𖼀𖽑𖽧 𖼦𖽑𖽙𖾐 𖼞𖽳𖾐 𖼍𖽻𖾐 𖼊𖽻 𖼺𖽙𖾐 𖼊𖽝𖾐 𖼦𖽑𖽺 𖼊𖽻𖾐
15
1 𖼊𖽑𖽡 𖼐𖽑𖽡𖾐 𖼮𖽻𖾐，𖼳𖽚𖾐 𖼠𖽜𖾐 𖼷𖽑𖽻𖾐 𖼐𖽺𖾐 𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼊𖽑𖽡 𖼷𖽪𖾐 𖼄𖽙𖾐 𖼽𖽺𖾐 𖼺𖽪𖾐 𖼖𖽙𖾐 𖼐𖽳 𖼖𖽻𖾐，𖼽𖽻 𖼄𖽪𖾑 𖼊𖽻 𖼊𖽑𖽺 𖼊𖽻 𖼐𖽙𖾐 𖼊𖽻𖾐． 2 𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐 𖼐𖽺𖾐 𖼺𖽪𖾑 𖼷𖽑𖽺𖾐 𖼷𖽑𖽻𖾐 𖼞𖽑𖽶𖾐 𖼞𖽑𖽶𖾐 𖼽𖽻 𖼊𖽑𖽺 𖼊𖽑𖽜𖾐，𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼊𖽑𖽺 𖼷𖽶𖾐 𖼺𖽳，𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼷𖽙𖾐 𖼷𖽙．”3 𖽃𖽔𖾐 𖼺𖽺𖾑，𖼽𖽺𖾐 𖼺𖽪𖾐 𖼍𖽻𖾐 𖼊𖽻 𖼻𖽜 𖼽𖽻 𖼈𖽳𖾐 𖼖𖽙𖾐 𖼀𖽦𖾐：
𖼽𖽻𖾐 𖼀𖽑𖽧 𖼦𖽑𖽙𖾐 𖼺𖽪𖾐 𖼍𖽻𖾐 𖼊𖽻 ( 𖼊𖽑𖽹𖾑 18：12-14 )
4 “𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖽃𖽔 𖼺𖽺 𖼣𖽻𖾐 𖼦𖽻，𖼽𖽻 𖼽𖽻𖾐 𖼊𖽑𖽡 𖼦𖽑𖽙𖾐 𖼊𖽝𖾐 𖼮𖽻𖾐，𖼊𖽑𖽡 𖼊𖽝𖾐 𖼀𖽑𖽧 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼞𖽑𖽶𖾑 𖼠𖽶𖾐 𖼷𖽑𖽡𖾐 𖼠𖽶𖾐 𖼊𖽝𖾐 𖼊𖽑𖽺 𖼀𖽑𖽨 𖼄𖽡𖾐 𖼳𖽡𖽻𖾐 𖼀𖽙 𖼍𖽙𖾑，𖼀𖽑𖽧 𖼦𖽑𖽙𖾐 𖼺𖽪𖾐 𖼞𖽑𖽶𖾑 𖼊𖽝𖾐 𖼊𖽑𖽺 𖼰𖽙𖾐 𖼽𖽡𖾐 𖼺𖽺𖾑，𖼰𖽙𖾐 𖽂𖽙𖾐 𖼖𖽙𖾐 𖼮𖽑𖽡𖾐 𖼊𖽻𖾐． 5 𖼰𖽙𖾐 𖽂𖽙𖾐 𖼦𖽑𖽻𖾐 𖼺𖽺𖾑，𖼖𖽺𖾑 𖼞𖽜𖾐 𖼺𖽜𖾐 𖼄𖽙𖾐 𖼀𖽑𖽨 𖼈𖽳𖾐 𖼀𖽑𖽳 𖼊𖽑𖽺 𖼍𖽦𖾐， 6 𖼈𖽦𖾑 𖼞𖽚 𖼮𖽑𖽡𖾐 𖼖𖽻𖾐，𖼽𖽻 𖼞𖽙𖾐 𖼮𖽑𖽻 𖼐𖽺𖾐 𖼮𖽑𖽡𖽦𖾐 𖼮𖽑𖽻 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼖𖽺𖾑 𖼞𖽜𖾐 𖼺𖽜𖾐 𖼄𖽺！ 𖼞𖽪𖾐 𖼮𖽡𖽺𖾐，𖼣𖽙𖾐 𖼀𖽑𖽧 𖼦𖽑𖽙𖾐 𖼺𖽪𖾐 𖼽𖽻𖾐 𖼰𖽙𖾐 𖽂𖽙𖾐 𖼦𖽑𖽻𖾐．’ 7 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽡 𖼮𖽑𖽻 𖼀𖽑𖽚𖾐，𖼄𖽶 𖼠𖽻𖾐 𖼊𖽑𖽺 𖼖𖽺𖾑 𖼦𖽑𖽺𖾑 𖼖𖽙𖾐 𖼺𖽶𖾑 𖼽𖽻 𖼖𖽙𖾐 𖼀𖽙𖾐 𖼖𖽺𖾑，𖼞𖽑𖽻𖾑 𖼠𖽶𖾐 𖼷𖽑𖽡𖾐 𖼠𖽶𖾐 𖼽𖽚𖾐 𖼊𖽡 𖼮𖽑𖽻 𖼀𖽑𖽚𖾐 𖼄𖽔 𖼻𖽻𖾐、 𖼷𖽑𖽻𖾐 𖼹𖽳𖾐 𖼣𖽻𖾐 𖼊𖽡 𖼮𖽑𖽻 𖼺𖽪𖾐 𖼖𖽙𖾐 𖼀𖽙𖾐 𖼦𖽶𖾑 𖼄𖽔 𖼷𖽑𖽶𖾐 𖼖𖽺𖾑 𖼳𖽶 𖼣𖽻𖾐！”
𖼀𖽑𖽨𖾐 𖼀𖽑𖽡 𖼀𖽑𖽧 𖼦𖽑𖽙𖾐 𖼺𖽪𖾐 𖼍𖽻𖾐 𖼊𖽻
8 “𖼦𖽑𖽔𖾐 𖼖𖽺𖾑 𖼻𖽙 𖼄𖽳 𖼄𖽡𖾐 𖼐𖽜𖾐 𖼊𖽑𖽡 𖼽𖽚𖾐 𖼀𖽑𖽨𖾐 𖼷𖽑𖽡𖾐 𖼀𖽑𖽡 𖼮𖽻𖾐，𖼊𖽑𖽡 𖼀𖽑𖽡 𖼀𖽑𖽧 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼽𖽻 𖼀𖽙𖾐 𖼊𖽪𖾐 𖼍𖽚𖾑 𖼍𖽪𖾐，𖽃𖽔𖾑 𖼞𖽑𖽶𖾐 𖼮𖽶𖾐 𖼺𖽸𖾐，𖼹𖽳𖾐 𖼄𖽙𖾐 𖼰𖽙𖾐 𖼺𖽺𖾑，𖼰𖽙𖾐 𖽂𖽙𖾐 𖼖𖽙𖾐 𖼮𖽑𖽡𖾐 𖼊𖽻𖾐． 9 𖼰𖽙𖾐 𖽂𖽙𖾐 𖼦𖽑𖽻𖾐 𖼺𖽺𖾑，𖼽𖽻 𖼞𖽙𖾐 𖼮𖽑𖽻 𖼐𖽺𖾐 𖼮𖽑𖽡𖽦𖾐 𖼮𖽑𖽻 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼖𖽺𖾑 𖼞𖽜𖾐 𖼺𖽜𖾐 𖼄𖽺！ 𖼞𖽪𖾐 𖼮𖽡𖽺𖾐，𖼣𖽙𖾐 𖼀𖽑𖽧 𖼦𖽑𖽙𖾐 𖼺𖽪𖾐 𖼀𖽑𖽨𖾐 𖼀𖽑𖽡 𖼰𖽙𖾐 𖽂𖽙𖾐 𖼦𖽑𖽻𖾐！’ 10 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽡 𖼮𖽑𖽻 𖼀𖽑𖽚𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼹𖽡𖾐 𖼖𖽦 𖼖𖽺𖾑 𖼦𖽑𖽺𖾑 𖼖𖽙𖾐 𖼺𖽶𖾑 𖼽𖽻 𖼖𖽙𖾐 𖼀𖽙𖾐 𖼖𖽺𖾑 𖼳𖽶 𖼣𖽻𖾐．”
𖽃𖽔𖾐 𖼐𖽑𖽳𖾐 𖼀𖽑𖽧 𖼦𖽑𖽙𖾐 𖼺𖽪𖾐 𖼍𖽻𖾐 𖼊𖽻
11 𖼽𖽺𖾐 𖼺𖽪𖾐 𖼦𖽑𖽔𖾐 𖼖𖽺𖾑 𖼀𖽦𖾐：“𖼷𖽑𖽻𖾐 𖼊𖽑𖽡 𖼽𖽚𖾐 𖼻𖽙 𖼐𖽑𖽡 𖼦𖽑𖽳𖾐 𖼐𖽑𖽳𖾐 𖼮𖽻𖾐． 12 𖼻𖽙 𖼽𖽳𖾐 𖼽𖽻 𖼀𖽙 𖼖𖽙𖾐 𖼀𖽦𖾐：‘ 𖽃𖽔 𖼀𖽙！ 𖼣𖽙𖾐 𖼞𖽑𖽙𖾐 𖽂𖽙𖾐 𖼷𖽻 𖼺𖽪𖾐 𖼈𖽴 𖼀𖽜𖾐 𖼣𖽙𖾐 𖼞𖽜 𖼖𖽻𖾐．’ 𖽃𖽔𖾐 𖼺𖽺𖾑，𖼽𖽻 𖼀𖽙 𖼈𖽴 𖼀𖽜𖾐 𖼽𖽻 𖼈𖽳𖾐 𖼐𖽑𖽡 𖼦𖽑𖽳𖾐 𖼐𖽑𖽳𖾐 𖼊𖽑𖽺 𖼞𖽜．
13 𖼞𖽑𖽙 𖼄𖽙𖾐 𖼐𖽑𖽡𖾐 𖼄𖽔 𖼖𖽚 𖼺𖽺，𖼻𖽙 𖼽𖽳𖾐 𖼽𖽻 𖼞𖽑𖽙𖾐 𖼮𖽻𖾐 𖼳𖽶 𖼄𖽳𖾑 𖼄𖽳 𖼠𖽙𖾐 𖼳𖽙𖾐 𖼍𖽪𖾐 𖼖𖽻𖾐 𖼺𖽺𖾑，𖼄𖽡𖾐 𖼈𖽡 𖼄𖽡𖾐 𖼊𖽺𖾐 𖼽𖽡𖾐 𖼦𖽑𖽙𖾐，𖼞𖽑𖽶𖾑 𖼠𖽻𖾐 𖼽𖽻 𖼐𖽑𖽧𖾐 𖼽𖽻 𖼺𖽳，𖼄𖽔 𖼠𖽕𖾐 𖼄𖽡𖽻 𖼂𖽺𖾐，𖼮𖽡 𖼀𖽑𖽡 𖼻𖽜 𖼀𖽑𖽧𖾐． 14 𖼽𖽻 𖼞𖽑𖽙𖾐 𖼮𖽻𖾐 𖼳𖽶 𖼄𖽳𖾑 𖼄𖽳 𖼻𖽜 𖼞𖽳𖾐 𖼦𖽑𖽻𖾐，𖼊𖽺𖾐 𖼊𖽺𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼦𖽑𖽦 𖼄𖽦 𖼈𖽳 𖼷𖽶𖾐 𖼄𖽳𖾐 𖼺𖽺𖾑，𖼳𖽚𖾑 𖼞𖽑𖽪 𖼍𖽪𖾐 𖼖𖽻𖾐． 15 𖽃𖽔𖾐 𖼺𖽺𖾑，𖼽𖽻 𖼽𖽡𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽙𖾐 𖼣𖽜𖾐．𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼽𖽻 𖼞𖽜 𖼄𖽡𖾐 𖼠𖽻𖾐 𖼈𖽦 𖼖𖽚𖾑 𖼽𖽡𖾐． 16 𖼽𖽻 𖼈𖽦 𖼰𖽙𖾑 𖼺𖽪𖾐 𖼐𖽚𖾐 𖼠𖽸𖾑 𖼖𖽺𖾑 𖼷𖽙 𖼊𖽡 𖼮𖽑𖽻 𖼊𖽑𖽻𖾐，𖼦𖽑𖽔𖾐 𖼖𖽺𖾑 𖼷𖽙 𖼊𖽪𖾐 𖼽𖽻 𖼊𖽑𖽺 𖼰𖽙𖾑 𖼞𖽜 𖼺𖽪𖾐 𖼄𖽔 𖼮𖽻𖾐．
17 𖼽𖽻 𖼣𖽝 𖼦𖽙𖾑 𖼮𖽑𖽡 𖼍𖽪𖾐 𖼖𖽻𖾐 𖼺𖽺𖾑，𖼀𖽦𖾐：‘ 𖼣𖽙𖾐 𖽃𖽔 𖼀𖽙 𖽂𖽙 𖼻𖽙 𖼄𖽨 𖼷𖽑𖽚，𖼦𖽑𖽔𖾐 𖼖𖽺𖾑 𖼷𖽙 𖼊𖽪𖾐 𖼀𖽻𖾐 𖼀𖽡𖾐，𖼣𖽙𖾐 𖼞𖽚 𖼀𖽑𖽚𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼄𖽦 𖼳𖽶𖾐 𖼖𖽔？’ 18 𖼣𖽙𖾐 𖼍𖽪𖾐 𖼖𖽻𖾐，𖼣𖽻𖾐 𖼀𖽙 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐 𖼊𖽻𖾐，𖼽𖽻 𖼖𖽙𖾐 𖼀𖽦𖾐：‘ 𖽃𖽔 𖼀𖽙！ 𖼣𖽙𖾐 𖼄𖽶 𖼠𖽻𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽑𖽡𖽺 𖼂𖽚𖾐，𖼐𖽑𖽡𖾐 𖼊𖽑𖽺 𖼖𖽺𖾑 𖼮𖽑𖽡𖽺 𖼂𖽚𖾐 𖼦𖽑𖽻𖾐， 19 𖽃𖽙𖾑 𖼐𖽑𖽡𖾐 𖼮𖽑𖽻𖾐 𖼍𖽪𖾐，𖼣𖽙𖾐 𖼐𖽑𖽡𖾐 𖼻𖽙 𖼖𖽺𖾑 𖼰𖽕𖾐 𖼄𖽔 𖼽𖽻，𖼣𖽙𖾐 𖼊𖽑𖽺 𖽂𖽙 𖼻𖽙 𖼊𖽑𖽡 𖼽𖽚𖾐 𖼍𖽺𖾑 𖼰𖽕𖾐 𖼻𖽻𖾐．’
20 𖽃𖽔𖾐 𖼺𖽺𖾑，𖼍𖽪𖾐 𖼖𖽻𖾐 𖼽𖽻 𖼀𖽙 𖼞𖽳𖾐 𖼞𖽚 𖼽𖽡𖾐．𖼞𖽑𖽙 𖼈𖽡𖾐 𖼄𖽙𖾐 𖼰𖽨𖾑 𖼍𖽳𖾐 𖼺𖽺，𖼽𖽻 𖼀𖽙 𖼐𖽦𖾐 𖼄𖽡𖽻𖾐 𖼺𖽺𖾑，𖼐𖽑𖽧𖾐 𖼮𖽡𖽻𖾐 𖼍𖽪𖾐 𖼖𖽻𖾐，𖼰𖽡𖽴 𖼂𖽡𖾐 𖼽𖽡𖾐 𖼽𖽻 𖼖𖽺𖾐 𖼀𖽺 𖼈𖽝𖾐 𖼍𖽦𖾐，𖼄𖽔 𖼐𖽙 𖼄𖽙𖾐 𖼽𖽻 𖼊𖽑𖽺 𖼹𖽮𖾑． 21 𖼻𖽙 𖼽𖽳𖾐 𖼀𖽦𖾐：‘ 𖽃𖽔 𖼀𖽙！ 𖼣𖽙𖾐 𖼄𖽶 𖼠𖽻𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽑𖽡𖽺 𖼂𖽚𖾐，𖼐𖽑𖽡𖾐 𖼊𖽑𖽺 𖼖𖽺𖾑 𖼮𖽑𖽡𖽺 𖼂𖽚𖾐 𖼦𖽑𖽻𖾐，𖽃𖽙𖾑 𖼐𖽑𖽡𖾐 𖼮𖽑𖽻𖾐 𖼍𖽪𖾐，𖼣𖽙𖾐 𖼐𖽑𖽡𖾐 𖼻𖽙 𖼖𖽺𖾑 𖼰𖽕𖾐 𖼄𖽔 𖼽𖽻．’
22 𖼦𖽑𖽻𖾐 𖼊𖽑𖽻𖾐，𖼽𖽻 𖼀𖽙 𖼮𖽜𖾐 𖼀𖽑𖽙 𖼊𖽑𖽺 𖼹𖽡𖾐 𖼺𖽺𖾑，𖼀𖽦𖾐：‘ 𖼐𖽕 𖼊𖽺𖾐 𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼀𖽑𖽡𖽻𖾐 𖼮𖽻 𖼞𖽑𖽶𖾑 𖼈𖽺𖾐 𖼂𖽻𖾐 𖼖𖽻𖾐 𖼽𖽻 𖼞𖽜 𖼈𖽦，𖼖𖽦 𖼐𖽑𖽡𖾐 𖼺𖽶𖾐 𖼈𖽺𖾐 𖼽𖽻 𖼖𖽦 𖼐𖽑𖽡𖾐 𖼊𖽑𖽺 𖼍𖽴𖾑，𖼮𖽑𖽡𖾑 𖼐𖽴𖾐 𖼈𖽺𖾐 𖼽𖽻 𖼮𖽑𖽡𖾑 𖼀𖽑𖽦𖾐 𖼊𖽑𖽺 𖼍𖽴𖾑， 23 𖼐𖽑𖽡 𖼻𖽙 𖼷𖽑𖽪𖾐 𖼞𖽑𖽶𖾑 𖼮𖽑𖽡𖾐 𖼺𖽶𖾐 𖼂𖽻𖾐 𖼖𖽻𖾐 𖼺𖽦，𖽃𖽔 𖼐𖽺𖾑 𖼷𖽙 𖼊𖽻𖾐 𖼞𖽜𖾐 𖼺𖽜𖾐 𖼖𖽡𖾐． 24 𖼞𖽪𖾐 𖼮𖽡𖽺𖾐，𖼣𖽙𖾐 𖼻𖽙 𖼦𖽑𖽺𖾑 𖼽𖽚𖾐，𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐，𖼀𖽑𖽧 𖼦𖽑𖽙𖾐 𖼀𖽑𖽚𖾐 𖼞𖽚 𖼖𖽻𖾐 𖼦𖽑𖽙𖾐 𖼳𖽶 𖼣𖽻𖾐．’” 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼖𖽺𖾑 𖼞𖽜𖾐 𖼺𖽜𖾐 𖼍𖽪𖾐 𖼖𖽻𖾐．
25 𖼞𖽑𖽶𖾑 𖼮𖽶𖾐，𖼻𖽙 𖼈𖽳 𖼄𖽡𖾐 𖼠𖽻𖾐 𖼮𖽻𖾐 𖼍𖽳𖾐 𖼺𖽺．𖼽𖽻 𖼞𖽚 𖼖𖽻𖾐，𖽃𖽔𖾑 𖼞𖽑𖽶𖾐 𖼮𖽑𖽡𖾐 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼊𖽝 𖼄𖽸𖾐 𖼞𖽪𖾐 𖼰𖽴𖾐 𖼮𖽑𖽡𖽪 𖼊𖽻 𖼮𖽨． 26 𖽃𖽔𖾐 𖼺𖽺𖾑，𖼽𖽻 𖼮𖽜𖾐 𖼀𖽑𖽙 𖼊𖽑𖽡 𖼽𖽚𖾐 𖽃𖽶𖾐 𖼂𖽻𖾐 𖼖𖽻𖾐，𖽃𖽔 𖼊𖽺𖾑 𖼳𖽶 𖼄𖽡𖽻 𖼣𖽻𖾐 𖼊𖽻 𖼐𖽙𖾐． 27 𖼮𖽜𖾐 𖼀𖽑𖽙 𖼀𖽦𖾐：‘ 𖼐𖽑𖽡𖾐 𖼐𖽑𖽳𖾐 𖼄𖽻 𖼞𖽚 𖼖𖽻𖾐，𖼽𖽻 𖼄𖽔 𖼐𖽙𖾐 𖼄𖽔 𖼮𖽡𖽻𖾐 𖼞𖽚 𖼖𖽻𖾐 𖼖𖽙𖾐 𖼀𖽙𖾐 𖼺𖽺𖾑，𖼐𖽑𖽡𖾐 𖽃𖽔 𖼀𖽙 𖼐𖽑𖽡 𖼻𖽙 𖼷𖽑𖽪𖾐 𖼺𖽦．’
28 𖼻𖽙 𖼈𖽳 𖼀𖽶 𖼻𖽶，𖼞𖽚 𖼽𖽡𖾐 𖼄𖽔 𖼦𖽶𖾐，𖼽𖽻 𖼀𖽙 𖼊𖽚𖾐 𖼖𖽻𖾐 𖼽𖽻 𖼊𖽑𖽺 𖼞𖽑𖽜𖾑． 29 𖼻𖽙 𖼈𖽳 𖼽𖽻 𖼀𖽙 𖼖𖽙𖾐 𖼀𖽦𖾐：‘ 𖼣𖽙𖾐 𖼦𖽑𖽺𖾑 𖼄𖽨𖾐 𖼞𖽑𖽚 𖼐𖽑𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼦𖽑𖽙𖾐，𖼐𖽑𖽡𖾐 𖼊𖽑𖽺 𖼊𖽑𖽡 𖼖𖽦 𖼖𖽺𖾐 𖼈𖽳𖾑 𖼄𖽔 𖼷𖽻𖾐 𖼺𖽪𖾐 𖼣𖽻𖾐，𖼐𖽑𖽡𖾐 𖼞𖽑𖽙 𖼊𖽑𖽻𖾐 𖽃𖽔𖾑 𖼮𖽑𖽸 𖼻𖽙 𖼊𖽑𖽡 𖼊𖽝𖾐 𖼣𖽙𖾐 𖼊𖽑𖽺 𖼄𖽻𖾑 𖼺𖽺𖾑，𖼣𖽙𖾐 𖼞𖽜 𖼞𖽙𖾐 𖼮𖽑𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼖𖽺𖾑 𖼞𖽜𖾐 𖼺𖽜𖾐 𖼷𖽻𖾐 𖼐𖽺𖾑？ 30 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼻𖽙 𖼦𖽑𖽺𖾑 𖼽𖽚𖾐 𖼊𖽑𖽙𖾑 𖼄𖽡𖽻 𖼂𖽺𖾐 𖼺𖽪𖾐 𖼻𖽙 𖼄𖽳 𖼖𖽙𖾐 𖼮𖽑𖽻𖾐，𖼊𖽑𖽡 𖼊𖽑𖽜 𖼐𖽑𖽡𖾐 𖼄𖽡𖾐 𖼳𖽡𖽪 𖼂𖽺𖾐 𖼀𖽑𖽧𖾐 𖼦𖽑𖽻𖾐．𖼽𖽻 𖼞𖽚 𖼖𖽻𖾐 𖼍𖽺𖾑 𖼺𖽺，𖼞𖽚 𖼀𖽑𖽚𖾐 𖼐𖽑𖽡𖾐 𖼽𖽻 𖼖𖽙𖾐 𖼀𖽙𖾐 𖼐𖽑𖽡 𖼻𖽙 𖼷𖽑𖽪𖾐 𖼺𖽦．’