𖼍𖽕𖾑 𖼈𖽪𖽺𖾑 𖼄𖽳𖾑 𖼊𖽺𖾐 𖼞𖽳𖾐 𖼊𖽻 𖼂𖽪𖾑
23
1 𖼍𖽕𖾑 𖽂𖽚 𖼦𖽑𖽺𖾑 𖼍𖽕𖾑 𖼈𖽪𖽺𖾑 𖼄𖽳𖾑 𖼊𖽺𖾐 𖼞𖽳𖾐 𖼊𖽻 𖼂𖽪𖾑 𖼣𖽻𖾐．𖼽𖽺𖾐 𖼳𖽡𖾐 𖼞𖽳𖾐 𖼻𖽙 𖼍𖽕𖾑 𖼈𖽪𖽺𖾑 𖼦𖽑𖽺𖾑 𖼽𖽔 𖼠𖽴𖾑 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼮𖽑𖽢𖾑 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽑𖽜 𖼈𖽪𖾐 𖼍𖽦 𖼂𖽺𖾐，𖼷𖽶 𖼊𖽺𖾐 𖼈𖽳 𖼮𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼮𖽻 𖼮𖽪 𖼺𖽪𖾑 𖼈𖽝 𖼺𖽪𖾐 𖼊𖽑𖽡 𖼽𖽚𖾐 𖼣𖽻𖾐． 2 𖼽𖽻 𖼀𖽦𖾐：“𖼽𖽺𖾐 𖼦𖽴 𖼦𖽫 𖼞𖽳𖾐 𖼳𖽨𖾐 𖼣𖽙𖾐 𖼊𖽑𖽺 𖼻𖽜 𖼊𖽻 𖼊𖽑𖽜𖾐，
𖼽𖽻 𖼞𖽳𖾐 𖼊𖽻 𖼮𖽑𖽡𖽺 𖼣𖽙𖾐 𖼄𖽡 𖼞𖽑𖽪𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐．”
3 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼖𖽙𖾐 𖼀𖽦𖾐 𖼊𖽑𖽧，
𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖼖𖽚𖾐 𖼳𖽕𖾐 𖼊𖽑𖽺𖾐 𖼣𖽙𖾐 𖼊𖽑𖽺 𖼀𖽦𖾐 𖼰𖽨𖾐：
“𖼀𖽳𖾐 𖼈𖽡𖾐 𖼖𖽙𖾐 𖼮𖽑𖽻𖾐 𖼷𖽑𖽻𖾐 𖼀𖽺 𖼊𖽑𖽺 𖼠𖽕 𖼺𖽪𖾐，
𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽡𖽮𖾐 𖼍𖽳𖾐 𖼄𖽡𖽻 𖼠𖽕 𖼺𖽪𖾐，
4 𖼞𖽑𖽶𖾑 𖼷𖽑𖽶𖾐 𖼐𖽦 𖼊𖽚𖾐 𖼖𖽻𖾐 𖼺𖽪𖾐 𖽃𖽔𖾑 𖼄𖽶 𖼐𖽑𖽡𖾐 𖼖𖽙𖾐 𖼺𖽶𖾑，
𖼹𖽦𖾑 𖼍𖽡𖾐 𖼮𖽑𖽙𖾐 𖼄𖽔 𖼮𖽻𖾐 𖼺𖽪𖾐 𖼄𖽶 𖼖𖽙𖾐 𖼀𖽙 𖼖𖽙𖾐 𖼺𖽶𖾑，
𖼦𖽑𖽔𖾐 𖼖𖽺𖾑 𖽃𖽔𖾑 𖼄𖽶 𖼦𖽑𖽙𖾐 𖼠𖽙𖾑 𖼍𖽻𖾐 𖼞𖽳𖾐 𖼄𖽶 𖼷𖽑𖽙𖾐 𖼖𖽙𖾐 𖼺𖽶𖾑，
𖼳𖽶𖾑 𖼐𖽑𖽧𖾐 𖼰𖽸𖾐 𖼞𖽜 𖼄𖽡𖾑 𖼐𖽦𖾐 𖼞𖽑𖽶𖾐 𖼮𖽑𖽻𖾐 𖼐𖽜 𖼊𖽑𖽧 𖼖𖽻𖾐．
5 𖼣𖽙𖾐 𖽃𖽔𖾑 𖼞𖽑𖽶𖾐 𖼖𖽺𖾑 𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽺𖾑 𖼻𖽻𖾐 𖼄𖽔 𖼣𖽻𖾐 𖼖𖽔？
𖼽𖽻 𖼣𖽙𖾐 𖼖𖽙𖾐 𖼮𖽑𖽻𖾐 𖼻𖽳𖾐 𖼹𖽦𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐，
𖼣𖽙𖾐 𖼖𖽙𖾐 𖼀𖽙𖾐 𖼞𖽑𖽙𖾐 𖼣𖽻𖾐 𖼳𖽶 𖼂𖽺𖾐 𖼳𖽡𖽻𖾐 𖼀𖽑𖽢，
𖼻𖽳𖾐 𖼻𖽳𖾐 𖼹𖽦𖾐 𖼹𖽦𖾐 𖼣𖽜𖾐 𖼻𖽺𖾐 𖼊𖽙𖾐 𖼳𖽶 𖼣𖽻𖾐．
𖼣𖽙𖾐 𖼞𖽳𖾐 𖼰𖽨𖾑 𖼄𖽡𖽻 𖼐𖽺𖾐 𖼐𖽦𖾐 𖼳𖽡𖽻𖾐 𖼊𖽪，𖼽𖽻 𖼂𖽺𖾐 𖼀𖽑𖽢 𖼦𖽑𖽻𖾐 𖼄𖽔 𖼣𖽻𖾐 𖼖𖽔？
6 𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼖𖽕𖾐 𖼀𖽕𖾐 𖼞𖽶𖾑𖽑 𖼷𖽴𖾐 𖼦𖽑𖽙𖾐 𖼺𖽪𖾐 𖽃𖽔𖾑 𖼮𖽑𖽪 𖼖𖽙𖾐 𖼺𖽶𖾑，
𖼽𖽻 𖼈𖽳𖾐 𖼊𖽑𖽺 𖼈𖽺𖾐 𖼂𖽡𖾑 𖼺𖽪𖾐 𖼷𖽑𖽻𖾐 𖼄𖽔 𖼮𖽻𖾐．
7 𖽃𖽔𖾑 𖼮𖽑𖽪 𖼈𖽺𖾐 𖼺𖽪𖾐，𖼦𖽜𖾐 𖼄𖽡𖽻 𖼐𖽑𖽡 𖼐𖽺𖾐 𖼂𖽨𖾐 𖼹𖽶 𖼻𖽜 𖼖𖽡𖾐，
𖽃𖽔𖾑 𖼮𖽑𖽪 𖼊𖽑𖽺 𖼞𖽑𖽻𖾑 𖼄𖽻𖾑 𖼮𖽑𖽻𖾐 𖽃𖽔𖾐 𖼍𖽚𖾑 𖼻𖽜 𖼮𖽑𖽡𖽪𖾐 𖼦𖽑𖽙𖾐 𖼊𖽻𖾐．”
𖼍𖽕𖾑 𖼈𖽪𖽺𖾑 𖼞𖽳𖾐 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 (𖼍𖽦𖾑 𖼊𖽑𖽡 11：10-41)
8 𖼍𖽕𖾑 𖽂𖽚 𖼦𖽑𖽺𖾑 𖼍𖽕𖾑 𖼈𖽪𖽺𖾑 𖼞𖽳𖾐 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼞𖽳𖾐 𖼄𖽡𖾐 𖼣𖽻𖾐：“𖼊𖽑𖽔𖾐 𖼠𖽴 𖼄𖽜𖾐 𖼺𖽪𖾐 𖼷𖽑𖽻𖾐 𖼽𖽱𖾐 𖼳𖽴𖾑 𖼂𖽔𖾐 𖼳𖽴𖾑 𖼞𖽑𖽶𖾑 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼣𖽻𖾐，𖼽𖽻 𖼞𖽑𖽶𖾑 𖼺𖽙𖾐 𖼽𖽚𖾐 𖼞𖽳𖾐 𖼈𖽪𖾑 𖼷𖽪𖾐 𖼣𖽻𖾐，𖼽𖽻 𖼊𖽑𖽺 𖼹𖽦𖾑 𖼽𖽡𖾐 𖼺𖽶𖾐 𖼐𖽑𖽧 𖼺𖽪𖾐 𖼷𖽑𖽻𖾐 𖼽𖽕𖾑 𖼍𖽡 𖼐𖽚 𖼀𖽦𖾐 𖼺𖽪𖾐 𖼖𖽺𖾑 𖼮𖽻𖾐．𖽃𖽙𖾑 𖼄𖽺 𖼊𖽑𖽙 𖼰𖽕𖾑 𖼊𖽝 𖼞𖽶𖾑𖽑 𖼮𖽶𖾐，𖼊𖽑𖽡 𖼰𖽻𖾐 𖼞𖽑𖽶𖾑 𖼽𖽻 𖼷𖽑𖽻𖾐 𖼦𖽑𖽦 𖼦𖽑𖽙𖾐 𖼽𖽚𖾐 𖼺𖽦 𖼦𖽑𖽙𖾐．
9 𖼹𖽦𖾑 𖼽𖽕𖾑 𖼦𖽴 𖼺𖽪𖾐 𖼷𖽑𖽻𖾐 𖼍𖽚 𖼍𖽙𖾐 𖼞𖽳𖾐 𖼻𖽙 𖼽𖽡 𖼖𖽡𖾑 𖼽𖽕𖾑 𖼺𖽔，𖽃𖽙𖾑 𖼄𖽺 𖼊𖽑𖽙 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼂𖽔𖾐 𖼺𖽶𖾐 𖼍𖽕 𖼄𖽡 𖼄𖽡𖾐 𖼊𖽺𖾐 𖼷𖽙𖾐 𖼖𖽙𖾐 𖼻𖽶𖾑 𖼖𖽻𖾐 𖼰𖽕𖾑 𖼊𖽝 𖼊𖽻𖾐，𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼺𖽙𖾐 𖼽𖽚𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼽𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼊𖽝 𖼊𖽦 𖼊𖽻𖾐．𖼞𖽑𖽶𖾑 𖼺𖽙𖾐 𖼽𖽚𖾐 𖼠𖽻𖾐 𖼞𖽑𖽶𖾐 𖼊𖽑𖽡 𖼽𖽚𖾐 𖼞𖽑𖽶𖾑 𖼽𖽡 𖼖𖽡𖾑 𖼽𖽔𖾑 𖼺𖽔 𖼣𖽻𖾐．𖼞𖽑𖽶𖾑 𖼮𖽶𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼮𖽡𖽪 𖼀𖽑𖽻𖾐 𖼍𖽪𖾐 𖼦𖽑𖽙𖾐． 10 𖼦𖽑𖽻𖾐 𖼊𖽻𖾐，𖼽𖽻 𖼍𖽪𖾐 𖼖𖽻𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼺𖽦 𖼺𖽺𖾑，𖼽𖽻 𖼞𖽳𖾐 𖼖𖽦 𖼀𖽑𖽦𖾐 𖽂𖽙 𖼄𖽔 𖼐𖽑𖽡𖾐 𖼦𖽑𖽻𖾐 𖼺𖽺𖾑，𖼖𖽦 𖼠𖽻𖾐 𖼊𖽑𖽻𖾐 𖽃𖽔𖾑 𖼊𖽑𖽙 𖼈𖽶 𖼊𖽑𖽺 𖼐𖽑𖽡𖽕𖾑 𖼍𖽡 𖼦𖽑𖽙𖾐 𖼰𖽶𖾐 𖼮𖽑𖽡𖾐．𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖽂𖽙 𖼊𖽙𖾐 𖼦𖽑𖽻𖾐．𖼷𖽑𖽻𖾐 𖼷𖽪𖾐 𖼰𖽻𖾐 𖼽𖽡 𖼖𖽡𖾑 𖼽𖽕𖾑 𖼺𖽔 𖼠𖽙𖾑 𖼍𖽻𖾐 𖼀𖽳 𖼽𖽡𖾐，𖼳𖽶𖾐 𖼦𖽑𖽙𖾐 𖼺𖽪𖾐 𖼞𖽳𖾐 𖼄𖽡𖽻 𖼐𖽑𖽡 𖼈𖽺𖾐 𖼍𖽺𖾑 𖼣𖽻𖾐．
11 𖼹𖽦𖾑 𖼦𖽔𖾐 𖼖𖽔𖾐 𖼺𖽪𖾐 𖼷𖽑𖽻𖾐 𖼽𖽕𖾑 𖼰𖽡𖾐 𖼞𖽳𖾐 𖼻𖽙 𖼳𖽔𖾐 𖼄𖽔．𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽡𖾑 𖼳𖽡𖾐 𖼄𖽡𖾐 𖼊𖽺𖾐 𖼷𖽙𖾐 𖼖𖽙𖾐 𖼻𖽶𖾑 𖼖𖽻𖾐，𖼞𖽑𖽶𖾑 𖼠𖽻𖾐 𖼄𖽡𖾐 𖼊𖽑𖽡 𖼮𖽑𖽙𖾐 𖼞𖽑𖽶𖾐 𖼐𖽚𖾐 𖼐𖽑𖽡𖾐 𖼐𖽜 𖼀𖽡𖾐 𖼦𖽑𖽻𖾐，𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼀𖽑𖽻𖾐 𖼍𖽪𖾐． 12 𖼳𖽔𖾐 𖼄𖽔 𖼍𖽺𖾑 𖼄𖽡𖾐 𖼞𖽑𖽶𖾑 𖼮𖽑𖽙𖾐 𖼞𖽑𖽶𖾐 𖼦𖽑𖽡𖽚，𖼄𖽡𖾐 𖼞𖽑𖽶𖾑 𖼮𖽑𖽙𖾐 𖼊𖽑𖽺 𖼳𖽪𖾐，𖼹𖽦𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼺𖽦 𖼦𖽑𖽙𖾐．𖼽𖽺𖾐 𖼦𖽴 𖼦𖽫 𖼹𖽦𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼞𖽜 𖽂𖽙 𖼊𖽙𖾐 𖼦𖽑𖽻𖾐．
13 𖼖𖽚𖾑 𖼄𖽚 𖼠𖽜𖾐 𖼷𖽑𖽳 𖼰𖽶𖾐 𖼞𖽑𖽶𖾑 𖼮𖽶𖾐，𖼈𖽪𖾑 𖼷𖽪𖾐 𖼺𖽙𖾐 𖼷𖽑𖽡𖾐 𖼽𖽚𖾐 𖼠𖽻𖾐 𖼞𖽑𖽶𖾐 𖼺𖽙𖾐 𖼽𖽚𖾐 𖼹𖽺𖾐 𖼽𖽡𖾐 𖼽𖽕𖾑 𖼍𖽪𖾑 𖼖𖽕 𖼄𖽡𖾐 𖼊𖽺𖾐 𖼖𖽚𖾐 𖼳𖽡𖽪𖾐 𖼞𖽳𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼄𖽡𖽻𖾐．𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼊𖽑𖽡 𖼷𖽪𖾐 𖼖𖽡𖾑 𖼇𖽕 𖼽𖽺𖾐 𖼖𖽻𖾐 𖼞𖽑𖽪 𖼞𖽳𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶． 14 𖼞𖽑𖽶𖾑 𖼮𖽶𖾐，𖼍𖽕𖾑 𖼈𖽪𖽺𖾑 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐 𖼻𖽺𖾐 𖼊𖽪 𖼞𖽳𖾐 𖼮𖽻𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼮𖽻𖾐．
15 𖼍𖽕𖾑 𖼈𖽪𖽺𖾑 𖼀𖽦𖾐：“𖼷𖽑𖽻𖾐 𖼽𖽡𖾐 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖽃𖽔𖾑 𖼊𖽪 𖼀𖽙 𖼮𖽑𖽶𖾐 𖼈𖽡𖾐 𖼊𖽪 𖼞𖽑𖽶𖾐 𖽃𖽔𖾐 𖼮𖽡𖽦𖾐 𖼞𖽑𖽴 𖼣𖽙𖾐 𖼊𖽑𖽺 𖼍𖽻𖾐 𖼞𖽜 𖼖𖽻𖾐 𖼐𖽦𖾐 𖼳𖽡𖽻𖾐．” 16 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼞𖽑𖽶𖾑 𖼺𖽙𖾐 𖼽𖽚𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼦𖽑𖽦 𖼞𖽳𖾐 𖼮𖽑𖽻𖾐 𖼰𖽡𖽴 𖼠𖽚 𖼽𖽡𖾐，𖼂𖽚 𖼖𖽡𖾑 𖼦𖽴 𖼖𖽪𖾐 𖽃𖽔𖾑 𖼊𖽪 𖼀𖽙 𖼮𖽑𖽶𖾐 𖼞𖽳𖾐 𖼈𖽡𖾐 𖼊𖽪 𖼞𖽑𖽶𖾐 𖽃𖽔𖾐 𖼮𖽡𖽦𖾐 𖼞𖽑𖽴 𖼊𖽦𖾐 𖼖𖽻𖾐，𖼈𖽺𖾐 𖼍𖽕𖾑 𖼈𖽪𖽺𖾑 𖼞𖽳𖾐 𖼞𖽑𖽻𖾑 𖼮𖽑𖽡𖾐．𖼦𖽑𖽻𖾐 𖼊𖽑𖽻𖾐 𖼍𖽕𖾑 𖼈𖽪𖽺𖾑 𖼊𖽻𖾐 𖼄𖽔 𖼦𖽶𖾐，𖼈𖽺𖾐 𖼍𖽡𖾐 𖼊𖽪𖾐 𖼂𖽺𖾐 𖼐𖽑𖽡𖾑 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼦𖽜． 17 𖼍𖽕𖾑 𖼈𖽪𖽺𖾑 𖼀𖽦𖾐：“𖼽𖽺𖾐 𖼦𖽴 𖼦𖽫 𖽃𖽔𖾐！𖼣𖽙𖾐 𖽃𖽔𖾐 𖼮𖽡𖽦𖾐 𖼦𖽑𖽺𖾑 𖼊𖽻𖾐 𖼄𖽔 𖼂𖽡𖾑，𖼷𖽑𖽻𖾐 𖼦𖽑𖽺𖾑 𖼺𖽙𖾐 𖼽𖽚𖾐 𖼈𖽪𖾑 𖼠𖽻𖾐 𖼦𖽑𖽙𖾐 𖼖𖽺𖾑 𖼄𖽔 𖼮𖽡𖽮𖾐 𖼄𖽙𖾐 𖽃𖽔𖾐 𖼮𖽡𖽦𖾐 𖼦𖽑𖽺𖾑 𖼞𖽑𖽴，𖽃𖽔𖾐 𖼮𖽡𖽦𖾐 𖼦𖽑𖽺𖾑 𖼽𖽻 𖼈𖽳𖾐 𖼞𖽳𖾐 𖼺𖽶 𖼖𖽙𖾐 𖼺𖽶𖾑 𖼄𖽔 𖼣𖽻𖾐 𖼖𖽔？” 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖽃𖽔𖾐 𖼮𖽡𖽦𖾐 𖼞𖽑𖽶𖾑 𖼊𖽻𖾐 𖼄𖽔 𖼦𖽶𖾐．𖼄𖽡𖽻 𖼦𖽑𖽺𖾑 𖼹𖽻𖾐 𖼦𖽑𖽺𖾑 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼞𖽑𖽶𖾑 𖼺𖽙𖾐 𖼽𖽚𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼣𖽻𖾐．
18 𖼳𖽡 𖼖𖽪 𖼽𖽔 𖼞𖽳𖾐 𖼻𖽙 𖼽𖽱𖾐 𖼽𖽔𖾐 𖼞𖽳𖾐 𖼐𖽑𖽳𖾐 𖼄𖽻 𖼽𖽕𖾑 𖼂𖽡 𖼳𖽺𖾐，𖼽𖽻 𖼞𖽑𖽶𖾑 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼺𖽙𖾐 𖼷𖽑𖽡𖾐 𖼽𖽚𖾐 𖼞𖽳𖾐 𖼈𖽪𖾑 𖼷𖽪𖾐 𖼣𖽻𖾐，𖼽𖽻 𖽃𖽙𖾑 𖼄𖽺 𖼊𖽑𖽙 𖼂𖽨𖾐 𖼹𖽶 𖼻𖽜 𖼷𖽑𖽻𖾐 𖼺𖽙𖾐 𖼦𖽑𖽙𖾐 𖼽𖽚𖾐 𖼺𖽦 𖼳𖽶𖾐 𖼦𖽑𖽙𖾐 𖼺𖽺𖾑，𖼽𖽻 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼞𖽑𖽶𖾑 𖼺𖽙𖾐 𖼽𖽚𖾐 𖼖𖽙𖾐 𖼺𖽶𖾑 𖼄𖽡𖾐 𖼊𖽻 𖼊𖽚𖾐． 19 𖼽𖽻 𖼞𖽳𖾐 𖼄𖽡𖾐 𖼊𖽻 𖼠𖽳𖾐 𖼖𖽪𖾐 𖼄𖽦 𖼀𖽑𖽙 𖼞𖽑𖽶𖾑 𖼺𖽙𖾐 𖼷𖽑𖽡𖾐 𖼽𖽚𖾐 𖼦𖽶𖾑 𖼄𖽔 𖼷𖽑𖽶𖾐 𖼈𖽳 𖼺𖽺𖾑，𖼽𖽻 𖼈𖽳𖾐 𖼞𖽳𖾐 𖼈𖽪𖾑 𖼷𖽪𖾐 𖼀𖽑𖽢，𖼦𖽑𖽻𖾐 𖼊𖽑𖽻𖾐 𖼄𖽡𖾐 𖼊𖽻 𖼠𖽳𖾐 𖼖𖽪𖾐 𖼞𖽑𖽶𖾑 𖼺𖽙𖾐 𖼽𖽚𖾐 𖼖𖽺𖾐 𖼄𖽔 𖼮𖽻𖾐．
20 𖼰𖽡𖽕 𖼳𖽡𖽱𖾐 𖼺𖽪𖾐 𖼷𖽑𖽻𖾐 𖼽𖽺𖾐 𖼦𖽴 𖼽𖽺𖾐 𖼍𖽕𖾑 𖼞𖽳𖾐 𖼻𖽙 𖼂𖽡 𖼐𖽕 𖼽𖽔，𖼞𖽑𖽶𖾑 𖼦𖽑𖽔𖾐 𖼮𖽶𖾐 𖽂𖽙 𖼐𖽑𖽡𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼣𖽻𖾐，𖼽𖽻 𖼄𖽡𖽻 𖼈𖽳 𖼞𖽑𖽙 𖼄𖽙𖾐 𖼖𖽺𖾑 𖼂𖽺𖾐 𖼠𖽚．𖽃𖽙𖾑 𖼄𖽺 𖼊𖽑𖽙 𖼽𖽻 𖼄𖽚 𖼽𖽔𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽦 𖼈𖽪𖾑 𖼷𖽪𖾐 𖼐𖽑𖽡 𖼽𖽚𖾐 𖼺𖽦 𖼦𖽑𖽙𖾐；𖼹𖽦𖾑 𖽂𖽙 𖼮𖽨𖾐 𖼞𖽑𖽶𖾑 𖼮𖽶𖾐，𖼄𖽡𖾑 𖼊𖽪 𖼞𖽑𖽶𖾐 𖼹𖽺𖾐 𖼽𖽡𖾐，𖼍𖽻𖾐 𖼊𖽑𖽡 𖼊𖽝𖾐 𖼺𖽦 𖼦𖽑𖽙𖾐； 21 𖼽𖽻 𖼹𖽦𖾑 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽶𖾐 𖼂𖽚𖾐 𖼈𖽳 𖼺𖽪𖾐 𖼊𖽑𖽡 𖼽𖽚𖾐 𖼊𖽑𖽺 𖼺𖽦 𖼦𖽑𖽙𖾐；𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼂𖽨𖾐 𖼹𖽶 𖼈𖽺𖾐 𖼍𖽳𖾐，𖼂𖽡 𖼐𖽕 𖼽𖽔 𖼺𖽧𖾐 𖼖𖽜 𖼊𖽑𖽡 𖼂𖽻𖾐 𖼍𖽺𖾑 𖼈𖽺𖾐 𖼹𖽺𖾐 𖼽𖽡𖾐 𖼽𖽻 𖼖𖽙𖾐 𖼮𖽑𖽻𖾐 𖼊𖽝 𖼊𖽦，𖼽𖽻 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼂𖽨𖾐 𖼹𖽶 𖼐𖽻𖾑 𖼠𖽚 𖼖𖽻𖾐，𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼰𖽶𖾑 𖼳𖽶𖾐 𖼦𖽑𖽙𖾐． 22 𖼄𖽡𖽻 𖼦𖽑𖽺𖾑 𖼹𖽻𖾐 𖼽𖽺𖾐 𖼦𖽴 𖼽𖽺𖾐 𖼍𖽕𖾑 𖼞𖽳𖾐 𖼻𖽙 𖼂𖽡 𖼐𖽕 𖼽𖽔 𖼞𖽑𖽙𖾐 𖼂𖽺𖾐 𖼺𖽪𖾐 𖼣𖽻𖾐，𖼽𖽻 𖼖𖽺𖾑 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼞𖽑𖽶𖾑 𖼺𖽙𖾐 𖼽𖽚𖾐 𖼖𖽙𖾐 𖼺𖽶𖾑 𖼄𖽡𖾐 𖼊𖽻 𖼊𖽚𖾐 𖼦𖽑𖽙𖾐． 23 𖼽𖽻 𖼞𖽳𖾐 𖼄𖽡𖾐 𖼊𖽻 𖼄𖽦 𖼀𖽑𖽙 𖼞𖽑𖽶𖾑 𖼺𖽙𖾐 𖼷𖽑𖽡𖾐 𖼽𖽚𖾐 𖼊𖽑𖽺 𖼠𖽳𖾐，𖼦𖽑𖽻𖾐 𖼊𖽑𖽻𖾐 𖼠𖽳𖾐 𖼖𖽪𖾐 𖼞𖽑𖽶𖾑 𖼺𖽙𖾐 𖼽𖽚𖾐 𖼖𖽙𖾐 𖼄𖽔 𖼮𖽑𖽡𖾐 𖼺𖽺．𖼍𖽕𖾑 𖼈𖽪𖽺𖾑 𖼽𖽻 𖼊𖽑𖽺 𖼀𖽑𖽨 𖼐𖽦𖾐 𖼳𖽪𖾐 𖼺𖽪𖾐 𖼂𖽺𖾐．
24 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼺𖽙𖾐 𖼷𖽑𖽡𖾐 𖼽𖽚𖾐 𖼞𖽳𖾐 𖼄𖽡𖾐 𖼈𖽝 𖼍𖽕𖾑 𖽂𖽚 𖼍𖽙𖾑：
𖼽𖽱𖾐 𖼽𖽔𖾐 𖼞𖽳𖾐 𖼐𖽑𖽳𖾐 𖼄𖽻 𖼽𖽕𖾑 𖼺𖽔 𖼦𖽺𖾐、𖼂𖽚 𖼖𖽡𖾑 𖼦𖽴 𖼺𖽪𖾐 𖼷𖽑𖽻𖾐 𖼍𖽚 𖼍𖽙𖾐 𖼞𖽳𖾐 𖼻𖽙 𖼽𖽡𖾐 𖼖𖽴𖾑 𖼦𖽔𖾐 𖼐𖽕、
25 𖼦𖽔𖾐 𖼖𖽲𖾑 𖼺𖽪𖾐 𖼷𖽑𖽻𖾐 𖼳𖽔𖾐 𖼄𖽔 、𖼦𖽔𖾐 𖼖𖽲𖾑 𖼺𖽪𖾐 𖼷𖽑𖽻𖾐 𖼽𖽡 𖼖𖽡𖾑 𖼰𖽡𖽔𖾐、
26 𖼀𖽑𖽕𖾑 𖼖𖽴𖾑 𖼊𖽑𖽧 𖼺𖽪𖾐 𖼷𖽑𖽻𖾐 𖼳𖽡𖾐 𖼖𖽡𖾑 𖼺𖽶𖾐、𖼊𖽑𖽧 𖼠𖽜𖾐 𖼽𖽕𖾑 𖼺𖽪𖾐 𖼷𖽑𖽻𖾐 𖼽𖽡𖾑 𖼰𖽧 𖼞𖽳𖾐 𖼻𖽙 𖼽𖽡 𖼖𖽔𖾐、
27 𖼽𖽕𖾑 𖼐𖽕 𖼊𖽑𖽪𖾐 𖼺𖽪𖾐 𖼷𖽑𖽻𖾐 𖼽𖽕𖾑 𖼂𖽡 𖼽𖽡 𖼳𖽡𖽺𖾑、𖼦𖽪𖾑 𖼳𖽔𖾐 𖼺𖽪𖾐 𖼷𖽑𖽻𖾐 𖼄𖽡 𖼂𖽜 𖼐𖽺、
28 𖼽𖽕𖾑 𖼦𖽴 𖼺𖽪𖾐 𖼷𖽑𖽻𖾐 𖼺𖽔 𖼄𖽴、𖼐𖽑𖽧 𖼊𖽑𖽚 𖼇𖽕 𖼺𖽪𖾐 𖼷𖽑𖽻𖾐 𖼄𖽔 𖼦𖽔𖾐 𖼖𖽦、
29 𖼐𖽑𖽧 𖼊𖽑𖽚 𖼇𖽕 𖼺𖽪𖾐 𖼷𖽑𖽻𖾐 𖼂𖽔𖾐 𖼐𖽕 𖼞𖽳𖾐 𖼻𖽙 𖼳𖽡𖾐 𖼖𖽧𖾑、𖼰𖽡𖾐 𖼂𖽡 𖼽𖽕𖾑 𖼺𖽪𖾐 𖼷𖽑𖽻𖾐 𖼂𖽡𖽦𖾑 𖼽𖽔 𖼄𖽡𖽺 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼖𖽡𖾑 𖼂𖽦𖾑 𖼞𖽳𖾐 𖼻𖽙 𖼽𖽡 𖼊𖽑𖽦𖾑、
30 𖼂𖽡 𖼖𖽔𖾐 𖼍𖽪𖽺𖾑 𖼺𖽪𖾐 𖼷𖽑𖽻𖾐 𖼂𖽡 𖼐𖽕 𖼽𖽔、𖼰𖽡𖽔𖾐 𖼳𖽸 𖼳𖽡𖾐 𖼺𖽪𖾐 𖼷𖽑𖽻𖾐 𖼳𖽡𖾐 𖼊𖽑𖽦𖾑、
31 𖼂𖽚 𖼽𖽕𖾑 𖼖𖽔𖾐 𖼂𖽔𖾐 𖼺𖽪𖾐 𖼷𖽑𖽻𖾐 𖼽𖽕𖾑 𖼂𖽡 𖼽𖽕𖾑 𖼂𖽜、𖼂𖽔𖾐 𖼖𖽪 𖼄𖽡 𖼺𖽪𖾐 𖼷𖽑𖽻𖾐 𖼽𖽔𖾐 𖼺𖽶𖾐 𖼄𖽔 𖼇𖽮、
32 𖼳𖽔𖾐 𖼂𖽜 𖼺𖽪𖾐 𖼷𖽑𖽻𖾐𖼽𖽡 𖼖𖽡𖾑 𖼽𖽔 𖼦𖽔𖾐 𖼂𖽔𖾐、𖼽𖽔 𖼳𖽕𖾑 𖼞𖽳𖾐 𖼻𖽙 𖼽𖽱𖾐 𖼐𖽕 𖼍𖽔𖾐、
33 𖼦𖽔𖾐 𖼖𖽔𖾐 𖼺𖽪𖾐 𖼷𖽑𖽻𖾐 𖼳𖽔𖾐 𖼄𖽔、𖼦𖽔𖾐 𖼖𖽔𖾐 𖼺𖽪𖾐 𖼷𖽑𖽻𖾐 𖼳𖽔𖾐 𖼖𖽔𖾐 𖼞𖽳𖾐 𖼻𖽙 𖼽𖽕𖾑 𖼳𖽡𖾐 𖽃𖽕𖾑、
34 𖼄𖽔 𖼰𖽡𖽔𖾐 𖼺𖽪𖾐 𖼷𖽑𖽻𖾐 𖼦𖽔𖾐 𖼂𖽦𖾑 𖼞𖽳𖾐 𖼻𖽙 𖼽𖽡 𖼖𖽡𖾑 𖼇𖽕 𖼖𖽡𖽦𖾑、𖼰𖽡𖾐 𖼖𖽚 𖼺𖽪𖾐 𖼷𖽑𖽻𖾐 𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼞𖽳𖾐 𖼻𖽙 𖼽𖽡 𖼖𖽡𖽦、
35 𖼰𖽡𖽔𖾐 𖼄𖽧𖾑 𖼺𖽪𖾐 𖼷𖽑𖽻𖾐 𖼳𖽡𖾐 𖼺𖽶𖾐 𖼖𖽦、𖼽𖽕𖾑 𖼂𖽔𖾐 𖼺𖽪𖾐 𖼷𖽑𖽻𖾐 𖼀𖽕𖾑𖽑 𖼖𖽦、
36 𖼺𖽙 𖼂𖽔𖾐 𖼺𖽪𖾐 𖼷𖽑𖽻𖾐 𖼐𖽕 𖼍𖽔𖾐 𖼞𖽳𖾐 𖼻𖽙 𖼽𖽡 𖼳𖽜𖾐、𖼰𖽡𖽔𖾐 𖼍𖽴 𖼺𖽪𖾐 𖼷𖽑𖽻𖾐 𖼂𖽔𖾐 𖼐𖽑𖽧、
37 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼳𖽡 𖼖𖽴𖾑、𖼂𖽡 𖼖𖽮𖾑 𖼺𖽪𖾐 𖼷𖽑𖽻𖾐 𖼐𖽕 𖼦𖽔𖾐 𖼖𖽦 (𖼐𖽕 𖼦𖽔𖾐 𖼖𖽦 𖼦𖽑𖽺𖾑 𖼳𖽡 𖼖𖽪 𖼽𖽔 𖼞𖽳𖾐 𖼻𖽙 𖼽𖽱𖾐 𖼽𖽔𖾐 𖼖𖽙𖾐 𖼀𖽙𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼣𖽻𖾐)、
38 𖼽𖽡 𖼊𖽑𖽡𖽦𖾐 𖼺𖽪𖾐 𖼷𖽑𖽻𖾐 𖼽𖽡 𖼖𖽔𖾐 、 𖼽𖽡 𖼊𖽑𖽡𖽦𖾐 𖼺𖽪𖾐 𖼷𖽑𖽻𖾐 𖼰𖽡𖽔𖾐 𖼖𖽧𖾑、
39 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼈𖽪𖾐 𖼖𖽡𖾑 𖼽𖽕𖾑．
𖼍𖽕𖾑 𖼈𖽪𖽺𖾑 𖼞𖽳𖾐 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼄𖽳𖾑 𖼄𖽳 𖼺𖽙𖾐 𖼷𖽑𖽡𖾐 𖼳𖽶 𖼽𖽚𖾐 𖼮𖽻𖾐．