𖼷𖽑𖽔𖾐 𖼂𖽔𖾐 𖼖𖽔𖾐 𖼖𖽪𖾐 𖼰𖽻𖾐 𖼷𖽑𖽧𖾐 𖼞𖽳𖾐 𖼀𖽨 𖼮𖽳 𖼊𖽡 𖼮𖽑𖽻
6
1 𖼷𖽑𖽔𖾐 𖼂𖽔𖾐 𖼖𖽔𖾐、 𖼍𖽙𖾐 𖼂𖽡 𖼽𖽔、 𖽃𖽔𖾐 𖼖𖽔𖾐 𖼂𖽚 𖼺𖽪𖾐 𖼷𖽑𖽻𖾐 𖼰𖽡𖾐 𖼳𖽕𖾑 𖼐𖽺𖾐 𖼣𖽙𖾐 𖼈𖽳𖾐 𖼞𖽳𖾐 𖼠𖽳𖾐 𖼖𖽪𖾐 𖼮𖽡𖾐 𖼂𖽦𖾐 𖼊𖽻 𖼮𖽨， 𖼣𖽙𖾐 𖼖𖽪𖾐 𖼰𖽻𖾐 𖼷𖽑𖽧𖾐 𖼂𖽚𖾐 𖼀𖽑𖽢 𖼦𖽑𖽻𖾐， 𖼮𖽑𖽡𖽦 𖼊𖽪 𖼊𖽑𖽡 𖼄𖽦𖾐 𖼖𖽺𖾑 𖼄𖽔 𖼮𖽻𖾐 𖼦𖽑𖽙𖾐． 𖼦𖽑𖽻𖾐 𖼊𖽑𖽻𖾐， 𖼞𖽑𖽶𖾑 𖼮𖽶𖾐 𖼣𖽙𖾐 𖼖𖽪𖾐 𖽃𖽔𖾑 𖼊𖽪 𖼀𖽑𖽡 𖼄𖽔 𖽂𖽙𖾐 𖼍𖽴𖾑 𖼍𖽪𖾐 𖼖𖽻𖾐 𖼺𖽺． 2 𖼷𖽑𖽔𖾐 𖼂𖽔𖾐 𖼖𖽔𖾐 𖼐𖽺𖾐 𖼰𖽡𖾐 𖼳𖽕𖾑， 𖼷𖽑𖽻𖾐 𖼹𖽡𖾐 𖼣𖽙𖾐 𖼊𖽑𖽺 𖼄𖽡𖽻𖾐 𖼖𖽻𖾐 𖼺𖽺𖾑， 𖼀𖽦𖾐：“𖼐𖽑𖽡𖾐 𖼖𖽻𖾐 𖽃𖽔𖾐 𖼐𖽔𖾑 𖼊𖽺𖾐 𖼠𖽻𖾐 𖼊𖽑𖽺 𖼮𖽑𖽡𖽦𖾐 𖼠𖽻𖾐 𖼊𖽑𖽡 𖼊𖽝𖾐 𖼞𖽳𖾐 𖼣𖽙𖾐 𖼖𖽙𖾐 𖼄𖽡𖽻𖾐 𖼖𖽡𖾐．”𖼽𖽻 𖼈𖽳𖾐 𖼣𖽙𖾐 𖼊𖽑𖽺 𖼦𖽹𖾑 𖼊𖽡 𖼮𖽑𖽻 𖼺𖽪𖾐 𖼣𖽻𖾐． 3 𖽃𖽔𖾐 𖼺𖽺𖾑， 𖼣𖽙𖾐 𖼹𖽡𖾐 𖼖𖽦 𖼹𖽡𖾐 𖼂𖽡𖾐 𖼽𖽡𖾐， 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖽃𖽔𖾑 𖼄𖽳𖾐 𖼖𖽪𖾐 𖼰𖽻 𖼷𖽑𖽧𖾐 𖼄𖽡𖽻 𖼰𖽡， 𖼐𖽑𖽡𖾐 𖼈𖽳𖾐 𖼖𖽙𖾐 𖼄𖽡𖽻𖾐 𖼄𖽔 𖼄𖽳𖾐． 𖼣𖽙𖾐 𖼄𖽡𖽻 𖼦𖽑𖽺𖾑 𖼀𖽑𖽨 𖼐𖽙 𖼺𖽺𖾑， 𖼽𖽡𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽡𖽻𖾐 𖼀𖽑𖽢 𖼊𖽙𖾐 𖼖𖽔𖾑？”
4 𖼽𖽻 𖼈𖽳𖾐 𖼖𖽡𖾐 𖼂𖽦𖾑 𖼦𖽑𖽺𖾑 𖼖𖽙𖾐 𖼺𖽶𖾑 𖼷𖽑𖽻𖾐 𖼹𖽡𖾐 𖼣𖽙𖾐 𖼊𖽑𖽺 𖼄𖽡𖽻𖾐 𖼖𖽻𖾐， 𖼣𖽙𖾐 𖼊𖽑𖽡 𖼰𖽻𖾑 𖼰𖽻𖾐 𖼽𖽻 𖼈𖽳𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼊𖽻 𖼞𖽑𖽚 𖼺𖽪𖾐 𖼣𖽻𖾐． 5 𖼷𖽑𖽔𖾐 𖼂𖽔𖾐 𖼖𖽔𖾐 𖼹𖽦𖾑 𖼣𖽙 𖼂𖽦𖾑 𖼞𖽑𖽶𖾑 𖼂𖽦𖾑 𖼽𖽻 𖼮𖽜𖾐 𖼀𖽑𖽙 𖼊𖽑𖽺 𖼹𖽡𖾐 𖼣𖽙𖾐 𖼖𖽙𖾐 𖼄𖽡𖽻𖾐 𖼖𖽻𖾐， 𖼺𖽪𖾑 𖼮𖽑𖽙𖾐 𖼮𖽑𖽡𖽺 𖼄𖽔 𖼐𖽝 𖼍𖽡 𖼺𖽪𖾐 𖼊𖽑𖽡 𖼮𖽑𖽙𖾐 𖼈𖽺𖾐 𖼍𖽳𖾐． 6 𖼺𖽪𖾑 𖼮𖽑𖽙𖾐 𖼊𖽑𖽺 𖼦𖽑𖽺𖾑 𖼖𖽙𖾐 𖼺𖽶𖾑 𖼈𖽝 𖼺𖽪𖾐 𖼣𖽻𖾐：
“𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼠𖽻𖾐 𖼞𖽑𖽶𖾐 𖼦𖽑𖽺𖾑 𖼻𖽻𖾐 𖼦𖽑𖽺 𖼊𖽻 𖼮𖽨， 𖼰𖽡𖽔𖾐 𖼳𖽶𖾐 𖼄𖽪𖾑 \fr 6．6 \ft “𖼰𖽡𖽔𖾐 𖼳𖽶𖾐 𖼄𖽪𖾑 ” 𖼦𖽑𖽺𖾑 “𖼰𖽡𖾐 𖼳𖽕𖾑 ” 𖼣𖽻𖾐． 𖼖𖽺𖾑 𖼀𖽦𖾐：‘ 𖼐𖽑𖽡𖾐 𖼐𖽺𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼀𖽑𖽚𖾐 𖼊𖽦 𖼊𖽻𖾐 𖼺𖽺𖾑， 𖼐𖽑𖽡𖾐 𖼖𖽪𖾐 𖼰𖽻𖾐 𖼷𖽑𖽧𖾐 𖼂𖽚𖾐， 𖼣𖽙𖾐 𖼦𖽑𖽔𖾐 𖼖𖽺𖾑 𖼊𖽻 𖼮𖽨， 𖼐𖽑𖽡𖾐 𖼽𖽻 𖼈𖽳𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐 𖼊𖽡 𖼮𖽑𖽻．’ 7 𖼐𖽑𖽡𖾐 𖼹𖽦𖾑 𖼺𖽡𖾐 𖼻𖽙 𖼹𖽡𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼈𖽪𖾐 𖼍𖽦 𖼮𖽻𖾐 𖼊𖽻𖾐．’
𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽻 𖼂𖽪𖾑 𖼦𖽑𖽺𖾑 𖼀𖽦𖾐 𖼈𖽪𖾐 𖼍𖽦 𖼞𖽳𖾐 𖼮𖽑𖽡𖾐 𖼽𖽡𖾐 𖼊𖽻𖾐． 𖽃𖽔𖾐 𖼺𖽺𖾑 𖼐𖽑𖽡𖾐 𖼖𖽻𖾐， 𖽃𖽔 𖼐𖽺𖾑 𖼷𖽙𖾐 𖼖𖽙𖾐 𖼮𖽑𖽻𖾐 𖼄𖽡𖽻 𖼊𖽑𖽡 𖼠𖽙𖾐 𖼷𖽜𖾐 𖼀𖽜𖾐．”
8 𖼣𖽙𖾐 𖼽𖽻 𖼊𖽑𖽺 𖼊𖽻 𖼞𖽑𖽚 𖼀𖽦𖾐：“𖼐𖽑𖽡𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼣𖽻𖾐 𖼄𖽔 𖼮𖽶𖾐， 𖼄𖽳𖾑 𖼄𖽳 𖼖𖽺𖾑 𖼐𖽑𖽡𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼮𖽑𖽻𖾐 𖼄𖽔 𖼠𖽕𖾐 𖼣𖽝 𖼊𖽑𖽧 𖼖𖽻𖾐 𖼺𖽪𖾐 𖼣𖽻𖾐．”
9 𖼦𖽑𖽻𖾐 𖼊𖽑𖽻𖾐， 𖼽𖽻 𖼈𖽳𖾐 𖼣𖽙𖾐 𖼈𖽳𖾐 𖼊𖽑𖽺 𖼰𖽡𖽮𖾐， 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝 𖼺𖽺𖾑 𖼀𖽦𖾐：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖽂𖽙 𖼄𖽔 𖼐𖽑𖽡𖾐 𖼊𖽻𖾐， 𖽃𖽔𖾐 𖼺𖽺𖾑 𖼖𖽪𖾐 𖼰𖽻𖾐 𖼦𖽑𖽺𖾑 𖼄𖽔 𖼷𖽑𖽧𖾐， 𖼀𖽑𖽨 𖼐𖽙 𖼦𖽑𖽙𖾐 𖼊𖽻𖾐．” 𖽂𖽙 𖼺𖽙𖾐 𖼂𖽙𖾐 𖽃𖽔𖾐， 𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐， 𖼣𖽙𖾐 𖼖𖽦 𖼀𖽑𖽦𖾐 𖼞𖽜 𖼠𖽳𖾐 𖼠𖽳𖾐 𖽂𖽙 𖼐𖽑𖽡𖾐 𖼞𖽜．
𖼳𖽶𖾑 𖼄𖽔 𖼽𖽔 𖼞𖽳𖾐 𖼰𖽡𖽮𖾐 𖼊𖽻
10 𖼊𖽑𖽡 𖼐𖽑𖽡𖾐 𖼮𖽻𖾐， 𖼣𖽙𖾐 𖼖𖽻𖾐 𖼺𖽺𖾑 𖼄𖽡 𖼳𖽡𖾐 𖼍𖽕𖾑 𖼂𖽡𖽦 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐， 𖼍𖽧𖾑 𖼖𖽦 𖼽𖽔 𖼞𖽳𖾐 𖼻𖽙 𖼳𖽶𖾑 𖼄𖽔 𖼽𖽔 𖼞𖽳𖾐 𖽃𖽔𖾑 𖼞𖽑𖽶𖾐 𖼮𖽑𖽡𖾐． 𖼞𖽑𖽶𖾑 𖼮𖽶𖾐， 𖽃𖽔𖾑 𖼊𖽪 𖼂𖽡𖾑 𖼍𖽡 𖼽𖽻 𖼄𖽔 𖼊𖽚𖾐 𖼽𖽡𖾐， 𖼽𖽻 𖼀𖽦𖾐：“𖽃𖽔 𖼐𖽺𖾑 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼷𖽙𖾐 𖼖𖽙𖾐 𖼄𖽡𖽻𖾐 𖼖𖽻𖾐， 𖽃𖽔 𖼐𖽺𖾑 𖼺𖽡 𖼮𖽡𖾐 𖼦𖽑𖽺𖾐 𖽃𖽔𖾑 𖼊𖽪 𖼂𖽡𖾑 𖼍𖽡 𖼖𖽡𖾐， 𖼞𖽪𖾐 𖼮𖽡𖽺𖾐 𖼽𖽻 𖼈𖽳𖾐 𖼖𖽻𖾐 𖼐𖽑𖽡𖾐 𖼊𖽑𖽺 𖼺𖽦 𖼊𖽻𖾐， 𖼄𖽶 𖼮𖽑𖽧 𖼖𖽻𖾐 𖼐𖽑𖽡𖾐 𖼊𖽑𖽺 𖼺𖽦 𖼊𖽻𖾐．”
11 𖼣𖽙𖾐 𖼊𖽻 𖼞𖽑𖽚 𖼀𖽦𖾐：“𖼣𖽙𖾐 𖼖𖽙𖾐 𖼺𖽶𖾑 𖼦𖽑𖽺𖾑 𖼳𖽶 𖼷𖽑𖽻𖾐， 𖽃𖽔𖾐 𖼹𖽻𖾐 𖼮𖽡𖽪 𖼀𖽑𖽻𖾐 𖼊𖽙𖾐 𖼐𖽺𖾑？ 𖼣𖽙𖾐 𖼖𖽙𖾐 𖼺𖽶𖾑 𖼺𖽪𖾐 𖼷𖽑𖽻𖾐， 𖽃𖽔 𖼺𖽺 𖼽𖽻 𖼄𖽳𖾑 𖼈𖽪𖾑 𖼠𖽻𖾐 𖼖𖽙𖾐 𖼀𖽙𖾐 𖼺𖽺𖾑， 𖼀𖽑𖽻𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐 𖼺𖽪𖾐 𖼮𖽻𖾐 𖼐𖽺𖾑？ 𖼣𖽙𖾐 𖼄𖽔 𖼊𖽡 𖼽𖽡𖾐 𖼊𖽻𖾐．” 12 𖼣𖽙𖾐 𖼐𖽦𖾐 𖼊𖽑𖽧 𖼖𖽻𖾐， 𖽂𖽙 𖼺𖽙𖾐 𖼂𖽙𖾐 𖼽𖽻 𖼊𖽑𖽺 𖼹𖽡𖾐 𖼂𖽻𖾐 𖼖𖽻𖾐 𖼺𖽪𖾐 𖼄𖽔 𖼣𖽻𖾐， 𖼦𖽑𖽺𖾑 𖼽𖽻 𖼊𖽻 𖼊𖽑𖽜𖾐 𖼣𖽙𖾐 𖼊𖽑𖽺 𖼀𖽨 𖼮𖽳 𖼺𖽪𖾐 𖼣𖽻𖾐． 𖼞𖽪𖾐 𖼮𖽡𖽺𖾐， 𖼍𖽙𖾐 𖼂𖽡 𖼽𖽔 𖼐𖽺𖾐 𖼷𖽑𖽔𖾐 𖼂𖽔𖾐 𖼖𖽔𖾐 𖼮𖽡 𖼀𖽑𖽡 𖼈𖽺𖾐 𖼽𖽻 𖼊𖽑𖽺 𖼮𖽜 𖼺𖽪𖾐 𖼣𖽻𖾐． 13 𖼽𖽻 𖼈𖽳𖾐 𖼮𖽡 𖼀𖽑𖽡 𖼈𖽺𖾐 𖼽𖽻 𖼊𖽑𖽺 𖼮𖽜 𖼺𖽪𖾐， 𖼞𖽑𖽶𖾑 𖼽𖽻 𖼞𖽜 𖼣𖽙𖾐 𖼊𖽑𖽺 𖼰𖽡𖽮𖾐， 𖼣𖽙𖾐 𖼞𖽜 𖼽𖽻 𖼀𖽦𖾐 𖼖𖽙𖾐 𖼮𖽑𖽻𖾐 𖼄𖽡𖽻 𖼂𖽺𖾐 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼺𖽺𖾑， 𖼣𖽙𖾐 𖼞𖽳𖾐 𖼄𖽡𖾐 𖼊𖽻 𖼂𖽺𖾐 𖼀𖽑𖽧𖾐， 𖼣𖽙𖾐 𖼊𖽑𖽺 𖼊𖽑𖽜𖾐 𖼀𖽑𖽧𖾐 𖼊𖽡 𖼮𖽑𖽻 𖼺𖽪𖾐 𖼣𖽻𖾐．
14 𖼣𖽙𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖽃𖽔𖾐! 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐， 𖼍𖽙𖾐 𖼂𖽡 𖼽𖽔 𖼐𖽺𖾐 𖼷𖽑𖽔𖾐 𖼂𖽔𖾐 𖼖𖽔𖾐 𖼂𖽺𖾐 𖼊𖽪𖾐 𖼊𖽑𖽺 𖼦𖽙𖾑 𖼮𖽑𖽡 𖼖𖽡𖾐， 𖼽𖽻 𖼈𖽳𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼳𖽶 𖼊𖽻 𖼐𖽙𖾐 𖼖𖽡𖾐， 𖼹𖽦𖾑 𖼻𖽙 𖼄𖽳 𖼺𖽡𖾐 𖼻𖽙 𖼐𖽚 𖼽𖽕𖾑 𖼍𖽡 𖼐𖽺𖾐 𖼠𖽳𖾐 𖼖𖽪𖾐 𖼺𖽡𖾐 𖼻𖽙 𖼊𖽑𖽺 𖼖𖽺𖾑 𖽂𖽙 𖼇𖽕 𖼳𖽶 𖼖𖽡𖾐， 𖼞𖽪𖾐 𖼮𖽡𖽺𖾐 𖼽𖽻 𖼈𖽳𖾐 𖼣𖽙𖾐 𖼊𖽑𖽺 𖼰𖽡𖽮𖾐．
𖼖𖽪𖾐 𖼰𖽻𖾐 𖼷𖽑𖽧𖾐 𖼊𖽑𖽧 𖼖𖽻𖾐 𖼦𖽑𖽻𖾐
15 𖼮𖽑𖽡𖽚 𖼳𖽨𖾐 𖼐𖽑𖽡 𖼷𖽑𖽡𖾐 𖼣𖽙 𖼞𖽑𖽶𖾑 𖼊𖽑𖽡 𖼐𖽑𖽡𖾐， 𖼖𖽪𖾐 𖼰𖽻𖾐 𖼷𖽑𖽧𖾐 𖼊𖽑𖽧 𖼖𖽻𖾐， 𖼄𖽳𖾑 𖼄𖽳 𖼣𖽙 𖼷𖽑𖽡𖾐 𖼐𖽑𖽡 𖼐𖽑𖽡𖾐 𖼷𖽑𖽧𖾐 𖼦𖽑𖽙𖾐． 16 𖼣𖽙𖾐 𖼈𖽳𖾐 𖼞𖽳𖾐 𖼮𖽡𖾐 𖼂𖽦𖾐 𖼞𖽑𖽙𖾐 𖼣𖽻𖾐 𖼺𖽪𖾐 𖼐𖽺𖾐 𖼣𖽙𖾐 𖼈𖽳𖾐 𖼞𖽕 𖼰𖽡𖽺𖾐 𖼮𖽻𖾐 𖼺𖽪𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼞𖽑𖽶𖾑 𖼹𖽻𖾐 𖼊𖽻 𖼮𖽨 𖼺𖽺𖾑 𖼦𖽑𖽔𖾐 𖼮𖽶𖾐 𖼮𖽡𖽮𖾐， 𖼦𖽑𖽔𖾐 𖼮𖽶𖾐 𖼣𖽝 𖼮𖽨𖾐 𖼄𖽔 𖼊𖽙𖾐， 𖼽𖽻 𖼈𖽳𖾐 𖼄𖽳𖾑 𖼄𖽳 𖼖𖽺𖾑 𖼀𖽦𖾐 𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼈𖽳𖾐 𖼖𖽙𖾐 𖼂𖽻𖾐 𖼺𖽺𖾑， 𖼷𖽑𖽧𖾐 𖼦𖽑𖽻𖾐 𖼺𖽪𖾐 𖼣𖽻𖾐．
17 𖼐𖽑𖽡𖾐 𖼦𖽑𖽦 𖼦𖽑𖽺𖾑 𖼠𖽻𖾐 𖼞𖽑𖽶𖾐， 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼀𖽑𖽶 𖼊𖽴 𖼷𖽑𖽻𖾐 𖼺𖽪𖾑 𖼮𖽑𖽙𖾐 𖼞𖽑𖽙 𖼄𖽙𖾐 𖼖𖽺𖾑 𖼈𖽝 𖼍𖽙𖾐 𖼂𖽡 𖼽𖽔 𖼊𖽑𖽺 𖼞𖽜， 𖼍𖽙𖾐 𖼂𖽡 𖼽𖽔 𖼖𖽺𖾑 𖼄𖽔 𖼐𖽙 𖼄𖽙𖾐 𖼈𖽝 𖼀𖽑𖽚𖾐 𖼽𖽻 𖼈𖽳𖾐 𖼊𖽑𖽺 𖼞𖽜． 18 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼞𖽳𖾐 𖼷𖽑𖽻𖾐 𖼞𖽑𖽙 𖼄𖽙𖾐 𖼖𖽺𖾑 𖼍𖽙𖾐 𖼂𖽡 𖼽𖽔 𖼖𖽙𖾐 𖼊𖽴， 𖼞𖽪𖾐 𖼮𖽡𖽺𖾐 𖼽𖽻 𖼦𖽑𖽺𖾑 𖼽𖽕𖾑 𖼖𖽔𖾐 𖼞𖽳𖾐 𖼻𖽙， 𖼳𖽶𖾑 𖼰𖽡𖽔𖾐 𖼐𖽑𖽧 𖼞𖽳𖾐 𖼄𖽦𖾑 𖼈𖽪𖾐 𖼣𖽻𖾐， 𖼽𖽻 𖼻𖽙 𖼽𖽱𖾐 𖼦𖽔𖾐 𖼐𖽕 𖼞𖽑𖽶𖾑 𖼄𖽡 𖼳𖽪𖾐 𖼖𖽕 𖼞𖽳𖾐 𖼻𖽙 𖼄𖽳 𖼊𖽑𖽺 𖼹𖽶𖾐， 𖼄𖽡 𖼳𖽪𖾐 𖼖𖽕 𖼦𖽑𖽺𖾑 𖼂𖽡 𖼖𖽡𖾑 𖼰𖽡𖽔𖾐 𖼞𖽳𖾐 𖼻𖽙 𖼣𖽻𖾐． 19 𖼦𖽑𖽺𖾑 𖼻𖽻𖾐 𖼍𖽺𖾑 𖼄𖽔 𖼣𖽻𖾐， 𖼽𖽻 𖼈𖽳𖾐 𖼄𖽔 𖼐𖽙 𖼄𖽙𖾐 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾐 𖼂𖽡 𖼽𖽔 𖼞𖽳𖾐 𖼹𖽳𖾐 𖼄𖽡𖽻 𖼀𖽦𖾐， 𖼹𖽦𖾑 𖼣𖽙𖾐 𖼦𖽑𖽺 𖼺𖽪𖾐 𖼊𖽻 𖼂𖽪𖾑 𖼦𖽑𖽺 𖼽𖽻 𖼊𖽑𖽺 𖼰𖽨𖾐， 𖼍𖽙𖾐 𖼂𖽡 𖼽𖽔 𖼄𖽔 𖼐𖽙 𖼄𖽙𖾐 𖼺𖽪𖾑 𖼈𖽝 𖼂𖽻𖾐 𖼖𖽻𖾐 𖼺𖽺𖾑 𖼣𖽙𖾐 𖼊𖽑𖽺 𖼰𖽡𖽮𖾐．