𖼷𖽻𖾐 𖼺𖽪𖾐 𖼳𖽶 𖼷𖽑𖽡𖾐 𖼽𖽚𖾐 𖼊𖽑𖽺 𖼹𖽡𖾐 𖼊𖽑𖽧 𖼽𖽡𖾐
10
1 𖼄𖽡𖽻 𖼦𖽑𖽺𖾑 𖼹𖽻𖾐 𖼠𖽙𖾑 𖼍𖽻𖾐，𖼺𖽡 𖼀𖽑𖽙 𖼽𖽻 𖼞𖽳𖾐 𖼷𖽻𖾐 𖼺𖽪𖾐 𖼠𖽳𖾐 𖼖𖽪𖾐 𖼳𖽶 𖼷𖽑𖽡𖾐 𖼽𖽚𖾐 \fr 10．1 \ft “𖼳𖽶 𖼷𖽑𖽡𖾐 𖼐𖽑𖽡 𖼽𖽚𖾐 ” 𖼀𖽦𖾐 𖼺𖽪𖾐 𖼖𖽺𖾑 𖼮𖽻𖾐． 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐，𖼽𖽻 𖼈𖽳𖾐 𖼞𖽜 𖼐𖽑𖽡 𖼽𖽚𖾐 𖼐𖽑𖽡 𖼽𖽚𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖽃𖽙𖾑 𖼄𖽺 𖼽𖽡𖾐，𖼹𖽡𖾐 𖼺𖽺𖾑 𖼽𖽻 𖼽𖽡𖾐 𖼊𖽻𖾐 𖼞𖽳𖾐 𖼞𖽑𖽙𖾐 𖼣𖽻𖾐 𖼖𖽪𖾐 𖼐𖽺𖾐 𖼮𖽑𖽡𖽦𖾐 𖼠𖽻𖾐 𖼽𖽡𖾐． 2 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼠𖽜𖾐 𖼖𖽡𖾐 𖼺𖽪𖾐 𖼖𖽚𖾑 𖼄𖽚 𖼄𖽨，𖼄𖽡𖽻 𖼄𖽪𖾐 𖼺𖽪𖾐 𖼷𖽑𖽻𖾐 𖼣𖽻𖾐 𖼐𖽑𖽡𖽪𖾑．𖽃𖽔𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼖𖽚𖾑 𖼄𖽚 𖼺𖽡 𖼀𖽑𖽙 𖼊𖽑𖽺 𖼮𖽑𖽡 𖼮𖽡𖽺𖾐，𖼽𖽻 𖼞𖽜 𖼄𖽡𖽻 𖼄𖽪𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼹𖽡𖾐 𖼊𖽚𖾐 𖼽𖽡𖾐，𖼽𖽻 𖼞𖽳𖾐 𖼖𖽚𖾑 𖼄𖽚 𖼊𖽑𖽺 𖼠𖽜𖾐 𖼽𖽡𖾐 𖼖𖽡𖾐． 3 𖼐𖽑𖽡𖾐 𖼈𖽳𖾐 𖼽𖽡𖾐 𖼻𖽻𖾐！ 𖼺𖽝𖾑 𖼖𖽡𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼹𖽡𖾐 𖼊𖽚𖾐 𖼽𖽡𖾐，𖼦𖽑𖽺𖾑 𖼽𖽻𖾐 𖼻𖽙 𖼐𖽑𖽡𖾑 𖼍𖽳𖾐 𖼖𖽳𖾐 𖼷𖽪𖾐 𖼞𖽑𖽶𖾐 𖼊𖽡 𖼽𖽡𖾐 𖼖𖽙𖾐 𖼺𖽶𖾑． 4 𖼐𖽑𖽡𖾐 𖼈𖽳𖾐 𖼮𖽡 𖼀𖽑𖽡𖾐 𖼊𖽑𖽔 𖼀𖽶，𖼀𖽶 𖼖𖽧𖾑 𖼊𖽑𖽔 𖼀𖽶，𖼮𖽑𖽡𖾑 𖼐𖽴𖾐 𖼊𖽑𖽔 𖼀𖽶，𖼮𖽨𖾐 𖼄𖽙𖾐 𖼊𖽑𖽺 𖼷𖽑𖽻𖾐 𖼖𖽙𖾐 ‘ 𖼺𖽙𖾑 𖼺𖽙𖾐 𖼮𖽻𖾐 𖼮𖽻𖾐 ’ 𖼊𖽻 𖼐𖽙𖾐 𖼍𖽻𖾐 𖼞𖽙𖾐 𖼖𖽺𖾑 𖼄𖽔 𖼻𖽻𖾐．5 𖽃𖽔 𖼊𖽺𖾑 𖼈𖽴 𖼞𖽳𖾐 𖼊𖽡 𖼽𖽡𖾐 𖼣𖽻𖾐 𖼦𖽻，𖽃𖽙𖾑 𖼄𖽺 𖼦𖽑𖽺𖾑 𖼻𖽻𖾐 𖼀𖽦𖾐 𖼖𖽡𖾐：‘ 𖼺𖽡 𖼀𖽑𖽙 𖼦𖽑𖽺𖾑 𖼊𖽑𖽡 𖼈𖽴 𖼊𖽑𖽺 𖼺𖽙𖾑 𖼺𖽙𖾐 𖼄𖽻𖾑 𖼞𖽜！ ’ 6 𖼞𖽑𖽶𖾑 𖼈𖽴 𖼠𖽻𖾐 𖼞𖽑𖽶𖾐 𖼺𖽙𖾑 𖼺𖽙𖾐 𖽂𖽙𖾐 𖼷𖽻 𖼺𖽪𖾐 𖼷𖽑𖽻𖾐 𖼮𖽻𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼦𖽙𖾐 𖼺𖽪𖾐 𖼺𖽙𖾑 𖼺𖽙𖾐，𖼷𖽑𖽜𖾑 𖼷𖽑𖽜𖾐 𖼞𖽑𖽶𖾑 𖼈𖽴 𖼊𖽑𖽺 𖼞𖽜 𖼊𖽻𖾐；𖼄𖽔 𖼮𖽻𖾐 𖼊𖽑𖽡𖾑 𖼣𖽻𖾐，𖼺𖽙𖾑 𖼺𖽙𖾐 𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼊𖽻𖾐． 7 𖽃𖽔 𖼊𖽺𖾑 𖼈𖽴 𖼐𖽑𖽡𖾐 𖼈𖽳𖾐 𖼊𖽑𖽺 𖼷𖽶𖾐 𖼦𖽶𖾐，𖼐𖽑𖽡𖾐 𖼈𖽳𖾐 𖼞𖽑𖽶𖾑 𖼈𖽴 𖼞𖽳𖾐 𖼮𖽻𖾐 𖼖𖽡𖾐，𖼦𖽑𖽺𖾑 𖼈𖽴 𖼞𖽳𖾐 𖼮𖽑𖽻𖾐 𖼂𖽻𖾐 𖼞𖽑𖽶𖾑 𖼈𖽴 𖼞𖽳𖾐 𖼽𖽡𖾐 𖼊𖽑𖽔 𖼂𖽺𖾐．𖼄𖽡𖽻 𖼄𖽪𖾐 𖼺𖽪𖾐 𖽂𖽙 𖼀𖽑𖽶 𖽂𖽙𖾐，𖼞𖽑𖽶𖾑 𖽂𖽙𖾐 𖼷𖽻 𖼳𖽶 𖼣𖽻𖾐，𖼐𖽑𖽡𖾐 𖼈𖽳𖾐 𖼞𖽑𖽶𖾑 𖼈𖽴 𖼞𖽑𖽙𖾐 𖼞𖽜 𖼺𖽪𖾐 𖼷𖽙 𖼊𖽪𖾐 𖼊𖽑𖽺 𖼷𖽙 𖼊𖽻𖾐 𖼮𖽑𖽳𖾐！
8 𖼖𖽪𖾐 𖽃𖽔 𖼊𖽺𖾑 𖼊𖽝𖾐 𖼞𖽑𖽶𖾐 𖼊𖽡 𖼽𖽡𖾐 𖼣𖽻𖾐 𖼦𖽻，𖼷𖽑𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼷𖽶𖾐 𖼦𖽶𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖽃𖽔 𖼊𖽺𖾑 𖼳𖽶 𖼂𖽺𖾐 𖼍𖽙𖾑，𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾑 𖼳𖽶 𖼷𖽙 𖼍𖽺𖾑 𖼻𖽻𖾐． 9 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼊𖽑𖽺 𖼐𖽙𖾐 𖼞𖽪𖾐 𖼖𖽡𖾐，𖼷𖽑𖽻𖾐 𖼊𖽑𖽺 𖼀𖽦𖾐 𖼊𖽑𖽧 𖼖𖽡𖾐：‘ 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼐𖽑𖽡𖾐 𖼈𖽳𖾐 𖼖𖽙𖾐 𖼐𖽳 𖼖𖽻𖾐 𖼦𖽑𖽻𖾐！ ’ 10 𖼖𖽪𖾐 𖽃𖽔 𖼊𖽺𖾑 𖼊𖽝𖾐 𖼞𖽑𖽶𖾐 𖼊𖽡 𖼽𖽡𖾐 𖼣𖽻𖾐 𖼦𖽻，𖼷𖽑𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼷𖽶𖾐 𖼄𖽔 𖼦𖽶𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼊𖽚𖾐 𖼖𖽻𖾐 𖼈𖽳𖾐 𖼮𖽶𖾐 𖼊𖽑𖽺 𖼽𖽡𖾐 𖼺𖽺𖾑，𖼦𖽑𖽺𖾑 𖼻𖽻𖾐 𖼀𖽦𖾐 𖼖𖽡𖾐： 11 ‘ 𖼐𖽑𖽡𖾐 𖼈𖽳𖾐 𖼖𖽪𖾐 𖼞𖽑𖽶𖾐 𖼞𖽳𖾐 𖼐𖽑𖽡𖾑 𖼄𖽶𖾐，𖼣𖽙𖾐 𖼈𖽳𖾐 𖼮𖽑𖽡𖾑 𖼀𖽑𖽦𖾐 𖼊𖽑𖽺 𖼊𖽴 𖼺𖽪𖾐 𖼖𖽺𖾑，𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼊𖽑𖽙𖾐 𖼦𖽑𖽙𖾐 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼺𖽝𖾑 𖼖𖽡𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼐𖽳 𖼖𖽻𖾐 𖼦𖽑𖽻𖾐！’ 12 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼳𖽶 𖼊𖽻 𖼐𖽙𖾐 𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼖𖽪𖾐 𖼞𖽑𖽶𖾑 𖼊𖽝𖾐 𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼈𖽡𖾑 𖼞𖽑𖽙，𖼞𖽑𖽶𖾑 𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼦𖽶𖾑 𖼄𖽔 𖼷𖽑𖽶𖾐 𖼈𖽳 𖼊𖽻𖾐．”
𖼊𖽡 𖼮𖽑𖽻 𖼀𖽑𖽚𖾐 𖼄𖽔 𖼦𖽶𖾐 𖼺𖽪𖾐 𖼖𖽪𖾐 𖼊𖽑𖽺 𖼦𖽑𖽳𖾐 𖼄𖽳𖾐 (𖼊𖽑𖽹𖾑 11：20-20)
13 𖼽𖽺𖾐 𖼺𖽪𖾐 𖼀𖽦𖾐：“𖼠𖽜𖾐 𖼖𖽔𖾐 𖼳𖽲𖾑 𖼖𖽪𖾐 𖽃𖽔𖾐！ 𖼐𖽑𖽡𖾐 𖼈𖽡𖾑 𖼞𖽑𖽙 𖼮𖽻𖾐 𖼊𖽻𖾐．𖼂𖽚 𖼺𖽦𖾑 𖼍𖽕𖾑 𖼖𖽪𖾐 𖽃𖽔𖾐！ 𖼐𖽑𖽡𖾐 𖼈𖽡𖾑 𖼞𖽑𖽙 𖼮𖽻𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼞𖽑𖽙𖾐 𖼂𖽺𖾐 𖼺𖽪𖾐 𖼺𖽡𖾐 𖼂𖽺𖾐 𖼊𖽪𖾐，𖼣𖽙𖾐 𖼂𖽺𖾐 𖼺𖽺𖾑 𖼊𖽑𖽪𖽺𖾐 𖼖𖽚 𖼖𖽪𖾐 𖼐𖽺𖾐 𖼳𖽡𖾐 𖼍𖽪𖽺𖾑 𖼖𖽪𖾐 𖼞𖽳𖾐 𖼍𖽙𖾑 𖼊𖽑𖽡𖾑 𖼣𖽻𖾐，𖼽𖽻 𖼈𖽳𖾐 𖼐𖽦 𖼄𖽙𖾐 𖼹𖽦𖾐 𖼽𖽦 𖼄𖽳𖾐 𖼞𖽙、 𖼞𖽑𖽪 𖼖𖽪𖾐 𖼀𖽑𖽶𖾐，𖼄𖽡𖾐 𖼐𖽦𖾐 𖼀𖽙 𖼊𖽡𖾐 𖼺𖽺𖾑，𖼊𖽡 𖼮𖽑𖽻 𖼀𖽑𖽚𖾐 𖼦𖽑𖽙𖾐 𖼊𖽻𖾐． 14 𖼳𖽶 𖼊𖽻 𖼐𖽙𖾐 𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼈𖽡𖾑 𖼞𖽑𖽙，𖼊𖽑𖽪𖽺𖾐 𖼖𖽚 𖼖𖽪𖾐 𖼐𖽺𖾐 𖼳𖽡𖾐 𖼍𖽪𖽺𖾑 𖼖𖽪𖾐 𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼦𖽶𖾑 𖼄𖽔 𖼷𖽑𖽶𖾐 𖼈𖽳 𖼊𖽻𖾐． 15 𖼰𖽡𖽔𖾐 𖼂𖽦 𖼐𖽚 𖼖𖽪𖾐 𖽃𖽔𖾐！ 𖼐𖽑𖽡𖾐 𖼞𖽜 𖼄𖽶 𖼠𖽻𖾐 𖽂𖽙𖾐 𖼊𖽦𖾐 𖼽𖽡𖾐 𖼊𖽻𖾐 𖼊𖽡 𖼮𖽑𖽻 𖼖𖽔？𖼐𖽑𖽡𖾐 𖼊𖽑𖽺 𖼊𖽜 𖼳𖽶𖾐 𖼷𖽪𖾐 𖼄𖽡𖾐 𖼞𖽑𖽶𖾐 𖼹𖽺𖾐 𖼊𖽻𖾐．”
16 𖼽𖽺𖾐 𖼺𖽪𖾐 𖼦𖽑𖽔𖾐 𖼖𖽺𖾑 𖼽𖽻 𖼷𖽻𖾐 𖼺𖽪𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽑𖽺 𖼊𖽻 𖼮𖽶𖾐 𖼮𖽻𖾑 𖼊𖽴 𖼺𖽪𖾐 𖼷𖽑𖽻𖾐，𖼞𖽑𖽶𖾑 𖼣𖽙𖾐 𖼊𖽑𖽺 𖼊𖽻 𖼮𖽶𖾐 𖼮𖽻𖾑 𖼊𖽴 𖼺𖽪𖾐 𖼣𖽻𖾐；𖼐𖽑𖽡𖾐 𖼈𖽳𖾐 𖼊𖽑𖽺 𖼷𖽴𖾐 𖼦𖽑𖽙𖾐 𖼺𖽪𖾐 𖼷𖽑𖽻𖾐，𖼞𖽑𖽶𖾑 𖼣𖽙𖾐 𖼊𖽑𖽺 𖼷𖽴𖾐 𖼦𖽑𖽙𖾐 𖼺𖽪𖾐 𖼣𖽻𖾐；𖼣𖽙𖾐 𖼊𖽑𖽺 𖼷𖽴𖾐 𖼦𖽑𖽙𖾐 𖼺𖽪𖾐 𖼷𖽑𖽻𖾐，𖼞𖽑𖽶𖾑 𖼣𖽙𖾐 𖼊𖽑𖽺 𖼹𖽡𖾐 𖼂𖽻𖾐 𖼖𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼷𖽴𖾐 𖼦𖽑𖽙𖾐 𖼺𖽪𖾐 𖼣𖽻𖾐．”
𖼷𖽻𖾐 𖼺𖽪𖾐 𖼞𖽑𖽶𖾑 𖼳𖽶 𖼷𖽑𖽡𖾐 𖼽𖽚𖾐 𖼞𖽚 𖼖𖽻𖾐
17 𖼠𖽙𖾑 𖼍𖽻𖾐，𖼷𖽻𖾐 𖼺𖽪𖾐 𖼞𖽑𖽶𖾑 𖼳𖽶 𖼷𖽑𖽡𖾐 𖼽𖽚𖾐 𖼖𖽺𖾑 𖼖𖽺𖾑 𖼺𖽪𖾐 𖼺𖽪𖾐 𖼞𖽚 𖼖𖽻𖾐，𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼐𖽑𖽡𖾐 𖼄𖽡𖾐 𖼖𖽙𖾐 𖼀𖽙𖾐 𖼺𖽺𖾑，𖼐𖽺 𖼖𖽺𖾑 𖼣𖽙𖾐 𖼈𖽳𖾐 𖼀𖽦𖾐 𖼖𖽙𖾐 𖼮𖽻𖾑 𖼊𖽴 𖼦𖽑𖽻𖾐．”
18 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖼐𖽦𖾐 𖼄𖽡𖽻𖾐，𖼺𖽔 𖼍𖽗𖾑 𖽃𖽔𖾑 𖼄𖽶 𖼀𖽢 𖼖𖽙𖾐 𖼺𖽶𖾑，𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼮𖽑𖽙 𖼹𖽺𖾐 𖼖𖽻𖾐 𖼦𖽑𖽙𖾐． 19 𖼐𖽑𖽡𖾐 𖼈𖽳𖾐 𖼺𖽝𖾑 𖼖𖽡𖾐！ 𖼣𖽙𖾐 𖼷𖽶 𖼊𖽺𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼦𖽑𖽙𖾐，𖼖𖽙𖾐 𖼳𖽳𖾐 𖼐𖽺𖾐 𖼀𖽶 𖼹𖽧𖾐 𖼊𖽑𖽺 𖼐𖽑𖽕𖾐 𖼀𖽑𖽧𖾐 𖼊𖽙𖾐，𖼦𖽑𖽔𖾐 𖼖𖽺𖾑 𖼮𖽡𖾐 𖼂𖽦𖾐 𖼞𖽳𖾐 𖽂𖽙 𖼐𖽑𖽡𖾐 𖼄𖽳𖾑 𖼄𖽳 𖼊𖽑𖽺 𖽂𖽙 𖼊𖽙𖾐 𖼦𖽑𖽻𖾐，𖼊𖽑𖽡 𖼳𖽶 𖼖𖽺𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽹𖾑 𖼀𖽑𖽧𖾐 𖼄𖽔 𖼠𖽸𖾑． 20 𖼦𖽑𖽻𖾐 𖼊𖽑𖽻𖾐，𖼐𖽺 𖼐𖽑𖽡𖾐 𖼈𖽳𖾐 𖼀𖽦𖾐 𖼖𖽙𖾐 𖼮𖽻𖾑 𖼊𖽴 𖼦𖽑𖽻𖾐 𖼖𖽙𖾐 𖼀𖽙𖾐 𖼖𖽺𖾑 𖼄𖽔 𖼻𖽻𖾐，𖼐𖽑𖽡𖾐 𖼈𖽳𖾐 𖼄𖽡𖾐 𖽂𖽙𖾐 𖼈𖽝 𖼄𖽶 𖼠𖽻𖾐 𖼊𖽑𖽺 𖼍𖽙𖾑 𖼰𖽨𖾑 𖽂𖽙𖾐 𖼖𖽙𖾐 𖼀𖽙𖾐 𖼺𖽺𖾑 𖼖𖽺𖾑 𖼖𖽡𖾐．”
𖼽𖽺𖾐 𖼺𖽪𖾐 𖼞𖽜𖾐 𖼺𖽜𖾐(𖼊𖽑𖽹𖾑 11：25-27；13：16-17 )
21 𖼞𖽑𖽶𖾑 𖼊𖽑𖽡 𖼠𖽸𖾑，𖼽𖽺𖾐 𖼺𖽪𖾐 𖼳𖽨𖾐 𖼹𖽳𖾐 𖼞𖽕 𖼍𖽪𖾐 𖽂𖽙𖾐 𖼺𖽺𖾑，𖼖𖽺𖾑 𖼞𖽜𖾐 𖼺𖽜𖾐，𖼀𖽦𖾐：“𖽃𖽔 𖼀𖽙 𖽃𖽔𖾐！ 𖼄𖽶 𖼠𖽻𖾐 𖼄𖽡𖾑 𖼐𖽦𖾐 𖼞𖽳𖾐 𖼺𖽡 𖼀𖽑𖽙，𖼣𖽙𖾐 𖼐𖽑𖽡𖾐 𖼊𖽑𖽺 𖼞𖽪𖾐 𖼮𖽑𖽳！ 𖼞𖽪𖾐 𖼮𖽡𖽺𖾐，𖼄𖽡𖽻 𖼦𖽑𖽺𖾑 𖼹𖽻𖾐 𖼈𖽪𖾐 𖼺𖽝𖾑 𖼐𖽺𖾐 𖼺𖽡𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼐𖽑𖽡𖾐 𖼰𖽳𖾐 𖼍𖽡，𖼞𖽚 𖼀𖽑𖽚𖾐 𖽃𖽔𖾐 𖼞𖽶𖾑 𖼞𖽜 𖽂𖽙𖾐 𖼺𖽝𖾑 𖼄𖽡𖾐 𖼀𖽻𖾐 𖼊𖽑𖽧 𖼖𖽻𖾐．𖽃𖽔 𖼀𖽙 𖽃𖽔𖾐！ 𖼠𖽕𖾐 𖼰𖽶𖾐 𖼦𖽑𖽺𖾑 𖼻𖽻𖾐 𖼣𖽻𖾐 𖼮𖽶𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼞𖽑𖽙𖾐 𖼐𖽑𖽧𖾐 𖼺𖽳 𖼺𖽪𖾐 𖼦𖽑𖽺𖾑 𖼣𖽻𖾐．
22 𖼞𖽑𖽙𖾐 𖼣𖽻𖾐 𖼳𖽶 𖼣𖽻𖾐 𖼀𖽙 𖼀𖽑𖽨 𖼣𖽙𖾐 𖼊𖽑𖽺 𖼞𖽜 𖼦𖽑𖽻𖾐．𖼀𖽑𖽙 𖼹𖽳𖾐 𖼄𖽔 𖼣𖽻𖾐，𖼻𖽙 𖼹𖽳𖾐 𖼊𖽑𖽺 𖼺𖽝𖾑 𖼺𖽪𖾐 𖼄𖽔 𖼮𖽻𖾐；𖼻𖽙 𖼹𖽳𖾐 𖼐𖽺𖾐 𖼻𖽙 𖼹𖽳𖾐 𖼐𖽑𖽧𖾐 𖼺𖽳 𖼀𖽑𖽪𖾐 𖼄𖽪𖾑 𖼺𖽪𖾐 𖼄𖽔 𖼣𖽻𖾐，𖼀𖽑𖽙 𖼹𖽳𖾐 𖼊𖽑𖽺 𖼺𖽝𖾑 𖼺𖽪𖾐 𖼖𖽺𖾑 𖼄𖽔 𖼮𖽻𖾐．”
23 𖼽𖽺𖾐 𖼺𖽪𖾐 𖼰𖽻𖾐 𖼀𖽑𖽚𖾐 𖼞𖽚 𖼖𖽻𖾐，𖼞𖽑𖽶𖾐 𖼞𖽑𖽶𖾐 𖼽𖽻 𖼷𖽻𖾐 𖼺𖽪𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼐𖽦𖾐 𖼄𖽡𖽻𖾐 𖼳𖽶 𖼊𖽑𖽺 𖽂𖽙𖾐 𖼐𖽦𖾐 𖼄𖽡𖽻𖾐 𖼺𖽪𖾐 𖼷𖽑𖽻𖾐 𖼄𖽢 𖼮𖽻𖾐 𖼳𖽶 𖼣𖽻𖾐． 24 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖽃𖽙𖾑 𖼄𖽺 𖼺𖽡𖾐 𖼻𖽙 𖼐𖽺𖾐 𖼈𖽪𖾐 𖼍𖽦，𖼞𖽑𖽙 𖼄𖽙𖾐 𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼐𖽦𖾐 𖼄𖽡𖽻𖾐 𖼳𖽶 𖼊𖽑𖽺 𖽂𖽙𖾐 𖼐𖽦𖾐 𖼄𖽡𖽻𖾐 𖼖𖽡𖾐 𖼊𖽡 𖼮𖽑𖽻 𖼊𖽑𖽻𖾐，𖼄𖽔 𖽂𖽙𖾐 𖼐𖽦𖾐 𖼄𖽡𖽻𖾐；𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼊𖽻 𖼮𖽨 𖼳𖽶 𖼊𖽑𖽺 𖽂𖽙𖾐 𖼊𖽻 𖼮𖽨 𖼖𖽡𖾐 𖼊𖽡 𖼮𖽑𖽻 𖼊𖽑𖽻𖾐，𖼄𖽔 𖽂𖽙𖾐 𖼊𖽻 𖼮𖽨．”
𖼺𖽔 𖼄𖽔 𖼖𖽡𖾑 𖼽𖽕𖾑 𖼺𖽪𖾐 𖼷𖽑𖽻𖾐 𖼹𖽳𖾐 𖼍𖽻𖾐 𖼊𖽻
25 𖼳𖽪𖾐 𖼮𖽨𖾐 𖼄𖽪𖾑 𖼰𖽪𖾐 𖼊𖽑𖽡 𖼽𖽚𖾐 𖼦𖽑𖽡𖽚 𖼍𖽪𖾐 𖼖𖽻𖾐，𖼽𖽺𖾐 𖼺𖽪𖾐 𖼊𖽑𖽺 𖼮𖽕𖾐 𖼐𖽦𖾐，𖼀𖽦𖾐：“𖼳𖽪𖾑 𖼰𖽪𖾐！ 𖼣𖽙𖾐 𖽃𖽔𖾐 𖼹𖽻𖾐 𖼂𖽺𖾐 𖼺𖽺𖾑，𖼻𖽳𖾐 𖼹𖽦𖾐 𖼈𖽪𖾑 𖼠𖽻𖾐 𖽂𖽙𖾐 𖼊𖽙𖾐？”
26 𖼽𖽺𖾐 𖼺𖽪𖾐 𖼽𖽻 𖼖𖽙𖾐 𖼀𖽦𖾐：“𖼳𖽪𖾐 𖼮𖽨𖾐 𖼺𖽪𖾑 𖼊𖽑𖽺 𖽃𖽔 𖼊𖽺𖾐 𖼈𖽝 𖼺𖽪𖾐 𖼣𖽻𖾐？𖼐𖽑𖽡𖾐 𖽃𖽔 𖼊𖽺𖾐 𖼷𖽻𖾐 𖽂𖽙𖾐 𖼐𖽺𖾑？”
27 𖼽𖽻 𖼊𖽻 𖼞𖽑𖽚 𖼀𖽦𖾐：“𖼐𖽑𖽡𖾐 𖼐𖽑𖽧𖾐 𖼄𖽙𖾐、 𖼈𖽦𖾐 𖼳𖽨𖾐、 𖽂𖽙 𖼐𖽑𖽡𖾐、 𖼊𖽡 𖼮𖽑𖽻，𖼦𖽑𖽻𖾑 𖼦𖽑𖽻𖾐 𖼻𖽜 𖼐𖽑𖽡𖾐 𖼞𖽳𖾐 𖼺𖽡 𖼀𖽑𖽙 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼐𖽙𖾑 𖼣𖽜 𖼖𖽡𖾐；𖼦𖽑𖽔𖾐 𖼖𖽺𖾑 𖼽𖽻 𖼄𖽳𖾑 𖼽𖽻 𖼊𖽑𖽺 𖼮𖽨 𖼖𖽙𖾐 𖼺𖽶𖾑，𖼐𖽑𖽡𖾐 𖼞𖽳𖾐 𖼮𖽑𖽡𖽦𖾐 𖼮𖽑𖽻 𖼐𖽳 𖼦𖽙𖾐 𖼊𖽑𖽺 𖼮𖽨 𖼖𖽡𖾐．”
28 𖼽𖽺𖾐 𖼺𖽪𖾐 𖼀𖽦𖾐：“𖼐𖽑𖽡𖾐 𖼊𖽻 𖼞𖽑𖽚 𖼺𖽪𖾐 𖼦𖽙𖾑 𖼍𖽳𖾐，𖼐𖽑𖽡𖾐 𖼦𖽑𖽺𖾑 𖼻𖽻𖾐 𖼂𖽺𖾐，𖼷𖽑𖽜𖾑 𖼷𖽑𖽜𖾐 𖼻𖽳𖾐 𖼹𖽦𖾐 𖼈𖽪𖾑 𖼠𖽻𖾐 𖽂𖽙𖾐 𖼊𖽻𖾐．”
29 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼽𖽻 𖼦𖽙𖾑 𖼦𖽑𖽻𖾐 𖼐𖽺𖾐 𖼀𖽦𖾐 𖼺𖽙𖾐 𖼊𖽑𖽺 𖼊𖽑𖽧 𖼊𖽡 𖼮𖽑𖽻 𖼺𖽺𖾑，𖼽𖽺𖾐 𖼺𖽪𖾐 𖼖𖽙𖾐 𖼀𖽦𖾐：“𖽃𖽔 𖼺𖽺 𖼣𖽙𖾐 𖼮𖽑𖽡𖽦𖾐 𖼮𖽑𖽻 𖼐𖽳 𖼦𖽙𖾐 𖼣𖽻𖾐 𖼐𖽺𖾑？”
30 𖼽𖽺𖾐 𖼺𖽪𖾐 𖼊𖽻 𖼞𖽑𖽚 𖼀𖽦𖾐：“𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐，𖼽𖽻 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽻𖾐 𖼹𖽺𖾐 𖼽𖽡𖾐 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼽𖽡𖾐，𖼮𖽨𖾐 𖼄𖽙𖾐 𖼊𖽑𖽺 𖼷𖽝𖾐 𖼀𖽑𖽙 𖼖𖽦 𖼀𖽑𖽦𖾐 𖼞𖽑𖽶𖾐 𖼠𖽻𖾐 𖼰𖽡𖽳𖾐，𖼽𖽻 𖼈𖽳𖾐 𖼽𖽻 𖼀𖽑𖽡𖽻𖾐 𖼷𖽑𖽶 𖼖𖽧 𖼦𖽑𖽙𖾐，𖼄𖽔 𖼳𖽶𖾐 𖼄𖽔 𖼠𖽻𖾐 𖼖𖽻𖾐 𖼊𖽝，𖼦𖽑𖽻 𖼞𖽑𖽻𖾑 𖼍𖽙𖾑 𖼍𖽧𖾑 𖼺𖽺𖾑 𖼽𖽡𖾐 𖼦𖽑𖽙𖾐．
31 𖼊𖽺𖾐 𖼊𖽺𖾐 𖼍𖽡𖾐 𖼄𖽻 𖼊𖽑𖽡 𖼽𖽚𖾐 𖼮𖽨𖾐 𖼄𖽙𖾐 𖼞𖽑𖽶𖾑 𖼰𖽴𖾐 𖼊𖽑𖽺 𖼮𖽑𖽻𖾐 𖼹𖽺𖾐 𖼖𖽻𖾐，𖼽𖽻 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼰𖽻𖾐 𖼞𖽑𖽶𖾑 𖼀𖽳 𖼮𖽑𖽻𖾐 𖼠𖽚 𖼽𖽡𖾐 𖼦𖽑𖽙𖾐． 32 𖼹𖽦𖾑 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽻𖾐 𖼞𖽑𖽻𖾑 𖼮𖽑𖽡𖾐，𖼽𖽻 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼦𖽑𖽔𖾐 𖼖𖽺𖾑 𖼞𖽑𖽶𖾑 𖼖𖽙𖾐 𖼺𖽶𖾑 𖼰𖽻𖾐 𖼞𖽑𖽶𖾑 𖼀𖽳 𖼮𖽑𖽻𖾐 𖼠𖽚 𖼽𖽡𖾐 𖼦𖽑𖽙𖾐．
33 𖼺𖽔 𖼄𖽔 𖼖𖽡𖾑 𖼽𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼍𖽺𖾑 𖼮𖽨𖾐 𖼠𖽚 𖼞𖽑𖽻𖾑 𖼮𖽑𖽡𖾐 𖼖𖽻𖾐，𖼽𖽻 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼐𖽑𖽧𖾐 𖼮𖽡𖽻𖾐 𖼍𖽪𖾐 𖼖𖽻𖾐， 34 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼽𖽡𖾐，𖼵𖽶𖾐 𖼈𖽡𖾐 𖼐𖽺𖾐 𖼮𖽶𖾐 𖼀𖽳 𖼐𖽑𖽡𖾑 𖼽𖽻 𖼮𖽑𖽡𖽦 𖼊𖽪 𖼊𖽑𖽺 𖼄𖽺𖾑，𖼹𖽳𖾐 𖼄𖽙𖾐 𖼖𖽧𖾐 𖼍𖽡 𖼦𖽑𖽻𖾐，𖼰𖽻 𖼊𖽑𖽳 𖼖𖽳𖾐 𖼄𖽪 𖼊𖽑𖽺 𖼹𖽳𖾑 𖼺𖽺𖾑，𖼦𖽳 𖼺𖽙𖾐 𖼈𖽡𖾐 𖼦𖽑𖽺𖾐 𖼞𖽑𖽶𖾐 𖼽𖽡𖾐 𖼠𖽙𖾐 𖼳𖽙𖾐． 35 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐，𖼀𖽑𖽨𖾐 𖼀𖽑𖽡 𖼐𖽑𖽡 𖼊𖽝𖾐 𖼈𖽺𖾐 𖼺𖽙𖾐 𖼈𖽡𖾐 𖼦𖽑𖽺𖾐 𖼺𖽡 𖼀𖽑𖽙 𖼊𖽑𖽺 𖼞𖽜，𖼀𖽦𖾐：‘ 𖼐𖽑𖽡𖾐 𖼽𖽻 𖼊𖽑𖽺 𖼠𖽙𖾐 𖼳𖽙𖾐 𖼞𖽜，𖼻𖽜 𖼄𖽔 𖼖𖽚 𖼺𖽪𖾐，𖼣𖽙𖾐 𖼀𖽑𖽚𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼊𖽑𖽺 𖼞𖽑𖽚 𖼞𖽜 𖼊𖽻𖾐．’”
36 𖼽𖽺𖾐 𖼺𖽪𖾐 𖼳𖽪𖾐 𖼮𖽨𖾐 𖼄𖽪𖾑 𖼰𖽪𖾐 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼀𖽦𖾐，𖼷𖽝𖾐 𖼀𖽑𖽙 𖼖𖽦 𖼀𖽑𖽦𖾐 𖼞𖽑𖽶𖾐 𖼠𖽻𖾐 𖼰𖽡𖽳𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽑𖽡𖽦𖾐 𖼮𖽑𖽻𖾐 𖼐𖽳 𖼦𖽙𖾐，𖼞𖽑𖽶𖾑 𖼽𖽻 𖼈𖽳𖾐 𖼺𖽙𖾐 𖼽𖽚𖾐 𖼠𖽻𖾐 𖼊𖽑𖽺 𖽃𖽔 𖼺𖽺 𖼣𖽻𖾐 𖼐𖽺𖾑？”
37 𖼳𖽪𖾐 𖼮𖽨𖾐 𖼄𖽪𖾑 𖼰𖽪𖾐 𖼊𖽻 𖼞𖽑𖽚：“𖼽𖽻 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼞𖽜 𖼺𖽪𖾐 𖼞𖽑𖽶𖾑 𖼽𖽚𖾐 𖼣𖽻𖾐！”
𖼽𖽺𖾐 𖼺𖽪𖾐 𖼀𖽦𖾐：“𖼐𖽑𖽡𖾐 𖼽𖽡𖾐，𖼦𖽑𖽺𖾑 𖼻𖽻𖾐 𖼂𖽺𖾐 𖼽𖽡𖾐！”
𖼄𖽔 𖼍𖽕𖾑 𖼐𖽺𖾐 𖼄𖽔 𖼖𖽡𖾑 𖼽𖽕𖾑 𖼞𖽪𖾐 𖼮𖽡𖽺𖾐
38 𖼽𖽺𖾐 𖼺𖽪𖾐 𖼐𖽺𖾐 𖼷𖽻𖾐 𖼺𖽪𖾐 𖼦𖽑𖽔𖾐 𖼖𖽺𖾑 𖼮𖽨𖾐 𖼺𖽜，𖼽𖽡𖾐 𖼮𖽑𖽡𖽦𖾐 𖼠𖽻𖾐 𖼊𖽑𖽡 𖼊𖽝𖾐 𖼞𖽑𖽶𖾐 𖼮𖽑𖽡𖾐．𖼮𖽑𖽡𖽦𖾐 𖼠𖽻𖾐 𖼞𖽑𖽶𖾐 𖼻𖽙 𖼄𖽳 𖼊𖽑𖽡 𖼽𖽚𖾐 𖼮𖽻𖾐，𖼄𖽔 𖼍𖽕𖾑 𖼄𖽡𖾐，𖼽𖽺𖾐 𖼺𖽪𖾐 𖼊𖽑𖽺 𖽃𖽶𖾐 𖼽𖽻 𖽃𖽔𖾑 𖼞𖽑𖽶𖾐 𖼽𖽡𖾐． 39 𖼽𖽻 𖼐𖽑𖽳𖾐 𖼄𖽙𖾐 𖼊𖽑𖽡 𖼽𖽚𖾐 𖼮𖽻𖾐，𖼄𖽔 𖼖𖽡𖾑 𖼽𖽕𖾑 𖼄𖽡𖾐，𖼽𖽺𖾐 𖼺𖽪𖾐 𖼞𖽳𖾐 𖼮𖽑𖽡𖾑 𖼀𖽑𖽦𖾐 𖼀𖽙 𖼮𖽑𖽶𖾐 𖼊𖽡𖾐 𖼺𖽺𖾑，𖼽𖽻 𖼄𖽪𖾑 𖼊𖽻 𖼊𖽑𖽺 𖼊𖽻 𖼐𖽙𖾐． 40 𖼄𖽔 𖼍𖽕𖾑 𖼠𖽙𖾐 𖼳𖽙𖾐 𖼖𖽡𖾐 𖼞𖽳𖾐 𖼄𖽡𖽻 𖼄𖽨，𖼐𖽑𖽧𖾐 𖼷𖽸𖾐 𖼠𖽻𖾐 𖼄𖽺 𖼺𖽺𖾑，𖼽𖽺𖾐 𖼺𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐，𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼣𖽙𖾐 𖼍𖽺𖾑 𖼦𖽑𖽻𖾑 𖼠𖽙𖾐 𖼳𖽙𖾐，𖼣𖽙𖾐 𖼐𖽑𖽳𖾐 𖼄𖽙𖾐 𖼣𖽙𖾐 𖼖𖽙𖾐 𖼄𖽔 𖼂𖽻𖾐，𖼐𖽑𖽡𖾐 𖼄𖽔 𖼄𖽡𖽻𖾐 𖼖𖽔？𖼽𖽻 𖼊𖽑𖽺 𖼀𖽦𖾐 𖼣𖽙𖾐 𖼖𖽙𖾐 𖼂𖽻𖾐 𖼞𖽜 𖼖𖽻𖾐！”