𖼽𖽔𖾐 𖼳𖽔𖾐 𖼖𖽚 𖼊𖽝 𖼺𖽙𖾐 𖼖𖽙𖾐 𖼄𖽔 𖼊𖽙𖾐
18
1 𖼍𖽕𖾑 𖼈𖽪𖽺𖾑 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼈𖽜𖾐 𖼐𖽦𖾐 𖼺𖽺𖾑，𖼍𖽪𖾐 𖼈𖽪𖾑 𖼷𖽪𖾐 𖼐𖽺𖾐 𖼦𖽑𖽙𖾐 𖼈𖽪𖾑 𖼷𖽪𖾐 𖼺𖽺𖾐 𖼊𖽑𖽧 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼦𖽳． 2 𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼷𖽪𖾐 𖼊𖽑𖽺 𖼹𖽡𖾐 𖼊𖽚𖾐 𖼽𖽡𖾐 𖼰𖽕𖾑 𖼊𖽝 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼷𖽪𖾐 𖼊𖽑𖽺 𖼀𖽜𖾐 𖼺𖽙𖾐 𖼷𖽪𖾐 𖼂𖽺𖾐，𖼺𖽙𖾐 𖼀𖽜𖾐 𖼊𖽑𖽡 𖼀𖽜𖾐 𖼳𖽡 𖼖𖽪 𖼽𖽔 𖼞𖽳𖾐 𖼻𖽙 𖼽𖽱𖾐 𖼽𖽔𖾐 𖼮𖽑𖽢𖾑 𖼦𖽳，𖼺𖽙𖾐 𖼀𖽜𖾐 𖼊𖽑𖽡 𖼀𖽜𖾐 𖼽𖽱𖾐 𖼽𖽔𖾐 𖼞𖽳𖾐 𖼐𖽑𖽳𖾐 𖼄𖽻 𖼽𖽕𖾑 𖼂𖽡 𖼳𖽺𖾐 𖼮𖽑𖽢𖾑 𖼦𖽳，𖼺𖽙𖾐 𖼀𖽜𖾐 𖼊𖽑𖽡 𖼀𖽜𖾐 𖼰𖽡𖽔𖾐 𖼊𖽑𖽴𖾑 𖼺𖽪𖾐 𖼷𖽑𖽻𖾐 𖼽𖽡 𖼊𖽑𖽦𖾑 𖼮𖽑𖽢𖾑 𖼦𖽳．𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼷𖽪𖾐 𖼖𖽙𖾐 𖼀𖽦𖾐：“𖼣𖽙𖾐 𖼖𖽺𖾑 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼊𖽚𖾐 𖼽𖽡𖾐 𖼰𖽕𖾑 𖼊𖽝 𖼊𖽻𖾐．”3 𖼷𖽑𖽻𖾐 𖼷𖽪𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝 𖼽𖽡𖾐 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼈𖽳𖾐 𖼮𖽡𖽪 𖼀𖽑𖽻𖾐 𖼍𖽪𖾐 𖼀𖽦𖾐 𖼖𖽺𖾑，𖼽𖽻 𖼈𖽳𖾐 𖼀𖽑𖽨 𖼐𖽑𖽧 𖼄𖽙𖾐 𖼊𖽑𖽺 𖼍𖽙𖾑 𖼄𖽔 𖼠𖽸𖾑；𖼣𖽙𖾐 𖼈𖽳𖾐 𖼊𖽑𖽡 𖼀𖽑𖽦𖾐 𖼳𖽶𖾐 𖼦𖽑𖽙𖾐 𖼀𖽦𖾐 𖼖𖽺𖾑，𖼽𖽻 𖼈𖽳𖾐 𖼀𖽑𖽨 𖼐𖽑𖽧𖾐 𖼄𖽙𖾐 𖼊𖽑𖽺 𖼍𖽙𖾑 𖼄𖽔 𖼠𖽸𖾑；𖼣𖽙𖾐 𖼈𖽳𖾐 𖼷𖽑𖽻𖾐 𖼊𖽑𖽡 𖼄𖽺 𖼖𖽺𖾑 𖼐𖽑𖽡𖾐 𖼊𖽑𖽡 𖼽𖽚𖾐 𖼖𖽙𖾐 𖼍𖽺𖾑 𖼀𖽑𖽶．𖽃𖽔𖾐 𖼺𖽺𖾑，𖼐𖽑𖽡𖾐 𖼖𖽪𖾐 𖼞𖽑𖽶𖾐 𖼮𖽻𖾐 𖼍𖽳𖾐 𖼖𖽡𖾐，𖼣𖽙𖾐 𖼈𖽳𖾐 𖼊𖽑𖽺 𖼂𖽻𖾐 𖼖𖽡𖾐 𖼀𖽦𖾐 𖼞𖽑𖽶𖾑 𖼮𖽶𖾐 𖼺𖽺𖾑 𖼖𖽻𖾐 𖼍𖽺𖾑 𖼻𖽻𖾐．”
4 𖼈𖽪𖾐 𖼍𖽦 𖼽𖽻 𖼈𖽳𖾐 𖼊𖽑𖽺 𖼊𖽻 𖼞𖽑𖽚：“𖼐𖽑𖽡𖾐 𖼈𖽳𖾐 𖼊𖽡 𖼮𖽑𖽻 𖽃𖽔 𖼊𖽺𖾐 𖼂𖽺𖾐 𖼺𖽺𖾑 𖼹𖽳𖾐，𖼣𖽙𖾐 𖼞𖽑𖽶𖾑 𖼻𖽻𖾐 𖼂𖽺𖾐 𖼊𖽻𖾐！” 𖽃𖽔𖾐 𖼺𖽺𖾑，𖼈𖽪𖾐 𖼍𖽦 𖼖𖽻𖾐 𖼖𖽪𖾐 𖽃𖽔𖾑 𖼊𖽪 𖼀𖽙 𖼮𖽑𖽶𖾐 𖼞𖽳𖾐 𖼦𖽑𖽡𖽚，𖼷𖽑𖽻𖾐 𖼷𖽪𖾐 𖼦𖽑𖽙𖾐 𖼽𖽚𖾐 𖼊𖽑𖽡 𖼷𖽪𖾐，𖼍𖽪𖾐 𖼽𖽚𖾐 𖼊𖽑𖽡 𖼷𖽪𖾐 𖼐𖽺𖾐 𖼊𖽚𖾐 𖼽𖽡𖾐 𖼦𖽑𖽙𖾐．
5 𖼈𖽪𖾐 𖼍𖽦 𖼽𖽻 𖼞𖽳𖾐 𖼄𖽦 𖼈𖽪𖾑 𖼷𖽪𖾐 𖼽𖽱𖾐 𖼽𖽔𖾐、𖼽𖽕𖾑 𖼂𖽡 𖼳𖽺𖾐 𖼐𖽺𖾐 𖼽𖽡 𖼊𖽑𖽦𖾑 𖼊𖽑𖽺 𖼄𖽪𖾑 𖼍𖽴𖾑，𖼀𖽦𖾐：“𖼐𖽑𖽡𖾐 𖼈𖽳𖾐 𖼣𖽙𖾐 𖼖𖽙𖾐 𖼀𖽙𖾐 𖼺𖽺𖾑，𖼣𖽙𖾐 𖼻𖽙 𖼽𖽔𖾐 𖼳𖽔𖾐 𖼖𖽚 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼞𖽜．” 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼀𖽙𖾐 𖼺𖽺𖾑，𖼈𖽪𖾐 𖼍𖽦 𖼄𖽦 𖼈𖽪𖾑 𖼷𖽪𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼊𖽻 𖼂𖽪𖾑，𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼊𖽻 𖼮𖽨 𖼦𖽑𖽻𖾐．
6 𖼷𖽑𖽻𖾐 𖼷𖽪𖾐 𖼊𖽚𖾐 𖼽𖽡𖾐 𖼄𖽡𖾐 𖼳𖽡𖽻𖾐 𖼀𖽙 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦，𖼞𖽑𖽶𖾑 𖼽𖽡 𖼇𖽕 𖼖𖽡𖽦 𖼄𖽡𖾐 𖼊𖽺𖾐 𖼞𖽳𖾐 𖼺𖽧𖾐 𖼠𖽶𖾑 𖼖𖽶𖾐 𖼍𖽡𖾐 𖼞𖽑𖽶𖾐 𖼣𖽻𖾐． 7 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽝 𖼍𖽕𖾑 𖼈𖽪𖽺𖾑 𖼞𖽳𖾐 𖼄𖽦 𖼀𖽑𖽙 𖼖𖽙𖾐 𖼄𖽔 𖼊𖽙𖾐，𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼺𖽦 𖼦𖽑𖽙𖾐 𖼺𖽪𖾐 𖼷𖽑𖽻𖾐 𖼦𖽑𖽔𖾐 𖼮𖽶𖾐 𖼄𖽨，𖼄𖽳𖾑 𖼄𖽳 𖼐𖽑𖽡 𖼄𖽺 𖼮𖽻𖾐． 8 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼰𖽕𖾑 𖼊𖽝 𖼖𖽡𖾐 𖼮𖽑𖽡𖾐 𖼖𖽡𖾐 𖼣𖽴 𖼞𖽳𖾐 𖼽𖽡𖾐，𖼺𖽧𖾐 𖼠𖽶𖾑 𖼖𖽶𖾐 𖼍𖽡𖾐 𖼞𖽑𖽶𖾐 𖼈𖽡𖾑 𖼞𖽑𖽙 𖼷𖽶𖾐 𖼺𖽺𖾑 𖼳𖽶𖾐 𖼦𖽑𖽙𖾐 𖼺𖽪𖾐 𖼷𖽑𖽻𖾐，𖼞𖽶𖾑𖽑 𖽃𖽔𖾑 𖼊𖽑𖽙 𖼮𖽑𖽢𖾑 𖼺𖽦 𖼳𖽶𖾐 𖼺𖽪𖾐 𖼷𖽑𖽻𖾐 𖼄𖽨𖾐 𖼄𖽔 𖼷𖽑𖽶𖾐．
𖼽𖽔𖾐 𖼳𖽔𖾐 𖼖𖽚 𖼳𖽶𖾐 𖼦𖽑𖽙𖾐
9 𖼽𖽔𖾐 𖼳𖽔𖾐 𖼖𖽚 𖼊𖽺𖾐 𖼊𖽺𖾐 𖼍𖽕𖾑 𖼈𖽪𖽺𖾑 𖼞𖽳𖾐 𖼄𖽦 𖼀𖽑𖽙 𖼊𖽑𖽺 𖼷𖽶𖾐 𖼄𖽳𖾐．𖼞𖽑𖽶𖾑 𖼮𖽶𖾐 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼹𖽶𖾐 𖼷𖽳 𖼍𖽳𖾐，𖼺𖽧𖾐 𖼠𖽕𖾑 𖼦𖽑𖽔𖾐 𖼮𖽶𖾐 𖼄𖽨 𖼺𖽪𖾐 𖼺𖽧𖾐 𖼈𖽳 𖼊𖽑𖽡 𖼷𖽡𖾐 𖼞𖽑𖽶𖾐 𖼠𖽚 𖼽𖽡𖾐，𖼽𖽔𖾐 𖼳𖽔𖾐 𖼖𖽚 𖼈𖽪𖾑 𖼷𖽑𖽜𖾐 𖼖𖽧𖾐 𖼺𖽧𖾐 𖼠𖽕𖾑 𖼊𖽑𖽺 𖼍𖽡 𖼺𖽺𖾑，𖼽𖽻 𖼊𖽑𖽺 𖼞𖽑𖽶𖾑 𖼠𖽻𖾐 𖼠𖽕𖾑 𖼍𖽳𖾐，𖼖𖽙𖾐 𖼹𖽶𖾐 𖼰𖽡𖽴 𖼍𖽪𖾐 𖼽𖽡𖾐 𖼦𖽑𖽙𖾐． 10 𖼷𖽑𖽻𖾐 𖼊𖽑𖽡 𖼽𖽚𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼽𖽡𖾐 𖼽𖽱𖾐 𖼽𖽔𖾐 𖼖𖽙𖾐 𖼀𖽦𖾐 𖼊𖽑𖽧：“𖼣𖽙𖾐 𖼐𖽦𖾐 𖼄𖽡𖽻𖾐，𖼽𖽔𖾐 𖼳𖽔𖾐 𖼖𖽚 𖼺𖽧𖾐 𖼈𖽳 𖼷𖽡𖾐 𖼊𖽑𖽺 𖼠𖽕𖾑 𖼍𖽳𖾐．”
11 𖼽𖽱𖾐 𖼽𖽔𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼐𖽦𖾐 𖼄𖽡𖽻𖾐 𖼦𖽑𖽻𖾐，𖽃𖽔𖾐 𖼹𖽻𖾐 𖼽𖽻 𖼊𖽑𖽺 𖼄𖽔 𖼺𖽦 𖼄𖽡𖾑 𖼐𖽦𖾐 𖼀𖽙 𖼀𖽜 𖼐𖽺𖾑？ 𖼐𖽑𖽡𖾐 𖼺𖽦 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼀𖽑𖽨𖾐 𖼷𖽑𖽡𖾐 𖼀𖽑𖽡 𖼐𖽺𖾐 𖼮𖽡𖾐 𖼮𖽡𖽪 𖼳𖽡𖽦𖾐 𖼊𖽑𖽡 𖼰𖽴𖾐 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐．”
12 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼽𖽱𖾐 𖼽𖽔 𖼊𖽑𖽺 𖼊𖽻 𖼞𖽑𖽚，𖼀𖽦𖾐：“𖼐𖽑𖽡𖾐 𖼀𖽑𖽨𖾐 𖼊𖽑𖽡 𖼍𖽪𖾐 𖼀𖽑𖽡 𖼈𖽺𖾐 𖼣𖽙𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽡𖽺𖾐 𖼀𖽦𖾐 𖼖𖽺𖾑，𖼣𖽙𖾐 𖼈𖽪𖾐 𖼍𖽦 𖼞𖽳𖾐 𖼻𖽙 𖼊𖽑𖽺 𖼺𖽦 𖼄𖽔 𖼂𖽡𖾑．𖼞𖽪𖾐 𖼮𖽡𖽺𖾐 𖼣𖽙𖾐 𖼈𖽳𖾐 𖼊𖽻 𖼮𖽨 𖼦𖽑𖽻𖾐，𖼈𖽪𖾐 𖼍𖽦 𖼞𖽑𖽻𖾑 𖼐𖽑𖽡𖾐 𖼐𖽺𖾐 𖼽𖽕𖾑 𖼂𖽡 𖼳𖽺𖾐、𖼽𖽡 𖼊𖽑𖽦𖾑 𖼊𖽑𖽺 𖼄𖽪𖾑 𖼍𖽴𖾑，𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼣𖽙𖾐 𖼖𖽙𖾐 𖼀𖽙𖾐 𖼺𖽺𖾑，𖼣𖽙𖾐 𖼻𖽙 𖼽𖽔𖾐 𖼳𖽔𖾐 𖼖𖽚 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼞𖽜 𖼖𖽡𖾐．’ 13 𖼣𖽙𖾐 𖼐𖽑𖽧𖾐 𖼈𖽳 𖼄𖽙𖾐 𖼽𖽻 𖼊𖽑𖽺 𖼈𖽪𖾑 𖼠𖽻𖾐 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺 𖼊𖽑𖽡 𖼳𖽶 𖼖𖽺𖾑 𖼰𖽳𖾐 𖼮𖽨𖾐 𖼄𖽔 𖼊𖽙𖾐 𖼺𖽪𖾐 𖼣𖽻𖾐，𖼞𖽑𖽶𖾑 𖼮𖽶𖾐 𖼐𖽑𖽡𖾐 𖼖𖽺𖾑 𖼣𖽙𖾐 𖼖𖽙𖾐 𖼂𖽻𖾐 𖼄𖽔 𖼠𖽸𖾑 𖼊𖽻𖾐．”
14 𖼽𖽱𖾐 𖼽𖽔𖾐 𖼀𖽦𖾐：“𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼦𖽑𖽺𖾑 𖼻𖽻𖾐 𖼍𖽻𖾐 𖼞𖽙𖾐 𖼄𖽔 𖼄𖽳𖾐．” 𖽃𖽔𖾐 𖼺𖽺𖾑 𖼽𖽻 𖼂𖽨𖾐 𖼹𖽶 𖼐𖽑𖽡𖽪𖾑 𖼺𖽪𖾐 𖼺𖽙𖾐 𖼂𖽻𖾐 𖼈𖽺𖾐 𖼂𖽡𖾐 𖼽𖽡𖾐，𖼽𖽔𖾐 𖼳𖽔𖾐 𖼖𖽚 𖼺𖽧𖾐 𖼈𖽳 𖼷𖽡𖾐 𖼊𖽑𖽺 𖼠𖽕𖾑，𖼠𖽙𖾑 𖼍𖽳𖾐 𖼺𖽺 𖼹𖽦𖾐 𖼽𖽻 𖼐𖽑𖽧𖾐 𖼄𖽙𖾐 𖼊𖽑𖽺 𖼰𖽶𖾑 𖼊𖽪𖾐 𖼦𖽑𖽙𖾐． 15 𖼽𖽱𖾐 𖼽𖽔𖾐 𖼖𖽙𖾐 𖼀𖽙𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼷𖽑𖽻𖾐 𖼖𖽦𖾑 𖼻𖽙 𖼞𖽑𖽶𖾑 𖼷𖽑𖽡𖾐 𖼽𖽚𖾐，𖼽𖽔𖾐 𖼳𖽔𖾐 𖼖𖽚 𖼊𖽑𖽺 𖼰𖽻𖾑 𖼍𖽡，𖼽𖽻 𖼊𖽑𖽺 𖼺𖽦 𖼳𖽶𖾐 𖼦𖽑𖽙𖾐．
16 𖼽𖽱𖾐 𖼽𖽔𖾐 𖼽𖽻𖾐 𖼮𖽑𖽡𖽪𖾐 𖼄𖽸𖾐 𖼺𖽺𖾑，𖼷𖽑𖽻𖾐 𖼷𖽪𖾐 𖼀𖽑𖽚𖾐 𖼞𖽚 𖼖𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽔 𖼞𖽕 𖼽𖽡𖾐，𖼞𖽪𖾐 𖼮𖽡𖽺𖾐 𖼽𖽱𖾐 𖼽𖽔𖾐 𖼷𖽑𖽻𖾐 𖼷𖽪𖾐 𖼊𖽑𖽺 𖼀𖽨 𖼮𖽳 𖼍𖽡． 17 𖼽𖽻 𖼈𖽳𖾐 𖼽𖽔𖾐 𖼳𖽔𖾐 𖼖𖽚 𖼞𖽶𖾐 𖼮𖽑𖽶 𖼈𖽦𖾑 𖼍𖽪𖾐 𖼖𖽻𖾐 𖼺𖽺𖾑，𖼷𖽴𖾐 𖼺𖽧𖾐 𖼠𖽶𖾑 𖼖𖽶𖾐 𖼍𖽡𖾐 𖼞𖽳𖾐 𖼄𖽡𖾑 𖼊𖽪 𖼈𖽳 𖼊𖽑𖽡 𖼊𖽝𖾐 𖼞𖽑𖽶𖾐 𖼹𖽺𖾐，𖼹𖽦𖾑 𖼞𖽑𖽶𖾑 𖼊𖽑𖽺 𖼖𖽚𖾐 𖼄𖽙𖾐 𖼊𖽑𖽡 𖼂𖽜𖾐 𖼄𖽙𖾐 𖼂𖽜𖾐 𖼍𖽪𖾐．𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽡𖽪 𖼀𖽑𖽻𖾐 𖼍𖽪𖾐 𖼺𖽺𖾑，𖼀𖽑𖽚𖾐 𖼽𖽻 𖼄𖽳𖾑 𖽃𖽔𖾑 𖼞𖽑𖽶𖾐 𖼞𖽚 𖼽𖽡𖾐 𖼦𖽑𖽙𖾐．
18 𖼽𖽔𖾐 𖼳𖽔𖾐 𖼖𖽚 𖼮𖽻𖾐 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐，𖼽𖽻 𖼈𖽪𖾐 𖼍𖽦 𖼖𖽻𖾐 𖼞𖽑𖽪 𖼞𖽳𖾐 𖼽𖽻 𖼄𖽳𖾑 𖼄𖽡𖾐 𖼊𖽻 𖼊𖽑𖽺 𖼦𖽙𖾑 𖼮𖽑𖽡 𖼖𖽡𖾐 𖼖𖽙𖾐 𖼀𖽙𖾐 𖼖𖽚𖾐 𖼀𖽳𖾐 𖼊𖽑𖽡 𖼊𖽝𖾐 𖼍𖽳𖾐 𖼍𖽙𖾑，𖼞𖽪𖾐 𖼮𖽡𖽺𖾐 𖼽𖽻 𖼀𖽦𖾐：“𖼣𖽙𖾐 𖼻𖽙 𖼣𖽙𖾐 𖼄𖽡𖾐 𖼊𖽑𖽺 𖼦𖽙𖾑 𖼮𖽑𖽡 𖼄𖽔 𖼠𖽸𖾑 𖼊𖽻𖾐．” 𖽃𖽔𖾐 𖼺𖽺𖾑，𖼽𖽻 𖼄𖽡𖾐 𖼻𖽜 𖼖𖽚𖾐 𖼀𖽳𖾐 𖼞𖽑𖽶𖾑 𖼊𖽝𖾐 𖼊𖽑𖽺 𖼄𖽡𖾐 𖼞𖽜，𖼷𖽑𖽻𖾐 𖼖𖽺𖾑 𖼖𖽚𖾐 𖼀𖽳𖾐 𖼊𖽑𖽺 “ 𖼽𖽔𖾐 𖼳𖽔𖾐 𖼖𖽚 𖼖𖽚𖾐 𖼀𖽳𖾐 ” 𖽃𖽶𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐．
𖼷𖽑𖽻𖾐 𖼐𖽑𖽡 𖼽𖽚𖾐 𖼰𖽕𖾑 𖼊𖽝 𖼄𖽡𖽻 𖼀𖽦𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼊𖽑𖽧
19 𖼺𖽔 𖼍𖽮 𖼞𖽳𖾐 𖼻𖽙 𖼽𖽕𖾑 𖼳𖽡𖾐 𖼄𖽔 𖼺𖽶𖾐 𖼽𖽱𖾐 𖼽𖽔𖾐 𖼖𖽙𖾐 𖼀𖽦𖾐：“𖼣𖽙𖾐 𖼞𖽜 𖼰𖽡𖽴 𖼂𖽡𖾐 𖼽𖽡𖾐 𖼈𖽪𖾐 𖼍𖽦 𖼖𖽙𖾐 𖼀𖽦𖾐 𖼊𖽑𖽧，𖼽𖽺𖾐 𖼦𖽴 𖼦𖽫 𖼮𖽡𖾐 𖼂𖽦𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼽𖽻 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐 𖼦𖽑𖽻𖾐．”
20 𖼽𖽱𖾐 𖼽𖽔𖾐 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽙𖾑 𖼐𖽑𖽡𖾐 𖽂𖽙𖾐 𖼀𖽦𖾐 𖼽𖽡𖾐 𖼄𖽔 𖼊𖽙𖾐，𖼠𖽙𖾑 𖼍𖽻𖾐 𖼺𖽺𖾑 𖽂𖽙𖾐 𖼽𖽡𖾐 𖼊𖽙𖾐．𖼐𖽑𖽡𖾐 𖽃𖽙𖾑 𖼐𖽑𖽡𖾐 𖽂𖽙𖾐 𖼽𖽡𖾐 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼈𖽪𖾐 𖼍𖽦 𖼞𖽳𖾐 𖼻𖽙 𖽃𖽙𖾑 𖼐𖽑𖽡𖾐 𖼳𖽶𖾐 𖼦𖽑𖽙𖾐．”
21 𖽃𖽔𖾐 𖼺𖽺𖾑，𖼽𖽱𖾐 𖼽𖽔𖾐 𖼠𖽪 𖼳𖽸 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽡𖾐 𖼺𖽺𖾑 𖼐𖽑𖽡𖾐 𖼞𖽑𖽙𖾐 𖼄𖽡𖽻𖾐 𖼺𖽪𖾐 𖼀𖽦𖾐 𖼈𖽪𖾐 𖼍𖽦 𖼊𖽑𖽺 𖼰𖽨𖾐！” 𖼠𖽪 𖼳𖽸 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽱𖾐 𖼽𖽔𖾐 𖼊𖽑𖽺 𖼊𖽑𖽴 𖼺𖽺𖾑 𖼰𖽡𖽴 𖼂𖽡𖾐 𖼽𖽡𖾐 𖼦𖽑𖽙𖾐．
22 𖼺𖽔 𖼍𖽮 𖼞𖽳𖾐 𖼻𖽙 𖼽𖽕𖾑 𖼳𖽡𖾐 𖼄𖽔 𖼺𖽶𖾐 𖼹𖽦𖾑 𖼽𖽱𖾐 𖼽𖽔𖾐 𖼖𖽙𖾐 𖼀𖽦𖾐：“𖽃𖽔 𖼊𖽺𖾐 𖼣𖽻𖾐 𖼦𖽻，𖼣𖽙𖾐 𖼞𖽜 𖼠𖽪 𖼳𖽸 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽙𖾐 𖼮𖽑𖽻𖾐 𖽂𖽙𖾐 𖼰𖽡𖽴 𖼂𖽡𖾐 𖼽𖽡𖾐 𖼊𖽙𖾐 𖼖𖽡𖾐．”
𖼽𖽱𖾐 𖼽𖽔𖾐 𖼀𖽦𖾐：“𖼣𖽙𖾐 𖼻𖽙 𖽃𖽔𖾐！𖼐𖽑𖽡𖾐 𖼰𖽡𖽴 𖼂𖽡𖾐 𖼽𖽡𖾐 𖽃𖽔 𖼊𖽺𖾑 𖼂𖽺𖾐 𖼐𖽺𖾑？ 𖼐𖽑𖽡𖾐𖼀𖽦𖾐 𖼊𖽑𖽧 𖼞𖽳𖾐 𖼷𖽻 𖼀𖽜𖾐 𖼊𖽑𖽡 𖼳𖽶 𖼖𖽺𖾑 𖽂𖽙𖾐 𖼄𖽔 𖼊𖽙𖾐 𖼊𖽻𖾐．”
23 𖼽𖽕𖾑 𖼳𖽡𖾐 𖼄𖽔 𖼺𖽶𖾐 𖼀𖽦𖾐：“𖽃𖽔 𖼊𖽺𖾐 𖼣𖽻𖾐 𖼦𖽻，𖼣𖽙𖾐 𖼞𖽜 𖽂𖽙𖾐 𖼰𖽡𖽴 𖼂𖽡𖾐 𖼽𖽡𖾐 𖼊𖽙𖾐 𖼖𖽡𖾐！”
𖽃𖽔𖾐 𖼺𖽺𖾑 𖼽𖽱𖾐 𖼽𖽔𖾐 𖼀𖽦𖾐：“𖼐𖽑𖽡𖾐 𖼰𖽡𖽴 𖼂𖽡𖾐 𖼽𖽡𖾐 𖼄𖽺！” 𖼽𖽕𖾑 𖼳𖽡𖾐 𖼄𖽔 𖼺𖽶𖾐 𖼊𖽺𖾐 𖼠𖽻𖾐 𖼄𖽙𖾐 𖼞𖽳𖾐 𖼮𖽨𖾐 𖼈𖽳 𖼊𖽑𖽺 𖼮𖽑𖽻𖾐 𖼰𖽡𖽴 𖼂𖽡𖾐 𖼽𖽡𖾐，𖼽𖽻 𖼠𖽪 𖼳𖽸 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖽃𖽙𖾑 𖼄𖽺 𖼀𖽳 𖼖𖽻𖾑 𖼽𖽡𖾐 𖼦𖽑𖽙𖾐．
24 𖼞𖽑𖽶𖾑 𖼮𖽶𖾐，𖼍𖽕𖾑 𖼈𖽪𖽺𖾑 𖼖𖽪𖾐 𖽃𖽔𖾑 𖼊𖽪 𖼠𖽻𖾐 𖼊𖽑𖽺 𖼞𖽳𖾐 𖼊𖽡𖾐 𖼍𖽳𖾐，𖼐𖽦𖾐 𖼳𖽪𖾐 𖼺𖽪𖾐 𖼷𖽑𖽻𖾐 𖼦𖽑𖽺𖾐 𖼀𖽶𖾐 𖼊𖽑𖽺 𖼊𖽦𖾐 𖼽𖽡𖾐，𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼐𖽦𖾐 𖼄𖽡𖽻𖾐，𖼷𖽑𖽻𖾐 𖼊𖽑𖽡 𖼽𖽚𖾐 𖼰𖽡𖽴 𖼂𖽻𖾐 𖼖𖽻𖾐． 25 𖼐𖽦𖾐 𖼳𖽪𖾐 𖼺𖽪𖾐 𖼷𖽑𖽻𖾐 𖽃𖽶𖾐 𖼮𖽸，𖼄𖽡𖽻 𖼦𖽑𖽺𖾑 𖼀𖽦𖾐 𖼈𖽪𖾐 𖼍𖽦 𖼖𖽙𖾐 𖼰𖽨𖾐．𖼈𖽪𖾐 𖼍𖽦 𖼀𖽦𖾐：“𖼽𖽻 𖼊𖽑𖽡 𖼽𖽚𖾐 𖼍𖽺𖾑 𖼣𖽻𖾐 𖼊𖽑𖽡𖾑 𖼣𖽻𖾐，𖼄𖽡𖽻 𖼮𖽨𖾐 𖼀𖽦𖾐 𖼊𖽑𖽧 𖼖𖽻𖾐 𖼺𖽪𖾐 𖼣𖽻𖾐．”
𖼷𖽑𖽻𖾐 𖼞𖽑𖽶𖾑 𖼽𖽚𖾐 𖽂𖽙𖾐 𖼰𖽡𖽴 𖽂𖽙𖾐 𖼐𖽳 𖼖𖽻𖾐． 26 𖼠𖽙𖾑 𖼍𖽻𖾐，𖼐𖽦𖾐 𖼳𖽪𖾐 𖼺𖽪𖾐 𖼷𖽑𖽻𖾐 𖼹𖽦𖾑 𖼠𖽳𖾐 𖼖𖽪𖾐 𖼊𖽑𖽡 𖼽𖽚𖾐 𖼰𖽡𖽴 𖼂𖽻𖾐 𖼖𖽻𖾐 𖼞𖽳𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼖𖽪𖾐 𖽃𖽔𖾑 𖼊𖽪 𖼳𖽪𖾐 𖼺𖽪𖾐 𖼊𖽑𖽺 𖽃𖽶𖾐 𖼮𖽸，𖼀𖽦𖾐：“𖼐𖽦𖾐 𖼄𖽺！𖼹𖽦𖾑 𖼷𖽑𖽻𖾐 𖼊𖽑𖽡 𖼽𖽚𖾐 𖼰𖽡𖽴 𖼂𖽻𖾐 𖼖𖽻𖾐 𖼺𖽺！”
𖼈𖽪𖾐 𖼍𖽦 𖼀𖽦𖾐：“𖼦𖽑𖽺𖾑 𖼽𖽚𖾐 𖼖𖽺𖾑 𖼷𖽑𖽜𖾑 𖼷𖽑𖽜𖾐 𖼄𖽡𖽻 𖼮𖽨𖾐 𖼀𖽦𖾐 𖼊𖽑𖽧 𖼖𖽻𖾐 𖼺𖽪𖾐 𖼣𖽻𖾐．”
27 𖼐𖽦𖾐 𖼳𖽪𖾐 𖼺𖽪𖾐 𖼀𖽦𖾐：“𖼣𖽙𖾐 𖼐𖽦𖾐 𖼂𖽻𖾐 𖼖𖽻𖾐，𖽃𖽙𖾑 𖼄𖽺 𖼰𖽡𖽴 𖼂𖽻𖾐 𖼖𖽻𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼺𖽔 𖼍𖽮 𖼞𖽳𖾐 𖼻𖽙 𖼽𖽕𖾑 𖼳𖽡𖾐 𖼄𖽔 𖼺𖽶𖾐 𖼖𖽙𖾐 𖼺𖽶𖾑．” 𖼈𖽪𖾐 𖼍𖽦 𖼀𖽦𖾐：“𖼽𖽻 𖼷𖽑𖽻𖾐 𖼹𖽳𖾐 𖼊𖽑𖽡 𖼽𖽚𖾐 𖼣𖽻𖾐，𖼷𖽑𖽜𖾑 𖼷𖽑𖽜𖾐 𖼄𖽡𖽻 𖼮𖽨𖾐 𖼀𖽦𖾐 𖼊𖽑𖽧 𖼖𖽻𖾐 𖼺𖽪𖾐 𖼣𖽻𖾐．”
28 𖼽𖽕𖾑 𖼳𖽡𖾐 𖼄𖽔 𖼺𖽶𖾐 𖼈𖽪𖾐 𖼍𖽦 𖼊𖽑𖽺 𖽃𖽶𖾐 𖼺𖽺𖾑，𖼀𖽦𖾐：“𖼺𖽙𖾑 𖼺𖽙𖾐 𖼮𖽻𖾐！” 𖼀𖽦𖾐 𖼦𖽑𖽻𖾐 𖼺𖽺𖾑 𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐 𖼈𖽪𖾐 𖼍𖽦 𖼊𖽑𖽺 𖼊𖽑𖽴，𖼀𖽦𖾐：“𖼐𖽑𖽡𖾐 𖼞𖽳𖾐 𖼺𖽡 𖼀𖽑𖽙 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽶𖾑 𖼞𖽑𖽪𖾐 𖼮𖽑𖽳 𖼷𖽻 𖼺𖽪𖾐 𖼣𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖼣𖽙𖾐 𖼺𖽡 𖼀𖽑𖽙 𖼣𖽙𖾐 𖼈𖽪𖾐 𖼍𖽦 𖼊𖽑𖽺 𖼊𖽝 𖼊𖽦 𖼖𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽡𖽻𖾐 𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼦𖽑𖽻𖾐！”
29 𖼈𖽪𖾐 𖼍𖽦 𖼊𖽻 𖼐𖽙𖾐：“𖼣𖽙𖾐 𖼻𖽙 𖼽𖽔𖾐 𖼳𖽔𖾐 𖼖𖽚 𖼺𖽙𖾑 𖼺𖽙𖾐 𖼮𖽻𖾐 𖼮𖽻𖾐？”
𖼽𖽕𖾑 𖼳𖽡𖾐 𖼄𖽔 𖼺𖽶𖾐 𖼊𖽻 𖼞𖽑𖽚：“𖼽𖽱𖾐 𖼽𖽔𖾐 𖼣𖽙𖾐 𖼊𖽑𖽺 𖼹𖽡𖾐 𖼊𖽑𖽧 𖼖𖽻𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼽𖽻 𖼈𖽳𖾐 𖼦𖽻𖾐 𖼊𖽦 𖼞𖽳𖾐 𖼐𖽦𖾐 𖼄𖽡𖽻𖾐，𖽃𖽔 𖼊𖽺𖾑 𖼳𖽶 𖼄𖽡𖽻 𖼣𖽻𖾐 𖼣𖽙𖾐 𖼄𖽔 𖼺𖽝𖾑．”
30 𖼈𖽪𖾐 𖼍𖽦 𖼀𖽦𖾐：“𖼐𖽑𖽡𖾐 𖼀𖽑𖽚𖾐 𖼊𖽑𖽡 𖼀𖽳 𖼄𖽻𖾑 𖼦𖽑𖽡𖽚 𖼽𖽡𖾐！” 𖽃𖽔𖾐 𖼺𖽺𖾑 𖼽𖽻 𖼀𖽑𖽚𖾐 𖼊𖽑𖽡 𖼀𖽳 𖼦𖽑𖽡𖽚 𖼽𖽡𖾐．
𖼍𖽕𖾑 𖼈𖽪𖽺𖾑 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪 𖼣𖽶𖾐
31 𖼠𖽪 𖼳𖽸 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽺𖾑 𖼮𖽑𖽡𖾐 𖼖𖽻𖾐，𖼽𖽻 𖼀𖽦𖾐：“𖼣𖽙𖾐 𖼄𖽡𖽻 𖼹𖽳𖾐 𖼀𖽦𖾐 𖼣𖽙𖾐 𖼺𖽡 𖼀𖽑𖽙 𖼣𖽙𖾐 𖼈𖽪𖾐 𖼍𖽦 𖼖𖽙𖾐 𖼊𖽑𖽧 𖼖𖽚𖾐 𖼂𖽚𖾐 𖼮𖽻𖾐，𖽃𖽙𖾑 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼞𖽑𖽻𖾑 𖼐𖽑𖽡𖾐 𖼊𖽑𖽺 𖼊𖽝 𖼊𖽦 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼐𖽑𖽡𖾐 𖼊𖽑𖽺 𖼰𖽨𖾑 𖼊𖽧 𖼖𖽻𖾐 𖼦𖽑𖽙𖾐！”
32 𖼈𖽪𖾐 𖼍𖽦 𖼠𖽪 𖼳𖽸 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼊𖽻 𖼐𖽙𖾐：“𖼣𖽙𖾐 𖼻𖽙 𖼽𖽔𖾐 𖼳𖽔𖾐 𖼖𖽚 𖼺𖽙𖾑 𖼺𖽙𖾐 𖼮𖽻𖾐 𖼮𖽻𖾐？”
𖼠𖽪 𖼳𖽸 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽻 𖼞𖽑𖽚：“𖼣𖽙𖾐 𖼺𖽡 𖼀𖽑𖽙 𖼣𖽙𖾐 𖼈𖽪𖾐 𖼍𖽦 𖼞𖽳𖾐 𖼮𖽡𖾐 𖼂𖽦𖾐 𖼐𖽺𖾐 𖼐𖽑𖽡𖾐 𖼊𖽑𖽺 𖼊𖽝 𖼊𖽦 𖼖𖽻𖾐 𖼺𖽪𖾐 𖼷𖽑𖽻𖾐，𖼄𖽳𖾑 𖼄𖽳 𖼷𖽑𖽻𖾐 𖼖𖽦𖾑 𖼞𖽑𖽶𖾑 𖼽𖽚𖾐 𖼖𖽙𖾐 𖼺𖽶𖾑 𖼮𖽻𖾐 𖼞𖽜 𖼻𖽻𖾐．”
33 𖼈𖽪𖾐 𖼍𖽦 𖼮𖽑𖽧𖾐 𖼞𖽪 𖼺𖽺𖾑 𖼊𖽑𖽡 𖼞𖽶𖾐 𖼮𖽑𖽶 𖼞𖽴𖾐 𖼍𖽪𖾐 𖼖𖽻𖾐，𖼽𖽻 𖼖𖽪𖾐 𖽃𖽔𖾑 𖼊𖽪 𖼞𖽳𖾐 𖼖𖽜𖾐 𖼊𖽑𖽺 𖼊𖽦𖾐 𖼽𖽡𖾐 𖼣𖽶𖾐．𖼽𖽻 𖽂𖽙𖾐 𖼊𖽦𖾐 𖼽𖽡𖾐 𖽂𖽙𖾐，𖼀𖽦𖾐：“𖼣𖽙𖾐 𖼻𖽙 𖼽𖽔𖾐 𖼳𖽔𖾐 𖼖𖽚 𖽃𖽔𖾐！𖼣𖽙𖾐 𖼻𖽙，𖼣𖽙𖾐 𖼻𖽙 𖼽𖽔𖾐 𖼳𖽔𖾐 𖼖𖽚 𖽃𖽔𖾐！𖼣𖽙𖾐 𖼐𖽑𖽡𖾐 𖼖𖽙𖾐 𖼀𖽙𖾐 𖼳𖽶𖾐 𖼄𖽡𖾐 𖼄𖽔 𖼳𖽚𖾑．𖼽𖽔𖾐 𖼳𖽔𖾐 𖼖𖽚 𖽃𖽔𖾐！𖼣𖽙𖾐 𖼻𖽙，𖼣𖽙𖾐 𖼻𖽙 𖽃𖽔𖾐！”