𖼍𖽕𖾑 𖼈𖽪𖽺𖾑 𖼐𖽺𖾐 𖼳𖽡𖾑 𖼂𖽔𖾐
16
1 𖼍𖽕𖾑 𖼈𖽪𖽺𖾑 𖽂𖽙 𖼰𖽡𖽺𖾐 𖼈𖽪𖾑 𖼖𖽚𖾐 𖼊𖽑𖽺 𖼠𖽚 𖼽𖽡𖾐 𖼍𖽺𖾑 𖼺𖽺 𖼐𖽦𖾐 𖼄𖽡𖽻𖾐，𖼄𖽡 𖼇𖽺𖾐 𖼂𖽙𖾐 𖼳𖽴𖾑 𖼞𖽳𖾐 𖼮𖽜𖾐 𖼀𖽑𖽙 𖼳𖽡𖾑 𖼂𖽔𖾐 𖼖𖽻𖾐 𖼽𖽻 𖽃𖽙𖾑 𖼄𖽺 𖼹𖽶𖾐 𖼖𖽻𖾐，𖼽𖽻 𖼊𖽑𖽳 𖼖𖽳𖾐 𖼄𖽪 𖼐𖽑𖽡 𖼷𖽳 𖼺𖽶𖾐 𖼍𖽳𖾐，𖽃𖽔𖾑 𖼂𖽻𖾐 𖼐𖽑𖽡 𖼦𖽑𖽙𖾐 𖼊𖽝𖾐，𖼺𖽳 𖼖𖽳 𖼊𖽻𖾐 𖼦𖽡𖽳𖾐 𖼊𖽑𖽡 𖼦𖽑𖽙𖾐 𖼂𖽸𖾐，𖼳𖽡𖽺𖾐 𖼞𖽑𖽶𖾐 𖼞𖽳𖾐 𖼺𖽳 𖼄𖽙𖾐 𖼦𖽡𖽳𖾐 𖼊𖽑𖽡 𖼦𖽑𖽙𖾐 𖼂𖽸𖾐 𖼐𖽺𖾐 𖼮𖽶𖾐 𖼀𖽳 𖼊𖽑𖽡 𖼖𖽧𖾑 𖼰𖽡𖽦𖾐 𖼍𖽳𖾐．2 𖼈𖽪𖾐 𖼍𖽦 𖼳𖽡𖾑 𖼂𖽔𖾐 𖼖𖽙𖾐 𖼊𖽻 𖼐𖽙𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼄𖽡𖽻 𖼐𖽑𖽡 𖼦𖽑𖽺𖾑 𖼹𖽻𖾐 𖼈𖽺𖾐 𖼂𖽻𖾐 𖼖𖽻𖾐 𖼐𖽺𖾑？”
𖼳𖽡𖾑 𖼂𖽔𖾐 𖼊𖽻 𖼞𖽑𖽚：“𖼊𖽑𖽳 𖼖𖽳𖾐 𖼄𖽪 𖼦𖽑𖽺𖾑 𖼐𖽑𖽡𖾐 𖼊𖽑𖽡 𖼈𖽴 𖼞𖽜 𖼷𖽳 𖼺𖽪𖾐 𖼣𖽻𖾐，𖽃𖽔𖾑 𖼂𖽻𖾐 𖼐𖽺𖾐 𖼳𖽡𖽺𖾐 𖼞𖽑𖽶𖾐 𖼞𖽳𖾐 𖼺𖽳 𖼄𖽙𖾐 𖼦𖽑𖽺𖾑 𖼷𖽑𖽻𖾐 𖼖𖽦𖾑 𖼻𖽙 𖼞𖽜 𖼷𖽙 𖼺𖽪𖾐 𖼣𖽻𖾐，𖼮𖽶𖾐 𖼀𖽳 𖼦𖽑𖽺𖾑 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐 𖽂𖽙 𖼞𖽶𖾐 𖼺𖽪𖾐 𖼷𖽑𖽻𖾐 𖼞𖽜 𖼊𖽻𖾐 𖼺𖽪𖾐 𖼣𖽻𖾐．”
3 𖼈𖽪𖾐 𖼍𖽦 𖼦𖽑𖽔𖾐 𖼖𖽺𖾑 𖼊𖽻 𖼐𖽙𖾐：“𖼐𖽑𖽡𖾐 𖼺𖽡 𖼀𖽑𖽙 𖼞𖽳𖾐 𖼖𖽡𖾑 𖼂𖽙𖾑 𖼄𖽡 𖼇𖽺𖾐 𖼂𖽙𖾐 𖼳𖽴𖾑 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼐𖽺𖾑？”
𖼳𖽡𖾑 𖼂𖽔𖾐 𖼈𖽪𖾐 𖼍𖽦 𖼊𖽑𖽺 𖼊𖽻 𖼞𖽑𖽚：“𖼽𖽻 𖼽𖽺𖾐 𖼖𖽪𖾑 𖼺𖽔 𖼺𖽜 𖼖𖽪𖾐 𖼞𖽳𖾐 𖼮𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖼊𖽡 𖼮𖽑𖽻：‘ 𖽃𖽙𖾑 𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼈𖽴 𖼣𖽻𖾐 𖼀𖽙 𖼺𖽻 𖼖𖽚 𖼞𖽳𖾐 𖼠𖽚 𖼀𖽑𖽨 𖼣𖽙𖾐 𖼊𖽑𖽺 𖼞𖽑𖽚 𖼞𖽜 𖼊𖽻𖾐．’”
4 𖼈𖽪𖾐 𖼍𖽦 𖼳𖽡𖾑 𖼂𖽔𖾐 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！𖼄𖽡 𖼇𖽺𖾐 𖼂𖽙𖾐 𖼳𖽴𖾑 𖼞𖽑𖽙𖾐 𖼮𖽻𖾐 𖼺𖽪𖾐，𖼄𖽳𖾑 𖼄𖽳 𖼐𖽑𖽡𖾐 𖼊𖽑𖽺 𖼞𖽜 𖼻𖽻𖾐．”
𖼳𖽡𖾑 𖼂𖽔𖾐 𖼀𖽦𖾐：“𖼣𖽙𖾐 𖼞𖽳𖾐 𖼺𖽡 𖼀𖽑𖽙 𖼈𖽪𖾐 𖼍𖽦 𖽃𖽔𖾐！𖼣𖽙𖾐 𖼐𖽑𖽡𖾐 𖼊𖽑𖽺 𖼊𖽑𖽴 𖼊𖽻𖾐，𖼣𖽙𖾐 𖼞𖽜 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐 𖼖𖽡𖾐！”
𖼳𖽶𖾑 𖼄𖽺 𖼍𖽕𖾑 𖼈𖽪𖽺𖾑 𖼊𖽑𖽺 𖼮𖽙 𖼰𖽪𖾑
5 𖼍𖽕𖾑 𖼈𖽪𖽺𖾑 𖼖𖽻𖾐 𖼂𖽔𖾐 𖼦𖽪𖾑 𖼖𖽧 𖼮𖽑𖽡𖽦𖾐 𖼠𖽻𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼊𖽑𖽡 𖼽𖽚𖾐 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼊𖽚𖾐 𖼖𖽻𖾐，𖼽𖽻 𖼺𖽻 𖼖𖽚 𖼈𖽴 𖼮𖽑𖽪𖾐 𖼷𖽑𖽻𖾐 𖼰𖽡𖾐 𖼖𖽔𖾐 𖼞𖽳𖾐 𖼻𖽙 𖼳𖽶𖾑 𖼄𖽺 𖼣𖽻𖾐，𖼽𖽻 𖽂𖽙𖾐 𖼊𖽚𖾐 𖼖𖽻𖾐 𖽂𖽙𖾐 𖼮𖽙 𖼰𖽪𖾑． 6 𖼹𖽦𖾑 𖼖𖽚𖾐 𖼄𖽙𖾐 𖼈𖽺𖾐 𖼍𖽕𖾑 𖼈𖽪𖽺𖾑 𖼈𖽪𖾐 𖼍𖽦 𖼐𖽺𖾐 𖼷𖽶 𖼄𖽻 𖼞𖽑𖽙𖾐 𖼣𖽻𖾐 𖼊𖽑𖽺 𖼷𖽴𖾐，𖼞𖽑𖽶𖾑 𖼮𖽶𖾐 𖼷𖽑𖽻𖾐 𖼷𖽪𖾐 𖼐𖽺𖾐 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼄𖽳𖾑 𖼄𖽳 𖼈𖽪𖾐 𖼍𖽦 𖼀𖽙 𖼮𖽑𖽶𖾐 𖼮𖽻𖾐 𖼍𖽳𖾐． 7 𖼳𖽶𖾑 𖼄𖽺 𖼮𖽙 𖼰𖽪𖾑 𖼞𖽑𖽶𖾑 𖼮𖽶𖾐，𖼦𖽑𖽺𖾑 𖼻𖽻𖾐 𖼀𖽦𖾐：“𖼷𖽑𖽻𖾐 𖼺𖽦 𖼺𖽪𖾐 𖼐𖽑𖽡𖾐，𖼊𖽑𖽡 𖼀𖽳 𖼽𖽡𖾐！𖼷𖽑𖽻𖾐 𖼖𖽕𖾐 𖼀𖽕𖾐 𖼐𖽑𖽡𖾐，𖼊𖽑𖽡 𖼀𖽳 𖼽𖽡𖾐！ 8 𖼐𖽑𖽡𖾐 𖼺𖽻 𖼖𖽚 𖼊𖽑𖽡 𖼈𖽴 𖼊𖽑𖽺 𖼺𖽦 𖼦𖽑𖽙𖾐，𖼽𖽻 𖼞𖽳𖾐 𖼷𖽶 𖼊𖽺𖾐 𖼐𖽻𖾑 𖼈𖽪𖾐 𖼍𖽦 𖼂𖽺𖾐，𖼽𖽺𖾐 𖼮𖽑𖽡𖽪𖾑 𖼦𖽑𖽺𖾑 𖼖𖽙𖾐 𖼀𖽙𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖽂𖽙 𖼇𖽕 𖼳𖽶 𖼺𖽪𖾐 𖼣𖽻𖾐，𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼊𖽑𖽺 𖼰𖽡𖽻𖾐 𖼐𖽑𖽡𖾐 𖼻𖽙 𖼽𖽔𖾐 𖼳𖽔𖾐 𖼖𖽚 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼦𖽑𖽻𖾐．𖼐𖽦𖾐 𖼄𖽺！𖽃𖽔𖾑 𖼄𖽳𖾐 𖼐𖽑𖽡𖾐 𖼽𖽻 𖼄𖽳𖾑 𖼷𖽺𖾐 𖼈𖽡𖾑 𖼞𖽑𖽙 𖼰𖽙𖾐 𖽂𖽙𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼦𖽑𖽺𖾑 𖼷𖽑𖽻𖾐 𖼺𖽦 𖼺𖽪𖾐 𖼣𖽻𖾐．”
9 𖼳𖽡 𖼖𖽪 𖼽𖽔 𖼞𖽳𖾐 𖼻𖽙 𖼽𖽕𖾑 𖼂𖽡 𖼳𖽺𖾐 𖼞𖽻𖾑𖽑 𖼈𖽪𖾐 𖼍𖽦 𖼖𖽙𖾐 𖼀𖽦𖾐：“𖽃𖽔𖾐 𖼹𖽻𖾐 𖽃𖽔𖾑 𖼐𖽙 𖼳𖽶𖾐 𖼄𖽻𖾐 𖼦𖽑𖽺𖾑 𖼊𖽝𖾐 𖼞𖽜 𖼺𖽺𖾑，𖼣𖽙𖾐 𖼞𖽳𖾐 𖼺𖽡 𖼀𖽑𖽙、𖼣𖽙𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼮𖽙 𖼰𖽪𖾑 𖼐𖽺𖾑？ 𖼣𖽙𖾐 𖼞𖽜 𖼠𖽚 𖼽𖽡𖾐，𖼽𖽻 𖼈𖽪𖾑 𖼊𖽡𖾐 𖼊𖽝𖾐 𖼹𖽺𖾐 𖼖𖽻𖾐 𖼻𖽻𖾐．”
10 𖼈𖽪𖾐 𖼍𖽦 𖼀𖽦𖾐：“𖼳𖽡 𖼖𖽪 𖼽𖽔𖾐 𖼞𖽳𖾐 𖼻𖽙 𖽃𖽔𖾐！𖼄𖽡𖽻 𖼦𖽺𖾑𖽑 𖼐𖽑𖽡𖾐 𖼈𖽳𖾐 𖼖𖽙𖾐 𖽃𖽔 𖼊𖽺𖾑 𖼳𖽶 𖼮𖽡 𖼠𖽳𖾐 𖼐𖽺𖾑？𖼽𖽺𖾐 𖼦𖽴 𖼦𖽫 𖼽𖽻 𖼊𖽑𖽺 𖼹𖽡𖾐 𖼂𖽻𖾐 𖼖𖽻𖾐 𖼣𖽙𖾐 𖼊𖽑𖽺 𖼮𖽙 𖼰𖽪𖾑 𖼺𖽪𖾐 𖼣𖽻𖾐 𖼊𖽑𖽡𖾑 𖼣𖽻𖾐，𖽃𖽔 𖼺𖽺 𖼹𖽦𖾑 𖼽𖽻 𖼊𖽑𖽺 𖼀𖽦𖾐 𖼂𖽡𖾑：‘ 𖼐𖽑𖽡𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼐𖽺𖾑？’ ”
11 𖼍𖽕𖾑 𖼈𖽪𖽺𖾑 𖼹𖽦𖾑 𖼽𖽕𖾑 𖼂𖽡 𖼳𖽺𖾐 𖼐𖽺𖾐 𖼽𖽻 𖼞𖽳𖾐 𖼷𖽶 𖼄𖽻 𖼞𖽑𖽙𖾐 𖼣𖽻𖾐 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！𖼣𖽙𖾐 𖼻𖽙 𖼖𖽺𖾑 𖼣𖽙𖾐 𖼊𖽑𖽺 𖼈𖽪𖾑 𖼠𖽻𖾐 𖼰𖽻𖾐，𖼂𖽡𖽦𖾑 𖼽𖽔 𖼄𖽡𖽺 𖼺𖽪𖾐 𖼷𖽑𖽻𖾐 𖼠𖽳𖾐 𖼖𖽳𖾐 𖼺𖽺𖾑 𖼀𖽦𖾐 𖼄𖽔 𖼻𖽻𖾐．𖼽𖽻 𖼖𖽙𖾐 𖼮𖽻𖾐，𖼽𖽻 𖼞𖽜 𖼮𖽙 𖼰𖽪𖾑 𖼍𖽳𖾐 𖼻𖽻𖾐，𖼞𖽪𖾐 𖼮𖽡𖽺𖾐 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼽𖽻 𖼊𖽑𖽺 𖼄𖽪𖾑 𖼍𖽴𖾑 𖼺𖽪𖾐 𖼣𖽻𖾐． 12 𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼦𖽴 𖼦𖽫 𖼣𖽙𖾐 𖼞𖽳𖾐 𖼠𖽻𖾐 𖼰𖽡𖽳𖾐 𖼊𖽑𖽺 𖼐𖽦𖾐 𖼄𖽡𖽻𖾐，𖽃𖽙𖾑 𖼐𖽑𖽡𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼣𖽙𖾐 𖼊𖽑𖽺 𖼮𖽙 𖼰𖽪𖾑 𖼖𖽙𖾐 𖼀𖽙𖾐 𖼺𖽺𖾑，𖼮𖽡 𖼽𖽡𖾑 𖼖𖽪 𖼣𖽙𖾐 𖼊𖽑𖽺 𖼄𖽻𖾑 𖼞𖽜 𖼊𖽻𖾐 𖼖𖽡𖾐 𖼷𖽻．” 13 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼹𖽦𖾑 𖼺𖽜 𖽃𖽙𖾑 𖼄𖽺 𖼽𖽡𖾐．𖼳𖽶𖾑 𖼄𖽺 𖼖𖽺𖾑 𖽂𖽙 𖼖𖽻𖾐 𖼂𖽡𖽻𖾐 𖼞𖽳𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼷𖽜𖾐 𖼺𖽜，𖽂𖽙𖾐 𖼺𖽜 𖽂𖽙𖾐 𖼮𖽙 𖼰𖽪𖾑，𖼹𖽦𖾑 𖼖𖽚𖾐 𖼄𖽙𖾐 𖼐𖽺𖾐 𖼐𖽑𖽡𖾑 𖼄𖽶𖾐 𖼈𖽺𖾐 𖼽𖽻 𖼊𖽑𖽺 𖼷𖽴𖾐．
14 𖼠𖽙𖾑 𖼍𖽻𖾐，𖼈𖽪𖾐 𖼍𖽦 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼄𖽡𖾐 𖼊𖽺𖾐 𖼊𖽑𖽡 𖼄𖽦𖾐 𖼞𖽳𖾐 𖼮𖽑𖽡𖾐，𖼄𖽳𖾑 𖼄𖽳 𖽂𖽙 𖼞𖽶𖾐 𖼺𖽺𖾑 𖼞𖽑𖽶𖾑 𖼠𖽻𖾐 𖼐𖽙．
𖼦𖽪𖾑 𖼳𖽺𖾐 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼄𖽡𖽻𖾐 𖼽𖽡𖾐
15 𖼽𖽔𖾐 𖼳𖽔𖾐 𖼖𖽚𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽪𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐，𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼖𖽺𖾑 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼮𖽑𖽻𖾐 𖼍𖽳𖾐． 16 𖼍𖽕𖾑 𖼈𖽪𖽺𖾑 𖼞𖽳𖾐 𖼞𖽙𖾐 𖼮𖽑𖽻 𖼽𖽕𖾑 𖼰𖽡𖾐 𖼺𖽪𖾐 𖼷𖽑𖽻𖾐 𖼦𖽪𖾑 𖼳𖽺𖾐 𖼽𖽡𖾐 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼄𖽡𖽻𖾐 𖼽𖽡𖾐，𖼽𖽻 𖼖𖽙𖾐 𖼀𖽦𖾐：“𖼈𖽪𖾐 𖼍𖽦 𖼞𖽜 𖼻𖽳𖾐 𖼻𖽳𖾐 𖽂𖽙𖾐 𖼮𖽻𖾐 𖼐𖽑𖽧𖾐 𖼺𖽳！𖼈𖽪𖾐 𖼍𖽦 𖼞𖽜 𖼻𖽳𖾐 𖼻𖽳𖾐 𖽂𖽙𖾐 𖼮𖽻𖾐 𖼐𖽑𖽧𖾐 𖼺𖽳！”
17 𖼽𖽔𖾐 𖼳𖽔𖾐 𖼖𖽚 𖼦𖽪𖾑 𖼳𖽺𖾐 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼞𖽙𖾐 𖼮𖽑𖽻 𖼊𖽑𖽺 𖼦𖽑𖽺𖾑 𖼻𖽻𖾐 𖼐𖽙𖾑 𖼣𖽜 𖼺𖽪𖾐 𖼣𖽻𖾐 𖼖𖽔𖾑？ 𖼐𖽑𖽡𖾐 𖽃𖽔𖾐 𖼹𖽻𖾐 𖼐𖽑𖽡𖾐 𖼞𖽙𖾐 𖼮𖽑𖽻 𖼖𖽙𖾐 𖼄𖽔 𖼮𖽑𖽻𖾐 𖼽𖽡𖾐 𖼐𖽺𖾑？”
18 𖼦𖽪𖾑 𖼳𖽺𖾐 𖼽𖽔𖾐 𖼳𖽔𖾐 𖼖𖽚 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖼄𖽔 𖼽𖽡𖾐！𖼽𖽺𖾐 𖼦𖽴 𖼦𖽫 𖼐𖽺𖾐 𖼷𖽑𖽻𖾐 𖼀𖽺 𖼦𖽑𖽺𖾑 𖼹𖽻𖾐，𖼹𖽦𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼞𖽑𖽙𖾐 𖼺𖽺𖾐 𖼄𖽳𖾐 𖼺𖽪𖾐，𖼣𖽙𖾐 𖼽𖽻 𖼖𖽙𖾐 𖼮𖽻𖾑 𖼊𖽴 𖼊𖽻𖾐，𖼽𖽻 𖼖𖽙𖾐 𖼮𖽑𖽻𖾐 𖼊𖽻𖾐． 19 𖼹𖽦𖾑 𖼀𖽦𖾐，𖼣𖽙𖾐 𖽃𖽔 𖼊𖽺𖾑 𖼽𖽚𖾐 𖼊𖽑𖽺 𖼠𖽙𖾐 𖼳𖽙𖾐 𖼖𖽡𖾐 𖼐𖽺𖾑？ 𖼞𖽑𖽶𖾑 𖽃𖽙𖾑 𖼄𖽺 𖼊𖽑𖽙 𖼈𖽪𖾐 𖼍𖽦 𖼂𖽺𖾐 𖼠𖽚 𖼺𖽪𖾐 𖼞𖽳𖾐 𖼻𖽙 𖼊𖽑𖽺 𖼄𖽔 𖼣𖽻𖾐 𖼖𖽔？ 𖼣𖽙𖾐 𖽃𖽙𖾑 𖼄𖽺 𖼊𖽑𖽙 𖽃𖽔 𖼊𖽺𖾐 𖼐𖽑𖽡𖽻𖾐 𖼀𖽙 𖼊𖽑𖽺 𖼠𖽙𖾐 𖼳𖽙𖾐，𖼣𖽙𖾐 𖽃𖽔𖾑 𖼄𖽳𖾐 𖼖𖽺𖾑 𖼞𖽑𖽶𖾑 𖼻𖽻𖾐 𖼐𖽑𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐．”
𖼽𖽔𖾐 𖼳𖽔𖾐 𖼖𖽚 𖼍𖽕𖾑 𖼈𖽪𖽺𖾑 𖼞𖽳𖾐 𖼄𖽳 𖼖𖽳𖾐 𖼖𖽙𖾐 𖼮𖽑𖽻𖾐 𖼊𖽑𖽙𖾑 𖼄𖽡𖽻 𖼂𖽺𖾐
20 𖼽𖽔𖾐 𖼳𖽔𖾐 𖼖𖽚 𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼖𖽙𖾐 𖼊𖽻 𖼐𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽑𖽡 𖼠𖽙𖾐 𖼣𖽝 𖼐𖽦𖾐，𖽃𖽔 𖼐𖽺𖾑 𖽃𖽔 𖼊𖽺𖾐 𖼂𖽺𖾐 𖼖𖽡𖾐 𖼐𖽺𖾑？”
21 𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽡𖾐 𖼐𖽑𖽡𖽻𖾐 𖼀𖽙 𖼹𖽺𖾐 𖼍𖽙𖾑 𖼈𖽪𖾐 𖼍𖽦 𖼦𖽑𖽺𖾐 𖼳𖽪𖾐 𖼺𖽪𖾐 𖼽𖽻 𖼞𖽳𖾐 𖼄𖽳 𖼖𖽳𖾐 𖼞𖽑𖽶𖾑 𖼹𖽻𖾐 𖼖𖽻𖾐 𖼮𖽑𖽻𖾐 𖼽𖽦 𖼽𖽡𖾐．𖼦𖽑𖽺𖾑 𖼻𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽻 𖼮𖽨，𖼐𖽑𖽡𖾐 𖼐𖽺𖾐 𖼐𖽑𖽡𖽻𖾐 𖼀𖽙 𖼷𖽙𖾐 𖼖𖽙𖾐 𖼮𖽡𖾐 𖼂𖽦𖾐 𖼀𖽑𖽢 𖼦𖽑𖽻𖾐．𖽃𖽔𖾐 𖼺𖽺𖾑，𖼞𖽑𖽙𖾐 𖼐𖽑𖽡𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼐𖽑𖽡𖾐 𖼖𖽙𖾐 𖼍𖽺𖾑 𖼮𖽻𖾑 𖼊𖽴 𖼊𖽻𖾐．”
22 𖽃𖽔𖾐 𖼺𖽺𖾑，𖼷𖽑𖽻𖾐 𖼊𖽑𖽡 𖼹𖽻𖾐 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼀𖽙𖾐 𖼈𖽪𖾐 𖼍𖽦 𖼞𖽳𖾐 𖼦𖽑𖽺𖾐 𖼀𖽶𖾐 𖼊𖽑𖽺 𖼦𖽑𖽺𖾐 𖼠𖽴𖾐 𖼊𖽑𖽡 𖼊𖽝𖾐 𖼍𖽚，𖼽𖽔𖾐 𖼳𖽔𖾐 𖼖𖽚 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽦𖾐 𖼊𖽪 𖼮𖽑𖽡𖽺 𖼽𖽻 𖼀𖽙 𖼞𖽳𖾐 𖼄𖽳𖾐 𖼖𖽳𖾐 𖼖𖽙𖾐 𖼮𖽑𖽻𖾐 𖼽𖽦．
23 𖼞𖽑𖽶𖾑 𖼮𖽶𖾐，𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼞𖽑𖽙𖾐 𖼣𖽝 𖼊𖽑𖽧 𖼖𖽻𖾐 𖼺𖽪𖾐 𖼄𖽡𖽻 𖼮𖽨𖾐，𖼞𖽑𖽶𖾑 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼮𖽑𖽡 𖼮𖽡𖽺𖾐 𖼊𖽻 𖼐𖽙𖾐 𖽂𖽙𖾐 𖼖𖽙𖾐 𖼺𖽶𖾑．𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼞𖽑𖽙𖾐 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼀𖽙𖾐 𖼣𖽝 𖼊𖽑𖽧 𖼖𖽻𖾐 𖼺𖽪𖾐 𖼄𖽡𖽻 𖼮𖽨𖾐 𖼄𖽳𖾑 𖼄𖽳 𖼦𖽑𖽺𖾑 𖼻𖽻𖾐 𖼣𖽻𖾐．