𖼺𖽔 𖼠𖽺𖾐 𖼊𖽡 𖼮𖽑𖽻 𖼀𖽑𖽚𖾐
19
1 𖼽𖽺𖾐 𖼺𖽪𖾐 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼊𖽡 𖼽𖽡𖾐，𖼖𖽪𖾐 𖼠𖽻𖾐 𖼮𖽑𖽻𖾐 𖼠𖽚 𖼽𖽡𖾐． 2 𖼞𖽑𖽶𖾑 𖼮𖽶𖾐，𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐，𖼺𖽔 𖼠𖽺𖾐 𖼄𖽡𖾐，𖼳𖽚𖾐 𖼠𖽜𖾐 𖼷𖽑𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖼣𖽻𖾐，𖼦𖽑𖽔𖾐 𖼮𖽶𖾐 𖼀𖽻𖾐 𖼀𖽡𖾐．3 𖼽𖽻 𖼽𖽺𖾐 𖼺𖽪𖾐 𖼦𖽑𖽺𖾑 𖽃𖽔 𖼊𖽺𖾐 𖼊𖽑𖽡 𖼽𖽚𖾐 𖼣𖽻𖾐 𖼐𖽦𖾐 𖼊𖽡 𖼮𖽑𖽻．𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼄𖽨 𖼰𖽡，𖼽𖽻 𖼷𖽶𖾐 𖽃𖽜𖾐 𖼺𖽺𖾑，𖼐𖽦𖾐 𖼄𖽡𖽻𖾐 𖼄𖽔 𖼊𖽙𖾐． 4 𖽃𖽔𖾐 𖼺𖽺𖾑，𖼽𖽻 𖼰𖽡𖽴 𖽃𖽙𖾑 𖼄𖽺 𖼽𖽡𖾐，𖼄𖽝𖾐 𖼺𖽳 𖼦𖽜𖾐 𖼷𖽡𖾐 𖼊𖽑𖽺 𖼊𖽦𖾐 𖼽𖽡𖾐，𖼽𖽺𖾐 𖼺𖽪𖾐 𖼊𖽑𖽺 𖼐𖽦𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼽𖽺𖾐 𖼺𖽪𖾐 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼠𖽚 𖼽𖽡𖾐 𖼊𖽻𖾐．
5 𖼽𖽺𖾐 𖼺𖽪𖾐 𖼺𖽜 𖼞𖽑𖽻𖾑 𖼮𖽑𖽡𖾐，𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼐𖽦𖾐，𖼽𖽻 𖼖𖽙𖾐 𖼀𖽦𖾐：“𖼺𖽔 𖼠𖽺𖾐 ，𖼐𖽕 𖼊𖽺𖾐 𖼹𖽺𖾐 𖼖𖽻𖾐！ 𖽃𖽙𖾑 𖼐𖽑𖽡𖾐 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼽𖽡𖾐 𖼐𖽑𖽡𖾐 𖽃𖽔𖾑 𖼞𖽑𖽶𖾐 𖼦𖽑𖽦 𖼽𖽡𖾐 𖼊𖽻𖾐．”
6 𖼽𖽻 𖼐𖽕 𖼊𖽺𖾐 𖼹𖽺𖾐 𖼖𖽻𖾐，𖼖𖽺𖾑 𖼖𖽺𖾑 𖼺𖽪𖾐 𖼺𖽪𖾐 𖼽𖽺𖾐 𖼺𖽪𖾐 𖼊𖽑𖽺 𖼹𖽶𖾐 𖼞𖽚 𖼽𖽡𖾐 𖼠𖽙𖾐 𖼳𖽙𖾐． 7 𖼷𖽑𖽻𖾐 𖼷𖽪𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼞𖽑𖽶𖾐 𖼞𖽑𖽶𖾐 𖼽𖽺𖾐 𖼺𖽪𖾐 𖼊𖽑𖽺 𖼊𖽑𖽜𖾐，𖼀𖽦𖾐：“𖽃𖽔𖾐 𖼹𖽻𖾐 𖼽𖽻 𖼽𖽡𖾐 𖼺𖽺𖾑，𖼽𖽺𖾐 𖼮𖽑𖽡𖽪𖾑 𖼷𖽑𖽻𖾐 𖽃𖽔𖾑 𖼞𖽑𖽶𖾐 𖼦𖽑𖽦 𖼐𖽺𖾑？”
8 𖼺𖽔 𖼠𖽺𖾐 𖼦𖽑𖽡𖽚 𖼍𖽳𖾐 𖼺𖽡 𖼀𖽑𖽙 𖼖𖽙𖾐 𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼣𖽙𖾐 𖼞𖽑𖽙𖾐 𖼮𖽻𖾐 𖼳𖽶 𖼊𖽑𖽡 𖼀𖽑𖽦𖾐 𖼀𖽜𖾐 𖼷𖽑𖽻𖾐 𖼳𖽚𖾑 𖼀𖽑𖽙 𖼊𖽑𖽺 𖼞𖽜 𖼊𖽻𖾐．𖼣𖽙𖾐 𖽃𖽔 𖼺𖽺 𖼊𖽑𖽺 𖼇𖽪 𖼠𖽚、 𖼮𖽴𖾐 𖼠𖽚 𖼊𖽑𖽡𖾑 𖼣𖽻𖾐，𖼣𖽙𖾐 𖼖𖽡𖾐 𖼀𖽜𖾐 𖼄𖽙𖾐 𖼽𖽻 𖼊𖽑𖽺 𖼞𖽑𖽚 𖼊𖽻𖾐．”
9 𖼽𖽺𖾐 𖼺𖽪𖾐 𖼀𖽦𖾐：“𖽃𖽙𖾑 𖼐𖽑𖽡𖾐 𖼰𖽨𖾑 𖼮𖽡 𖼽𖽡𖾑 𖼦𖽑𖽺𖾑 𖼈𖽴 𖼞𖽳𖾐 𖼮𖽑𖽡𖾐 𖼖𖽻𖾐 𖼦𖽑𖽻𖾐！ 𖼞𖽪𖾐 𖼮𖽡𖽺𖾐，𖼽𖽻 𖼖𖽺𖾑 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼣𖽻𖾐． 10 𖼷𖽑𖽻𖾐 𖼻𖽙 𖼖𖽻𖾐，𖼀𖽑𖽧 𖼦𖽑𖽙𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽙𖾐 𖼰𖽨𖾑 𖼖𖽻𖾐 𖼳𖽶 𖼣𖽻𖾐．”
𖼮𖽜𖾐 𖼀𖽑𖽙 𖼷𖽑𖽡𖾐 𖼽𖽚𖾐 𖼀𖽑𖽨𖾐 𖼻𖽜 𖼍𖽻𖾐 𖼊𖽻 (𖼊𖽑𖽹𖾑 25：14-30)
11 𖼷𖽑𖽻𖾐 𖼷𖽪𖾐 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼊𖽻 𖼮𖽨 𖼦𖽑𖽻𖾐，𖼞𖽑𖽶𖾑 𖼮𖽶𖾐 𖼽𖽺𖾐 𖼺𖽪𖾐 𖼺𖽜 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽡𖾐 𖼖𖽻𖾐 𖼮𖽻𖾐，𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼷𖽪𖾐 𖼊𖽡 𖼮𖽑𖽻，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼐𖽕 𖼊𖽺𖾐 𖼊𖽚𖾐 𖼊𖽑𖽧 𖼖𖽻𖾐 𖼊𖽻𖾐．𖽃𖽔𖾐 𖼺𖽺𖾑，𖼽𖽺𖾐 𖼺𖽪𖾐 𖼹𖽦𖾑 𖼍𖽻𖾐 𖼊𖽻 𖼊𖽑𖽡 𖼊𖽝𖾐 𖼦𖽑𖽺， 12 𖼀𖽦𖾐：“𖼷𖽶 𖼄𖽻 𖼈𖽴 𖼻𖽙 𖼊𖽑𖽡 𖼽𖽚𖾐 𖼮𖽻𖾐，𖼻𖽙 𖼞𖽶𖾑𖽑 𖼽𖽚𖾐 𖼄𖽡𖾐 𖼈𖽡 𖼄𖽡𖾐 𖼊𖽺𖾐 𖼽𖽡𖾐，𖼈𖽪𖾐 𖼍𖽦 𖼂𖽺𖾐 𖼞𖽳𖾐 𖼷𖽶 𖼊𖽺𖾐 𖼷𖽶𖾐 𖽂𖽙𖾐 𖼺𖽺𖾑 𖼞𖽚 𖼖𖽻𖾐 𖼊𖽻𖾐． 13 𖼽𖽻 𖼮𖽜𖾐 𖼀𖽑𖽙 𖼷𖽑𖽡𖾐 𖼽𖽚𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼀𖽑𖽨𖾐 𖼊𖽑𖽡 𖼍𖽪𖾐 𖼀𖽑𖽡 𖼽𖽻 𖼈𖽳𖾐 𖼊𖽑𖽺 𖼞𖽜，𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼈𖽺𖾐 𖼂𖽡𖾐 𖼽𖽡𖾐 𖼈𖽳𖾐 𖼖𖽦 𖼂𖽺𖾐，𖼣𖽙𖾐 𖼞𖽚 𖼖𖽻𖾐 𖼖𖽙𖾐 𖼳𖽡𖽻𖾐 𖼖𖽡𖾐．’ 14 𖼦𖽑𖽻𖾐 𖼊𖽑𖽻𖾐，𖼽𖽻 𖼈𖽪𖾐 𖼍𖽦 𖼂𖽺𖾐 𖼽𖽡𖾐 𖼊𖽻𖾐 𖼞𖽳𖾐 𖼠𖽚 𖼠𖽻𖾐 𖼞𖽑𖽶𖾐 𖼷𖽑𖽻𖾐 𖼽𖽻 𖼊𖽑𖽺 𖼐𖽑𖽧𖾐 𖼰𖽴𖾑 𖼺𖽺𖾑，𖼹𖽡𖾐 𖼖𖽦 𖼹𖽡𖾐 𖼂𖽡𖾐 𖼽𖽡𖾐，𖼀𖽦𖾐：‘ 𖼣𖽙𖾐 𖼈𖽳𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼞𖽜 𖼈𖽪𖾐 𖼍𖽦 𖼂𖽺𖾐 𖼣𖽙𖾐 𖼈𖽳𖾐 𖼊𖽑𖽺 𖼠𖽕 𖼐𖽑𖽧𖾐 𖼄𖽔 𖼺𖽳．’
15 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼦𖽑𖽔𖾐 𖼖𖽺𖾑 𖼈𖽪𖾐 𖼍𖽦 𖽂𖽙𖾐 𖼂𖽺𖾐．𖼠𖽙𖾑 𖼍𖽻𖾐 𖼽𖽻 𖼞𖽚 𖼖𖽻𖾐，𖼞𖽑𖽻𖾑 𖼀𖽑𖽨𖾐 𖼀𖽑𖽡 𖼷𖽶𖾐 𖼂𖽡𖾐 𖼽𖽡𖾐 𖼺𖽪𖾐 𖼮𖽜𖾐 𖼀𖽑𖽙 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼈𖽳𖾐 𖼈𖽳𖾐 𖼖𖽦 𖼂𖽺𖾐 𖼞𖽑𖽙 𖼄𖽙𖾐 𖼊𖽴 𖽂𖽙𖾐 𖼺𖽝𖾑 𖼖𖽡𖾐 𖼊𖽡 𖼮𖽑𖽻． 16 𖽂𖽙 𖼊𖽺𖾐 𖼊𖽑𖽡 𖼽𖽚𖾐 𖼠𖽚 𖼖𖽻𖾐 𖼀𖽦𖾐：‘ 𖼺𖽡 𖼀𖽑𖽙 𖽃𖽔𖾐！ 𖼐𖽑𖽡𖾐 𖼞𖽑𖽙𖾐 𖼞𖽜 𖼺𖽪𖾐 𖼀𖽑𖽨𖾐 𖼊𖽑𖽡 𖼦𖽑𖽙𖾐 𖼀𖽑𖽡，𖽃𖽔𖾑 𖼄𖽳𖾐 𖼣𖽙𖾐 𖼊𖽑𖽡 𖼍𖽪𖾐 𖼀𖽑𖽡 𖼊𖽴 𖽂𖽙𖾐．’
17 𖼺𖽡 𖼀𖽑𖽙 𖼀𖽦𖾐：‘ 𖼹𖽳𖾐 𖼷𖽑𖽚！ 𖼐𖽑𖽡𖾐 𖼮𖽜𖾐 𖼀𖽑𖽙 𖼹𖽳𖾐 𖼣𖽻𖾐，𖼦𖽑𖽔𖾐 𖼮𖽶𖾐 𖼽𖽳𖾐 𖼳𖽶 𖼄𖽡𖽻 𖼂𖽺𖾐 𖼖𖽺𖾑 𖼐𖽑𖽡𖾐 𖼐𖽑𖽧𖾐 𖼻𖽺𖾐．𖽃𖽔𖾐 𖼺𖽺𖾑，𖼐𖽑𖽡𖾐 𖼞𖽜 𖼷𖽶 𖼊𖽺𖾐 𖼮𖽻𖾐 𖼖𖽪𖾐 𖼷𖽑𖽡𖾐 𖼊𖽝𖾐 𖽂𖽙𖾐 𖼠𖽕 𖼊𖽙𖾐．’
18 𖼠𖽙𖾑 𖼍𖽻𖾐 𖼊𖽑𖽡 𖼽𖽚𖾐 𖼠𖽚 𖼖𖽻𖾐 𖼀𖽦𖾐：‘ 𖼺𖽡 𖼀𖽑𖽙 𖽃𖽔𖾐！ 𖼐𖽑𖽡𖾐 𖼞𖽑𖽙𖾐 𖼞𖽜 𖼺𖽪𖾐 𖼀𖽑𖽨𖾐 𖼊𖽑𖽡 𖼦𖽑𖽙𖾐 𖼀𖽑𖽡，𖽃𖽔𖾑 𖼄𖽳𖾐 𖼣𖽙𖾐 𖼣𖽙 𖼦𖽑𖽙𖾐 𖼀𖽑𖽡 𖼊𖽴 𖽂𖽙𖾐．’
19 𖼺𖽡 𖼀𖽑𖽙 𖼀𖽦𖾐：‘ 𖼐𖽑𖽡𖾐 𖼞𖽜 𖼖𖽪𖾐 𖼣𖽙 𖼊𖽝𖾐 𖽂𖽙𖾐 𖼠𖽕 𖼊𖽙𖾐．’
20 𖼠𖽳𖾐 𖼖𖽪𖾐 𖼊𖽑𖽡 𖼽𖽚𖾐 𖼠𖽚 𖼖𖽻𖾐 𖼀𖽦𖾐：‘ 𖼺𖽡 𖼀𖽑𖽙 𖽃𖽔𖾐！ 𖼐𖽦𖾐 𖼄𖽺！ 𖼐𖽑𖽡𖾐 𖼞𖽑𖽙𖾐 𖼞𖽜 𖼺𖽪𖾐 𖼀𖽑𖽨𖾐 𖼊𖽑𖽡 𖼦𖽑𖽙𖾐 𖼀𖽑𖽡，𖼣𖽙𖾐 𖼄𖽳𖾐 𖼮𖽑𖽙𖾐 𖼻𖽜 𖼖𖽧𖾐 𖼍𖽡 𖼰𖽳𖾐 𖼍𖽙𖾑 𖼍𖽳𖾐． 21 𖼞𖽪𖾐 𖼮𖽡𖽺𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖼮𖽡𖽮𖾐，𖼐𖽑𖽡𖾐 𖼊𖽑𖽡 𖼻𖽳𖾐 𖼮𖽡𖽮𖾐 𖼖𖽕𖾐 𖼖𖽕𖾐 𖼷𖽑𖽻𖾐 𖼣𖽻𖾐，𖼄𖽔 𖼰𖽳𖾐 𖼍𖽙𖾑 𖼞𖽳𖾐 𖼖𖽺𖾑 𖼈𖽺𖾐 𖼊𖽻𖾐，𖼄𖽔 𖼹𖽚 𖼳𖽶𖾑 𖼞𖽳𖾐 𖼖𖽺𖾑 𖼠𖽜𖾐 𖼊𖽻𖾐．’
22 𖼺𖽡 𖼀𖽑𖽙 𖼀𖽦𖾐：‘ 𖼊𖽶𖾐 𖼮𖽑𖽪 𖼺𖽪𖾐 𖼮𖽜𖾐 𖼀𖽑𖽙 𖼐𖽑𖽡𖾐 𖼖𖽻！ 𖼐𖽑𖽡𖾐 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐 𖼣𖽙𖾐 𖼐𖽑𖽡𖾐 𖼊𖽑𖽺 𖼽𖽺𖾐 𖼮𖽑𖽡𖽪𖾑 𖼍𖽧𖾑 𖼊𖽻𖾐．𖼣𖽙𖾐 𖼦𖽑𖽺𖾑 𖼮𖽡𖽮𖾐 𖼖𖽕𖾐 𖼖𖽕𖾐 𖼷𖽑𖽻𖾐 𖼣𖽻𖾐，𖼄𖽔 𖼹𖽚 𖼞𖽳𖾐 𖼖𖽺𖾑 𖼈𖽺𖾐 𖼊𖽻𖾐，𖼄𖽔 𖼳𖽶𖾑 𖼞𖽳𖾐 𖼖𖽺𖾑 𖼠𖽜𖾐 𖼊𖽻𖾐 𖼐𖽑𖽡𖾐 𖼺𖽝𖾑． 23 𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼣𖽙𖾐 𖼞𖽳𖾐 𖼀𖽑𖽨𖾐 𖼄𖽔 𖼈𖽺𖾐 𖼮𖽡 𖼀𖽑𖽡 𖼠𖽕 𖼦𖽑𖽺𖾐 𖼞𖽑𖽶𖾐 𖼰𖽡𖽺𖾐 𖼽𖽡𖾐，𖼳𖽡𖽻𖾐 𖼺𖽺𖾑 𖼣𖽙𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐 𖼮𖽑𖽡𖾐，𖼂𖽜 𖼐𖽺𖾐 𖼖𖽡𖾑 𖼊𖽑𖽡 𖼊𖽑𖽜 𖼠𖽜𖾐 𖼞𖽚 𖼖𖽻𖾐 𖼐𖽺𖾑？’
24 𖽃𖽔𖾐 𖼺𖽺𖾑，𖼽𖽻 𖼀𖽙 𖼮𖽑𖽶𖾐 𖼦𖽑𖽡𖽚 𖼺𖽪𖾐 𖼹𖽡𖾐 𖼖𖽦 𖼖𖽙𖾐 𖼀𖽦𖾐：‘ 𖼽𖽻 𖼞𖽳𖾐 𖼀𖽑𖽨𖾐 𖼊𖽑𖽡 𖼦𖽑𖽙𖾐 𖼀𖽑𖽡 𖼐𖽻𖾑 𖼠𖽚 𖼖𖽻𖾐，𖼈𖽺𖾐 𖼊𖽑𖽡 𖼍𖽪𖾐 𖼀𖽑𖽡 𖼮𖽻𖾐 𖼺𖽪𖾐 𖼊𖽑𖽺 𖼞𖽜 𖼖𖽡𖾐．’
25 𖼽𖽻 𖼈𖽳𖾐 𖼀𖽦𖾐：‘ 𖼺𖽡 𖼀𖽑𖽙 𖽃𖽔𖾐！ 𖼽𖽻 𖼀𖽑𖽨𖾐 𖼊𖽑𖽡 𖼍𖽪𖾐 𖼀𖽑𖽡 𖼮𖽻𖾐 𖼍𖽳𖾐 𖼦𖽑𖽻𖾐．’
26 𖼺𖽡 𖼀𖽑𖽙 𖼀𖽦𖾐：‘ 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼞𖽑𖽙𖾐 𖼮𖽻𖾐 𖼍𖽳𖾐 𖼦𖽑𖽻𖾐 𖼺𖽪𖾐，𖼠𖽳𖾐 𖼠𖽳𖾐 𖼖𖽪 𖼽𖽻 𖼄𖽻𖾑 𖼊𖽻𖾐；𖼞𖽑𖽙𖾐 𖼄𖽔 𖼮𖽻𖾐 𖼺𖽪𖾐，𖼽𖽻 𖼮𖽻𖾐 𖼍𖽳𖾐 𖼦𖽑𖽻𖾐 𖼺𖽪𖾐 𖼖𖽺𖾑 𖼐𖽻𖾑 𖼀𖽑𖽚𖾐 𖼞𖽚 𖼖𖽻𖾐 𖼊𖽻𖾐． 27 𖼞𖽑𖽻𖾑 𖼣𖽙𖾐 𖼞𖽜 𖼈𖽪𖾐 𖼍𖽦 𖼂𖽺𖾐 𖼐𖽑𖽧𖾐 𖼄𖽔 𖼺𖽳 𖼺𖽪𖾐 𖼮𖽡𖾐 𖼂𖽦𖾐 𖼞𖽑𖽶𖾑 𖼹𖽻𖾐，𖼽𖽻 𖼈𖽳𖾐 𖼊𖽑𖽺 𖼵𖽪𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐，𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑 𖼺𖽦 𖼦𖽑𖽙𖾐 𖼖𖽡𖾐！’”
𖼽𖽺𖾐 𖼺𖽪𖾐 𖼊𖽑𖽳 𖼖𖽳𖾐 𖼄𖽪 𖼷𖽳 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼊𖽡 𖼽𖽡𖾐 ( 𖼊𖽑𖽹𖾑 21：1-9；𖼞𖽑𖽜 11：1-10；𖼽𖽱𖾐 12 ： 12-15 )
28 𖼽𖽺𖾐 𖼺𖽪𖾐 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼦𖽑𖽺 𖼦𖽑𖽻𖾐 𖼺𖽺𖾑，𖽃𖽙𖾑 𖼄𖽺 𖼮𖽑𖽻𖾐 𖼺𖽜 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐． 29 𖼂𖽚 𖼇𖽕 𖼮𖽑𖽧 𖼐𖽺𖾐 𖼂𖽚 𖼍𖽕𖾑 𖼐𖽑𖽧 𖼮𖽑𖽡𖽦𖾐 𖼠𖽻𖾐 𖼦𖽑𖽺𖾑 𖼐𖽑𖽡 𖼊𖽝𖾐 𖼞𖽳𖾐 𖼮𖽑𖽡𖾐 𖼖𖽻𖾐 𖼮𖽻𖾐，𖼞𖽑𖽶𖾑 𖽃𖽔 𖼮𖽑𖽙 𖽂𖽙 𖼰𖽡𖽺𖾐 𖼖𖽙𖾐 𖼐𖽳，𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼷𖽻𖾐 𖼺𖽪𖾐 𖼐𖽑𖽡 𖼽𖽚𖾐 𖼹𖽡𖾐 𖼊𖽑𖽧 𖼽𖽡𖾐， 30 𖼀𖽦𖾐：“𖼐𖽑𖽡𖾐 𖼈𖽳𖾐 𖼞𖽑𖽶𖾐 𖼀𖽙 𖼖𖽙𖾐 𖼞𖽳𖾐 𖼮𖽑𖽡𖽦𖾐 𖼠𖽻𖾐 𖼞𖽑𖽶𖾐 𖼽𖽡𖾐，𖼊𖽡 𖼽𖽡𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼷𖽳 𖼄𖽔 𖼠𖽚 𖼺𖽪𖾐 𖼊𖽑𖽳 𖼖𖽳𖾐 𖼄𖽪 𖼻𖽙 𖼊𖽑𖽡 𖼷𖽳 𖼄𖽡𖽻𖾐 𖼊𖽻𖾐，𖼀𖽑𖽳𖾐 𖼞𖽑𖽻𖾑 𖼍𖽡 𖼍𖽳𖾐，𖼞𖽑𖽶𖾑 𖼀𖽑𖽡𖾐 𖼺𖽶𖾐 𖼂𖽻𖾐 𖼖𖽻𖾐 𖼖𖽡𖾐． 31 𖼷𖽑𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼊𖽻 𖼐𖽙𖾐 𖼺𖽪𖾐 𖼮𖽻𖾐 𖼺𖽺𖾑，𖼀𖽦𖾐：‘ 𖼊𖽑𖽳 𖼖𖽳𖾐 𖼄𖽪 𖼻𖽙 𖼀𖽑𖽡𖾐 𖼺𖽶𖾐 𖽃𖽔 𖼊𖽺𖾑 𖼂𖽺𖾐 𖼐𖽺𖾑？’ 𖼞𖽑𖽶𖾑 𖼮𖽶𖾐 𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼖𖽡𖾐：‘ 𖼺𖽡 𖼀𖽑𖽙 𖼽𖽻 𖼊𖽑𖽺 𖼻𖽜 𖼄𖽳𖾐！’”
32 𖼷𖽻𖾐 𖼺𖽪𖾐 𖼐𖽑𖽡 𖼽𖽚𖾐 𖼽𖽡𖾐 𖼦𖽑𖽙𖾐，𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼞𖽑𖽶𖾑 𖼽𖽺𖾐 𖼺𖽪𖾐 𖼀𖽦𖾐 𖼖𖽙𖾐 𖼺𖽶𖾑 𖼦𖽑𖽻𖾐． 33 𖼽𖽻 𖼈𖽳𖾐 𖼊𖽑𖽳 𖼖𖽳𖾐 𖼄𖽪 𖼻𖽙 𖼀𖽑𖽡𖾐 𖼺𖽶𖾐 𖼞𖽑𖽶𖾑 𖼮𖽶𖾐，𖼊𖽑𖽳 𖼖𖽳𖾐 𖼄𖽪 𖼻𖽙 𖼞𖽳𖾐 𖼺𖽡 𖼀𖽑𖽙 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽑𖽳 𖼖𖽳𖾐 𖼄𖽪 𖼻𖽙 𖼀𖽑𖽡𖾐 𖼺𖽶𖾐 𖽃𖽔 𖼊𖽺𖾑 𖼂𖽺𖾐 𖼐𖽺𖾑？”
34 𖼽𖽻 𖼈𖽳𖾐 𖼀𖽦𖾐：“𖼺𖽡 𖼀𖽑𖽙 𖼽𖽻 𖼊𖽑𖽺 𖼻𖽜 𖼄𖽳𖾐．” 35 𖼽𖽻 𖼈𖽳𖾐 𖼊𖽑𖽳 𖼖𖽳𖾐 𖼄𖽪 𖼻𖽙 𖼺𖽶𖾐 𖼽𖽺𖾐 𖼺𖽪𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐，𖼽𖽻 𖼄𖽳𖾑 𖼀𖽑𖽡𖽻𖾐 𖼮𖽻 𖼖𖽧 𖼊𖽑𖽳 𖼖𖽳𖾐 𖼄𖽪 𖼻𖽙 𖼊𖽑𖽺 𖼍𖽦𖾐，𖼽𖽺𖾐 𖼺𖽪𖾐 𖼊𖽑𖽺 𖼰𖽻 𖼊𖽑𖽳 𖼖𖽳𖾐 𖼄𖽪 𖼻𖽙 𖼊𖽑𖽺 𖼹𖽳𖾑．
36 𖼽𖽡𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼷𖽪𖾐 𖼽𖽻 𖼄𖽳𖾑 𖼀𖽑𖽡𖽻𖾐 𖼮𖽻 𖼈𖽺𖾐 𖼮𖽨𖾐 𖼄𖽙𖾐 𖼊𖽑𖽺 𖼞𖽑𖽻． 37 𖼽𖽺𖾐 𖼺𖽪𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽡𖾐 𖼖𖽻𖾐 𖼮𖽻𖾐，𖽃𖽔 𖼮𖽑𖽙 𖽂𖽙 𖼰𖽡𖽺𖾐 𖼊𖽑𖽺 𖼮𖽑𖽻𖾐 𖼹𖽺𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼽𖽻 𖼷𖽻𖾐 𖼺𖽪𖾐 𖼞𖽑𖽶𖾑 𖼹𖽻𖾐 𖼽𖽻 𖼞𖽑𖽙𖾐 𖼂𖽺𖾐 𖼠𖽚 𖼞𖽳𖾐 𖼺𖽡𖾐 𖼂𖽺𖾐 𖼊𖽪𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼦𖽑𖽻𖾐 𖼖𖽙𖾐 𖼀𖽙𖾐 𖼺𖽺𖾑，𖼖𖽺𖾑 𖼞𖽜𖾐 𖼺𖽜𖾐 𖼍𖽪𖾐 𖼖𖽻𖾐，𖼮𖽑𖽡𖽪 𖼈𖽳 𖼄𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳，𖼀𖽦𖾐：
38 “𖽂𖽙 𖼺𖽙𖾐 𖼂𖽙𖾐 𖼹𖽡𖾐 𖼂𖽻𖾐 𖼖𖽻𖾐 𖼺𖽪𖾐 𖼈𖽪𖾐 𖼍𖽦 𖼊𖽑𖽺 𖼞𖽑𖽪𖾐 𖼮𖽑𖽳 𖼷𖽻 𖼳𖽶 𖼣𖽻𖾐！ 𖼄𖽶 𖼠𖽻𖾐 𖼊𖽑𖽺 𖼺𖽙𖾑 𖼺𖽙𖾐 𖼮𖽻𖾐，𖼄𖽶𖾐 𖼷𖽑𖽚 𖼞𖽳𖾐 𖼄𖽶 𖼳𖽳𖾐 𖼮𖽻𖾐！”
39 𖼷𖽑𖽻𖾐 𖼷𖽪𖾐 𖼠𖽻𖾐 𖼊𖽑𖽺 𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐 𖼊𖽑𖽡 𖼹𖽻𖾐 𖼽𖽺𖾐 𖼺𖽪𖾐 𖼖𖽙𖾐 𖼀𖽦𖾐 ：“𖼳𖽪𖾑 𖼰𖽪𖾐！ 𖼐𖽑𖽡𖾐 𖼞𖽳𖾐 𖼷𖽻𖾐 𖼺𖽪𖾐 𖼊𖽑𖽺 𖼦𖽑𖽳𖾐 𖼄𖽪𖾑 𖼞𖽜 𖼻𖽻𖾐！”
40 𖼽𖽺𖾐 𖼺𖽪𖾐 𖼀𖽦𖾐：“𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼽𖽻 𖼈𖽳𖾐 𖼮𖽑𖽡𖽪 𖼀𖽺𖾐 𖼄𖽔 𖼊𖽑𖽧 𖼊𖽑𖽡𖾑 𖼣𖽻𖾐，𖼖𖽚𖾐 𖼄𖽙𖾐 𖼦𖽑𖽺𖾑 𖼹𖽻𖾐 𖽃𖽶𖾐 𖼮𖽸 𖼍𖽪𖾐 𖼖𖽻𖾐 𖼊𖽻𖾐！”
𖼽𖽺𖾐 𖼺𖽪𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪 𖼣𖽶𖾐
41 𖼽𖽺𖾐 𖼺𖽪𖾐 𖼺𖽜 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼖𖽙𖾐 𖼐𖽳 𖼽𖽡𖾐 𖼞𖽑𖽶𖾑 𖼮𖽶𖾐，𖼖𖽪𖾐 𖼞𖽑𖽶𖾑 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼽𖽻 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪 𖼣𖽶𖾐， 42 𖼀𖽦𖾐：“𖼐𖽑𖽡𖾐 𖼊𖽑𖽺 𖼺𖽙𖾑 𖼺𖽙𖾐 𖼞𖽜 𖼠𖽸𖾑 𖼞𖽳𖾐 𖼄𖽡𖽻 𖼮𖽨𖾐，𖽃𖽙𖾑 𖼐𖽑𖽡𖾐 𖼹𖽦𖾐 𖼐𖽑𖽡𖾐 𖼞𖽜 𖼺𖽝𖾑 𖼖𖽡𖾐 𖼄𖽡𖾐 𖼄𖽔 𖼳𖽚𖾑．𖼦𖽑𖽻𖾐 𖼊𖽑𖽻𖾐，𖽃𖽔𖾑 𖼄𖽳𖾐 𖼄𖽡𖽻 𖼮𖽨𖾐 𖼦𖽑𖽺𖾑 𖼹𖽻𖾐 𖼰𖽳𖾐 𖼍𖽡 𖼍𖽳𖾐 𖼺𖽺．𖽃𖽔𖾐 𖼺𖽺𖾑，𖼐𖽑𖽡𖾐 𖼄𖽦𖾐 𖼊𖽪 𖼞𖽜 𖼐𖽦𖾐 𖼊𖽑𖽧 𖼄𖽔 𖼖𖽻𖾐． 43 𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼞𖽳𖾐 𖼮𖽡𖾐 𖼂𖽦𖾐 𖼖𖽪𖾐 𖼰𖽻𖾐 𖼊𖽴𖾐 𖼍𖽪𖾐 𖼐𖽑𖽡𖾐 𖼊𖽑𖽺 𖼊𖽝 𖼊𖽦，𖼰𖽻𖾐 𖼖𖽡𖾐 𖼖𖽡𖾐 𖼐𖽑𖽡𖾐 𖼊𖽑𖽺 𖼰𖽻𖾑 𖼍𖽡，𖼖𖽡𖾐 𖼣𖽴 𖼐𖽑𖽡𖾐 𖼊𖽑𖽺 𖼀𖽨 𖼍𖽡 𖼊𖽻𖾐． 44 𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼠𖽻𖾐 𖼞𖽑𖽶𖾐 𖼮𖽻𖾐 𖼺𖽪𖾐 𖼻𖽙 𖼄𖽡𖾐 𖼐𖽜𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐，𖼖𖽚𖾐 𖼄𖽙𖾐 𖼊𖽑𖽡 𖼊𖽝𖾐 𖼖𖽺𖾑 𖼹𖽺𖾐 𖼊𖽑𖽡 𖼊𖽝𖾐 𖼊𖽑𖽺 𖼄𖽔 𖼍𖽦𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼊𖽑𖽺 𖼐𖽦𖾐 𖼳𖽪𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼐𖽑𖽡𖾐 𖼄𖽔 𖼺𖽝𖾑．”
𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼈𖽳𖾐 𖼖𖽦 𖼂𖽺𖾐 𖼺𖽪𖾐 𖼊𖽑𖽺 𖼞𖽕 𖼊𖽑𖽧 (𖼊𖽑𖽹𖾑 21：12-17；𖼞𖽑𖽜 11：15-19；𖼽𖽱𖾐 2：13-22 )
45 𖼽𖽺𖾐 𖼺𖽪𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽡𖾐，𖼽𖽻 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐 𖼺𖽺𖾑，𖼈𖽳𖾐 𖼖𖽦 𖼂𖽺𖾐 𖼺𖽪𖾐 𖼊𖽑𖽺 𖼞𖽕 𖼊𖽑𖽧 𖼽𖽡𖾐， 46 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“《𖼺𖽡 𖼮𖽡𖾐 𖼺𖽪𖾑 》 𖼊𖽑𖽺 𖼀𖽦𖾐：‘ 𖼣𖽙𖾐 𖼺𖽡 𖼮𖽡𖾐 𖼦𖽑𖽺𖾐 𖼦𖽑𖽺𖾑 𖼮𖽑𖽡 𖼮𖽡𖽺𖾐 𖼦𖽑𖽺𖾐 𖼣𖽻𖾐，𖼐𖽑𖽡𖾐 𖼈𖽳𖾐 𖼽𖽻 𖼞𖽜 𖼀𖽑𖽚𖾐 𖼷𖽝𖾐 𖼮𖽑𖽡𖾐 𖼊𖽧𖾐 𖼀𖽑𖽢 𖼦𖽑𖽻𖾐．’”