𖼄𖽳 𖼮𖽑𖽶 𖼄𖽙𖾐 𖼐𖽺𖾐 𖼄𖽡𖽻 𖼦𖽑𖽺 𖼷𖽶 𖼄𖽻 𖼍𖽻𖾐 𖼊𖽻
18
1 𖼽𖽺𖾐 𖼺𖽪𖾐 𖼽𖽻 𖼷𖽻𖾐 𖼺𖽪𖾐 𖼊𖽑𖽺 𖼄𖽪𖾑，𖼐𖽑𖽧𖾐 𖼮𖽡𖽦𖾐 𖼄𖽔 𖼊𖽙𖾐，𖼄𖽔 𖼐𖽙 𖼄𖽙𖾐 𖼮𖽑𖽡 𖼮𖽡𖽺𖾐 𖼂𖽺𖾐 𖼖𖽡𖾐．𖽃𖽔𖾐 𖼺𖽺𖾑，𖼍𖽻𖾐 𖼊𖽻 𖼊𖽑𖽡 𖼊𖽝𖾐 𖼦𖽑𖽺， 2 𖼀𖽦𖾐：“𖼖𖽪𖾐 𖼊𖽑𖽡 𖼊𖽝𖾐 𖼞𖽑𖽶𖾐 𖼄𖽡𖽻 𖼦𖽑𖽺 𖼷𖽶 𖼄𖽻 𖼊𖽑𖽡 𖼽𖽚𖾐 𖼮𖽻𖾐，𖼽𖽻 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼄𖽔 𖼮𖽡𖽮𖾐，𖼷𖽑𖽻𖾐 𖼊𖽑𖽺 𖼖𖽺𖾑 𖼐𖽦𖾐 𖼄𖽔 𖼍𖽪𖾐． 3 𖼖𖽪𖾐 𖼞𖽑𖽶𖾑 𖼊𖽝𖾐 𖼞𖽑𖽶𖾐 𖼄𖽳 𖼮𖽑𖽶 𖼄𖽙𖾐 𖼊𖽑𖽡 𖼽𖽚𖾐 𖼮𖽻𖾐，𖼄𖽔 𖼐𖽙 𖼄𖽙𖾐 𖼖𖽻𖾐 𖼽𖽻 𖼖𖽙𖾐 𖼀𖽦𖾐：‘ 𖼣𖽙𖾐 𖼮𖽡𖾐 𖼂𖽦𖾐 𖼊𖽑𖽡 𖼽𖽚𖾐 𖼮𖽻𖾐，𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼣𖽙𖾐 𖼖𖽙𖾐 𖼂𖽻𖾐 𖼖𖽦 𖼂𖽚𖾐 𖼞𖽜．’ 4 𖼊𖽑𖽡 𖼳𖽕𖾐 𖼄𖽙𖾐 𖼖𖽚 𖼖𖽺𖾑 𖼄𖽡𖽻 𖼦𖽑𖽺 𖼷𖽶 𖼄𖽻 𖼂𖽻𖾐 𖼞𖽜 𖼄𖽔 𖼦𖽶𖾐，𖼠𖽙𖾑 𖼍𖽻𖾐 𖼽𖽻 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝：‘ 𖼣𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼄𖽔 𖼮𖽡𖽮𖾐，𖼷𖽑𖽻𖾐 𖼊𖽑𖽺 𖼖𖽺𖾑 𖼐𖽦𖾐 𖼄𖽔 𖼍𖽪𖾐． 5 𖼦𖽑𖽻𖾐 𖼊𖽑𖽻𖾐，𖼄𖽳 𖼮𖽑𖽶 𖼄𖽙𖾐 𖼦𖽑𖽺𖾑 𖼽𖽚𖾐 𖼄𖽔 𖼐𖽙 𖼄𖽙𖾐 𖼖𖽻𖾐 𖼣𖽙𖾐 𖼊𖽑𖽺 𖼍𖽺𖾑 𖼠𖽻 𖼮𖽑𖽻．𖽃𖽔𖾐 𖼺𖽺𖾑，𖼣𖽙𖾐 𖼽𖽻 𖼖𖽙𖾐 𖼊𖽑𖽡𖾑 𖼮𖽪 𖼂𖽻𖾐 𖼮𖽨𖾐 𖼖𖽡𖾐，𖼽𖽻 𖼞𖽜 𖼹𖽦𖾑 𖼄𖽔 𖼐𖽙 𖼄𖽙𖾐 𖼖𖽻𖾐 𖼣𖽙𖾐 𖼊𖽑𖽺 𖼠𖽻 𖼮𖽑𖽻 𖼄𖽔 𖼻𖽻𖾐！’”6 𖼺𖽡 𖼀𖽑𖽙 𖼀𖽦𖾐：“𖼐𖽑𖽡𖾐 𖼈𖽳𖾐 𖼦𖽑𖽻𖾑 𖼄𖽔 𖼹𖽳𖾐 𖼺𖽪𖾐 𖼄𖽡𖽻 𖼦𖽑𖽺 𖼷𖽶 𖼄𖽻 𖼞𖽑𖽙𖾐 𖼀𖽦𖾐 𖼊𖽻 𖼂𖽪𖾑 𖼦𖽑𖽺𖾑 𖼊𖽑𖽺 𖼊𖽻 𖼐𖽙𖾐 𖼄𖽺！ 7 𖽂𖽙 𖼺𖽙𖾐 𖼂𖽙𖾐 𖼞𖽑𖽙𖾐 𖼺𖽺𖾐 𖼄𖽳𖾐 𖼺𖽪𖾐 𖼷𖽑𖽻𖾐 𖼀𖽺，𖼄𖽶 𖼐𖽑𖽡𖾐 𖼄𖽶 𖼦𖽑𖽦 𖼽𖽻 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼽𖽻 𖼈𖽳𖾐 𖼖𖽙𖾐 𖼄𖽔 𖼂𖽻𖾐 𖼮𖽨𖾐，𖼍𖽻𖾐 𖼞𖽙𖾐 𖼠𖽸𖾑 𖼍𖽳𖾐 𖼖𖽔𖾑？ 8 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼽𖽻 𖼐𖽕 𖼊𖽺𖾐 𖼽𖽻 𖼈𖽳𖾐 𖼮𖽑𖽡 𖼮𖽡𖽺𖾐 𖼊𖽑𖽺 𖼊𖽻 𖼞𖽑𖽚 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼻𖽙 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼊𖽺𖾐 𖼊𖽑𖽺 𖼷𖽑𖽻𖾐 𖼦𖽑𖽺𖾑 𖼻𖽻𖾐 𖼊𖽻 𖼮𖽶𖾐 𖼻𖽺𖾐 𖼺𖽪𖾐 𖼊𖽑𖽺 𖼰𖽙𖾐 𖽂𖽙𖾐 𖼊𖽙𖾐 𖼊𖽙𖾐 𖼐𖽺𖾑？”
𖼐𖽑𖽡 𖼳𖽶 𖼷𖽑𖽻𖾐 𖼮𖽑𖽡 𖼮𖽡𖽺𖾐 𖼂𖽺𖾐 𖼞𖽳𖾐 𖼍𖽻𖾐 𖼊𖽻
9 𖼽𖽺𖾐 𖼺𖽪𖾐 𖼍𖽻𖾐 𖼊𖽻 𖼦𖽑𖽺𖾑 𖼊𖽝𖾐 𖼻𖽜 𖼺𖽺𖾑，𖼞𖽑𖽻𖾑 𖼽𖽻 𖼄𖽳𖾑 𖼷𖽑𖽻𖾐 𖼹𖽳𖾐 𖼣𖽻𖾐 𖼊𖽡 𖼮𖽑𖽻，𖼺𖽙𖾐 𖼊𖽑𖽺 𖼐𖽦𖾐 𖼄𖽔 𖼍𖽪𖾐 𖼺𖽪𖾐 𖼖𖽙𖾐 𖼀𖽦𖾐： 10 “𖼷𖽑𖽻𖾐 𖼐𖽑𖽡 𖼽𖽚𖾐 𖼽𖽡𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼮𖽑𖽡 𖼮𖽡𖽺𖾐 𖼂𖽺𖾐，𖼊𖽑𖽡 𖼽𖽚𖾐 𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐 𖼣𖽻𖾐，𖼊𖽑𖽡 𖼽𖽚𖾐 𖼳𖽚𖾐 𖼠𖽜𖾐 𖼷𖽑𖽻𖾐 𖼣𖽻𖾐． 11 𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐 𖼞𖽑𖽶𖾑 𖼽𖽚𖾐 𖼦𖽑𖽡𖽚 𖼍𖽳𖾐，𖼽𖽻 𖼣𖽻𖾐 𖼽𖽻 𖼊𖽻𖾑 𖼊𖽻𖾑 𖼮𖽑𖽡 𖼮𖽡𖽺𖾐 𖼀𖽦𖾐：‘ 𖽂𖽙 𖼺𖽙𖾐 𖼂𖽙𖾐 𖽃𖽔𖾐！ 𖼣𖽙𖾐 𖼐𖽑𖽡𖾐 𖼊𖽑𖽺 𖼊𖽑𖽡 𖼞𖽔𖾐 𖼞𖽜，𖼣𖽙𖾐 𖼠𖽳𖾐 𖼖𖽪𖾐 𖼷𖽑𖽻𖾐 𖼖𖽙𖾐 𖼺𖽶𖾑 𖼐𖽻𖾑 𖼮𖽴𖾐、 𖼊𖽶𖾐 𖼮𖽑𖽪 𖼐𖽺𖾐 𖼊𖽑𖽙𖾑 𖼄𖽡𖽻 𖼄𖽔 𖼂𖽺𖾐，𖼳𖽚𖾐 𖼠𖽜𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼖𖽙𖾐 𖼖𖽺𖾑 𖼄𖽔 𖼺𖽶𖾑． 12 𖼣𖽙𖾐 𖼊𖽑𖽡 𖼖𖽡 𖼂𖽦𖾑 𖼷𖽙𖾐 𖼐𖽑𖽡 𖼰𖽻𖾐 𖼷𖽜𖾐，𖼣𖽙𖾐 𖼞𖽑𖽙𖾐 𖽂𖽙𖾐 𖼺𖽪𖾐，𖼷𖽑𖽡𖾐 𖼀𖽜𖾐 𖼊𖽑𖽡 𖼀𖽜𖾐 𖼈𖽺𖾐 𖼐𖽑𖽡𖾐 𖼊𖽑𖽺 𖼞𖽜 𖼍𖽳𖾐．’
13 𖼳𖽚𖾐 𖼠𖽜𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼄𖽡𖾐 𖼈𖽡 𖼈𖽡 𖼦𖽑𖽡𖽚 𖼍𖽳𖾐，𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼄𖽶 𖼠𖽻𖾐 𖼊𖽑𖽺 𖼖𖽺𖾑 𖼐𖽦𖾐 𖼄𖽔 𖼂𖽡𖾑，𖼐𖽑𖽧𖾐 𖼄𖽙𖾐 𖼰𖽙𖾐 𖼊𖽝 𖼍𖽳𖾐 𖼀𖽦𖾐：‘ 𖽂𖽙 𖼺𖽙𖾐 𖼂𖽙𖾐 𖽃𖽔𖾐！ 𖼣𖽙𖾐 𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼣𖽻𖾐，𖼣𖽙𖾐 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼞𖽜！’ 14 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼳𖽚𖾐 𖼠𖽜𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼞𖽚 𖼽𖽡𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐 𖼞𖽳𖾐 𖼞𖽑𖽶𖾑 𖼽𖽚𖾐 𖼦𖽶𖾑 𖼄𖽔 𖼷𖽑𖽶𖾐 𖽂𖽙 𖼺𖽙𖾐 𖼂𖽙𖾐 𖼮𖽑𖽢𖾑 𖼹𖽳𖾐 𖼰𖽕𖾐 𖼺𖽺．𖼞𖽪𖾐 𖼮𖽡𖽺𖾐，𖼞𖽑𖽙𖾐 𖼳𖽡𖽦 𖼈𖽳 𖼺𖽪𖾐 𖼷𖽑𖽻𖾐，𖼽𖽳𖾐 𖼺𖽪𖾐 𖼀𖽑𖽢 𖼊𖽻𖾐；𖽃𖽜𖾐 𖼺𖽳 𖼺𖽪𖾐 𖼷𖽑𖽻𖾐，𖼈𖽳 𖼺𖽪𖾐 𖼖𖽚 𖼊𖽻𖾐．”
𖼽𖽺𖾐 𖼺𖽪𖾐 𖽃𖽔𖾐 𖼞𖽶𖾑 𖼊𖽑𖽺 𖼷𖽶𖾐 𖼐𖽑𖽧𖾐 𖼺𖽳 (𖼊𖽑𖽹𖾑19：13-15；𖼞𖽑𖽜 10：13-16)
15 𖼷𖽑𖽻𖾐 𖼊𖽑𖽡 𖼹𖽻𖾐 𖽃𖽔𖾐 𖼞𖽶𖾑 𖼊𖽑𖽺 𖼍𖽦𖾐 𖼽𖽺𖾐 𖼺𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐，𖼽𖽻 𖼞𖽜 𖼽𖽻 𖼈𖽳𖾐 𖼊𖽑𖽺 𖼄𖽚𖾐，𖼄𖽢 𖼦𖽙𖾐 𖼄𖽻𖾑 𖼞𖽜 𖼖𖽡𖾐．𖼷𖽻𖾐 𖼺𖽪𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼊𖽑𖽺 𖼦𖽑𖽳𖾐．
16 𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼺𖽪𖾐 𖽃𖽔𖾐 𖼞𖽶𖾑 𖼞𖽑𖽶𖾑 𖼹𖽻𖾐 𖼊𖽑𖽺 𖽃𖽶𖾐 𖼠𖽚 𖼖𖽻𖾐，𖼀𖽦𖾐：“𖽃𖽔𖾐 𖼞𖽶𖾑 𖼞𖽜 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼖𖽡𖾐，𖼽𖽻 𖼈𖽳𖾐 𖼊𖽑𖽺 𖽂𖽙𖾐 𖼀𖽨 𖼮𖽳 𖼄𖽔 𖼊𖽙𖾐．𖼞𖽪𖾐 𖼮𖽡𖽺𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼞𖽑𖽶𖾐 𖼮𖽻𖾐 𖼺𖽪𖾐，𖼦𖽑𖽺𖾑 𖼖𖽙𖾐 𖼺𖽶𖾑 𖼳𖽶 𖼷𖽑𖽻𖾐 𖼣𖽻𖾐． 17 𖼣𖽙𖾐 𖼠𖽕𖾐 𖼰𖽶𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼞𖽑𖽙𖾐 𖽃𖽔𖾐 𖼞𖽶𖾑 𖼖𖽙𖾐 𖼺𖽶𖾑 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼊𖽑𖽺 𖼷𖽶𖾐 𖼺𖽪𖾐 𖼷𖽑𖽻𖾐 𖼄𖽔 𖼣𖽻𖾐，𖼊𖽑𖽡 𖼽𖽚𖾐 𖼖𖽺𖾑 𖽂𖽙𖾐 𖼊𖽡 𖼽𖽡𖾐 𖼄𖽔 𖼊𖽙𖾐．”
𖼀𖽻𖾐 𖼀𖽡𖾐 𖼺𖽪𖾐 𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼞𖽑𖽶𖾐 𖼊𖽡 𖼽𖽡𖾐 𖼂𖽕𖾑 𖼞𖽑𖽕𖾐 ( 𖼊𖽑𖽹𖾑 19：16-29；𖼞𖽑𖽜 10：17-30 )
18 𖼷𖽶 𖼄𖽻 𖼊𖽑𖽡 𖼽𖽚𖾐 𖼮𖽻𖾐，𖼽𖽻 𖼽𖽺𖾐 𖼺𖽪𖾐 𖼖𖽙𖾐 𖼊𖽻 𖼐𖽙𖾐：“𖼳𖽪𖾑 𖼰𖽪𖾐 𖼹𖽳𖾐 𖽃𖽔𖾐！ 𖼣𖽙𖾐 𖽃𖽔 𖼊𖽺𖾐 𖼂𖽺𖾐 𖼺𖽺𖾑，𖼻𖽳𖾐 𖼹𖽦𖾐 𖼈𖽪𖾑 𖼠𖽻𖾐 𖽂𖽙𖾐 𖼊𖽙𖾐 𖼐𖽺𖾑？”
19 𖼽𖽺𖾐 𖼺𖽪𖾐 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼣𖽙𖾐 𖼊𖽑𖽺 𖼹𖽳𖾐 𖼺𖽪𖾐 𖼣𖽻𖾐 𖼀𖽦𖾐 𖼐𖽺𖾑？𖽂𖽙 𖼺𖽙𖾐 𖼂𖽙𖾐 𖼄𖽔 𖼣𖽻𖾐，𖼹𖽳𖾐 𖼺𖽪𖾐 𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼮𖽻𖾐． 20 𖼷𖽑𖽦𖾐 𖼮𖽡𖽺𖾐 𖼐𖽑𖽡𖾐 𖼖𖽺𖾑 𖼺𖽝𖾑 𖼍𖽳𖾐 𖼄𖽺： 𖼊𖽑𖽙𖾑 𖼄𖽡𖽻 𖼂𖽺𖾐 𖼄𖽔 𖼊𖽙𖾐，𖼷𖽑𖽻𖾐 𖼺𖽦 𖼄𖽔 𖼊𖽙𖾐，𖼺𖽙𖾐 𖼞𖽳𖾐 𖼞𖽑𖽶 𖼄𖽔 𖼊𖽙𖾐，𖼐𖽙 𖼊𖽻 𖼊𖽑𖽜𖾐 𖼺𖽙𖾐 𖼍𖽶𖾐 𖼄𖽔 𖼊𖽙𖾐，𖽃𖽔 𖼀𖽙 𖽃𖽔 𖼄𖽙𖾐 𖼊𖽑𖽺 𖼮𖽨 𖼮𖽻𖾑 𖼊𖽴 𖼖𖽡𖾐．”
21 𖼽𖽻 𖼀𖽦𖾐：“𖼽𖽳𖾐 𖼊𖽑𖽙 𖼮𖽑𖽻𖾐 𖼍𖽪𖾐 𖼹𖽦𖾐，𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼣𖽙𖾐 𖼳𖽪𖾐 𖼮𖽑𖽡𖾐 𖼦𖽑𖽻𖾐．”
22 𖼽𖽺𖾐 𖼺𖽪𖾐 𖼊𖽻 𖼮𖽨 𖼦𖽑𖽻𖾐 𖼺𖽺𖾑，𖼽𖽻 𖼖𖽙𖾐 𖼀𖽦𖾐 𖼊𖽑𖽧：“𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼊𖽑𖽡 𖼮𖽨𖾐 𖼂𖽺𖾐 𖼄𖽔 𖼮𖽑𖽡𖾐 𖼺𖽺，𖼐𖽑𖽡𖾐 𖼞𖽑𖽙𖾐 𖼮𖽻𖾐 𖼳𖽶 𖼈𖽪 𖼦𖽑𖽙𖾐，𖼀𖽜𖾐 𖼷𖽑𖽻𖾐 𖼳𖽚𖾑 𖼀𖽑𖽙 𖼊𖽑𖽺 𖼞𖽜 𖼖𖽡𖾐．𖽃𖽔𖾐 𖼺𖽺𖾑，𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼀𖽑𖽶 𖼊𖽴 𖼹𖽳𖾐 𖼖𖽪𖾐 𖼄𖽶 𖼠𖽻𖾐 𖼊𖽑𖽺 𖽂𖽙𖾐 𖼮𖽻𖾐 𖼊𖽻𖾐，𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼣𖽙𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼖𖽻𖾐 𖼖𖽡𖾐．”
23 𖼽𖽻 𖼊𖽻 𖼂𖽪𖾑 𖼦𖽑𖽺𖾑 𖼊𖽻 𖼮𖽨 𖼦𖽑𖽻𖾐，𖼦𖽑𖽔𖾐 𖼮𖽶𖾐 𖼮𖽑𖽧𖾐 𖼞𖽪．𖼞𖽪𖾐 𖼮𖽡𖽺𖾐，𖼽𖽻 𖼀𖽻𖾐 𖼀𖽡𖾐 𖼷𖽑𖽚．
24 𖼽𖽻 𖼦𖽑𖽺𖾑 𖼻𖽻𖾐 𖼄𖽙𖾐 𖼮𖽻𖾐 𖼊𖽑𖽻𖾐，𖼽𖽺𖾐 𖼺𖽪𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼀𖽦𖾐：“𖼀𖽻𖾐 𖼀𖽡𖾐 𖼺𖽪𖾐 𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼞𖽑𖽶𖾐 𖼊𖽡 𖼽𖽡𖾐，𖼞𖽑𖽶𖾑 𖼦𖽑𖽔𖾐 𖼮𖽶𖾐 𖼂𖽕𖾑 𖼞𖽑𖽕𖾐 𖼺𖽪𖾐 𖼣𖽻𖾐！ 25 𖼖𖽚𖾑 𖼊𖽑𖽚 𖼈𖽴 𖼐𖽙𖾑 𖼂𖽻𖾐 𖼳𖽡𖽪𖾐 𖼮𖽑𖽻𖾐 𖼖𖽴 𖼠𖽚 𖼽𖽡𖾐，𖼞𖽑𖽶𖾑 𖼀𖽻𖾐 𖼀𖽡𖾐 𖼺𖽪𖾐 𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼞𖽑𖽶𖾐 𖼊𖽡 𖼽𖽡𖾐 𖼦𖽶𖾑 𖼄𖽔 𖼷𖽑𖽶𖾐 𖼖𖽳𖾐 𖼮𖽡𖽺 𖼺𖽺．”
26 𖼊𖽻 𖼮𖽨 𖼺𖽪𖾐 𖼷𖽑𖽻𖾐 𖼀𖽦𖾐：“𖼦𖽑𖽺𖾑 𖼻𖽻𖾐 𖼊𖽑𖽡𖾑 𖼣𖽻𖾐，𖽃𖽔 𖼺𖽺 𖼰𖽨𖾑 𖽂𖽙𖾐 𖼊𖽙𖾐 𖼺𖽺 𖼐𖽺𖾑？”
27 𖼽𖽺𖾐 𖼺𖽪𖾐 𖼀𖽦𖾐：“𖼷𖽑𖽻𖾐 𖼂𖽺𖾐 𖼮𖽑𖽡𖾐 𖼄𖽔 𖼠𖽸𖾑 𖼳𖽶 𖼄𖽡𖽻，𖽂𖽙𖾐 𖼺𖽙𖾐 𖼂𖽙𖾐 𖼂𖽺𖾐 𖼠𖽸𖾑 𖼳𖽶 𖼣𖽻𖾐．”
28 𖼂𖽡 𖼍𖽴 𖼀𖽦𖾐：“𖼐𖽦𖾐 𖼄𖽺！ 𖼣𖽙𖾐 𖼈𖽳𖾐 𖼞𖽑𖽙𖾐 𖼮𖽻𖾐 𖼳𖽶 𖼀𖽑𖽨 𖼮𖽑𖽳 𖼦𖽑𖽙𖾐 𖼺𖽺𖾑，𖼐𖽑𖽡𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼖𖽻𖾐 𖼦𖽑𖽻𖾐．”
29 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖼠𖽕𖾐 𖼰𖽶𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼖𖽙𖾐 𖼀𖽙𖾐 𖼺𖽺𖾑，𖼦𖽑𖽺𖾐 𖼄𖽙𖾐 𖼠𖽙𖾐 𖼞𖽪、 𖼄𖽳 𖼻𖽙、 𖼈𖽧 𖼄𖽻 𖼐𖽑𖽳𖾐 𖼄𖽻、 𖽃𖽔 𖼀𖽙 𖽃𖽔 𖼄𖽙𖾐 𖼐𖽺𖾐 𖼻𖽙 𖼄𖽡𖾐 𖼐𖽜𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽪𖾐 𖼷𖽑𖽻𖾐， 30 𖼽𖽻 𖼊𖽺𖾐 𖼊𖽑𖽺 𖼮𖽻𖾐 𖼊𖽑𖽙 𖼄𖽢 𖼦𖽑𖽙𖾐 𖼀𖽜𖾐 𖽂𖽙𖾐 𖼊𖽻𖾐，𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼊𖽑𖽙 𖼻𖽳𖾐 𖼹𖽦𖾐 𖼈𖽪𖾑 𖼠𖽻𖾐 𖽂𖽙𖾐 𖼊𖽻𖾐．”
𖼽𖽺𖾐 𖼺𖽪𖾐 𖼺𖽙𖾐 𖼂𖽦𖾑 𖼽𖽻 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼊𖽻𖾐 𖼞𖽳𖾐 𖼺𖽡𖾐 𖼹𖽦𖾑 𖼊𖽻 𖼀𖽦𖾐 (𖼊𖽑𖽹𖾑 20： 17-19；𖼞𖽑𖽜 10： 32-34)
31 𖼽𖽺𖾐 𖼺𖽪𖾐 𖼽𖽻 𖼹𖽡𖾐 𖼺𖽪𖾐 𖼷𖽑𖽡𖾐 𖼐𖽑𖽡 𖼽𖽚𖾐 𖼊𖽑𖽺 𖼦𖽳 𖼊𖽑𖽡 𖼀𖽳 𖼽𖽡𖾐 𖼺𖽺𖾑，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！ 𖽃𖽔𖾑 𖼄𖽳𖾐 𖽃𖽔 𖼐𖽺𖾑 𖼊𖽦𖾐 𖼽𖽡𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼽𖽡𖾐．𖼺𖽡𖾐 𖼻𖽙 𖼺𖽪𖾑 𖼊𖽑𖽺 𖼄𖽧 𖼺𖽦𖾑 𖼽𖽕𖾑 𖼖𖽙𖾐 𖼞𖽑𖽙𖾐 𖼀𖽦𖾐 𖼠𖽚 𖼺𖽪𖾐 𖼄𖽡𖽻 𖼮𖽨𖾐，𖼄𖽳𖾑 𖼄𖽳 𖼷𖽑𖽻𖾐 𖼻𖽙 𖼞𖽶𖾐 𖼮𖽑𖽶 𖼊𖽑𖽺 𖼮𖽑𖽻𖾐 𖼀𖽑𖽢 𖼦𖽑𖽻𖾐 𖼊𖽻𖾐． 32 𖼽𖽻 𖼊𖽑𖽺 𖼰𖽡𖽻𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐，𖼺𖽙𖾐 𖼞𖽜 𖼈𖽳𖾐 𖼵𖽶𖾐、 𖼐𖽑𖽧𖾐 𖼣𖽡𖽳𖾐、 𖼍𖽧𖾑 𖼈𖽧 𖼀𖽑𖽧 𖼽𖽻 𖼮𖽑𖽻 𖼄𖽦𖾐 𖼊𖽑𖽺 𖼍𖽦𖾐 𖼊𖽻𖾐． 33 𖼦𖽑𖽔𖾐 𖼖𖽺𖾑 𖼖𖽙 𖼮𖽝 𖼈𖽺𖾐 𖼽𖽻 𖼊𖽑𖽺 𖼮𖽝，𖼽𖽻 𖼊𖽑𖽺 𖼺𖽦 𖼦𖽑𖽙𖾐．𖼠𖽙𖾑 𖼍𖽻𖾐 𖼺𖽙𖾐 𖼐𖽑𖽡𖾐 𖼖𖽚，𖼽𖽻 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼊𖽻𖾐．”
34 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼞𖽑𖽙𖾐 𖼀𖽦𖾐 𖼺𖽪𖾐，𖼹𖽡𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼄𖽔 𖼦𖽑𖽺 𖼀𖽑𖽪𖾐 𖼺𖽺．𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼊𖽻 𖼮𖽨 𖼦𖽑𖽻𖾐，𖼊𖽑𖽡 𖼳𖽶 𖼖𖽺𖾑 𖼄𖽡𖾐 𖼄𖽔 𖼀𖽻𖾐，𖼽𖽺𖾐 𖼺𖽪𖾐 𖽃𖽔 𖼊𖽺𖾑 𖼳𖽶 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐 𖼽𖽻 𖼈𖽳𖾐 𖼄𖽔 𖼺𖽝𖾑．
𖼽𖽺𖾐 𖼺𖽪𖾐 𖼷𖽑𖽻𖾐 𖼄𖽦𖾐 𖼍𖽳𖾐 𖼊𖽑𖽺 𖼞𖽪𖾐 𖼞𖽑𖽙 ( 𖼊𖽑𖽹𖾑 20：29-34；𖼞𖽑𖽜 10：46-52 )
35 𖼽𖽺𖾐 𖼺𖽪𖾐 𖼺𖽜 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼮𖽑𖽡𖾐 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼄𖽦𖾐 𖼍𖽳𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽨𖾐 𖼦𖽜 𖼊𖽡𖾐 𖼍𖽳𖾐 𖼷𖽙𖾐 𖼄𖽦𖾑． 36 𖼽𖽻 𖼷𖽑𖽻𖾐 𖼊𖽑𖽡 𖼷𖽪𖾐 𖼄𖽙𖾐 𖼮𖽨𖾐 𖼠𖽚 𖼞𖽳𖾐 𖼊𖽻 𖼮𖽨 𖼺𖽺𖾑，𖽃𖽔 𖼊𖽺𖾑 𖼳𖽶 𖼄𖽡𖽻 𖼣𖽻𖾐 𖼊𖽻 𖼐𖽙𖾐． 37 𖼷𖽑𖽻𖾐 𖼽𖽻 𖼊𖽑𖽺 𖼀𖽦𖾐 𖼊𖽑𖽧，𖼐𖽕 𖼺𖽔 𖼖𖽴 𖼺𖽪𖾐 𖼷𖽑𖽻𖾐 𖼽𖽺𖾐 𖼺𖽪𖾐 𖼮𖽨𖾐 𖼠𖽚． 38 𖽃𖽔𖾐 𖼺𖽺𖾑，𖼽𖽻 𖼮𖽑𖽡𖽪 𖼈𖽳 𖼄𖽙𖾐 𖽃𖽶𖾐 𖼀𖽦𖾐 ：“𖼍𖽕𖾑 𖼈𖽪𖽺𖾑 𖼞𖽳𖾐 𖼻𖽙 𖼖𖽡𖾑 𖼽𖽺𖾐 𖼺𖽪𖾐 𖽃𖽔𖾐！ 𖼣𖽙𖾐 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼞𖽜！”
39 𖽃𖽙𖾑 𖼄𖽺 𖼀𖽳 𖼺𖽜 𖼺𖽪𖾐 𖼷𖽑𖽻𖾐 𖼽𖽻 𖼊𖽑𖽺 𖼦𖽑𖽳𖾐，𖼽𖽻 𖼞𖽜 𖼮𖽑𖽡𖽪 𖼀𖽺𖾐 𖽂𖽙𖾐 𖼊𖽑𖽧 𖼄𖽔 𖼊𖽙𖾐．
𖼦𖽑𖽻𖾐 𖼊𖽑𖽻𖾐，𖼽𖽻 𖼠𖽳𖾐 𖼠𖽳𖾐 𖼮𖽑𖽡𖽪 𖼈𖽳 𖼄𖽙𖾐 𖽃𖽶𖾐 𖼀𖽦𖾐：“𖼍𖽕𖾑 𖼈𖽪𖽺𖾑 𖼞𖽳𖾐 𖼻𖽙 𖼖𖽡𖾑 𖼽𖽺𖾐 𖼺𖽪𖾐 𖽃𖽔𖾐，𖼣𖽙𖾐 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼞𖽜！”
40 𖼽𖽺𖾐 𖼺𖽪𖾐 𖼦𖽑𖽡𖽚 𖼹𖽺𖾐 𖼖𖽻𖾐，𖼷𖽑𖽻𖾐 𖼄𖽪𖾑 𖼽𖽻 𖼊𖽑𖽺 𖼦𖽳 𖼠𖽚 𖼖𖽻𖾐．𖼽𖽻 𖼺𖽜 𖼐𖽳 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼺𖽪𖾐 𖼽𖽻 𖼊𖽑𖽺 𖼊𖽻 𖼐𖽙𖾐： 41 “𖼣𖽙𖾐 𖼞𖽜 𖼐𖽑𖽡𖾐 𖼖𖽙𖾐 𖼀𖽙𖾐 𖽃𖽔 𖼊𖽺𖾑 𖼳𖽶 𖼄𖽡𖽻 𖼂𖽺𖾐 𖼖𖽡𖾐 𖼐𖽺𖾑？”
𖼽𖽻 𖼀𖽦𖾐：“𖼺𖽡 𖼀𖽑𖽙 𖽃𖽔𖾐，𖼣𖽙𖾐 𖼞𖽜 𖽂𖽙𖾐 𖼐𖽦𖾐 𖼄𖽡𖽻𖾐 𖼖𖽡𖾐！”