𖼷𖽑𖽻𖾐 𖼞𖽜 𖼮𖽴𖾐 𖼀𖽜 𖼺𖽪𖾐 𖼈𖽡𖾑 𖼞𖽑𖽙 𖼮𖽻𖾐 𖼊𖽻𖾐
17
1 𖼽𖽺𖾐 𖼺𖽪𖾐 𖼦𖽑𖽔𖾐 𖼖𖽺𖾑 𖼽𖽻 𖼷𖽻𖾐 𖼺𖽪𖾐 𖼖𖽙𖾐 𖼀𖽦𖾐：“𖼷𖽑𖽻𖾐 𖼞𖽜 𖼮𖽴𖾐 𖼀𖽜 𖼞𖽳𖾐 𖼄𖽡𖽻 𖼄𖽔 𖼮𖽻𖾐 𖼄𖽔 𖼠𖽸𖾑．𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼞𖽜 𖼮𖽜𖾐 𖼀𖽜 𖼺𖽪𖾐 𖼈𖽡𖾑 𖼞𖽑𖽙 𖼮𖽻𖾐 𖼊𖽻𖾐． 2 𖽃𖽔 𖼺𖽺 𖼷𖽑𖽻𖾐 𖼊𖽑𖽡 𖼽𖽚𖾐 𖼞𖽜 𖼮𖽴𖾐 𖼀𖽜 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼖𖽚𖾐 𖼮𖽑𖽙 𖼀𖽑𖽳𖾐 𖼽𖽻 𖼖𖽺𖾐 𖼀𖽺 𖼍𖽡 𖼺𖽺𖾑，𖼦𖽑𖽻 𖼦𖽜𖾐 𖼄𖽙𖾐 𖼊𖽑𖽻𖾐 𖼐𖽦𖾑 𖼹𖽺𖾐 𖼦𖽑𖽙𖾐 𖼻𖽻𖾐，𖼦𖽑𖽔𖾐 𖼖𖽺𖾑 𖼽𖽻 𖼮𖽑𖽢𖾑 𖼷𖽑𖽻𖾐 𖼊𖽑𖽡 𖼽𖽚𖾐 𖼞𖽜 𖼮𖽴𖾐 𖼀𖽜 𖼦𖽑𖽙𖾐 𖼦𖽶𖾑 𖼄𖽔 𖼷𖽑𖽶𖾐 𖼹𖽳𖾐 𖼺𖽺．3 𖼐𖽑𖽡𖾐 𖼈𖽳𖾐 𖼷𖽜𖾐 𖼍𖽳𖾐 𖼖𖽡𖾐！
𖼷𖽳𖾑 𖼦𖽑𖽙𖾐 𖼖𖽡𖾐
𖼐𖽑𖽡𖾐 𖼈𖽧 𖼐𖽑𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡𖽺 𖼂𖽚𖾐 𖼊𖽑𖽡𖾑 𖼣𖽻𖾐，𖼽𖽻 𖼊𖽑𖽺 𖼄𖽪𖾑 𖼍𖽴𖾑 𖼖𖽡𖾐；𖼽𖽻 𖼊𖽡 𖼮𖽑𖽻 𖼀𖽑𖽚𖾐 𖼊𖽑𖽡𖾑 𖼣𖽻𖾐，𖼽𖽻 𖼊𖽑𖽺 𖼷𖽳𖾑 𖼦𖽑𖽙𖾐 𖼖𖽡𖾐． 4 𖼽𖽻 𖼊𖽑𖽡 𖼐𖽑𖽡𖾐 𖼳𖽶 𖼂𖽦𖾑 𖼐𖽑𖽡𖾐 𖼊𖽑𖽺 𖼮𖽑𖽡𖽺 𖼂𖽚𖾐，𖼦𖽑𖽔𖾐 𖼖𖽺𖾑 𖼳𖽶 𖼂𖽦𖾑 𖼊𖽡 𖼮𖽑𖽻 𖼀𖽑𖽚𖾐，𖼐𖽑𖽡𖾐 𖼖𖽙𖾐 𖼀𖽦𖾐：‘ 𖼣𖽙𖾐 𖼂𖽺𖾐 𖼦𖽑𖽙 𖼦𖽑𖽻𖾐！’ 𖼀𖽦𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼽𖽻 𖼊𖽑𖽺 𖼷𖽳𖾑 𖼦𖽑𖽙𖾐 𖼖𖽡𖾐．”
𖼊𖽻 𖼮𖽶𖾐 𖼐𖽑𖽧𖾐 𖼄𖽙𖾐
5 𖼹𖽡𖾐 𖼺𖽪𖾐 𖼺𖽡 𖼀𖽑𖽙 𖼖𖽙𖾐 𖼀𖽦𖾐：“𖼣𖽙𖾐 𖼈𖽳𖾐 𖼊𖽑𖽺 𖼊𖽻 𖼮𖽶𖾐 𖼐𖽑𖽧𖾐 𖼄𖽙𖾐 𖼈𖽳 𖼈𖽳 𖼖𖽪 𖼄𖽻𖾑 𖼞𖽜！”
6 𖼺𖽡 𖼀𖽑𖽙 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽻 𖼮𖽶𖾐 𖼐𖽑𖽧𖾐 𖼄𖽙𖾐 𖼈𖽻 𖼳𖽶𖾑 𖼊𖽑𖽡 𖼄𖽙𖾐 𖼖𖽙𖾐 𖼺𖽶𖾑 𖼮𖽻𖾐 𖼊𖽑𖽡𖾑 𖼣𖽻𖾐，𖼺𖽳 𖼦𖽜𖾐 𖼦𖽑𖽺𖾑 𖼷𖽡𖾐 𖼖𖽙𖾐 𖼀𖽦𖾐：‘ 𖼰𖽡𖽺𖾐 𖼰𖽨𖾐 𖼰𖽨𖾐 𖼰𖽸𖾐 𖼍𖽪𖾐 𖼖𖽻𖾐，𖼍𖽳𖾐 𖼦𖽜𖾐 𖼄𖽙𖾐 𖼮𖽻 𖼹𖽺𖾐！’ 𖼀𖽦𖾐 𖼖𖽺𖾑，𖼽𖽻 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼊𖽻 𖼮𖽶𖾐 𖼊𖽻𖾐．”
𖼮𖽜𖾐 𖼀𖽑𖽙 𖼂𖽺𖾐 𖼷𖽻 𖼺𖽪𖾐 𖼄𖽡𖽻
7 𖼐𖽑𖽡𖾐 𖼈𖽳𖾐 𖽃𖽔 𖼺𖽺 𖼞𖽳𖾐 𖼮𖽜𖾐 𖼀𖽑𖽙 𖼄𖽡𖾐 𖼄𖽙 𖼣𖽻𖾐 𖼦𖽻，𖼮𖽡𖽺 𖼖𖽚𖾑 𖼣𖽻𖾐 𖼦𖽻，𖼽𖽻 𖼄𖽡𖾐 𖼠𖽻𖾐 𖼮𖽑𖽻𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼽𖽻 𖼊𖽑𖽺 ‘ 𖼐𖽕 𖼐𖽕𖾐 𖼊𖽡𖾐 𖼹𖽺𖾐 𖼖𖽻𖾐 𖼷𖽙𖾐 𖼷𖽙！’ 𖼀𖽦𖾐 𖼠𖽸𖾑 𖼐𖽺𖾑？ 8 𖼐𖽑𖽡𖾐 𖼽𖽻 𖼊𖽑𖽺 ‘ 𖼣𖽙𖾐 𖼖𖽙𖾐 𖼀𖽙𖾐 𖼮𖽑𖽧 𖼷𖽙𖾐 𖼂𖽺𖾐 𖼳𖽡𖽻𖾐，𖼮𖽡𖽪 𖼳𖽡𖽦𖾐 𖼐𖽦𖾑 𖼍𖽡 𖼣𖽙𖾐 𖼊𖽑𖽺 𖼠𖽙𖾐 𖼳𖽙𖾐，𖼣𖽙𖾐 𖼷𖽙 𖼊𖽻𖾐 𖼀𖽚𖾐 𖼦𖽑𖽻𖾐 𖼺𖽺𖾑，𖼐𖽑𖽡𖾐 𖽂𖽙𖾐 𖼷𖽙 𖼊𖽙𖾐！’ 𖼀𖽦𖾐 𖼊𖽻𖾐． 9 𖼮𖽜𖾐 𖼀𖽑𖽙 𖼽𖽻 𖼺𖽡 𖼀𖽑𖽙 𖼞𖽑𖽙𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼀𖽑𖽢 𖼦𖽑𖽻𖾐 𖼠𖽙𖾑 𖼍𖽻𖾐，𖼺𖽡 𖼀𖽑𖽙 𖼽𖽻 𖼊𖽑𖽺 𖼊𖽑𖽡 𖼞𖽔𖾐 𖼞𖽜 𖼠𖽸𖾑 𖼍𖽳𖾐 𖼖𖽔𖾑？ 10 𖼐𖽑𖽡𖾐 𖼈𖽳𖾐 𖼖𖽺𖾑 𖼦𖽑𖽺𖾑 𖼖𖽙𖾐 𖼺𖽶𖾑 𖼣𖽻𖾐，𖼞𖽑𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼀𖽑𖽢 𖼦𖽑𖽻𖾐 𖼠𖽙𖾑 𖼍𖽻𖾐，𖼦𖽑𖽔𖾐 𖼖𖽺𖾑 𖼀𖽦𖾐 𖼖𖽡𖾐：‘ 𖼣𖽙𖾐 𖼈𖽳𖾐 𖼦𖽑𖽺𖾑 𖼻𖽜 𖼀𖽑𖽢 𖼄𖽔 𖼊𖽙𖾐 𖼺𖽪𖾐 𖼮𖽜𖾐 𖼀𖽑𖽙 𖼣𖽻𖾐，𖼞𖽑𖽙𖾐 𖼂𖽺𖾐 𖼺𖽪𖾐 𖼦𖽑𖽺𖾑 𖼣𖽙𖾐 𖼈𖽳𖾐 𖼂𖽺𖾐 𖼷𖽻 𖼺𖽪𖾐 𖼣𖽻𖾐．’”
𖼷𖽑𖽻𖾐 𖼐𖽪𖾐 𖼀𖽑𖽙 𖼷𖽑𖽡𖾐 𖼽𖽚𖾐 𖼊𖽑𖽺 𖼞𖽪𖾐 𖼞𖽑𖽙
11 𖼽𖽺𖾐 𖼺𖽪𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼺𖽔 𖼄𖽔 𖼖𖽡𖾑 𖼽𖽕𖾑 𖼄𖽡𖾐 𖼊𖽺𖾐 𖼐𖽺𖾐 𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼞𖽳𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼠𖽚 𖼽𖽡𖾐． 12 𖼽𖽻 𖼮𖽑𖽡𖽦𖾐 𖼠𖽻𖾐 𖼊𖽑𖽡 𖼊𖽝𖾐 𖼞𖽳𖾐 𖼊𖽡 𖼽𖽡𖾐，𖼷𖽑𖽻𖾐 𖼐𖽪𖾐 𖼀𖽑𖽙 𖼷𖽑𖽡𖾐 𖼽𖽚𖾐 𖼽𖽻 𖽃𖽙𖾑 𖼄𖽺 𖼀𖽳 𖼮𖽑𖽻𖾐 𖼖𖽻𖾐，𖼄𖽡𖾐 𖼈𖽡 𖼈𖽡 𖼦𖽑𖽡𖽚 𖼍𖽳𖾐， 13 𖼮𖽑𖽡𖽪 𖼈𖽳 𖼄𖽙𖾐 𖽃𖽶𖾐 𖼀𖽦𖾐：“𖼽𖽺𖾐 𖼺𖽪𖾐 𖼺𖽡 𖼀𖽑𖽙 𖽃𖽔𖾐！ 𖼣𖽙𖾐 𖼈𖽳𖾐 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼞𖽜！”
14 𖼽𖽺𖾐 𖼺𖽪𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼞𖽶𖾐 𖼮𖽑𖽶 𖼀𖽑𖽨 𖼍𖽡𖾐 𖼄𖽻 𖼞𖽜 𖼐𖽦𖾐 𖼽𖽡𖾐！” 𖼽𖽻 𖼈𖽳𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼐𖽪𖾐 𖼐𖽙𖾐 𖼺𖽡 𖼮𖽡𖾐 𖼦𖽑𖽻𖾐．
15 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼊𖽑𖽡 𖼽𖽚𖾐 𖼮𖽻𖾐，𖼽𖽻 𖼞𖽶𖾐 𖼮𖽑𖽶 𖼐𖽪𖾐 𖼐𖽙𖾐 𖼞𖽑𖽙 𖼦𖽑𖽻𖾐 𖼞𖽑𖽶𖾑 𖼐𖽦𖾐 𖼄𖽡𖽻𖾐 𖼺𖽺𖾑，𖼀𖽑𖽚𖾐 𖼞𖽚 𖼖𖽻𖾐 𖼮𖽑𖽡𖽪 𖼈𖽳 𖼄𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳， 16 𖼦𖽑𖽔𖾐 𖼖𖽺𖾑 𖼂𖽴𖾐 𖼽𖽺𖾐 𖼺𖽪𖾐 𖼮𖽑𖽡𖾑 𖼀𖽑𖽦𖾐 𖼞𖽳𖾐 𖼹𖽺𖾐，𖼽𖽻 𖼊𖽑𖽺 𖼊𖽑𖽡 𖼞𖽔𖾐 𖼞𖽜．𖼽𖽻 𖼞𖽑𖽶𖾑 𖼺𖽔 𖼄𖽔 𖼖𖽡𖾑 𖼽𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼣𖽻𖾐．
17 𖼽𖽺𖾐 𖼺𖽪𖾐 𖼀𖽦𖾐：“𖼺𖽡 𖼮𖽡𖾐 𖼦𖽑𖽻𖾐 𖼺𖽪𖾐 𖼷𖽑𖽡𖾐 𖼽𖽚𖾐 𖼄𖽔 𖼣𖽻𖾐 𖼖𖽔？𖼠𖽳𖾐 𖼖𖽪𖾐 𖼞𖽑𖽶𖾑 𖼠𖽶𖾐 𖼽𖽚𖾐 𖽃𖽔 𖼊𖽺𖾑 𖼠𖽻𖾐 𖼽𖽡𖾐 𖼦𖽑𖽙𖾐 𖼐𖽺𖾑？ 18 𖼞𖽑𖽻𖾐 𖼂𖽻𖾑 𖼀𖽑𖽙 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼄𖽔 𖼣𖽻𖾐，𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼀𖽑𖽚𖾐 𖼞𖽚 𖼖𖽻𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳 𖼖𖽔？” 19 𖽃𖽔𖾐 𖼺𖽺𖾑，𖼽𖽺𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼍𖽪𖾐 𖼖𖽻𖾐，𖼺𖽜 𖼽𖽡𖾐 𖼦𖽻，𖼐𖽑𖽡𖾐 𖼊𖽻 𖼮𖽶𖾐 𖼺𖽺𖾑 𖼰𖽨𖾑 𖽂𖽙𖾐 𖼦𖽑𖽻𖾐！”
𖼷𖽑𖽻𖾐 𖼻𖽙 𖼞𖽚 𖼖𖽻𖾐 𖼐𖽑𖽡𖾐 𖼦𖽑𖽦 ( 𖼊𖽑𖽹𖾑 24：23-28；37-41 )
20 𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐 𖼽𖽺𖾐 𖼺𖽪𖾐 𖼊𖽑𖽺 𖼊𖽻 𖼐𖽙𖾐：“𖽂𖽙 𖼺𖽙 𖼂𖽙𖾐 𖼞𖽳𖾐 𖼠𖽚 𖼞𖽑𖽙 𖼊𖽑𖽻𖾐 𖼮𖽑𖽡𖾐 𖼖𖽻𖾐 𖼐𖽺𖾑？”
𖼽𖽻 𖼊𖽻 𖼞𖽑𖽚 𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼮𖽑𖽡𖾐 𖼖𖽻𖾐，𖼞𖽑𖽶𖾑 𖼄𖽦𖾐 𖼊𖽪 𖼐𖽦𖾐 𖼄𖽡𖽻𖾐 𖼄𖽔 𖼊𖽙𖾐 𖼺𖽪𖾐 𖼣𖽻𖾐． 21 𖼷𖽑𖽻𖾐 𖼺𖽺𖾑 ‘ 𖼐𖽦𖾐 𖼄𖽺！ 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼦𖽑𖽺𖾑 𖼠𖽻𖾐 𖼮𖽻𖾐．’ ‘ 𖼐𖽦𖾐 𖼄𖽺！ 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼞𖽑𖽶𖾑 𖼠𖽻𖾐 𖼮𖽻𖾐．’ 𖼀𖽦𖾐 𖼄𖽔 𖼊𖽙𖾐．𖼞𖽪𖾐 𖼮𖽡𖽺𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼮𖽻𖾐 𖼺𖽪𖾐 𖼣𖽻𖾐．”
22 𖼽𖽺𖾐 𖼺𖽪𖾐 𖼦𖽑𖽔𖾐 𖼖𖽺𖾑 𖼽𖽻 𖼷𖽻𖾐 𖼺𖽪𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼷𖽑𖽻𖾐 𖼻𖽙 𖼊𖽑𖽺 𖼐𖽦𖾐 𖼳𖽡𖽻𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼖𖽻𖾐 𖼮𖽻𖾐，𖼞𖽑𖽶𖾑 𖼮𖽶𖾐 𖼐𖽑𖽡𖾐 𖼈𖽳𖾐 𖼷𖽑𖽻𖾐 𖼻𖽙 𖼞𖽚 𖼖𖽻𖾐 𖼖𖽙𖾐 𖽂𖽙𖾐 𖼐𖽦𖾐 𖼄𖽡𖽻𖾐 𖼖𖽡𖾐 𖼊𖽡 𖼮𖽑𖽻．𖼦𖽑𖽻𖾐 𖼊𖽑𖽻𖾐，𖽂𖽙𖾐 𖼐𖽦𖾐 𖼄𖽡𖽻𖾐 𖼄𖽔 𖼊𖽙𖾐． 23 𖼷𖽑𖽻𖾐 𖼊𖽑𖽡 𖼹𖽻𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽦𖾐 𖼊𖽻𖾐：‘ 𖼐𖽦𖾐 𖼄𖽺！ 𖼷𖽑𖽻𖾐 𖼻𖽙 𖼦𖽑𖽺𖾑 𖼠𖽻𖾐 𖼮𖽻𖾐．’ ‘ 𖼐𖽦𖾐 𖼄𖽺！ 𖼷𖽑𖽻𖾐 𖼻𖽙 𖼞𖽑𖽶𖾑 𖼠𖽻𖾐 𖼮𖽻𖾐．’ 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼊𖽑𖽔 𖼊𖽚𖾐 𖼽𖽡𖾐，𖼽𖽻 𖼈𖽳𖾐 𖼠𖽙𖾑 𖼍𖽻𖾐 𖼊𖽑𖽔 𖼮𖽑𖽻𖾐 𖼽𖽡𖾐． 24 𖼞𖽪𖾐 𖼮𖽡𖽺𖾐，𖼷𖽑𖽻𖾐 𖼻𖽙 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼞𖽑𖽶𖾑 𖼄𖽶 𖼖𖽙𖾐 𖼀𖽙 𖽃𖽔𖾑 𖼄𖽶 𖼀𖽢 𖼦𖽑𖽺𖾑 𖼀𖽳 𖼮𖽑𖽻𖾐 𖼀𖽙𖾐 𖼞𖽑𖽶𖾑 𖼀𖽳 𖼮𖽑𖽡𖾐 𖼖𖽙𖾐 𖼺𖽶𖾑 𖼄𖽡𖽻𖾐 𖼊𖽙𖾐． 25 𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼻𖽙 𖼷𖽑𖽜𖾑 𖼷𖽑𖽜𖾐 𖽃𖽙𖾑 𖼄𖽺 𖼠𖽻𖾐 𖼰𖽡𖽳𖾐 𖼞𖽑𖽙 𖼄𖽙𖾐 𖼷𖽶𖾐 𖼄𖽳𖾐 𖼺𖽺𖾑，𖼦𖽑𖽺𖾑 𖼊𖽑𖽙𖾐 𖼻𖽳𖾐 𖼷𖽑𖽻𖾐 𖼮𖽑𖽢𖾑 𖼰𖽡𖾑 𖼦𖽑𖽙𖾐 𖼊𖽻𖾐．
26 𖼐𖽚 𖼽𖽕𖾑 𖼐𖽑𖽡𖾐 𖼦𖽑𖽦 𖽃𖽔 𖼊𖽺𖾐 𖼮𖽻𖾐，𖼷𖽑𖽻𖾐 𖼻𖽙 𖼞𖽚 𖼖𖽻𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼖𖽺𖾑 𖼞𖽑𖽶𖾑 𖼖𖽙𖾐 𖼺𖽶𖾑 𖼮𖽻𖾐 𖼊𖽻𖾐． 27 𖼞𖽑𖽶𖾑 𖼊𖽑𖽙𖾐 𖼻𖽳𖾐 𖼷𖽑𖽻𖾐，𖼷𖽙 𖼷𖽙𖼊𖽻𖾐 𖼊𖽻𖾐，𖼹𖽶𖾐 𖼹𖽶𖾐 𖼇𖽪𖾐 𖼇𖽪𖾐 𖼺𖽺𖾑，𖼐𖽚 𖼽𖽕𖾑 𖼈𖽴 𖼖𖽡𖾑 𖼞𖽑𖽪 𖼞𖽑𖽶𖾐 𖼊𖽡 𖼽𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼖𖽙𖾐 𖼮𖽑𖽡𖾐，𖼊𖽚𖾐 𖼈𖽡𖾐 𖼹𖽪𖾐 𖼐𖽦𖾐 𖼈𖽡𖾐 𖼽𖽚 𖼂𖽻𖾐 𖼖𖽻𖾐，𖼊𖽺𖾐 𖼊𖽑𖽺 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖽃𖽝𖾐 𖼳𖽶𖾐 𖼦𖽑𖽙𖾐．
28 𖼦𖽑𖽔𖾐 𖼖𖽺𖾑 𖼖𖽚 𖼍𖽴 𖼐𖽑𖽡𖾐 𖼦𖽑𖽦 𖼖𖽙𖾐 𖼺𖽶𖾑，𖼷𖽑𖽻𖾐 𖼷𖽙 𖼷𖽙 𖼊𖽻𖾐 𖼊𖽻𖾐，𖼈𖽪 𖼈𖽪 𖼈𖽳𖾐 𖼈𖽳𖾐，𖼄𖽡𖾐 𖼄𖽪𖾐 𖼦𖽑𖽺𖾐 𖼍𖽡𖾐 𖼺𖽺𖾑， 29 𖼖𖽚 𖼍𖽴 𖼈𖽴 𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽳𖾐 𖼮𖽑𖽻𖾐 𖼊𖽚𖾐 𖼽𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼖𖽙𖾐 𖼮𖽑𖽡𖾐，𖽃𖽔𖾐 𖼍𖽚𖾑 𖼐𖽺𖾐 𖼖𖽡𖽚 𖼦𖽫 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼮𖽑𖽙 𖼹𖽺𖾐 𖼖𖽻𖾐，𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼮𖽑𖽡𖽪𖾐 𖼮𖽡𖽦 𖼦𖽑𖽙𖾐． 30 𖼷𖽑𖽻𖾐 𖼻𖽙 𖼞𖽚 𖼖𖽻𖾐 𖼐𖽑𖽡𖾐 𖼦𖽑𖽦 𖼖𖽺𖾑 𖼦𖽑𖽺𖾑 𖼖𖽙𖾐 𖼺𖽶𖾑 𖼮𖽻𖾐 𖼊𖽻𖾐． 31 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽡𖾐，𖼷𖽑𖽻𖾐 𖼦𖽑𖽺𖾐 𖼀𖽶𖾐 𖼊𖽑𖽺 𖼮𖽻𖾐，𖼄𖽡𖽻 𖼐𖽑𖽡 𖼦𖽑𖽺𖾐 𖼞𖽑𖽶𖾐 𖼍𖽙𖾑 𖼺𖽪𖾐，𖼹𖽺𖾐 𖼖𖽻𖾐 𖼈𖽺𖾐 𖼄𖽔 𖼊𖽙𖾐；𖼷𖽑𖽻𖾐 𖼄𖽡𖾐 𖼠𖽻𖾐 𖼞𖽑𖽶𖾐 𖼮𖽻𖾐 𖼺𖽪𖾐 𖼖𖽺𖾑，𖼞𖽚 𖼽𖽡𖾐 𖼄𖽔 𖼊𖽙𖾐． 32 𖼖𖽚 𖼍𖽴 𖼄𖽳 𖼻𖽙 𖼞𖽳𖾐 𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼦𖽙𖾑 𖼮𖽑𖽡 𖼖𖽡𖾐！ 33 𖼞𖽑𖽙𖾐 𖼽𖽻 𖼄𖽳𖾑 𖼷𖽺𖾐 𖼈𖽪𖾑 𖼠𖽻𖾐 𖼊𖽑𖽺 𖼰𖽨𖾑 𖼺𖽪𖾐 𖼷𖽑𖽻𖾐，𖼷𖽑𖽜𖾑 𖼷𖽑𖽜𖾐 𖼈𖽪𖾑 𖼠𖽻𖾐 𖼮𖽡𖽦 𖼦𖽑𖽙𖾐 𖼊𖽻𖾐；𖼞𖽑𖽙𖾐 𖼣𖽙𖾐 𖼖𖽙𖾐 𖼀𖽙𖾐 𖼈𖽪𖾑 𖼠𖽻𖾐 𖼦𖽑𖽙𖾐 𖼺𖽪𖾐 𖼷𖽑𖽻𖾐，𖼷𖽑𖽜𖾑 𖼷𖽑𖽜𖾐 𖼈𖽪𖾑 𖼠𖽻𖾐 𖼰𖽨𖾑 𖽂𖽙𖾐 𖼊𖽻𖾐． 34 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼞𖽑𖽶𖾑 𖼊𖽑𖽡 𖼦𖽑𖽦 𖼄𖽺𖾐，𖼷𖽑𖽻𖾐 𖼐𖽑𖽡 𖼽𖽚𖾐 𖼮𖽡𖽺 𖼄𖽙𖾐 𖼊𖽑𖽡 𖼷𖽸 𖼊𖽑𖽺 𖼽𖽦，𖼊𖽑𖽡 𖼽𖽚𖾐 𖼊𖽑𖽺 𖼹𖽶𖾐 𖼂𖽡𖾐 𖼽𖽡𖾐，𖼊𖽑𖽡 𖼽𖽚𖾐 𖼊𖽑𖽺 𖼰𖽡𖾑 𖼍𖽙𖾑 𖼍𖽧𖾑 𖼊𖽻𖾐； 35 𖼻𖽙 𖼄𖽳 𖼐𖽑𖽡 𖼽𖽚𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼖𖽚𖾐 𖼮𖽑𖽙 𖼞𖽻𖾐，𖼊𖽑𖽡 𖼽𖽚𖾐 𖼊𖽑𖽺 𖼹𖽶𖾐 𖼂𖽡𖾐 𖼽𖽡𖾐，𖼊𖽑𖽡 𖼽𖽚𖾐 𖼊𖽑𖽺 𖼰𖽡𖾑 𖼍𖽙𖾑 𖼍𖽧𖾑 𖼊𖽻𖾐． 36 𖼷𖽑𖽻𖾐 𖼐𖽑𖽡 𖼽𖽚𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼄𖽡𖾐 𖼠𖽻𖾐 𖼮𖽻𖾐，𖼊𖽑𖽡 𖼽𖽚𖾐 𖼊𖽑𖽺 𖼹𖽶𖾐 𖼂𖽡𖾐 𖼽𖽡𖾐，𖼊𖽑𖽡 𖼽𖽚𖾐 𖼊𖽑𖽺 𖼰𖽡𖾑 𖼍𖽙𖾑 𖼍𖽧𖾑 𖼊𖽻𖾐．”
37 𖼷𖽻𖾐 𖼺𖽪𖾐 𖼽𖽻 𖼊𖽑𖽺 𖼊𖽻 𖼐𖽙𖾐：“𖼺𖽡 𖼀𖽑𖽙 𖽃𖽔𖾐！ 𖼄𖽡𖽻 𖼦𖽑𖽺𖾑 𖼹𖽻𖾐 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼊𖽻𖾐 𖼐𖽺𖾑？”
𖼺𖽡 𖼀𖽑𖽙 𖼀𖽦𖾐：“𖼳𖽶𖾐 𖼄𖽻𖾐 𖽃𖽔 𖼊𖽺𖾑 𖼠𖽻𖾐 𖼮𖽻𖾐，𖼷𖽜𖾐 𖼄𖽙𖾐 𖼖𖽺𖾑 𖽃𖽔 𖼊𖽺𖾑 𖼠𖽻𖾐 𖼻𖽶𖾑 𖼖𖽻𖾐 𖼊𖽻𖾐．”