𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼺𖽻 𖼖𖽚 𖼈𖽴 𖼊𖽑𖽺 𖼖𖽦 𖼂𖽚𖾐
21
1 𖼍𖽕𖾑 𖼈𖽪𖽺𖾑 𖼈𖽪𖾐 𖼍𖽦 𖼂𖽺𖾐 𖼞𖽑𖽶𖾑 𖼮𖽶𖾐，𖼷𖽙𖾐 𖼖𖽙𖾐 𖼠𖽙𖾑 𖼍𖽻𖾐 𖼄𖽳𖾐 𖼄𖽳𖾐 𖼦𖽑𖽦 𖼄𖽦 𖼺𖽙𖾐 𖼞𖽑𖽚 𖼮𖽻𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺．𖼽𖽺𖾐 𖼦𖽴 𖼦𖽫 𖼀𖽦𖾐：“𖼦𖽑𖽺𖾑 𖼺𖽻 𖼖𖽚 𖼐𖽺𖾐 𖼺𖽻 𖼖𖽚 𖼈𖽴 𖼷𖽑𖽻𖾐 𖼺𖽦 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼖𖽙𖾐 𖼀𖽙𖾐 𖼺𖽪𖾐 𖼣𖽻𖾐，𖼞𖽪𖾐 𖼮𖽡𖽺𖾐 𖽃𖽙𖾑 𖼄𖽺 𖼊𖽑𖽙 𖼽𖽻 𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼺𖽦 𖼦𖽑𖽙𖾐．”2 𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽔 𖼣𖽻𖾐，𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼞𖽳𖾐 𖼷𖽺 𖼷𖽺𖾐 𖼺𖽪𖾐 𖼷𖽑𖽻𖾐 𖼣𖽻𖾐．𖽃𖽙𖾑 𖼄𖽺 𖼊𖽑𖽙 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼠𖽚．𖼦𖽑𖽻𖾐 𖼊𖽑𖽻𖾐，𖼺𖽻 𖼖𖽚 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖼺𖽺𖾑，𖼄𖽪𖾐 𖼊𖽪𖾐 𖼰𖽙𖾐 𖼐𖽑𖽧𖾐 𖼷𖽑𖽙𖾐 𖼄𖽙𖾐 𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼺𖽦 𖼦𖽑𖽙𖾐 𖼊𖽡 𖼮𖽑𖽻．𖽃𖽔𖾐 𖼺𖽺𖾑， 𖼍𖽕𖾑 𖼈𖽪𖽺𖾑 𖼈𖽪𖾐 𖼍𖽦 𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐． 3 𖼍𖽕𖾑 𖼈𖽪𖽺𖾑 𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼊𖽻 𖼐𖽙𖾐：“𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖽃𖽔 𖼊𖽺𖾑 𖼳𖽶 𖼂𖽺𖾐 𖼊𖽙𖾐？𖼣𖽙𖾐 𖽃𖽔 𖼊𖽺𖾐 𖼂𖽺𖾐 𖼺𖽺𖾑 𖼽𖽺𖾐 𖼮𖽑𖽡𖽪𖾑 𖽂𖽙𖾐 𖼄𖽡𖽺 𖼊𖽙𖾐 𖼐𖽺𖾑？𖽃𖽔𖾐 𖼺𖽺𖾑 𖼐𖽑𖽡𖾐 𖼈𖽳𖾐 𖼄𖽢 𖼦𖽙𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼞𖽜 𖼦𖽶𖾐．”
4 𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖼈𖽳𖾐 𖼐𖽺𖾐 𖼺𖽻 𖼖𖽚、𖼹𖽦𖾑 𖼽𖽻 𖽃𖽔𖾑 𖼞𖽑𖽶𖾐 𖼞𖽳𖾐 𖼄𖽡𖽻，𖼞𖽑𖽶𖾑 𖼀𖽑𖽨𖾐 𖼳𖽳𖾐 𖼖𖽙𖾐 𖼮𖽡 𖼄𖽔 𖼠𖽳𖾐 𖼳𖽶 𖼣𖽻𖾐，𖼣𖽙𖾐 𖼈𖽳𖾐 𖼖𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼊𖽑𖽡 𖼽𖽚𖾐 𖼊𖽑𖽺 𖼖𖽺𖾑 𖼺𖽦 𖼄𖽳𖾐 𖼐𖽑𖽧𖾐 𖼄𖽔 𖼺𖽳．”
𖼍𖽕𖾑 𖼈𖽪𖽺𖾑 𖼊𖽻 𖼐𖽙𖾐：“𖼦𖽑𖽺𖾑 𖼻𖽻𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼀𖽦𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖽃𖽔 𖼊𖽺𖾑 𖼳𖽶 𖼂𖽺𖾐 𖼖𖽡𖾐？”
5-6 𖼽𖽻 𖼈𖽳𖾐 𖼈𖽪𖾐 𖼍𖽦 𖼊𖽑𖽺 𖼊𖽻 𖼞𖽑𖽚：“𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖽃𖽙𖾑 𖼄𖽺 𖼊𖽑𖽙 𖼄𖽪𖾐 𖼊𖽪𖾐 𖼻𖽜 𖼣𖽙𖾐 𖼈𖽳𖾐 𖼊𖽑𖽺 𖼺𖽦，𖼣𖽙𖾐 𖼈𖽳𖾐 𖼊𖽑𖽺 𖼦𖽹𖾑，𖼣𖽙𖾐 𖼈𖽳𖾐 𖼊𖽑𖽺 𖼄𖽳 𖼮𖽡𖽦 𖼊𖽡 𖼮𖽑𖽻，𖼣𖽙𖾐 𖼈𖽳𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼠𖽻𖾐 𖼞𖽑𖽶𖾐 𖽂𖽙𖾐 𖼮𖽻𖾐 𖼄𖽔 𖼊𖽙𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦 𖼠𖽻𖾐 𖼞𖽑𖽶𖾐 𖼻𖽙 𖼐𖽜𖾐 𖼳𖽶 𖼽𖽚𖾐 𖼀𖽑𖽨 𖼣𖽙𖾐 𖼈𖽳𖾐 𖼊𖽑𖽺 𖼞𖽜 𖼖𖽻𖾐．” 𖼣𖽙𖾐 𖼈𖽳𖾐 𖼰𖽡𖾐 𖼂𖽡𖽦𖾑 𖼄𖽡𖾐 𖼊𖽺𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐，𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼽𖽻 𖼈𖽳𖾐 𖼊𖽑𖽺 𖼳𖽳𖾑 𖼳𖽶𖾐 𖼦𖽑𖽙𖾐 𖼊𖽻𖾐．”
𖼈𖽪𖾐 𖼍𖽦 𖼀𖽦𖾐：“𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼰𖽡𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼊𖽻𖾐．” 7 𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼞𖽳𖾐 𖼖𖽡𖾑 𖼂𖽙𖾑、𖼽𖽱𖾐 𖼐𖽕 𖼍𖽔𖾐 𖼞𖽳𖾐 𖼻𖽙 𖼄𖽡 𖼇𖽺𖾐 𖼂𖽙𖾐 𖼳𖽴𖾑 𖼊𖽑𖽺 𖼐𖽙𖾑 𖼣𖽜，𖼞𖽪𖾐 𖼮𖽡𖽺𖾐 𖼍𖽕𖾑 𖼈𖽪𖽺𖾑 𖽃𖽙𖾑 𖼄𖽺 𖼊𖽑𖽙 𖼺𖽻 𖼖𖽚 𖼞𖽳𖾐 𖼻𖽙 𖼽𖽱𖾐 𖼐𖽕 𖼍𖽔𖾐 𖼖𖽙𖾐 𖼮𖽑𖽻𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼄𖽳𖾐 𖼷𖽑𖽦𖾐 𖼠𖽚． 8 𖽃𖽔𖾐 𖼺𖽺𖾑，𖼈𖽪𖾐 𖼍𖽦 𖼞𖽑𖽻𖾑 𖼺𖽻 𖼖𖽚 𖼄𖽳 𖼻𖽙 𖼖𖽡𖾑 𖼺𖽶𖾐 𖼂𖽔𖾐 𖼽𖽚𖾐 𖼺𖽪𖾐 𖼽𖽕𖾑 𖼄𖽚 𖼐𖽑𖽧 𖼐𖽺𖾐 𖼄𖽡 𖼇𖽺𖾐 𖼂𖽙𖾐 𖼳𖽴𖾑，𖼹𖽦𖾑 𖼺𖽻 𖼖𖽚 𖼻𖽙 𖼄𖽳 \pn 𖼄𖽡 𖼖𖽔𖾐 𖼽𖽚𖾐 𖼺𖽪𖾐 𖼻𖽙 𖼣𖽙 𖼽𖽚𖾐 𖼊𖽑𖽺 𖼰𖽡𖽻𖾐 𖼺𖽺𖾑，𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐．𖼖𖽡𖾑 𖼺𖽶𖾐 𖼂𖽔𖾐 𖼞𖽶𖾑𖽑 𖽃𖽦𖾑 𖼽𖽔 𖼞𖽳𖾐 𖼻𖽙 𖼄𖽳 𖼣𖽻𖾐，𖼄𖽡 𖼖𖽔𖾐 𖼞𖽳𖾐 𖼷𖽑𖽻𖾐 𖼀𖽑𖽙 𖼞𖽶𖾑𖽑 𖼄𖽡 𖼦𖽴 𖼖𖽔𖾐 𖼺𖽪𖾐 𖼷𖽑𖽻𖾐 𖼂𖽔𖾐 𖼳𖽡𖾐 𖼖𖽦 𖼞𖽳𖾐 𖼻𖽙 𖼽𖽕𖾑 𖼍𖽴 𖼖𖽡𖽦𖾑 𖼣𖽻𖾐． 9 𖼈𖽪𖾐 𖼍𖽦 𖼷𖽑𖽻𖾐 𖼦𖽺𖾑𖽑 𖼳𖽶 𖼽𖽚𖾐 𖼊𖽑𖽺 𖼰𖽡𖽻𖾐 𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽜 𖼦𖽑𖽙𖾐 𖼠𖽙𖾑 𖼍𖽻𖾐，𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐，𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼽𖽻 𖼈𖽳𖾐 𖼊𖽑𖽺 𖼳𖽳𖾑 𖼳𖽶𖾐 𖼦𖽑𖽙𖾐．𖼷𖽑𖽻𖾐 𖼦𖽑𖽺𖾑 𖼳𖽶 𖼽𖽚𖾐 𖼊𖽑𖽺 𖼳𖽳𖾑 𖼳𖽶𖾐 𖼦𖽑𖽙𖾐 𖼞𖽑𖽶𖾑 𖼮𖽶𖾐，𖼞𖽶𖾑𖽑 𖽃𖽔𖾑 𖼄𖽶 𖼦𖽡𖽳𖾐 𖼻𖽪𖾐 𖼷𖽑𖽳 𖼰𖽶𖾐 𖼣𖽻𖾐．
10 𖽃𖽦𖾑 𖼽𖽔 𖼞𖽳𖾐 𖼻𖽙 𖼄𖽳 𖼖𖽡𖾑 𖼺𖽶𖾐 𖼂𖽔𖾐 𖼽𖽦 𖼄𖽳𖾐 𖼊𖽑𖽡 𖼮𖽑𖽙𖾐 𖼈𖽺𖾐 𖼖𖽚𖾐 𖼳𖽕𖾐 𖼊𖽑𖽺𖾐 𖼊𖽑𖽺 𖼷𖽑𖽻𖾐 𖼳𖽶𖾐 𖼄𖽻𖾐 𖼊𖽑𖽺 𖼀𖽜𖾐 𖼍𖽡，𖽂𖽙 𖼊𖽺𖾐 𖼖𖽚𖾑 𖼄𖽚 𖼠𖽜𖾐 𖼞𖽑𖽶𖾑 𖼮𖽶𖾐 𖼮𖽑𖽻𖾐 𖼺𖽺𖾑，𖽃𖽔𖾑 𖼄𖽶 𖼦𖽑𖽙𖾐 𖼹𖽺𖾐 𖼖𖽻𖾐 𖼷𖽑𖽻𖾐 𖼳𖽶𖾐 𖼄𖽻𖾐 𖼊𖽑𖽺 𖼍𖽺𖾑 𖼄𖽳𖾐 𖼰𖽶𖾐 𖼮𖽑𖽡𖾐．𖽃𖽔𖾑 𖼐𖽑𖽡 𖼞𖽪𖾐 𖼣𖽕𖾐 𖼞𖽜 𖼷𖽑𖽻𖾐 𖼳𖽶𖾐 𖼄𖽻𖾐 𖼊𖽑𖽺 𖼄𖽔 𖼐𖽙，𖼄𖽶 𖼮𖽑𖽧 𖼐𖽑𖽡𖾑 𖼳𖽶𖾐 𖼞𖽜 𖼖𖽻𖾐 𖼷𖽑𖽻𖾐 𖼳𖽶𖾐 𖼄𖽻𖾐 𖼊𖽑𖽺 𖼄𖽔 𖼮𖽑𖽳 𖼀𖽑𖽧𖾐．
𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼈𖽴 𖼞𖽳𖾐 𖼷𖽑𖽻𖾐 𖼄𖽻𖾐 𖼊𖽑𖽺 𖼍𖽡𖾑
11 𖼷𖽑𖽻𖾐 𖼊𖽑𖽡 𖼹𖽻𖾐 𖼺𖽻 𖼖𖽚 𖼞𖽳𖾐 𖼄𖽳 𖼖𖽳𖾐 𖼖𖽡𖾑 𖼺𖽶𖾐 𖼂𖽔𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼀𖽦𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼊𖽑𖽧．𖼖𖽡𖾑 𖼺𖽶𖾐 𖼂𖽔𖾐 𖼦𖽺𖾑𖽑 𖽃𖽦𖾑 𖼽𖽔 𖼞𖽳𖾐 𖼻𖽙 𖼄𖽳 𖼣𖽻𖾐． 12 𖼍𖽕𖾑 𖼈𖽪𖽺𖾑 𖼽𖽡𖾐 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼽𖽔 𖼂𖽡 𖼖𖽪𖾐 𖼷𖽑𖽻𖾐 𖼮𖽻𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼮𖽑𖽻𖾐，𖼺𖽻 𖼖𖽚 𖼐𖽺𖾐 𖼽𖽱𖾐 𖼐𖽕 𖼍𖽔𖾐 𖼞𖽳𖾐 𖼈𖽶 𖼠𖽴𖾐 𖼊𖽑𖽺 𖼮𖽑𖽶𖾑 𖼞𖽚 𖼖𖽻𖾐．𖽃𖽙𖾑 𖼄𖽺 𖼊𖽑𖽙 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼰𖽡𖾐 𖼖𖽡𖾑 𖼂𖽙𖾐 𖽂𖽙 𖼰𖽡𖽺𖾐 𖼞𖽳𖾐 𖼺𖽻 𖼖𖽚 𖼊𖽑𖽺 𖼺𖽦 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼹𖽦𖾐，𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼊𖽑𖽺 𖼀𖽑𖽨 𖼂𖽚 𖼳𖽔𖾐 𖼖𖽪𖾐 𖼞𖽳𖾐 𖼈𖽳𖾐 𖼮𖽶𖾐 𖼊𖽑𖽺 𖼠𖽕𖾑．𖼦𖽑𖽻𖾐 𖼊𖽑𖽻𖾐，𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼽𖽔 𖼂𖽡 𖼖𖽪𖾐 𖼞𖽳𖾐 𖼷𖽑𖽻𖾐 𖼮𖽑𖽢𖾑 𖼞𖽑𖽶 𖼂𖽡𖾐 𖼽𖽡𖾐 𖼦𖽑𖽙𖾐． 13 𖼍𖽕𖾑 𖼈𖽪𖽺𖾑 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼺𖽻 𖼖𖽚 𖼐𖽺𖾐 𖼽𖽱𖾐 𖼐𖽕 𖼍𖽔𖾐 𖼞𖽳𖾐 𖼈𖽶 𖼠𖽴𖾐 𖼮𖽑𖽶𖾑 𖼊𖽦𖾐 𖼖𖽻𖾐 𖼦𖽑𖽙𖾐，𖼹𖽦𖾑 𖼳𖽳𖾑 𖼳𖽶𖾐 𖼦𖽑𖽙𖾐 𖼺𖽪𖾐 𖼞𖽑𖽶𖾑 𖼳𖽶 𖼽𖽚𖾐 𖼞𖽳𖾐 𖼈𖽶 𖼠𖽴𖾐 𖼊𖽑𖽺 𖼈𖽺𖾐 𖼖𖽻𖾐 𖼺𖽪𖾐 𖼷𖽑𖽻𖾐 𖼮𖽻𖾐．
14 𖼷𖽑𖽻𖾐 𖼷𖽪𖾐 𖼺𖽻 𖼖𖽚 𖼐𖽺𖾐 𖼽𖽻 𖼻𖽙 𖼽𖽱𖾐 𖼐𖽕 𖼍𖽔𖾐 𖼞𖽳𖾐 𖼈𖽶 𖼠𖽴𖾐 𖼀𖽑𖽨 𖼂𖽡𖽦𖾑 𖼽𖽔 𖼄𖽡𖽺 𖼄𖽡𖾐 𖼊𖽺𖾐 𖼳𖽡 𖼖𖽔𖾐 𖼖𖽪𖾐 𖼞𖽑𖽶𖾐 𖼺𖽻 𖼖𖽚 𖼽𖽻 𖼀𖽙 𖼰𖽡𖾐 𖼳𖽸𖾑 𖼞𖽳𖾐 𖼖𖽧 𖼀𖽳𖾐 𖼞𖽑𖽶𖾐 𖼍𖽡𖾑．𖼈𖽪𖾐 𖼍𖽦 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐，𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼂𖽺𖾐 𖼦𖽑𖽻𖾐．𖼄𖽡𖽻 𖼦𖽑𖽺𖾑 𖼠𖽙𖾑 𖼍𖽻𖾐，𖼷𖽑𖽻𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼖𖽙𖾐 𖼀𖽙𖾐 𖼮𖽑𖽡 𖼮𖽡𖽺𖾐 𖼺𖽪𖾐，𖽂𖽙 𖼺𖽙𖾐 𖼂𖽙𖾐 𖼊𖽻 𖼞𖽑𖽚 𖼦𖽑𖽻𖾐．
𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼖𖽡𖾐 𖼂𖽦𖾑 𖼊𖽝 𖽂𖽙 𖼊𖽙𖾐 (𖼍𖽦𖾑 𖼊𖽑𖽡 20：4 -8)
15 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼹𖽦𖾑 𖼷𖽙𖾐 𖼖𖽙𖾐 𖼊𖽝 𖼊𖽦 𖼞𖽳𖾐 𖼄𖽡𖽻 𖼮𖽻𖾐．𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼄𖽦 𖼀𖽑𖽙 𖼊𖽑𖽡 𖼊𖽑𖽜 𖼹𖽺𖾐 𖼽𖽡𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦 𖼊𖽻𖾐．𖼍𖽕𖾑 𖼈𖽪𖽺𖾑 𖽂𖽙 𖼞𖽶𖾐 𖼦𖽑𖽻𖾐． 16 𖼽𖽻 𖼈𖽳𖾐 𖼠𖽜𖾐 𖼂𖽚 𖼄𖽡𖾐 𖼊𖽺𖾐 𖼮𖽻𖾐．𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐，𖼞𖽑𖽶𖾑 𖼞𖽶𖾐 𖼂𖽚𖾐 𖼠𖽳𖾐 𖼖𖽪𖾐 𖼷𖽑𖽻𖾐 𖼦𖽶𖾑 𖼄𖽔 𖼷𖽑𖽶𖾐 𖼈𖽳 𖼺𖽪𖾐 𖼷𖽑𖽻𖾐 𖼞𖽳𖾐 𖼻𖽙 𖼣𖽻𖾐，𖼽𖽻 𖼞𖽳𖾐 𖼂𖽨𖾐 𖼹𖽶 𖼺𖽙𖾐 𖼰𖽡𖾐 𖼂𖽕 𖼮𖽻𖾐，𖼹𖽦𖾑 𖽃𖽔𖾑 𖼊𖽑𖽙 𖼳𖽸 𖼊𖽑𖽡 𖼂𖽻𖾐 𖼀𖽶 𖼍𖽳𖾐，𖼽𖽻 𖼍𖽕𖾑 𖼈𖽪𖽺𖾑 𖼊𖽑𖽺 𖼺𖽦 𖼊𖽡 𖼮𖽑𖽻． 17 𖼳𖽡 𖼖𖽪 𖼽𖽔 𖼞𖽳𖾐 𖼻𖽙 𖼽𖽕𖾑 𖼂𖽡 𖼳𖽺𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼂𖽻𖾐 𖼺𖽺𖾑，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼊𖽝 𖼊𖽦，𖼽𖽻 𖼊𖽑𖽺 𖼺𖽦 𖼦𖽑𖽙𖾐．𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼽𖽻 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼀𖽦𖾐：“𖼐𖽑𖽡𖾐 𖽃𖽔𖾑 𖼞𖽶𖾐 𖼹𖽦𖾑 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼊𖽚𖾐 𖼽𖽡𖾐 𖼰𖽕𖾑 𖽂𖽙𖾐 𖼊𖽝 𖼄𖽔 𖼊𖽙𖾐，𖽃𖽔𖾑 𖼽𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽦𖾐 𖼳𖽡𖽻𖾐 𖼊𖽪 𖼄𖽔 𖼮𖽻𖾐 𖼦𖽑𖽙𖾐 𖼠𖽸𖾑．”
18 𖼠𖽙𖾑 𖼍𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼹𖽦𖾑 𖼠𖽜𖾐 𖼂𖽚 𖼄𖽡𖾐 𖼊𖽺𖾐 𖼮𖽻𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝．𖼞𖽑𖽶𖾑 𖼮𖽶𖾐，𖼦𖽪𖾑 𖼳𖽔𖾐 𖼺𖽪𖾐 𖼷𖽑𖽻𖾐 𖼳𖽡𖾐 𖼂𖽡 𖼠𖽺𖾐 𖼞𖽑𖽻𖾑 𖼞𖽶𖾐 𖼂𖽚𖾐 𖼦𖽑𖽔𖾐 𖼮𖽶𖾐 𖼈𖽳 𖼺𖽪𖾐 𖼷𖽑𖽻𖾐 𖼞𖽳𖾐 𖼻𖽙 𖼺𖽔 𖼇𖽮 𖼊𖽑𖽺 𖼺𖽦 𖼦𖽑𖽙𖾐．
19 𖼹𖽦𖾑 𖼊𖽑𖽡 𖼂𖽦𖾑 𖼠𖽜𖾐 𖼂𖽚 𖼄𖽡𖾐 𖼊𖽺𖾐 𖼮𖽻𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝．𖼂𖽚 𖼖𖽡𖾑 𖼦𖽴 𖼺𖽪𖾐 𖼷𖽑𖽻𖾐 𖼽𖽔 𖼖𖽺 𖽃𖽴 𖽃𖽳 𖼰𖽡𖽺𖾐 𖼞𖽳𖾐 𖼻𖽙 𖼽𖽡𖾐 𖼖𖽴𖾑 𖼦𖽔𖾐 𖼐𖽕，𖼞𖽑𖽻𖾑 𖼰𖽡𖽔𖾐 𖼊𖽑𖽴𖾑 𖼺𖽪𖾐 𖼷𖽑𖽻𖾐 𖼠𖽜𖾐 𖼖𖽡𖾑 𖼽𖽕𖾑 𖼊𖽑𖽺 𖼺𖽦 𖼦𖽑𖽙𖾐．𖼠𖽜𖾐 𖼖𖽡𖾑 𖼽𖽕𖾑 𖼞𖽳𖾐 𖼂𖽨𖾐 𖼹𖽶 𖼈𖽶 𖼈𖽳 𖼞𖽳𖾐 𖼄𖽳𖾐 𖼊𖽝 𖼖𖽚𖾐 𖼂𖽚𖾐 𖼈𖽶 𖼊𖽜 𖼖𖽺𖾐 𖼮𖽻𖾐．
20 𖼰𖽡𖽔𖾐 𖼊𖽑𖽴𖾑 𖼄𖽡𖾐 𖼊𖽺𖾐 𖼹𖽦𖾑 𖼰𖽕𖾑 𖼊𖽝 𖼞𖽳𖾐 𖼄𖽡𖽻 𖼮𖽻𖾐，𖼞𖽑𖽶𖾑 𖼠𖽻𖾐 𖼦𖽑𖽔𖾐 𖼮𖽶𖾐 𖼷𖽶𖾐 𖼄𖽶𖾐 𖼞𖽶𖾐 𖼂𖽚𖾐 𖼈𖽳 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐，𖼖𖽦 𖼈𖽶 𖼐𖽑𖽡 𖼀𖽙 𖼐𖽺𖾐 𖼖𖽦 𖼐𖽑𖽡𖾐 𖼮𖽑𖽡𖽚 𖼮𖽑𖽡𖾐 𖼊𖽴，𖼮𖽑𖽡𖾐 𖼈𖽶 𖼖𖽺𖾑 𖼐𖽑𖽡 𖼂𖽦𖾐 𖼐𖽺𖾐 𖼮𖽑𖽡𖾐 𖼐𖽑𖽡𖾐 𖼮𖽑𖽡𖽚 𖼮𖽑𖽡𖾐 𖼊𖽴，𖼮𖽑𖽡𖾐 𖼐𖽑𖽡𖾐 𖼖𖽦 𖼐𖽑𖽡𖾐 𖼄𖽳𖾑 𖼄𖽳 𖼐𖽑𖽡 𖼷𖽑𖽡𖾐 𖼖𖽡𖾐 𖼮𖽑𖽡𖾐 𖼮𖽻𖾐．𖼷𖽑𖽻𖾐 𖼦𖽑𖽺𖾑 𖼞𖽶𖾐 𖼂𖽚𖾐 𖼦𖽑𖽔𖾐 𖼮𖽶𖾐 𖼈𖽳 𖼺𖽪𖾐 𖼷𖽑𖽻𖾐 𖼞𖽳𖾐 𖼻𖽙 𖼣𖽻𖾐． 21 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼊𖽚𖾐 𖼖𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼐𖽑𖽧 𖼣𖽡𖽳𖾐 𖼊𖽻 𖼊𖽑𖽜𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼽𖽻 𖼍𖽕𖾑 𖼳𖽶𖾑 𖼄𖽡 𖼽𖽕𖾑 𖼞𖽳𖾐 𖼻𖽙 𖼽𖽱𖾐 𖼐𖽕 𖼍𖽔𖾐 𖼮𖽑𖽢𖾑 𖼺𖽦 𖼦𖽑𖽙𖾐．
22 𖼞𖽕 𖼂𖽻𖾑 𖼦𖽑𖽺𖾑 𖼖𖽡𖾐 𖼽𖽚𖾐 𖼄𖽳𖾑 𖼄𖽳 𖼖𖽺𖾑 𖼰𖽡𖽔𖾐 𖼊𖽑𖽴𖾑 𖼖𖽪𖾐 𖼞𖽑𖽶𖾐 𖼞𖽶𖾐 𖼂𖽚𖾐 𖼦𖽑𖽔𖾐 𖼰𖽶𖾐 𖼈𖽳 𖼺𖽪𖾐 𖼞𖽑𖽶𖾑 𖼽𖽚𖾐 𖼞𖽳𖾐 𖼻𖽙 𖼣𖽻𖾐，𖼄𖽳𖾑 𖼄𖽳 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼞𖽳𖾐 𖼄𖽦 𖼀𖽑𖽙 𖼖𖽦 𖼀𖽑𖽦𖾐 𖼞𖽑𖽶𖾐 𖼳𖽶𖾐 𖼦𖽑𖽙𖾐．