𖼷𖽑𖽻𖾐 𖼀𖽺 𖼐𖽑𖽧𖾐 𖼄𖽙𖾐 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼊𖽴
15
1 𖼄𖽡𖽻 𖼦𖽑𖽺𖾑 𖼠𖽙𖾑 𖼍𖽻𖾐，𖼽𖽔𖾐 𖼳𖽔𖾐 𖼖𖽚 𖼰𖽕𖾑 𖼊𖽝 𖼮𖽑𖽜𖾐 𖼐𖽺𖾐 𖼄𖽪 𖼊𖽑𖽡 𖼹𖽻𖾐 𖼂𖽺𖾐 𖼳𖽡𖽻𖾐，𖼹𖽦𖾑 𖼷𖽑𖽻𖾐 𖼣𖽙 𖼷𖽑𖽡𖾐 𖼽𖽚𖾐 𖼹𖽡𖾐 𖼽𖽻 𖽃𖽙𖾑 𖼄𖽺 𖼀𖽳 𖼮𖽑𖽻𖾐 𖼮𖽨𖾐 𖼀𖽑𖽪𖾐． 2 𖼽𖽔𖾐 𖼳𖽔𖾐 𖼖𖽚 𖼷𖽑𖽶𖾐 𖼐𖽦 𖼍𖽪𖾐 𖼖𖽻𖾐，𖼄𖽔 𖼐𖽙 𖼖𖽪𖾐 𖽃𖽔𖾑 𖼊𖽪 𖼞𖽳𖾐 𖼮𖽨𖾐 𖼄𖽙𖾐 𖼦𖽜 𖼦𖽑𖽡𖽚．𖼷𖽑𖽻𖾐 𖼷𖽙𖾐 𖼖𖽙𖾐 𖼍𖽶𖾐 𖼞𖽳𖾐 𖼄𖽡𖽻 𖼮𖽻𖾐 𖼺𖽺𖾑，𖼽𖽡𖾐 𖼖𖽪𖾐 𖼞𖽑𖽶𖾐 𖼈𖽪𖾐 𖼍𖽦 𖼞𖽳𖾐 𖼄𖽡𖽻 𖼦𖽑𖽺 𖼊𖽻𖾐 𖼞𖽑𖽶𖾑 𖼮𖽶𖾐，𖼽𖽔𖾐 𖼳𖽔𖾐 𖼖𖽚 𖼽𖽻 𖼊𖽑𖽺 𖽃𖽶𖾐 𖼠𖽚 𖼖𖽻𖾐，𖼽𖽻 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼖𖽪𖾐 𖽃𖽔 𖼊𖽺𖾑 𖼊𖽝𖾐 𖼞𖽳𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼣𖽻𖾐？” 𖽃𖽔𖾐 𖼺𖽺𖾑 𖼽𖽻 𖼽𖽔𖾐 𖼳𖽔𖾐 𖼖𖽚 𖼊𖽑𖽺 𖼊𖽻 𖼞𖽑𖽚，𖼽𖽻 𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽳𖾐 𖽃𖽔 𖼊𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼣𖽻𖾐． 3 𖼽𖽔𖾐 𖼳𖽔𖾐 𖼖𖽚 𖼹𖽦𖾑 𖼽𖽻 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！𖼄𖽡𖽻 𖼦𖽑𖽺𖾑 𖼮𖽨𖾐 𖼐𖽑𖽡𖾐 𖼖𖽡 𖼮𖽻𖾐 𖼺𖽪𖾐 𖼣𖽻𖾐，𖼦𖽑𖽻𖾐 𖼊𖽑𖽻𖾐 𖼈𖽪𖾐 𖼍𖽦 𖼷𖽑𖽻𖾐 𖼹𖽡𖾐 𖼐𖽑𖽡𖾐 𖼞𖽳𖾐 𖼄𖽡𖽻 𖼦𖽑𖽺𖾑 𖼊𖽑𖽺 𖼊𖽻 𖼐𖽙𖾐 𖼺𖽪𖾐 𖼄𖽔 𖼮𖽻𖾐．” 4 𖼽𖽔𖾐 𖼳𖽔𖾐 𖼖𖽚 𖼹𖽦𖾑 𖼀𖽦𖾐：“𖽃𖽔 𖼺𖽺 𖼣𖽙𖾐 𖼞𖽜 𖼦𖽑𖽺𖾑 𖼄𖽡𖾐 𖼊𖽺𖾐 𖼞𖽳𖾐 𖼄𖽡𖽻 𖼦𖽑𖽺 𖼷𖽶 𖼄𖽻 𖼂𖽺𖾐 𖼊𖽑𖽡𖾑 𖼣𖽻𖾐，𖼞𖽑𖽙𖾐 𖼷𖽙𖾐 𖼖𖽙𖾐 𖼍𖽶𖾐 𖼞𖽳𖾐 𖼄𖽡𖽻 𖼮𖽻𖾐 𖼺𖽪𖾐 𖼷𖽑𖽻𖾐，𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼻𖽻𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼀𖽳𖾐 𖼈𖽡𖾐 𖼖𖽙𖾐 𖼮𖽑𖽻𖾐 𖼽𖽻 𖼖𖽙𖾐 𖼀𖽙𖾐 𖼄𖽡𖽻 𖼦𖽑𖽺 𖼊𖽻𖾐．”5 𖼷𖽑𖽻𖾐 𖼺𖽜 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼐𖽳 𖼽𖽡𖾐，𖼽𖽻 𖼊𖽑𖽺 𖼊𖽑𖽴 𖼊𖽻𖾐 𖼺𖽪𖾐 𖼮𖽻𖾐 𖼊𖽑𖽡𖾑 𖼣𖽻𖾐，𖼽𖽻 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼺𖽶𖾐 𖼍𖽡，𖼽𖽻 𖼖𖽙𖾐 𖼮𖽑𖽻𖾐 𖼮𖽑𖽻 𖼄𖽦𖾐 𖼹𖽮𖾑． 6 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽑𖽶𖾐 𖼞𖽑𖽙𖾐 𖼈𖽪𖾐 𖼍𖽦 𖼞𖽳𖾐 𖼖𖽻𖾐 𖼄𖽡𖽻 𖼦𖽑𖽺 𖼺𖽪𖾐 𖼷𖽑𖽻𖾐，𖼽𖽔𖾐 𖼳𖽔𖾐 𖼖𖽚 𖼽𖽻 𖼈𖽳𖾐 𖼄𖽳𖾑 𖼄𖽳 𖼊𖽑𖽺 𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐．𖽃𖽔𖾐 𖼺𖽺𖾑，𖼽𖽔𖾐 𖼳𖽔𖾐 𖼖𖽚 𖼞𖽑𖽶𖾐 𖼞𖽑𖽶𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼐𖽑𖽧𖾐 𖼄𖽙𖾐 𖼊𖽑𖽺 𖼇𖽪 𖼽𖽻 𖼖𖽙𖾐 𖼊𖽴 𖼽𖽡𖾐．
𖼽𖽔𖾐 𖼳𖽔𖾐 𖼖𖽚 𖼀𖽑𖽚𖾐 𖼊𖽦
7 𖼖𖽡𖾐 𖼞𖽑𖽚 𖼠𖽚 𖼽𖽡𖾐 𖼦𖽑𖽙𖾐，𖼽𖽔𖾐 𖼳𖽔𖾐 𖼖𖽚 𖼈𖽪𖾐 𖼍𖽦 𖼖𖽙𖾐 𖼀𖽦𖾐：“𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼞𖽜 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽑𖽶𖾐 𖽂𖽙𖾐 𖼊𖽡 𖼽𖽡𖾐 𖼊𖽙𖾐 𖼖𖽡𖾐，𖼣𖽙𖾐 𖼞𖽜 𖼮𖽙𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼺𖽺𖾑，𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖽂𖽙𖾐 𖼞𖽜 𖼊𖽙𖾐． 8 𖼞𖽪𖾐 𖼮𖽡𖽺𖾐，𖼣𖽙𖾐 𖼽𖽕𖾑 𖼖𖽕 𖼠𖽚 𖼰𖽡𖾐 𖼳𖽪𖾑 𖼄𖽡𖾐 𖼊𖽺𖾐 𖼞𖽳𖾐 𖼮𖽻𖾐 𖼞𖽑𖽶𖾑 𖼮𖽶𖾐 𖼀𖽦𖾐 𖼷𖽑𖽦𖾐 𖼠𖽚：‘ 𖼽𖽺𖾐 𖼦𖽴 𖼦𖽫 𖼣𖽙𖾐 𖼞𖽜 𖼀𖽑𖽚𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖽂𖽙𖾐 𖼞𖽚 𖼖𖽻𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼮𖽻𖾐 𖼽𖽻 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐．’”
9 𖼈𖽪𖾐 𖼍𖽦 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼺𖽙𖾑 𖼺𖽙𖾐 𖼽𖽡𖾐 𖼮𖽑𖽳𖾐！”
𖽃𖽔𖾐 𖼺𖽺𖾑 𖼽𖽻 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼽𖽡𖾐 𖼦𖽑𖽙𖾐． 10 𖼦𖽑𖽻𖾐 𖼊𖽑𖽻𖾐，𖼽𖽔𖾐 𖼳𖽔𖾐 𖼖𖽚 𖼞𖽑𖽶 𖼮𖽑𖽕 𖼐𖽦𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼹𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼷𖽑𖽡𖾐 𖼐𖽑𖽡 𖼮𖽑𖽪𖾐 𖼳𖽶 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼽𖽡𖾐，𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽻𖾐 𖼮𖽑𖽡𖽪𖾐 𖼄𖽸𖾐 𖼮𖽑𖽡𖽪 𖼊𖽻 𖼮𖽨 𖼞𖽑𖽶𖾑 𖼮𖽶𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼖𖽡𖾐：‘ 𖼽𖽔𖾐 𖼳𖽔𖾐 𖼖𖽚 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐 𖼍𖽳𖾐 𖼦𖽑𖽻𖾐！’” 11 𖼞𖽶𖾑𖽑 𖼮𖽶𖾐，𖼽𖽔𖾐 𖼳𖽔𖾐 𖼖𖽚 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽻𖾐 𖼷𖽑𖽻𖾐 𖼐𖽑𖽡 𖼦𖽑𖽙𖾐 𖼽𖽚𖾐 𖼊𖽑𖽺 𖽃𖽶𖾐 𖼽𖽻 𖼖𖽙𖾐 𖼮𖽑𖽻𖾐 𖼽𖽡𖾐．𖼽𖽻 𖼈𖽳𖾐 𖼐𖽑𖽧𖾐 𖼰𖽶𖾐 𖼺𖽪𖾐 𖼷𖽑𖽻𖾐 𖼣𖽻𖾐，𖼦𖽑𖽺𖾑 𖼠𖽻𖾐 𖼊𖽑𖽺 𖼽𖽔𖾐 𖼳𖽔𖾐 𖼖𖽚 𖽃𖽔𖾐 𖼊𖽺𖾑 𖼳𖽶 𖼄𖽡𖽻 𖼂𖽺𖾐 𖼺𖽪𖾐 𖼣𖽻𖾐 𖼽𖽻 𖼈𖽳𖾐 𖼊𖽑𖽡 𖼳𖽶 𖼖𖽺𖾑 𖼄𖽔 𖼺𖽝𖾑． 12 𖼽𖽔𖾐 𖼳𖽔𖾐 𖼖𖽚 𖼍𖽡𖾐 𖼮𖽡𖽺𖾐 𖼂𖽺𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼹𖽡𖾐 𖼰𖽡𖾐 𖼖𖽚 𖼖𖽪𖾐 𖼞𖽑𖽶𖾐 𖼍𖽕𖾑 𖼈𖽪𖽺𖾑 𖼞𖽳𖾐 𖼳𖽪𖾑 𖼰𖽪𖾐 𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐．𖽃𖽔𖾐 𖼺𖽺𖾑，𖼀𖽑𖽚𖾐 𖼊𖽦 𖼞𖽳𖾐 𖼄𖽡𖽻 𖽂𖽙𖾐 𖼂𖽺𖾐 𖽂𖽙𖾐 𖼈𖽳，𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼖𖽺𖾑 𖽂𖽙𖾐 𖼮𖽻𖾐 𖽂𖽙𖾐 𖼄𖽨．
𖼍𖽕𖾑 𖼈𖽪𖽺𖾑 𖼮𖽡𖽪 𖼀𖽑𖽻𖾐
13 𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽻𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐 𖼊𖽑𖽧：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼐𖽑𖽧𖾐 𖼄𖽙𖾐 𖼄𖽳𖾑 𖼄𖽳 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼊𖽴 𖼽𖽡𖾐 𖼦𖽑𖽻𖾐．”
14 𖼍𖽕𖾑 𖼈𖽪𖽺𖾑 𖼽𖽻 𖼖𖽙𖾐 𖼮𖽑𖽻𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽻𖾐 𖼺𖽪𖾐 𖼷𖽶 𖼄𖽻 𖼖𖽙𖾐 𖼀𖽦𖾐：“𖽃𖽔 𖼐𖽺𖾑 𖼮𖽡𖽪 𖼀𖽑𖽻𖾐 𖼍𖽪𖾐 𖼖𖽡𖾐，𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖼽𖽔𖾐 𖼳𖽔𖾐 𖼖𖽚 𖽃𖽙𖾑 𖼄𖽺 𖼮𖽑𖽡𖽺 𖼮𖽡𖽪 𖼮𖽨𖾐 𖼄𖽔 𖼊𖽙𖾐 𖼊𖽻𖾐．𖽃𖽔 𖼐𖽺𖾑 𖼐𖽕 𖼐𖽕𖾐 𖼽𖽡𖾐 𖼖𖽡𖾐，𖽃𖽔𖾑 𖼽𖽪𖾐 𖼽𖽻 𖼐𖽕 𖼊𖽺𖾐 𖽃𖽔 𖼐𖽺𖾑 𖼞𖽳𖾐 𖼮𖽑𖽡𖾐 𖼖𖽻𖾐 𖼺𖽺𖾑，𖽃𖽔 𖼐𖽺𖾑 𖼞𖽜 𖼈𖽡𖾑 𖼞𖽑𖽙 𖼷𖽶𖾐 𖼄𖽳𖾐，𖽃𖽔𖾑 𖼊𖽑𖽙 𖼻𖽜 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼺𖽦 𖼦𖽑𖽙𖾐 𖼠𖽸𖾑．”
15 𖼷𖽶 𖼄𖽻 𖼞𖽑𖽶𖾑 𖼹𖽻𖾐 𖼈𖽪𖾐 𖼍𖽦 𖼖𖽙𖾐 𖼀𖽦𖾐：“𖼣𖽙𖾐 𖼺𖽡 𖼀𖽑𖽙 𖼣𖽙𖾐 𖼈𖽪𖾐 𖼍𖽦 𖼞𖽑𖽙𖾐 𖼀𖽦𖾐 𖼺𖽪𖾐，𖼮𖽜𖾐 𖼀𖽑𖽙 𖼷𖽑𖽜𖾑 𖼷𖽑𖽜𖾐 𖼐𖽑𖽧𖾐 𖼺𖽳 𖼄𖽙𖾐 𖼂𖽺𖾐 𖼽𖽡𖾐 𖼊𖽻𖾐．”
16 𖽃𖽔𖾐 𖼺𖽺𖾑，𖼈𖽪𖾐 𖼍𖽦 𖼺𖽜 𖼽𖽡𖾐 𖼦𖽑𖽙𖾐，𖼽𖽻 𖼊𖽑𖽡 𖼈𖽴 𖼷𖽑𖽻𖾐 𖼖𖽺𖾑 𖼽𖽻 𖼠𖽙𖾑 𖼍𖽻𖾐 𖼽𖽡𖾐 𖼦𖽑𖽙𖾐，𖼄𖽳 𖼖𖽳𖾐 𖼷𖽑𖽡𖾐 𖼽𖽚𖾐 𖼊𖽑𖽺 𖼍𖽺𖾑 𖼹𖽺𖾐 𖼍𖽙𖾑 𖼈𖽪𖾐 𖼍𖽦 𖼦𖽑𖽺𖾐 𖼞𖽳𖾐 𖼳𖽪𖾐． 17 𖼈𖽪𖾐 𖼍𖽦 𖼺𖽜 𖼽𖽡𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼽𖽻 𖼖𖽙𖾐 𖼮𖽑𖽻𖾐 𖼺𖽜 𖼽𖽡𖾐，𖼽𖽻 𖼈𖽳𖾐 𖼖𖽪𖾐 𖼦𖽜 𖼞𖽳𖾐 𖼦𖽑𖽺𖾐 𖼞𖽶𖾑𖽑 𖼊𖽡 𖼞𖽳𖾐 𖼐𖽙 𖼹𖽺𖾐． 18 𖼈𖽪𖾐 𖼍𖽦 𖼞𖽳𖾐 𖼷𖽶 𖼄𖽻 𖼞𖽑𖽙𖾐 𖼣𖽻𖾐 𖼽𖽻 𖼀𖽙 𖼮𖽑𖽶𖾐 𖼮𖽑𖽻𖾐 𖼺𖽜 𖼠𖽚 𖼽𖽡𖾐，𖼰𖽡𖾐 𖼖𖽡𖾑 𖼊𖽑𖽧 𖼺𖽪𖾐 𖼷𖽑𖽻𖾐、𖼂𖽡 𖼖𖽡𖾑 𖼊𖽑𖽧 𖼺𖽪𖾐 𖼷𖽑𖽻𖾐 𖼐𖽺𖾐 𖼰𖽡𖽔𖾐 𖼊𖽑𖽴𖾑 𖼖𖽪𖾐 𖼞𖽳𖾐 𖼮𖽑𖽻𖾐 𖼈𖽪𖾐 𖼍𖽦 𖼠𖽙𖾑 𖼍𖽻𖾐 𖼖𖽻𖾐 𖼺𖽪𖾐 𖼮𖽑𖽡𖽚 𖼦𖽑𖽙𖾐 𖼽𖽚𖾐，𖼄𖽳𖾑 𖼄𖽳 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼠𖽚 𖼽𖽡𖾐．
19 𖼈𖽪𖾐 𖼍𖽦 𖼰𖽡𖽔𖾐 𖼊𖽑𖽴𖾑 𖼺𖽪𖾐 𖼷𖽑𖽻𖾐 𖼽𖽡 𖼊𖽑𖽦𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼺𖽜 𖼽𖽡𖾐 𖼐𖽺𖾑？ 𖼀𖽑𖽚𖾐 𖼈𖽪𖾐 𖼍𖽦 𖼳𖽸 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐 𖼻𖽻𖾐！𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼦𖽑𖽺𖾑 𖼞𖽑𖽻𖾐 𖼂𖽻𖾑 𖼀𖽑𖽙 𖼷𖽑𖽻𖾐 𖼣𖽻𖾐，𖼽𖽻 𖼄𖽳𖾑 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐，𖼮𖽡𖽪 𖼀𖽑𖽻𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼺𖽪𖾐 𖼣𖽻𖾐． 20 𖼐𖽑𖽡𖾐 𖽃𖽔 𖼐𖽑𖽡𖾐 𖼺𖽺𖾑 𖼖𖽻𖾐 𖼺𖽺，𖽃𖽔𖾐 𖼹𖽻𖾐 𖽃𖽙𖾑 𖼐𖽑𖽡𖾐 𖼹𖽦𖾐 𖼐𖽑𖽡𖾐 𖼞𖽜 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽡𖽪 𖼀𖽑𖽻𖾐 𖼊𖽙𖾐 𖼐𖽺𖾑？ 𖼣𖽙𖾐 𖽃𖽔𖾑 𖼄𖽳𖾐 𖽃𖽔 𖼊𖽻𖾑 𖼽𖽡𖾐 𖼖𖽡𖾐 𖼖𖽺𖾑 𖼄𖽔 𖼺𖽝𖾑．𖼐𖽑𖽡𖾐 𖼀𖽑𖽚𖾐 𖼞𖽚 𖼽𖽡𖾐 𖼻𖽻𖾐！𖼐𖽑𖽡𖾐 𖼈𖽧 𖼐𖽑𖽳𖾐 𖼊𖽑𖽺 𖼦𖽳 𖼀𖽑𖽚𖾐 𖼞𖽚 𖼽𖽡𖾐 𖼻𖽻𖾐！𖼽𖽺𖾐 𖼦𖽴 𖼦𖽫 𖼞𖽳𖾐 𖼐𖽙𖾑 𖼣𖽜 𖼐𖽺𖾐 𖼖𖽡 𖼮𖽨𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼞𖽜．”
21 𖼽𖽡 𖼊𖽑𖽦𖾑 𖼈𖽪𖾐 𖼍𖽦𖾐 𖼊𖽑𖽺 𖼊𖽻 𖼞𖽑𖽚，𖼀𖽦𖾐：“𖼣𖽙𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐，𖼣𖽙𖾐 𖼦𖽑𖽔𖾐 𖼖𖽺𖾑 𖼣𖽙𖾐 𖼺𖽡 𖼀𖽑𖽙 𖼣𖽙𖾐 𖼈𖽪𖾐 𖼍𖽦 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼄𖽳𖾐 𖼷𖽑𖽦𖾐，𖼣𖽙𖾐 𖼺𖽡 𖼀𖽑𖽙 𖼣𖽙𖾐 𖼈𖽪𖾐 𖼍𖽦 𖽃𖽔 𖼊𖽻𖾑 𖼮𖽻𖾐 𖼄𖽔 𖼠𖽕，𖼳𖽶𖾐 𖼣𖽻𖾐 𖼦𖽻，𖼠𖽙𖾑 𖼣𖽻𖾐 𖼦𖽻，𖼮𖽜𖾐 𖼀𖽑𖽙 𖼷𖽑𖽜𖾑 𖼷𖽑𖽜𖾐 𖼞𖽑𖽶𖾑 𖼠𖽻𖾐 𖼮𖽻𖾐 𖼊𖽻𖾐．”
22 𖼍𖽕𖾑 𖼈𖽪𖽺𖾑 𖼽𖽡 𖼊𖽑𖽦𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖽂𖽙𖾐 𖼽𖽡𖾐 𖼊𖽙𖾐，𖼐𖽑𖽡𖾐 𖽃𖽙𖾑 𖼄𖽺 𖼺𖽜 𖼻𖽻𖾐！” 𖼰𖽡𖽔𖾐 𖼊𖽑𖽴𖾑 𖼺𖽪𖾐 𖼷𖽑𖽻𖾐 𖼽𖽡 𖼊𖽑𖽦𖾑 𖼽𖽻 𖼖𖽙𖾐 𖼞𖽑𖽙𖾐 𖼮𖽑𖽻𖾐 𖼺𖽪𖾐 𖼻𖽙 𖼐𖽜𖾐，𖼻𖽙 𖼄𖽳 𖼄𖽡𖾐 𖼐𖽜𖾐 𖼐𖽺𖾐 𖽃𖽔𖾐 𖼞𖽶𖾑 𖼊𖽑𖽺 𖼦𖽳 𖼺𖽺𖾑，𖽃𖽙𖾑 𖼄𖽺 𖼺𖽜 𖼽𖽡𖾐 𖼦𖽑𖽙𖾐．
23 𖼷𖽑𖽻𖾐 𖼷𖽪𖾐 𖼺𖽜 𖽃𖽙𖾑 𖼄𖽺 𖼽𖽡𖾐 𖼞𖽑𖽶𖾑 𖼮𖽶𖾐，𖼞𖽑𖽙𖾐 𖼮𖽑𖽡𖾐 𖼊𖽪 𖼷𖽑𖽻𖾐 𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐．𖼈𖽪𖾐 𖼍𖽦 𖼰𖽧 𖼖𖽪𖽦 𖼖𖽻𖾐 𖼮𖽻 𖼠𖽚 𖼽𖽡𖾐 𖼦𖽑𖽙𖾐，𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼽𖽡𖾐 𖼞𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼺𖽜．
𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼹𖽡𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼞𖽚 𖼽𖽡𖾐
24 𖼽𖽻 𖼈𖽳𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽑𖽻𖾐 𖼊𖽚𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼍𖽡𖾐 𖼄𖽻 𖼺𖽔 𖼍𖽮 𖼐𖽺𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺𖾐 𖼈𖽦𖾑 𖼺𖽪𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼀𖽑𖽨 𖼐𖽙 𖼹𖽺𖾐 𖼖𖽻𖾐．𖼽𖽕𖾑 𖼂𖽡 𖼽𖽕𖾑 𖼊𖽑𖽔𖾐 𖼊𖽦𖾐 𖼖𖽻𖾐 𖼞𖽑𖽶𖾑 𖼠𖽻𖾐 𖼦𖽑𖽡𖽚 𖼺𖽺𖾑，𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼞𖽜 𖼖𖽪𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼽𖽡𖾐 𖼦𖽑𖽻𖾐 𖼰𖽶𖾐 𖼮𖽑𖽡𖾐．
25 𖼈𖽪𖾐 𖼍𖽦 𖼺𖽔 𖼍𖽮 𖼖𖽙𖾐 𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼈𖽦𖾑 𖼀𖽑𖽚𖾐 𖼖𖽪𖾐 𖼞𖽑𖽶𖾐 𖼞𖽚 𖼽𖽡𖾐 𖼻𖽻𖾐！𖼣𖽙𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐 𖼊𖽑𖽡𖾑 𖼣𖽻𖾐，𖼽𖽻 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼞𖽜 𖼞𖽚 𖼖𖽻𖾐 𖼺𖽺𖾑，𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼐𖽺𖾐 𖼽𖽻 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼐𖽦𖾐 𖼄𖽡𖽻𖾐 𖼊𖽻𖾐． 26 𖽂𖽙 𖼺𖽙𖾐 𖼂𖽙𖾐 𖼀𖽦𖾐，𖼽𖽻 𖼣𖽙𖾐 𖼊𖽑𖽺 𖼐𖽑𖽧𖾐 𖼄𖽔 𖼺𖽳 𖼊𖽑𖽡𖾑 𖼣𖽻𖾐，𖼐𖽦𖾐 𖼄𖽺！𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐，𖼽𖽻 𖼣𖽙𖾐 𖼊𖽑𖽺 𖽃𖽔 𖼊𖽺𖾐 𖼂𖽺𖾐 𖼊𖽻𖾐 𖼊𖽡 𖼮𖽑𖽻，𖽃𖽔 𖼊𖽺𖾐 𖼂𖽺𖾐 𖼮𖽑𖽳𖾐！”
27 𖼈𖽪𖾐 𖼍𖽦 𖼹𖽦𖾑 𖼍𖽡𖾐 𖼄𖽻 𖼺𖽔 𖼍𖽮 𖼖𖽙𖾐 𖼀𖽦𖾐：“𖼐𖽑𖽡𖾐 𖼺𖽡𖾐 𖼻𖽙 𖼄𖽔 𖼣𖽻𖾐 𖼖𖽔？ 𖼺𖽙𖾑 𖼺𖽙𖾐 𖼀𖽑𖽚𖾐 𖼖𖽪𖾐 𖼞𖽑𖽶𖾐 𖼞𖽚 𖼽𖽡𖾐 𖼻𖽻𖾐！𖼐𖽑𖽡𖾐 𖼻𖽙 𖼽𖽕𖾑 𖼳𖽡𖾐 𖼄𖽔 𖼺𖽶𖾐 𖼐𖽺𖾐 𖼽𖽕𖾑 𖼂𖽡 𖼽𖽕𖾑 𖼊𖽑𖽔𖾐 𖼞𖽳𖾐 𖼻𖽙 𖼽𖽱𖾐 𖼐𖽕 𖼍𖽔𖾐 𖼖𖽺𖾑 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼞𖽚 𖼽𖽡𖾐 𖼊𖽻𖾐． 28 𖼣𖽙𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼈𖽡𖾐 𖼠𖽚 𖼊𖽪 𖼞𖽳𖾐 𖼞𖽑𖽶𖾑 𖼠𖽻𖾐 𖼳𖽡𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼊𖽻 𖼂𖽙𖾐 𖼣𖽙𖾐 𖼊𖽑𖽺 𖼞𖽜 𖼰𖽶𖾐 𖼮𖽑𖽡𖾐 𖼊𖽻𖾐．” 29 𖽃𖽔𖾐 𖼺𖽺𖾑，𖼺𖽔 𖼍𖽮 𖼐𖽺𖾐 𖼽𖽕𖾑 𖼂𖽡 𖼽𖽕𖾑 𖼊𖽑𖽔𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼈𖽦𖾑 𖼀𖽑𖽚𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖼞𖽚 𖼽𖽡𖾐，𖼞𖽑𖽶𖾑 𖼠𖽻𖾐 𖼮𖽻𖾐 𖼍𖽧𖾑 𖼦𖽑𖽙𖾐．
30 𖼍𖽕𖾑 𖼈𖽪𖽺𖾑 𖼺𖽜 𖽃𖽔 𖼮𖽑𖽙 𖽂𖽙 𖼰𖽡𖽺𖾐 𖼊𖽑𖽺 𖼊𖽦𖾐 𖼽𖽡𖾐，𖼽𖽻 𖼈𖽪𖾑 𖼊𖽡𖾐 𖼀𖽜𖾐 𖼍𖽡，𖼮𖽑𖽡𖾑 𖼐𖽴𖾐 𖼄𖽔 𖼊𖽴，𖽂𖽙𖾐 𖼺𖽜 𖽂𖽙𖾐 𖼣𖽶𖾐，𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖼖𖽺𖾑 𖼈𖽪𖾑 𖼊𖽡𖾐 𖼀𖽜𖾐 𖼍𖽡，𖽂𖽙𖾐 𖼺𖽜 𖽂𖽙𖾐 𖼣𖽶𖾐． 31 𖼷𖽑𖽻𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐 𖼊𖽑𖽧：“𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼖𖽺𖾑 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼊𖽴 𖼺𖽺𖾑，𖼀𖽑𖽚𖾐 𖼊𖽦 𖼺𖽪𖾐 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼮𖽻𖾐．” 𖼍𖽕𖾑 𖼈𖽪𖽺𖾑 𖼮𖽑𖽡 𖼮𖽡𖽺𖾐 𖼺𖽺𖾑，𖼀𖽦𖾐：“𖼽𖽺𖾐 𖼦𖽴 𖼦𖽫 𖽃𖽔𖾐！𖼐𖽑𖽡𖾐 𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼞𖽑𖽙𖾐 𖼣𖽝 𖼊𖽑𖽧 𖼖𖽻𖾐 𖼺𖽪𖾐 𖼄𖽪𖾐 𖼊𖽪𖾐 𖼞𖽜 𖼣𖽡𖽳𖾐 𖼍𖽺 𖼄𖽡𖽻 𖼀𖽑𖽢 𖼞𖽜．”
32 𖼍𖽕𖾑 𖼈𖽪𖽺𖾑 𖽂𖽙 𖼰𖽡𖽺𖾐 𖼈𖽪𖾑 𖼖𖽚𖾐 𖼞𖽳𖾐 𖼮𖽑𖽡𖾐，𖼞𖽑𖽶𖾑 𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽴 𖼞𖽳𖾐 𖼄𖽡𖾐 𖼊𖽺𖾐 𖼣𖽻𖾐．𖼐𖽦𖾐 𖼄𖽺！𖼽𖽕𖾑 𖼰𖽡𖾐 𖼺𖽪𖾐 𖼷𖽑𖽻𖾐 𖼦𖽪𖾑 𖼳𖽺𖾐 𖼀𖽑𖽡𖽻𖾐 𖼷𖽑𖽶 𖼰𖽸𖾐 𖼮𖽑𖽡𖽦，𖼐𖽑𖽡𖾑 𖼄𖽶𖾐 𖼰𖽡𖽕𖾐 𖼈𖽪𖾑 𖼊𖽡𖾐 𖼊𖽑𖽺 𖼍𖽦𖾐 𖼺𖽺𖾑，𖼖𖽻𖾐 𖼽𖽻 𖽃𖽙𖾑 𖼄𖽺 𖼹𖽶𖾐． 33 𖼍𖽕𖾑 𖼈𖽪𖽺𖾑 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼊𖽑𖽺 𖼊𖽑𖽡 𖼳𖽶 𖼖𖽺𖾑 𖼂𖽻𖾐 𖼄𖽳𖾐 𖼄𖽔 𖼊𖽙𖾐． 34 𖼐𖽑𖽡𖾐 𖼀𖽑𖽚𖾐 𖼖𖽪𖾐 𖼞𖽑𖽶𖾐 𖼞𖽚 𖼽𖽡𖾐 𖼺𖽺𖾑，𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼀𖽦𖾐：‘ 𖼈𖽪𖾐 𖼍𖽦 𖽃𖽔𖾐！𖼣𖽙𖾐 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼂𖽺𖾐 𖼐𖽑𖽧𖾐 𖼺𖽳，𖽃𖽙𖾑 𖼄𖽺 𖼊𖽑𖽙 𖼣𖽙𖾐 𖼐𖽑𖽡𖽻𖾐 𖼀𖽙 𖼞𖽳𖾐 𖼮𖽜𖾐 𖼀𖽑𖽙 𖼂𖽺𖾐 𖼖𖽙𖾐 𖼺𖽶𖾑，𖽃𖽔𖾑 𖼄𖽳𖾐 𖼣𖽙𖾐 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼂𖽺𖾐 𖼊𖽻𖾐．’ 𖼐𖽑𖽡𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼊𖽑𖽡𖾑 𖼣𖽻𖾐，𖼽𖽕𖾑 𖼳𖽡𖾐 𖼍𖽙𖾐 𖼇𖽮 𖼞𖽳𖾐 𖼄𖽪𖾐 𖼊𖽪𖾐 𖼊𖽑𖽺 𖽂𖽙𖾐 𖼂𖽺𖾐 𖼀𖽑𖽧𖾐 𖼊𖽙𖾐． 35 𖼍𖽡𖾐 𖼄𖽻 𖼺𖽔 𖼍𖽮 𖼐𖽺𖾐 𖼽𖽕𖾑 𖼂𖽡 𖼽𖽕𖾑 𖼊𖽑𖽔𖾐 𖼖𖽺𖾑 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼖𖽪𖾐 𖼞𖽑𖽶𖾐 𖼮𖽻𖾐 𖼄𖽔 𖼣𖽻𖾐 𖼖𖽔？ 𖼐𖽑𖽡𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖼊𖽻 𖼮𖽨 𖼺𖽪𖾐 𖼊𖽻 𖼂𖽪𖾑，𖼄𖽳𖾑 𖼄𖽳 𖼀𖽦𖾐 𖼍𖽡𖾐 𖼄𖽻 𖼺𖽔 𖼍𖽮 𖼐𖽺𖾐 𖼽𖽕𖾑 𖼂𖽡 𖼽𖽕𖾑 𖼊𖽑𖽔𖾐 𖼖𖽙𖾐 𖼰𖽨𖾐 𖼖𖽡𖾐． 36 𖼽𖽻 𖼻𖽙 𖼐𖽑𖽡 𖼽𖽚𖾐 𖼖𖽺𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼞𖽑𖽻𖾑 𖼮𖽻𖾐 𖼍𖽳𖾐，𖼞𖽑𖽶𖾑 𖼺𖽔 𖼍𖽮 𖼞𖽳𖾐 𖼻𖽙 𖼽𖽕𖾑 𖼳𖽡𖾐 𖼄𖽔 𖼺𖽶𖾐 𖼐𖽺𖾐 𖼽𖽕𖾑 𖼂𖽡 𖼽𖽕𖾑 𖼊𖽑𖽔𖾐 𖼞𖽳𖾐 𖼻𖽙 𖼽𖽱𖾐 𖼐𖽕 𖼍𖽔𖾐 𖼣𖽻𖾐．𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼊𖽻 𖼮𖽨 𖼺𖽪𖾐，𖼽𖽻 𖼈𖽳𖾐 𖼊𖽑𖽺 𖼹𖽡𖾐 𖼂𖽻𖾐 𖼖𖽻𖾐 𖼀𖽦𖾐 𖼣𖽙𖾐 𖼖𖽙𖾐 𖼊𖽑𖽧 𖼊𖽙𖾐．”
37 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼞𖽳𖾐 𖼞𖽙𖾐 𖼮𖽑𖽻 𖼦𖽪𖾑 𖼳𖽺𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐，𖼽𖽔𖾐 𖼳𖽔𖾐 𖼖𖽚 𖼖𖽺𖾑 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐 𖼦𖽑𖽙𖾐．