𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼀𖽺 𖼊𖽑𖽺 𖼈𖽜𖾐 𖼐𖽦𖾐
24
1 𖼽𖽺𖾐 𖼦𖽴 𖼦𖽫 𖼹𖽦𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽶 𖼻𖽶 𖼺𖽺𖾑，𖼍𖽕𖾑 𖼈𖽪𖽺𖾑 𖼊𖽑𖽺 𖼷𖽑𖽙，𖼽𖽻 𖼈𖽳𖾐 𖼞𖽜 𖼠𖽻𖾐 𖼰𖽡𖽳𖾐 𖼷𖽶𖾐 𖼊𖽻𖾐．𖼽𖽺𖾐 𖼦𖽴 𖼦𖽫 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽑𖽡 𖼠𖽙𖾐 𖼈𖽜𖾐 𖼐𖽦𖾐！”2 𖼈𖽪𖾐 𖼍𖽦𖾐 𖼞𖽑𖽻𖾑 𖼽𖽱𖾐 𖼽𖽔𖾐 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼄𖽦 𖼈𖽪𖾑 𖼷𖽪𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼞𖽑𖽙𖾐 𖼣𖽻𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼺𖽜 𖼻𖽶𖾐 𖼖𖽡𖾐，𖼍𖽕𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼂𖽡𖽦 𖼳𖽶𖾑 𖼂𖽔𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖼷𖽑𖽻𖾐 𖼀𖽺 𖼊𖽑𖽺 𖼈𖽜𖾐 𖼐𖽦𖾐 𖼺𖽺𖾑，𖼞𖽑𖽙 𖼄𖽙𖾐 𖼮𖽻𖾐 𖼞𖽑𖽶𖾑 𖼣𖽙𖾐 𖼺𖽝𖾑 𖼊𖽙𖾐．”
3 𖼽𖽱𖾐 𖼽𖽔𖾐 𖼈𖽪𖾐 𖼍𖽦 𖼊𖽑𖽺 𖼊𖽻 𖼞𖽑𖽚：“𖼷𖽑𖽻𖾐 𖼀𖽺 𖼞𖽑𖽙 𖼄𖽙𖾐 𖼮𖽻𖾐 𖼣𖽻𖾐 𖼦𖽻，𖼐𖽑𖽡𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼞𖽜 𖼹𖽦𖾑 𖼊𖽑𖽡 𖼦𖽑𖽙𖾐 𖼀𖽜𖾐 𖼄𖽨𖾐 𖼖𖽪 𖼐𖽑𖽡𖾐 𖼊𖽑𖽺 𖼞𖽜 𖼮𖽑𖽳𖾐，𖼹𖽦𖾑 𖼣𖽙𖾐 𖼺𖽡 𖼀𖽑𖽙 𖼣𖽙𖾐 𖼈𖽪𖾐 𖼍𖽦 𖼞𖽜 𖽂𖽙𖾐 𖼐𖽦𖾐 𖼄𖽡𖽻𖾐 𖼊𖽙𖾐 𖼖𖽡𖾐．𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼺𖽡 𖼀𖽑𖽙 𖼣𖽙𖾐 𖼈𖽪𖾐 𖼍𖽦 𖼐𖽑𖽡𖾐 𖽃𖽔𖾐 𖼹𖽻𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼊𖽑𖽺 𖼐𖽑𖽧𖾐 𖼺𖽳 𖼐𖽺𖾑？”
4 𖼦𖽑𖽻𖾐 𖼊𖽑𖽻𖾐，𖼈𖽪𖾐 𖼍𖽦 𖼀𖽦𖾐 𖼺𖽪𖾐 𖼞𖽑𖽶𖾑 𖼽𖽱𖾐 𖼽𖽔𖾐 𖼐𖽺𖾐 𖼄𖽦 𖼈𖽪𖾑 𖼷𖽪𖾐 𖼞𖽑𖽶𖾑 𖼹𖽻𖾐 𖼄𖽔 𖼊𖽻𖾐 𖼐𖽙𖾐 𖼄𖽔 𖼂𖽡𖾑 𖼺𖽺𖾑，𖼽𖽻 𖼈𖽳𖾐 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼊𖽚𖾐 𖼽𖽡𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖼈𖽜𖾐 𖼐𖽦𖾐． 5 𖼽𖽻 𖼈𖽳𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽚 𖼽𖽡𖾐 𖼦𖽑𖽙𖾐 𖼺𖽺𖾑，𖼖𖽻𖾐 𖼞𖽑𖽪 𖼠𖽻𖾐 𖼊𖽑𖽺 𖼽𖽕𖾑 𖼖𖽚 𖽃𖽳 𖼖𖽪𖾐 𖼽𖽙𖾐 𖼀𖽳 𖼞𖽳𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶；𖼠𖽙𖾑 𖼍𖽻𖾐，𖼰𖽡𖽔𖾐 𖼍𖽴 𖼄𖽡𖾐 𖼊𖽺𖾐 𖼮𖽑𖽻𖾐 𖼠𖽚 𖼽𖽡𖾐 𖼺𖽺𖾑，𖼽𖽔 𖼳𖽡𖽺𖾑 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽡𖾐； 6 𖼹𖽦𖾑 𖼖𖽻𖾐 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼐𖽺𖾐 𖼊𖽑𖽔𖾐 𖼊𖽑𖽧 𖼦𖽴 𖼳𖽶𖾑 𖼄𖽡𖾐 𖼊𖽺𖾐 𖼮𖽑𖽡𖾐；𖼹𖽦𖾑 𖼽𖽡𖾐 𖼍𖽕𖾑 𖼽𖽔 𖽃𖽔𖾐 𖼄𖽡𖾐 𖼊𖽺𖾐 𖼮𖽑𖽡𖾐；𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼰𖽻𖾐 𖼳𖽡𖾐 𖼍𖽪𖽺𖾑 𖼖𖽪𖾐 𖼞𖽳𖾐 𖼮𖽑𖽡𖾐； 7 𖼹𖽦𖾑 𖼖𖽻𖾐 𖼊𖽑𖽪𖽺𖾐 𖼖𖽚 𖼖𖽪𖾐 𖼞𖽳𖾐 𖼄𖽦 𖼀𖽑𖽙 𖼳𖽪𖾐 𖼞𖽳𖾐 𖼄𖽡𖾐 𖼊𖽺𖾐，𖼳𖽡𖾐 𖼈𖽪𖽺𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼰𖽡𖽔𖾐 𖼐𖽕 𖼺𖽪𖾐 𖼷𖽑𖽻𖾐 𖼖𖽪𖾐 𖼞𖽑𖽙𖾐 𖼣𖽻𖾐 𖼞𖽳𖾐 𖼮𖽑𖽡𖾐．𖼠𖽙𖾑 𖼍𖽻𖾐，𖼽𖽻 𖼈𖽳𖾐 𖼖𖽻𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼂𖽡𖽦 𖼳𖽶𖾑 𖼂𖽔𖾐 𖼄𖽡𖾐 𖼊𖽺𖾐 𖼮𖽑𖽡𖾐．
8 𖼞𖽑𖽶𖾑 𖼠𖽙𖾑 𖼍𖽻𖾐，𖼽𖽻 𖼈𖽳𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼺𖽜 𖼻𖽶𖾐 𖼦𖽑𖽻𖾐，𖼳𖽨𖾐 𖼀𖽙𖾐 𖼠𖽶𖾐 𖼊𖽝𖾐 𖼐𖽺𖾐 𖼐𖽑𖽡 𖼷𖽑𖽡𖾐 𖼐𖽑𖽡𖾐 𖼖𖽚 𖼞𖽑𖽶𖾑 𖼮𖽶𖾐 𖼺𖽺𖾑，𖼀𖽑𖽚𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼞𖽚 𖼮𖽑𖽡𖾐． 9 𖼷𖽑𖽻𖾐 𖼀𖽺 𖼞𖽑𖽙 𖼄𖽙𖾐 𖼮𖽻𖾐 𖼞𖽑𖽶𖾑 𖼽𖽱𖾐 𖼽𖽔𖾐 𖼽𖽡𖾐 𖼈𖽪𖾐 𖼍𖽦 𖼖𖽙𖾐 𖼮𖽑𖽻𖾐 𖼀𖽦𖾐：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖽃𖽔𖾑 𖼊𖽑𖽙 𖼈𖽺𖾐，𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼦𖽑𖽦 𖼷𖽑𖽡𖾐 𖼄𖽺 𖼮𖽻𖾐，𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼣𖽙 𖼷𖽑𖽡𖾐 𖼄𖽺 𖼮𖽻𖾐．
𖼍𖽕𖾑 𖼈𖽪𖽺𖾑 𖽂𖽙 𖼇𖽕 𖼳𖽶 𖼷𖽶𖾐 𖼄𖽳𖾐 (𖼍𖽦𖾑 𖼊𖽑𖽡 21 ：7 17 )
10 𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼀𖽺 𖼊𖽑𖽺 𖼈𖽜𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼐𖽑𖽧𖾐 𖼄𖽙𖾐 𖼺𖽙𖾑 𖼺𖽙𖾐 𖼄𖽔 𖼮𖽻𖾐，𖽃𖽔𖾐 𖼺𖽺𖾑 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽦𖾐：“𖼣𖽙𖾐 𖼄𖽡𖽻 𖼦𖽑𖽺𖾑 𖼂𖽺𖾐 𖼦𖽑𖽙𖾐，𖼽𖽺𖾐 𖼮𖽑𖽡𖽪𖾑 𖼈𖽳 𖼄𖽙𖾐 𖼀𖽑𖽨 𖼦𖽑𖽙𖾐．𖼽𖽺𖾐 𖼦𖽴 𖼦𖽫 𖽃𖽔𖾐！𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼐𖽑𖽡𖾐 𖼮𖽜𖾐 𖼀𖽑𖽙 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽑𖽺 𖼄𖽡𖽺 𖼦𖽑𖽙𖾐 𖼞𖽜，𖼞𖽪𖾐 𖼮𖽡𖽺𖾐 𖼣𖽙𖾐 𖼦𖽑𖽔𖾐 𖼮𖽶𖾐 𖼣𖽡𖽳𖾐 𖼍𖽺 𖼺𖽪𖾐 𖼄𖽡𖽻 𖼂𖽺𖾐 𖼦𖽑𖽙𖾐．”
11 𖼍𖽕𖾑 𖼈𖽪𖽺𖾑 𖼷𖽑𖽶𖾐 𖼐𖽦 𖼍𖽪𖾐 𖼖𖽻𖾐，𖼽𖽺𖾐 𖼦𖽴 𖼦𖽫 𖼽𖽻 𖼞𖽳𖾐 𖼺𖽡𖾐 𖼻𖽙 𖼰𖽡𖽔𖾐 𖼍𖽴 𖼊𖽑𖽺 𖼀𖽑𖽪𖾐 𖼄𖽪𖾑，𖼰𖽡𖽔𖾐 𖼍𖽴 𖼦𖽑𖽺𖾑 𖼍𖽕𖾑 𖼈𖽪𖽺𖾑 𖼞𖽳𖾐 𖼺𖽡𖾐 𖼻𖽙 𖼣𖽻𖾐．𖼽𖽺𖾐 𖼦𖽴 𖼦𖽫 𖼀𖽦𖾐： 12 “𖼐𖽑𖽡𖾐 𖼽𖽡𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐 𖼊𖽑𖽧，𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼣𖽙𖾐 𖼈𖽡𖾑 𖼞𖽑𖽙 𖼺𖽙𖾐 𖼳𖽶 𖼮𖽻𖾐，𖼐𖽑𖽡𖾐 𖼊𖽑𖽡 𖼳𖽶 𖼺𖽺𖾐 𖼺𖽺𖾑，𖼣𖽙𖾐 𖼀𖽑𖽨 𖼐𖽑𖽡𖾐 𖼞𖽜 𖼊𖽻𖾐．”
13 𖽃𖽔𖾐 𖼺𖽺𖾑 𖼰𖽡𖽔𖾐 𖼍𖽴 𖼖𖽻𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼄𖽡𖽻𖾐，𖼽𖽻 𖼖𖽙𖾐 𖼊𖽻 𖼐𖽙𖾐：“𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽜 𖼦𖽑𖽦 𖼄𖽦 𖼳𖽶 𖼞𖽑𖽚 𖼷𖽶𖾐 𖼊𖽻𖾐 𖼐𖽺𖾑？𖼐𖽑𖽡𖾐 𖼈𖽳𖾐 𖼞𖽳𖾐 𖼮𖽡𖾐 𖼂𖽦𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼮𖽡𖽪 𖼀𖽑𖽻𖾐，𖼳𖽨𖾐 𖼀𖽙𖾐 𖼺𖽙𖾐 𖼊𖽝𖾐 𖼺𖽙𖾐 𖼞𖽜 𖼞𖽕 𖼐𖽺𖾑？ 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼐𖽙𖾐 𖼊𖽡𖾐 𖼺𖽙𖾐 𖼐𖽑𖽡𖾐 𖼮𖽻𖾐 𖼖𖽡𖾐 𖼐𖽺𖾑？ 𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽡 𖼠𖽙𖾐 𖼣𖽝 𖼐𖽦𖾐 𖼺𖽺𖾑，𖼀𖽦𖾐 𖼣𖽙𖾐 𖼊𖽑𖽺 𖼊𖽑𖽧 𖼖𖽻𖾐，𖼣𖽙𖾐 𖼣𖽙𖾐 𖼊𖽑𖽺 𖼹𖽡𖾐 𖼂𖽻𖾐 𖼖𖽻𖾐 𖼺𖽪𖾐 𖼊𖽑𖽺 𖼊𖽻 𖼞𖽑𖽚 𖼺𖽙𖾐．”
14 𖼍𖽕𖾑 𖼈𖽪𖽺𖾑 𖼰𖽡𖽔𖾐 𖼍𖽴 𖼖𖽙𖾐 𖼀𖽦𖾐：“𖼣𖽙𖾐 𖼦𖽑𖽔𖾐 𖼮𖽶𖾐 𖼺𖽺𖾐 𖼳𖽚𖾑，𖼣𖽙𖾐 𖼈𖽳𖾐 𖼐𖽑𖽧𖾐 𖼺𖽳 𖼽𖽺𖾐 𖼦𖽴 𖼦𖽫 𖼞𖽜 𖼣𖽙𖾐 𖼈𖽳𖾐 𖼊𖽑𖽺 𖽂𖽙 𖼇𖽕 𖼳𖽶，𖼞𖽪𖾐 𖼮𖽡𖽺𖾐 𖼽𖽻 𖼀𖽻𖾐 𖼀𖽡𖾐 𖼞𖽳𖾐 𖼐𖽑𖽧𖾐 𖼮𖽡𖽻𖾐 𖼮𖽻𖾐．𖼣𖽙𖾐 𖼊𖽑𖽺 𖼰𖽡𖽻𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼊𖽑𖽔 𖼰𖽡𖽺𖾐 𖼞𖽜．”
15 𖽃𖽔𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼐𖽙𖾐 𖼊𖽡𖾐 𖼀𖽑𖽨 𖼽𖽡 𖼺𖽴𖾑 𖼖𖽡𖽦𖾑 𖼄𖽡𖾐 𖼊𖽺𖾐 𖼹𖽺𖾐，𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼷𖽑𖽶𖾐 𖼐𖽦 𖼮𖽑𖽻𖾐 𖼺𖽺𖾑，𖼽𖽻 𖼞𖽑𖽙𖾐 𖼀𖽦𖾐 𖼍𖽙𖾑 𖼺𖽪𖾐 𖼐𖽑𖽡𖾐 𖼦𖽑𖽦 𖼖𖽙𖾐 𖼮𖽑𖽡𖾐．𖼍𖽕𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼂𖽡𖽦 𖼳𖽶𖾑 𖼂𖽔𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖼷𖽑𖽻𖾐 𖼀𖽺 𖼳𖽶 𖼄𖽺 𖼳𖽶𖾐 𖼦𖽑𖽙𖾐． 16 𖼄𖽶 𖼹𖽡𖾐 𖼖𖽦 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼠𖽚，𖼖𖽪𖾐 𖼊𖽑𖽺 𖼄𖽳 𖼮𖽡𖽦 𖼊𖽻𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼣𖽝 𖼀𖽑𖽚𖾐 𖼺𖽺𖾑，𖼄𖽳 𖼮𖽡𖽦 𖼄𖽡𖽻 𖼂𖽺𖾐 𖼺𖽪𖾐 𖼄𖽶 𖼹𖽡𖾐 𖼖𖽦 𖼖𖽙𖾐 𖼀𖽦𖾐：“𖼖𖽚 𖼦𖽑𖽻𖾐，𖼀𖽑𖽨 𖼐𖽙 𖼦𖽻！” 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽶 𖼹𖽡𖾐 𖼖𖽦𖾐 𖼞𖽑𖽻𖾑 𖼽𖽺𖾐 𖼂𖽪𖾑 𖼺𖽶𖾐 𖼺𖽪𖾐 𖼷𖽑𖽻𖾐 𖼽𖽕𖾑 𖼖𖽘 𖼐𖽕 𖼞𖽳𖾐 𖼊𖽝 𖼞𖽳𖾐 𖼊𖽑𖽺 𖼮𖽻𖾐．
17 𖼍𖽕𖾑 𖼈𖽪𖽺𖾑 𖼞𖽑𖽻𖾑 𖼷𖽑𖽻𖾐 𖼀𖽺 𖼊𖽑𖽺 𖼺𖽦 𖼺𖽪𖾐 𖼄𖽶 𖼹𖽡𖾐 𖼖𖽦 𖼖𖽙𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽦𖾐：“𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼺𖽪𖾐 𖼞𖽑𖽶𖾑 𖼣𖽙𖾐 𖼣𖽻𖾐，𖼊𖽶𖾐 𖼄𖽡𖽻 𖼂𖽺𖾐 𖼺𖽪𖾐 𖼞𖽑𖽶𖾑 𖼖𖽺𖾑 𖼣𖽙𖾐 𖼣𖽻𖾐，𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼦𖽑𖽺𖾑 𖼹𖽻𖾐 𖽃𖽔 𖼊𖽺𖾑 𖼳𖽶 𖼦𖽑𖽙 𖼊𖽪 𖼮𖽻𖾐 𖼐𖽺𖾑？ 𖼐𖽑𖽡𖾐 𖼣𖽙𖾐 𖼐𖽺𖾐 𖼣𖽙𖾐 𖼊𖽑𖽡 𖼈𖽴 𖼊𖽑𖽺 𖽂𖽙 𖼇𖽕 𖼳𖽶 𖼮𖽑𖽳𖾐．”
𖼍𖽕𖾑 𖼈𖽪𖽺𖾑 𖼍𖽡𖾐 𖼮𖽡𖽺𖾐 𖼂𖽺𖾐 ( 𖼍𖽦𖾑 𖼊𖽑𖽡 21：18 27)
18 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼰𖽡𖽔𖾐 𖼍𖽴 𖼖𖽻𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼄𖽡𖽻𖾐，𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼊𖽦𖾐 𖼽𖽡𖾐，𖼽𖽺𖾐 𖼂𖽪𖾑 𖼺𖽶𖾐 𖼺𖽪𖾐 𖼷𖽑𖽻𖾐 𖼽𖽕𖾑 𖼖𖽘 𖼐𖽕 𖼞𖽳𖾐 𖼊𖽝 𖼞𖽳𖾐 𖼊𖽑𖽺 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐 𖼖𖽡𖾐．”
19 𖼍𖽕𖾑 𖼈𖽪𖽺𖾑 𖼰𖽡𖽔𖾐 𖼍𖽴 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐，𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼊𖽦𖾐 𖼽𖽡𖾐 𖼦𖽑𖽙𖾐． 20 𖼽𖽕𖾑 𖼖𖽘 𖼐𖽕 𖼍𖽕𖾑 𖽂𖽚 𖼀𖽳 𖼘𖽜𖾑 𖼐𖽦𖾐，𖼈𖽪𖾐 𖼍𖽦 𖼐𖽺𖾐 𖼷𖽶 𖼄𖽻 𖼺𖽜 𖼽𖽻 𖼮𖽻𖾐 𖼞𖽳𖾐 𖼐𖽳 𖼖𖽻𖾐 𖼖𖽙𖾐 𖼄𖽡𖽻𖾐 𖼺𖽺𖾑，𖼽𖽻 𖼽𖽡𖾐 𖼽𖽻 𖼈𖽳𖾐 𖼊𖽑𖽺 𖼹𖽶𖾐，𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐 𖼈𖽪𖾐 𖼍𖽦 𖼊𖽑𖽺 𖼊𖽑𖽴． 21 𖼽𖽕𖾑 𖼖𖽘 𖼐𖽕 𖼊𖽻 𖼐𖽙𖾐：“𖼣𖽙𖾐 𖼺𖽡 𖼀𖽑𖽙 𖼣𖽙𖾐 𖼈𖽪𖾐 𖼍𖽦 𖼐𖽑𖽡𖾐 𖽃𖽔𖾐 𖼹𖽻𖾐 𖼮𖽜𖾐 𖼀𖽑𖽙 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼐𖽺𖾑？” 𖼍𖽕𖾑 𖼈𖽪𖽺𖾑 𖼊𖽻 𖼞𖽑𖽚 𖼀𖽦𖾐：“𖼣𖽙𖾐 𖼖𖽻𖾐 𖼐𖽑𖽡𖾐 𖼞𖽳𖾐 𖼊𖽝 𖼞𖽳𖾐 𖼊𖽑𖽺 𖼈𖽳𖾐 𖼖𖽻𖾐 𖼺𖽪𖾐 𖼣𖽻𖾐，𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐 𖼺𖽺𖾑，𖼷𖽑𖽻𖾐 𖼀𖽺 𖼠𖽻𖾐 𖼞𖽑𖽶𖾐 𖼐𖽙𖾐 𖼊𖽡𖾐 𖼞𖽜 𖼐𖽙 𖼹𖽺𖾐 𖼖𖽡𖾐．”
22 𖼽𖽕𖾑 𖼖𖽘 𖼐𖽕 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼣𖽙𖾐 𖼺𖽡 𖼀𖽑𖽙，𖼣𖽙𖾐 𖼈𖽪𖾐 𖼍𖽦𖾐 𖽃𖽔𖾐！𖼐𖽑𖽡𖾐 𖼐𖽦𖾐 𖽃𖽔 𖼊𖽺𖾑 𖼳𖽶 𖼹𖽳𖾐 𖼊𖽑𖽡𖾑 𖼣𖽻𖾐，𖽃𖽔𖾐 𖼊𖽺𖾑 𖼳𖽶 𖼈𖽺𖾐 𖼍𖽡𖾐 𖼊𖽪𖾐 𖼂𖽺𖾐 𖼮𖽑𖽳𖾐！𖼐𖽦𖾐 𖼄𖽺，𖼦𖽑𖽺𖾑 𖼠𖽻𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐 𖼐𖽑𖽡 𖼮𖽻𖾐，𖼷𖽙𖾐 𖼊𖽝 𖼖𖽚𖾐 𖼂𖽚𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐 𖼐𖽺𖾐 𖼐𖽑𖽡 𖼊𖽑𖽺 𖼹𖽜𖾐 𖼺𖽪𖾐 𖼖𖽦𖾐 𖼞𖽚 𖼈𖽺𖾐 𖼺𖽧𖾐 𖼂𖽺𖾐 𖼮𖽑𖽡𖽪𖾐 𖼊𖽙𖾐． 23 𖼈𖽪𖾐 𖼍𖽦 𖽃𖽔𖾐！𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼣𖽙𖾐 𖼀𖽑𖽨 𖼐𖽑𖽡𖾐 𖼊𖽑𖽺 𖼞𖽜 𖼊𖽙𖾐．” 𖼽𖽕𖾑 𖼖𖽘 𖼐𖽕 𖼹𖽦𖾑 𖼈𖽪𖾐 𖼍𖽦 𖼖𖽙𖾐 𖼀𖽦𖾐：“𖼐𖽑𖽡𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼐𖽑𖽧𖾐 𖼺𖽳 𖼐𖽑𖽡𖾐 𖼊𖽑𖽺 𖼷𖽶𖾐 𖼞𖽜！”
24 𖼈𖽪𖾐 𖼍𖽦 𖼽𖽕𖾑 𖼖𖽘 𖼐𖽕 𖼊𖽑𖽺 𖼊𖽻 𖼞𖽑𖽚：“𖼦𖽑𖽺𖾑 𖼻𖽻𖾐 𖼂𖽺𖾐 𖼄𖽔 𖼊𖽙𖾐，𖼣𖽙𖾐 𖼀𖽑𖽶 𖼊𖽚𖾐 𖼐𖽑𖽡𖾐 𖼞𖽳𖾐 𖼈𖽳𖾐 𖼊𖽻𖾐，𖼣𖽙𖾐 𖼀𖽑𖽶 𖼄𖽔 𖼞𖽜 𖼺𖽪𖾐 𖼻𖽜 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼺𖽺𖾑，𖼦𖽑𖽙𖾐 𖼣𖽙𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼄𖽔 𖼊𖽙𖾐．” 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼣𖽙 𖼷𖽑𖽡𖾐 𖼀𖽑𖽡 𖼻𖽜 𖼊𖽝 𖼞𖽳𖾐 𖼐𖽺𖾐 𖼐𖽑𖽡 𖼞𖽑𖽶𖾑 𖼈𖽳𖾐 𖼹𖽺𖾐 𖼖𖽻𖾐．
25 𖼍𖽕𖾑 𖼈𖽪𖽺𖾑 𖼞𖽑𖽶𖾑 𖼠𖽻𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐，𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼐𖽺𖾐 𖼺𖽙𖾑 𖼺𖽙𖾐 𖼍𖽡𖾐 𖼮𖽑𖽡𖽺𖾐 𖼂𖽺𖾐．𖼦𖽑𖽺𖾑 𖼻𖽻𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼽𖽻 𖼞𖽳𖾐 𖼮𖽑𖽡 𖼮𖽡𖽺𖾐 𖼊𖽑𖽺 𖼊𖽻 𖼞𖽑𖽚，𖼐𖽙𖾐 𖼊𖽡𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼐𖽙 𖼹𖽺𖾐 𖼦𖽑𖽙𖾐．