𖼷𖽑𖽔𖾐 𖼂𖽔𖾐 𖼖𖽔𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽶 𖼻𖽶 𖼈𖽳𖾐 𖼵𖽶𖾐
4
1 𖼷𖽑𖽔𖾐 𖼂𖽔𖾐 𖼖𖽔𖾐 𖼣𖽙𖾐 𖼈𖽳𖾐 𖼖𖽪𖾐 𖼰𖽻𖾐 𖼷𖽑𖽧𖾐 𖼞𖽑𖽶𖾑 𖼊𖽻 𖼮𖽨 𖼺𖽺𖾑， 𖼀𖽶 𖼻𖽶 𖼍𖽪𖾐 𖼖𖽻𖾐， 𖼦𖽑𖽔𖾐 𖼮𖽶𖾐 𖼦𖽑𖽦 𖼞𖽑𖽴， 𖼦𖽑𖽔𖾐 𖼖𖽺𖾑 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼈𖽳𖾐 𖼵𖽶𖾐． 2 𖼽𖽻 𖼈𖽧 𖼐𖽑𖽳𖾐 𖼐𖽺𖾐 𖼺𖽔 𖼄𖽔 𖼖𖽡𖾑 𖼽𖽕𖾑 𖼺𖽪𖾐 𖼄𖽦 𖼀𖽑𖽙 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼺𖽺𖾑， 𖼀𖽦𖾐：“𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼞𖽫 𖼦𖽑𖽺𖾑 𖼹𖽻𖾐 𖽃𖽔 𖼊𖽺𖾑 𖼳𖽶 𖼂𖽺𖾐 𖼊𖽡 𖼮𖽑𖽻 𖼐𖽺𖾑？ 𖼽𖽻 𖼄𖽳𖾑 𖼷𖽺𖾐 𖼖𖽪𖾐 𖼰𖽻𖾐 𖼷𖽑𖽧𖾐 𖼊𖽡 𖼮𖽑𖽻 𖼖𖽔𖾑？ 𖼍𖽡𖾐 𖼮𖽡𖽺𖾐 𖼂𖽺𖾐 𖼊𖽡 𖼮𖽑𖽻 𖼖𖽔𖾑？ 𖼊𖽑𖽡 𖼐𖽑𖽡𖾐 𖼠𖽻𖾐 𖼞𖽑𖽶𖾐 𖼂𖽺𖾐 𖼦𖽑𖽻𖾐 𖼊𖽡 𖼮𖽑𖽻 𖼖𖽔𖾑？ 𖼐𖽑𖽡𖾑 𖼦𖽑𖽻 𖼂𖽜𖾐 𖼞𖽑𖽶𖾐 𖼮𖽑𖽻𖾐 𖼮𖽑𖽡𖽪𖾐 𖼠𖽚 𖼺𖽪𖾐 𖼖𖽚𖾐 𖼄𖽙𖾐 𖼻𖽜 𖼺𖽺𖾑， 𖼖𖽪𖾐 𖼰𖽻𖾐 𖼷𖽑𖽧𖾐 𖼍𖽪𖾐 𖼖𖽻𖾐 𖼊𖽡 𖼮𖽑𖽻 𖼖𖽔𖾑？3 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼍𖽙𖾐 𖼂𖽡 𖼽𖽔 𖼞𖽑𖽻𖾑 𖼷𖽑𖽔𖾐 𖼂𖽔𖾐 𖼖𖽔𖾐 𖼀𖽙 𖼮𖽑𖽶𖾐 𖼮𖽻𖾐 𖼺𖽺𖾑， 𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼞𖽑𖽙𖾐 𖼷𖽑𖽧𖾐 𖼺𖽪𖾐 𖼖𖽪𖾐 𖼰𖽻𖾐， 𖼈𖽪𖾑 𖼊𖽡 𖼊𖽑𖽡 𖼊𖽝𖾐 𖼺𖽜 𖼊𖽦𖾐 𖼽𖽡𖾐 𖼖𖽺𖾑 𖼀𖽜 𖼦𖽑𖽙𖾐 𖼊𖽻𖾐．”
4 “𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖽃𖽔𖾐， 𖼣𖽙𖾐 𖼈𖽳𖾐 𖼮𖽑𖽡 𖼮𖽡𖽺𖾐 𖼊𖽑𖽺 𖼊𖽻 𖼞𖽑𖽚 𖼞𖽜， 𖼣𖽙𖾐 𖼈𖽳𖾐 𖼊𖽑𖽺 𖼺𖽙𖾐 𖼮𖽑𖽢𖾑 𖼐𖽦𖾐 𖼄𖽔 𖼍𖽪𖾐， 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺， 𖼽𖽻 𖼈𖽳𖾐 𖽃𖽔 𖼊𖽺𖾐 𖼣𖽙𖾐 𖼈𖽳𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐， 𖼽𖽻 𖼈𖽳𖾐 𖼊𖽑𖽺 𖼖𖽺𖾑 𖼞𖽑𖽶𖾑 𖼖𖽙𖾐 𖼺𖽶𖾑 𖼐𖽑𖽧𖾐 𖼣𖽡𖽳𖾐 𖼄𖽳𖾐 𖼖𖽡𖾐， 𖼽𖽻 𖼈𖽳𖾐 𖼊𖽑𖽺 𖼖𖽺𖾑 𖼮𖽴𖾐 𖼺𖽙𖾐 𖼄𖽡𖾐 𖼊𖽺𖾐 𖼽𖽡𖾐 𖼦𖽑𖽙𖾐 𖼖𖽡𖾐． 5 𖼐𖽑𖽡𖾐 𖼽𖽻 𖼈𖽳𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽑𖽺 𖼊𖽑𖽔 𖼰𖽳𖾐 𖼍𖽡， 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼽𖽻 𖼈𖽳𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽑𖽺 𖼖𖽺𖾑 𖼊𖽑𖽔 𖼄𖽡𖽺 𖼦𖽑𖽙𖾐， 𖼞𖽪𖾐 𖼮𖽡𖽺𖾐 𖼽𖽻 𖼈𖽳𖾐 𖼖𖽪𖾐 𖼰𖽻𖾐 𖼷𖽑𖽧𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐， 𖼞𖽑𖽶𖾑 𖼐𖽑𖽡𖾐 𖼞𖽳𖾐 𖼀𖽶 𖼻𖽶 𖼮𖽑𖽡𖾐 𖼊𖽑𖽺 𖼊𖽑𖽡 𖼺𖽪𖾐 𖼣𖽻𖾐．”
6 𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼊𖽑𖽡 𖼐𖽑𖽧𖾐 𖼄𖽙𖾐 𖼄𖽡𖽻 𖼄𖽪𖾐 𖼺𖽺𖾑， 𖼣𖽙𖾐 𖼈𖽳𖾐 𖼖𖽪𖾐 𖼰𖽻𖾐 𖼷𖽑𖽧𖾐 𖼂𖽚𖾐， 𖼖𖽪𖾐 𖼰𖽻𖾐 𖼄𖽳𖾑 𖼄𖽳 𖼷𖽑𖽧𖾐 𖼷𖽙𖾐 𖼖𖽙𖾐 𖼹𖽙𖾑 𖼍𖽪𖾐， 𖽃𖽙𖾑 𖼄𖽺 𖼊𖽑𖽙 𖼖𖽪𖾐 𖼰𖽻𖾐 𖼞𖽑𖽶𖾑 𖼞𖽳𖾐 𖼊𖽑𖽡 𖼀𖽑𖽦𖾐 𖼄𖽶𖾐 𖼷𖽑𖽧𖾐 𖼍𖽪𖾐 𖼖𖽻𖾐 𖼦𖽑𖽙𖾐．
𖼮𖽡𖾐 𖼂𖽦𖾐 𖼖𖽻𖾐 𖼀𖽨 𖼮𖽳
7 𖼷𖽑𖽔𖾐 𖼂𖽔𖾐 𖼖𖽔𖾐、 𖼍𖽙𖾐 𖼂𖽡 𖼽𖽔、 𖽃𖽔𖾐 𖼖𖽔𖾐 𖼂𖽚 𖼺𖽪𖾐 𖼷𖽑𖽻𖾐、 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽕𖾑 𖼳𖽸 𖼊𖽑𖽪𖾐 𖼺𖽪𖾐 𖼷𖽑𖽻𖾐 𖼊𖽻 𖼮𖽨， 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼦𖽑𖽔𖾐 𖼖𖽺𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼖𖽪𖾐 𖼰𖽻𖾐 𖼷𖽑𖽧𖾐， 𖼖𖽦 𖼦𖽑𖽙𖾐 𖼞𖽳𖾐 𖼷𖽑𖽶 𖼍𖽪𖾐 𖼖𖽻𖾐 𖼦𖽑𖽻𖾐． 𖽃𖽔𖾐 𖼺𖽺𖾑， 𖼽𖽻 𖼈𖽳𖾐 𖼦𖽑𖽔𖾐 𖼮𖽶𖾐 𖼀𖽶 𖼻𖽶． 8 𖼽𖽻 𖼈𖽳𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼊𖽶𖾐 𖼄𖽡𖽻 𖼷𖽜𖾐 𖼀𖽜𖾐， 𖼖𖽻𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼊𖽑𖽺 𖼊𖽝 𖼊𖽦 𖼠𖽻 𖼮𖽑𖽻 𖼊𖽻𖾐． 9 𖽃𖽔𖾐 𖼺𖽺𖾑， 𖼣𖽙𖾐 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐， 𖼦𖽑𖽔𖾐 𖼖𖽺𖾑 𖼮𖽡𖾐 𖼂𖽦𖾐 𖼖𖽻𖾐 𖼊𖽻𖾐 𖼖𖽙𖾐 𖼀𖽙𖾐 𖼺𖽺𖾑， 𖼷𖽑𖽻𖾐 𖼹𖽡𖾐 𖼐𖽦𖾐 𖼳𖽪𖾐， 𖼄𖽶 𖼐𖽑𖽡𖾐 𖼄𖽶 𖼦𖽑𖽦 𖼽𖽻 𖼈𖽳𖾐 𖼊𖽑𖽺 𖼷𖽜𖾐 𖼍𖽳𖾐．
10 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑， 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽡 𖼹𖽻𖾐 𖼀𖽦𖾐： “𖼖𖽚𖾐 𖼮𖽡𖽦 𖼐𖽺𖾐 𖼐𖽑𖽡𖾑 𖼦𖽑𖽻 𖼈𖽦𖾑 𖼺𖽪𖾐 𖼷𖽑𖽻𖾐 𖽂𖽙 𖼞𖽶𖾐 𖼦𖽑𖽻𖾐， 𖼦𖽑𖽔𖾐 𖼖𖽺𖾑 𖼊𖽑𖽡 𖼂𖽜𖾐 𖼄𖽙𖾐 𖼮𖽻𖾐 𖼺𖽺， 𖽃𖽔 𖼐𖽺𖾑 𖼖𖽪𖾐 𖼰𖽻𖾐 𖼦𖽑𖽺𖾑 𖼷𖽑𖽧𖾐 𖼀𖽑𖽢 𖼄𖽔 𖼊𖽙𖾐．”
11 𖼣𖽙𖾐 𖼈𖽳𖾐 𖼞𖽳𖾐 𖼮𖽡𖾐 𖼂𖽦𖾐 𖼞𖽑𖽶𖾑 𖼹𖽻𖾐 𖼖𖽺𖾑 𖼀𖽦𖾐： “𖽃𖽔 𖼐𖽺𖾑 𖼽𖽻 𖼈𖽳𖾐 𖼞𖽜 𖼄𖽔 𖼺𖽝𖾑 𖼄𖽔 𖼄𖽡𖽻𖾐 𖼄𖽙𖾐 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼊𖽡 𖼽𖽡𖾐， 𖼽𖽻 𖼈𖽳𖾐 𖼊𖽑𖽺 𖼺𖽦 𖼦𖽑𖽙𖾐 𖼺𖽺𖾑， 𖼖𖽪𖾐 𖼰𖽻𖾐 𖼊𖽑𖽔 𖼷𖽑𖽧𖾐 𖼍𖽳𖾐．”
12 𖼮𖽡𖾐 𖼂𖽦𖾐 𖼞𖽕 𖼰𖽡𖽺𖾐 𖼞𖽳𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼖𖽺𖾑 𖼷𖽑𖽡𖾐 𖼂𖽦𖾑 𖼷𖽑𖽻𖾐 𖼹𖽡𖾐 𖼂𖽻𖾐 𖼖𖽻𖾐 𖼣𖽙𖾐 𖼈𖽳𖾐 𖼖𖽙𖾐 𖼀𖽦𖾐 𖼊𖽑𖽧， 𖼮𖽡𖾐 𖼂𖽦𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼮𖽑𖽻𖾐 𖼊𖽦𖾐 𖼖𖽻𖾐 𖼣𖽙𖾐 𖼈𖽳𖾐 𖼊𖽑𖽺 𖼊𖽝 𖼊𖽦 𖼊𖽻𖾐． \fr 4．12 \ft 𖼦𖽑𖽺𖾑 𖼊𖽑𖽡 𖼮𖽑𖽡𖽺 𖼊𖽑𖽺 “𖼮𖽡𖾐 𖼂𖽦𖾐 𖼞𖽕 𖼰𖽡𖽺𖾐 𖼞𖽳𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼖𖽺𖾑 𖼷𖽑𖽡𖾐 𖼂𖽦𖾑 𖼷𖽑𖽻𖾐 𖼹𖽡𖾐 𖼂𖽻𖾐 𖼖𖽻𖾐 𖼣𖽙𖾐 𖼈𖽳𖾐 𖼖𖽙𖾐 𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼣𖽙𖾐 𖼈𖽳𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 ’ 𖼀𖽑𖽚𖾐 𖼺𖽪𖾐 𖼖𖽺𖾑 𖼮𖽻𖾐．” 13 𖽃𖽔𖾐 𖼺𖽺𖾑， 𖼣𖽙𖾐 𖼷𖽑𖽻𖾐 𖼷𖽪𖾐 𖼞𖽜 𖼽𖽻 𖼄𖽳𖾑 𖼈𖽴 𖼮𖽑𖽪𖾐 𖼖𖽙𖾐 𖼮𖽑𖽻𖾐 𖼺𖽺𖾑， 𖽃𖽔𖾑 𖼊𖽑𖽙、 𖼂𖽨𖾐 𖼹𖽶 𖼐𖽺𖾐 𖼮𖽑𖽡𖽦𖾐 𖼈𖽺𖾐， 𖽃𖽜𖾐 𖼞𖽳𖾐 𖼣𖽻𖾐 𖼦𖽻， 𖼄𖽶𖾐 𖼞𖽳𖾐 𖼣𖽻𖾐 𖼦𖽻， 𖼖𖽪𖾐 𖼰𖽻𖾐 𖼠𖽙𖾑 𖼍𖽻𖾐 𖼀𖽳 𖼄𖽡𖽻𖾐 𖼄𖽔 𖼊𖽙𖾐 𖼞𖽳𖾐 𖼣𖽻𖾐 𖼦𖽻， 𖼖𖽪𖾐 𖼰𖽻𖾐 𖽃𖽙𖾑 𖼄𖽺 𖼀𖽳 𖼊𖽺𖾐 𖼠𖽻𖾐 𖼣𖽻𖾐 𖼦𖽻， 𖼄𖽳𖾑 𖼄𖽳 𖼊𖽑𖽺 𖼳𖽪𖾐 𖼍𖽡．
14 𖼣𖽙𖾐 𖼊𖽑𖽡 𖼂𖽦𖾑 𖼰𖽻𖾐 𖼐𖽦𖾐 𖼦𖽑𖽙𖾐 𖼠𖽙𖾑 𖼍𖽻𖾐， 𖼀𖽑𖽶 𖼊𖽴 𖼷𖽑𖽻𖾐、 𖼈𖽪𖾑 𖼷𖽪𖾐 𖼐𖽺𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐：“𖼽𖽻 𖼈𖽳𖾐 𖼊𖽑𖽺 𖼮𖽡𖽮𖾐 𖼄𖽔 𖼻𖽻𖾐! 𖼐𖽑𖽡𖾐 𖼈𖽳𖾐 𖼦𖽙𖾑 𖼮𖽑𖽡 𖼖𖽡𖾐， 𖼺𖽡 𖼀𖽑𖽙 𖼦𖽑𖽺𖾑 𖼈𖽳 𖼷𖽑𖽚 𖼮𖽡𖽮𖾐 𖼷𖽻 𖼺𖽪𖾐 𖼣𖽻𖾐；𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼈𖽧 𖼐𖽑𖽳𖾐、 𖼻𖽙 𖼄𖽡𖾐 𖼐𖽜𖾐、 𖼄𖽳 𖼻𖽙 𖼐𖽺𖾐 𖽃𖽔𖾑 𖼞𖽑𖽶𖾐 𖼖𖽙𖾐 𖼀𖽙𖾐 𖼺𖽺𖾑， 𖼮𖽡𖾐 𖼂𖽦𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦 𖼖𖽡𖾐．”
𖽂𖽙𖾐 𖼄𖽡𖽻 𖼄𖽪𖾐 𖽂𖽙𖾐 𖼐𖽦𖾐 𖼳𖽪𖾐
15 𖼣𖽙𖾐 𖼈𖽳𖾐 𖼞𖽳𖾐 𖼮𖽡𖾐 𖼂𖽦𖾐 𖼊𖽻 𖼮𖽨， 𖼣𖽙𖾐 𖼈𖽳𖾐 𖼽𖽻 𖼈𖽳𖾐 𖼞𖽑𖽙𖾐 𖼷𖽜𖾐 𖼀𖽜𖾐 𖼺𖽪𖾐 𖼊𖽑𖽺 𖼺𖽝𖾑 𖼦𖽑𖽻𖾐， 𖽂𖽙 𖼺𖽙𖾐 𖼂𖽙𖾐 𖼖𖽺𖾑 𖼽𖽻 𖼈𖽳𖾐 𖼞𖽳𖾐 𖼄𖽪𖾐 𖼊𖽪𖾐 𖼊𖽑𖽺 𖼂𖽺𖾐 𖼀𖽑𖽧𖾐 𖼦𖽑𖽙𖾐 𖼺𖽺𖾑， 𖼽𖽻 𖼈𖽳𖾐 𖼖𖽻𖾐 𖼄𖽔 𖼂𖽡𖾑． 𖼣𖽙𖾐 𖼈𖽳𖾐 𖼄𖽳𖾑 𖼄𖽳 𖼀𖽑𖽚𖾐 𖼖𖽪𖾐 𖼰𖽻𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐， 𖼊𖽑𖽡 𖼽𖽚𖾑 𖼽𖽚𖾐 𖽃𖽙𖾑 𖼄𖽺 𖼖𖽙𖾐 𖼺𖽶𖾑 𖼽𖽻 𖼄𖽳𖾑 𖼄𖽪𖾐 𖼺𖽪𖾐 𖼄𖽡𖽻 𖼞𖽑𖽶𖾑 𖼄𖽪𖾐． 16 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽻𖾐 𖼍𖽪𖾐， 𖼣𖽙𖾐 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽡 𖼀𖽑𖽦𖾐 𖼄𖽡𖽻 𖼄𖽪𖾐， 𖼊𖽑𖽡 𖼀𖽑𖽦𖾐 𖼂𖽨𖾐 𖼹𖽶、 𖼮𖽑𖽨𖾑 𖼊𖽪𖾐 𖼐𖽺𖾐 𖼮𖽑𖽡𖽦𖾐 𖼈𖽺𖾐、 𖼦𖽜𖾐 𖼀𖽑𖽡𖽻𖾐 𖼈𖽦 𖼺𖽺𖾑 𖼳𖽪𖾐 𖼍𖽪𖾐， 𖼈𖽪𖾑 𖼷𖽪𖾐 𖼞𖽑𖽶𖾑 𖼹𖽻𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼠𖽙𖾑 𖼍𖽻𖾐 𖼍𖽚𖾐． 17 𖼖𖽪𖾐 𖼰𖽻𖾐 𖼷𖽑𖽧𖾐 𖼺𖽪𖾐 𖼐𖽺𖾐 𖼄𖽡𖽻 𖼖𖽡 𖼄𖽪𖾐 𖼺𖽪𖾐 𖼷𖽑𖽻𖾐， 𖼄𖽳𖾑 𖼄𖽳 𖼊𖽝 𖼊𖽦 𖼖𖽚𖾐 𖼂𖽚𖾐 𖼄𖽡𖽻 𖼐𖽑𖽡 𖼈𖽺𖾐 𖼍𖽳𖾐 𖼄𖽡𖽻 𖼄𖽪𖾐 𖼺𖽪𖾐 𖼣𖽻𖾐． 18 𖼖𖽪𖾐 𖼰𖽻𖾐 𖼷𖽑𖽧𖾐 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼖𖽺𖾑 𖽃𖽔𖾑 𖼊𖽑𖽙 𖼈𖽺𖾐 𖼮𖽚 𖼀𖽺𖾐 𖼀𖽶 𖼍𖽳𖾐 𖼄𖽡𖽻 𖼄𖽪𖾐， 𖼽𖽻𖾐 𖼮𖽑𖽡𖽪𖾐 𖼄𖽸𖾐 𖼺𖽪𖾐 𖼣𖽙𖾐 𖼀𖽙 𖼮𖽑𖽶𖾐 𖼞𖽳𖾐 𖼮𖽻𖾐．
19 𖼣𖽙𖾐 𖼞𖽑𖽻𖾑 𖼀𖽑𖽶 𖼊𖽴 𖼷𖽑𖽻𖾐、 𖼷𖽶 𖼄𖽻 𖼐𖽺𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐：“𖼖𖽪𖾐 𖼰𖽻𖾐 𖼦𖽑𖽺𖾑 𖼈𖽳 𖼷𖽑𖽚， 𖽃𖽔 𖼐𖽺𖾑 𖼖𖽪𖾐 𖼰𖽻𖾐 𖼊𖽑𖽺 𖼮𖽻𖾐 𖼷𖽙𖾐 𖼖𖽙𖾐 𖼰𖽡𖾑 𖼄𖽡𖾐 𖼈𖽡， 20 𖽃𖽔𖾐 𖼺𖽺𖾑 𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼣𖽻𖾐 𖼦𖽻， 𖼽𖽻𖾐 𖼮𖽑𖽡𖽪𖾐 𖼄𖽸𖾐 𖼮𖽑𖽡𖽪 𖼀𖽺𖾐 𖼊𖽻 𖼮𖽨 𖼞𖽑𖽶𖾑 𖼮𖽶𖾐， 𖼣𖽙𖾐 𖼈𖽳𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼖𖽡𖾐． 𖽃𖽔 𖼐𖽺𖾑 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖽃𖽔 𖼐𖽺𖾑 𖼖𖽙𖾐 𖼀𖽙𖾐 𖼊𖽝 𖼊𖽦 𖼊𖽻𖾐．”
21 𖼣𖽙𖾐 𖼈𖽳𖾐 𖼄𖽡𖽻 𖼦𖽑𖽺𖾑 𖼄𖽪𖾐． 𖼷𖽑𖽻𖾐 𖼊𖽑𖽡 𖼀𖽑𖽦𖾐 𖼂𖽨𖾐 𖼹𖽶 𖼈𖽺𖾐 𖼺𖽺𖾑， 𖼄𖽶 𖼊𖽑𖽡 𖼮𖽑𖽻𖾐 𖼄𖽶 𖼮𖽑𖽧 𖼠𖽳𖾐 𖼊𖽚𖾐 𖼖𖽻𖾐 𖼰𖽶𖾐 𖼮𖽑𖽡𖾐． 22 𖼞𖽑𖽶𖾑 𖼮𖽶𖾐， 𖼣𖽙𖾐 𖼷𖽑𖽻𖾐 𖼷𖽪𖾐 𖼖𖽙𖾐 𖼀𖽦𖾐：“𖼄𖽳𖾑 𖼄𖽳 𖼽𖽻 𖼄𖽳𖾑 𖼮𖽜𖾐 𖼀𖽑𖽙 𖼖𖽙𖾐 𖼮𖽑𖽻𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖼦𖽑𖽦 𖼖𖽻𖾐 𖼖𖽡𖾐． 𖼦𖽑𖽺𖾑 𖼻𖽻𖾐， 𖼽𖽻 𖼈𖽳𖾐 𖼄𖽶 𖼮𖽑𖽧 𖼞𖽑𖽶𖾐 𖽃𖽔 𖼐𖽺𖾑 𖼊𖽑𖽺 𖼐𖽦𖾐 𖼳𖽪𖾐， 𖼄𖽶 𖼐𖽑𖽡𖾐 𖼞𖽑𖽶𖾐 𖽃𖽔 𖼐𖽺𖾑 𖼄𖽡𖽻 𖽂𖽙𖾐 𖼄𖽪𖾐 𖼊𖽙𖾐．” 23 𖽃𖽔𖾐 𖼺𖽺𖾑， 𖼣𖽙𖾐 𖼐𖽺𖾐 𖼣𖽙𖾐 𖼞𖽳𖾐 𖼈𖽧 𖼐𖽑𖽳𖾐、 𖼣𖽙𖾐 𖼞𖽳𖾐 𖼮𖽜𖾐 𖼀𖽑𖽙 𖼐𖽺𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐， 𖼄𖽳𖾑 𖼄𖽳 𖼀𖽑𖽡𖽻𖾐 𖼄𖽔 𖼖𖽧， 𖼊𖽑𖽡 𖼽𖽚𖾑 𖼽𖽚𖾐 𖼄𖽔 𖼐𖽙 𖼊𖽝 𖼊𖽦 𖼖𖽚𖾐 𖼂𖽚𖾐 𖼄𖽡𖽻 𖼐𖽑𖽡 𖼈𖽺𖾐 𖼍𖽳𖾐．