𖼍𖽕𖾑 𖼈𖽪𖽺𖾑 𖼞𖽳𖾐 𖼞𖽑𖽪𖾐 𖼮𖽑𖽳 𖼮𖽻 𖼮𖽪
22
1 𖼽𖽺𖾐 𖼦𖽴 𖼦𖽫 𖼍𖽕𖾑 𖼈𖽪𖽺𖾑 𖼊𖽑𖽺 𖼮𖽡𖾐 𖼂𖽦𖾐 𖼞𖽑𖽙𖾐 𖼣𖽻𖾐 𖼐𖽺𖾐 𖼺𖽻 𖼖𖽚 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐 𖼦𖽑𖽙𖾐 𖼞𖽑𖽶𖾑 𖼮𖽶𖾐，𖼽𖽻 𖼮𖽻 𖼮𖽪 𖼦𖽑𖽺𖾑 𖼈𖽝 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽪𖾐 𖼮𖽑𖽳． 2 𖼽𖽻 𖼀𖽦𖾐：“𖼽𖽺𖾐 𖼦𖽴 𖼦𖽫 𖼣𖽙𖾐 𖼞𖽳𖾐 𖼖𖽚𖾐 𖼀𖽑𖽡 𖼀𖽳𖾐、𖼮𖽻𖾐 𖼻𖽺𖾐 𖼊𖽪 𖼐𖽺𖾐 𖼰𖽨𖾑 𖼺𖽡 𖼀𖽑𖽙 𖼣𖽻𖾐，
3 𖼽𖽻 𖼣𖽙𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 、𖼖𖽚𖾐 𖼳𖽕𖾐 𖼊𖽑𖽺𖾐 𖼣𖽻𖾐，
𖼽𖽻 𖼦𖽺𖾑𖽑 𖼣𖽙𖾐 𖼞𖽑𖽙𖾐 𖼣𖽜𖾐 𖼻𖽺𖾐 𖼊𖽙𖾐 𖼺𖽪𖾐 𖼣𖽻𖾐，
𖼽𖽻 𖼣𖽙𖾐 𖼞𖽳𖾐 𖼮𖽑𖽨𖾑 𖼊𖽪𖾐、𖼣𖽙𖾐 𖼞𖽳𖾐 𖼰𖽨𖾑 𖼮𖽡 𖼽𖽡𖾑 𖼽𖽻𖾐 𖼮𖽑𖽡𖽪𖾐 𖼣𖽻𖾐，
𖼽𖽻 𖼣𖽙𖾐 𖼞𖽳𖾐 𖼖𖽪𖾐 𖼰𖽻𖾐、𖼀𖽑𖽻𖾐 𖼈𖽶 𖼊𖽪 𖼐𖽺𖾐 𖼰𖽨𖾑 𖼺𖽡 𖼀𖽑𖽙 𖼣𖽻𖾐．
𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼣𖽙𖾐 𖼊𖽑𖽺 𖼮𖽑𖽡𖾐 𖼻𖽸 𖼄𖽡𖽻 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐．
4 𖼣𖽙𖾐 𖼞𖽑𖽪𖾐 𖼮𖽑𖽳 𖼷𖽻 𖼺𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐，
𖼽𖽻 𖼣𖽙𖾐 𖼊𖽑𖽺 𖼮𖽡𖾐 𖼂𖽦𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐．
5 𖼳𖽶𖾐 𖼮𖽡𖽦 𖼞𖽶𖾑𖽑 𖼈𖽡𖾐 𖼹𖽧𖾑 𖼖𖽙𖾐 𖼺𖽶𖾑 𖼣𖽙𖾐 𖼊𖽑𖽺 𖼰𖽻𖾑，
𖼄𖽳 𖼮𖽡𖽦 𖼞𖽶𖾑𖽑 𖽃𖽔𖾐 𖼮𖽡𖽦𖾐 𖼖𖽙𖾐 𖼺𖽶𖾑 𖼣𖽙𖾐 𖼊𖽑𖽺 𖼊𖽑𖽕𖾐．
6 𖼳𖽶𖾐 𖼷𖽪𖾐 𖼄𖽡𖾐 𖼞𖽶𖾑𖽑 𖼰𖽕𖾐 𖼈𖽝 𖼖𖽙𖾐 𖼺𖽶𖾑 𖼣𖽙𖾐 𖼊𖽑𖽺 𖼖𖽧𖾐 𖼍𖽡，
𖼳𖽶𖾐 𖼮𖽡𖽦 𖼞𖽶𖾑𖽑 𖼈𖽪𖾐 𖼂𖽝𖾐 𖼖𖽙𖾐 𖼺𖽶𖾑 𖼣𖽙𖾐 𖼊𖽑𖽺 𖼐𖽦𖾑 𖼍𖽡．
7 𖼣𖽙𖾐 𖼠𖽻𖾐 𖼰𖽡𖽳𖾐 𖼠𖽻𖾐 𖼞𖽑𖽶𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐，
𖼣𖽙𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼰𖽙𖾐 𖽃𖽶𖾐，
𖼽𖽻 𖼍𖽡𖾐 𖼦𖽑𖽺𖾐 𖼞𖽑𖽶𖾐 𖼮𖽑𖽻𖾐 𖼣𖽙𖾐 𖼮𖽑𖽡𖽪 𖼊𖽻 𖼐𖽙𖾐，
𖼽𖽻 𖼣𖽙𖾐 𖼞𖽳𖾐 𖽃𖽶𖾐 𖼮𖽑𖽡𖽪 𖼊𖽑𖽺 𖼊𖽻 𖼮𖽨 𖼦𖽑𖽻𖾐．
8 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼀𖽶 𖼻𖽶 𖼮𖽑𖽡𖾐 𖼀𖽑𖽨 𖼺𖽺𖾑 𖼄𖽡𖾐 𖼖𖽧𖾐，
𖼄𖽶 𖼠𖽻𖾐 𖼞𖽳𖾐 𖼻𖽶𖾐 𖼮𖽑𖽡𖾐 𖼖𖽺𖾑 𖼐𖽑𖽡𖽻𖾐 𖼍𖽪𖾐 𖼖𖽻𖾐 𖼦𖽑𖽙𖾐．
9 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼐𖽙𖾑 𖼀𖽧𖾐 𖼳𖽡𖽪𖾐 𖼞𖽑𖽶𖾐 𖽃𖽔𖾑 𖼞𖽑𖽶 𖼺𖽶𖾑 𖼍𖽪𖾐 𖼖𖽻𖾐，
𖼄𖽡 𖼞𖽑𖽪𖾐 𖼮𖽑𖽻𖾐 𖽃𖽔𖾐 𖼍𖽚𖾑 𖼄𖽸𖾐 𖼊𖽚𖾐 𖼖𖽻𖾐 𖼺𖽺𖾑，𖼺𖽳 𖼐𖽑𖽡 𖼖𖽺𖾑 𖼊𖽴 𖼍𖽪𖾐 𖼖𖽻𖾐 𖼦𖽑𖽙𖾐．
10 𖼽𖽻 𖼄𖽶 𖼠𖽻𖾐 𖼞𖽜 𖼞𖽚 𖼹𖽺𖾐 𖼖𖽻𖾐，𖼐𖽜𖾑 𖼠𖽻𖾐 𖼮𖽑𖽻𖾐 𖼹𖽺𖾐 𖼖𖽻𖾐，
𖼍𖽡𖾐 𖼮𖽑𖽙𖾐 𖼐𖽦𖾑 𖼐𖽦𖾐 𖼽𖽻 𖼮𖽑𖽡𖾑 𖼀𖽑𖽦𖾐 𖼞𖽑𖽶𖾐 𖼮𖽻𖾐．
11 𖼽𖽻 𖼀𖽨𖾐 𖼍𖽳𖾐 𖼺𖽪𖾐 𖼰𖽡𖾐 𖼖𖽪𖾑 𖼂𖽚 𖼊𖽑𖽺 𖼊𖽡𖾐，
𖼽𖽻 𖽃𖽔𖾑 𖼄𖽶 𖼳𖽡𖽺𖾐 𖼞𖽳𖾐 𖼊𖽪𖾐 𖼖𖽦 𖼊𖽑𖽺 𖼮𖽻𖾐 𖼷𖽑𖽻𖾐 𖼞𖽜 𖼄𖽡𖽻𖾐．
12 𖼽𖽻 𖼐𖽦𖾑 𖼐𖽦𖾐 𖼻𖽜 𖼽𖽻 𖼄𖽳𖾑 𖼞𖽚 𖼰𖽻𖾐 𖼖𖽡𖾐 𖼖𖽡𖾐 𖼮𖽑𖽨𖾑 𖼍𖽡，
𖽃𖽔𖾐 𖼮𖽡𖽦𖾐 𖼐𖽺𖾐 𖼍𖽡𖾐 𖼮𖽑𖽙𖾐 𖼻𖽜 𖼽𖽻 𖼞𖽳𖾐 𖼮𖽨𖾑𖽑 𖼄𖽳𖾐 𖼂𖽺𖾐．
13 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼊𖽚𖾐 𖼊𖽑𖽧 𖼖𖽻𖾐 𖼺𖽪𖾐 𖼀𖽜𖾐 𖼖𖽜𖾐，
𖼺𖽳 𖼐𖽑𖽡 𖼊𖽑𖽺 𖼮𖽑𖽡𖽪𖾐 𖼍𖽪𖾐 𖼖𖽻𖾐 𖼦𖽑𖽙𖾐！
14 𖼽𖽺𖾐 𖼦𖽴 𖼦𖽫 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖽃𖽔𖾑 𖼄𖽶 𖼠𖽶，
𖼄𖽶𖾐 𖼷𖽑𖽚 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼮𖽑𖽡𖽪 𖼀𖽺𖾐 𖼊𖽚𖾐 𖼊𖽑𖽧 𖼖𖽻𖾐．
15 𖼽𖽻 𖼮𖽑𖽡𖽦𖾐 𖼻𖽜 𖼮𖽡𖾐 𖼂𖽦𖾐 𖼊𖽑𖽺 𖼀𖽝𖾐 𖼀𖽺 𖼦𖽑𖽻𖾐．
𖼽𖽻 𖽃𖽔𖾑 𖼄𖽶 𖼀𖽢 𖼻𖽜 𖼮𖽡𖾐 𖼂𖽦𖾐 𖼊𖽑𖽺 𖼰𖽡𖽮𖾐 𖼀𖽺 𖼦𖽑𖽙𖾐．
16 𖼽𖽺𖾐 𖼦𖽴 𖼦𖽫 𖼊𖽑𖽡 𖼖𖽦 𖼦𖽑𖽳𖾐 𖼄𖽪𖾑，
𖼽𖽻 𖼐𖽙𖾑 𖼀𖽧𖾐 𖼳𖽡𖽪𖾐 𖼞𖽑𖽶𖾐 𖼺𖽦 𖼊𖽑𖽡 𖼖𖽦 𖼦𖽑𖽙𖾐 𖼊𖽑𖽧 𖼖𖽻𖾐 𖼍𖽺𖾑 𖼺𖽺，
𖼦𖽜𖾐 𖼄𖽙𖾐 𖼊𖽑𖽻𖾐 𖼖𖽺𖾑 𖼊𖽑𖽦 𖼊𖽚𖾐 𖼖𖽻𖾐，
𖼄𖽡𖾑 𖼐𖽦𖾐 𖼞𖽳𖾐 𖼻𖽺𖾐 𖼮𖽑𖽡𖾐 𖼖𖽺𖾑 𖼊𖽚𖾐 𖼊𖽑𖽧 𖼖𖽻𖾐．
17 𖼽𖽻 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼣𖽙𖾐 𖼊𖽑𖽺 𖼺𖽶𖾐 𖼍𖽡，
𖽃𖽔𖾐 𖼮𖽡𖽦𖾐 𖼞𖽑𖽶𖾐 𖼮𖽑𖽻𖾐 𖼣𖽙𖾐 𖼊𖽑𖽺 𖼺𖽶𖾐 𖼊𖽦𖾐 𖼖𖽻𖾐．
18 𖼽𖽻 𖼮𖽡𖾐 𖼂𖽦𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼣𖽙𖾐 𖼊𖽑𖽺 𖼰𖽨𖾑，
𖼣𖽙𖾐 𖼞𖽜 𖼣𖽙𖾐 𖼊𖽑𖽺 𖼐𖽑𖽧𖾐 𖼰𖽴𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼰𖽡𖾑 𖼦𖽑𖽙𖾐，
𖼞𖽪𖾐 𖼮𖽡𖽺𖾐 𖼽𖽻 𖼈𖽳𖾐 𖼣𖽙𖾐 𖼦𖽶𖾑 𖼄𖽔 𖼷𖽑𖽶𖾐 𖽂𖽙 𖼊𖽙𖾐．
19 𖼣𖽙𖾐 𖼠𖽻𖾐 𖼰𖽡𖽳𖾐 𖼷𖽶𖾐 𖼞𖽑𖽶𖾑 𖼮𖽶𖾐，𖼮𖽡𖾐 𖼂𖽦𖾐 𖼖𖽻𖾐 𖼣𖽙𖾐 𖼊𖽑𖽺 𖼊𖽝 𖼊𖽦，
𖼦𖽑𖽻𖾐 𖼊𖽑𖽻𖾐 𖼽𖽺𖾐 𖼦𖽴 𖼦𖽫 𖼞𖽑𖽶𖾑 𖼣𖽙𖾐 𖼣𖽜𖾐 𖼻𖽺𖾐 𖼊𖽙𖾐 𖼺𖽪𖾐 𖼺𖽡 𖼀𖽑𖽙 𖼣𖽻𖾐．
20 𖼽𖽻 𖼣𖽙𖾐 𖼊𖽑𖽺 𖼦𖽳 𖼊𖽚𖾐 𖼽𖽡𖾐 𖼊𖽺𖾐 𖼠𖽻𖾐 𖼞𖽳𖾐 𖼮𖽑𖽡𖾐．
𖼽𖽻 𖼣𖽙𖾐 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖼣𖽙𖾐 𖼊𖽑𖽺 𖼐𖽑𖽧𖾐 𖼺𖽳．
21 𖼽𖽺𖾐 𖼦𖽴 𖼦𖽫 𖼣𖽙𖾐 𖼞𖽳𖾐 𖼀𖽳𖾐 𖼈𖽡𖾐 𖼖𖽙𖾐 𖼮𖽑𖽻𖾐 𖼣𖽙𖾐 𖼊𖽑𖽺 𖼞𖽑𖽚 𖼞𖽜 𖼊𖽻𖾐，
𖼽𖽻 𖼣𖽙𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼺𖽡 𖼮𖽡𖾐 𖼄𖽡𖽻 𖼖𖽙𖾐 𖼮𖽑𖽻𖾐 𖼣𖽙𖾐 𖼊𖽑𖽺 𖼮𖽡 𖼖𖽪 𖼊𖽻𖾐．
22 𖼞𖽪𖾐 𖼮𖽡𖽺𖾐，𖼣𖽙𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼺𖽜，
𖼣𖽙𖾐 𖼊𖽶𖾐 𖼄𖽡𖽻 𖼄𖽔 𖼂𖽺𖾐，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼖𖽺𖾑 𖼰𖽡𖾑 𖼦𖽑𖽙𖾐 𖼄𖽔 𖼠𖽚．
23 𖼞𖽪𖾐 𖼮𖽡𖽺𖾐，𖼽𖽻 𖼞𖽳𖾐 𖼳𖽪𖾐 𖼮𖽨𖾐 𖼄𖽔 𖼐𖽙 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐，
𖼽𖽻 𖼞𖽳𖾐 𖼷𖽑𖽦𖾐 𖼮𖽡𖽺𖾐 𖼖𖽺𖾑 𖼣𖽙𖾐 𖼷𖽴𖾐 𖼦𖽑𖽙𖾐 𖼄𖽔 𖼠𖽚．
24 𖼣𖽙𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽙 𖼊𖽪 𖼄𖽔 𖼮𖽻𖾐，
𖼽𖽻 𖼄𖽳𖾑 𖼞𖽚 𖼷𖽜𖾐 𖼮𖽑𖽡𖾐，𖼽𖽺𖾐 𖼮𖽑𖽡𖽪𖾑 𖼊𖽑𖽺 𖼰𖽡𖾑 𖼦𖽑𖽙𖾐．
25 𖽃𖽔𖾐 𖼺𖽺𖾑 𖼽𖽺𖾐 𖼦𖽴 𖼦𖽫 𖼣𖽙𖾐 𖼞𖽳𖾐 𖼀𖽳𖾐 𖼈𖽡𖾐 𖼖𖽙𖾐 𖼮𖽑𖽻𖾐，
𖼣𖽙𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼺𖽡 𖼮𖽡𖾐 𖼄𖽡𖽻 𖼂𖽺𖾐 𖼖𖽙𖾐 𖼀𖽙𖾐，
𖼽𖽻 𖼣𖽙𖾐 𖼊𖽑𖽺 𖼮𖽡 𖼖𖽪 𖼞𖽜．
26 𖼷𖽑𖽻𖾐 𖼊𖽑𖽺 𖼐𖽙𖾑 𖼣𖽜 𖼺𖽪𖾐，𖼐𖽑𖽡𖾐 𖼖𖽺𖾑 𖼽𖽻 𖼊𖽑𖽺 𖼐𖽙𖾑 𖼣𖽜 𖼊𖽻𖾐；
𖼦𖽑𖽙 𖼊𖽪 𖼄𖽔 𖼮𖽻𖾐 𖼺𖽪𖾐，𖼐𖽑𖽡𖾐 𖼖𖽺𖾑 𖼽𖽻 𖼊𖽑𖽺 𖼹𖽳𖾑 𖼹𖽳𖾐 𖼂𖽺𖾐 𖼊𖽻𖾐；
27 𖼺𖽡 𖼮𖽡𖾐 𖼄𖽡𖽻 𖼂𖽺𖾐 𖼺𖽪𖾐，𖼐𖽑𖽡𖾐 𖼖𖽺𖾑 𖼽𖽻 𖼊𖽑𖽺 𖼺𖽡 𖼮𖽡𖾐 𖼄𖽡𖽻 𖼂𖽺𖾐 𖼊𖽻𖾐；
𖼊𖽝𖾑 𖼞𖽚 𖼄𖽡𖽻 𖼂𖽺𖾐 𖼺𖽪𖾐，𖼐𖽑𖽡𖾐 𖼖𖽺𖾑 𖼽𖽻 𖼞𖽜 𖼊𖽝𖾑 𖼞𖽚 𖼄𖽡𖽻 𖼷𖽶𖾐 𖼊𖽻𖾐．
28 𖼳𖽚𖾑 𖼞𖽑𖽪 𖼺𖽪𖾐 𖼷𖽑𖽻𖾐 𖼊𖽑𖽺 𖼐𖽑𖽡𖾐 𖼰𖽨𖾑 𖼊𖽻𖾐，
𖼐𖽑𖽡𖾐 𖼳𖽡𖽦 𖼈𖽳 𖼺𖽪𖾐 𖼷𖽑𖽻𖾐 𖼊𖽑𖽺 𖼮𖽑𖽕 𖼐𖽦𖾐，
𖼽𖽻 𖼈𖽳𖾐 𖼞𖽜 𖽃𖽜𖾐 𖼺𖽳 𖼺𖽪𖾐 𖼀𖽑𖽢 𖼊𖽻𖾐．
29 𖼽𖽺𖾐 𖼦𖽴 𖼦𖽫 𖽃𖽔𖾐！𖼐𖽑𖽡𖾐 𖼣𖽙𖾐 𖼞𖽳𖾐 𖼀𖽙𖾐 𖼊𖽪𖾐 𖼣𖽻𖾐，
𖼽𖽺𖾐 𖼦𖽴 𖼦𖽫 𖼣𖽙𖾐 𖼞𖽳𖾐 𖼐𖽦𖾑 𖼐𖽦𖾐 𖼊𖽑𖽺 𖼀𖽜𖾐 𖼖𖽜𖾐 𖼮𖽨𖾐．
30 𖼣𖽙𖾐 𖼐𖽑𖽡𖾐 𖼖𖽙𖾐 𖼣𖽜𖾐 𖼺𖽺𖾑 𖼰𖽡𖽴 𖼮𖽡𖾐 𖼂𖽦𖾐 𖼠𖽻𖾐 𖼊𖽑𖽺 𖼊𖽡 𖼽𖽡𖾐，
𖼣𖽙𖾐 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼣𖽜𖾐 𖼺𖽺𖾑 𖼖𖽜𖾐 𖼀𖽜𖾐 𖼊𖽑𖽺 𖼂𖽦𖾐 𖼖𖽻𖾑 𖼠𖽚 𖼽𖽡𖾐．
31 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼮𖽨𖾐 𖼄𖽙𖾐 𖼦𖽑𖽺𖾑 𖼹𖽳𖾐 𖼦𖽑𖽻𖾐 𖼳𖽶 𖼣𖽻𖾐，
𖼽𖽺𖾐 𖼦𖽴 𖼦𖽫 𖼞𖽳𖾐 𖼊𖽻 𖼂𖽪𖾑 𖼦𖽑𖽺𖾑 𖼺𖽡 𖼮𖽡 𖼺𖽪𖾐 𖼣𖽻𖾐．
𖼽𖽻 𖼖𖽙𖾐 𖼞𖽑𖽙𖾐 𖼣𖽜𖾐 𖼺𖽪𖾐 𖼷𖽑𖽻𖾐，𖼽𖽻 𖼽𖽻 𖼈𖽳𖾐 𖼞𖽳𖾐 𖼮𖽑𖽨𖾑 𖼊𖽪𖾐 𖼂𖽺𖾐 𖼊𖽻𖾐．
32 𖼽𖽺𖾐 𖼦𖽴 𖼦𖽫 𖼞𖽑𖽶𖾑 𖽂𖽙 𖼺𖽙𖾐 𖼂𖽙𖾐 𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，
𖽃𖽔 𖼺𖽺 𖽂𖽙 𖼺𖽙𖾐 𖼂𖽙𖾐 𖼣𖽻𖾐 𖼠𖽸𖾑 𖼐𖽺𖾑？
𖽂𖽙 𖼺𖽙𖾐 𖼂𖽙𖾐 𖼞𖽶𖾑𖽑 𖼖𖽚𖾐 𖼳𖽕𖾐 𖼊𖽑𖽺𖾐 𖼄𖽔 𖼣𖽻𖾐 𖼊𖽡𖾑𖽑 𖼣𖽻𖾐，
𖽃𖽔 𖼺𖽺 𖼖𖽚𖾐 𖼳𖽕𖾐 𖼊𖽑𖽺𖾐 𖼣𖽻𖾐 𖼠𖽸𖾑 𖼐𖽺𖾑？
33 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼀𖽑𖽻𖾐 𖼈𖽶 𖼞𖽳𖾐 𖼮𖽻𖾐 𖼻𖽺𖾐 𖼊𖽪 𖼣𖽻𖾐，
𖼽𖽻 𖼣𖽙𖾐 𖼞𖽜 𖼺𖽙𖾑 𖼺𖽙𖾐 𖼞𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼺𖽜．
34 𖼽𖽻 𖼣𖽙𖾐 𖼞𖽜 𖼮𖽑𖽶𖾐 𖼄𖽙𖾐 𖼖𖽙𖾐 𖼺𖽶𖾑 𖼰𖽡𖽻𖾐，
𖼣𖽙𖾐 𖼞𖽜 𖼄𖽶𖾐 𖼞𖽳𖾐 𖼮𖽻𖾐 𖼦𖽑𖽡𖽚 𖼻𖽺𖾐．
35 𖼽𖽻 𖼣𖽙𖾐 𖼖𖽦 𖼀𖽑𖽦𖾐 𖼊𖽑𖽺 𖼄𖽪𖾑 𖼰𖽕𖾑 𖼊𖽝 𖼠𖽸𖾑，
𖼣𖽙𖾐 𖼖𖽦 𖼂𖽪𖾑 𖼞𖽜 𖼮𖽡 𖼮𖽑𖽡𖽦𖾐 𖼞𖽻𖾐 𖼍𖽪𖾐 𖼠𖽸𖾑．
36 𖼐𖽑𖽡𖾐 𖼰𖽨𖾑 𖼮𖽡 𖼽𖽡𖾑 𖼞𖽳𖾐 𖼮𖽑𖽨𖾑 𖼊𖽪𖾐 𖼖𖽪 𖼣𖽙𖾐 𖼊𖽑𖽺 𖼞𖽜，
𖼐𖽑𖽡𖾐 𖼣𖽙𖾐 𖼮𖽑𖽡 𖼮𖽡𖽺𖾐 𖼊𖽑𖽺 𖼊𖽻 𖼞𖽑𖽚 𖼺𖽺𖾑 𖼣𖽙𖾐 𖽂𖽙𖾐 𖼮𖽑𖽪𖾐 𖼮𖽑𖽻．
37 𖼐𖽑𖽡𖾐 𖼣𖽙𖾐 𖼞𖽜 𖼮𖽨𖾐 𖼄𖽙𖾐 𖼀𖽳𖾑 𖼀𖽳𖾐 𖼊𖽑𖽺 𖼺𖽜，
𖼐𖽑𖽡𖾐 𖼣𖽙𖾐 𖼮𖽑𖽡𖾐 𖼀𖽡𖾐 𖼞𖽜 𖼊𖽑𖽚 𖼦𖽑𖽙 𖼄𖽔 𖼠𖽚．
38 𖼣𖽙𖾐 𖼮𖽡𖾐 𖼂𖽦𖾐 𖼊𖽑𖽺 𖼞𖽕 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐；
𖼄𖽔 𖼄𖽳 𖼮𖽡𖽦 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼄𖽔 𖼀𖽑𖽚𖾐 𖼞𖽚 𖼖𖽻𖾐 𖼊𖽻𖾐．
39 𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐，𖼽𖽻 𖼈𖽳𖾐 𖼊𖽑𖽺 𖼊𖽝 𖼳𖽻𖾐，
𖼽𖽻 𖼈𖽳𖾐 𖼞𖽜 𖼦𖽑𖽡𖽚 𖼍𖽪𖾐 𖼖𖽻𖾐 𖼄𖽔 𖼠𖽸𖾑，𖼣𖽙𖾐 𖼮𖽑𖽡𖾑 𖼀𖽑𖽦𖾐 𖽂𖽚 𖼞𖽑𖽶𖾐 𖼀𖽜 𖼹𖽺𖾐．
40 𖼐𖽑𖽡𖾐 𖽂𖽙 𖼐𖽑𖽡𖾐 𖼀𖽑𖽨 𖼣𖽙𖾐 𖼮𖽡𖽪 𖼳𖽡𖽦𖾐 𖼂𖽺𖾐，𖼣𖽙𖾐 𖼞𖽜 𖼰𖽕𖾑 𖼊𖽝 𖽂𖽙 𖼐𖽑𖽡𖾐，
𖼐𖽑𖽡𖾐 𖼹𖽦𖾑 𖼣𖽙𖾐 𖼊𖽑𖽺 𖼊𖽝 𖼊𖽦 𖼺𖽪𖾐 𖼮𖽡𖾐 𖼂𖽦𖾐 𖼞𖽜 𖼖𖽻𖾐 𖼣𖽙𖾐 𖼖𖽙𖾐 𖼮𖽻𖾑 𖼊𖽴．
41 𖼐𖽑𖽡𖾐 𖼣𖽙𖾐 𖼞𖽳𖾐 𖼮𖽡𖾐 𖼂𖽦𖾐 𖼞𖽜 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼮𖽡𖽪 𖼀𖽑𖽻𖾐 𖼍𖽪𖾐，
𖼣𖽙𖾐 𖼞𖽜 𖼺𖽺𖾑 𖼣𖽙𖾐 𖼊𖽑𖽺 𖼐𖽑𖽧𖾐 𖼰𖽴𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽂𖽙𖾐 𖼄𖽳 𖼮𖽡𖽦 𖼦𖽑𖽙𖾐．
42 𖼽𖽻 𖼈𖽳𖾐 𖼊𖽑𖽺 𖼰𖽨𖾑 𖼠𖽸𖾑 𖼺𖽪𖾐 𖼖𖽙𖾐 𖼐𖽦𖾐 𖼳𖽡𖽻𖾐，
𖼦𖽑𖽻𖾐 𖼊𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼰𖽨𖾑 𖼖𖽻𖾐 𖼺𖽪𖾐 𖼄𖽔 𖼮𖽻𖾐；
𖼽𖽻 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼀𖽦𖾐 𖼖𖽺𖾑，
𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼊𖽑𖽺 𖼄𖽔 𖼊𖽻 𖼞𖽑𖽚．
43 𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖼄𖽡𖾑 𖼐𖽦𖾐 𖼀𖽙 𖼞𖽳𖾐 𖼐𖽑𖽡𖾑 𖼄𖽶𖾐 𖼖𖽙𖾐 𖼺𖽶𖾑 𖼍𖽺𖾑 𖼄𖽶𖾐 𖼦𖽑𖽙𖾐．
𖼽𖽻 𖼈𖽳𖾐 𖼖𖽙𖾐 𖼈𖽳𖾐 𖼮𖽶𖾐 𖼊𖽑𖽺 𖼞𖽳𖾐 𖼐𖽑𖽡𖾑 𖼦𖽑𖽻 𖼖𖽙𖾐 𖼺𖽶𖾑 𖼐𖽑𖽕𖾐 𖼐𖽝𖾐 𖼦𖽑𖽙𖾐．
44 𖼐𖽑𖽡𖾐 𖼀𖽑𖽚𖾐 𖼊𖽦 𖼺𖽪𖾐 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼣𖽙𖾐 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐，
𖼐𖽑𖽡𖾐 𖼣𖽙𖾐 𖼞𖽜 𖼠𖽚 𖼞𖽑𖽙𖾐 𖼣𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖼂𖽺𖾐，
𖼣𖽙𖾐 𖼄𖽔 𖼺𖽝𖾑 𖼺𖽪𖾐 𖼷𖽑𖽻𖾐 𖼀𖽺 𖼖𖽺𖾑 𖼣𖽙𖾐 𖼊𖽑𖽺 𖼠𖽙𖾐 𖼳𖽙𖾐．
45 𖼞𖽑𖽻𖾐 𖼂𖽻𖾑 𖼀𖽑𖽙 𖼖𖽻𖾐 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼂𖽴𖾐 𖼹𖽺𖾐，
𖼽𖽻 𖼈𖽳𖾐 𖼣𖽙𖾐 𖼄𖽡𖾐 𖼊𖽑𖽺 𖼊𖽻 𖼮𖽨 𖼍𖽺𖾑 𖼺𖽺 𖼖𖽻𖾐 𖼣𖽙𖾐 𖼊𖽑𖽺 𖼮𖽻𖾑 𖼊𖽴．
46 𖼞𖽑𖽻𖾐 𖼂𖽻𖾑 𖼀𖽑𖽙 𖼞𖽫 𖼹𖽺𖾐 𖼽𖽡𖾐 𖼦𖽑𖽻𖾐 𖼺𖽺𖾑，
𖼮𖽡𖽮𖾐 𖼮𖽡𖽮𖾐 𖼞𖽴𖾐 𖼞𖽴𖾐 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼖𖽪𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼖𖽻𖾐．
47 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼖𖽚𖾐 𖼳𖽕𖾐 𖼊𖽑𖽺𖾐 𖼣𖽻𖾐，
𖼽𖽻 𖼊𖽑𖽺 𖼦𖽑𖽺𖾑 𖼞𖽑𖽪𖾐 𖼮𖽑𖽳 𖼷𖽻 𖼺𖽪𖾐 𖼣𖽻𖾐；
𖼣𖽙𖾐 𖼊𖽑𖽺 𖼰𖽨𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼦𖽑𖽺𖾑 𖼖𖽚𖾐 𖼳𖽕𖾐 𖼊𖽑𖽺𖾐 𖼣𖽻𖾐，
𖼽𖽻 𖼊𖽑𖽺 𖼠𖽕𖾐 𖼰𖽶𖾐 𖼄𖽶𖾐 𖼷𖽑𖽚 𖼺𖽪𖾐 𖼰𖽕𖾐 𖼖𖽡𖾐．
48 𖼽𖽻 𖼦𖽑𖽺𖾑 𖼣𖽙𖾐 𖼖𖽙𖾐 𖼀𖽙𖾐 𖼖𖽦 𖼂𖽚𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，
𖼽𖽻 𖼍𖽪𖾐 𖼄𖽺 𖼷𖽑𖽻𖾐 𖼀𖽺 𖼞𖽜 𖼣𖽙𖾐 𖽂𖽚 𖼞𖽑𖽶𖾐 𖼮𖽻𖾐，
49 𖼽𖽻 𖼣𖽙𖾐 𖼮𖽡𖾐 𖼂𖽦𖾐 𖼞𖽳𖾐 𖼮𖽑𖽻𖾐 𖼣𖽙𖾐 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐．
𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼣𖽙𖾐 𖼊𖽑𖽺 𖼮𖽑𖽳 𖼄𖽶𖾐 𖼍𖽪𖾐 𖼖𖽻𖾐 𖼺𖽺𖾑，
𖼣𖽙𖾐 𖼊𖽑𖽺 𖼊𖽝 𖼊𖽦 𖼺𖽪𖾐 𖼞𖽑𖽶𖾑 𖼹𖽻𖾐 𖼦𖽶𖾑 𖼄𖽔 𖼷𖽑𖽶𖾐 𖽂𖽙 𖼊𖽙𖾐，
𖼹𖽦𖾑 𖼮𖽑𖽡𖾐 𖼻𖽸 𖼺𖽪𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼣𖽙𖾐 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐．
50 𖼽𖽺𖾐 𖼦𖽴 𖼦𖽫 𖽃𖽔𖾐！
𖼣𖽙𖾐 𖼞𖽑𖽙𖾐 𖼣𖽻𖾐 𖼠𖽚 𖼠𖽻𖾐 𖼞𖽑𖽶𖾐 𖼐𖽑𖽡𖾐 𖼊𖽑𖽺 𖼄𖽶 𖼳𖽳𖾐 𖼊𖽻𖾐，
𖼐𖽑𖽡𖾐 𖼄𖽡𖾐 𖼊𖽑𖽺 𖼞𖽑𖽪𖾐 𖼮𖽑𖽳 𖼊𖽻𖾐．
51 𖼽𖽺𖾐 𖼦𖽴 𖼦𖽫 𖼰𖽨𖾑 𖼮𖽡 𖼽𖽡𖾑 𖼈𖽳 𖼄𖽙𖾐 𖼖𖽪 𖼽𖽻 𖼞𖽑𖽙𖾐 𖼺𖽺𖾐 𖼺𖽪𖾐 𖼈𖽪𖾐 𖼍𖽦 𖼊𖽑𖽺 𖼞𖽜，
𖼹𖽦𖾑 𖼐𖽙𖾑 𖼣𖽜 𖼖𖽪 𖼽𖽻 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼺𖽪𖾐 𖼊𖽑𖽺 𖼞𖽜，
𖼞𖽑𖽶𖾑 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼣𖽻𖾐，
𖼞𖽜 𖼻𖽳𖾐 𖼹𖽦𖾐 𖼖𖽙𖾐 𖼮𖽑𖽡𖾐 𖼊𖽻𖾐．