𖽃𖽔𖾑 𖼞𖽑𖽶𖾐 𖼠𖽕 𖼈𖽪𖾐 𖼺𖽝𖾑 𖼮𖽻𖾐 𖼺𖽪𖾐 𖼍𖽻𖾐 𖼊𖽻
16
1 𖼽𖽺𖾐 𖼺𖽪𖾐 𖼦𖽑𖽔𖾐 𖼖𖽺𖾑 𖼽𖽻 𖼷𖽻𖾐 𖼺𖽪𖾐 𖼖𖽙𖾐 𖼀𖽦𖾐：“𖼷𖽑𖽻𖾐 𖼀𖽻𖾐 𖼀𖽑𖽙 𖼞𖽳𖾐 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼊𖽑𖽡 𖼽𖽚𖾐 𖼮𖽻𖾐．𖼷𖽑𖽻𖾐 𖼽𖽻 𖼺𖽡 𖼀𖽑𖽙 𖽃𖽙𖾑 𖼄𖽺 𖼮𖽑𖽡𖽺 𖼽𖽻 𖼊𖽑𖽺 𖼍𖽶𖾐 𖼺𖽪𖾐 𖼮𖽻𖾐 𖼀𖽦𖾐，𖼽𖽻 𖼺𖽡 𖼀𖽑𖽙 𖼞𖽳𖾐 𖼄𖽡𖽻 𖼐𖽑𖽡 𖼮𖽡 𖼀𖽑𖽡 𖼄𖽔 𖼠𖽕𖾐 𖼂𖽺𖾐 𖼀𖽑𖽧𖾐． 2 𖼽𖽻 𖼺𖽡 𖼀𖽑𖽙 𖼽𖽻 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼖𖽙𖾐 𖼀𖽦𖾐：‘ 𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼄𖽡𖽻 𖼣𖽙𖾐 𖼊𖽻 𖼮𖽨 𖼦𖽑𖽻𖾐，𖼐𖽑𖽡𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼐𖽺𖾑？𖼐𖽑𖽡𖾐 𖼞𖽑𖽙𖾐 𖼠𖽕 𖼺𖽪𖾐 𖼮𖽡𖽺𖾐 𖼰𖽕𖾐 𖼄𖽡𖾐 𖼀𖽻𖾐 𖼖𖽡𖾐！ 𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼞𖽜 𖼹𖽦𖾑 𖼣𖽙𖾐 𖼞𖽳𖾐 𖽃𖽔𖾑 𖼞𖽑𖽶𖾐 𖼊𖽑𖽺 𖽂𖽙𖾐 𖼠𖽕 𖼄𖽔 𖼊𖽙𖾐 𖼦𖽑𖽻𖾐 𖼳𖽶 𖼣𖽻𖾐．’3 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼞𖽑𖽶𖾑 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝：‘ 𖼺𖽡 𖼀𖽑𖽙 𖼣𖽙𖾐 𖼊𖽑𖽺 𖼄𖽔 𖼖𖽡𖾐，𖼣𖽙𖾐 𖼞𖽜 𖼽𖽻 𖼞𖽳𖾐 𖽃𖽔𖾑 𖼞𖽑𖽶𖾐 𖼊𖽑𖽺 𖽂𖽙𖾐 𖼠𖽕 𖼄𖽔 𖼊𖽙𖾐，𖼠𖽙𖾑 𖼍𖽻𖾐 𖼣𖽙𖾐 𖽃𖽔 𖼊𖽺𖾐 𖼂𖽺𖾐 𖼖𖽡𖾐 𖼐𖽺𖾑？𖼄𖽡𖾐 𖼠𖽢𖾑 𖼊𖽑𖽡𖾑 𖼣𖽻𖾐，𖽂𖽙 𖼄𖽔 𖼐𖽑𖽡𖾐；𖼷𖽙𖾐 𖼄𖽦𖾑 𖼊𖽑𖽡𖾑 𖼣𖽻𖾐，𖼳𖽡𖽦𖾑 𖼍𖽻𖾐 𖼮𖽡𖽮𖾐． 4 𖽃𖽔 𖼊𖽺𖾐 𖼂𖽺𖾐 𖼖𖽡𖾐 𖼣𖽙𖾐 𖼺𖽝𖾑 𖼦𖽑𖽻𖾐！ 𖽃𖽔𖾐 𖼺𖽺𖾑，𖼣𖽙𖾐 𖽃𖽔𖾑 𖼞𖽑𖽶𖾐 𖼄𖽔 𖽂𖽙𖾐 𖼠𖽕 𖼞𖽑𖽶𖾑 𖼮𖽶𖾐 𖼮𖽑𖽡𖾐，𖼷𖽑𖽻𖾐 𖼞𖽜 𖼣𖽙𖾐 𖼊𖽑𖽺 𖼹𖽶𖾐 𖼽𖽻 𖼈𖽳𖾐 𖽃𖽔𖾑 𖼞𖽑𖽶𖾐 𖼞𖽳𖾐 𖽂𖽙𖾐 𖼽𖽡𖾐 𖼊𖽙𖾐．’
5 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼽𖽻 𖼺𖽡 𖼀𖽑𖽙 𖼞𖽳𖾐 𖼮𖽡𖽺𖾐 𖼀𖽶𖾐 𖼖𖽦 𖼠𖽸𖾑 𖼊𖽑𖽺 𖼊𖽑𖽡 𖼽𖽚𖾐 𖼊𖽑𖽡 𖼽𖽚𖾐 𖽃𖽶𖾐 𖼂𖽻𖾐 𖼖𖽻𖾐．𖼽𖽻 𖽂𖽙 𖼊𖽺𖾐 𖼊𖽑𖽡 𖼽𖽚𖾐 𖼊𖽑𖽺 𖼊𖽻 𖼐𖽙𖾐：‘ 𖼐𖽑𖽡𖾐 𖼣𖽙𖾐 𖼺𖽡 𖼀𖽑𖽙 𖼞𖽳𖾐 𖼮𖽡𖽺𖾐 𖼞𖽑𖽙 𖼄𖽙𖾐 𖼀𖽶𖾐 𖼐𖽺𖾑？’ 6 𖼽𖽻 𖼀𖽦𖾐：‘ 𖼵𖽶𖾐 𖼈𖽡𖾐 𖼊𖽑𖽡 𖼦𖽑𖽙𖾐 𖼀𖽸 \fr 16．6 \ft 𖼊𖽑𖽡 𖼀𖽸 𖽃𖽔 𖼖𖽙𖾐 𖼣𖽙 𖼷𖽑𖽡𖾐 𖼰𖽡𖾐 𖼺𖽺𖾑 𖼮𖽻𖾐． 𖼀𖽶𖾐．’ 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼀𖽦𖾐：‘ 𖼮𖽡𖽺𖾐 𖼈𖽝 𖼍𖽴𖾑 𖼺𖽪𖾑 𖼈𖽺𖾐 𖼺𖽺𖾑，𖼐𖽕 𖼐𖽕𖾐 𖼊𖽡𖾐 𖼹𖽺𖾐 𖼖𖽻𖾐，𖼣𖽙 𖼷𖽑𖽡𖾐 𖼀𖽸 𖼈𖽝．’
7 𖼦𖽑𖽔𖾐 𖼖𖽺𖾑 𖼠𖽳𖾐 𖼖𖽪𖾐 𖼊𖽑𖽡 𖼽𖽚𖾐 𖼖𖽙𖾐 𖼊𖽻 𖼐𖽙𖾐：‘ 𖼐𖽑𖽡𖾐 𖼞𖽑𖽙 𖼄𖽙𖾐 𖼀𖽶𖾐 𖼐𖽺𖾑？’ 𖼞𖽑𖽶𖾑 𖼽𖽚𖾐 𖼀𖽦𖾐：‘ 𖼳𖽙𖾐 𖼊𖽑𖽡 𖼦𖽑𖽙𖾐 𖼍𖽕 𖼄𖽙𖾐 \fr 16．7 \ft 𖼊𖽑𖽡 𖼍𖽕 𖼄𖽙𖾐 𖽃𖽔 𖼖𖽙𖾐 𖼖𖽡𖾐 𖼦𖽑𖽙𖾐 𖼰𖽡𖾐 𖼺𖽺𖾑 𖼮𖽻𖾐． 𖼀𖽶𖾐．’ 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼀𖽦𖾐：‘ 𖼮𖽡𖽺𖾐 𖼈𖽝 𖼍𖽴𖾑 𖼺𖽪𖾑 𖼈𖽺𖾐 𖼺𖽺𖾑，𖼦𖽑𖽦 𖼷𖽑𖽡𖾐 𖼍𖽕 𖼄𖽙𖾐 𖼈𖽝．’
8 𖽃𖽔𖾐 𖼺𖽺𖾑，𖼺𖽡 𖼀𖽑𖽙 𖼽𖽻 𖼞𖽳𖾐 𖽃𖽔𖾑 𖼞𖽑𖽶𖾐 𖼠𖽕 𖼐𖽑𖽧𖾐 𖼄𖽙𖾐 𖼄𖽔 𖼰𖽶𖾐 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼊𖽑𖽺 𖼂𖽪𖾐，𖼽𖽻 𖼄𖽡𖽻 𖼂𖽺𖾐 𖼦𖽑𖽔𖾐 𖼮𖽶𖾐 𖼺𖽡𖾐 𖼀𖽦𖾐．𖼞𖽪𖾐 𖼮𖽡𖽺𖾐，𖼊𖽺𖾐 𖼊𖽑𖽺 𖼖𖽙𖾐 𖼊𖽴 𖼺𖽪𖾐 𖼷𖽑𖽻𖾐，𖼊𖽺𖾐 𖼊𖽑𖽺 𖼄𖽡𖽻 𖼂𖽺𖾐，𖼞𖽑𖽶𖾑 𖼀𖽜𖾐 𖼖𖽜𖾐 𖼺𖽪𖾐 𖼻𖽙 𖼦𖽶𖾑 𖼄𖽔 𖼷𖽑𖽶𖾐 𖼺𖽡𖾐 𖼺𖽪𖾐 𖼣𖽻𖾐． 9 𖼽𖽺𖾐 𖼺𖽪𖾐 𖼹𖽦𖾑 𖼽𖽻 𖼷𖽻𖾐 𖼺𖽪𖾐 𖼖𖽙𖾐 𖼀𖽦𖾐：“𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼊𖽺𖾐 𖼊𖽑𖽺 𖼮𖽡 𖼷𖽙𖾐 𖼻𖽜 𖼞𖽙𖾐 𖼮𖽑𖽻 𖼊𖽑𖽪 𖼖𖽡𖾐．𖽃𖽔𖾐 𖼺𖽺𖾑，𖼮𖽡 𖼀𖽑𖽡 𖼖𖽡𖾐 𖼄𖽔 𖼊𖽙𖾐 𖼞𖽑𖽶𖾑 𖼮𖽶𖾐 𖼮𖽑𖽡𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼹𖽶𖾐 𖼺𖽺𖾑，𖼻𖽳𖾐 𖼹𖽦𖾐 𖼮𖽻𖾐 𖼞𖽳𖾐 𖽃𖽔𖾑 𖼞𖽑𖽶𖾐 𖽂𖽙𖾐 𖼽𖽡𖾐 𖼊𖽻𖾐．
10 𖼦𖽑𖽔𖾐 𖼮𖽶𖾐 𖼽𖽳𖾐 𖼳𖽶 𖼄𖽡𖽻 𖼂𖽺𖾐 𖼖𖽺𖾑 𖼐𖽑𖽧𖾐 𖼻𖽺𖾐 𖼺𖽪𖾐 𖼷𖽑𖽻𖾐，𖼄𖽡𖽻 𖼈𖽳 𖼂𖽺𖾐 𖼖𖽺𖾑 𖼐𖽑𖽧𖾐 𖼻𖽺𖾐 𖼊𖽻𖾐；𖼦𖽑𖽔𖾐 𖼮𖽶𖾐 𖼽𖽳𖾐 𖼳𖽶 𖼄𖽡𖽻 𖼂𖽺𖾐 𖼖𖽺𖾑 𖼐𖽑𖽧𖾐 𖼄𖽔 𖼻𖽺𖾐 𖼺𖽪𖾐 𖼷𖽑𖽻𖾐，𖼄𖽡𖽻 𖼈𖽳 𖼂𖽺𖾐 𖼖𖽺𖾑 𖼐𖽑𖽧𖾐 𖼄𖽔 𖼻𖽺𖾐 𖼊𖽻𖾐． 11 𖼊𖽺𖾐 𖼊𖽑𖽺 𖼮𖽡 𖼷𖽙𖾐 𖼠𖽕 𖼞𖽳𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼄𖽔 𖼻𖽺𖾐 𖼊𖽑𖽡𖾑 𖼣𖽻𖾐，𖼄𖽶 𖼠𖽻𖾐 𖼮𖽡 𖼷𖽙𖾐 𖽃𖽔 𖼺𖽺 𖼀𖽑𖽨 𖼐𖽑𖽡𖾐 𖼈𖽳𖾐 𖼞𖽜 𖼠𖽕 𖼠𖽸𖾑 𖼺𖽺 𖼐𖽺𖾑？ 12 𖼐𖽑𖽡𖾐 𖼈𖽳𖾐 𖼺𖽙𖾐 𖼞𖽳𖾐 𖼄𖽡𖽻 𖼐𖽑𖽡 𖼠𖽕 𖼖𖽺𖾑 𖼐𖽑𖽧𖾐 𖼄𖽔 𖼻𖽺𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖼣𖽻𖾐 𖼷𖽻 𖼺𖽪𖾐 𖼄𖽡𖽻 𖼐𖽑𖽡，𖽃𖽔 𖼺𖽺 𖼀𖽑𖽨 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼊𖽻𖾐 𖼺𖽺 𖼐𖽺𖾑？”
13 𖼮𖽜𖾐 𖼀𖽑𖽙 𖼊𖽑𖽡 𖼽𖽚𖾐，𖼺𖽡 𖼀𖽑𖽙 𖼐𖽑𖽡 𖼽𖽚𖾐 𖼊𖽑𖽺 𖼠𖽙𖾐 𖼳𖽙𖾐 𖼄𖽔 𖼊𖽙𖾐．𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖼦𖽑𖽺𖾑 𖼽𖽚𖾐 𖼊𖽑𖽺 𖼦𖽶𖾑，𖼞𖽑𖽶𖾑 𖼽𖽚𖾐 𖼊𖽑𖽺 𖼮𖽨；𖼦𖽑𖽺𖾑 𖼽𖽚𖾐 𖼊𖽑𖽺 𖼐𖽦𖾐 𖼍𖽪𖾐，𖼞𖽑𖽶𖾑 𖼽𖽚𖾐 𖼊𖽑𖽺 𖼐𖽦𖾐 𖼄𖽔 𖼍𖽪𖾐 𖼊𖽻𖾐．𖼐𖽑𖽡𖾐 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼠𖽙𖾐 𖼳𖽙𖾐，𖼮𖽡 𖼀𖽑𖽡 𖼊𖽑𖽺 𖼖𖽺𖾑 𖼠𖽙𖾐 𖼳𖽙𖾐 𖼞𖽑𖽶𖾑 𖼂𖽺𖾐 𖼄𖽔 𖼊𖽙𖾐．”
𖼳𖽪𖾐 𖼮𖽨𖾐 𖼐𖽺𖾐 𖼄𖽶 𖼠𖽚 𖼄𖽢 𖼮𖽑𖽡𖽪 (𖼊𖽑𖽹𖾑5：31-32；11：12-13；𖼞𖽑𖽜10：11-12 )
14 𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐 𖼮𖽡 𖼀𖽑𖽡 𖼊𖽑𖽺 𖼐𖽙𖾑 𖼣𖽜 𖼺𖽪𖾐 𖼣𖽻𖾐，𖼊𖽻 𖼂𖽪𖾑 𖼦𖽑𖽺𖾑 𖼊𖽻 𖼮𖽨 𖼺𖽺𖾑，𖼽𖽺𖾐 𖼺𖽪𖾐 𖼊𖽑𖽺 𖼈𖽳𖾐 𖼵𖽶𖾐． 15 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺，𖼽𖽻 𖼄𖽳𖾑 𖼞𖽚 𖼹𖽳𖾐 𖼺𖽪𖾐 𖼰𖽕𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼄𖽙𖾐 𖽃𖽔 𖼊𖽺𖾐 𖼮𖽻𖾐 𖼺𖽪𖾐 𖼣𖽻𖾐，𖼞𖽑𖽶𖾑 𖽂𖽙 𖼺𖽙𖾐 𖼂𖽙𖾐 𖼺𖽝𖾑 𖼍𖽳𖾐．𖼞𖽪𖾐 𖼮𖽡𖽺𖾐，𖼷𖽑𖽻𖾐 𖼮𖽑𖽢𖾑 𖼐𖽦𖾐 𖼀𖽑𖽶 𖼊𖽴 𖼺𖽪𖾐，𖼞𖽑𖽶𖾑 𖽂𖽙 𖼺𖽙𖾐 𖼂𖽙𖾐 𖼐𖽦𖾐 𖼂𖽻𖾐 𖼖𖽻𖾐，𖼦𖽑𖽔𖾐 𖼮𖽶𖾐 𖼦𖽶𖾑 𖼺𖽪𖾐 𖼣𖽻𖾐．
16 𖼷𖽑𖽡 𖼺𖽪𖾐 𖼽𖽱𖾐 𖼦𖽕𖾑 𖼄𖽔 𖼮𖽑𖽡𖾐 𖼖𖽻𖾐 𖼺𖽺 𖽃𖽙𖾑 𖼄𖽺，𖼳𖽪𖾐 𖼮𖽨𖾐 𖼐𖽺𖾐 𖼺𖽡𖾐 𖼻𖽙 𖼄𖽪𖾑 𖼊𖽻 𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽨𖾐 𖼄𖽪𖾑．𖼷𖽑𖽡 𖼺𖽪𖾐 𖼽𖽱𖾑 𖼦𖽕𖾑 𖼮𖽑𖽡𖾐 𖼖𖽻𖾐 𖼄𖽻𖾑 𖼮𖽑𖽻𖾐 𖼍𖽪𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽶 𖼠𖽚 𖼄𖽢 𖼮𖽑𖽡𖽪 𖼞𖽑𖽙𖾐 𖼮𖽑𖽡𖾐 𖼊𖽪 𖼦𖽑𖽺 𖼊𖽑𖽧 𖼽𖽡𖾐 𖼦𖽑𖽙𖾐，𖼊𖽑𖽡 𖼽𖽚𖾑 𖼽𖽚𖾐 𖽂𖽙 𖼊𖽑𖽧 𖼄𖽙𖾐 𖼄𖽶 𖼠𖽚 𖼞𖽑𖽶𖾐 𖼊𖽡 𖼽𖽡𖾐 𖼖𖽡𖾐． 17 𖼄𖽶 𖼠𖽻𖾐 𖼄𖽡𖾑 𖼐𖽦𖾐 𖼀𖽑𖽧𖾐 𖼦𖽑𖽙𖾐，𖼞𖽶𖾑𖽑 𖼳𖽪𖾐 𖼮𖽨𖾐 𖼞𖽳𖾐 𖼺𖽪𖾑 𖼂𖽕𖾐 𖼊𖽑𖽡 𖼀𖽧𖾑 𖼻𖽙 𖼀𖽑𖽧𖾐 𖼦𖽑𖽙𖾐 𖼦𖽶𖾑 𖼄𖽔 𖼷𖽑𖽶𖾐 𖼖𖽳𖾐 𖼮𖽡𖽺 𖼳𖽶 𖼣𖽻𖾐．
18 𖼷𖽑𖽻𖾐 𖼄𖽳 𖼻𖽙 𖼊𖽑𖽺 𖼖𖽧 𖼦𖽑𖽙𖾐 𖼺𖽺𖾑，𖼠𖽳𖾐 𖼖𖽪𖾐 𖼹𖽶𖾐 𖼺𖽪𖾐，𖼞𖽑𖽶𖾑 𖼊𖽑𖽙𖾑 𖼄𖽡𖽻 𖼂𖽺𖾐 𖼺𖽪𖾐 𖼣𖽻𖾐；𖼖𖽧 𖼦𖽑𖽙𖾐 𖼺𖽪𖾐 𖼻𖽙 𖼄𖽳 𖼊𖽑𖽺 𖼹𖽶𖾐 𖼺𖽪𖾐 𖼷𖽑𖽻𖾐，𖼽𖽻 𖼖𖽺𖾑 𖼊𖽑𖽙𖾑 𖼄𖽡𖽻 𖼂𖽺𖾐 𖼺𖽪𖾐 𖼣𖽻𖾐．”
𖼷𖽑𖽻𖾐 𖼀𖽻𖾐 𖼀𖽑𖽙 𖼐𖽺𖾐 𖼷𖽙𖾐 𖼄𖽦𖾑 𖼀𖽑𖽙 𖼖𖽔𖾐 𖼺𖽔 𖼖𖽪𖾑
19 “𖼷𖽑𖽻𖾐 𖼀𖽻𖾐 𖼀𖽑𖽙 𖼊𖽑𖽡 𖼽𖽚𖾐 𖼮𖽻𖾐，𖼈𖽡𖾑 𖼂𖽚𖾐 𖼀𖽑𖽡𖽻𖾐 𖼮𖽻 𖼐𖽺𖾐 𖼽𖽦 𖼄𖽳𖾐 𖼄𖽶𖾑 𖼄𖽶𖾐 𖼞𖽑𖽶𖾑 𖼳𖽶 𖼀𖽑𖽡𖽻𖾐 𖼹𖽳𖾐 𖼍𖽺𖾑 𖼈𖽦，𖼷𖽙 𖼷𖽙 𖼊𖽻𖾐 𖼊𖽻𖾐，𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼞𖽜𖾐 𖼺𖽜𖾐． 20 𖼦𖽑𖽔𖾐 𖼖𖽺𖾑 𖼷𖽙𖾐 𖼄𖽦𖾑 𖼀𖽑𖽙𖾐 𖼊𖽑𖽡 𖼽𖽚𖾐 𖼮𖽻𖾐，𖼖𖽔𖾐 𖼺𖽔 𖼖𖽪𖾑 𖼄𖽡𖾐．𖼽𖽻 𖼊𖽑𖽡 𖼞𖽶𖾐 𖼮𖽑𖽶 𖼀𖽕𖾐 𖼐𖽙𖾐 𖼊𖽚𖾐，𖼺𖽙𖾐 𖼮𖽑𖽢𖾑 𖼀𖽑𖽨 𖼷𖽑𖽻𖾐 𖼀𖽻𖾐 𖼀𖽑𖽙 𖽃𖽔𖾑 𖼊𖽪 𖼞𖽳𖾐 𖼍𖽙𖾑． 21 𖽃𖽔𖾐 𖼺𖽺𖾑，𖼷𖽑𖽻𖾐 𖼀𖽻𖾐 𖼀𖽑𖽙 𖼞𖽳𖾐 𖼹𖽪𖾐 𖼹𖽪𖾐 𖼊𖽑𖽺 𖼮𖽑𖽻𖾐 𖼖𖽜𖾐 𖼹𖽺𖾐 𖼖𖽻𖾐 𖼺𖽪𖾐 𖼷𖽙𖾐 𖼄𖽙𖾐 𖼮𖽡𖽦 𖼊𖽑𖽺 𖽂𖽙𖾐 𖼷𖽙 𖼊𖽙𖾐 𖼖𖽡𖾐 𖼊𖽡 𖼮𖽑𖽻．𖽃𖽔𖾑 𖼐𖽙 𖼖𖽺𖾑 𖼖𖽻𖾐 𖼽𖽻 𖼀𖽕𖾐 𖼐𖽙𖾐 𖼊𖽑𖽺 𖼖𖽝．
22 𖼠𖽙𖾑 𖼍𖽻𖾐，𖼷𖽙𖾐 𖼄𖽦𖾑 𖼀𖽑𖽙 𖼳𖽶𖾐 𖼦𖽑𖽙𖾐，𖼄𖽶 𖼹𖽡𖾐 𖼖𖽦 𖼽𖽻 𖼊𖽑𖽺 𖼹𖽶𖾐 𖼂𖽡𖾐 𖼽𖽡𖾐，𖼀𖽑𖽨 𖼽𖽕𖾑 𖼂𖽚 𖼖𖽔𖾐 𖼦𖽗 𖼍𖽦𖾐 𖼞𖽚 𖼞𖽑𖽶𖾐 𖼮𖽻𖾐．𖼷𖽑𖽻𖾐 𖼀𖽻𖾐 𖼀𖽑𖽙 𖼖𖽺𖾑 𖼳𖽶𖾐 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼍𖽡𖾑 𖼦𖽑𖽙𖾐． 23 𖼷𖽑𖽻𖾐 𖼀𖽻𖾐 𖼀𖽑𖽙 𖼄𖽙𖾑 𖼄𖽡𖾐 𖼞𖽑𖽶𖾐 𖼮𖽻𖾐 𖼠𖽻𖾐 𖼰𖽡𖽳𖾐，𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐，𖼄𖽡𖾐 𖼈𖽡 𖼈𖽡 𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽺𖾐 𖼽𖽻 𖼍𖽦𖾐 𖼞𖽚 𖼞𖽑𖽶𖾐 𖼮𖽻𖾐 𖼺𖽪𖾐 𖼖𖽔𖾐 𖼺𖽔 𖼖𖽪𖾑 𖼊𖽑𖽺 𖼐𖽦𖾐 𖼄𖽡𖽻𖾐．
24 𖽃𖽔𖾐 𖼺𖽺𖾑，𖼷𖽑𖽻𖾐 𖼀𖽻𖾐 𖼀𖽑𖽙 𖽃𖽶𖾐 𖼍𖽪𖾐 𖼖𖽻𖾐，𖼀𖽦𖾐：‘ 𖼣𖽙𖾐 𖽃𖽔𖾑 𖼄𖽻 𖼽𖽕𖾑 𖼂𖽚 𖼖𖽔𖾐 𖼦𖽗 𖽃𖽔𖾐！ 𖼣𖽙𖾐 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼞𖽜！ 𖼖𖽔𖾐 𖼺𖽔 𖼖𖽪𖾑 𖼊𖽑𖽺 𖼹𖽡𖾐 𖼺𖽺𖾑，𖼖𖽦 𖼐𖽑𖽡𖾐 𖼻𖽜 𖽃𖽔𖾐 𖼮𖽡𖽦𖾐 𖼊𖽑𖽡 𖼂𖽝𖾐 𖼍𖽙 𖼣𖽙𖾐 𖼖𖽙𖾐 𖼊𖽑𖽺 𖼍𖽦𖾐 𖼖𖽻𖾐，𖼣𖽙𖾐 𖼖𖽙𖾐 𖼞𖽜 𖼮𖽑𖽸𖾑 𖼮𖽑𖽸 𖼊𖽑𖽡 𖼖𖽦 𖼮𖽻𖾐 𖼞𖽜！ 𖼞𖽪𖾐 𖼮𖽡𖽺𖾐，𖼣𖽙𖾐 𖽃𖽔𖾐 𖼍𖽚𖾑 𖼖𖽜𖾐 𖼠𖽻𖾐 𖼊𖽑𖽺 𖼮𖽻𖾐，𖼦𖽑𖽔𖾐 𖼮𖽶𖾐 𖼠𖽻𖾐 𖼰𖽡𖽳𖾐．’
25 𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽦𖾐：‘ 𖼣𖽙𖾐 𖼻𖽙 𖽃𖽔𖾐！ 𖼐𖽑𖽡𖾐 𖼊𖽑𖽡 𖼠𖽙𖾐 𖼣𖽝 𖼐𖽦𖾐，𖼊𖽺𖾐 𖼊𖽑𖽺 𖼮𖽻𖾐 𖼊𖽑𖽙 𖼐𖽑𖽡𖾐 𖼮𖽻𖾐 𖼷𖽡𖾑 𖼮𖽻𖾐 𖼺𖽙𖾐 𖽂𖽙𖾐，𖼖𖽔𖾐 𖼺𖽔 𖼖𖽪𖾑 𖼍𖽺𖾑 𖼳𖽚𖾑 𖼞𖽑𖽪 𖼠𖽻𖾐 𖼰𖽡𖽳𖾐 𖼷𖽶𖾐．𖽃𖽔𖾑 𖼄𖽳𖾐 𖼽𖽻 𖼦𖽑𖽺𖾑 𖼠𖽻𖾐 𖼞𖽳𖾐 𖼐𖽑𖽧𖾐 𖼍𖽡𖾐 𖽂𖽙𖾐，𖼐𖽑𖽡𖾐 𖼀𖽑𖽚𖾐 𖼠𖽻𖾐 𖼰𖽡𖽺𖾐 𖼖𖽚． 26 𖼦𖽑𖽺𖾑 𖼖𖽙𖾐 𖼺𖽶𖾑 𖼍𖽺𖾑 𖼄𖽔 𖼣𖽻𖾐，𖼣𖽙𖾐 𖼈𖽳𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼊𖽑𖽻𖾐 𖼄𖽔 𖼊𖽴 𖼺𖽪𖾐 𖼰𖽨𖾑 𖼍𖽻𖾑 𖼍𖽳𖾐．𖽃𖽔𖾐 𖼺𖽺𖾑，𖼷𖽑𖽻𖾐 𖼦𖽑𖽺𖾑 𖼀𖽳 𖼮𖽑𖽻𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼞𖽑𖽶𖾑 𖼀𖽳 𖼽𖽡𖾐 𖼄𖽔 𖼊𖽙𖾐，𖼞𖽑𖽶𖾑 𖼀𖽳 𖼮𖽑𖽻𖾐 𖼣𖽙𖾐 𖼈𖽳𖾐 𖼞𖽳𖾐 𖼦𖽑𖽺𖾑 𖼀𖽳 𖼖𖽺𖾑 𖼖𖽻𖾐 𖼄𖽔 𖼊𖽙𖾐 𖼳𖽶 𖼣𖽻𖾐．’
27 𖼷𖽑𖽻𖾐 𖼀𖽻𖾐 𖼀𖽑𖽙 𖼀𖽦𖾐：‘ 𖼣𖽙𖾐 𖽃𖽔𖾑 𖼄𖽻 𖽃𖽔𖾐！ 𖼦𖽑𖽺𖾑 𖼻𖽻𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼖𖽔𖾐 𖼺𖽔 𖼖𖽪𖾑 𖼊𖽑𖽺 𖼹𖽡𖾐 𖼣𖽙𖾐 𖽃𖽔 𖼀𖽙 𖼈𖽴 𖼞𖽳𖾐 𖼽𖽡𖾐 𖼞𖽜． 28 𖼞𖽪𖾐 𖼮𖽡𖽺𖾐，𖼣𖽙𖾐 𖼈𖽧 𖼄𖽻 𖼐𖽑𖽳𖾐 𖼄𖽻 𖼣𖽙 𖼽𖽚𖾐 𖼮𖽻𖾐 𖼍𖽳𖾐 𖼺𖽺，𖼽𖽻 𖼈𖽳𖾐 𖼖𖽙𖾐 𖼀𖽦𖾐 𖼄𖽪𖾑 𖼽𖽡𖾐 𖼖𖽡𖾐，𖼽𖽻 𖼈𖽳𖾐 𖼞𖽜 𖼦𖽑𖽺𖾑 𖼄𖽡𖾐 𖼊𖽺𖾐 𖼠𖽻𖾐 𖼰𖽡𖽳𖾐 𖼖𖽻𖾐 𖼄𖽔 𖼻𖽻𖾐．’
29 𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽦𖾐：‘ 𖼽𖽻 𖼈𖽳𖾐 𖼄𖽚 𖼳𖽡𖾐 𖼐𖽺𖾐 𖼺𖽡𖾐 𖼻𖽙 𖼄𖽪𖾑 𖼊𖽻 𖼊𖽑𖽺 𖽂𖽙𖾐 𖼊𖽻 𖼮𖽶𖾐 𖼊𖽙𖾐．’
30 𖼷𖽑𖽻𖾐 𖼀𖽻𖾐 𖼀𖽑𖽙 𖼀𖽦𖾐：‘ 𖼣𖽙𖾐 𖽃𖽔𖾑 𖼄𖽻 𖼽𖽕𖾑 𖼂𖽚 𖼖𖽔𖾐 𖼦𖽗 𖽃𖽔𖾐！ 𖼦𖽑𖽺𖾑 𖼖𖽙𖾐 𖼺𖽶𖾑 𖼄𖽔 𖼣𖽻𖾐，𖼷𖽑𖽻𖾐 𖼳𖽶𖾐 𖼦𖽑𖽙𖾐 𖼺𖽪𖾐 𖼊𖽑𖽡 𖼽𖽚𖾐 𖼠𖽙𖾑 𖼞𖽑𖽚 𖼖𖽻𖾐 𖼽𖽻 𖼈𖽳𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐 𖼊𖽑𖽡𖾑 𖼣𖽻𖾐，𖼽𖽻 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼊𖽡 𖼮𖽑𖽻 𖼀𖽑𖽚𖾐 𖼊𖽻𖾐．’
31 𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽦𖾐：‘ 𖼽𖽻 𖼈𖽳𖾐 𖼄𖽚 𖼳𖽡𖾐 𖼐𖽺𖾐 𖼺𖽡𖾐 𖼻𖽙 𖼄𖽪𖾑 𖼊𖽻 𖼖𖽙𖾐 𖼄𖽔 𖼊𖽻 𖼮𖽶𖾐 𖼊𖽑𖽡𖾑 𖼣𖽻𖾐，𖼷𖽑𖽻𖾐 𖼊𖽑𖽡 𖼽𖽚𖾐 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼀𖽦𖾐 𖼖𖽺𖾑，𖼽𖽻 𖼈𖽳𖾐 𖼊𖽻 𖼮𖽶𖾐 𖼄𖽔 𖼠𖽸𖾑 𖼳𖽶 𖼣𖽻𖾐．’ ”