𖽳𖾐，𖼀𖽑𖽡𖽻𖾐 𖼷𖽑𖽶 𖼀𖽙𖾐 𖼍𖽪𖾐 𖼖𖽻𖾐．5 𖼽𖽻 𖼈𖽳𖾐 𖼮𖽡𖽮𖾐 𖼰𖽡，𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐，𖼈𖽪𖾑 𖼊𖽡𖾐 𖼮𖽑𖽳 𖼄𖽔 𖼂𖽡𖾑．𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼷𖽑𖽻𖾐 𖼳𖽶𖾐 𖼠𖽻𖾐 𖼊𖽑𖽺 𖼷𖽑𖽻𖾐 𖼠𖽙𖾑 𖼰𖽙𖾐 𖼐𖽺𖾑？ 6 𖼽𖽻 𖼦𖽑𖽺𖾑 𖼠𖽻𖾐 𖼄𖽔 𖼮𖽻𖾐，𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼦𖽑𖽙𖾐 𖼳𖽶 𖼣𖽻𖾐．𖼽𖽻 𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼮𖽻𖾐 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼀𖽦𖾐 𖼠𖽚 𖼺𖽪𖾐，𖼐𖽑𖽡𖾐 𖼈𖽳𖾐 𖼦𖽙𖾑 𖼮𖽑𖽡 𖼖𖽡𖾐． 7 𖼽𖽻 𖼀𖽦𖾐：‘ 𖼷𖽑𖽻𖾐 𖼻𖽙 𖼊𖽑𖽺 𖼷𖽑𖽜𖾑 𖼷𖽑𖽜𖾐 𖼰𖽡𖽻𖾐 𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐，𖼳𖽳𖾑 𖼺𖽧𖾐 𖼳𖽡𖽦𖾑 𖼊𖽑𖽺 𖼍𖽡，𖼺𖽙𖾐 𖼐𖽑𖽡𖾐 𖼖𖽚 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼊𖽻𖾐．’”
8 𖼽𖽻 𖼈𖽳𖾐 𖼽𖽺𖾐 𖼺𖽪𖾐 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼣𖽝 𖼦𖽙𖾑 𖼮𖽑𖽡 𖼍𖽪𖾐 𖼖𖽻𖾐． 9 𖽃𖽔𖾐 𖼺𖽺𖾑，𖼖𖽧 𖼀𖽳𖾐 𖼞𖽳𖾐 𖼮𖽑𖽻𖾐 𖼞𖽚 𖼽𖽡𖾐，𖼄𖽡𖽻 𖼦𖽑𖽺𖾑 𖼹𖽻𖾐 𖼀𖽦𖾐 𖼹𖽡𖾐 𖼺𖽪𖾐 𖼷𖽑𖽡𖾐 𖼍𖽡𖾑 𖼽𖽚𖾐 𖼐𖽺𖾐 𖼠𖽳𖾐 𖼖𖽪𖾐 𖼷𖽑𖽻𖾐 𖼊𖽑𖽺 𖼰𖽨𖾐． 10 𖼄𖽡𖽻 𖼦𖽑𖽺𖾑 𖼹𖽻𖾐 𖼀𖽦𖾐 𖼹𖽡𖾐 𖼺𖽪𖾐 𖼊𖽑𖽺 𖼊𖽑𖽧 𖼺𖽪𖾐 𖼞𖽑𖽶𖾑 𖼄𖽚 𖼍𖽕𖾑 𖼖𖽔𖾐 𖼺𖽪𖾐 𖼄𖽔 𖼖𖽡𖾑 𖼽𖽕𖾑 ，𖼦𖽑𖽔𖾐 𖼖𖽺𖾑 𖼽𖽔 𖼠𖽴𖾑 𖼽𖽻 𖼄𖽙𖾐 𖼄𖽔 𖼖𖽡𖾑 𖼽𖽕𖾑 𖼐𖽺𖾐 𖼽𖽱𖾐 𖼽𖽕𖾑 𖼐𖽕 ，𖼹𖽦𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼺𖽪𖾐 𖼠𖽳𖾐 𖼖𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽶𖾑 𖼹𖽻𖾐 𖼣𖽻𖾐． 11 𖼹𖽡𖾐 𖼺𖽪𖾐 𖼊𖽡 𖼮𖽑𖽻，𖼽𖽻 𖼈𖽳𖾐 𖼄𖽔 𖼠𖽕𖾐 𖼊𖽻 𖼀𖽦𖾐．𖽃𖽔𖾐 𖼺𖽺𖾑，𖼊𖽻 𖼄𖽔 𖼮𖽶𖾐． 12 𖼂𖽡 𖼍𖽴 𖼍𖽪𖾐 𖼖𖽻𖾐，𖼰𖽡𖽴 𖼖𖽧 𖼀𖽳𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐，𖼈𖽪𖾑 𖼊𖽡𖾐 𖼞𖽸 𖼹𖽺𖾐 𖼖𖽧 𖼀𖽳𖾐 𖼞𖽑𖽶𖾐 𖼐𖽦𖾐，𖼽𖽦 𖼄𖽳𖾐 𖼮𖽑𖽙𖾐 𖼍𖽺𖾑 𖼞𖽑𖽻𖾑 𖼍𖽙𖾑 𖼞𖽳𖾐 𖼄𖽡𖽻𖾐 𖼺𖽺𖾑，𖼽𖽻 𖼞𖽚 𖼽𖽡𖾐 𖼦𖽑𖽙𖾐，𖼞𖽑𖽙𖾐 𖼊𖽚𖾐 𖼺𖽪𖾐 𖼄𖽡𖽻 𖼖𖽙𖾐 𖼀𖽙𖾐 𖼦𖽑𖽔𖾐 𖼮𖽶𖾐 𖼞𖽑𖽙 𖼣𖽝．
𖼽𖽺𖾐 𖼺𖽪𖾐 𖼽𖽡 𖼄𖽔 𖼈𖽪 𖼺𖽶𖾐 𖼮𖽨𖾐 𖼄𖽙𖾐 𖼊𖽑𖽺 𖼊𖽚𖾐 𖼊𖽑𖽧 𖼖𖽻𖾐 ( 𖼞𖽑𖽜 16：12-13 )
13 𖼦𖽑𖽔𖾐 𖼖𖽺𖾑 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼣𖽻𖾐，𖼷𖽻𖾐 𖼺𖽪𖾐 𖼠𖽻𖾐 𖼞𖽑𖽶𖾐 𖼐𖽑𖽡 𖼽𖽚𖾐 𖼽𖽡 𖼄𖽔 𖼈𖽪 𖼺𖽶𖾐 𖼮𖽑𖽡𖽦𖾐 𖼠𖽻𖾐 𖼽𖽡𖾐．𖼮𖽑𖽡𖽦𖾐 𖼠𖽻𖾐 𖼞𖽑𖽶𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼊𖽑𖽺 𖽃𖽔 𖼖𖽙𖾐 𖼷𖽑𖽡𖾐 𖼍𖽡𖾑 𖽃𖽶𖾐 𖼮𖽨 𖼄𖽡𖾐 \fr 24．13 \ft 𖽃𖽶𖾐 𖼮𖽨 𖼄𖽡𖾐，𖼦𖽑𖽺𖾑 𖼳𖽡𖽦𖾑 𖼈𖽪𖾐 𖼞𖽳𖾐 “𖼠𖽙𖾐 𖼖𖽡 ” 𖼞𖽑𖽶𖾑 𖼣𖽻𖾐． 𖼺𖽺𖾑 𖼰𖽨𖾑． 14 𖼽𖽻 𖼈𖽳𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼊𖽚𖾐 𖼊𖽑𖽧 𖼖𖽻𖾐 𖼺𖽪𖾐 𖼄𖽡𖽻 𖼞𖽑𖽶𖾑 𖼦𖽑𖽺． 15 𖼷𖽙𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼺𖽪𖾐 𖼺𖽜 𖼽𖽻 𖼈𖽳𖾐 𖼖𖽙𖾐 𖼐𖽳 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽨𖾐 𖼺𖽜． 16 𖼦𖽑𖽻𖾐 𖼊𖽑𖽻𖾐，𖼽𖽻 𖼈𖽳𖾐 𖼄𖽦𖾐 𖼊𖽪 𖼐𖽦𖾐 𖼮𖽡𖾐 𖼄𖽔 𖼠𖽸𖾑 𖼺𖽺𖾑，𖼽𖽺𖾐 𖼺𖽪𖾐 𖼊𖽑𖽺 𖼵𖽜𖾑 𖼊𖽑𖽧 𖼄𖽔 𖼖𖽻𖾐．
17 𖼽𖽺𖾐 𖼺𖽪𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖽂𖽙𖾐 𖼺𖽜 𖽂𖽙𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼦𖽑𖽺 𖼺𖽪𖾐 𖼄𖽡𖽻，𖼞𖽑𖽶𖾑 𖽃𖽔 𖼊𖽺𖾑 𖼳𖽶 𖼣𖽻𖾐 𖼐𖽺𖾑？”
𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼦𖽑𖽡𖽚 𖼞𖽑𖽻𖾑 𖼐𖽙，𖼮𖽑𖽻 𖼄𖽦𖾐 𖼮𖽑𖽧𖾐 𖼠𖽴 𖼷𖽚𖾐． 18 𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼠𖽻𖾐 𖼊𖽑𖽺 𖼠𖽴 𖼖𖽡𖽚 𖼂𖽔𖾐 𖼄𖽡𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼽𖽻 𖼊𖽑𖽺 𖼊𖽻 𖼞𖽑𖽚：“𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼺𖽙𖾐 𖼈𖽡𖾐 𖼄𖽪𖾐 𖼺𖽪𖾐，𖼦𖽑𖽺𖾑 𖼐𖽑𖽡 𖼺𖽙𖾐 𖼐𖽑𖽡𖾐 𖼞𖽑𖽶𖾑 𖼠𖽻𖾐 𖼞𖽑𖽙𖾐 𖼊𖽚𖾐 𖼄𖽡𖽻，𖼐𖽑𖽡𖾐 𖼍𖽺𖾑 𖼄𖽔 𖼺𖽝𖾑 𖼖𖽔？”
19 𖼽𖽻 𖼀𖽦𖾐：“𖽃𖽔 𖼊𖽺𖾑 𖼳𖽶 𖼄𖽡𖽻 𖼣𖽻𖾐 𖼐𖽺𖾑？”
𖼽𖽻 𖼈𖽳𖾐 𖼀𖽦𖾐：“𖼐𖽕 𖼺𖽔 𖼖𖽴𖾑 𖼺𖽪𖾐 𖼷𖽑𖽻𖾐 𖼽𖽺𖾐 𖼺𖽪𖾐 𖼞𖽳𖾐 𖼄𖽡𖽻 𖼣𖽻𖾐．𖼽𖽻 𖼺𖽡𖾐 𖼻𖽙 𖼊𖽑𖽡 𖼽𖽚𖾐 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖼐𖽺𖾐 𖼷𖽑𖽻𖾐 𖼀𖽺 𖽃𖽙𖾑 𖼄𖽺 𖼮𖽑𖽡𖽺 𖼊𖽻 𖼊𖽑𖽜𖾐 𖼄𖽡𖽻 𖼂𖽺𖾐 𖽂𖽙 𖼐𖽑𖽡𖾐 𖼈𖽳 𖼮𖽻𖾐． 20 𖼣𖽙𖾐 𖼈𖽳𖾐 𖼞𖽳𖾐 𖼍𖽡𖾐 𖼄𖽻 𖼈𖽪𖾑 𖼐𖽺𖾐 𖼷𖽶 𖼄𖽻 𖼞𖽑𖽶𖾑 𖼹𖽻𖾐 𖼽𖽻 𖼊𖽑𖽺 𖼵𖽪𖾐 𖼂𖽡𖾐 𖼽𖽡𖾐，𖼳𖽶𖾐 𖼽𖽺𖾐 𖼮𖽑𖽡𖽪𖾑 𖼍𖽧𖾑，𖼳𖽳𖾑 𖼺𖽧𖾐 𖼳𖽡𖽦𖾑 𖼊𖽑𖽺 𖼍𖽡． 21 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼈𖽳𖾐 𖽃𖽙𖾑 𖼄𖽺 𖼊𖽑𖽙 𖼞𖽑𖽙𖾐 𖼐𖽦𖾐 𖼳𖽡𖽻𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼈𖽳 𖼞𖽑𖽚 𖼖𖽻𖾐 𖼊𖽻𖾐 𖼺𖽪𖾐 𖼞𖽑𖽶𖾑 𖼽𖽻 𖼣𖽻𖾐．𖼦𖽑𖽺𖾑 𖼖𖽙𖾐 𖼺𖽶𖾑 𖼍𖽺𖾑 𖼄𖽔 𖼣𖽻𖾐，𖼄𖽡𖽻 𖼦𖽑𖽺𖾑 𖼊𖽚𖾐 𖼺𖽪𖾐 𖼺𖽙𖾐 𖼐𖽑𖽡𖾐 𖼖𖽚 𖼦𖽑𖽻𖾐．
22 𖼹𖽦𖾑 𖼣𖽙𖾐 𖼈𖽳𖾐 𖼠𖽻𖾐 𖼊𖽑𖽺 𖼻𖽙 𖼄𖽳 𖼄𖽡𖾐 𖼐𖽜𖾐 𖼊𖽑𖽡 𖼹𖽻𖾐 𖼣𖽙𖾐 𖼈𖽳𖾐 𖼞𖽜 𖼞𖽑𖽙 𖼣𖽝 𖼺𖽪𖾐，𖼽𖽻 𖼈𖽳𖾐 𖼷𖽑𖽶𖾐 𖼐𖽦 𖼖𖽧 𖼀𖽳𖾐 𖼞𖽳𖾐 𖼞𖽑𖽻𖾑 𖼽𖽡𖾐， 23 𖼽𖽻 𖼞𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖼰𖽙𖾐 𖼄𖽔 𖼄𖽡𖽻𖾐．𖼽𖽻 𖼈𖽳𖾐 𖼞𖽚 𖼖𖽻𖾐 𖼣𖽙𖾐 𖼈𖽳𖾐 𖼖𖽙𖾐 𖼀𖽦𖾐 𖼊𖽑𖽧，𖼄𖽶 𖼹𖽡𖾐 𖼖𖽦 𖼊𖽚𖾐 𖼊𖽑𖽧 𖼖𖽻𖾐 𖼽𖽻 𖼈𖽳𖾐 𖼄𖽡𖽻𖾐，𖼄𖽶 𖼹𖽡𖾐 𖼖𖽦 𖼀𖽦𖾐 𖼽𖽻 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼦𖽑𖽙𖾐． 24 𖼦𖽑𖽔𖾐 𖼖𖽺𖾑 𖼣𖽙𖾐 𖼈𖽳𖾐 𖼠𖽻𖾐 𖼊𖽑𖽺 𖼞𖽳𖾐 𖼷𖽑𖽻𖾐 𖼊𖽑𖽡 𖼹𖽻𖾐 𖼖𖽧 𖼀𖽳𖾐 𖼞𖽳𖾐 𖼞𖽑𖽻𖾑 𖼽𖽡𖾐，𖼞𖽑𖽙𖾐 𖼄𖽡𖽻𖾐 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽶𖾑 𖼹𖽻𖾐 𖼀𖽦𖾐 𖼖𖽙𖾐 𖼺𖽶𖾑，𖼽𖽻 𖼊𖽑𖽺 𖼍𖽺𖾑 𖼄𖽔 𖼄𖽡𖽻𖾐 𖼦𖽑𖽙𖾐．”
25 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽡𖽳𖾐 𖼍𖽺 𖼺𖽪𖾐 𖼷𖽑𖽻𖾐 𖽃𖽔𖾐！ 𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐 𖼖𖽺𖾑，𖼺𖽡𖾐 𖼻𖽙 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽶𖾐 𖼄𖽔 𖼦𖽶𖾐 𖼐𖽺𖾑？ 26 𖼰𖽡𖾐 𖼍𖽮 𖼷𖽑𖽜𖾑 𖼷𖽑𖽜𖾐 𖼦𖽑𖽺𖾑 𖼻𖽻𖾐 𖼠𖽻𖾐 𖼰𖽡𖽳𖾐 𖼷𖽶𖾐 𖼄𖽳𖾐 𖼺𖽺𖾑，𖼽𖽻 𖼞𖽳𖾐 𖼄𖽶 𖼳𖽳𖾐 𖼞𖽑𖽶𖾐 𖼊𖽡 𖼽𖽡𖾐，𖼦𖽑𖽺𖾑 𖼖𖽙𖾐 𖼺𖽶𖾑 𖼣𖽻𖾐 𖼄𖽔 𖼷𖽻 𖼖𖽔？” 27 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼞𖽳𖾐 𖼮𖽑𖽻𖾐 𖼺𖽡𖾐 𖼻𖽙 𖼞𖽑𖽙𖾐 𖼣𖽻𖾐 𖼖𖽙𖾐 𖼮𖽑𖽡𖾐，《 𖼺𖽡 𖼮𖽡𖾐 𖼺𖽪𖾑》 𖼊𖽑𖽺 𖼞𖽑𖽙𖾐 𖼈𖽝 𖼽𖽻 𖼖𖽙𖾐 𖼊𖽑𖽪 𖼺𖽪𖾐 𖼊𖽻 𖼂𖽪𖾑，𖼽𖽺𖾐 𖼺𖽪𖾐 𖼄𖽳𖾑 𖼄𖽳 𖼦𖽑𖽺 𖼀𖽑𖽪𖾐 𖼽𖽻 𖼈𖽳𖾐 𖼞𖽜 𖼄𖽡𖾐 𖼀𖽻𖾐 𖼦𖽑𖽻𖾐．
28 𖼽𖽻 𖼈𖽳𖾐 𖼽𖽡 𖼄𖽔 𖼈𖽪 𖼺𖽶𖾐 𖼮𖽑𖽡𖽦𖾐 𖼠𖽻𖾐 𖼮𖽑𖽡𖾐 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼺𖽪𖾐 𖼦𖽑𖽔𖾐 𖼖𖽺𖾑 𖼺𖽜 𖽃𖽙𖾑 𖼄𖽺 𖼽𖽡𖾐 𖼊𖽻𖾐 𖼖𖽙𖾐 𖼺𖽶𖾑． 29 𖼽𖽻 𖼈𖽳𖾐 𖼦𖽑𖽔𖾐 𖼮𖽶𖾐 𖼽𖽻 𖼊𖽑𖽺 𖼞𖽑𖽜𖾐 𖼺𖽺𖾑，𖼀𖽦𖾐：“𖼄𖽶 𖼮𖽑𖽧 𖼦𖽑𖽻𖾐，𖽃𖽔𖾑 𖼄𖽶 𖼐𖽑𖽡𖾐 𖼖𖽺𖾑 𖼖𖽻𖾑 𖼹𖽺𖾐 𖼽𖽡𖾐 𖼦𖽑𖽙𖾐，𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼦𖽑𖽦 𖼍𖽺𖾑 𖼻𖽻𖾐！” 𖽃𖽔𖾐 𖼺𖽺𖾑，𖼽𖽺𖾐 𖼺𖽪𖾐 𖼊𖽡 𖼽𖽡𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼦𖽑𖽦． 30 𖼷𖽙𖾐 𖼷𖽙 𖼞𖽑𖽶𖾑 𖼮𖽶𖾐，𖼽𖽻 𖽃𖽔𖾑 𖼂𖽻𖾐 𖼈𖽺𖾐 𖼍𖽪𖾐 𖼖𖽻𖾐，𖼊𖽡 𖼞𖽔𖾐 𖼞𖽜 𖼦𖽑𖽙𖾐，𖼣𖽕𖾑 𖼀𖽳 𖼷𖽶𖾐 𖼽𖽻 𖼈𖽳𖾐 𖼊𖽑𖽺 𖼞𖽜， 31 𖼽𖽻 𖼈𖽳𖾐 𖼄𖽦𖾐 𖼊𖽪 𖼐𖽦𖾐 𖼮𖽡𖾐 𖼠𖽸𖾑 𖼺𖽺𖾑，𖼽𖽺𖾐 𖼺𖽪𖾐 𖼊𖽑𖽺 𖼵𖽜𖾑 𖼊𖽑𖽧 𖼖𖽻𖾐．𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼺𖽪𖾐 𖼊𖽑𖽺 𖼐𖽕 𖼊𖽺𖾐 𖼄𖽔 𖼄𖽡𖽻𖾐 𖼦𖽑𖽙𖾐．
32 𖼽𖽻 𖼈𖽳𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐：“𖼮𖽨𖾐 𖼄𖽙𖾐 𖼊𖽑𖽺 𖼮𖽻𖾐，𖼽𖽻 𖽃𖽔𖾑 𖼐𖽺𖾑 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐，𖽃𖽔 𖼐𖽺𖾑 𖼊𖽑𖽺 《𖼺𖽡 𖼮𖽡𖾐 𖼺𖽪𖾑》 𖼀𖽦𖾐 𖼄𖽪𖾑 𖼞𖽑𖽶𖾑 𖼮𖽶𖾐，𖽃𖽔 𖼐𖽺𖾑 𖼐𖽑𖽧𖾐 𖼄𖽙𖾐 𖼷𖽑𖽙𖾐 𖼍𖽪𖾐 𖼖𖽻𖾐 𖼄𖽔 𖼣𖽻𖾐 𖼖𖽔？” 33 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼐𖽕 𖼊𖽺𖾐 𖼍𖽪𖾐 𖼖𖽻𖾐，𖼀𖽑𖽚𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼞𖽚 𖼽𖽡𖾐．𖼽𖽻 𖼈𖽳𖾐 𖼐𖽦𖾐 𖼄𖽡𖽻𖾐，𖼹𖽡𖾐 𖼺𖽪𖾐 𖼷𖽑𖽡𖾐 𖼍𖽡𖾑 𖼽𖽚𖾐 𖼐𖽺𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼞𖽑𖽻𖾑 𖼮𖽻𖾐 𖼺𖽪𖾐 𖼷𖽑𖽻𖾐，𖼷𖽙𖾐 𖼖𖽙𖾐 𖼮𖽑𖽻𖾐 𖼞𖽑𖽶𖾑 𖼠𖽻𖾐 𖼻𖽶𖾑 𖼍𖽳𖾐， 34 𖼷𖽙𖾐 𖼖𖽙𖾐 𖼮𖽑𖽻𖾐 𖼦𖽑𖽺 𖼀𖽦𖾐：“𖼺𖽡 𖼀𖽑𖽙 𖼠𖽕𖾐 𖼰𖽶𖾐 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼦𖽑𖽙𖾐，𖼊𖽚𖾐 𖼊𖽑𖽧 𖼖𖽻𖾐 𖼳𖽡𖾐 𖼄𖽴 𖼞𖽜 𖼐𖽦𖾐 𖼄𖽡𖽻𖾐 𖼦𖽑𖽻𖾐．”
35 𖽃𖽔𖾐 𖼺𖽺𖾑，𖼷𖽻𖾐 𖼺𖽪𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼮𖽨𖾐 𖼄𖽙𖾐 𖼊𖽑𖽺 𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐，𖼹𖽦𖾑 𖽃𖽔𖾑 𖼂𖽻𖾐 𖼣𖽕𖾑 𖼞𖽑𖽶𖾑 𖼮𖽶𖾐 𖽃𖽔 𖼊𖽺𖾐 𖼽𖽺𖾐 𖼺𖽪𖾐 𖼊𖽑𖽺 𖼵𖽜𖾑 𖼊𖽑𖽧 𖼖𖽻𖾐 𖼞𖽳𖾐 𖼄𖽡𖽻，𖼄𖽳𖾑 𖼄𖽳 𖼊𖽑𖽡 𖼂𖽦𖾑 𖼀𖽦𖾐 𖼽𖽻 𖼈𖽳𖾐 𖼰𖽨𖾐．
𖼽𖽺𖾐 𖼺𖽪𖾐 𖼊𖽚𖾐 𖼊𖽑𖽧 𖼖𖽻𖾐 𖼷𖽻𖾐 𖼺𖽪𖾐 𖼞𖽜 𖼄𖽡𖽻𖾐 ( 𖼊𖽑𖽹𖾑 28：16-20；𖼞𖽑𖽜16：14-18；𖼽𖽱𖾐 20：19-23 )
36 𖼊𖽻 𖼂𖽪𖾑 𖼊𖽑𖽜𖾐 𖼮𖽻𖾐 𖼺𖽺 𖼞𖽑𖽶𖾑 𖼮𖽶𖾐，𖼽𖽺𖾐 𖼺𖽪𖾐 𖼊𖽚𖾐 𖼊𖽑𖽧 𖼖𖽻𖾐 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼦𖽑𖽡𖽚，𖼀𖽦𖾐：“𖼐𖽑𖽡𖾐 𖼈𖽳𖾐 𖼞𖽜 𖼺𖽙𖾑 𖼺𖽙𖾐 𖼮𖽻𖾐！” 37 𖼽𖽻 𖼈𖽳𖾐 𖼮𖽡𖽮𖾐 𖼞𖽴𖾐 𖼷𖽑𖽚，𖼳𖽨𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽪𖾐 𖼣𖽻𖾐 𖼊𖽡 𖼮𖽑𖽻．
38 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼮𖽡𖽮𖾐 𖼞𖽴𖾐 𖼐𖽺𖾑？𖼦𖽑𖽔𖾐 𖼖𖽺𖾑 𖼊𖽻 𖼄𖽔 𖼮𖽶𖾐 𖼐𖽑𖽧𖾐 𖼄𖽙𖾐 𖼮𖽻𖾐 𖼐𖽺𖾑？ 39 𖼐𖽑𖽡𖾐 𖼈𖽳𖾐 𖼣𖽙𖾐 𖼮𖽑𖽡𖾑 𖼀𖽑𖽦𖾐 𖼖𖽦 𖼀𖽑𖽦𖾐 𖼖𖽙𖾐 𖼐𖽦𖾐！ 𖽃𖽔𖾐 𖼺𖽺𖾑，𖼠𖽕𖾐 𖼰𖽶𖾐 𖼣𖽙𖾐 𖼣𖽻𖾐 𖼞𖽑𖽶𖾑 𖼺𖽝𖾑 𖼊𖽙𖾐．𖼣𖽙𖾐 𖼊𖽑𖽺 𖼄𖽚𖾐 𖼐𖽦𖾐 𖼄𖽺！ 𖼞𖽪𖾐 𖼮𖽡𖽺𖾐，𖼳𖽨𖾐 𖼈𖽶 𖼄𖽔 𖼮𖽻𖾐，𖼦𖽙 𖼄𖽔 𖼮𖽻𖾐．𖼐𖽑𖽡𖾐 𖼈𖽳𖾐 𖼐𖽦𖾐，𖼣𖽙𖾐 𖼦𖽑𖽺𖾑 𖼮𖽻𖾐 𖼍𖽳𖾐 𖼺𖽪𖾐 𖼣𖽻𖾐！” 40 𖼊𖽻 𖼂𖽪𖾑 𖼦𖽑𖽺𖾑 𖼀𖽦𖾐 𖼦𖽑𖽻𖾐 𖼺𖽺𖾑，𖼮𖽑𖽡𖾑 𖼀𖽑𖽦𖾐 𖼖𖽦 𖼀𖽑𖽦𖾐 𖼀𖽑𖽨 𖼽𖽻 𖼈𖽳𖾐 𖼞𖽜 𖼐𖽦𖾐．
41 𖼽𖽻 𖼈𖽳𖾐 𖼞𖽑𖽙 𖼣𖽝 𖼖𖽺𖾑 𖼷𖽑𖽚，𖼽𖽺𖾐 𖼺𖽪𖾐 𖼠𖽕𖾐 𖼰𖽶𖾐 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼦𖽑𖽙𖾐 𖼺𖽪𖾐 𖼣𖽻𖾐 𖼊𖽻 𖼮𖽶𖾐 𖼄𖽔 𖼂𖽡𖾑．𖼽𖽺𖾐 𖼺𖽪𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼷𖽙 𖼊𖽪𖾐 𖼮𖽻𖾐 𖼐𖽺𖾑 𖼄𖽔 𖼮𖽻𖾐？” 42 𖼽𖽻 𖼈𖽳𖾐 𖼮𖽑𖽡𖽪𖾐 𖼊𖽑𖽧 𖼖𖽻𖾐 𖼺𖽪𖾐 𖼣𖽙𖾑 𖼊𖽑𖽡 𖼮𖽑𖽡𖾐 𖼈𖽺𖾐 𖼽𖽻 𖼞𖽜 \fr 24．42 \ft “𖼣𖽙𖾑 𖼊𖽑𖽡 𖼮𖽑𖽡𖾐 𖼐𖽺𖾐 𖼀𖽨 𖼈𖽡𖾐 𖼊𖽑𖽡 𖼮𖽡𖽦 ” 𖼀𖽦𖾐 𖼺𖽪𖾐 𖼖𖽺𖾑 𖼮𖽻𖾐．． 43 𖼽𖽻 𖼷𖽶𖾐 𖼠𖽚 𖼖𖽻𖾐，𖼽𖽻 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼷𖽙 𖼦𖽑𖽙𖾐．
44 𖼽𖽺𖾐 𖼺𖽪𖾐 𖼺𖽡 𖼀𖽑𖽙 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖽃𖽙𖾑 𖼄𖽺 𖼹𖽦𖾐 𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽦𖾐 𖼠𖽚： 𖼄𖽚 𖼳𖽡𖾐 𖼞𖽳𖾐 𖼳𖽪𖾐 𖼮𖽨𖾐 𖼺𖽪𖾑、 𖼺𖽡𖾐 𖼻𖽙 𖼺𖽪𖾑 𖼐𖽺𖾐 𖼮𖽻 𖼮𖽪 𖼺𖽪𖾑 𖼊𖽑𖽺 𖼈𖽝 𖼍𖽳𖾐，𖼣𖽙𖾐 𖼊𖽑𖽺 𖼞𖽑𖽙𖾐 𖼊𖽑𖽪 𖼺𖽪𖾐 𖼄𖽡𖽻 𖼮𖽨𖾐 𖼷𖽑𖽜𖾑 𖼷𖽑𖽜𖾐 𖼊𖽚𖾐 𖼊𖽑𖽧 𖼖𖽻𖾐 𖼦𖽑𖽻𖾐 𖼊𖽻𖾐．” 45 𖽃𖽔𖾐 𖼺𖽺𖾑，𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼐𖽑𖽧𖾐 𖼄𖽙𖾐 𖼀𖽑𖽪𖾐 𖼦𖽑𖽙𖾐，𖼽𖽻 𖼈𖽳𖾐 𖼞𖽜 《 𖼺𖽡 𖼮𖽡𖾐 𖼺𖽪𖾑》 𖼄𖽡𖾐 𖼀𖽻𖾐． 46 𖼽𖽻 𖼦𖽑𖽔𖾐 𖼖𖽺𖾑 𖼀𖽦𖾐：“《 𖼺𖽡 𖼮𖽡𖾐 𖼺𖽪𖾑》 𖼊𖽑𖽺 𖼞𖽑𖽙𖾐 𖼈𖽝 𖼺𖽪𖾐，𖼰𖽡𖾐 𖼍𖽮 𖼷𖽑𖽜𖾑 𖼷𖽑𖽜𖾐 𖼠𖽻𖾐 𖼰𖽡𖽳𖾐 𖼳𖽶𖾐 𖼷𖽶𖾐 𖼄𖽳𖾐，𖼺𖽙𖾐 𖼐𖽑𖽡𖾐 𖼖𖽚 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼊𖽻𖾐． 47 𖼷𖽑𖽻𖾐 𖼽𖽻 𖼄𖽡𖾐 𖼖𖽙𖾐 𖼣𖽜𖾐，𖼊𖽡 𖼮𖽑𖽻 𖼀𖽑𖽚𖾐 𖼺𖽺𖾑，𖼽𖽺𖾐 𖼮𖽑𖽡𖽪𖾑 𖽂𖽙𖾐 𖼄𖽡𖽺 𖼞𖽳𖾐 𖼄𖽢 𖼮𖽑𖽡𖽪 𖼦𖽑𖽺，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽻𖾐 𖼍𖽪𖾐 𖼺𖽺𖾑，𖼄𖽶 𖼊𖽑𖽡 𖽂𖽚 𖼞𖽑𖽶𖾐 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼞𖽳𖾐 𖼮𖽑𖽡𖾐 𖼊𖽻𖾐． 48 𖼐𖽑𖽡𖾐 𖼈𖽳𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼞𖽳𖾐 𖼮𖽨 𖼄𖽡𖽻𖾐 𖼂𖽺𖾐 𖼺𖽪𖾐 𖼷𖽑𖽻𖾐 𖼣𖽻𖾐．
49 𖼣𖽻𖾐 𖼀𖽙 𖼞𖽑𖽙𖾐 𖼞𖽜 𖼮𖽙𖾐 𖼺𖽪𖾐，𖼣𖽙𖾐 𖼀𖽑𖽨 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼊𖽻𖾐．𖼐𖽑𖽡𖾐 𖼈𖽳𖾐 𖼖𖽪𖾐 𖼠𖽻𖾐 𖼞𖽑𖽶𖾐 𖼮𖽻𖾐 𖼳𖽡𖽻𖾐 𖼺𖽺𖾑，𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼖𖽻𖾐 𖼺𖽪𖾐 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼷𖽶𖾐 𖽂𖽙𖾐 𖼰𖽶𖾐 𖼮𖽑𖽡𖾐 𖼖𖽡𖾐．”
𖼽𖽺𖾐 𖼺𖽪𖾐 𖼄𖽶 𖼠𖽻𖾐 𖼊𖽑𖽺 𖼊𖽦𖾐 𖼽𖽡𖾐 (𖼞𖽑𖽜16：19-20；𖼹𖽡𖾐1：9-11 )
50 𖼽𖽺𖾐 𖼺𖽪𖾐 𖼺𖽡 𖼀𖽑𖽙 𖼽𖽻 𖼈𖽳𖾐 𖼊𖽑𖽺 𖼦𖽳 𖼊𖽚𖾐 𖼽𖽡𖾐，𖼂𖽚 𖼍𖽕𖾑 𖼐𖽑𖽧 𖼮𖽑𖽡𖽦𖾐 𖼠𖽻𖾐 𖼞𖽕 𖼰𖽡𖽺𖾐 𖼮𖽑𖽡𖾐，𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼍𖽪𖾐 𖼖𖽻𖾐 𖼄𖽢 𖼦𖽙𖾐 𖼽𖽻 𖼈𖽳𖾐 𖼊𖽑𖽺 𖼞𖽜． 51 𖼄𖽢 𖼦𖽙𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖼰𖽡𖾑 𖼦𖽑𖽙𖾐，𖼹𖽶𖾐 𖼄𖽶 𖼠𖽻𖾐 𖼊𖽑𖽺 𖼊𖽦𖾐 𖼽𖽡𖾐 𖼦𖽑𖽙𖾐． 52 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼽𖽻 𖼊𖽑𖽺 𖼊𖽑𖽴．𖼞𖽜𖾐 𖼞𖽜𖾐 𖼺𖽜𖾐 𖼺𖽜𖾐 𖼀𖽑𖽚𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼞𖽚 𖼮𖽑𖽡𖾐， 53 𖼻𖽳𖾐 𖼻𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼮𖽻𖾐，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳．