𖼽𖽺𖾐 𖼺𖽪𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐
8
1 𖼞𖽑𖽙 𖼄𖽙𖾐 𖼐𖽑𖽡𖾐 𖼄𖽔 𖼠𖽚 𖼺𖽺，𖼽𖽺𖾐 𖼺𖽪𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼖𖽪𖾐 𖼐𖽺𖾐 𖼮𖽑𖽡𖽦𖾐 𖼠𖽻𖾐 𖼺𖽜 𖼮𖽨𖾐，𖽂𖽙 𖼺𖽙𖾐 𖼂𖽙𖾐 𖼠𖽚 𖼞𖽳𖾐 𖼄𖽢 𖼮𖽑𖽡𖽪 𖼦𖽑𖽺．𖼹𖽡𖾐 𖼺𖽪𖾐 𖼷𖽑𖽡𖾐 𖼐𖽑𖽡 𖼽𖽚𖾐 𖼽𖽻 𖼖𖽙𖾐 𖼮𖽑𖽻𖾐 𖼽𖽡𖾐， 2 𖼦𖽑𖽔𖾐 𖼖𖽺𖾑 𖽃𖽙𖾑 𖼄𖽺 𖼊𖽑𖽙 𖼐𖽺 𖼊𖽶𖾐 𖼮𖽑𖽢𖾑 𖼻𖽸、 𖼐𖽙𖾐 𖼊𖽴 𖼮𖽡𖽻𖾐 𖼷𖽚𖾐 𖼺𖽺𖾑，𖽂𖽙𖾐 𖼞𖽪𖾐 𖼞𖽑𖽙 𖼦𖽑𖽻𖾐 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼊𖽑𖽡 𖼹𖽻𖾐 𖼽𖽻 𖼖𖽙𖾐 𖼮𖽑𖽻𖾐 𖼽𖽡𖾐．𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼊𖽑𖽡 𖼽𖽚𖾐 𖼞𖽑𖽶𖾑 𖼄𖽚 𖼍𖽕𖾑 𖼖𖽔𖾐 𖼺𖽪𖾐 𖼄𖽔 𖼖𖽡𖾑 𖼽𖽕𖾑 𖼣𖽻𖾐，𖽃𖽙𖾑 𖼄𖽺 𖼊𖽑𖽙 𖼽𖽺𖾐 𖼺𖽪𖾐 𖼽𖽻 𖼞𖽶𖾐 𖼮𖽑𖽶 𖼊𖽑𖽺 𖼮𖽑𖽻𖾐 𖼐𖽺 𖼳𖽶 𖼊𖽝𖾐 𖼞𖽕 𖼊𖽑𖽧 𖼖𖽻𖾐 𖼦𖽑𖽙𖾐． 3 𖼦𖽑𖽔𖾐 𖼖𖽺𖾑 𖼺𖽪𖾐 𖼺𖽔 𖼐𖽕 𖼐𖽺𖾐 𖼳𖽡𖾐 𖼖𖽲𖾑 𖼈𖽴 𖼞𖽳𖾐 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼞𖽑𖽪 𖼺𖽔 𖼞𖽳𖾐 𖼄𖽳 𖼻𖽙 𖼽𖽱𖾐 𖼽𖽕𖾑 𖼐𖽕 ，𖼹𖽦𖾑 𖼠𖽳𖾐 𖼖𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽙 𖼄𖽙𖾐 𖼖𖽺𖾑 𖼮𖽑𖽻𖾐 𖼽𖽡𖾐．𖼻𖽙 𖼄𖽳 𖼄𖽡𖾐 𖼐𖽜𖾐 𖼦𖽑𖽺𖾑 𖼹𖽻𖾐 𖼽𖽻 𖼄𖽳𖾑 𖼞𖽳𖾐 𖼄𖽡𖽻 𖼐𖽑𖽡 𖼮𖽡 𖼀𖽑𖽡 𖼻𖽜 𖼺𖽺𖾑，𖼄𖽔 𖼐𖽙 𖼄𖽙𖾐 𖼽𖽺𖾐 𖼺𖽪𖾐 𖼐𖽺𖾐 𖼹𖽡𖾐 𖼺𖽪𖾐 𖼊𖽑𖽺 𖼠𖽙𖾐 𖼳𖽙𖾐．𖼳𖽶𖾑 𖼄𖽙𖾐 𖼊𖽻 𖼍𖽻𖾐 𖼊𖽻 ( 𖼊𖽑𖽹𖾑 13：1-9；𖼞𖽑𖽜 1：4-9 )
4 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼊𖽑𖽡 𖼷𖽪𖾐 𖼄𖽙𖾐 𖼻𖽶𖾑 𖼖𖽻𖾐，𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼖𖽪𖾐 𖼞𖽳𖾐 𖼮𖽑𖽻𖾐 𖼽𖽺𖾐 𖼺𖽪𖾐 𖼊𖽑𖽺 𖼄𖽡𖽻𖾐 𖼖𖽻𖾐．𖽃𖽔𖾐 𖼺𖽺𖾑，𖼽𖽺𖾐 𖼺𖽪𖾐 𖼍𖽻𖾐 𖼊𖽻 𖼻𖽜，𖼀𖽦𖾐： 5 “𖼳𖽶𖾑 𖼄𖽙𖾐 𖼊𖽻 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽚𖾐 𖼽𖽡𖾐 𖼳𖽶𖾑 𖼄𖽙𖾐 𖼊𖽻．𖼊𖽻 𖼞𖽑𖽶𖾑 𖼮𖽶𖾐，𖼊𖽑𖽡 𖼹𖽻𖾐 𖼊𖽻 𖼮𖽨𖾐 𖼦𖽜 𖼀𖽜 𖼺𖽪𖾐 𖼮𖽻𖾐，𖼷𖽑𖽻𖾐 𖼮𖽑𖽢𖾑 𖼐𖽑𖽕𖾐 𖼀𖽑𖽧𖾐，𖼦𖽑𖽔𖾐 𖼖𖽺𖾑 𖼄𖽶 𖼖𖽙𖾐 𖼀𖽙 𖼀𖽨𖾐 𖼺𖽪𖾐 𖼣𖽕𖾐 𖼻𖽙 𖼖𖽻𖾐 𖼊𖽻𖾐 𖼞𖽳𖾐 𖼦𖽑𖽙𖾐． 6 𖼊𖽑𖽡 𖼹𖽻𖾐 𖼊𖽻 𖼄𖽡𖾐 𖼰𖽡𖾑 𖼀𖽙 𖼊𖽑𖽺 𖼀𖽜 𖼺𖽪𖾐 𖼮𖽻𖾐，𖼄𖽡𖾐 𖼦𖽡𖽳𖾐 𖽃𖽔𖾐 𖼮𖽡𖽦𖾐 𖼄𖽔 𖼖𖽚，𖼐𖽜 𖼍𖽪𖾐 𖼖𖽻𖾐 𖼍𖽺𖾑 𖼺𖽺 𖼮𖽡𖽪𖾐 𖼦𖽡𖽳𖾐 𖼦𖽑𖽙𖾐． 7 𖼊𖽑𖽡 𖼹𖽻𖾐 𖼊𖽻 𖽃𖽔𖾑 𖼮𖽑𖽪 𖼷𖽑𖽪𖾐 𖼞𖽑𖽶𖾐 𖼀𖽜 𖼺𖽪𖾐 𖼮𖽻𖾐，𖽃𖽔𖾑 𖼮𖽑𖽪 𖼽𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼐𖽜 𖼽𖽚𖾐，𖼽𖽻 𖼊𖽑𖽺 𖼈𖽧𖾐 𖼍𖽡 𖼦𖽑𖽙𖾐． 8 𖼦𖽑𖽔𖾐 𖼖𖽺𖾑 𖼊𖽑𖽡 𖼹𖽻𖾐 𖼊𖽻 𖼄𖽡𖾐 𖼹𖽳𖾐 𖼞𖽑𖽶𖾐 𖼀𖽜 𖼺𖽪𖾐 𖼮𖽻𖾐，𖼐𖽜 𖼽𖽚𖾐 𖼍𖽪𖾐 𖼖𖽻𖾐，𖼄𖽙𖾐 𖼹𖽳𖾐 𖼊𖽑𖽡 𖼦𖽑𖽙𖾐 𖼀𖽜𖾐 𖼊𖽴．” 𖼽𖽺𖾐 𖼺𖽪𖾐 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼀𖽦𖾐 𖼦𖽑𖽻𖾐 𖼺𖽺𖾑，𖼮𖽑𖽡𖽪 𖼈𖽳 𖼄𖽙𖾐 𖼀𖽦𖾐：“𖼐𖽙𖾑 𖼂𖽻𖾐 𖼮𖽻𖾐 𖼊𖽻 𖼐𖽙𖾐 𖼀𖽑𖽢 𖼊𖽙𖾐 𖼺𖽪𖾐，𖼊𖽻 𖼐𖽙𖾐 𖼷𖽻．”
𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼍𖽻𖾐 𖼊𖽻 𖼻𖽜 ( 𖼊𖽑𖽹𖾑 13：10-17；𖼞𖽑𖽜 4：10-12 )
9 𖼷𖽻𖾐 𖼺𖽪𖾐 𖼽𖽺𖾐 𖼺𖽪𖾐 𖼊𖽑𖽺 𖼊𖽻 𖼐𖽙𖾐：“𖼳𖽪𖾑 𖼰𖽪𖾐！ 𖼍𖽻𖾐 𖼊𖽻 𖼦𖽑𖽺𖾑 𖽃𖽔 𖼊𖽺𖾑 𖼳𖽶 𖼀𖽦𖾐 𖼈𖽪𖾐 𖼣𖽻𖾐？” 10 𖼽𖽻 𖼊𖽻 𖼞𖽑𖽚：“𖽂𖽙 𖼺𖽙𖾐 𖼂𖽙𖾐 𖼠𖽚 𖼞𖽳𖾐 𖼺𖽝𖾑 𖼮𖽑𖽡𖾐 𖼄𖽔 𖼊𖽙𖾐 𖼳𖽶 𖼄𖽡𖽻，𖼐𖽑𖽡𖾐 𖼈𖽳𖾐 𖼞𖽜 𖼍𖽺𖾑 𖼺𖽝𖾑 𖼊𖽻𖾐．𖼠𖽳𖾐 𖼖𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐 𖼞𖽑𖽶𖾑 𖼮𖽶𖾐 𖼍𖽻𖾐 𖼊𖽻 𖼻𖽜，𖼽𖽻 𖼈𖽳𖾐 𖼞𖽜 𖼺𖽺𖾑 𖼐𖽦𖾐 𖼄𖽡𖽻𖾐 𖼦𖽑𖽻𖾐，𖼦𖽑𖽔𖾐 𖼖𖽺𖾑 𖼄𖽔 𖼺𖽝𖾑；𖼊𖽻 𖼮𖽨 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼄𖽡𖾐 𖼄𖽔 𖼀𖽻𖾐 𖼊𖽻𖾐．
𖼳𖽶𖾑 𖼄𖽙𖾐 𖼊𖽻 𖼍𖽻𖾐 𖼊𖽻 𖼊𖽑𖽺 𖼦𖽑𖽺 𖼀𖽑𖽪𖾐 ( 𖼊𖽑𖽹𖾑 13；18-23；𖼞𖽑𖽜 4：13-20 )
11 𖼍𖽻𖾐 𖼊𖽻 𖼞𖽳𖾐 𖼀𖽦𖾐 𖼈𖽪𖾐 𖼦𖽑𖽺𖾑 𖼻𖽻𖾐 𖼣𖽻𖾐： 𖼳𖽶𖾑 𖼄𖽙𖾐 𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼊𖽻 𖼂𖽪𖾑 𖼣𖽻𖾐． 12 𖼊𖽻 𖼮𖽨𖾐 𖼦𖽜 𖼀𖽜 𖼺𖽪𖾐，𖼞𖽑𖽶𖾑 𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽨 𖼦𖽑𖽻𖾐，𖼠𖽙𖾑 𖼍𖽻𖾐 𖼐𖽺 𖼈𖽪𖾑 𖼷𖽪𖾐 𖼽𖽻 𖼈𖽳𖾐 𖼊𖽻 𖼮𖽶𖾐 𖼰𖽨𖾑 𖽂𖽙𖾐 𖼠𖽸𖾑 𖼮𖽡𖽮𖾐 𖼺𖽺𖾑，𖼖𖽻𖾐 𖼽𖽻 𖼈𖽳𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼮𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼊𖽻 𖼂𖽪𖾑 𖼐𖽻𖾑 𖼂𖽡𖾐 𖼽𖽡𖾐 𖼦𖽑𖽙𖾐． 13 𖼊𖽻 𖼄𖽡𖾐 𖼰𖽡𖾑 𖼀𖽙 𖼊𖽑𖽺 𖼀𖽜 𖼺𖽪𖾐，𖼞𖽑𖽶𖾑 𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽨 𖼦𖽑𖽻𖾐，𖼖𖽺𖾑 𖼞𖽜𖾐 𖼺𖽜𖾐 𖼄𖽙𖾐 𖼷𖽶𖾐 𖼦𖽶𖾐．𖼦𖽑𖽻𖾐 𖼊𖽑𖽻𖾐，𖼰𖽡𖽺𖾐 𖼄𖽔 𖼮𖽻𖾐，𖼊𖽑𖽡 𖼠𖽙𖾐 𖼍𖽺𖾑 𖼊𖽻 𖼮𖽶𖾐，𖼮𖽕𖾐 𖼐𖽦𖾐 𖼷𖽶𖾐 𖼄𖽳𖾐 𖼞𖽑𖽶𖾑 𖼮𖽶𖾐 𖼀𖽑𖽚𖾐 𖼽𖽡𖾐 𖼦𖽑𖽙𖾐． 14 𖼊𖽻 𖽃𖽔𖾑 𖼮𖽑𖽪 𖼷𖽑𖽪𖾐 𖼞𖽑𖽶𖾐 𖼀𖽜 𖼺𖽪𖾐，𖼞𖽑𖽶𖾑 𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽨 𖼦𖽑𖽻𖾐，𖼠𖽚 𖼦𖽑𖽙𖾐 𖼠𖽙𖾑 𖼍𖽻𖾐，𖼊𖽺𖾐 𖼊𖽑𖽺 𖼞𖽳𖾐 𖼐𖽑𖽧𖾐 𖼀𖽙𖾐、 𖼮𖽡 𖼷𖽙𖾐 𖼐𖽺𖾐 𖼞𖽜𖾐 𖼺𖽜𖾐 𖼮𖽑𖽢𖾑 𖼈𖽧𖾐 𖼍𖽡 𖼺𖽺𖾑，𖼄𖽙𖾐 𖼷𖽺𖾐 𖼺𖽪𖾐 𖼷𖽙𖾐 𖼺𖽳 𖼊𖽴 𖼊𖽑𖽧 𖼖𖽻𖾐 𖼄𖽔 𖼠𖽸𖾑． 15 𖼊𖽻 𖼄𖽡𖾐 𖼹𖽳𖾐 𖼞𖽑𖽶𖾐 𖼀𖽜 𖼺𖽪𖾐，𖼞𖽑𖽶𖾑 𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽨 𖼦𖽑𖽻𖾐，𖼐𖽑𖽧𖾐 𖼹𖽳𖾐 𖼐𖽑𖽧𖾐 𖼻𖽺𖾐 𖼄𖽙𖾐 𖼳𖽪𖾐，𖼦𖽑𖽔𖾐 𖼖𖽺𖾑 𖼷𖽳𖾑 𖼊𖽙𖾐 𖼺𖽺𖾑，𖼷𖽙𖾐 𖼺𖽳 𖼹𖽳𖾐 𖼊𖽴．”
𖼀𖽙𖾐 𖼊𖽪𖾐 𖼍𖽚𖾑 𖼍𖽻𖾐 𖼊𖽻 ( 𖼞𖽑𖽜 4：21-25 )
16 “𖼷𖽑𖽻𖾐 𖼀𖽙𖾐 𖼊𖽪𖾐 𖼍𖽚𖾑 𖼍𖽪𖾐 𖼺𖽺𖾑，𖼄𖽡𖽻 𖼐𖽑𖽡 𖼻𖽜 𖼂𖽡𖾑 𖼍𖽡 𖼺𖽪𖾐 𖼄𖽔 𖼮𖽻𖾐，𖼀𖽑𖽨 𖼽𖽦 𖼞𖽪𖾐 𖼊𖽑𖽻𖾐 𖼍𖽙𖾑 𖼺𖽪𖾐 𖼖𖽺𖾑 𖼄𖽔 𖼮𖽻𖾐，𖼍𖽚𖾑 𖼀𖽙𖾐 𖼷𖽻𖾐 𖼊𖽑𖽺 𖼍𖽙𖾑 𖼺𖽪𖾐 𖼍𖽺𖾑 𖼮𖽻𖾐，𖼊𖽡 𖼖𖽻𖾐 𖼺𖽪𖾐 𖼷𖽑𖽻𖾐 𖼞𖽜 𖼀𖽜𖾐 𖼖𖽜𖾐 𖽂𖽙𖾐 𖼄𖽡𖽻𖾐 𖼊𖽙𖾐． 17 𖼞𖽪𖾐 𖼮𖽡𖽺𖾐，𖼰𖽳𖾐 𖼍𖽪𖾐 𖼞𖽳𖾐 𖼄𖽡𖽻 𖼄𖽔 𖼊𖽑𖽦 𖼊𖽚𖾐 𖼖𖽻𖾐 𖼄𖽔 𖼳𖽡𖽳𖾐，𖼳𖽸𖾐 𖼍𖽡 𖼞𖽳𖾐 𖼄𖽡𖽻 𖼖𖽺𖾑 𖼺𖽙𖾐 𖼞𖽜 𖼄𖽔 𖼺𖽝𖾑 𖼄𖽔 𖼠𖽸𖾑．
18 𖽃𖽔𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼊𖽻 𖼐𖽙𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼰𖽡𖽺𖾐 𖼖𖽡𖾐！ 𖼞𖽪𖾐 𖼮𖽡𖽺𖾐，𖼞𖽑𖽙𖾐 𖼮𖽻𖾐 𖼍𖽳𖾐 𖼦𖽑𖽻𖾐 𖼺𖽪𖾐，𖼠𖽳𖾐 𖼠𖽳𖾐 𖼖𖽪 𖼽𖽻 𖼄𖽻𖾑 𖼊𖽻𖾐；𖼞𖽑𖽙𖾐 𖼄𖽔 𖼮𖽻𖾐 𖼺𖽪𖾐，𖼽𖽻 𖼊𖽡 𖼮𖽑𖽻 𖼮𖽻𖾐 𖼍𖽳𖾐 𖼦𖽑𖽻𖾐 𖼺𖽪𖾐 𖼖𖽺𖾑 𖼈𖽺𖾐 𖼦𖽑𖽙𖾐 𖼊𖽻𖾐．” \fr 8．18 \ft 𖼦𖽑𖽺𖾑 “𖼞𖽑𖽙𖾐 𖼹𖽳𖾐 𖼄𖽙𖾐 𖼊𖽻 𖼐𖽙𖾐 𖼺𖽪𖾐，𖼽𖽻 𖼞𖽜 𖼠𖽳𖾐 𖼠𖽳𖾐 𖼄𖽡𖾐 𖼀𖽻𖾐 𖼊𖽻𖾐；𖼞𖽑𖽙𖾐 𖼹𖽳𖾐 𖼄𖽙𖾐 𖼄𖽔 𖼊𖽻 𖼐𖽙𖾐 𖼺𖽪𖾐，𖼽𖽻 𖼞𖽑𖽙𖾐 𖼄𖽡𖾐 𖼀𖽻𖾐 𖼺𖽪𖾐 𖼖𖽺𖾑 𖼀𖽑𖽧𖾐 𖼦𖽑𖽙𖾐 𖼊𖽻𖾐．” 𖼀𖽦𖾐 𖼈𖽪𖾐 𖼣𖽻𖾐．
𖼽𖽺𖾐 𖼺𖽪𖾐 𖼞𖽳𖾐 𖼈𖽧 𖼐𖽑𖽳𖾐 𖼐𖽳 𖼦𖽙𖾐 ( 𖼊𖽑𖽹𖾑 12： 46-50；𖼞𖽑𖽜 4： 35-41 )
19 𖼽𖽺𖾐 𖼺𖽪𖾐 𖼽𖽻 𖼄𖽙𖾐 𖼐𖽺𖾐 𖼽𖽻 𖼐𖽑𖽳𖾐 𖼄𖽻，𖼽𖽻 𖼞𖽳𖾐 𖼞𖽑𖽻𖾑 𖼖𖽻𖾐．𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼄𖽨 𖼺𖽺𖾑 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽡𖾐 𖼖𖽻𖾐 𖼄𖽔 𖼊𖽙𖾐． 20 𖼷𖽑𖽻𖾐 𖼽𖽻 𖼊𖽑𖽺 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐，𖼀𖽦𖾐：“𖼐𖽑𖽡𖾐 𖽃𖽔 𖼄𖽙𖾐 𖼐𖽺𖾐 𖼐𖽑𖽡𖾐 𖼐𖽑𖽳𖾐 𖼄𖽻 𖼐𖽑𖽡𖾑 𖼮𖽻𖾐 𖼀𖽳 𖼦𖽑𖽡𖽚 𖼍𖽳𖾐，𖼐𖽑𖽡𖾐 𖼊𖽑𖽺 𖼄𖽡𖽻𖾐 𖼊𖽡 𖼮𖽑𖽻．”
21 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖼊𖽻 𖼞𖽑𖽚 𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽨 𖼦𖽑𖽻𖾐 𖼺𖽺𖾑，𖼂𖽺𖾐 𖼽𖽡𖾐 𖼺𖽪𖾐 𖼷𖽑𖽻𖾐，𖼞𖽑𖽶𖾑 𖼣𖽙𖾐 𖼞𖽳𖾐 𖽃𖽔 𖼄𖽙𖾐、 𖼣𖽙𖾐 𖼞𖽳𖾐 𖼐𖽑𖽳𖾐 𖼄𖽻 𖼣𖽻𖾐．”
𖼽𖽺𖾐 𖼺𖽪𖾐 𖼄𖽶 𖼳𖽡𖽺𖾐 𖼈𖽡𖾐 𖼹𖽧𖾑 𖼞𖽜 𖼐𖽙 𖼹𖽺𖾐 ( 𖼊𖽑𖽹𖾑 8：23-27；𖼞𖽑𖽜 4：35-41 )
22 𖼊𖽑𖽡 𖼐𖽑𖽡𖾐 𖼮𖽻𖾐，𖼽𖽺𖾐 𖼺𖽪𖾐 𖼐𖽺𖾐 𖼽𖽻 𖼷𖽻𖾐 𖼺𖽪𖾐 𖼖𖽡𖾑 𖼞𖽑𖽪 𖼊𖽑𖽺 𖼊𖽦𖾐 𖼽𖽡𖾐，𖼽𖽻 𖼷𖽻𖾐 𖼺𖽪𖾐 𖼖𖽙𖾐 𖼀𖽦𖾐：“𖽃𖽔 𖼐𖽺𖾑 𖼦𖽜𖾐 𖼀𖽜𖾐 𖼞𖽑𖽶𖾐 𖼀𖽙 𖼖𖽙𖾐 𖼽𖽡𖾐 𖼄𖽺．” 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼠𖽚 𖼽𖽡𖾐． 23 𖼖𖽡𖾑 𖼞𖽑𖽪 𖼠𖽚 𖼽𖽡𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼺𖽪𖾐 𖼽𖽦 𖼄𖽦𖾐 𖼠𖽶𖾑 𖼦𖽑𖽻𖾐．𖼦𖽜𖾐 𖼀𖽜𖾐 𖼊𖽑𖽺 𖼐𖽕 𖼊𖽺𖾐 𖼄𖽶 𖼳𖽡𖽺𖾐 𖼈𖽳 𖼮𖽝 𖼍𖽪𖾐 𖼖𖽻𖾐，𖼖𖽡𖾑 𖼞𖽑𖽪 𖽃𖽔𖾐 𖼮𖽡𖽦𖾐 𖼀𖽡𖾐 𖼖𖽻𖾐 𖼮𖽻𖾐，𖼦𖽑𖽔𖾐 𖼮𖽶𖾐 𖼷𖽜𖾐 𖼳𖽚𖾑．
24 𖼷𖽻𖾐 𖼺𖽪𖾐 𖼽𖽡𖾐 𖼽𖽺𖾐 𖼺𖽪𖾐 𖼊𖽑𖽺 𖽃𖽶𖾐 𖼦𖽙𖾑 𖼮𖽑𖽡，𖼀𖽦𖾐：“𖼳𖽪𖾑 𖼰𖽪𖾐，𖼳𖽪𖾑 𖼰𖽪𖾐！ 𖽃𖽔 𖼐𖽺𖾑 𖼳𖽶𖾐 𖼊𖽻𖾐 𖼣𖽻𖾐！”
𖼽𖽺𖾐 𖼺𖽪𖾐 𖼦𖽙𖾑 𖼮𖽑𖽡，𖼄𖽶 𖼳𖽡𖽺𖾐 𖼈𖽡𖾐 𖼹𖽧𖾑 𖼈𖽳 𖼊𖽑𖽺 𖼦𖽑𖽳𖾐 𖼺𖽺𖾑，𖼄𖽶 𖼳𖽡𖽺𖾐 𖼐𖽙 𖼦𖽑𖽙𖾐，𖼈𖽡𖾐 𖼹𖽧𖾑 𖼀𖽳𖾐 𖼦𖽑𖽻𖾐． 25 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽻 𖼮𖽶𖾐 𖼐𖽑𖽧𖾐 𖼄𖽙𖾐 𖽃𖽔 𖼊𖽻𖾑 𖼮𖽻𖾐 𖼺𖽺？”
𖼽𖽻 𖼈𖽳𖾐 𖼮𖽡𖽮𖾐 𖼖𖽺𖾑 𖼮𖽡𖽮𖾐，𖼞𖽑𖽙 𖼖𖽺𖾑 𖼞𖽑𖽙 𖼣𖽝．𖼷𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐：“𖼦𖽑𖽺𖾑 𖽃𖽔 𖼊𖽺𖾑 𖼳𖽶 𖼷𖽑𖽻𖾐 𖼣𖽻𖾐 𖼐𖽺𖾑？𖼽𖽻 𖼄𖽶 𖼳𖽡𖽺𖾐 𖼈𖽡𖾐 𖼹𖽧𖾑 𖼊𖽑𖽺 𖼦𖽑𖽳𖾐 𖼄𖽪𖾑，𖼄𖽶 𖼳𖽡𖽺𖾐 𖼈𖽡𖾐 𖼹𖽧𖾑 𖼖𖽺𖾑 𖼽𖽻 𖼀𖽦𖾐 𖼖𖽙𖾐 𖼊𖽻 𖼐𖽙𖾐 𖼦𖽑𖽻𖾐．”
𖼠𖽴 𖼖𖽔𖾐 𖼺𖽜𖾐 𖼄𖽡𖾐 𖼊𖽺𖾐 𖼐𖽺 𖼻𖽸 𖼺𖽪𖾐 𖼊𖽑𖽺 𖼞𖽪𖾐 𖼞𖽑𖽙 ( 𖼊𖽑𖽹𖾑 8：28-34；𖼞𖽑𖽜 5：1-20 )
26 𖼽𖽻 𖼈𖽳𖾐 𖼠𖽴 𖼖𖽔𖾐 𖼺𖽜𖾐 𖼄𖽡𖾐 𖼊𖽺𖾐 𖼷𖽑𖽻𖾐 𖼞𖽳𖾐 𖼮𖽑𖽡𖾐，𖼦𖽑𖽺𖾑 𖼰𖽡𖽔𖾐 𖼖𖽡𖾑 𖼖𖽡𖾑 𖼞𖽳𖾐 𖼍𖽦 𖼠𖽚 𖼀𖽙 𖼣𖽻𖾐 \fr 8．26 \ft “𖼠𖽴 𖼖𖽔𖾐 𖼺𖽜𖾐 ” 𖼊𖽑𖽺 “𖼰𖽡𖽔𖾐 𖼍𖽕𖾑 𖼖𖽔𖾐 ” 𖼀𖽦𖾐 𖼺𖽪𖾐 𖼖𖽺𖾑 𖼮𖽻𖾐．． 27 𖼽𖽺𖾐 𖼺𖽪𖾐 𖼦𖽜𖾐 𖼀𖽜𖾐 𖼦𖽜 𖼊𖽦𖾐 𖼽𖽡𖾐 𖼍𖽺𖾑 𖼺𖽺，𖼖𖽪𖾐 𖼞𖽑𖽶𖾐 𖼐𖽺 𖼮𖽑𖽢𖾑 𖼻𖽸 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼽𖽻 𖽃𖽙𖾑 𖼄𖽺 𖼀𖽳 𖼮𖽑𖽻𖾐 𖼖𖽻𖾐．𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼊𖽑𖽡 𖼳𖽕𖾐 𖼄𖽙𖾐 𖼀𖽑𖽡𖽻𖾐 𖼷𖽑𖽶 𖼄𖽔 𖼈𖽦，𖼦𖽑𖽺𖾐 𖼞𖽑𖽶𖾐 𖼄𖽔 𖼈𖽜，𖼖𖽧 𖼀𖽳𖾐 𖼠𖽶𖾑 𖼖𖽶𖾑 𖼍𖽡𖾐 𖼞𖽑𖽶𖾐 𖼍𖽺𖾑 𖼮𖽻𖾐．
28 𖼽𖽻 𖼽𖽺𖾐 𖼺𖽪𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼂𖽴𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼹𖽺𖾐，𖼮𖽑𖽡𖽪 𖼈𖽳 𖼄𖽙𖾐 𖽃𖽶𖾐 𖼍𖽳𖾐 𖼀𖽦𖾐：“𖼄𖽶𖾐 𖼷𖽑𖽚 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼻𖽙 𖼽𖽺𖾐 𖼺𖽪𖾐，𖼣𖽙𖾐 𖼐𖽑𖽡𖾐 𖼖𖽙𖾐 𖽃𖽔 𖼊𖽺𖾑 𖼳𖽶 𖼮𖽡 𖼠𖽳𖾐 𖼊𖽪𖾐 𖼮𖽻𖾐 𖼐𖽺𖾑？𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼣𖽙𖾐 𖼞𖽜 𖼠𖽻𖾐 𖼰𖽡𖽳𖾐 𖼊𖽑𖽔 𖼷𖽶𖾐 𖼄𖽶𖾑 𖼞𖽜！” 29 𖼽𖽺𖾐 𖼺𖽪𖾐 𖼐𖽺 𖼊𖽶𖾐 𖼊𖽑𖽺 𖼦𖽑𖽳𖾐 𖼄𖽪𖾑 𖼠𖽚，𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼞𖽶𖾐 𖼮𖽑𖽶 𖼊𖽑𖽺 𖼮𖽑𖽻𖾐 𖼊𖽚𖾐 𖼖𖽻𖾐 𖼖𖽡𖾐．” 𖽃𖽔𖾐 𖼺𖽺𖾑，𖼽𖽻 𖼽𖽺𖾐 𖼺𖽪𖾐 𖼊𖽑𖽺 𖼦𖽑𖽺𖾑 𖼖𖽙𖾐 𖼺𖽶𖾑 𖼀𖽦𖾐．𖽃𖽙𖾑 𖼄𖽺 𖼞𖽑𖽶𖾑 𖼮𖽶𖾐，𖼐𖽺 𖼊𖽶𖾐 𖼞𖽑𖽙 𖼄𖽙𖾐 𖼂𖽦𖾑 𖼄𖽙𖾐 𖼽𖽻 𖼊𖽑𖽺 𖼵𖽪𖾐 𖼍𖽡 𖼺𖽺𖾑，𖼷𖽑𖽻𖾐 𖼄𖽔 𖼐𖽙 𖼄𖽙𖾐 𖼽𖽻 𖼊𖽑𖽺 𖼐𖽦𖾐 𖼳𖽪𖾐，𖼦𖽑𖽔𖾐 𖼖𖽺𖾑 𖼖𖽙 𖼰𖽳𖾑 𖼐𖽺𖾐 𖼮𖽑𖽡𖾐 𖼮𖽚𖾐 𖼻𖽜 𖼀𖽑𖽳𖾐 𖼮𖽚𖾐 𖼍𖽡．𖼖𖽙 𖼰𖽳𖾑 𖼖𖽺𖾑 𖼰𖽸𖾐 𖼷𖽑𖽦𖾐 𖼦𖽑𖽙𖾐 𖼺𖽺𖾑，𖼽𖽻 𖼊𖽑𖽺 𖼐𖽺 𖼮𖽑𖽢𖾑 𖼞𖽕 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽑𖽡𖾐 𖼽𖽡𖾐．
30 𖼽𖽺𖾐 𖼺𖽪𖾐 𖼽𖽻 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼊𖽑𖽺 𖽃𖽔 𖼊𖽺𖾐 𖼄𖽡𖾐？”
𖼽𖽻 𖼀𖽦𖾐：“𖼣𖽙𖾐 𖼊𖽑𖽺 ‘ 𖼊𖽑𖽡 𖼷𖽪𖾐 ’ 𖼄𖽡𖾐．” 𖼞𖽪𖾐 𖼮𖽡𖽺𖾐，𖼽𖽻 𖼊𖽑𖽺 𖼻𖽸 𖼺𖽪𖾐 𖼐𖽺 𖼦𖽑𖽔𖾐 𖼮𖽶𖾐 𖼄𖽨 𖼳𖽶 𖼣𖽻𖾐． 31 𖼐𖽺 𖼽𖽺𖾐 𖼺𖽪𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼽𖽻 𖼈𖽳𖾐 𖼊𖽑𖽺 𖼞𖽕 𖼊𖽑𖽻𖾐 𖼄𖽔 𖼊𖽴 𖼄𖽡𖾐 𖼊𖽺𖾐 𖼊𖽑𖽔 𖼽𖽡𖾐 𖼞𖽜．
32 𖼞𖽑𖽶𖾑 𖼠𖽻𖾐 𖼈𖽦 𖼊𖽑𖽡 𖼷𖽪𖾐 𖽂𖽙 𖼰𖽡𖽺𖾐 𖼀𖽙 𖼖𖽚𖾑 𖼍𖽳𖾐，𖼐𖽺 𖼞𖽑𖽙𖾐 𖼊𖽙𖾐 𖼊𖽙𖾐 𖼽𖽺𖾐 𖼺𖽪𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼽𖽻 𖼈𖽳𖾐 𖼞𖽜 𖼈𖽦 𖼷𖽪𖾐 𖼠𖽻𖾐 𖼊𖽑𖽺 𖽂𖽙𖾐 𖼊𖽡 𖼽𖽡𖾐 𖼊𖽙𖾐 𖼖𖽡𖾐．
𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖽃𖽺 𖼦𖽑𖽙𖾐． 33 𖽃𖽔𖾐 𖼺𖽺𖾑，𖼐𖽺 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼮𖽑𖽻𖾐 𖼊𖽚𖾐 𖼖𖽻𖾐，𖼈𖽦 𖼷𖽪𖾐 𖼠𖽻𖾐 𖼊𖽑𖽺 𖼊𖽡 𖼽𖽡𖾐，𖼈𖽦 𖼷𖽪𖾐 𖼞𖽑𖽶𖾑 𖼮𖽑𖽙 𖼈𖽦𖾑 𖼹𖽚𖾐 𖼹𖽺𖾐 𖼽𖽡𖾐，𖼄𖽳𖾑 𖼄𖽳 𖼦𖽜𖾐 𖼀𖽜𖾐 𖼞𖽑𖽶𖾐 𖽃𖽝𖾐 𖼳𖽶𖾐 𖼦𖽑𖽙𖾐．
34 𖼈𖽦 𖼖𖽚𖾑 𖼺𖽪𖾐 𖼷𖽑𖽻𖾐 𖼄𖽡𖽻 𖼦𖽑𖽺𖾑 𖼐𖽦𖾐 𖼄𖽡𖽻𖾐 𖼺𖽺𖾑，𖼮𖽡𖽪 𖼀𖽑𖽻𖾐 𖼍𖽪𖾐 𖼽𖽡𖾐 𖼦𖽑𖽙𖾐，𖼽𖽡𖾐 𖼖𖽪𖾐 𖼐𖽺𖾐 𖼮𖽑𖽡𖽦𖾐 𖼠𖽻𖾐 𖼞𖽳𖾐 𖼷𖽑𖽻𖾐 𖼊𖽑𖽺 𖼀𖽦𖾐 𖼊𖽑𖽧． 35 𖼷𖽑𖽻𖾐 𖼄𖽳𖾑 𖼄𖽳 𖼊𖽚𖾐 𖼖𖽻𖾐，𖽃𖽔 𖼊𖽺𖾑 𖼳𖽶 𖼄𖽡𖽻 𖼣𖽻𖾐 𖼀𖽡𖾐 𖼐𖽦𖾐．𖼽𖽻 𖼈𖽳𖾐 𖼖𖽻𖾐 𖼽𖽺𖾐 𖼺𖽪𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐 𖼐𖽦𖾐 𖼄𖽡𖽻𖾐，𖼐𖽺 𖼰𖽡𖾑 𖼦𖽑𖽙𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼐𖽑𖽧𖾐 𖼄𖽙𖾐 𖼦𖽙𖾑 𖼮𖽑𖽡，𖼀𖽑𖽡𖽻𖾐 𖼷𖽑𖽶 𖼈𖽦 𖼍𖽡，𖼽𖽺𖾐 𖼺𖽪𖾐 𖼮𖽑𖽡𖾑 𖼀𖽑𖽦𖾐 𖽃𖽙𖾑 𖼄𖽺 𖼮𖽑𖽡𖽺 𖼊𖽡𖾐 𖼍𖽳𖾐 𖼺𖽺𖾑，𖼽𖽻 𖼈𖽳𖾐 𖼮𖽡𖽮𖾐 𖼷𖽑𖽚． 36 𖼐𖽺 𖼻𖽸 𖼺𖽪𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖽃𖽔 𖼊𖽺𖾐 𖼞𖽪𖾐 𖼞𖽑𖽙 𖼖𖽙𖾐 𖼐𖽦𖾐 𖼄𖽡𖽻𖾐 𖼺𖽪𖾐 𖼷𖽑𖽻𖾐，𖼄𖽡𖽻 𖼦𖽑𖽺𖾑 𖼀𖽦𖾐 𖼽𖽻 𖼈𖽳𖾐 𖼖𖽙𖾐 𖼊𖽑𖽧． 37 𖼠𖽴 𖼖𖽔𖾐 𖼺𖽜𖾐 𖼄𖽡𖾐 𖼊𖽺𖾐 𖼞𖽕 𖼰𖽡𖽺𖾐 𖼞𖽳𖾐 𖼷𖽑𖽻𖾐 𖼮𖽡𖽮𖾐 𖼷𖽑𖽚 𖼺𖽺𖾑，𖼄𖽳𖾑 𖼄𖽳 𖼽𖽺𖾐 𖼺𖽪𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼽𖽻 𖼈𖽳𖾐 𖼞𖽳𖾐 𖼰𖽡𖾑 𖼦𖽑𖽙𖾐 𖼖𖽡𖾐．
𖽃𖽔𖾐 𖼺𖽺𖾑，𖼽𖽺𖾐 𖼺𖽪𖾐 𖼖𖽡𖾑 𖼞𖽑𖽪 𖼊𖽑𖽺 𖼊𖽦𖾐 𖼽𖽡𖾐 𖼀𖽑𖽚𖾐 𖼞𖽚 𖼽𖽡𖾐 𖼊𖽻𖾐． 38 𖼐𖽺 𖼞𖽑𖽙𖾐 𖼰𖽡𖾑 𖼦𖽑𖽙𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼽𖽺𖾐 𖼺𖽪𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖼽𖽻 𖼖𖽙𖾐 𖼮𖽑𖽻𖾐 𖼽𖽡𖾐 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼺𖽪𖾐 𖼽𖽻 𖼊𖽑𖽺 𖼹𖽡𖾐 𖼀𖽑𖽚𖾐 𖼞𖽚 𖼽𖽡𖾐，𖼀𖽦𖾐： 39 “𖼐𖽑𖽡𖾐 𖽃𖽔𖾑 𖼞𖽑𖽶𖾐 𖼞𖽚 𖼽𖽡𖾐，𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼖𖽙𖾐 𖼀𖽙𖾐 𖽃𖽔 𖼊𖽺𖾑 𖼻𖽻𖾐 𖼈𖽳 𖼺𖽪𖾐 𖼄𖽡𖽻 𖼂𖽺𖾐 𖼀𖽑𖽢 𖼊𖽑𖽺 𖼀𖽦𖾐 𖼊𖽑𖽧 𖼽𖽡𖾐 𖼖𖽡𖾐．” 𖽃𖽔𖾐 𖼺𖽺𖾑，𖼽𖽻 𖼖𖽪𖾐 𖼞𖽑𖽶𖾐 𖼺𖽜 𖼮𖽨𖾐，𖼽𖽺𖾐 𖼺𖽪𖾐 𖼽𖽻 𖼖𖽙𖾐 𖼀𖽙𖾐 𖽃𖽔 𖼊𖽺𖾑 𖼻𖽻𖾐 𖼈𖽳 𖼺𖽪𖾐 𖼄𖽡𖽻 𖼂𖽺𖾐 𖼀𖽑𖽢 𖼦𖽑𖽙𖾐 𖼞𖽑𖽶𖾑 𖼀𖽦𖾐 𖼊𖽑𖽧．
𖼽𖽕 𖼖𖽪 𖼞𖽳𖾐 𖼻𖽙 𖼄𖽳 𖼊𖽑𖽺 𖽃𖽶𖾐 𖼠𖽙𖾑 𖼐𖽺𖾐 𖼺𖽶 𖼵𖽶𖾐 𖼺𖽪𖾐 𖼻𖽙 𖼄𖽳 𖼊𖽑𖽺 𖼞𖽪𖾐 𖼞𖽑𖽙( 𖼊𖽑𖽹𖾑9：18-26，𖼞𖽑𖽜 5：21-43 )
40 𖼽𖽺𖾐 𖼺𖽪𖾐 𖼀𖽑𖽚𖾐 𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼊𖽑𖽺 𖼳𖽡𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼷𖽪𖾐 𖼄𖽙𖾐 𖼽𖽻 𖼊𖽑𖽺 𖼹𖽶𖾐 𖼖𖽻𖾐． 41 𖼻𖽶𖾑 𖼦𖽑𖽺𖾐 𖼠𖽕 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐，𖼽𖽕 𖼖𖽪 𖼄𖽡𖾐．𖼽𖽻 𖼖𖽻𖾐 𖼽𖽺𖾐 𖼺𖽪𖾐 𖼮𖽑𖽡𖾑 𖼀𖽑𖽦𖾐 𖽃𖽙𖾑 𖼄𖽺 𖼮𖽑𖽡𖽺 𖼂𖽴𖾐 𖼹𖽺𖾐，𖼽𖽺𖾐 𖼺𖽪𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖼽𖽻 𖽃𖽔𖾑 𖼞𖽑𖽶𖾐 𖼽𖽡𖾐 𖼖𖽡𖾐． 42 𖼞𖽪𖾐 𖼮𖽡𖽺𖾐，𖼽𖽻 𖼻𖽙 𖼄𖽳 𖼍𖽡𖾑 𖽃𖽔 𖼖𖽙𖾐 𖼷𖽑𖽡𖾐 𖼐𖽑𖽡 𖼞𖽑𖽚 𖼺𖽺𖾑 𖼖𖽚，𖼳𖽶𖾐 𖼖𖽻𖾐 𖼮𖽻𖾐．
𖼽𖽺𖾐 𖼺𖽪𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼊𖽑𖽡 𖼷𖽪𖾐 𖼄𖽙𖾐 𖼽𖽻 𖼊𖽑𖽺 𖼀𖽑𖽸𖾐 𖼂𖽻𖾐 𖼖𖽻𖾐． 43 𖼷𖽑𖽻𖾐 𖼷𖽪𖾐 𖼠𖽑𖽻𖾐 𖼊𖽑𖽺 𖼻𖽙 𖼄𖽳 𖼊𖽑𖽡 𖼽𖽚𖾐 𖼮𖽻𖾐，𖼷𖽑𖽡𖾐 𖼐𖽑𖽡 𖼞𖽑𖽚 𖼺𖽶 𖼵𖽶𖾐 𖼐𖽙𖾐 𖼦𖽑𖽙𖾐，𖼐𖽙𖾐 𖼞𖽪𖾐 𖼀𖽑𖽙 𖼖𖽦 𖼠𖽻𖾐 𖼞𖽑𖽶𖾐 𖼽𖽻 𖼞𖽑𖽙𖾐 𖼮𖽻𖾐 𖼺𖽪𖾐 𖼄𖽳𖾑 𖼄𖽳 𖼻𖽜 𖼞𖽳𖾐 𖼦𖽑𖽻𖾐．𖼦𖽑𖽻𖾐 𖼊𖽑𖽻𖾐，𖼽𖽻 𖼊𖽑𖽺 𖼞𖽪𖾐 𖼞𖽑𖽙 𖼠𖽸𖾑 𖼺𖽪𖾐 𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼮𖽻𖾐． 44 𖼽𖽻 𖼽𖽺𖾐 𖼺𖽪𖾐 𖼠𖽙𖾑 𖼍𖽻𖾐 𖼀𖽳 𖼄𖽻𖾑 𖼖𖽻𖾐，𖼽𖽺𖾐 𖼺𖽪𖾐 𖼞𖽳𖾐 𖼀𖽑𖽡𖽻𖾐 𖼄𖽳𖾑 𖼖𖽦 𖼄𖽚𖾐 𖼄𖽳𖾐，𖼺𖽶 𖼵𖽶𖾐 𖼐𖽙𖾐 𖼐𖽕 𖼊𖽺𖾐 𖼞𖽑𖽙 𖼦𖽑𖽻𖾐．
45 𖼽𖽺𖾐 𖼺𖽪𖾐 𖼀𖽦𖾐：“𖼣𖽙𖾐 𖼊𖽑𖽺 𖼄𖽚𖾐 𖼺𖽪𖾐 𖽃𖽔 𖼺𖽺 𖼣𖽻𖾐 𖼐𖽺𖾑？”
𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽺𖾑 𖼄𖽚𖾐 𖼄𖽳𖾐 𖼀𖽦𖾐 𖼄𖽔 𖼦𖽶𖾐．𖼂𖽡 𖼍𖽴 𖼀𖽦𖾐：“𖼳𖽪𖾑 𖼰𖽪𖾐！ 𖼷𖽑𖽻𖾐 𖼄𖽳𖾑 𖼄𖽳 𖼐𖽑𖽡𖾐 𖼊𖽑𖽺 𖼊𖽜 𖼊𖽜 𖼐𖽑𖽡𖽚𖾐 𖼐𖽑𖽡𖽚𖾐 𖼳𖽶 𖼣𖽻𖾐．” \fr 8．45 \ft “𖼂𖽡 𖼍𖽴 𖼀𖽦𖾐：‘ 𖼳𖽪𖾑 𖼰𖽪𖾐！ 𖼷𖽑𖽻𖾐 𖼄𖽳𖾑 𖼄𖽳 𖼐𖽑𖽡𖾐 𖼊𖽑𖽺 𖼊𖽜 𖼊𖽜 𖼐𖽑𖽡𖽚𖾐 𖼐𖽑𖽡𖽚𖾐 𖼳𖽶 𖼣𖽻𖾐．’” 𖼦𖽑𖽺𖾑 𖼮𖽑𖽡𖽺 𖼊𖽑𖽺 “𖼂𖽡 𖼍𖽴 𖼐𖽺𖾐 𖼊𖽑𖽡 𖼊𖽑𖽜 𖼷𖽙𖾐 𖼖𖽙𖾐 𖼮𖽑𖽻𖾐 𖼮𖽨𖾐 𖼺𖽜 𖼺𖽪𖾐 𖼀𖽦𖾐 ” 𖼐𖽺𖾐 𖼀𖽦𖾐 𖼺𖽪𖾐 𖼖𖽺𖾑 𖼮𖽻𖾐．” 𖼠𖽙𖾑 𖼍𖽻𖾐 𖼄𖽻𖾑 “𖼷𖽑𖽻𖾐 𖼄𖽳𖾑 𖼄𖽳 𖼐𖽑𖽡𖾐 𖼊𖽑𖽺 𖼊𖽜 𖼊𖽜 𖼐𖽑𖽡𖽚𖾐 𖼐𖽑𖽡𖽚𖾐 𖼳𖽶 𖼣𖽻𖾐．𖼦𖽑𖽔𖾐 𖼖𖽺𖾑 ‘ 𖽃𖽔 𖼺𖽺 𖼣𖽙𖾐 𖼊𖽑𖽺 𖼄𖽚𖾐 ’ 𖼀𖽦𖾐 𖼺𖽺 𖼖𖽔？” 𖼦𖽑𖽺𖾑 𖼮𖽑𖽡𖽺 𖼮𖽑𖽻𖾐 𖼰𖽨𖾐 𖼺𖽪𖾐 𖼮𖽻𖾐．
46 𖼽𖽺𖾐 𖼺𖽪𖾐 𖼀𖽦𖾐：“𖼣𖽙𖾐 𖼊𖽑𖽺 𖼄𖽚𖾐 𖼄𖽳𖾐 𖼺𖽪𖾐 𖼷𖽑𖽻𖾐 𖼮𖽻𖾐 𖼍𖽳𖾐！ 𖼞𖽪𖾐 𖼮𖽡𖽺𖾐，𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼣𖽙𖾐 𖼞𖽶𖾐 𖼮𖽑𖽶 𖼊𖽑𖽺 𖼮𖽑𖽻𖾐 𖼊𖽚𖾐 𖼽𖽡𖾐 𖼦𖽑𖽙𖾐 𖼣𖽙𖾐 𖼺𖽝𖾑．” 47 𖼻𖽙 𖼄𖽳 𖼞𖽑𖽶𖾑 𖼽𖽚𖾐 𖼄𖽡𖽻 𖼦𖽑𖽺𖾑 𖼰𖽳𖾐 𖼮𖽨𖾐 𖼄𖽔 𖼊𖽙𖾐 𖼺𖽝𖾑 𖼺𖽺𖾑，𖼮𖽡𖽮𖾐 𖼮𖽡𖽮𖾐 𖼞𖽴𖾐 𖼞𖽴𖾐 𖼠𖽚 𖼖𖽻𖾐，𖼽𖽺𖾐 𖼺𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼂𖽴𖾐 𖼹𖽺𖾐，𖼽𖽻 𖼊𖽑𖽺 𖼄𖽚𖾐 𖼄𖽳𖾐 𖼞𖽪𖾐 𖼮𖽡𖽺𖾐 𖼐𖽺𖾐 𖼐𖽙𖾐 𖽃𖽔𖾐 𖼹𖽻𖾐 𖼐𖽕 𖼊𖽺𖾐 𖼞𖽑𖽙 𖼦𖽑𖽻𖾐 𖼞𖽳𖾐 𖼄𖽡𖽻，𖼷𖽑𖽻𖾐 𖼷𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼄𖽳𖾑 𖼄𖽳 𖼀𖽦𖾐 𖼊𖽑𖽧 𖼖𖽻𖾐． 48 𖼽𖽺𖾐 𖼺𖽪𖾐 𖼽𖽻 𖼖𖽙𖾐 𖼀𖽦𖾐：“𖼻𖽙 𖼄𖽳 𖽃𖽔𖾐！ 𖼐𖽑𖽡𖾐 𖼊𖽻 𖼮𖽶𖾐 𖼺𖽺𖾑，𖼐𖽑𖽡𖾐 𖼐𖽙𖾐 𖼞𖽑𖽙 𖼦𖽑𖽻𖾐，𖼺𖽙𖾑 𖼺𖽙𖾐 𖼞𖽚 𖼽𖽡𖾐 𖼻𖽻𖾐！”
49 𖼽𖽺𖾐 𖼺𖽪𖾐 𖼊𖽻 𖼂𖽪𖾑 𖼊𖽑𖽜𖾐 𖼮𖽻𖾐 𖼺𖽺 𖼞𖽑𖽶𖾑 𖼮𖽶𖾐，𖼻𖽶𖾑 𖼦𖽑𖽺𖾐 𖼠𖽕 𖼺𖽪𖾐 𖼞𖽳𖾐 𖽃𖽔𖾑 𖼞𖽑𖽶𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼮𖽻𖾐，𖼀𖽦𖾐：“𖼐𖽑𖽡𖾐 𖼻𖽙 𖼄𖽳 𖼳𖽶𖾐 𖼦𖽑𖽙𖾐 𖼦𖽑𖽻𖾐，𖼳𖽪𖾑 𖼰𖽪𖾐 𖼞𖽜 𖽂𖽙 𖼞𖽶𖾐 𖼄𖽔 𖼻𖽻𖾐！”
50 𖼽𖽺𖾐 𖼺𖽪𖾐 𖼊𖽻 𖼮𖽨 𖼺𖽺𖾑，𖼽𖽕 𖼖𖽪 𖼖𖽙𖾐 𖼀𖽦𖾐：“𖼮𖽡𖽮𖾐 𖼄𖽔 𖼻𖽻𖾐，𖼊𖽻 𖼮𖽶𖾐 𖼍𖽺𖾑 𖼻𖽻𖾐！ 𖼐𖽑𖽡𖾐 𖼻𖽙 𖼄𖽳 𖽂𖽙𖾐 𖼰𖽨𖾑 𖼊𖽻𖾐．”
51 𖼽𖽺𖾐 𖼺𖽪𖾐 𖼽𖽡𖾐 𖼽𖽕 𖼖𖽪 𖼈𖽴 𖼞𖽳𖾐 𖼮𖽑𖽡𖾐，𖼽𖽻 𖼂𖽡 𖼍𖽴、 𖼽𖽱𖾐 𖼦𖽕𖾑、 𖼽𖽔 𖼠𖽴𖾑 𖼐𖽺𖾐 𖼻𖽙 𖼄𖽳 𖼞𖽳𖾐 𖽃𖽔 𖼀𖽙 𖽃𖽔 𖼄𖽙𖾐 𖼊𖽑𖽺 𖼦𖽳 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐，𖼠𖽳𖾐 𖼖𖽪𖾐 𖼷𖽑𖽻𖾐 𖼞𖽜 𖼽𖽻 𖼖𖽙𖾐 𖼮𖽑𖽻𖾐 𖽂𖽙𖾐 𖼊𖽡 𖼽𖽡𖾐 𖼄𖽔 𖼊𖽙𖾐． 52 𖼷𖽑𖽻𖾐 𖼄𖽳𖾑 𖼄𖽳 𖼻𖽙 𖼄𖽳 𖼦𖽑𖽺𖾑 𖼽𖽚𖾐 𖼖𖽙𖾐 𖼀𖽙𖾐 𖼐𖽑𖽧𖾐 𖼄𖽙𖾐 𖼰𖽙𖾐 𖼊𖽝 𖼍𖽳𖾐 𖼣𖽶𖾐 𖼦𖽑𖽡𖽻𖾐．𖼽𖽺𖾐 𖼺𖽪𖾐 𖼀𖽦𖾐：“𖼊𖽑𖽔 𖼣𖽶𖾐 𖼦𖽻！ 𖼽𖽻 𖼳𖽶𖾐 𖼦𖽑𖽙𖾐 𖼺𖽪𖾐 𖼄𖽔 𖼣𖽻𖾐，𖼽𖽦 𖼄𖽦𖾐 𖼠𖽶𖾑 𖼍𖽺𖾑 𖼣𖽻𖾐．”
53 𖼽𖽻 𖼈𖽳𖾐 𖼻𖽙 𖼄𖽳 𖼦𖽑𖽺𖾑 𖼳𖽶𖾐 𖼦𖽑𖽙𖾐 𖼦𖽑𖽻𖾐 𖼺𖽝𖾑 𖼺𖽺𖾑，𖼽𖽺𖾐 𖼺𖽪𖾐 𖼊𖽑𖽺 𖼈𖽳𖾐 𖼵𖽶𖾐． 54 𖼽𖽺𖾐 𖼺𖽪𖾐 𖼽𖽻 𖼖𖽦 𖼀𖽑𖽦𖾐 𖼄𖽻𖾑 𖼺𖽶𖾐 𖼺𖽺𖾑，𖽃𖽶𖾐 𖼀𖽦𖾐：“𖼻𖽙 𖼄𖽳，𖼍𖽪𖾐 𖼖𖽻𖾐！” 55 𖼽𖽻 𖼈𖽦𖾐 𖼳𖽨𖾐 𖼀𖽑𖽚𖾐 𖼞𖽶𖾐 𖼮𖽑𖽶 𖼞𖽑𖽶𖾐 𖼞𖽚 𖼖𖽻𖾐 𖼺𖽺𖾑，𖼽𖽻 𖼐𖽕 𖼊𖽺𖾐 𖼍𖽪𖾐 𖼖𖽻𖾐 𖼦𖽑𖽙𖾐．𖼽𖽺𖾐 𖼺𖽪𖾐 𖼀𖽦𖾐：“𖼷𖽙 𖼊𖽪𖾐 𖼈𖽺𖾐 𖼽𖽻 𖼊𖽑𖽺 𖼰𖽙𖾑 𖼖𖽻𖾐！” 56 𖼽𖽻 𖼀𖽙 𖼽𖽻 𖼄𖽙𖾐 𖼦𖽑𖽔𖾐 𖼮𖽶𖾐 𖼞𖽑𖽙 𖼣𖽝．𖼽𖽺𖾐 𖼺𖽪𖾐 𖼦𖽑𖽔𖾐 𖼮𖽶𖾐 𖼮𖽶𖾐 𖼽𖽻 𖼈𖽳𖾐 𖼊𖽑𖽺 𖼀𖽦𖾐 𖼄𖽪𖾑，𖼞𖽑𖽙𖾐 𖼂𖽺𖾐 𖼀𖽑𖽢 𖼺𖽪𖾐 𖼄𖽡𖽻 𖼀𖽦𖾐 𖼊𖽑𖽡 𖼽𖽚𖾐 𖼊𖽑𖽺 𖼖𖽺𖾑 𖽂𖽙𖾐 𖼰𖽨𖾐 𖼄𖽔 𖼊𖽙𖾐．