𖼳𖽶𖾑 𖼂𖽔𖾐 𖼀𖽑𖽚𖾐 𖼊𖽦
20
1 𖼞𖽑𖽶𖾑 𖼠𖽻𖾐 𖼷𖽑𖽻𖾐 𖼖𖽕𖾐 𖼀𖽕𖾐 𖼊𖽑𖽡 𖼽𖽚𖾐 𖼮𖽻𖾐，𖼳𖽶𖾑 𖼂𖽔𖾐 𖼄𖽡𖾐，𖼞𖽑𖽶𖾑 𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼂𖽡 𖼰𖽡𖾐 𖼖𖽡𖾑 𖼞𖽳𖾐 𖼻𖽙 𖼣𖽻𖾐．𖼽𖽻 𖼽𖽻𖾐 𖼮𖽑𖽡𖽪𖾐 𖼄𖽸𖾐 𖼺𖽺𖾑，𖼀𖽦𖾐：“𖽃𖽔 𖼐𖽺𖾑 𖼍𖽕𖾑 𖼈𖽪𖽺𖾑 𖼞𖽳𖾐 𖼷𖽻 𖼀𖽜𖾐 𖼊𖽑𖽡 𖼳𖽶 𖼖𖽺𖾑 𖼄𖽔 𖼮𖽻𖾐，𖼽𖽺𖾐 𖼳𖽡𖾐 𖼞𖽳𖾐 𖼻𖽙 𖼖𖽙𖾐 𖼖𖽺𖾑 𖼮𖽡 𖼄𖽔 𖼠𖽳𖾐．𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽔𖾐！𖼐𖽑𖽡𖾐 𖼈𖽳𖾐 𖼀𖽑𖽚𖾐 𖼽𖽻 𖼄𖽳𖾑 𖼦𖽑𖽺𖾐 𖼠𖽴𖾐 𖼞𖽚 𖼽𖽡𖾐 𖼻𖽻𖾐！”2 𖽃𖽔𖾐 𖼺𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖽂𖽙 𖼰𖽡𖽺𖾐 𖼊𖽑𖽺 𖼊𖽦𖾐 𖼽𖽡𖾐，𖼍𖽕𖾑 𖼈𖽪𖽺𖾑 𖼖𖽙𖾐 𖼄𖽔 𖼮𖽑𖽻𖾐，𖼞𖽚 𖼀𖽑𖽚𖾐𖼂𖽡 𖼰𖽡𖾐 𖼖𖽡𖾑 𖼞𖽳𖾐 𖼻𖽙 𖼳𖽶𖾑 𖼂𖽔𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼦𖽑𖽙𖾐．𖼦𖽑𖽻𖾐 𖼊𖽑𖽻𖾐，𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼍𖽺𖾑 𖼻𖽺𖾑 𖼻𖽺𖾐 𖼽𖽻 𖼈𖽳𖾐 𖼞𖽳𖾐 𖼈𖽪𖾐 𖼍𖽦 𖼠𖽙𖾑 𖼍𖽻𖾐 𖼮𖽑𖽻𖾐，𖼽𖽱𖾐 𖼍𖽗𖾑 𖼖𖽻 𖼮𖽻 𖼮𖽑𖽻𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽡𖾐．
3 𖼍𖽕𖾑 𖼈𖽪𖽺𖾑 𖼀𖽑𖽚𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼽𖽻 𖼮𖽻𖾐 𖼞𖽳𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖼞𖽚 𖼮𖽑𖽡𖾐 𖼺𖽺𖾑，𖽃𖽙𖾑 𖼄𖽺 𖼊𖽑𖽙 𖼹𖽺𖾐 𖼍𖽙𖾑 𖼈𖽪𖾐 𖼍𖽦 𖼦𖽑𖽺𖾐 𖼳𖽪𖾐 𖼺𖽪𖾐 𖼄𖽳 𖼖𖽳𖾐 𖼷𖽑𖽡𖾐 𖼽𖽚𖾐 𖼊𖽑𖽺 𖼵𖽪𖾐 𖼦𖽑𖽺𖾐 𖼞𖽑𖽶𖾐 𖼠𖽶𖾐．𖼈𖽪𖾐 𖼍𖽦 𖼽𖽻 𖼈𖽳𖾐 𖼊𖽑𖽺 𖼰𖽙𖾑 𖼞𖽜，𖼦𖽑𖽻𖾐 𖼊𖽑𖽻𖾐 𖼽𖽻 𖼈𖽳𖾐 𖼖𖽙𖾐 𖼄𖽔 𖼐𖽳，𖼽𖽻 𖼈𖽳𖾐 𖼞𖽜 𖼦𖽑𖽺𖾐 𖼞𖽑𖽶𖾐 𖼮𖽻𖾐，𖼄𖽳 𖼮𖽑𖽶 𖼄𖽙𖾐 𖼖𖽙𖾐 𖼺𖽶𖾑 𖼐𖽑𖽡𖾐 𖼦𖽑𖽦 𖼠𖽚 𖼺𖽺𖾑，𖼳𖽶𖾐 𖼰𖽶𖾐 𖼖𖽙𖾐 𖼮𖽑𖽡𖾐．
𖼽𖽱𖾐 𖼽𖽔𖾐 𖼽𖽕𖾑 𖼄𖽔 𖼺𖽔 𖼊𖽑𖽺 𖼺𖽦
4 𖼈𖽪𖾐 𖼍𖽦 𖼽𖽕𖾑 𖼄𖽔 𖼺𖽔 𖼖𖽙𖾐 𖼀𖽦𖾐：“𖼐𖽑𖽡𖾐 𖼺𖽙𖾐 𖼐𖽑𖽡𖾐 𖼠𖽻𖾐 𖼞𖽑𖽶𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽶𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼻𖽶𖾑 𖼖𖽻𖾐 𖼖𖽡𖾐，𖼐𖽑𖽡𖾐 𖼖𖽺𖾑 𖼦𖽑𖽺𖾑 𖼠𖽻𖾐 𖼮𖽻𖾐 𖼖𖽡𖾐．” 5 𖽃𖽔𖾐 𖼺𖽺𖾑，𖼽𖽕𖾑 𖼄𖽔 𖼺𖽔 𖼽𖽡𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐，𖼞𖽑𖽶𖾑 𖼮𖽶𖾐 𖼽𖽻 𖼍𖽻𖾐 𖼞𖽙𖾐 𖼺𖽺𖾑，𖼈𖽪𖾐 𖼍𖽦 𖼞𖽑𖽙𖾐 𖼀𖽦𖾐 𖼍𖽙𖾑 𖼺𖽪𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼊𖽑𖽺 𖼠𖽚 𖼽𖽡𖾐 𖼦𖽑𖽙𖾐．
6 𖼍𖽕𖾑 𖼈𖽪𖽺𖾑 𖼽𖽕𖾑 𖼂𖽡 𖼳𖽺𖾐 𖼖𖽙𖾐 𖼀𖽦𖾐：“𖽃𖽔𖾑 𖼄𖽳𖾐 𖼂𖽡 𖼰𖽡𖾐 𖼖𖽡𖾑 𖼞𖽳𖾐 𖼻𖽙 𖼳𖽶𖾑 𖼂𖽔𖾐 𖼞𖽶𖾑𖽑 𖼽𖽔𖾐 𖼳𖽔𖾐 𖼖𖽚 𖼦𖽶𖾑 𖼄𖽔 𖼷𖽑𖽶𖾐 𖽃𖽔 𖼐𖽺𖾑 𖼊𖽑𖽺 𖼦𖽹𖾑 𖼊𖽻𖾐．𖼐𖽑𖽡𖾐 𖼐𖽑𖽡𖾐 𖼺𖽡 𖼀𖽑𖽙 𖼞𖽳𖾐 𖼄𖽦 𖼀𖽑𖽙 𖼦𖽳 𖼽𖽻 𖼊𖽑𖽺 𖼞𖽕 𖼽𖽡𖾐 𖼖𖽡𖾐，𖽃𖽔𖾑 𖼽𖽪𖾐 𖼽𖽻 𖼻𖽺𖾑 𖼻𖽺𖾐 𖼊𖽴𖾐 𖼺𖽪𖾐 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐 𖼊𖽑𖽡𖾑 𖼣𖽻𖾐，𖽃𖽔 𖼐𖽺𖾑 𖼊𖽑𖽺 𖼮𖽡𖽪 𖼀𖽑𖽻𖾐，𖽃𖽔 𖼐𖽺𖾑 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼮𖽡𖽪 𖼊𖽜𖾑 𖼦𖽑𖽙𖾐 𖼊𖽻𖾐．”
7 𖽃𖽔𖾐 𖼺𖽺𖾑 𖼽𖽱𖾐 𖼽𖽔𖾐 𖼞𖽳𖾐 𖼄𖽦 𖼀𖽑𖽙 𖼐𖽺𖾐 𖼰𖽡𖾐 𖼖𖽡𖾑 𖼊𖽑𖽧 𖼺𖽪𖾐 𖼷𖽑𖽻𖾐、𖼂𖽡 𖼖𖽡𖾑 𖼊𖽑𖽧 𖼺𖽪𖾐 𖼷𖽑𖽻𖾐、𖼹𖽦𖾑 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼄𖽳𖾑 𖼄𖽳 𖼽𖽕𖾑 𖼂𖽡 𖼳𖽺𖾐 𖼖𖽙𖾐 𖼮𖽑𖽻𖾐，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽻𖾐 𖼊𖽚𖾐 𖼽𖽡𖾐，𖼂𖽡 𖼰𖽡𖾐 𖼖𖽡𖾑 𖼞𖽳𖾐 𖼻𖽙 𖼳𖽶𖾑 𖼂𖽔𖾐 𖼊𖽑𖽺 𖼞𖽕． 8 𖼽𖽻 𖼈𖽳𖾐 𖼰𖽡𖾐 𖼂𖽡𖽦𖾑 𖼖𖽪𖾐 𖼞𖽳𖾐 𖼖𖽚𖾐 𖼳𖽕𖾐 𖼊𖽑𖽺𖾐 𖼞𖽑𖽻𖾑 𖼮𖽑𖽡𖾐，𖼽𖽕𖾑 𖼄𖽔 𖼺𖽔 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼄𖽡𖽻𖾐，𖼞𖽑𖽶𖾑 𖼮𖽶𖾐 𖼽𖽱𖾐 𖼽𖽔𖾐 𖼰𖽕𖾑 𖼊𖽝 𖼖𖽚𖾐 𖼂𖽚𖾐 𖼀𖽑𖽡𖽻𖾐 𖼈𖽦 𖼍𖽳𖾐，𖽃𖽔𖾑 𖼊𖽑𖽙 𖼈𖽺𖾐 𖽃𖽔𖾑 𖼊𖽑𖽙 𖼦𖽑𖽺𖾐 𖼞𖽑𖽶𖾐 𖼰𖽡𖽺𖾐 𖼀𖽑𖽨 𖼮𖽚 𖼀𖽺𖾐 𖼊𖽑𖽺 𖼀𖽶 𖼍𖽳𖾐．𖼽𖽱𖾐 𖼽𖽔𖾐 𖼺𖽜 𖽃𖽙𖾑 𖼄𖽺 𖼽𖽡𖾐 𖼞𖽑𖽶𖾑 𖼮𖽶𖾐，𖽃𖽔𖾑 𖼊𖽑𖽙 𖼍𖽜𖾐 𖼹𖽺𖾐 𖼖𖽻𖾐．
9 𖼽𖽱𖾐 𖼽𖽔𖾐 𖼖𖽦 𖼈𖽶 𖼈𖽳𖾑 𖼀𖽳 𖼮𖽑𖽡𖽺𖾐 𖽃𖽔𖾑 𖼊𖽑𖽙 𖼠𖽺𖾑 𖼍𖽪𖾐 𖼖𖽻𖾐，𖼽𖽕𖾑 𖼄𖽔 𖼺𖽔 𖼖𖽙𖾐 𖼀𖽦𖾐：“𖼣𖽙𖾐 𖼈𖽧 𖼐𖽑𖽳𖾐 𖽃𖽔𖾐！𖼐𖽑𖽡𖾐 𖼺𖽙𖾑 𖼺𖽙𖾐 𖼮𖽻𖾐 𖼮𖽻𖾐？” 𖼽𖽱𖾐 𖼽𖽔𖾐 𖼹𖽦𖾑 𖼽𖽙𖾐 𖼀𖽳 𖼖𖽦 𖼈𖽶 𖼮𖽑𖽡𖽺𖾐 𖼽𖽕𖾑 𖼄𖽔 𖼺𖽔 𖼀𖽙 𖼀𖽺 𖼵𖽪𖾐 𖼍𖽡 𖼺𖽺𖾑，𖼽𖽻 𖼖𖽙𖾐 𖼮𖽑𖽻𖾐 𖼮𖽑𖽻 𖼄𖽦𖾐 𖼹𖽮𖾑 𖼊𖽻𖾐． 10 𖼽𖽱𖾐 𖼽𖽔𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖽃𖽔𖾑 𖼊𖽑𖽙 𖼈𖽺𖾐 𖼍𖽳𖾐，𖼽𖽕𖾑 𖼄𖽔 𖼺𖽔 𖼷𖽜𖾐 𖼄𖽔 𖼮𖽑𖽡𖾐 𖼺𖽺𖾑，𖼽𖽱𖾐 𖼽𖽔𖾐 𖽃𖽔𖾑 𖼊𖽑𖽙 𖼈𖽺𖾐 𖼽𖽻 𖼦𖽑𖽦 𖼂𖽙𖾐 𖼊𖽑𖽺 𖼰𖽶𖾑，𖼽𖽻 𖼞𖽳𖾐 𖼈𖽪𖾐 𖼦𖽑𖽦 𖼽𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐 𖼖𖽻𖾐，𖼹𖽦𖾑 𖼽𖽻 𖼊𖽑𖽺 𖼊𖽑𖽡 𖼂𖽦𖾑 𖼰𖽶𖾑 𖼄𖽔 𖼮𖽑𖽳𖾐，𖼽𖽕𖾑 𖼄𖽔 𖼺𖽔 𖼳𖽶𖾐 𖼦𖽑𖽙𖾐．𖼽𖽱𖾐 𖼽𖽔𖾐 𖼐𖽺𖾐 𖼽𖽻 𖼈𖽧 𖼐𖽑𖽳𖾐 𖼽𖽕𖾑 𖼂𖽡 𖼳𖽺𖾐 𖼹𖽦𖾑 𖼂𖽡 𖼰𖽡𖾐 𖼖𖽡𖾑 𖼞𖽳𖾐 𖼻𖽙 𖼳𖽶𖾑 𖼂𖽔𖾐 𖼊𖽑𖽺 𖼞𖽕 𖼽𖽡𖾐．
𖼽𖽱𖾐 𖼽𖽔𖾐 𖼳𖽶𖾑 𖼂𖽔𖾐 𖼊𖽑𖽺 𖼞𖽕
11 𖼽𖽱𖾐 𖼽𖽔𖾐 𖼞𖽳𖾐 𖼄𖽦 𖼀𖽑𖽙 𖼠𖽻𖾐 𖼞𖽑𖽶𖾐，𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽻𖾐 𖼽𖽕𖾑 𖼄𖽔 𖼺𖽔 𖼞𖽳𖾐 𖼳𖽶𖾐 𖼄𖽻𖾐 𖼀𖽙 𖼮𖽑𖽶𖾐 𖼦𖽑𖽡𖽚 𖼺𖽺𖾑，𖼀𖽦𖾐：“𖽃𖽔 𖼺𖽺 𖼽𖽱𖾐 𖼽𖽔𖾐 𖼊𖽑𖽺 𖼐𖽑𖽧𖾐 𖼺𖽳 𖼺𖽺𖾑，𖼍𖽕𖾑 𖼈𖽪𖽺𖾑 𖼊𖽑𖽺 𖼮𖽻𖾑 𖼊𖽴 𖼊𖽻𖾐 𖼊𖽑𖽡𖾑 𖼣𖽻𖾐，𖼽𖽱𖾐 𖼽𖽔𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼻𖽻𖾐！” 12 𖼽𖽕𖾑 𖼄𖽔 𖼺𖽔 𖼞𖽑𖽻𖾑 𖼮𖽨𖾐 𖼄𖽙𖾐 𖼠𖽻𖾐 𖼊𖽑𖽺 𖼽𖽻 𖼄𖽳𖾑 𖼺𖽶 𖼞𖽑𖽶𖾐 𖼖𖽪𖾐 𖼍𖽳𖾐．𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼐𖽦𖾐 𖼄𖽡𖽻𖾐，𖼞𖽑𖽙𖾐 𖼮𖽨𖾐 𖼠𖽚 𖼺𖽪𖾐 𖼄𖽳𖾑 𖼄𖽳 𖼽𖽕𖾑 𖼄𖽔 𖼺𖽔 𖼞𖽳𖾐 𖼳𖽶𖾐 𖼄𖽻𖾐 𖼀𖽙 𖼮𖽑𖽶𖾐 𖼦𖽑𖽡𖽚 𖼍𖽳𖾐 𖼺𖽺𖾑，𖼽𖽕𖾑 𖼄𖽔 𖼺𖽔 𖼞𖽳𖾐 𖼳𖽶𖾐 𖼄𖽻𖾐 𖼮𖽨𖾐 𖼄𖽙𖾐 𖼊𖽑𖽺 𖼮𖽑𖽻𖾐 𖼳𖽡𖽺𖾐 𖼄𖽡𖾐 𖼞𖽑𖽶𖾐 𖼍𖽙𖾑，𖼀𖽑𖽡𖽻𖾐 𖼊𖽑𖽡 𖼳𖽡𖽚𖾐 𖼷𖽴𖾐 𖼽𖽻 𖼊𖽑𖽺 𖼀𖽜𖾐 𖼍𖽡，𖼞𖽪𖾐 𖼮𖽡𖽺𖾐 𖼽𖽕𖾐 𖼄𖽔 𖼺𖽔 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼖𖽺𖾑 𖼽𖽻 𖼳𖽶𖾐 𖼄𖽻𖾐 𖼀𖽙 𖼮𖽑𖽶𖾐 𖼦𖽑𖽡𖽚 𖼍𖽳𖾐． 13 𖼷𖽑𖽻𖾐 𖼄𖽻𖾐 𖼮𖽨𖾐 𖼄𖽙𖾐 𖼊𖽑𖽺 𖼮𖽑𖽻𖾐 𖼳𖽡𖽺𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼠𖽚 𖼽𖽡𖾐 𖼺𖽺𖾑，𖼽𖽱𖾐 𖼽𖽔𖾐 𖼖𖽙𖾐 𖼮𖽑𖽻𖾐 𖼂𖽡 𖼰𖽡𖾐 𖼖𖽡𖾑 𖼞𖽳𖾐 𖼻𖽙 𖼳𖽶𖾑 𖼂𖽔𖾐 𖼊𖽑𖽺 𖼞𖽕 𖼽𖽡𖾐．
𖼳𖽶𖾑 𖼂𖽔𖾐 𖼊𖽑𖽺 𖼺𖽦 𖼦𖽑𖽙𖾐
14 𖼳𖽶𖾑 𖼂𖽔𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽑𖽙𖾐 𖼣𖽻𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼺𖽜 𖼻𖽶𖾐 𖼺𖽺𖾑，𖼂𖽚 𖼄𖽔 𖼰𖽡𖽔𖾐 𖼄𖽡𖾐 𖼊𖽺𖾐 𖼽𖽕𖾑 𖼂𖽡 𖼖𖽔𖾐 𖼖𖽪𖾐 𖼞𖽳𖾐 𖼮𖽑𖽡𖾐，𖼞𖽶𖾑𖽑 𖼠𖽻𖾐 𖼞𖽳𖾐 𖼂𖽡 𖼖𖽡𖾑 𖼺𖽪𖾐 𖼷𖽑𖽻𖾐 𖼷𖽙𖾐 𖼖𖽙𖾐 𖼻𖽶𖾑 𖼖𖽻𖾐 𖼽𖽻 𖼠𖽙𖾑 𖼍𖽻𖾐 𖼮𖽑𖽻𖾐． 15 𖼽𖽱𖾐 𖼽𖽔𖾐 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼖𖽻𖾐 𖼺𖽺𖾑，𖼳𖽶𖾑 𖼂𖽔𖾐 𖼮𖽻𖾐 𖼊𖽪 𖼂𖽚 𖼄𖽔 𖼰𖽡𖽔𖾐 𖼄𖽡𖾐 𖼊𖽺𖾐 𖼞𖽳𖾐 𖼽𖽕𖾑 𖼂𖽡 𖼖𖽔𖾐 𖼖𖽪𖾐 𖼊𖽑𖽺 𖼰𖽻𖾑 𖼍𖽡．𖼽𖽻 𖼈𖽳𖾐 𖼖𖽪𖾐 𖼍𖽴 𖼍𖽪𖾐 𖼞𖽳𖾐 𖼐𖽑𖽡𖾑 𖼦𖽑𖽻 𖼂𖽜𖾐 𖼷𖽑𖽧𖾐 𖼍𖽪𖾐，𖼄𖽶𖾐 𖼞𖽳𖾐 𖼖𖽪𖾐 𖼰𖽻𖾐 𖼄𖽶𖾐 𖼮𖽻𖾐．𖼽𖽻 𖼈𖽳𖾐 𖼖𖽪𖾐 𖼰𖽻𖾐 𖼊𖽑𖽺 𖼮𖽑𖽙，𖼖𖽪𖾐 𖼰𖽻𖾐 𖼊𖽑𖽺 𖼮𖽑𖽙 𖼖𖽦 𖼊𖽻𖾐． 16 𖼈𖽪𖾐 𖼺𖽝𖾑 𖼮𖽻𖾐 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼊𖽑𖽡 𖼽𖽚𖾐 𖼖𖽪𖾐 𖼰𖽻𖾐 𖼊𖽑𖽺 𖼮𖽻𖾐 𖽃𖽶𖾐 𖼮𖽸 𖼺𖽺𖾑，𖼀𖽦𖾐：“𖼊𖽻 𖼐𖽙𖾐 𖼍𖽳𖾐！𖼊𖽻 𖼐𖽙𖾐 𖼍𖽳𖾐！𖼐𖽑𖽡𖾐 𖼈𖽳𖾐 𖼽𖽱𖾐 𖼽𖽔𖾐 𖼊𖽑𖽺 𖼀𖽦𖾐 𖼊𖽑𖽧，𖼺𖽜 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼐𖽳 𖼖𖽻𖾐，𖼣𖽙𖾐 𖼽𖽻 𖼖𖽙𖾐 𖼮𖽑𖽻𖾐 𖼀𖽦𖾐 𖼖𖽚𖾐 𖼂𖽚𖾐 𖼊𖽻 𖼂𖽪𖾑 𖼮𖽻𖾐．” 17 𖼽𖽱𖾐 𖼽𖽔𖾐 𖼺𖽜 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽳𖾐 𖼐𖽳 𖼽𖽡𖾐，𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽶𖾑 𖼽𖽚𖾐 𖼊𖽻 𖼐𖽙𖾐：“𖼐𖽑𖽡𖾐 𖼽𖽱𖾐 𖼽𖽔𖾐 𖼣𖽻𖾐 𖼣𖽻𖾐？”
𖼽𖽻 𖼊𖽻 𖼞𖽑𖽚：“𖼣𖽻𖾐 𖼍𖽳𖾐．”
𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽶𖾑 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼮𖽜𖾐 𖼄𖽙𖾐 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼞𖽜！”
𖼽𖽻 𖼀𖽦𖾐：“𖼣𖽙𖾐 𖼊𖽻 𖼐𖽙𖾐 𖼍𖽳𖾐！”
18 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽶𖾑 𖼽𖽚𖾐 𖼀𖽦𖾐：“𖽃𖽔 𖼈𖽶 𖼊𖽑𖽙 𖼷𖽑𖽻𖾐 𖼄𖽔 𖼐𖽙 𖼀𖽦𖾐 𖼦𖽶𖾐：‘ 𖼄𖽡𖽻 𖼮𖽻𖾐 𖼺𖽪𖾐 𖼽𖽕𖾑 𖼂𖽡 𖼖𖽔𖾐 𖼖𖽪𖾐 𖼞𖽳𖾐 𖼊𖽻 𖼐𖽙𖾐 𖼽𖽡𖾐 𖼊𖽑𖽡𖾑 𖼣𖽻𖾐，𖼄𖽡𖽻 𖼞𖽑𖽶𖾑 𖼷𖽑𖽜𖾑 𖼷𖽑𖽜𖾐 𖼀𖽑𖽢 𖼊𖽻𖾐．’ 19 𖼣𖽙𖾐 𖼈𖽳𖾐 𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽑𖽶𖾐 𖼷𖽑𖽻𖾐 𖼖𖽙𖾐 𖼊𖽑𖽙，𖼣𖽜𖾐 𖼻𖽺𖾐 𖼊𖽙𖾐 𖼺𖽪𖾐 𖼷𖽑𖽻𖾐 𖼣𖽻𖾐，𖼐𖽑𖽡𖾐 𖽃𖽔𖾐 𖼹𖽻𖾐 𖼄𖽪𖾐 𖼊𖽪𖾐 𖼻𖽜 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖼖𖽪𖾐 𖼦𖽑𖽺𖾑 𖼊𖽑𖽺 𖼄𖽳 𖼮𖽡𖽦 𖼊𖽡 𖼮𖽑𖽻 𖼐𖽺𖾑？𖼖𖽪𖾐 𖼦𖽺𖾑𖽑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽃𖽔 𖼄𖽙𖾐 𖼖𖽙𖾐 𖼺𖽶𖾑．𖼐𖽑𖽡𖾐 𖽃𖽔𖾐 𖼹𖽻𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽡𖾐 𖼳𖽡𖽪 𖼊𖽑𖽺 𖼀𖽑𖽧𖾐 𖼄𖽶𖾑 𖼊𖽻𖾐 𖼐𖽺𖾑？”
20 𖼽𖽱𖾐 𖼽𖽔𖾐 𖼊𖽻 𖼞𖽑𖽚：“𖼣𖽙𖾐 𖼠𖽕𖾐 𖼰𖽶𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼄𖽔 𖼠𖽸𖾑！𖼣𖽙𖾐 𖼠𖽕𖾐 𖼰𖽶𖾐 𖼖𖽪𖾐 𖼦𖽑𖽺𖾑 𖼊𖽑𖽺 𖼄𖽳 𖼮𖽡𖽦 𖼄𖽔 𖼠𖽸𖾑， 21 𖼄𖽡𖽻 𖼦𖽑𖽺𖾑 𖼐𖽑𖽡𖾐 𖼀𖽦𖾐 𖼺𖽪𖾐 𖼞𖽶𖾑𖽑 𖼻𖽻𖾐 𖼄𖽔 𖼣𖽻𖾐．𖼽𖽡 𖼇𖽕 𖼖𖽡𖽦 𖽂𖽙 𖼰𖽡𖽺𖾐 𖼀𖽙 𖼳𖽶𖾑 𖼂𖽔𖾐𖼄𖽡𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽻𖾐，𖼽𖽻 𖼞𖽑𖽶𖾑 𖼂𖽡 𖼰𖽡𖾐 𖼖𖽡𖾑 𖼞𖽳𖾐 𖼻𖽙 𖼣𖽻𖾐，𖼽𖽻 𖼍𖽕𖾑 𖼈𖽪𖽺𖾑 𖼈𖽪𖾑 𖼍𖽦 𖼊𖽑𖽺 𖼀𖽑𖽚𖾐 𖼊𖽦，𖼐𖽑𖽡𖾐 𖼈𖽳𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼰𖽡𖽻𖾐 𖼊𖽑𖽧 𖼖𖽻𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼖𖽪𖾐 𖼦𖽑𖽺𖾑 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽜 𖼽𖽡𖾐 𖼊𖽻𖾐．”
𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽶𖾑 𖼽𖽱𖾐 𖼽𖽔𖾐 𖼖𖽙𖾐 𖼀𖽦𖾐：“𖼐𖽦𖾐 𖼍𖽳𖾐！𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼞𖽳𖾐 𖼈𖽪𖾑 𖼊𖽡𖾐 𖼷𖽑𖽜𖾑 𖼷𖽑𖽜𖾐 𖼖𖽪𖾐 𖼰𖽻𖾐 𖼦𖽑𖽺𖾑 𖼊𖽑𖽺 𖼮𖽑𖽻𖾐 𖼷𖽴𖾐 𖼐𖽑𖽡𖾐 𖼞𖽜 𖼊𖽻𖾐．” 22 𖼻𖽙 𖼄𖽳 𖼄𖽡𖾐 𖼐𖽜𖾐 𖼽𖽻 𖼞𖽳𖾐 𖼈𖽪𖾐 𖼺𖽝𖾑 𖼖𖽙𖾐 𖼮𖽑𖽻𖾐 𖼽𖽡𖾐 𖼷𖽑𖽻𖾐 𖼷𖽪𖾐 𖼖𖽙𖾐 𖼄𖽡𖽻𖾐 𖼺𖽺𖾑，𖼽𖽻 𖼈𖽳𖾐 𖼂𖽡 𖼰𖽡𖾐 𖼖𖽡𖾑 𖼞𖽳𖾐 𖼻𖽙 𖼳𖽶𖾑 𖼂𖽔𖾐 𖼞𖽳𖾐 𖼈𖽪𖾑 𖼊𖽡𖾐 𖼊𖽝𖾐 𖼹𖽺𖾐 𖼖𖽻𖾐，𖼷𖽴𖾐 𖼽𖽱𖾐 𖼽𖽔𖾐 𖼊𖽑𖽺 𖼞𖽜．𖼽𖽱𖾐 𖼽𖽔𖾐 𖼽𖽻𖾐 𖼮𖽑𖽡𖽪𖾐 𖼄𖽸𖾐 𖼺𖽺𖾑，𖼄𖽦 𖼀𖽑𖽙 𖼞𖽑𖽶𖾑 𖼹𖽻𖾐 𖼖𖽪𖾐 𖼞𖽳𖾐 𖼰𖽡𖾑 𖼦𖽑𖽙𖾐，𖼀𖽑𖽚𖾐 𖼽𖽻 𖼄𖽳𖾑 𖽃𖽔𖾑 𖼞𖽑𖽶𖾐 𖼞𖽚 𖼽𖽡𖾐 𖼦𖽑𖽙𖾐．𖼽𖽱𖾐 𖼽𖽔𖾐 𖼖𖽺𖾑 𖼀𖽑𖽚𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼄𖽡𖽻𖾐 𖼽𖽡𖾐．
𖼍𖽕𖾑 𖼈𖽪𖽺𖾑 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻
23 𖼽𖽱𖾐 𖼽𖽔𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼷𖽪𖾐 𖼞𖽑𖽙𖾐 𖼣𖽻𖾐 𖼞𖽳𖾐 𖼄𖽦 𖼈𖽪𖾑 𖼄𖽙𖾐 𖼂𖽺𖾐．𖼽𖽺𖾐 𖼦𖽴 𖼽𖽺𖾐 𖼍𖽕𖾑 𖼞𖽳𖾐 𖼻𖽙 𖼂𖽡 𖼐𖽕 𖼽𖽔，𖼽𖽻 𖼰𖽡𖾐 𖼖𖽡𖾑 𖼊𖽑𖽧 𖼺𖽪𖾐 𖼷𖽑𖽻𖾐 𖼐𖽺𖾐 𖼂𖽡 𖼖𖽡𖾑 𖼊𖽑𖽧 𖼺𖽪𖾐 𖼷𖽑𖽻𖾐 𖼊𖽑𖽺 𖼠𖽕． 24 𖼽𖽕𖾑 𖼍𖽙𖾐 𖼖𖽕 𖼄𖽡𖽻 𖼖𖽡 𖼄𖽪𖾐 𖼺𖽪𖾐 𖼊𖽑𖽺 𖼠𖽕．𖼽𖽕𖾑 𖼳𖽡𖾐 𖼖𖽲𖾑 𖼞𖽳𖾐 𖼻𖽙 𖼽𖽱𖾐 𖼳𖽔𖾐 𖼇𖽕 𖼄𖽡𖽻 𖼮𖽨𖾐 𖼈𖽝 𖼺𖽪𖾐 𖼷𖽶 𖼄𖽻 𖼂𖽺𖾐． 25 𖼳𖽶𖾑 𖼇𖽕 𖼺𖽪𖾑 𖼷𖽑𖽺𖾐 𖼣𖽻𖾐．𖼺𖽔 𖼍𖽮 𖼐𖽺𖾐 𖼽𖽕𖾑 𖼂𖽡 𖼽𖽕𖾑 𖼊𖽑𖽔𖾐 𖼍𖽡𖾐 𖼄𖽻 𖼂𖽺𖾐． 26 𖼽𖽔 𖽃𖽳 𖼺𖽪𖾐 𖼷𖽑𖽻𖾐 𖼽𖽡 𖼖𖽔𖾐 𖼖𖽺𖾑 𖼍𖽕𖾑 𖼈𖽪𖽺𖾑 𖼞𖽳𖾐 𖼍𖽡𖾐 𖼄𖽻 𖼂𖽺𖾐．