𖼷𖽑𖽻𖾐 𖼳𖽚𖾑 𖼀𖽑𖽙 𖼞𖽳𖾐 𖼷𖽳𖾑 𖼮𖽑𖽡𖽪
5
1 𖼞𖽑𖽶𖾑 𖼮𖽶𖾐， 𖼷𖽑𖽻𖾐 𖼀𖽺 𖼞𖽑𖽶𖾑 𖼹𖽻𖾐 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼄𖽳 𖼻𖽙 𖼮𖽑𖽡𖽪 𖼈𖽳 𖼄𖽙𖾐 𖽃𖽶𖾐 𖼮𖽸 𖼺𖽺𖾑， 𖼽𖽻 𖼈𖽳𖾐 𖼞𖽳𖾐 𖼈𖽧 𖼐𖽑𖽳𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼍𖽶𖾐． 2 𖼷𖽑𖽻𖾐 𖼊𖽑𖽡 𖼹𖽻𖾐 𖼀𖽦𖾐：“𖼣𖽙𖾐 𖼈𖽳𖾐 𖼐𖽺𖾐 𖼣𖽙𖾐 𖼈𖽳𖾐 𖼞𖽳𖾐 𖼻𖽙 𖼄𖽡𖾐 𖼐𖽜𖾐 𖼦𖽑𖽔𖾐 𖼮𖽶𖾐 𖼄𖽨， 𖼷𖽙𖾐 𖼺𖽳 𖼣𖽙𖾐 𖼈𖽳𖾐 𖼊𖽑𖽺 𖼞𖽜 𖼺𖽺𖾑， 𖼣𖽙𖾐 𖼈𖽳𖾐 𖼞𖽜 𖽂𖽙𖾐 𖼠𖽙𖾑 𖼊𖽙𖾐 𖼖𖽡𖾐．”3 𖼷𖽑𖽻𖾐 𖼊𖽑𖽡 𖼹𖽻𖾐 𖼦𖽑𖽔𖾐 𖼖𖽺𖾑 𖼀𖽦𖾐：“𖼦𖽑𖽦 𖼄𖽦 𖼐𖽑𖽡𖾐 𖼦𖽑𖽦 𖼠𖽻𖾐 𖼞𖽑𖽶𖾐， 𖼣𖽙𖾐 𖼈𖽳𖾐 𖼽𖽻 𖼄𖽳𖾑 𖼞𖽳𖾐 𖼄𖽡𖾐 𖼮𖽑𖽙𖾐、 𖼺𖽳 𖼖𖽳 𖼊𖽻𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼐𖽺𖾐 𖼦𖽑𖽺𖾐 𖼀𖽑𖽨 𖼺𖽙𖾐 𖼊𖽑𖽺 𖼞𖽜 𖼮𖽙𖾐 𖼺𖽺𖾑， 𖼷𖽙𖾐 𖼺𖽳 𖼮𖽡𖽺𖾐 𖽂𖽙𖾐 𖼺𖽺．”
4 𖼹𖽦𖾑 𖼷𖽑𖽻𖾐 𖼊𖽑𖽡 𖼹𖽻𖾐 𖼀𖽦𖾐：“𖼣𖽙𖾐 𖼈𖽳𖾐 𖼄𖽡𖾐 𖼮𖽑𖽙𖾐 𖼐𖽺𖾐 𖼺𖽳 𖼖𖽳 𖼊𖽻𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼀𖽑𖽨 𖼺𖽙𖾐 𖼊𖽑𖽺 𖼞𖽜 𖼮𖽙𖾐 𖼺𖽺𖾑， 𖼮𖽡 𖼀𖽑𖽡 𖼮𖽑𖽶 𖼂𖽻𖾐 𖼖𖽻𖾐 𖼳𖽚𖾐 𖼳𖽕𖾐 𖼈𖽪𖾐 𖼍𖽦 𖼊𖽑𖽺 𖽂𖽙𖾐 𖼞𖽜 𖼺𖽺． 5 𖼣𖽙𖾐 𖼈𖽳𖾐 𖼐𖽺𖾐 𖼣𖽙𖾐 𖼈𖽳𖾐 𖼞𖽳𖾐 𖼈𖽧 𖼐𖽑𖽳𖾐 𖼊𖽑𖽡 𖼮𖽑𖽪𖾐 𖼳𖽶 𖼷𖽑𖽻𖾐 𖼍𖽺𖾑 𖼣𖽻𖾐， 𖼣𖽙𖾐 𖼈𖽳𖾐 𖼞𖽳𖾐 𖼻𖽙 𖼄𖽡𖾐 𖼐𖽜𖾐 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼻𖽙 𖼄𖽡𖾐 𖼐𖽜𖾐 𖼖𖽺𖾑 𖼷𖽙𖾐 𖼖𖽙𖾐 𖼺𖽶𖾑． 𖼦𖽑𖽻𖾐 𖼊𖽑𖽻𖾐， 𖼣𖽙𖾐 𖼈𖽳𖾐 𖼞𖽳𖾐 𖼄𖽡𖾐 𖼮𖽑𖽙𖾐 𖼐𖽺𖾐 𖼺𖽳 𖼖𖽳 𖼊𖽻𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼺𖽙𖾐 𖼷𖽺𖾐 𖼀𖽑𖽢 𖼦𖽑𖽙𖾐 𖼦𖽑𖽻𖾐 𖼺𖽺𖾑， 𖼣𖽙𖾐 𖼈𖽳𖾐 𖼽𖽻 𖼄𖽳𖾑 𖼻𖽙 𖼄𖽡𖾐 𖼐𖽜𖾐 𖼊𖽑𖽺 𖼞𖽕 𖼺𖽙𖾐 𖼞𖽳𖾐 𖼀𖽑𖽚𖾐 𖼀𖽑𖽙 𖼀𖽑𖽚𖾐 𖼄𖽙𖾐 𖼂𖽺𖾐， 𖼣𖽙𖾐 𖼈𖽳𖾐 𖼞𖽳𖾐 𖼻𖽙 𖼄𖽳 𖼊𖽑𖽡 𖼹𖽻𖾐 𖼀𖽑𖽚𖾐 𖼄𖽙𖾐 𖼂𖽺𖾐 𖼍𖽳𖾐 𖼦𖽑𖽻𖾐， 𖼣𖽙𖾐 𖼈𖽳𖾐 𖼈𖽳 𖼞𖽑𖽚 𖼖𖽻𖾐 𖼞𖽳𖾐 𖽂𖽙 𖼐𖽑𖽡𖾐 𖼄𖽔 𖼮𖽻𖾐．”
𖼐𖽑𖽧 𖼳𖽡𖾐 𖼄𖽡 𖼞𖽑𖽻𖾑 𖼷𖽶 𖼄𖽻 𖼐𖽺𖾐 𖼈𖽪𖾑 𖼷𖽪𖾐 𖼊𖽑𖽺 𖼦𖽑𖽳𖾐 𖼄𖽪𖾑
6 𖼣𖽙𖾐 𖼽𖽻 𖼈𖽳𖾐 𖼞𖽳𖾐 𖼷𖽳𖾑 𖼮𖽑𖽡𖽪 𖼐𖽺𖾐 𖼞𖽑𖽙𖾐 𖼦𖽑𖽺 𖼺𖽪𖾐 𖼄𖽡𖽻 𖼦𖽑𖽺𖾑 𖼊𖽻 𖼮𖽨 𖼺𖽺𖾑， 𖼦𖽑𖽔𖾐 𖼮𖽶𖾐 𖼀𖽶 𖼻𖽶． 7 𖼣𖽙𖾐 𖼹𖽳𖾐 𖼄𖽙𖾐 𖼣𖽝 𖼐𖽦𖾐 𖼦𖽑𖽙𖾐 𖼠𖽙𖾑 𖼍𖽻𖾐， 𖼀𖽑𖽶 𖼊𖽴 𖼷𖽑𖽻𖾐 𖼐𖽺𖾐 𖼷𖽶 𖼄𖽻 𖼊𖽑𖽺 𖼦𖽑𖽳𖾐， 𖼀𖽦𖾐： “𖼐𖽑𖽡𖾐 𖼈𖽳𖾐 𖼮𖽡 𖼀𖽑𖽡 𖼈𖽺𖾐 𖼽𖽻 𖼄𖽳𖽳𖾑 𖼈𖽧 𖼐𖽑𖽳𖾐 𖼊𖽑𖽺 𖼮𖽑𖽶 𖼣𖽙𖾑 𖼺𖽺𖾑 𖼖𖽡𖾑 𖼠𖽜𖾐．” 𖼦𖽑𖽺𖾑 𖼖𖽙𖾐 𖼀𖽙𖾐 𖼺𖽺𖾑， 𖼣𖽙𖾐 𖼷𖽑𖽻𖾐 𖼊𖽑𖽡 𖼷𖽪𖾐 𖽃𖽶𖾐 𖼂𖽻𖾐 𖼖𖽻𖾐， 𖼽𖽻 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼖𖽡𖾑 𖼠𖽜𖾐 𖼺𖽪𖾐 𖼊𖽑𖽺 𖼦𖽑𖽳𖾐．
8 𖼣𖽙𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖼈𖽳𖾐 𖽂𖽙 𖼊𖽑𖽧 𖼄𖽙𖾐 𖼞𖽑𖽻𖾑 𖼈𖽪 𖼺𖽺𖾑 𖼞𖽑𖽻𖾐 𖼂𖽻𖾑 𖼀𖽑𖽙 𖼊𖽑𖽺 𖼞𖽜 𖼦𖽑𖽙𖾐 𖼺𖽪𖾐， 𖽃𖽔 𖼐𖽺𖾑 𖼞𖽳𖾐 𖼈𖽧 𖼐𖽑𖽳𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼈𖽳 𖼞𖽑𖽚 𖼖𖽻𖾐． 𖼦𖽑𖽻𖾐 𖼊𖽑𖽻𖾐， 𖼐𖽑𖽡𖾐 𖼈𖽳𖾐 𖼦𖽑𖽔𖾐 𖼖𖽺𖾑 𖼽𖽻 𖼄𖽳𖾑 𖼞𖽳𖾐 𖼈𖽧 𖼐𖽑𖽳𖾐 𖼊𖽑𖽺 𖼈𖽪 𖼦𖽑𖽙𖾐 𖼺𖽺𖾑， 𖼣𖽙𖾐 𖼈𖽳𖾐 𖼞𖽜 𖼹𖽦𖾑 𖼈𖽳 𖼞𖽑𖽚 𖼖𖽻𖾐 𖼊𖽻𖾐 𖼖𖽔𖾑？” 𖼽𖽻 𖼈𖽳𖾐 𖼍𖽧𖾑 𖼊𖽧𖾐 𖼊𖽧𖾐 𖼮𖽻𖾐， 𖼊𖽑𖽡 𖼳𖽶 𖼖𖽺𖾑 𖼀𖽦𖾐 𖼖𖽚𖾐 𖼂𖽚𖾐 𖼄𖽔 𖼮𖽻𖾐．
9 𖼣𖽙𖾐 𖼹𖽦𖾑 𖼀𖽦𖾐：“𖼐𖽑𖽡𖾐 𖼈𖽳𖾐 𖼄𖽡𖽻 𖼦𖽑𖽺𖾑 𖼮𖽨𖾐 𖼂𖽺𖾐 𖼄𖽔 𖼀𖽑𖽢． 𖼮𖽡𖾐 𖼂𖽦𖾐 𖼞𖽜 𖽃𖽔 𖼐𖽺𖾑 𖼊𖽑𖽺 𖼊𖽑𖽜𖾐 𖼀𖽑𖽧𖾐 𖼄𖽔 𖼻𖽻𖾐 𖼖𖽙𖾐 𖼀𖽙𖾐 𖼺𖽺𖾑， 𖼐𖽑𖽡𖾐 𖼈𖽳𖾐 𖼊𖽻 𖼊𖽑𖽜𖾐 𖼄𖽡𖽻 𖼂𖽺𖾐， 𖼞𖽑𖽶𖾑 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐 𖼐𖽑𖽧𖾐 𖼄𖽙𖾐 𖼮𖽻𖾐 𖼖𖽡𖾐． 10 𖽃𖽔𖾑 𖼄𖽳𖾐 𖼮𖽑𖽻𖾐 𖼍𖽪𖾐 𖼣𖽙𖾐 𖼐𖽺𖾐 𖼣𖽙𖾐 𖼐𖽑𖽳𖾐 𖼄𖽻、 𖼣𖽙𖾐 𖼞𖽳𖾐 𖼮𖽜𖾐 𖼀𖽑𖽙， 𖼣𖽙𖾐 𖼈𖽳𖾐 𖼀𖽑𖽨𖾐 𖼀𖽑𖽡 𖼐𖽺𖾐 𖼷𖽙𖾐 𖼺𖽳 𖼮𖽑𖽶 𖼣𖽙𖾑 𖼷𖽑𖽻𖾐 𖼀𖽺 𖼊𖽑𖽺 𖼞𖽜 𖼞𖽑𖽶𖾑 𖼮𖽶𖾐， 𖽃𖽔 𖼐𖽺𖾑 𖼊𖽑𖽡 𖼽𖽚𖾐 𖼖𖽺𖾑 𖼽𖽻 𖼈𖽳𖾐 𖼞𖽳𖾐 𖼖𖽡𖾑 𖽂𖽙𖾐 𖼠𖽜𖾐 𖼄𖽔 𖼊𖽙𖾐． 11 𖼐𖽑𖽡𖾐 𖼈𖽳𖾐 𖽃𖽙𖾑 𖼐𖽑𖽡𖾐 𖼹𖽦𖾐 𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼮𖽑𖽙𖾐、 𖼺𖽳 𖼖𖽳 𖼊𖽻𖾐 𖼮𖽑𖽨𖾐 𖼖𖽪𖾐 𖼞𖽪𖾐、 𖽃𖽔 𖼮𖽑𖽙 𖼮𖽑𖽨𖾐 𖼖𖽪𖾐 𖼞𖽪𖾐、 𖼦𖽑𖽺𖾐， 𖼹𖽦𖾑 𖼐𖽑𖽡𖾐 𖼈𖽳𖾐 𖼽𖽻 𖼈𖽳𖾐 𖼞𖽳𖾐 𖼞𖽑𖽙𖾐 𖼠𖽜𖾐 𖼺𖽪𖾐， 𖼦𖽑𖽙𖾐 𖼀𖽜𖾐 𖼊𖽑𖽡 𖼀𖽜𖾐 𖼞𖽳𖾐 𖼖𖽡𖾑、 𖼷𖽙𖾐 𖼺𖽳、 𖼮𖽶𖾐 𖼀𖽳 𖼐𖽺𖾐 𖼷𖽑𖽳𖾐， 𖼄𖽳𖾑 𖼄𖽳 𖼈𖽺𖾐 𖼽𖽻 𖼈𖽳𖾐 𖼊𖽑𖽺 𖼞𖽑𖽚 𖼖𖽡𖾐．”
12 𖼽𖽻 𖼈𖽳𖾐 𖼊𖽻 𖼞𖽑𖽚：“𖼣𖽙𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼞𖽑𖽚 𖼊𖽻𖾐， 𖽃𖽔𖾑 𖼄𖽳𖾐 𖼮𖽑𖽻𖾐 𖼍𖽪𖾐 𖼽𖽻 𖼈𖽳𖾐 𖼞𖽳𖾐 𖼖𖽡𖾑 𖼄𖽔 𖼠𖽜𖾐 𖼊𖽻𖾐， 𖼐𖽑𖽡𖾐 𖽃𖽔 𖼊𖽺𖾐 𖼀𖽦𖾐， 𖼣𖽙𖾐 𖼈𖽳𖾐 𖼐𖽑𖽧𖾐 𖼺𖽳 𖼄𖽙𖾐 𖼐𖽑𖽡𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐 𖼊𖽻𖾐．” 𖽃𖽔𖾐 𖼺𖽺𖾑， 𖼣𖽙𖾐 𖼍𖽡𖾐 𖼄𖽻 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐， 𖼷𖽑𖽻𖾐 𖼄𖽳𖾑 𖼄𖽳 𖼞𖽜 𖼄𖽳𖾐 𖼷𖽑𖽦𖾐， 𖼊𖽻 𖼂𖽪𖾑 𖼦𖽑𖽺𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐 𖼊𖽻𖾐．
13 𖼣𖽙𖾐 𖼐𖽑𖽧𖾐 𖼄𖽙𖾐 𖼰𖽙𖾐 𖼞𖽳𖾐 𖼀𖽑𖽡𖽻𖾐 𖼷𖽑𖽶 𖼠𖽙𖾐 𖼺𖽺𖾑， 𖼀𖽦𖾐：“𖼊𖽻 𖼂𖽪𖾑 𖼦𖽑𖽺𖾑 𖼖𖽙𖾐 𖼮𖽑𖽻𖾐 𖼄𖽔 𖼂𖽺𖾐 𖼺𖽪𖾐， 𖽂𖽙 𖼺𖽙𖾐 𖼂𖽙𖾐 𖼞𖽜 𖼖𖽺𖾑 𖼽𖽻 𖼊𖽑𖽺 𖼦𖽑𖽺𖾑 𖼖𖽙𖾐 𖼺𖽶𖾑 𖼠𖽙𖾐 𖼺𖽺𖾑， 𖼽𖽻 𖼞𖽳𖾐 𖽃𖽔𖾑 𖼞𖽑𖽶𖾐 𖼐𖽺𖾐 𖼄𖽡𖾐 𖼳𖽡𖽪 𖼊𖽑𖽺 𖼠𖽙𖾐 𖼞𖽳𖾐 𖼦𖽑𖽙𖾐， 𖼄𖽔 𖼮𖽻𖾐 𖼦𖽑𖽻𖾐 𖼰𖽶𖾐 𖼮𖽑𖽡𖾐 𖼖𖽡𖾐．” 𖼷𖽑𖽻𖾐 𖼄𖽳𖾑 𖼄𖽳 “𖽃𖽔 𖼄𖽜! ” 𖼀𖽦𖾐 𖼺𖽺𖾑， 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽪𖾐 𖼮𖽑𖽳． 𖼷𖽑𖽻𖾐 𖼄𖽳𖾑 𖼄𖽳 𖼦𖽑𖽺𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐．
𖼐𖽑𖽧 𖼳𖽡𖾐 𖼄𖽡 𖼐𖽑𖽧𖾐 𖼄𖽙𖾐 𖼠𖽕𖾐 𖼰𖽶𖾐 𖼺𖽡 𖼮𖽡𖾐
14 𖼽𖽕𖾑 𖼍𖽕 𖼳𖽡𖽱𖾐 𖼳𖽡𖾐 𖼈𖽪𖾐 𖼍𖽦 𖼂𖽺𖾐 𖼐𖽑𖽡 𖼷𖽑𖽡𖾐 𖼞𖽑𖽚 𖼮𖽑𖽻𖾐 𖼺𖽙𖾐 𖼷𖽑𖽡𖾐 𖼐𖽑𖽡 𖼞𖽑𖽚 𖼖𖽙𖾐 𖼮𖽑𖽡𖾐， 𖼞𖽑𖽶𖾑 𖼣𖽙𖾐 𖼊𖽑𖽺 𖼹𖽡𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼷𖽶 𖼄𖽻 𖼈𖽳 𖼂𖽺𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼣𖽻𖾐， 𖼦𖽑𖽺𖾑 𖼷𖽑𖽡𖾐 𖼐𖽑𖽡 𖼞𖽑𖽚 𖼠𖽻𖾐 𖼞𖽑𖽶𖾐， 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼷𖽶 𖼄𖽻 𖼈𖽳 𖼊𖽑𖽺 𖼞𖽜 𖼷𖽻 𖼺𖽪𖾐 𖽂𖽙 𖼀𖽑𖽶 𖼷𖽙 𖼊𖽪𖾐， 𖼣𖽙𖾐 𖼐𖽺𖾐 𖼣𖽙𖾐 𖼐𖽑𖽳𖾐 𖼄𖽻 𖼠𖽜𖾐 𖼷𖽙 𖼄𖽔 𖼠𖽚． 15 𖽃𖽙𖾑 𖼄𖽺 𖼊𖽑𖽙 𖼞𖽳𖾐 𖼷𖽶 𖼄𖽻 𖼞𖽑𖽶𖾑 𖼹𖽻𖾐， 𖼷𖽑𖽻𖾐 𖼀𖽺 𖼊𖽑𖽺 𖼮𖽑𖽡𖾐 𖼻𖽸， 𖼊𖽑𖽡 𖼐𖽑𖽡𖾑 𖼊𖽑𖽡 𖼐𖽑𖽡𖾐 𖼷𖽑𖽻𖾐 𖼀𖽺 𖼞𖽳𖾐 𖼷𖽙𖾐 𖼺𖽳 𖼐𖽺𖾐 𖼮𖽶𖾐 𖼀𖽳 𖼠𖽜𖾐， 𖼹𖽦𖾑 𖼀𖽑𖽨𖾐 𖼖𖽡𖾐 𖼖𖽙 𖼣𖽙 𖼷𖽑𖽺𖾐 𖼠𖽜𖾐． 𖼽𖽻 𖼈𖽳𖾐 𖼞𖽳𖾐 𖼮𖽜𖾐 𖼀𖽑𖽙 𖼖𖽺𖾑 𖼷𖽑𖽻𖾐 𖼀𖽺 𖼊𖽑𖽺 𖼮𖽑𖽡𖾐 𖼻𖽸， 𖼦𖽑𖽻𖾐 𖼊𖽑𖽻𖾐 𖼣𖽙𖾐 𖽂𖽙 𖼺𖽙 𖼂𖽙𖾐 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐 𖼺𖽺𖾑， 𖼦𖽑𖽺𖾑 𖼖𖽙𖾐 𖼺𖽶𖾑 𖼄𖽔 𖼂𖽺𖾐．
16 𖼣𖽙𖾐 𖼊𖽑𖽡 𖼐𖽑𖽧𖾐 𖼄𖽙𖾐 𖼖𖽪𖾐 𖼰𖽻𖾐 𖼷𖽑𖽧𖾐 𖼺𖽺𖾑， 𖼄𖽡𖾐 𖼮𖽑𖽙𖾐 𖼄𖽔 𖼈𖽳𖾐， 𖼣𖽙𖾐 𖼞𖽳𖾐 𖼮𖽜𖾐 𖼀𖽑𖽙 𖼖𖽺𖾑 𖼖𖽻𖾐 𖼞𖽑𖽶𖾑 𖼠𖽻𖾐 𖼻𖽶𖾑 𖼖𖽻𖾐 𖼄𖽡𖽻 𖼄𖽪𖾐． 17 𖼣𖽙𖾐 𖼖𖽙𖾐 𖼮𖽑𖽻𖾐 𖼹𖽙𖾐 𖼹𖽶𖾐 𖼞𖽳𖾐 𖼷𖽙𖾐 𖼷𖽙 𖼺𖽪𖾐， 𖼞𖽑𖽶𖾑 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼷𖽶 𖼄𖽻 𖼊𖽑𖽡 𖼦𖽑𖽙𖾐 𖼣𖽙 𖼷𖽑𖽡𖾐 𖼽𖽚𖾐 𖼮𖽻𖾐， 𖼹𖽦𖾑 𖼣𖽙𖾐 𖼈𖽳𖾐 𖼞𖽕 𖼰𖽡𖽺𖾐 𖼞𖽳𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼷𖽑𖽻𖾐 𖼖𖽺𖾑 𖼮𖽑𖽻𖾐． 18 𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼷𖽙 𖼖𖽚𖾐 𖼂𖽚𖾐， 𖼐𖽑𖽡 𖼊𖽑𖽡 𖼮𖽑𖽡𖾐、 𖽃𖽔𖾑 𖼮𖽑𖽸 𖼽𖽻𖾐 𖼷𖽑𖽪𖾐 𖼺𖽪𖾐 𖼮𖽑𖽡𖽚 𖼖𖽜 𖼂𖽺𖾐 𖼳𖽡𖽻𖾐 𖼖𖽡𖾐， 𖼦𖽑𖽔𖾐 𖼖𖽺𖾑 𖼣𖽙𖾐 𖼖𖽙𖾐 𖼀𖽙𖾐 𖼣𖽕𖾐 𖼊𖽑𖽡 𖼹𖽻𖾐 𖼂𖽺𖾐 𖼳𖽡𖽻𖾐；𖼹𖽦𖾑 𖼷𖽑𖽡𖾐 𖼐𖽑𖽡𖾐 𖼊𖽑𖽡 𖼂𖽦𖾑， 𖼞𖽑𖽙𖾐 𖼣𖽻𖾐 𖼳𖽶 𖼮𖽶𖾐 𖼀𖽳 𖼄𖽨 𖼄𖽨 𖼂𖽺𖾐 𖼳𖽡𖽻𖾐 𖼖𖽡𖾐． 𖼦𖽑𖽺𖾑 𖼻𖽻𖾐 𖼣𖽻𖾐 𖼊𖽑𖽻𖾐， 𖼣𖽙𖾐 𖼦𖽑𖽔𖾐 𖼖𖽺𖾑 𖼷𖽶 𖼄𖽻 𖼈𖽳 𖼊𖽑𖽺 𖼞𖽜 𖼷𖽻 𖼺𖽪𖾐 𖽂𖽙 𖼀𖽑𖽶 𖼷𖽙 𖼊𖽪𖾐 𖼞𖽑𖽶𖾑 𖼄𖽔 𖼰𖽙𖾐， 𖼞𖽪𖾐 𖼮𖽡𖽺𖾐 𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼄𖽡𖽻 𖼖𖽡 𖼄𖽪𖾐 𖼦𖽑𖽔𖾐 𖼮𖽶𖾐 𖼳𖽚𖾑 𖼞𖽑𖽪．
19 “𖼣𖽙𖾐 𖼞𖽳𖾐 𖼺𖽡 𖼀𖽑𖽙 𖽃𖽔𖾐! 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐， 𖼣𖽙𖾐 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼞𖽜， 𖼣𖽙𖾐 𖼷𖽑𖽻𖾐 𖼀𖽺 𖼦𖽑𖽺𖾑 𖼹𖽻𖾐 𖼖𖽙𖾐 𖼀𖽙𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼊𖽑𖽺 𖼦𖽙𖾑 𖼮𖽑𖽡 𖼞𖽜， 𖼮𖽡 𖼽𖽡𖾑 𖼣𖽙𖾐 𖼊𖽑𖽺 𖼄𖽻𖾑 𖼞𖽜．”