𖼺𖽔 𖼄𖽪 𖽃𖽳 𖼐𖽑𖽡 𖼺𖽪𖾑 17

𖼦𖽪𖾑 𖼳𖽺𖾐 𖼽𖽡𖾐 𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼄𖽪𖾐 𖼊𖽪𖾐 𖼊𖽑𖽺 𖼂𖽺𖾐 𖼀𖽑𖽧𖾐

1 𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼹𖽦𖾑 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙 𖼞𖽜 𖼷𖽑𖽻𖾐 𖼊𖽑𖽡 𖼄𖽺 𖼐𖽑𖽡 𖼍𖽪𖾐 𖼽𖽚𖾐 𖼺𖽺𖾐 𖼊𖽑𖽧 𖼖𖽻𖾐 𖼺𖽺𖾑，𖼣𖽙𖾐 𖽃𖽙𖾑 𖼄𖽺𖾐 𖼽𖽡𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖽂𖽙𖾐 𖼞𖽕 𖼽𖽡𖾐 𖼊𖽙𖾐 𖼖𖽡𖾐， 2 𖼽𖽻 𖽂𖽙 𖼞𖽶𖾐 𖼦𖽑𖽻𖾐 𖼞𖽑𖽶𖾑 𖼮𖽶𖾐，𖼐𖽕 𖼊𖽺𖾐 𖼽𖽻 𖼊𖽑𖽺 𖼞𖽕 𖼄𖽳𖾐，𖼽𖽻 𖼞𖽜 𖼮𖽡𖽮𖾐 𖼷𖽑𖽚 𖼺𖽺𖾑，𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼷𖽑𖽜𖾑 𖼷𖽑𖽜𖾐 𖼮𖽡𖽪 𖼀𖽑𖽻𖾐 𖼍𖽪𖾐 𖼊𖽻𖾐．𖼣𖽙𖾐 𖼈𖽪𖾐 𖼍𖽦 𖼊𖽑𖽺 𖼍𖽺𖾑 𖼺𖽦 𖼦𖽑𖽙𖾐， 3 𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼞𖽜 𖼖𖽻𖾐 𖼐𖽑𖽡𖾐 𖼖𖽙𖾐 𖼮𖽻𖾑 𖼊𖽴 𖼊𖽻𖾐．𖼐𖽑𖽡𖾐 𖼞𖽑𖽙𖾐 𖼰𖽙𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼳𖽶𖾐 𖼦𖽑𖽙𖾐 𖼹𖽦𖾐，𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼐𖽑𖽡𖾐 𖼖𖽙𖾐 𖼮𖽻𖾑 𖼊𖽴 𖼊𖽻𖾐，𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼺𖽙𖾑 𖼺𖽙𖾐 𖽂𖽙𖾐 𖼮𖽻𖾐 𖼊𖽙𖾐．” 4 𖼽𖽔𖾐 𖼳𖽔𖾐 𖼖𖽚 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼖𖽺𖾑 𖼄𖽡𖽻 𖼦𖽑𖽺𖾑 𖼮𖽨𖾐 𖼊𖽑𖽺 𖼹𖽳𖾐 𖼰𖽕𖾐．

5 𖼽𖽔𖾐 𖼳𖽔𖾐 𖼖𖽚 𖼀𖽦𖾐：“𖼽𖽕𖾑 𖼰𖽡𖾐 𖼺𖽪𖾐 𖼷𖽑𖽻𖾐 𖼦𖽪𖾑 𖼳𖽺𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖽃𖽔 𖼐𖽺𖾑 𖼽𖽻 𖽃𖽔 𖼊𖽺𖾐 𖼀𖽦𖾐 𖼐𖽺𖾐 𖼊𖽑𖽡 𖼠𖽙𖾐 𖼊𖽻 𖼐𖽙𖾐 𖼊𖽙𖾐．” 6 𖽃𖽔𖾐 𖼺𖽺𖾑，𖼦𖽪𖾑 𖼳𖽺𖾐 𖼖𖽻𖾐 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼄𖽡𖽻𖾐，𖼽𖽔𖾐 𖼳𖽔𖾐 𖼖𖽚 𖼽𖽻 𖼊𖽑𖽺 𖼊𖽻 𖼐𖽙𖾐：“𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼦𖽑𖽺𖾑 𖼻𖽻𖾐 𖼀𖽦𖾐，𖽃𖽔 𖼐𖽺𖾑 𖼽𖽻 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐 𖼊𖽙𖾐 𖼊𖽙𖾐？ 𖼄𖽔 𖼊𖽙𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼀𖽦𖾐 𖽃𖽔 𖼊𖽺𖾐 𖼂𖽺𖾐 𖼖𖽡𖾐？”

7 𖼦𖽪𖾑 𖼳𖽺𖾐 𖼽𖽔𖾐 𖼳𖽔𖾐 𖼖𖽚 𖼊𖽑𖽺 𖼊𖽻 𖼞𖽑𖽚：“𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼦𖽑𖽺𖾑 𖼊𖽑𖽡 𖼂𖽦𖾑 𖼞𖽑𖽙𖾐 𖼣𖽝 𖼊𖽑𖽧 𖼖𖽻𖾐 𖼺𖽪𖾐 𖼄𖽡𖽻 𖼮𖽨𖾐 𖼦𖽑𖽺𖾑 𖼄𖽔 𖼹𖽳𖾐 𖼳𖽶 𖼣𖽻𖾐．” 8 𖼦𖽪𖾑 𖼳𖽺𖾐 𖼹𖽦𖾑 𖼀𖽦𖾐：“𖼐𖽑𖽡𖾐 𖼺𖽝𖾑 𖼖𖽡𖾐，𖼐𖽑𖽡𖽻𖾐 𖼀𖽙 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼄𖽳𖾑 𖼄𖽳 𖼖𖽺𖾑 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼣𖽻𖾐，𖼽𖽻 𖼈𖽳𖾐 𖼀𖽶 𖼻𖽶 𖼮𖽑𖽡𖾐 𖼀𖽡𖾐 𖼦𖽑𖽻𖾐，𖼞𖽑𖽶𖾑 𖼄𖽡𖾐 𖼳𖽡𖽻𖾐 𖼀𖽙 𖼞𖽳𖾐 𖼈𖽜𖾐 𖼻𖽙 𖼀𖽑𖽧 𖼦𖽑𖽙𖾐 𖼺𖽪𖾐 𖼈𖽜𖾐 𖼄𖽙𖾐 𖼖𖽙𖾐 𖼺𖽶𖾑．𖼐𖽑𖽡𖽻𖾐 𖼀𖽙 𖼖𖽺𖾑 𖼰𖽕𖾑 𖼊𖽝 𖼺𖽪𖾐 𖼄𖽦 𖼀𖽑𖽙 𖼣𖽻𖾐 𖼺𖽺𖾑，𖼽𖽻 𖼷𖽑𖽜𖾑 𖼷𖽑𖽜𖾐 𖼷𖽑𖽻𖾐 𖼷𖽪𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼞𖽕 𖼦𖽑𖽦 𖼄𖽔 𖼠𖽸𖾑． 9 𖼽𖽻 𖽃𖽔𖾑 𖼄𖽳𖾐 𖼈𖽦𖾑 𖼳𖽡𖽪 𖼞𖽑𖽶𖾐 𖼂𖽡𖽚𖾐 𖼣𖽻𖾐 𖼦𖽻，𖼠𖽳𖾐 𖼖𖽪𖾐 𖼊𖽑𖽡 𖼄𖽦𖾐 𖼮𖽻𖾐 𖼣𖽻𖾐 𖼦𖽻，𖼽𖽻 𖽃𖽙𖾑 𖼄𖽺 𖼖𖽻𖾐 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼊𖽑𖽺 𖼺𖽦 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼊𖽻 𖼮𖽨 𖼺𖽪𖾐 𖼷𖽑𖽻𖾐 𖼀𖽦𖾐 𖼊𖽻𖾐：‘ 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼊𖽴 𖼺𖽪𖾐 𖼷𖽑𖽻𖾐 𖼊𖽑𖽺 𖼺𖽦 𖼦𖽑𖽙𖾐 𖼦𖽑𖽻𖾐！’ 10 𖼞𖽑𖽶𖾑 𖼮𖽶𖾐，𖼍𖽻𖾐 𖼖𖽙𖾐 𖼺𖽶𖾑 𖼐𖽑𖽧𖾐 𖼈𖽳 𖼺𖽪𖾐 𖼷𖽑𖽻𖾐 𖼖𖽺𖾑 𖼮𖽡𖽮𖾐 𖼞𖽴𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼺𖽝𖾑，𖼐𖽑𖽡𖽻𖾐 𖼀𖽙 𖼞𖽑𖽶𖾑 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼣𖽻𖾐，𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼖𖽺𖾑 𖼄𖽳𖾑 𖼄𖽳 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼣𖽻𖾐．

11 𖽃𖽔𖾐 𖼺𖽺𖾑，𖼣𖽙𖾐 𖼦𖽑𖽺𖾑 𖼻𖽻𖾐 𖼊𖽑𖽡 𖼮𖽑𖽻𖾐 𖼺𖽪𖾐 𖼣𖽻𖾐：𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖽃𖽶𖾐 𖼐𖽑𖽡𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼻𖽶𖾑 𖼖𖽻𖾐，𖼍𖽕𖾑 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽻𖾐 𖼂𖽡𖽦 𖼳𖽶𖾑 𖼂𖽔𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽡𖾐，𖼦𖽜𖾐 𖼄𖽙𖾐 𖼦𖽜 𖼞𖽳𖾐 𖼦𖽳 𖼐𖽑𖽡 𖼖𖽙𖾐 𖼺𖽶𖾑 𖼄𖽨 𖼺𖽺𖾑，𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼦𖽳 𖼰𖽕𖾑 𖼊𖽝 𖼽𖽡𖾐 𖼖𖽡𖾐． 12 𖽃𖽔 𖼐𖽺𖾑 𖼍𖽕𖾑 𖼈𖽪𖽺𖾑 𖼊𖽑𖽺 𖽃𖽔 𖼊𖽻𖾑 𖼰𖽙𖾐 𖼄𖽡𖽻𖾐 𖼣𖽻𖾐 𖼦𖽻，𖼽𖽻 𖼊𖽑𖽺 𖼊𖽝 𖼊𖽦 𖼻𖽻𖾐，𖼰𖽶𖾑 𖼈𖽡𖾐 𖼊𖽻 𖼄𖽡𖾑 𖼐𖽦𖾐 𖼊𖽑𖽺 𖼹𖽺𖾐 𖼖𖽙𖾐 𖼺𖽶𖾑，𖽃𖽔𖾐 𖼐𖽺𖾑 𖼐𖽕 𖼊𖽺𖾐 𖼽𖽻 𖼞𖽳𖾐 𖼞𖽑𖽻𖾑 𖼮𖽑𖽡𖾐．𖼦𖽑𖽺𖾑 𖼻𖽻𖾐，𖼽𖽻 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽑𖽺 𖼖𖽺𖾑 𖼄𖽔 𖼹𖽺𖾐 𖼍𖽙𖾑． 13 𖼽𖽻 𖼀𖽑𖽻𖾐 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐 𖼊𖽑𖽡𖾑 𖼣𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽪𖾐 𖼰𖽕𖾐 𖼈𖽝 𖼈𖽺𖾐 𖼖𖽪𖾐 𖼞𖽑𖽶𖾑 𖼊𖽝𖾐 𖼞𖽳𖾐 𖼽𖽡𖾐，𖼖𖽪𖾐 𖼰𖽻𖾐 𖼊𖽑𖽺 𖼞𖽻𖾐 𖼖𖽻𖾐 𖼠𖽕𖾑 𖼰𖽡𖽚𖾐 𖼞𖽑𖽶𖾐 𖼹𖽺𖾐，𖼖𖽚𖾐 𖼻𖽙 𖼊𖽑𖽡 𖼊𖽝𖾐 𖼖𖽺𖾑 𖼊𖽑𖽔 𖼹𖽺𖾐 𖼍𖽙𖾑 𖼖𖽡𖾐．”

14 𖼽𖽔𖾐 𖼳𖽔𖾐 𖼖𖽚 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽪𖾐 𖼀𖽦𖾐：“𖼽𖽕𖾑 𖼰𖽡𖾐 𖼺𖽪𖾐 𖼷𖽑𖽻𖾐 𖼦𖽪𖾑 𖼳𖽺𖾐 𖼞𖽑𖽙𖾐 𖼣𖽝 𖼊𖽑𖽧 𖼖𖽻𖾐 𖼺𖽪𖾐 𖼦𖽑𖽺𖾑 𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼣𖽝 𖼊𖽑𖽧 𖼖𖽻𖾐 𖼺𖽪𖾐 𖼦𖽶𖾑 𖼄𖽔 𖼷𖽑𖽶𖾐 𖼹𖽳𖾐．” 𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼣𖽝 𖼊𖽑𖽧 𖼖𖽻𖾐 𖼺𖽪𖾐 𖼄𖽪𖾐 𖼊𖽪𖾐 𖼊𖽑𖽺 𖼂𖽺𖾐 𖼀𖽑𖽧𖾐 𖼊𖽻𖾐 𖼺𖽺𖾑，𖼽𖽔𖾐 𖼳𖽔𖾐 𖼖𖽚 𖼞𖽜 𖼈𖽡𖾑 𖼞𖽑𖽙 𖼷𖽶𖾐 𖼊𖽻𖾐 𖼳𖽶 𖼣𖽻𖾐．

𖼦𖽪𖾑 𖼳𖽺𖾐 𖼊𖽻 𖼂𖽙𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼞𖽜

15 𖽃𖽔𖾐 𖼺𖽺𖾑 𖼦𖽪𖾑 𖼳𖽺𖾐 𖼞𖽑𖽻𖾑 𖼍𖽡𖾐 𖼄𖽻 𖼺𖽔 𖼍𖽮 𖼐𖽺𖾐 𖼽𖽕𖾑 𖼂𖽡 𖼽𖽕𖾑 𖼊𖽑𖽔𖾐 𖼖𖽙𖾐 𖼀𖽦𖾐：“𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼞𖽑𖽻𖾑 𖼽𖽔𖾐 𖼳𖽔𖾐 𖼖𖽚 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖼮𖽳 𖼄𖽻 𖼞𖽑𖽶𖾑 𖼹𖽻𖾐 𖼖𖽙𖾐 𖼀𖽙𖾐 𖼞𖽑𖽙𖾐 𖼣𖽝 𖼊𖽑𖽧 𖼖𖽻𖾐 𖼺𖽪𖾐 𖼄𖽡𖽻 𖼮𖽨𖾐 𖼦𖽑𖽺𖾑 𖼻𖽻𖾐 𖼣𖽻𖾐，𖼣𖽙𖾐 𖼞𖽑𖽙𖾐 𖼊𖽚𖾐 𖼺𖽪𖾐 𖼄𖽪𖾐 𖼊𖽪𖾐 𖼞𖽑𖽶𖾑 𖼦𖽑𖽺𖾑 𖼻𖽻𖾐 𖼣𖽻𖾐． 16 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼐𖽕 𖼐𖽕𖾐 𖼷𖽑𖽻𖾐 𖼹𖽡𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐 𖼊𖽑𖽧 𖼽𖽡𖾐：‘ 𖽃𖽙𖾑 𖼄𖽺𖾐 𖼐𖽑𖽡𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼈𖽡𖾐 𖼠𖽚 𖼊𖽪 𖼞𖽑𖽶𖾑 𖼠𖽻𖾐 𖼊𖽑𖽔 𖼦𖽑𖽦，𖼐𖽕 𖼐𖽕𖾐 𖼖𖽻𖾐 𖼮𖽻 𖼠𖽚 𖼽𖽡𖾐 𖼖𖽡𖾐，𖽃𖽔𖾑 𖼽𖽪𖾐 𖼈𖽪𖾐 𖼍𖽦 𖼐𖽺𖾐 𖼈𖽪𖾐 𖼍𖽦 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼞𖽑𖽙𖾐 𖼣𖽻𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼠𖽸𖾑．’

17 𖼞𖽑𖽶𖾑 𖼮𖽶𖾐，𖼽𖽱𖾐 𖼐𖽕 𖼍𖽔𖾐 𖼐𖽺𖾐 𖼽𖽕𖾑 𖼳𖽡𖾐 𖼄𖽔 𖼺𖽶𖾐 𖼽𖽺 𖼖𖽚 𖼰𖽧 𖼈𖽡𖾐 𖼊𖽚𖾐 𖼞𖽳𖾐 𖼐𖽙 𖼹𖽺𖾐，𖼽𖽻 𖼈𖽳𖾐 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐 𖼄𖽔 𖼂𖽡𖾑，𖼺𖽙𖾐 𖼮𖽑𖽢𖾑 𖼄𖽡𖽻𖾐 𖼠𖽸𖾑 𖼮𖽡𖽮𖾐．𖼮𖽜𖾐 𖼄𖽙𖾐 𖼊𖽑𖽡 𖼽𖽚𖾐 𖼄𖽔 𖼐𖽙 𖼊𖽚𖾐 𖼖𖽻𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐 𖼊𖽑𖽧，𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼹𖽦𖾑 𖼽𖽡𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐 𖼊𖽑𖽧． 18 𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼖𖽦𖾑 𖼻𖽙 𖼊𖽑𖽡 𖼽𖽚𖾐 𖼽𖽻 𖼈𖽳𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼽𖽡𖾐 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼀𖽦𖾐 𖼊𖽑𖽧．𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼐𖽕 𖼐𖽕𖾐 𖼞𖽑𖽶𖾑 𖼠𖽻𖾐 𖼰𖽡𖾑 𖼦𖽑𖽙𖾐，𖼖𖽻𖾐 𖼂𖽔𖾐 𖼦𖽪𖾑 𖼖𖽧 𖼮𖽑𖽡𖽦𖾐 𖼠𖽻𖾐 𖼷𖽑𖽻𖾐 𖼊𖽑𖽡 𖼈𖽴 𖼞𖽳𖾐 𖼮𖽑𖽡𖾐．𖼷𖽑𖽻𖾐 𖼞𖽑𖽶𖾑 𖼈𖽴 𖼞𖽳𖾐 𖼮𖽡𖽺 𖼞𖽪 𖼞𖽑𖽶𖾐 𖼈𖽡𖾐 𖼊𖽪 𖼊𖽑𖽡 𖼊𖽝𖾐 𖼮𖽻𖾐 𖼺𖽺𖾑，𖼽𖽻 𖼈𖽳𖾐 𖼈𖽡𖾐 𖼊𖽪 𖼞𖽑𖽶𖾐 𖼹𖽺𖾐 𖼽𖽡𖾐． 19 𖼷𖽑𖽻𖾐 𖼞𖽑𖽶𖾑 𖼈𖽴 𖼞𖽳𖾐 𖼈𖽴 𖼺𖽶𖾐 𖼄𖽙𖾐 𖼞𖽑𖽶𖾑 𖼽𖽚𖾐 𖼄𖽳𖾐 𖼮𖽑𖽙𖾐 𖼊𖽑𖽡 𖼮𖽑𖽙𖾐 𖼈𖽺𖾐 𖼈𖽡𖾐 𖼊𖽪 𖼮𖽑𖽡𖽺 𖼊𖽑𖽺 𖼀𖽜𖾐 𖼍𖽡，𖼳𖽙𖾐 𖼊𖽑𖽡 𖼀𖽧𖾑 𖼊𖽻 𖼞𖽑𖽶𖾑 𖼊𖽑𖽺 𖼍𖽦𖾐 𖼺𖽺𖾑，𖼄𖽡𖽻 𖼦𖽑𖽺𖾑 𖼮𖽨𖾐 𖼺𖽝𖾑 𖼺𖽪𖾐 𖼄𖽔 𖼮𖽻𖾐．

20 𖼽𖽔𖾐 𖼳𖽔𖾐 𖼖𖽚 𖼞𖽳𖾐 𖼷𖽶 𖼄𖽻 𖼖𖽻𖾐 𖼷𖽑𖽻𖾐 𖼦𖽑𖽺𖾑 𖼈𖽴 𖼞𖽳𖾐 𖼈𖽴 𖼺𖽶𖾐 𖼄𖽙𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼄𖽡𖽻𖾐 𖼺𖽺𖾑，𖼽𖽻 𖼊𖽑𖽺 𖼊𖽻 𖼐𖽙𖾐：“𖼽𖽕𖾑 𖼳𖽡𖾐 𖼄𖽔 𖼺𖽶𖾐 𖼐𖽺𖾐 𖼽𖽱𖾐 𖼐𖽕 𖼍𖽔𖾐 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼐𖽺𖾑？” 𖼈𖽴 𖼺𖽶𖾐 𖼄𖽙𖾐 𖼞𖽑𖽶𖾑 𖼽𖽚𖾐 𖼊𖽻 𖼞𖽑𖽚：“𖼽𖽻 𖼈𖽳𖾐 𖼖𖽻 𖼮𖽻 𖼠𖽚 𖼽𖽡𖾐 𖼦𖽑𖽙𖾐．” 𖽃𖽔𖾐 𖼺𖽺𖾑 𖼷𖽶 𖼄𖽻 𖼽𖽡𖾐 𖼽𖽻 𖼈𖽳𖾐 𖼊𖽑𖽺 𖼰𖽙𖾐，𖼦𖽑𖽔𖾐 𖼖𖽺𖾑 𖼰𖽙𖾐 𖼄𖽔 𖼄𖽡𖽻𖾐 𖼺𖽺𖾑，𖼀𖽑𖽚𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼞𖽚 𖼽𖽡𖾐 𖼦𖽑𖽙𖾐．

𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼽𖽻 𖼄𖽳𖾑 𖼞𖽚 𖼖𖽺𖾐 𖼮𖽑𖽳 𖼳𖽶𖾐 𖼦𖽑𖽙𖾐

21 𖼽𖽻 𖼈𖽳𖾐 𖼺𖽜 𖼽𖽡𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼈𖽡𖾐 𖼊𖽪 𖼞𖽑𖽶𖾐 𖼮𖽑𖽻𖾐 𖼊𖽦𖾐 𖼖𖽻𖾐，𖼽𖽡𖾐 𖼈𖽪𖾐 𖼍𖽦 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐 𖼊𖽑𖽧：“𖼐𖽑𖽡𖾐 𖼈𖽳𖾐 𖼐𖽕 𖼐𖽕𖾐 𖼍𖽪𖾐 𖼖𖽻𖾐，𖼖𖽻𖾐 𖼮𖽻 𖼠𖽚 𖼽𖽡𖾐 𖼖𖽡𖾐，𖼞𖽪𖾐 𖼮𖽡𖽺𖾐 𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼄𖽔 𖼹𖽳𖾐 𖼳𖽶 𖼄𖽡𖽻 𖼮𖽨𖾐 𖼣𖽝 𖼺𖽺𖾑，𖼖𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽹𖾑 𖼊𖽻𖾐．” 22 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼍𖽪𖾐 𖼖𖽻𖾐，𖼽𖽱𖾐 𖼍𖽗𖾑 𖼖𖽻 𖼮𖽻 𖼠𖽚 𖼽𖽡𖾐．𖽃𖽔𖾑 𖼄𖽶 𖼊𖽑𖽡 𖼞𖽑𖽶𖾑 𖼮𖽶𖾐 𖼮𖽑𖽡𖾐 𖼄𖽳𖾑 𖼄𖽳 𖼖𖽻𖾐 𖼮𖽻 𖼠𖽚 𖼽𖽡𖾐 𖼦𖽑𖽙𖾐．

23 𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼐𖽦𖾐 𖼄𖽡𖽻𖾐，𖼽𖽔𖾐 𖼳𖽔𖾐 𖼖𖽚 𖼽𖽻 𖼞𖽑𖽙𖾐 𖼣𖽝 𖼺𖽪𖾐 𖼖𖽙𖾐 𖼮𖽑𖽻𖾐 𖼄𖽔 𖼦𖽶𖾐 𖼺𖽺𖾑，𖼽𖽻 𖼊𖽑𖽳 𖼖𖽳𖾐 𖼄𖽪 𖼷𖽳，𖼀𖽑𖽚𖾐 𖼽𖽻 𖼄𖽳𖾑 𖼖𖽪𖾐 𖼞𖽳𖾐 𖽃𖽔𖾑 𖼞𖽑𖽶𖾐 𖼞𖽚 𖼽𖽡𖾐 𖼦𖽑𖽙𖾐．𖼽𖽻 𖽃𖽔𖾑 𖼞𖽑𖽶𖾐 𖼞𖽳𖾐 𖼄𖽡𖽻 𖼀𖽦𖾐 𖼄𖽪𖾑 𖼹𖽳𖾐 𖼦𖽑𖽻𖾐 𖼺𖽺𖾑，𖼖𖽺𖾐 𖼮𖽑𖽳 𖼳𖽶𖾐 𖼦𖽑𖽙𖾐，𖼀𖽑𖽨 𖼽𖽻 𖼀𖽙 𖼖𖽧 𖼀𖽳𖾐 𖼞𖽑𖽶𖾐 𖼍𖽡𖾑．

𖼽𖽔𖾐 𖼳𖽔𖾐 𖼖𖽚 𖼷𖽑𖽻𖾐 𖼦𖽳 𖼍𖽕𖾑 𖼈𖽪𖽺𖾑 𖼊𖽑𖽺 𖼞𖽕 𖼺𖽦 𖼽𖽡𖾐

24 𖼍𖽕𖾑 𖼈𖽪𖽺𖾑 𖼄𖽔 𖼦𖽔𖾐 𖼐𖽑𖽡𖽦𖾑 𖼄𖽡𖾐 𖼊𖽺𖾐 𖼮𖽑𖽡𖾐，𖼽𖽔𖾐 𖼳𖽔𖾐 𖼖𖽚 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽪𖾐 𖼖𖽺𖾑 𖼄𖽳𖾑 𖼄𖽳 𖼽𖽱𖾐 𖼍𖽗𖾑 𖼖𖽻 𖼮𖽻 𖼠𖽚 𖼽𖽡𖾐 𖼦𖽑𖽙𖾐． 25 𖼽𖽔𖾐 𖼳𖽔𖾐 𖼖𖽚 𖼽𖽕𖾑 𖼄𖽔 𖼺𖽔 𖼊𖽑𖽺 𖼹𖽡𖾐 𖼺𖽺𖾑，𖼽𖽱𖾐 𖼽𖽔𖾐 𖼊𖽑𖽡𖾑 𖼮𖽪 𖼄𖽦 𖼀𖽑𖽙 𖼦𖽳．𖼽𖽕𖾑 𖼄𖽔 𖼺𖽔 𖼦𖽑𖽺𖾑 𖼽𖽡 𖼳𖽸 𖼄𖽔 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽡 𖼊𖽑𖽴𖾑 𖼖𖽔𖾐 𖼞𖽳𖾐 𖼻𖽙 𖼣𖽻𖾐．𖼽𖽡 𖼊𖽑𖽴𖾑 𖼖𖽔𖾐 𖽃𖽙𖾑 𖼄𖽺 𖼊𖽑𖽙 𖼞𖽑𖽶𖾑 𖼮𖽶𖾐 𖼐𖽕 𖼳𖽡𖽕 𖼞𖽳𖾐 𖼻𖽙 𖼄𖽳 𖼽𖽕𖾑 𖼂𖽡 𖼠𖽺𖾐 𖼖𖽙𖾐 𖼐𖽳 𖼠𖽚．𖼽𖽕𖾑 𖼂𖽡 𖼠𖽺𖾐 𖼐𖽺𖾐 𖼽𖽱𖾐 𖼽𖽔𖾐 𖼽𖽻 𖼄𖽙𖾐 𖼳𖽡 𖼖𖽪 𖼽𖽔 𖼦𖽑𖽺𖾑 𖽃𖽔 𖼷𖽶𖾐 𖼐𖽑𖽳𖾐 𖼄𖽙𖾐 𖼣𖽻𖾐． 26 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼐𖽺𖾐 𖼽𖽔𖾐 𖼳𖽔𖾐 𖼖𖽚 𖼖𖽺𖾑 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼞𖽳𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶．

27 𖼍𖽕𖾑 𖼈𖽪𖽺𖾑 𖼄𖽔 𖼦𖽔𖾐 𖼐𖽑𖽡𖽦𖾑 𖼄𖽡𖾐 𖼊𖽺𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，\pn 𖼽𖽕𖾑 𖼄𖽜𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼖𖽔𖾐 𖼂𖽔𖾐 𖼺𖽪𖾐 𖼐𖽕 𖼳𖽡𖽕 𖼞𖽳𖾐 𖼻𖽙 𖼳𖽚𖾑 𖼂𖽡、𖼖𖽚 𖼍𖽡 𖼂𖽔𖾐 𖼺𖽪𖾐 𖼷𖽑𖽻𖾐 𖼽𖽕𖾑 𖼄𖽡 𖼖𖽡𖾑 𖼞𖽳𖾐 𖼻𖽙 𖼄𖽔 𖼰𖽧、𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼖𖽚 𖼰𖽡𖾐 𖼖𖽧 𖼺𖽪𖾐 𖼷𖽑𖽻𖾐 𖼂𖽔𖾐 𖼳𖽡𖾐 𖼖𖽦， 28 𖼽𖽻 𖼈𖽳𖾐 𖼖𖽙 𖼀𖽙𖾐 𖼄𖽡𖽻 𖼐𖽑𖽡、𖼺𖽡𖾑、𖼺𖽡𖾑 𖼊𖽻 𖼖𖽻、𖼐𖽑𖽡𖾑 𖼦𖽑𖽻 𖼈𖽺𖾐 𖼮𖽑𖽡𖽪𖾐 𖼺𖽪𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐、𖼳𖽙𖾐、𖼻𖽪𖾐、𖼳𖽙𖾐 𖼄𖽶𖾐、𖼖𖽪𖾐 𖼊𖽑𖽧 𖼖𖽻𖾐 𖼺𖽪𖾐 𖼳𖽙𖾐、𖼐𖽚𖾐、𖼐𖽚𖾐 𖼐𖽑𖽡𖾐、𖼖𖽪𖾐 𖼊𖽑𖽧 𖼖𖽻𖾐 𖼺𖽪𖾐 𖼐𖽚𖾐、 29 𖼀𖽨 𖼈𖽡𖾐、𖼀𖽕𖾑 𖼮𖽸𖾐 𖼷𖽑𖽳𖾐、𖼽𖽻𖾐 𖼐𖽺𖾐 𖼀𖽕𖾑 𖼮𖽸𖾐 𖼈𖽡𖾐 𖼂𖽺𖾐 𖼺𖽪𖾐 𖽃𖽔𖾑 𖼂𖽻𖾐 𖼦𖽑𖽙𖾐 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼞𖽜 𖼷𖽙，𖼞𖽪𖾐 𖼮𖽡𖽺𖾐 𖼽𖽻 𖼈𖽳𖾐 𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽻𖾐 𖼦𖽑𖽔𖾐 𖼮𖽶𖾐 𖼄𖽦，𖼦𖽑𖽔𖾐 𖼮𖽶𖾐 𖽂𖽙 𖼞𖽶𖾐，𖼦𖽑𖽔𖾐 𖼮𖽶𖾐 𖽃𖽔𖾐 𖼮𖽡𖽦𖾐 𖼺𖽧 𖼖𖽡𖾐 𖼷𖽻．”