𖼽𖽺𖾐 𖼺𖽪𖾐 𖼽𖽻 𖼹𖽡𖾐 𖼺𖽪𖾐 𖼷𖽑𖽡𖾐 𖼐𖽑𖽡 𖼽𖽚𖾐 𖼊𖽑𖽺 𖼹𖽡𖾐 𖼊𖽚𖾐 𖼽𖽡𖾐 ( 𖼊𖽑𖽹𖾑 10：5-15；𖼞𖽑𖽜 6：7-13 )
9
1 𖼠𖽙𖾑 𖼍𖽻𖾐，𖼽𖽺𖾐 𖼺𖽪𖾐 𖼽𖽻 𖼹𖽡𖾐 𖼺𖽪𖾐 𖼷𖽑𖽡𖾐 𖼐𖽑𖽡 𖼽𖽚𖾐 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐 𖼦𖽑𖽻𖾐，𖼷𖽶 𖼊𖽺𖾐 𖽂𖽙 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼞𖽜，𖼽𖽻 𖼈𖽳𖾐 𖼞𖽜 𖼐𖽺 𖼄𖽳𖾑 𖼄𖽳 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼊𖽙𖾐，𖼞𖽑𖽙𖾐 𖼣𖽻𖾐 𖼳𖽶 𖼐𖽙𖾐 𖼊𖽑𖽺 𖼞𖽪𖾐 𖼞𖽑𖽙 𖼠𖽸𖾑． 2 𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼊𖽑𖽺 𖼹𖽡𖾐 𖼊𖽚𖾐 𖼽𖽡𖾐，𖽂𖽙 𖼺𖽙𖾐 𖼂𖽙𖾐 𖼠𖽚 𖼞𖽳𖾐 𖼄𖽢 𖼮𖽑𖽡𖽪 𖼦𖽑𖽺，𖼷𖽑𖽻𖾐 𖼊𖽑𖽺 𖼐𖽙𖾐 𖼞𖽪𖾐． 3 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼊𖽚𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼄𖽡𖽻 𖼐𖽑𖽡 𖼊𖽑𖽡 𖼳𖽶 𖼖𖽺𖾑 𖼊𖽑𖽔 𖼈𖽺𖾐： 𖼍𖽚𖾐 𖼖𖽜 𖼐𖽺𖾐 𖼀𖽶 𖼖𖽧𖾑 𖼊𖽑𖽔 𖼈𖽺𖾐，𖼷𖽙 𖼊𖽪𖾐 𖼐𖽺𖾐 𖼮𖽡 𖼀𖽑𖽡𖾐 𖼖𖽺𖾑 𖼊𖽑𖽔 𖼀𖽶，𖼠𖽳𖾐 𖼖𖽪𖾐 𖼀𖽑𖽡𖽻𖾐 𖼷𖽑𖽶 𖼖𖽺𖾑 𖼊𖽑𖽔 𖼀𖽶． 4 𖽃𖽔 𖼊𖽺𖾑 𖼈𖽴 𖼞𖽳𖾐 𖼊𖽡 𖼽𖽡𖾐 𖼣𖽻𖾐 𖼦𖽻，𖼐𖽑𖽡𖾐 𖼈𖽳𖾐 𖼊𖽑𖽺 𖼷𖽶𖾐 𖼦𖽶𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼞𖽑𖽻𖾑 𖼮𖽻𖾐 𖼺𖽺𖾑，𖼺𖽜 𖼽𖽡𖾐 𖼰𖽶𖾐 𖼮𖽑𖽡𖾐 𖼖𖽡𖾐． 5 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽑𖽙𖾐 𖼷𖽶𖾐 𖼄𖽔 𖼦𖽶𖾐 𖼺𖽪𖾐，𖼐𖽑𖽡𖾐 𖼈𖽳𖾐 𖼖𖽪𖾐 𖼞𖽑𖽶𖾑 𖼊𖽝𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼞𖽑𖽶𖾑 𖼮𖽶𖾐，𖼮𖽑𖽡𖾑 𖼀𖽑𖽦𖾐 𖼊𖽑𖽺 𖼐𖽑𖽡𖾑 𖼄𖽶𖾐 𖼞𖽑𖽶𖾑 𖼊𖽑𖽙𖾐 𖼹𖽺𖾐 𖼺𖽺𖾑，𖼽𖽻 𖼈𖽳𖾐 𖼦𖽑𖽙 𖼊𖽪 𖼮𖽻𖾐 𖼞𖽑𖽶𖾑 𖼖𖽙𖾐 𖼮𖽨 𖼄𖽡𖽻𖾐 𖼂𖽺𖾐 𖼖𖽡𖾐．”6 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼊𖽚𖾐 𖼽𖽡𖾐，𖼮𖽑𖽡𖽦𖾐 𖼠𖽻𖾐 𖼞𖽑𖽙𖾐 𖼣𖽻𖾐 𖼞𖽳𖾐 𖼺𖽜 𖼻𖽶𖾐，𖼄𖽢 𖼮𖽑𖽡𖽪 𖼦𖽑𖽺，𖼞𖽑𖽙𖾐 𖼮𖽑𖽡𖾐 𖼊𖽪 𖼷𖽑𖽻𖾐 𖼊𖽑𖽺 𖼐𖽙𖾐 𖼞𖽪𖾐．
𖼳𖽡𖾐 𖼖𖽲𖾑 𖼐𖽑𖽧𖾐 𖼄𖽙𖾐 𖼷𖽪𖾐 𖼞𖽜𖾐 ( 𖼊𖽑𖽹𖾑 4：1-12；𖼞𖽑𖽜 6：16-29 )
7 𖼽𖽺𖾐 𖼺𖽪𖾐 𖼞𖽑𖽙𖾐 𖼂𖽺𖾐 𖼄𖽡𖽻，𖼳𖽡𖾐 𖼖𖽲𖾑 𖼷𖽶 𖼄𖽻 𖼊𖽻 𖼮𖽨 𖼦𖽑𖽻𖾐 𖼺𖽺𖾑，𖼣𖽝 𖼮𖽨𖾐 𖼄𖽔 𖼊𖽙𖾐．𖼞𖽪𖾐 𖼮𖽡𖽺𖾐 𖼷𖽑𖽻𖾐 𖼊𖽑𖽡 𖼹𖽻𖾐 𖼀𖽦𖾐：“𖼷𖽑𖽡 𖼺𖽪𖾐 𖼽𖽱𖾐 𖼦𖽕𖾑 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼦𖽑𖽙𖾐．” 8 𖼷𖽑𖽻𖾐 𖼊𖽑𖽡 𖼹𖽻𖾐 𖼀𖽦𖾐：“𖽃𖽔 𖼈𖽜 𖼺𖽡𖾐 𖼻𖽙 𖼽𖽡 𖼖𖽡𖾑 𖼽𖽕𖾑 𖼊𖽚𖾐 𖼊𖽑𖽧 𖼖𖽻𖾐 𖼷𖽑𖽻𖾐 𖼞𖽜 𖼄𖽡𖽻𖾐．” 𖼷𖽑𖽻𖾐 𖼊𖽑𖽡 𖼹𖽻𖾐 𖼦𖽑𖽔𖾐 𖼖𖽺𖾑 𖼀𖽦𖾐：“𖽃𖽔 𖼈𖽜 𖼺𖽡𖾐 𖼻𖽙 𖼊𖽑𖽡 𖼽𖽚𖾐 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼦𖽑𖽙𖾐．”
9 𖼳𖽡𖾐 𖼖𖽲𖾑 𖼀𖽦𖾐：“𖼷𖽑𖽡 𖼺𖽪𖾐 𖼽𖽱𖾐 𖼦𖽕𖾑 𖼈𖽪𖾑 𖼊𖽡𖾐 𖼣𖽙𖾐 𖼮𖽑𖽢𖾑 𖼊𖽝𖾐 𖼦𖽑𖽙𖾐 𖼦𖽑𖽻𖾐，𖼄𖽡𖽻 𖼦𖽑𖽺𖾑 𖼹𖽻𖾐 𖼂𖽺𖾐 𖼺𖽪𖾐 𖽃𖽔 𖼺𖽺 𖼣𖽻𖾐 𖼠𖽸𖾑 𖼐𖽺𖾑？” 𖽃𖽔𖾐 𖼺𖽺𖾑，𖼳𖽡𖾐 𖼖𖽲𖾑 𖼽𖽻 𖼊𖽑𖽺 𖼄𖽡𖽻𖾐 𖼖𖽡𖾐 𖼊𖽡 𖼮𖽑𖽻．
𖼽𖽺𖾐 𖼺𖽪𖾐 𖼷𖽑𖽻𖾐 𖼣𖽙 𖼍𖽪𖾐 𖼽𖽚𖾐 𖼞𖽜 𖼷𖽙 𖼀𖽚𖾐 ( 𖼊𖽑𖽹𖾑 14：13 - 21，𖼞𖽑𖽜 6：30 - 44，𖼽𖽱𖾐 6：1-13 )
10 𖼹𖽡𖾐 𖼺𖽪𖾐 𖼞𖽚 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼞𖽑𖽙𖾐 𖼂𖽺𖾐 𖼄𖽡𖽻 𖼀𖽦𖾐 𖼽𖽺𖾐 𖼺𖽪𖾐 𖼊𖽑𖽺 𖼰𖽨𖾐．𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖼦𖽳，𖼄𖽔 𖼊𖽡𖾑 𖼊𖽡𖾐 𖼞𖽑𖽶𖾑 𖼠𖽻𖾐 𖼰𖽡𖾑 𖼦𖽑𖽙𖾐，𖼂𖽚 𖼺𖽦𖾑 𖼍𖽕𖾑 𖼖𖽪𖾐 𖼞𖽳𖾐 𖼽𖽡𖾐． 11 𖼷𖽑𖽻𖾐 𖼷𖽪𖾐 𖼺𖽝𖾑 𖼺𖽺𖾑，𖼽𖽻 𖼖𖽙𖾐 𖼮𖽑𖽻𖾐 𖼽𖽡𖾐 𖼦𖽑𖽙𖾐．𖼽𖽻 𖼐𖽑𖽧𖾐 𖼺𖽳 𖼄𖽙𖾐 𖼽𖽻 𖼈𖽳𖾐 𖼊𖽑𖽺 𖼷𖽶𖾐 𖼞𖽜，𖽂𖽙 𖼺𖽙𖾐 𖼂𖽙𖾐 𖼠𖽚 𖼞𖽳𖾐 𖼄𖽢 𖼮𖽑𖽡𖽪 𖼦𖽑𖽺 𖼽𖽻 𖼈𖽳𖾐 𖼊𖽑𖽺 𖼰𖽨𖾐，𖼐𖽙𖾐 𖼞𖽪𖾐 𖼞𖽜 𖼖𖽡𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼖𖽺𖾑 𖼞𖽪𖾐 𖼞𖽑𖽙 𖼦𖽑𖽻𖾐．
12 𖽃𖽔𖾑 𖼄𖽶 𖼐𖽑𖽡𖾐 𖼖𖽻𖾑 𖼹𖽺𖾐 𖼽𖽡𖾐 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼹𖽡𖾐 𖼺𖽪𖾐 𖼷𖽑𖽡𖾐 𖼐𖽑𖽡 𖼽𖽚𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐，𖼽𖽻 𖼖𖽙𖾐 𖼀𖽦𖾐：“𖼷𖽑𖽻𖾐 𖼷𖽪𖾐 𖼞𖽜 𖼀𖽺 𖼦𖽑𖽙𖾐 𖼽𖽡𖾐 𖼻𖽻𖾐！ 𖼽𖽻 𖼈𖽳𖾐 𖼞𖽜 𖼽𖽡𖾐 𖼊𖽑𖽡 𖼰𖽻𖾐 𖼖𖽡𖾐 𖼮𖽑𖽡𖽦𖾐 𖼠𖽻𖾐 𖼞𖽑𖽶𖾐 𖽂𖽙𖾐 𖼰𖽙𖾐 𖼷𖽙、 𖼰𖽙𖾐 𖼦𖽑𖽦 𖼽𖽡𖾐 𖼊𖽙𖾐．𖼞𖽪𖾐 𖼮𖽡𖽺𖾐，𖽃𖽔 𖼐𖽺𖾑 𖼞𖽳𖾐 𖼦𖽑𖽺𖾑 𖼠𖽻𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼣𖽻𖾐．”
13 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼷𖽙 𖼊𖽪𖾐 𖼽𖽻 𖼈𖽳𖾐 𖼊𖽑𖽺 𖼰𖽙𖾑 𖼖𖽡𖾐！”
𖼽𖽻 𖼈𖽳𖾐 𖼀𖽦𖾐：“𖼣𖽙𖾐 𖼈𖽳𖾐 𖽃𖽔𖾑 𖼂𖽻𖾐 𖼣𖽙 𖼖𖽜，𖼣𖽙𖾑 𖼐𖽑𖽡 𖼮𖽑𖽡𖾐 𖼍𖽺𖾑 𖼮𖽻𖾐，𖼷𖽙 𖼊𖽪𖾐 𖼄𖽔 𖼈𖽳𖾐 𖼮𖽑𖽻𖾐 𖼊𖽑𖽡𖾑 𖼣𖽻𖾐，𖼷𖽑𖽻𖾐 𖼦𖽑𖽺𖾑 𖼄𖽨𖾐 𖼞𖽜 𖼷𖽙 𖼖𖽚 𖼄𖽔 𖼊𖽙𖾐．” 14 𖼞𖽑𖽶𖾑 𖼮𖽶𖾐，𖼻𖽙 𖼐𖽜𖾐 𖽃𖽔 𖼖𖽙𖾐 𖼣𖽙 𖼍𖽪𖾐 𖼽𖽚𖾐 𖼮𖽻𖾐．
𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼷𖽑𖽻𖾐 𖼄𖽳𖾑 𖼄𖽳 𖼞𖽜 𖼊𖽑𖽡 𖼷𖽪𖾐、 𖼊𖽑𖽡 𖼷𖽪𖾐 𖼊𖽡𖾐 𖼹𖽺𖾐 𖼖𖽻𖾐 𖼖𖽡𖾐！ 𖼊𖽑𖽡 𖼷𖽪𖾐 𖽃𖽔 𖼖𖽙𖾐 𖼣𖽙𖾐 𖼷𖽑𖽡𖾐 𖼽𖽚𖾐 𖼺𖽺𖾑 𖼮𖽻𖾐．” 15 𖼽𖽻 𖼈𖽳𖾐 𖼽𖽻 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐，𖼷𖽑𖽻𖾐 𖼄𖽳𖾑 𖼄𖽳 𖼞𖽜 𖼊𖽡𖾐 𖼹𖽺𖾐 𖼖𖽻𖾐 𖼦𖽑𖽙𖾐． 16 𖼽𖽺𖾐 𖼺𖽪𖾐 𖽃𖽔𖾐 𖼂𖽻𖾐 𖼦𖽑𖽺𖾑 𖼣𖽙 𖼖𖽜，𖼣𖽙𖾑 𖼦𖽑𖽺𖾑 𖼐𖽑𖽡 𖼮𖽑𖽡𖾐 𖼈𖽺𖾐 𖼺𖽺𖾑，𖼄𖽶 𖼠𖽻𖾐 𖼊𖽑𖽺 𖼐𖽦𖾐 𖼍𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐、 𖼊𖽑𖽡 𖼞𖽔𖾐 𖼞𖽜 𖼦𖽑𖽻𖾐，𖼣𖽕𖾑 𖼀𖽳，𖼷𖽶𖾐 𖼽𖽻 𖼈𖽳𖾐 𖼊𖽑𖽺 𖼄𖽻𖾑，𖼀𖽜𖾐 𖼷𖽑𖽻𖾐 𖼷𖽪𖾐 𖼊𖽑𖽺 𖼞𖽜． 17 𖼷𖽑𖽻𖾐 𖼄𖽳𖾑 𖼄𖽳 𖼷𖽙 𖼀𖽚𖾐 𖼦𖽑𖽻𖾐，𖼷𖽙 𖼷𖽺 𖼷𖽺𖾐 𖼠𖽙𖾐 𖼳𖽙𖾐 𖼍𖽪𖾐 𖼖𖽻𖾐，𖼰𖽡𖽻𖾐 𖼖𖽪𖾐 𖼷𖽑𖽡𖾐 𖼐𖽑𖽡 𖼊𖽝𖾐 𖼰𖽡𖽺𖾐 𖼀𖽡𖾐 𖼦𖽑𖽙𖾐．
𖼂𖽡 𖼍𖽴 𖼀𖽦𖾐 𖼽𖽺𖾐 𖼺𖽪𖾐 𖼦𖽑𖽺𖾑 𖼰𖽡𖾐 𖼍𖽮 𖼣𖽻𖾐 ( 𖼊𖽑𖽹𖾑 16：13 -19，𖼞𖽑𖽜 8：27-29 )
18 𖼊𖽑𖽡 𖼰𖽻𖾐 𖼮𖽻𖾐，𖼽𖽺𖾐 𖼺𖽪𖾐 𖼮𖽑𖽡 𖼮𖽡𖽺𖾐 𖼂𖽺𖾐 𖼞𖽑𖽶𖾑 𖼮𖽶𖾐，𖼷𖽻𖾐 𖼺𖽪𖾐 𖼽𖽻 𖼀𖽙 𖼮𖽑𖽶𖾐 𖼮𖽻𖾐．𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖼊𖽻 𖼐𖽙𖾐：“𖼷𖽑𖽻𖾐 𖼷𖽪𖾐 𖼀𖽦𖾐 𖼺𖽪𖾐 𖼣𖽙𖾐 𖽃𖽔 𖼺𖽺 𖼣𖽻𖾐？”
19 𖼽𖽻 𖼈𖽳𖾐 𖼊𖽻 𖼞𖽑𖽚：“𖼊𖽑𖽡 𖼹𖽻𖾐 𖼀𖽦𖾐 ‘ 𖼐𖽑𖽡𖾐 𖼷𖽑𖽡 𖼺𖽪𖾐 𖼽𖽱𖾐 𖼦𖽕𖾑 𖼣𖽻𖾐 ’，𖼊𖽑𖽡 𖼹𖽻𖾐 𖼀𖽦𖾐 ‘ 𖼐𖽑𖽡𖾐 𖽃𖽔 𖼈𖽜 𖼺𖽡𖾐 𖼻𖽙 𖼽𖽡 𖼖𖽡𖾑 𖼽𖽕𖾑 𖼣𖽻𖾐 ’，𖼊𖽑𖽡 𖼹𖽻𖾐 𖼦𖽑𖽔𖾐 𖼖𖽺𖾑 𖼀𖽦𖾐 ‘ 𖼐𖽑𖽡𖾐 𖽃𖽔 𖼈𖽜 𖼺𖽡𖾐 𖼻𖽙 𖼊𖽑𖽡 𖼽𖽚𖾐 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼦𖽑𖽙𖾐 𖼺𖽪𖾐 𖼣𖽻𖾐．’ ”
20 𖼽𖽺𖾐 𖼺𖽪𖾐 𖼹𖽦𖾑 𖼽𖽻 𖼈𖽳𖾐 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼈𖽳𖾐 𖼀𖽦𖾐 𖼣𖽙𖾐 𖽃𖽔 𖼺𖽺 𖼣𖽻𖾐？”
𖼂𖽡 𖼍𖽴 𖼊𖽻 𖼞𖽑𖽚：“𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼹𖽡𖾐 𖼂𖽻𖾐 𖼖𖽻𖾐 𖼺𖽪𖾐 𖼰𖽡𖾐 𖼍𖽮 𖼣𖽻𖾐．”
𖼽𖽺𖾐 𖼺𖽪𖾐 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼊𖽻𖾐 𖼞𖽳𖾐 𖼺𖽡𖾐 𖼹𖽦𖾑 𖼊𖽻 ( 𖼊𖽑𖽹𖾑 16：20-22，𖼞𖽑𖽜 8：31 )
21 𖼽𖽺𖾐 𖼺𖽪𖾐 𖼦𖽑𖽔𖾐 𖼮𖽶𖾐 𖼮𖽶𖾐 𖼽𖽻 𖼈𖽳𖾐 𖼊𖽑𖽺 𖼀𖽦𖾐 𖼄𖽪𖾑，𖼄𖽡𖽻 𖼦𖽑𖽺𖾑 𖼀𖽦𖾐 𖼊𖽑𖽡 𖼽𖽚𖾐 𖼊𖽑𖽺 𖼖𖽺𖾑 𖽂𖽙𖾐 𖼊𖽑𖽧 𖼄𖽔 𖼊𖽙𖾐． 22 𖼽𖽻 𖼦𖽑𖽔𖾐 𖼖𖽺𖾑 𖼀𖽦𖾐：“𖼷𖽑𖽻𖾐 𖼻𖽙 𖼷𖽑𖽜𖾑 𖼷𖽑𖽜𖾐 𖼠𖽻𖾐 𖼰𖽡𖽳𖾐 𖼞𖽑𖽙 𖼄𖽙𖾐 𖼷𖽶𖾐 𖼄𖽳𖾐 𖼺𖽺𖾑，𖼽𖽻 𖼊𖽑𖽺 𖼮𖽳 𖼄𖽻、 𖼍𖽡𖾐 𖼄𖽻 𖼈𖽪𖾑 𖼐𖽺𖾐 𖼺𖽪𖾑 𖼷𖽺𖾐 𖼷𖽑𖽻𖾐 𖼮𖽑𖽢𖾑 𖼷𖽴𖾐 𖼦𖽑𖽙𖾐、 𖼺𖽦 𖼦𖽑𖽙𖾐 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼺𖽙𖾐 𖼐𖽑𖽡𖾐 𖼖𖽚 𖼽𖽻 𖼳𖽶𖾐 𖼮𖽑𖽻𖾐 𖼠𖽙𖾑 𖼞𖽑𖽚 𖼖𖽻𖾐 𖼊𖽻𖾐．”
𖼺𖽧𖾐 𖼳𖽡𖽦𖾑 𖼀𖽶 𖼺𖽡 𖼀𖽑𖽙 𖼠𖽙𖾑 𖼍𖽻𖾐 𖼮𖽑𖽻𖾐 𖼖𖽡𖾐
23 𖼽𖽺𖾐 𖼺𖽪𖾐 𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼄𖽳𖾑 𖼄𖽳 𖼖𖽙𖾐 𖼀𖽦𖾐：“𖽃𖽔 𖼺𖽺 𖼣𖽙𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼖𖽻𖾐 𖼊𖽡 𖼮𖽑𖽻 𖼊𖽑𖽡𖾑 𖼣𖽻𖾐，𖼽𖽻 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽨 𖼮𖽑𖽳 𖼦𖽑𖽙𖾐 𖼖𖽡𖾐，𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼽𖽻 𖼄𖽳𖾑 𖼺𖽧𖾐 𖼳𖽡𖽦𖾑 𖼀𖽶 𖼺𖽺𖾑，𖼣𖽙𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼖𖽻𖾐 𖼖𖽡𖾐． 24 𖼞𖽪𖾐 𖼮𖽡𖽺𖾐，𖼞𖽑𖽙𖾐 𖼽𖽻 𖼄𖽳𖾑 𖼞𖽚 𖼈𖽪𖾑 𖼠𖽻𖾐 𖼰𖽨𖾑 𖼺𖽪𖾐 𖼷𖽑𖽻𖾐，𖼷𖽑𖽜𖾑 𖼷𖽑𖽜𖾐 𖼈𖽪𖾑 𖼠𖽻𖾐 𖼀𖽑𖽧𖾐 𖼦𖽑𖽙𖾐 𖼊𖽻𖾐；𖼞𖽑𖽙𖾐 𖼣𖽙𖾐 𖼖𖽙𖾐 𖼀𖽙𖾐 𖼈𖽪𖾑 𖼠𖽻𖾐 𖼀𖽑𖽧𖾐 𖼦𖽑𖽙𖾐 𖼺𖽪𖾐 𖼷𖽑𖽻𖾐，𖼷𖽑𖽜𖾑 𖼷𖽑𖽜𖾐 𖼈𖽪𖾑 𖼠𖽻𖾐 𖼀𖽻𖾐 𖽂𖽙𖾐 𖼊𖽻𖾐． 25 𖼷𖽑𖽻𖾐 𖼊𖽑𖽡 𖼊𖽺𖾐 𖼊𖽑𖽺 𖼄𖽳𖾑 𖼄𖽳 𖽂𖽙𖾐 𖼦𖽑𖽻𖾐 𖼀𖽦𖾐 𖼖𖽺𖾑，𖼽𖽻 𖼄𖽳𖾑 𖼞𖽚 𖼀𖽑𖽧𖾐 𖼦𖽑𖽙𖾐，𖼈𖽪𖾑 𖼠𖽻𖾐 𖼈𖽺𖾐 𖼮𖽑𖽡𖽪𖾑 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖽃𖽔 𖼊𖽺𖾑 𖼳𖽶 𖼹𖽳𖾐 𖼞𖽳𖾐 𖼮𖽻𖾐 𖼐𖽺𖾑？ 26 𖼣𖽙𖾐 𖼊𖽑𖽺 𖼐𖽺𖾐 𖼣𖽙𖾐 𖼊𖽻 𖼂𖽪𖾑 𖼊𖽑𖽺 𖼀𖽑𖽨 𖼳𖽡𖽦𖾑 𖼍𖽻𖾐 𖼊𖽪𖾐 𖼰𖽕𖾐 𖼺𖽪𖾐 𖼷𖽑𖽻𖾐，𖽃𖽔𖾑 𖼞𖽶𖾐 𖼷𖽑𖽻𖾐 𖼻𖽙 𖼞𖽑𖽻𖾑 𖼽𖽻 𖼄𖽳𖾑 𖼐𖽺𖾐 𖼄𖽶 𖼠𖽻𖾐 𖽃𖽔 𖼀𖽙、 𖼄𖽶 𖼹𖽡𖾐 𖼖𖽦 𖼞𖽳𖾐 𖼄𖽶 𖼳𖽳𖾐 𖼞𖽑𖽶𖾐 𖼮𖽑𖽻𖾐 𖼹𖽺𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼊𖽑𖽺 𖼖𖽺𖾑 𖼀𖽑𖽨 𖼳𖽡𖽦𖾑 𖼍𖽻𖾐 𖼊𖽪𖾐 𖼰𖽕𖾐 𖼊𖽻𖾐． 27 𖼣𖽙𖾐 𖼠𖽕𖾐 𖼰𖽶𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼦𖽑𖽺𖾑 𖼄𖽻𖾑 𖼦𖽑𖽡𖽚 𖼺𖽪𖾐 𖼷𖽑𖽻𖾐 𖼊𖽑𖽡 𖼹𖽻𖾐，𖼄𖽔 𖼳𖽶𖾐 𖼺𖽺 𖽃𖽙𖾑 𖼄𖽺 𖼷𖽑𖽜𖾑 𖼷𖽑𖽜𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼊𖽑𖽺 𖼄𖽡𖽻𖾐 𖼊𖽻𖾐．”
𖼽𖽺𖾐 𖼺𖽪𖾐 𖼄𖽶 𖼳𖽳𖾐 𖼀𖽑𖽡𖽻 𖼖𖽳𖾑 ( 𖼊𖽑𖽹𖾑 17：1-13，𖼞𖽑𖽜 9：2-8 )
28 𖼽𖽺𖾐 𖼺𖽪𖾐 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼦𖽑𖽺 𖼦𖽑𖽻𖾐 𖼠𖽙𖾑 𖼍𖽻𖾐，𖼦𖽑𖽦 𖼐𖽑𖽡𖾐 𖼺𖽺𖾑 𖼖𖽚，𖼽𖽻 𖼂𖽡 𖼍𖽴、 𖼽𖽱𖾐 𖼦𖽕𖾑、 𖼽𖽔 𖼠𖽴𖾑 𖼊𖽑𖽺 𖼦𖽳 𖽂𖽙 𖼰𖽡𖽺𖾐 𖼊𖽦𖾐 𖼽𖽡𖾐 𖼮𖽑𖽡 𖼮𖽡𖽺𖾐 𖼂𖽺𖾐． 29 𖼽𖽻 𖼮𖽑𖽡 𖼮𖽡𖽺𖾐 𖼂𖽺𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼀𖽑𖽡𖽻 𖼖𖽳𖾑 𖼦𖽑𖽙𖾐，𖼀𖽑𖽡𖽻𖾐 𖼷𖽑𖽶 𖼀𖽙𖾐 𖼮𖽨𖾐 𖼄𖽦𖾐 𖼠𖽳𖾐 𖼍𖽪𖾐 𖼖𖽻𖾐． 30 𖼐𖽕 𖼊𖽺𖾐，𖼄𖽚 𖼳𖽡𖾐 𖼐𖽺𖾐 𖼽𖽡 𖼖𖽡𖾑 𖼽𖽕𖾑 𖼐𖽑𖽡 𖼽𖽚𖾐 𖼽𖽺𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐． 31 𖼽𖽻 𖼈𖽳𖾐 𖼄𖽶 𖼳𖽳𖾐 𖼀𖽜𖾐 𖼖𖽜𖾐 𖼞𖽑𖽶𖾐 𖼮𖽻𖾐，𖼽𖽺𖾐 𖼺𖽪𖾐 𖽃𖽔 𖼊𖽺𖾐 𖼳𖽶𖾐 𖼊𖽻𖾐 𖼞𖽳𖾐 𖼄𖽡𖽻 𖼦𖽑𖽺，𖼞𖽑𖽙𖾐 𖼦𖽑𖽺 𖼺𖽪𖾐 𖼞𖽑𖽶𖾑 𖼽𖽻 𖼽𖽡𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖼂𖽺𖾐 𖼀𖽑𖽢 𖼊𖽻𖾐 𖼞𖽳𖾐 𖼄𖽡𖽻 𖼣𖽻𖾐．
32 𖼂𖽡 𖼍𖽴 𖼐𖽺𖾐 𖼽𖽻 𖼮𖽑𖽻 𖼂𖽦𖾐 𖼽𖽦 𖼄𖽦𖾐 𖼠𖽶𖾑，𖼦𖽙𖾑 𖼮𖽑𖽡 𖼞𖽑𖽶𖾑 𖼮𖽶𖾐 𖼽𖽺𖾐 𖼺𖽪𖾐 𖼞𖽳𖾐 𖼄𖽶 𖼳𖽳𖾐 𖼀𖽜𖾐 𖼖𖽜𖾐 𖼊𖽑𖽺 𖼄𖽡𖽻𖾐，𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼐𖽑𖽡 𖼽𖽚𖾐 𖼽𖽻 𖼖𖽙𖾐 𖼮𖽑𖽻𖾐 𖼞𖽑𖽻𖾑 𖼦𖽑𖽡𖽚 𖼍𖽳𖾐． 33 𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼽𖽺𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼀𖽜𖾐 𖼀𖽺 𖼽𖽡𖾐 𖼊𖽻𖾐 𖼞𖽑𖽶𖾑 𖼮𖽶𖾐，𖼂𖽡 𖼍𖽴 𖼽𖽺𖾐 𖼺𖽪𖾐 𖼖𖽙𖾐 𖼀𖽦𖾐：“𖼳𖽪𖾑 𖼰𖽪𖾐！ 𖽃𖽔 𖼐𖽺𖾑 𖼦𖽑𖽺𖾑 𖼠𖽻𖾐 𖼮𖽻𖾐，𖼠𖽕𖾐 𖼰𖽶𖾐 𖼹𖽳𖾐 𖼺𖽪𖾐 𖼣𖽻𖾐！ 𖽃𖽔 𖼐𖽺𖾑 𖼦𖽑𖽺𖾐 𖼠𖽴𖾐 𖼺𖽙𖾐 𖼊𖽝𖾐 𖼍𖽡𖾐，𖼊𖽑𖽡 𖼊𖽝𖾐 𖼐𖽑𖽡𖾐 𖼞𖽜，𖼊𖽑𖽡 𖼊𖽝𖾐 𖼄𖽚 𖼳𖽡𖾐 𖼞𖽜，𖼊𖽑𖽡 𖼊𖽝𖾐 𖼽𖽡 𖼖𖽡𖾑 𖼽𖽕𖾑 𖼞𖽜．” 𖼦𖽑𖽻𖾐 𖼊𖽑𖽻𖾐，𖼽𖽻 𖽃𖽔 𖼊𖽺𖾑 𖼳𖽶 𖼀𖽦𖾐 𖼺𖽪𖾐 𖼣𖽻𖾐，𖼽𖽻 𖼖𖽺𖾑 𖼄𖽔 𖼺𖽝𖾑． 34 𖼽𖽻 𖼊𖽻 𖼂𖽪𖾑 𖼦𖽑𖽺𖾑 𖼊𖽑𖽜𖾐 𖼮𖽻𖾐 𖼺𖽺，𖼍𖽡𖾐 𖼮𖽑𖽙𖾐 𖼊𖽑𖽡 𖼮𖽑𖽙𖾐 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼀𖽜𖾐 𖼮𖽑𖽨𖾑 𖼍𖽡．𖼽𖽻 𖼈𖽳𖾐 𖼍𖽡𖾐 𖼮𖽑𖽙𖾐 𖼞𖽑𖽶𖾐 𖼊𖽡 𖼽𖽡𖾐 𖼞𖽑𖽶𖾑 𖼮𖽶𖾐，𖼷𖽻𖾐 𖼺𖽪𖾐 𖼮𖽡𖽮𖾐 𖼷𖽑𖽚．
35 𖼍𖽡𖾐 𖼮𖽑𖽙𖾐 𖼞𖽑𖽶𖾐 𖼮𖽑𖽻𖾐 𖼮𖽑𖽡𖽪 𖼀𖽺𖾐 𖼊𖽚𖾐 𖼖𖽻𖾐 𖼺𖽺𖾑，𖼀𖽦𖾐：“𖼽𖽻 𖼦𖽑𖽺𖾑 𖼣𖽙𖾐 𖼻𖽙 𖼣𖽻𖾐，𖼣𖽙𖾐 𖼞𖽑𖽙𖾐 𖼺𖽺𖾐 𖼊𖽑𖽧 𖼖𖽻𖾐 𖼺𖽪𖾐 𖼣𖽻𖾐，𖼐𖽑𖽡𖾐 𖼈𖽳𖾐 𖼽𖽻 𖼀𖽦𖾐 𖼺𖽪𖾐 𖼊𖽑𖽺 𖼊𖽻 𖼮𖽶𖾐 𖼖𖽡𖾐！” 36 𖼊𖽻 𖼊𖽑𖽜𖾐 𖼐𖽙 𖼦𖽑𖽻𖾐 𖼠𖽙𖾑 𖼍𖽻𖾐，𖼽𖽻 𖼈𖽳𖾐 𖼐𖽦𖾐 𖼄𖽡𖽻𖾐，𖼽𖽺𖾐 𖼺𖽪𖾐 𖼍𖽺𖾑 𖼞𖽑𖽻𖾑 𖼮𖽻𖾐．𖼞𖽑𖽶𖾑 𖼮𖽶𖾐 𖼞𖽳𖾐 𖼐𖽑𖽡𖾐 𖼦𖽑𖽦，𖼷𖽻𖾐 𖼺𖽪𖾐 𖼽𖽻 𖼈𖽳𖾐 𖼞𖽑𖽙𖾐 𖼄𖽡𖽻𖾐 𖼺𖽪𖾐 𖼄𖽡𖽻 𖼄𖽔 𖼦𖽑𖽺，𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽑𖽺 𖼖𖽺𖾑 𖼄𖽔 𖼀𖽦𖾐 𖼊𖽑𖽧．
𖼐𖽺 𖼊𖽶𖾐 𖼮𖽑𖽢𖾑 𖼻𖽸 𖼺𖽪𖾐 𖽃𖽔𖾐 𖼞𖽶𖾑 𖼊𖽑𖽺 𖼞𖽪𖾐 𖼞𖽑𖽙 ( 𖼊𖽑𖽹𖾑 1714-17；𖼞𖽑𖽜 9：14-27 )
37 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐，𖼽𖽻 𖼈𖽳𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽑𖽻𖾐 𖼹𖽺𖾐 𖼖𖽻𖾐 𖼦𖽑𖽙𖾐，𖼷𖽑𖽻𖾐 𖼊𖽑𖽡 𖼷𖽪𖾐 𖼄𖽙𖾐 𖼽𖽺𖾐 𖼺𖽪𖾐 𖽃𖽙𖾑 𖼄𖽺 𖼷𖽶𖾐 𖼖𖽻𖾐． 38 𖼞𖽑𖽶𖾑 𖼊𖽑𖽡 𖼠𖽸𖾑，𖼷𖽑𖽻𖾐 𖼷𖽪𖾐 𖼠𖽻𖾐 𖼞𖽑𖽶𖾐 𖼊𖽑𖽡 𖼽𖽚𖾐 𖽃𖽶𖾐 𖼍𖽪𖾐 𖼖𖽻𖾐，𖼀𖽦𖾐：“𖼳𖽪𖾑 𖼰𖽪𖾐！ 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼻𖽙 𖼊𖽑𖽺 𖼂𖽻𖾐 𖼞𖽜，𖼣𖽙𖾐 𖼻𖽙 𖼍𖽡𖾑 𖼦𖽑𖽺𖾑 𖼽𖽚𖾐 𖼍𖽺𖾑 𖼮𖽻𖾐． 39 𖼐𖽦𖾐 𖼄𖽺！ 𖼐𖽺 𖼊𖽶𖾐 𖼽𖽻 𖼊𖽑𖽺 𖼮𖽳 𖼍𖽡 𖼺𖽺𖾑，𖼽𖽻 𖼐𖽕 𖼊𖽺𖾐 𖽃𖽶𖾐 𖼮𖽸 𖼍𖽪𖾐 𖼖𖽻𖾐，𖼮𖽡𖽪 𖼰𖽙𖾐 𖼞𖽻𖾐 𖼰𖽚𖾑，𖼄𖽡 𖼞𖽑𖽪𖾐 𖼦𖽸𖾑 𖼊𖽚𖾐．𖼐𖽺 𖼊𖽶𖾐 𖼮𖽡𖽮𖾐 𖼖𖽕𖾐 𖼖𖽕𖾐 𖼽𖽻 𖼊𖽑𖽺 𖼦𖽹𖾑 𖼀𖽑𖽧𖾐，𖼖𖽳𖾐 𖼮𖽡𖽺 𖼽𖽻 𖼊𖽑𖽺 𖼀𖽑𖽨 𖼦𖽑𖽙𖾐 𖼄𖽔 𖼦𖽶𖾐． 40 𖼣𖽙𖾐 𖼐𖽑𖽡𖾐 𖼞𖽳𖾐 𖼷𖽻𖾐 𖼺𖽪𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖼐𖽺 𖼊𖽶𖾐 𖼊𖽑𖽺 𖼞𖽕 𖼠𖽚．𖼦𖽑𖽻𖾐 𖼊𖽑𖽻𖾐，𖼽𖽻 𖼈𖽳𖾐 𖼞𖽕 𖼊𖽑𖽧 𖼽𖽡𖾐 𖼄𖽔 𖼠𖽸𖾑．”
41 𖼽𖽺𖾐 𖼺𖽪𖾐 𖼀𖽦𖾐：“𖽃𖽺𖾐！ 𖼊𖽻 𖼄𖽔 𖼮𖽶𖾐，𖼦𖽑𖽔𖾐 𖼖𖽺𖾑 𖼮𖽨𖾐 𖼦𖽑𖽙 𖼺𖽪𖾐 𖼦𖽑𖽺𖾑 𖼊𖽑𖽙𖾐 𖼻𖽳𖾐 𖼷𖽑𖽻𖾐 𖽃𖽔𖾐！ 𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽻𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼷𖽳𖾑 𖼺𖽺𖾑，𖼞𖽑𖽙 𖼊𖽑𖽻𖾐 𖼮𖽑𖽡𖾐 𖼖𖽡𖾐 𖼐𖽺𖾑？𖼐𖽑𖽡𖾐 𖼻𖽙 𖼊𖽑𖽺 𖼦𖽳 𖼣𖽙𖾐 𖼞𖽳𖾐 𖼦𖽑𖽻𖾑 𖼖𖽻𖾐！”
42 𖽃𖽔𖾐 𖼞𖽶𖾑 𖼖𖽻𖾐 𖼞𖽑𖽶𖾑 𖼮𖽶𖾐，𖼐𖽺 𖼊𖽶𖾐 𖼽𖽻 𖼊𖽑𖽺 𖼈𖽡𖾑 𖼂𖽶𖾑，𖼽𖽻 𖼞𖽜 𖼮𖽡𖽪 𖼰𖽙𖾐 𖼞𖽻𖾐 𖼰𖽚𖾑 𖼰𖽡．𖼽𖽺𖾐 𖼺𖽪𖾐 𖼐𖽺 𖼊𖽶𖾐 𖼞𖽑𖽶𖾑 𖼊𖽑𖽺 𖼦𖽑𖽳𖾐，𖽃𖽔𖾐 𖼞𖽶𖾑 𖼊𖽑𖽺 𖼞𖽪𖾐 𖼞𖽑𖽙 𖼦𖽑𖽙𖾐，𖼰𖽡𖽻𖾐 𖼽𖽻 𖼀𖽙 𖼞𖽜． 43 𖼞𖽑𖽻𖾑 𖼮𖽻𖾐 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼖𖽺𖾑 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖽂𖽙 𖼐𖽑𖽡𖾐 𖼈𖽳 𖼊𖽑𖽺 𖼞𖽑𖽙 𖼣𖽝．
𖼽𖽺𖾐 𖼺𖽪𖾐 𖼦𖽑𖽔𖾐 𖼖𖽺𖾑 𖼊𖽑𖽡 𖼂𖽦𖾑 𖼽𖽻 𖼳𖽶𖾐 𖼊𖽻𖾐 𖼞𖽳𖾐 𖼺𖽡𖾐 𖼹𖽦𖾑 𖼊𖽻 𖼀𖽦𖾐 ( 𖼊𖽑𖽹𖾑 17：22-23；𖼞𖽑𖽜 9：30-32 )
𖼷𖽑𖽻𖾐 𖼄𖽳𖾑 𖼄𖽳 𖼽𖽺𖾐 𖼺𖽪𖾐 𖼞𖽑𖽙𖾐 𖼂𖽺𖾐 𖼄𖽡𖽻 𖼊𖽑𖽺 𖼞𖽑𖽙 𖼣𖽝 𖼞𖽑𖽶𖾑 𖼮𖽶𖾐，𖼽𖽺𖾐 𖼺𖽪𖾐 𖼽𖽻 𖼷𖽻𖾐 𖼺𖽪𖾐 𖼖𖽙𖾐 𖼀𖽦𖾐： 44 “𖼷𖽑𖽻𖾐 𖼻𖽙 𖼊𖽑𖽺 𖼰𖽡𖽻𖾐 𖼺𖽙𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼊𖽻𖾐，𖼐𖽑𖽡𖾐 𖼈𖽳𖾐 𖼊𖽻 𖼂𖽪𖾑 𖼦𖽑𖽺𖾑 𖼊𖽻 𖼐𖽙𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼰𖽡𖽺𖾐 𖼖𖽡𖾐．” 45 𖼷𖽻𖾐 𖼺𖽪𖾐 𖼽𖽻 𖼊𖽻 𖼂𖽪𖾑 𖼦𖽑𖽺𖾑 𖼄𖽡𖾐 𖼄𖽔 𖼀𖽻𖾐．𖼞𖽪𖾐 𖼮𖽡𖽺𖾐，𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽔 𖼦𖽑𖽺 𖼀𖽑𖽪𖾐 𖼺𖽺 𖼺𖽺𖾑，𖼄𖽡𖾐 𖼄𖽔 𖼀𖽻𖾐．𖼽𖽻 𖼈𖽳𖾐 𖼄𖽡𖾐 𖼄𖽔 𖼀𖽻𖾐 𖼊𖽑𖽻𖾐，𖼦𖽑𖽔𖾐 𖼖𖽺𖾑 𖽃𖽔 𖼊𖽺𖾑 𖼳𖽶 𖼀𖽦𖾐 𖼈𖽪𖾐 𖼣𖽻𖾐 𖼊𖽻 𖼐𖽙𖾐 𖼄𖽔 𖼂𖽡𖾑．
𖽃𖽔 𖼺𖽺 𖼈𖽳 𖼺𖽪𖾐 𖼂𖽺𖾐 𖼊𖽻𖾐 𖼐𖽺𖾑 ( 𖼊𖽑𖽹𖾑 18：1-5；𖼞𖽑𖽜 9：33-37 )
46 𖼷𖽻𖾐 𖼺𖽪𖾐 𖼠𖽻𖾐 𖼊𖽑𖽺 𖼷𖽙𖾐 𖼖𖽙𖾐 𖼦𖽻𖾐 𖼊𖽦 𖼍𖽪𖾐 𖼖𖽻𖾐，𖽃𖽔 𖼺𖽺 𖼰𖽻𖾑 𖼦𖽑𖽔𖾐 𖼮𖽶𖾐 𖼈𖽳 𖼺𖽪𖾐 𖼣𖽻𖾐 𖼀𖽦𖾐． 47 𖼽𖽻 𖼈𖽳𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼞𖽑𖽙𖾐 𖼣𖽝 𖼺𖽪𖾐 𖼽𖽺𖾐 𖼺𖽪𖾐 𖼺𖽝𖾑 𖼺𖽺𖾑，𖽃𖽔𖾐 𖼞𖽶𖾑 𖼊𖽑𖽡 𖼽𖽚𖾐 𖽃𖽶𖾐 𖼂𖽻𖾐 𖼖𖽻𖾐 𖼽𖽻 𖼀𖽙 𖼮𖽑𖽶𖾐 𖼦𖽑𖽡𖽚， 48 𖼀𖽑𖽚𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼞𖽑𖽙𖾐 𖼣𖽙𖾐 𖼄𖽡𖾐 𖼖𖽙𖾐 𖼀𖽙𖾐 𖼺𖽺𖾑，𖽃𖽔𖾐 𖼞𖽶𖾑 𖼊𖽑𖽺 𖼷𖽶𖾐 𖼞𖽜 𖼺𖽪𖾐，𖼞𖽑𖽶𖾑 𖼣𖽙𖾐 𖼊𖽑𖽺 𖼷𖽶𖾐 𖼞𖽜 𖼺𖽪𖾐 𖼣𖽻𖾐；𖼞𖽑𖽙𖾐 𖼣𖽙𖾐 𖼊𖽑𖽺 𖼷𖽶𖾐 𖼞𖽜 𖼺𖽪𖾐，𖼞𖽑𖽶𖾑 𖼣𖽙𖾐 𖼊𖽑𖽺 𖼹𖽡𖾐 𖼂𖽻𖾐 𖼖𖽻𖾐 𖼺𖽪𖾐 𖼊𖽑𖽺 𖼷𖽶𖾐 𖼞𖽜 𖼺𖽪𖾐 𖼣𖽻𖾐．𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼦𖽑𖽔𖾐 𖼮𖽶𖾐 𖼽𖽳𖾐 𖼺𖽪𖾐，𖼽𖽻 𖼞𖽑𖽶𖾑 𖼦𖽑𖽔𖾐 𖼮𖽶𖾐 𖼈𖽳 𖼺𖽪𖾐 𖼣𖽻𖾐．”
49 𖼽𖽱𖾐 𖼦𖽕𖾑 𖼀𖽦𖾐：“𖼳𖽪𖾑 𖼰𖽪𖾐！ 𖼣𖽙𖾐 𖼈𖽳𖾐 𖼐𖽦𖾐 𖼄𖽡𖽻𖾐，𖼷𖽑𖽻𖾐 𖼊𖽑𖽡 𖼽𖽚𖾐 𖼐𖽑𖽡𖾐 𖼄𖽡𖾐 𖼖𖽙𖾐 𖼣𖽜𖾐 𖼐𖽺 𖼞𖽕．𖽃𖽔𖾐 𖼺𖽺𖾑，𖼣𖽙𖾐 𖼈𖽳𖾐 𖼽𖽻 𖼊𖽑𖽺 𖼀𖽨 𖼮𖽳．𖼞𖽪𖾐 𖼮𖽡𖽺𖾐，𖼽𖽻 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼐𖽑𖽡𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼄𖽔 𖼦𖽶𖾐．”
50 𖼽𖽺𖾐 𖼺𖽪𖾐 𖼀𖽦𖾐：“𖼽𖽻 𖼊𖽑𖽺 𖼊𖽑𖽔 𖼀𖽨 𖼮𖽳！ 𖼞𖽪𖾐 𖼮𖽡𖽺𖾐 𖼞𖽑𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽔 𖼀𖽨 𖼮𖽳 𖼺𖽪𖾐，𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼂𖽻𖾐 𖼮𖽨𖾐 𖼺𖽪𖾐 𖼣𖽻𖾐．”
𖼺𖽔 𖼄𖽔 𖼖𖽡𖾑 𖼽𖽕𖾑 𖼺𖽪𖾐 𖼷𖽑𖽻𖾐 𖼺𖽡 𖼀𖽑𖽙 𖼊𖽑𖽺 𖼷𖽶𖾐 𖼄𖽔 𖼦𖽶𖾐
51 𖼽𖽺𖾐 𖼺𖽪𖾐 𖼊𖽑𖽺 𖼹𖽶𖾐 𖼄𖽶 𖼠𖽻𖾐 𖼊𖽦𖾐 𖼽𖽡𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼣𖽝 𖼷𖽑𖽦𖾐 𖼺𖽺𖾑，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼽𖽡𖾐． 52 𖽃𖽔𖾐 𖼺𖽺𖾑，𖼽𖽻 𖼹𖽡𖾐 𖼖𖽦 𖼊𖽑𖽺 𖼹𖽡𖾐 𖽃𖽙𖾑 𖼄𖽺 𖼽𖽡𖾐．𖼽𖽻 𖼈𖽳𖾐 𖼺𖽔 𖼄𖽔 𖼖𖽡𖾑 𖼽𖽕𖾑 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽡𖽦𖾐 𖼠𖽻𖾐 𖼊𖽑𖽡 𖼊𖽝𖾐 𖼞𖽑𖽶𖾐 𖼊𖽡 𖼽𖽡𖾐，𖼞𖽑𖽶𖾑 𖼠𖽻𖾐 𖼽𖽺𖾐 𖼺𖽪𖾐 𖼖𖽙𖾐 𖼀𖽙𖾐 𖼷𖽙 𖼊𖽻𖾐 𖼐𖽺𖾐 𖼦𖽑𖽦 𖼞𖽳𖾐 𖼂𖽺𖾐 𖼳𖽡𖽻𖾐 𖼊𖽻𖾐． 53 𖼽𖽺𖾐 𖼺𖽪𖾐 𖼺𖽜 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼀𖽳 𖼀𖽑𖽡𖽻 𖼽𖽡𖾐 𖼺𖽪𖾐 𖼣𖽻𖾐 𖼺𖽺𖾑，𖼞𖽑𖽶𖾑 𖼠𖽻𖾐 𖼺𖽪𖾐 𖼷𖽑𖽻𖾐 𖼽𖽻 𖼊𖽑𖽺 𖼷𖽶𖾐 𖼄𖽔 𖼦𖽶𖾐． 54 𖼽𖽻 𖼷𖽻𖾐 𖼺𖽪𖾐 𖼽𖽔 𖼠𖽴𖾑 𖼐𖽺𖾐 𖼽𖽱𖾐 𖼦𖽕𖾑 𖼐𖽦𖾐 𖼄𖽡𖽻𖾐 𖼺𖽺𖾑，𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼣𖽙𖾐 𖼈𖽳𖾐 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖽃𖽔𖾐 𖼍𖽚𖾑 𖼀𖽑𖽨 𖼹𖽺𖾐 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼮𖽑𖽡𖽪𖾐 𖼮𖽡𖽦 𖼦𖽑𖽙𖾐 𖼻𖽻𖾐 𖼻𖽻𖾐？ \fr 9．54 \ft 𖼦𖽑𖽺𖾑 𖼮𖽑𖽡𖽺 𖼠𖽙𖾑 𖼍𖽻𖾐 “𖼽𖽡 𖼖𖽡𖾑 𖼽𖽕𖾑 𖼞𖽑𖽙𖾐 𖼂𖽺𖾐 𖼖𖽙𖾐 𖼺𖽶𖾑 ” 𖼮𖽑𖽻𖾐 𖼺𖽪𖾐 𖼮𖽻𖾐．” 55 𖼽𖽺𖾐 𖼺𖽪𖾐 𖼰𖽻𖾐 𖼀𖽑𖽚𖾐 𖼞𖽚 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼦𖽑𖽳𖾐 \fr 9．55 \ft 𖼦𖽑𖽺𖾑 𖼮𖽑𖽡𖽺 𖼠𖽙𖾑 𖼍𖽻𖾐 “𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼄𖽙𖾐 𖽃𖽔 𖼊𖽺𖾑 𖼳𖽶 𖼐𖽑𖽧𖾐 𖼄𖽙𖾐 𖼣𖽻𖾐，𖼐𖽑𖽡𖾐 𖼈𖽳𖾐 𖼺𖽝𖾑 𖼺𖽝𖾑？56 𖼷𖽑𖽻𖾐 𖼻𖽙 𖼊𖽺𖾐 𖼊𖽑𖽺 𖼖𖽻𖾐 𖼺𖽪𖾐，𖼷𖽑𖽻𖾐 𖼈𖽪𖾑 𖼠𖽻𖾐 𖼊𖽑𖽺 𖼦𖽑𖽙𖾐 𖼖𖽻𖾐 𖼺𖽪𖾐 𖼄𖽔 𖼣𖽻𖾐，𖼷𖽑𖽻𖾐 𖼈𖽪𖾑 𖼠𖽻𖾐 𖼊𖽑𖽺 𖼰𖽨𖾑 𖼖𖽻𖾐 𖼺𖽪𖾐 𖼣𖽻𖾐 ” 𖼮𖽑𖽻𖾐 𖼺𖽪𖾐 𖼮𖽻𖾐．． 56 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼠𖽳𖾐 𖼖𖽪𖾐 𖼮𖽑𖽡𖽦𖾐 𖼠𖽻𖾐 𖼞𖽳𖾐 𖼽𖽡𖾐 𖼦𖽑𖽙𖾐．
𖽃𖽔 𖼊𖽺𖾑 𖼻𖽻𖾐 𖼂𖽺𖾐 𖼺𖽺𖾑 𖼽𖽺𖾐 𖼺𖽪𖾐 𖼠𖽙𖾑 𖼍𖽻𖾐 𖽂𖽙𖾐 𖼮𖽑𖽻𖾐 𖼊𖽙𖾐 ( 𖼊𖽑𖽹𖾑 8：19-22 )
57 𖼽𖽻 𖼈𖽳𖾐 𖼮𖽨𖾐 𖼺𖽜 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼊𖽑𖽡 𖼽𖽚𖾐 𖼽𖽺𖾐 𖼺𖽪𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔 𖼊𖽺𖾑 𖼠𖽻𖾐 𖼽𖽡𖾐 𖼣𖽻𖾐 𖼦𖽻，𖼣𖽙𖾐 𖼐𖽑𖽡𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼊𖽻𖾐．”
58 𖼽𖽺𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼈𖽪𖾑 𖼊𖽡 𖼳𖽡𖽪𖾐 𖼮𖽻𖾐，𖼄𖽶 𖼖𖽙𖾐 𖼀𖽙 𖼀𖽨𖾐 𖼺𖽪𖾐 𖼣𖽕𖾐 𖼻𖽙 𖼮𖽑𖽡𖾐 𖼮𖽻𖾐，𖼷𖽑𖽻𖾐 𖼻𖽙 𖼍𖽺𖾑 𖼈𖽪𖾑 𖼞𖽪 𖼊𖽪𖾐 𖼍𖽙𖾑 𖼞𖽳𖾐 𖼖𖽺𖾑 𖼄𖽔 𖼮𖽻𖾐．”
59 𖼽𖽻 𖼹𖽦𖾑 𖼠𖽳𖾐 𖼖𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼖𖽻𖾐！”
𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼣𖽙𖾐 𖼞𖽜 𖽃𖽙𖾑 𖼄𖽺 𖼞𖽚 𖼽𖽡𖾐 𖼣𖽻𖾐 𖼀𖽙 𖼊𖽑𖽺 𖼍𖽡𖾑 𖼦𖽑𖽙𖾐 𖼺𖽺．”
60 𖼽𖽺𖾐 𖼺𖽪𖾐 𖼽𖽻 𖼖𖽙𖾐 𖼀𖽦𖾐：“𖼳𖽶𖾐 𖼺𖽪𖾐 𖼷𖽑𖽻𖾐 𖼞𖽜 𖼽𖽻 𖼈𖽳𖾐 𖼞𖽳𖾐 𖼳𖽶𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼍𖽡𖾑 𖼽𖽡𖾐 𖼍𖽳𖾐，𖼐𖽑𖽡𖾐 𖼽𖽡𖾐 𖽂𖽙 𖼺𖽙𖾐 𖼂𖽙𖾐 𖼠𖽚 𖼞𖽳𖾐 𖼄𖽢 𖼮𖽑𖽡𖽪 𖼦𖽑𖽺 𖼽𖽡𖾐 𖼍𖽺𖾑 𖼻𖽻𖾐．”
61 𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼊𖽑𖽡 𖼽𖽚𖾐 𖼀𖽦𖾐：“𖼺𖽡 𖼀𖽑𖽙！ 𖼣𖽙𖾐 𖼐𖽑𖽡𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼽𖽡𖾐 𖼊𖽻𖾐，𖼦𖽑𖽻𖾐 𖼊𖽑𖽻𖾐 𖼣𖽙𖾐 𖼞𖽜 𖽃𖽙𖾑 𖼄𖽺 𖼞𖽚 𖼽𖽡𖾐 𖼣𖽙𖾐 𖽃𖽔𖾑 𖼞𖽑𖽶𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼀𖽦𖾐 𖼦𖽑𖽙𖾐 𖼺𖽺．”
62 𖼽𖽺𖾐 𖼺𖽪𖾐 𖼽𖽻 𖼖𖽙𖾐 𖼀𖽦𖾐：“𖼺𖽧𖾐 𖼞𖽚 𖼈𖽶 𖼄𖽳𖾑 𖼰𖽻 𖼍𖽳𖾐，𖼀𖽑𖽚𖾐 𖼠𖽙𖾑 𖼍𖽻𖾐 𖼐𖽦𖾐 𖼺𖽪𖾐 𖼷𖽑𖽻𖾐，𖽂𖽙 𖼺𖽙𖾐 𖼂𖽙𖾐 𖼠𖽚 𖼞𖽑𖽶𖾐 𖼊𖽡 𖼽𖽡𖾐 𖼄𖽔 𖼽𖽻．”