𖼐𖽕 𖼍𖽳𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼦𖽳𖾐 𖼄𖽪𖾑
12
1 𖼽𖽺𖾐 𖼦𖽴 𖼦𖽫 𖼐𖽕 𖼍𖽔𖾐 𖼊𖽑𖽺 𖼹𖽡𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼄𖽡𖽻𖾐 𖼽𖽡𖾐．𖽃𖽔𖾐 𖼺𖽺𖾑 𖼐𖽕 𖼍𖽔𖾐 𖼖𖽻𖾐 𖼍𖽕𖾑 𖼈𖽪𖽺𖾑 𖼞𖽳𖾐 𖼞𖽑𖽻𖾑 𖼮𖽑𖽡𖾐 𖼺𖽺𖾑，𖼽𖽻 𖼖𖽙𖾐 𖼀𖽦𖾐：“𖼖𖽪𖾐 𖼊𖽑𖽡 𖼊𖽝𖾐 𖼞𖽑𖽶𖾐 𖼷𖽑𖽻𖾐 𖼐𖽑𖽡 𖼽𖽚𖾐 𖼮𖽻𖾐，𖼊𖽑𖽡 𖼽𖽚𖾐 𖼞𖽑𖽶𖾑 𖼷𖽑𖽻𖾐 𖼀𖽻𖾐 𖼀𖽑𖽙 𖼣𖽻𖾐，𖼊𖽑𖽡 𖼽𖽚𖾐 𖼞𖽑𖽶𖾑 𖼷𖽑𖽻𖾐 𖼳𖽚𖾑 𖼀𖽑𖽙 𖼣𖽻𖾐． 2 𖼷𖽑𖽻𖾐 𖼀𖽻𖾐 𖼀𖽑𖽙 𖼞𖽑𖽶𖾑 𖼽𖽚𖾐 𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖼦𖽑𖽔𖾐 𖼮𖽶𖾐 𖼮𖽻𖾐 𖼄𖽨， 3 𖼷𖽑𖽻𖾐 𖼳𖽚𖾑 𖼀𖽑𖽙 𖼞𖽑𖽶𖾑 𖼽𖽚𖾐 𖼈𖽳𖾐 𖼂𖽻𖾐 𖼖𖽻𖾐 𖼺𖽪𖾐 𖼽𖽻𖾐 𖼊𖽑𖽦 𖼊𖽑𖽡 𖼊𖽝𖾐 𖼍𖽺𖾑 𖼮𖽻𖾐，𖼠𖽳𖾐 𖼖𖽪𖾐 𖼊𖽑𖽡 𖼳𖽶 𖼖𖽺𖾑 𖼄𖽔 𖼮𖽻𖾐．𖼽𖽻𖾐 𖼊𖽑𖽦 𖼞𖽑𖽶𖾑 𖼽𖽻 𖼻𖽙 𖼄𖽡𖾐 𖼐𖽜𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼍𖽻𖾐 𖼈𖽳 𖼺𖽪𖾐 𖼣𖽻𖾐，𖼽𖽻 𖼷𖽙 𖼺𖽪𖾐 𖼊𖽑𖽺 𖼷𖽙，𖼽𖽻 𖼊𖽻𖾐 𖼺𖽪𖾐 𖼊𖽑𖽺 𖼊𖽻𖾐，𖼽𖽻 𖼍𖽦𖾐 𖼞𖽚 𖼞𖽑𖽶𖾐 𖼽𖽦，𖼽𖽻 𖼻𖽙 𖼄𖽳 𖼖𖽙𖾐 𖼺𖽶𖾑． 4 𖼊𖽑𖽡 𖼐𖽑𖽡𖾐 𖼮𖽻𖾐，𖼺𖽙𖾐 𖼈𖽡𖾐 𖼊𖽑𖽡 𖼽𖽚𖾐 𖼷𖽑𖽻𖾐 𖼀𖽻𖾐 𖼀𖽑𖽙 𖼞𖽑𖽶𖾑 𖼈𖽴 𖼞𖽳𖾐 𖼖𖽻𖾐，𖼷𖽑𖽻𖾐 𖼀𖽻𖾐 𖼀𖽑𖽙 𖼞𖽑𖽶𖾑 𖼽𖽻 𖼞𖽳𖾐 𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖼷𖽪𖾐 𖼞𖽑𖽶𖾐 𖼮𖽑𖽻𖾐 𖼊𖽑𖽡 𖼊𖽝𖾐 𖼺𖽶𖾐 𖼊𖽑𖽧 𖼖𖽻𖾐，𖼺𖽦 𖼺𖽙𖾐 𖼈𖽡𖾐 𖼖𖽙𖾐 𖼮𖽑𖽻𖾐 𖼷𖽙 𖼄𖽔 𖼽𖽦，𖼞𖽚 𖼀𖽑𖽚𖾐 𖼷𖽑𖽻𖾐 𖼳𖽚𖾑 𖼀𖽑𖽙 𖼞𖽑𖽶𖾑 𖼈𖽴 𖼞𖽳𖾐 𖼽𖽻𖾐 𖼊𖽑𖽦 𖼞𖽑𖽶𖾑 𖼊𖽝𖾐 𖼺𖽶𖾐 𖼂𖽻𖾐 𖼖𖽻𖾐，𖼺𖽦 𖼺𖽙𖾐 𖼈𖽡𖾐 𖼖𖽙𖾐 𖼮𖽑𖽻𖾐 𖼷𖽙 𖼦𖽑𖽙𖾐．”5 𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼀𖽻𖾐 𖼀𖽑𖽙 𖼞𖽑𖽶𖾑 𖼽𖽚𖾐 𖼊𖽑𖽺 𖼦𖽑𖽔𖾐 𖼮𖽶𖾐 𖼀𖽶 𖼻𖽶 𖼺𖽺𖾑，𖼐𖽕 𖼍𖽔𖾐 𖼖𖽙𖾐 𖼀𖽦𖾐：“𖼣𖽙𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐，𖼄𖽡𖽻 𖼦𖽑𖽺𖾑 𖼂𖽺𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼳𖽶𖾐 𖼷𖽻 𖼺𖽪𖾐 𖼣𖽻𖾐． 6 𖼽𖽻 𖽃𖽔𖾑 𖼮𖽑𖽸 𖼖𖽡𖾐 𖼊𖽝𖾐 𖼞𖽑𖽚 𖼞𖽜 𖼖𖽡，𖼞𖽪𖾐 𖼮𖽡𖽺𖾐 𖼽𖽻 𖼂𖽺𖾐 𖼺𖽪𖾐 𖼄𖽡𖽻 𖼦𖽑𖽺𖾑 𖼐𖽑𖽧𖾐 𖼮𖽡𖽻𖾐 𖼐𖽑𖽧𖾐 𖼄𖽙𖾐 𖼊𖽑𖽡 𖼀𖽧𖾑 𖼖𖽺𖾑 𖼄𖽔 𖼮𖽻𖾐．”
7 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼷𖽑𖽻𖾐 𖼀𖽻𖾐 𖼀𖽑𖽙 𖼞𖽑𖽶𖾑 𖼽𖽚𖾐 𖼞𖽑𖽶𖾑 𖼐𖽑𖽡𖾐 𖼣𖽻𖾐！𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼣𖽙𖾐 𖼐𖽑𖽡𖾐 𖼊𖽑𖽺 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼺𖽺𖾑，𖼐𖽑𖽡𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐，𖼺𖽻 𖼖𖽚 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼐𖽑𖽡𖾐 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐， 8 𖼣𖽙𖾐 𖼐𖽑𖽡𖾐 𖼺𖽡 𖼀𖽑𖽙 𖼞𖽳𖾐 𖼄𖽡𖾐 𖼳𖽡𖽪 𖼦𖽑𖽺𖾐 𖼠𖽙𖾐 𖼖𖽪 𖼐𖽑𖽡𖾐 𖼊𖽑𖽺 𖼞𖽜，𖼹𖽦𖾑 𖼐𖽑𖽡𖾐 𖼺𖽡 𖼀𖽑𖽙 𖼞𖽳𖾐 𖼄𖽳 𖼻𖽙 𖼄𖽳 𖼖𖽳𖾐 𖼀𖽑𖽨 𖼐𖽑𖽡𖾐 𖼍𖽦𖾐 𖼞𖽚 𖼞𖽑𖽶𖾐 𖼰𖽡𖽺𖾐，𖼦𖽑𖽔𖾐 𖼖𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽚 𖼍𖽕𖾑 𖼈𖽴 𖼊𖽑𖽺 𖼖𖽪 𖼐𖽑𖽡𖾐 𖼞𖽜．𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼦𖽑𖽺𖾑 𖼣𖽻𖾐 𖼐𖽑𖽡𖽪𖾑 𖼊𖽡 𖼮𖽑𖽻 𖼊𖽑𖽡𖾑 𖼣𖽻𖾐，𖼣𖽙𖾐 𖼹𖽦𖾑 𖼄𖽨 𖼄𖽨 𖼖𖽪 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐． 9 𖼐𖽑𖽡𖾐 𖽃𖽔𖾐 𖼹𖽻𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽪𖾑 𖼊𖽻 𖼊𖽑𖽺 𖼐𖽦𖾐 𖼄𖽔 𖼍𖽪𖾐，𖼽𖽻 𖼐𖽦𖾐 𖼂𖽻𖾐 𖼖𖽻𖾐 𖼊𖽶𖾐 𖼺𖽪𖾐 𖼄𖽡𖽻 𖼞𖽑𖽶𖾑 𖼂𖽺𖾐 𖼐𖽺𖾑？ 𖼐𖽑𖽡𖾐 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼈𖽪𖾐 𖼖𖽡𖾑 𖼽𖽕𖾑 𖼞𖽜 𖼺𖽙𖾐 𖼮𖽢𖾑𖽑 𖼺𖽦 𖼳𖽶𖾐 𖼦𖽑𖽙𖾐，𖼽𖽻 𖼄𖽳 𖼻𖽙 𖼊𖽑𖽺 𖼹𖽶𖾐 𖼐𖽑𖽡𖾐 𖼄𖽳 𖼻𖽙 𖼰𖽕𖾐，𖼐𖽑𖽡𖾐 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼻𖽜 𖼈𖽪𖾐 𖼖𖽡𖾑 𖼽𖽕𖾑 𖼊𖽑𖽺 𖼺𖽦 𖼳𖽶𖾐 𖼦𖽑𖽙𖾐． 10 𖽃𖽔𖾐 𖼺𖽺𖾑，𖽃𖽙𖾑 𖼐𖽑𖽡𖾐 𖼮𖽑𖽻𖾐 𖼍𖽪𖾐，𖼐𖽑𖽡𖾐 𖽃𖽔𖾑 𖼞𖽑𖽶𖾐 𖼷𖽑𖽻𖾐 𖼄𖽔 𖼐𖽙 𖼺𖽙𖾐 𖼮𖽢𖾑𖽑 𖼺𖽦 𖼦𖽑𖽙𖾐 𖼞𖽳𖾐 𖼄𖽡𖽻 𖼮𖽻𖾐 𖼊𖽻𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼣𖽙𖾐 𖼊𖽑𖽺 𖼐𖽦𖾐 𖼄𖽔 𖼍𖽪𖾐，𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼈𖽪𖾐 𖼖𖽡𖾑 𖼽𖽕𖾑 𖼞𖽳𖾐 𖼄𖽳 𖼻𖽙 𖼊𖽑𖽺 𖼹𖽶𖾐 𖼐𖽑𖽡𖾐 𖼄𖽳 𖼻𖽙 𖼰𖽕𖾐．’
11 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘𖼐𖽦𖾐 𖼄𖽺！𖼣𖽙𖾐 𖼐𖽑𖽡𖾐 𖽃𖽔𖾑 𖼞𖽑𖽶𖾐 𖼮𖽑𖽻𖾐 𖼈𖽡𖾑 𖼞𖽑𖽙 𖼊𖽚𖾐 𖼐𖽑𖽡𖾐 𖼊𖽑𖽺 𖼊𖽝 𖼊𖽦 𖼊𖽻𖾐，𖼣𖽙𖾐 𖼹𖽦𖾑 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼐𖽑𖽡𖾐 𖼄𖽳 𖼖𖽳𖾐 𖼦𖽑𖽺𖾑 𖼹𖽻𖾐 𖼊𖽑𖽺 𖼀𖽑𖽨 𖼐𖽑𖽡𖾐 𖼞𖽳𖾐 𖼮𖽑𖽻 𖼂𖽦𖾐 𖼊𖽑𖽺 𖼞𖽜 𖼊𖽻𖾐．𖼐𖽑𖽡𖾐 𖼞𖽳𖾐 𖼞𖽙𖾐 𖼮𖽑𖽻𖾐 𖼄𖽶 𖼐𖽑𖽡𖾐 𖼄𖽶 𖼖𖽚𖾐 𖼄𖽙𖾐 𖼐𖽑𖽡𖾐 𖼞𖽳𖾐 𖼄𖽳 𖼖𖽳𖾐 𖼖𖽙𖾐 𖼮𖽑𖽻𖾐 𖼊𖽑𖽙𖾑 𖼄𖽡𖽻 𖼂𖽺𖾐 𖼊𖽻𖾐． 12 𖼐𖽑𖽡𖾐 𖼞𖽑𖽶𖾐 𖼞𖽑𖽶𖾐 𖼐𖽺𖾐 𖼄𖽡𖽻 𖼦𖽑𖽺𖾑 𖼂𖽺𖾐 𖼦𖽑𖽙𖾐，𖼦𖽑𖽻𖾐 𖼊𖽑𖽻𖾐 𖼣𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐，𖼄𖽶 𖼐𖽑𖽡𖾐 𖼄𖽶 𖼖𖽚𖾐 𖼄𖽙𖾐 𖼄𖽡𖽻 𖼦𖽑𖽺𖾑 𖼂𖽺𖾐 𖼊𖽻𖾐．’” 13 𖼍𖽕𖾑 𖼈𖽪𖽺𖾑 𖼐𖽕 𖼍𖽔𖾐 𖼖𖽙𖾐 𖼀𖽦𖾐：“𖼣𖽙𖾐 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡𖽺 𖼂𖽚𖾐 𖼦𖽑𖽻𖾐．”
𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽑𖽺 𖼄𖽡𖽺 𖼦𖽑𖽙𖾐 𖼦𖽑𖽻𖾐，𖼐𖽑𖽡𖾐 𖼞𖽜 𖼳𖽶𖾐 𖼞𖽑𖽶𖾑 𖼀𖽡𖾐 𖼖𖽙𖾐 𖼄𖽔 𖼮𖽑𖽡𖾐 𖼊𖽻𖾐． 14 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼄𖽡𖽻 𖼦𖽑𖽺𖾑 𖼂𖽺𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽡𖾐 𖼂𖽦𖾐 𖼞𖽜 𖼽𖽻 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼊𖽪 𖼮𖽻𖾐，𖽃𖽔𖾐 𖼺𖽺𖾑 𖼐𖽑𖽡𖾐 𖼂𖽕 𖼳𖽶𖾑 𖼂𖽔𖾐 𖼖𖽙𖾐 𖼮𖽑𖽻𖾐 𖼽𖽚𖾐 𖼊𖽻𖾐 𖼺𖽪𖾐 𖽃𖽔𖾐 𖼞𖽶𖾑 𖼞𖽑𖽶𖾑 𖼽𖽚𖾐 𖼷𖽑𖽜𖾑 𖼷𖽑𖽜𖾐 𖼳𖽶𖾐 𖼊𖽻𖾐．”
15 𖽃𖽔𖾐 𖼺𖽺𖾑，𖼐𖽕 𖼍𖽔𖾐 𖼀𖽑𖽚𖾐 𖼽𖽻 𖽃𖽔𖾑 𖼞𖽑𖽶𖾐 𖼞𖽚 𖼽𖽡𖾐 𖼦𖽑𖽙𖾐．
𖼍𖽕𖾑 𖼈𖽪𖽺𖾑 𖼞𖽳𖾐 𖽃𖽔𖾐 𖼞𖽶𖾑 𖼞𖽑𖽶𖾑 𖼐𖽙𖾐 𖼳𖽶𖾐 𖼦𖽑𖽙𖾐
𖼈𖽪𖾐 𖼖𖽡𖾑 𖼽𖽕𖾑 𖼞𖽳𖾐 𖼄𖽳 𖼻𖽙 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼽𖽚𖾐 𖼺𖽪𖾐 𖽃𖽔𖾐 𖼞𖽶𖾑 𖼊𖽑𖽺 𖼽𖽺𖾐 𖼦𖽴 𖼦𖽫 𖼮𖽑𖽢𖾑 𖼊𖽝 𖼺𖽺𖾑，𖼽𖽻 𖼞𖽜 𖼐𖽙𖾐 𖼖𖽡 𖼷𖽶𖾐． 16 𖼍𖽕𖾑 𖼈𖽪𖽺𖾑 𖽃𖽔𖾐 𖼞𖽶𖾑 𖼦𖽑𖽺𖾑 𖼽𖽚𖾐 𖼖𖽙𖾐 𖼀𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼦𖽑𖽔𖾐 𖼖𖽺𖾑 𖼷𖽙𖾐 𖼷𖽜𖾐．𖼽𖽻 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐，𖼊𖽑𖽡 𖼦𖽑𖽦 𖼐𖽺𖾐 𖼄𖽡𖾑 𖼐𖽦𖾐 𖼀𖽙 𖼽𖽦． 17 𖼽𖽻 𖽃𖽔𖾑 𖼞𖽑𖽶𖾐 𖼞𖽳𖾐 𖼮𖽜𖾐 𖼀𖽑𖽙 𖼄𖽻 𖼞𖽻𖾑𖽑 𖼽𖽻 𖼀𖽙 𖼮𖽑𖽶𖾐 𖼦𖽑𖽡𖽚，𖼄𖽡𖾑 𖼐𖽦𖾐 𖼀𖽙 𖼮𖽑𖽻𖾐 𖼽𖽻 𖼊𖽑𖽺 𖼺𖽶𖾐 𖼍𖽪𖾐 𖼖𖽻𖾐 𖼊𖽡 𖼮𖽑𖽻，𖼦𖽑𖽻𖾐 𖼊𖽑𖽻𖾐 𖼽𖽻 𖼍𖽪𖾐 𖼖𖽻𖾐 𖼄𖽔 𖼦𖽶𖾐，𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼷𖽙𖾐 𖼖𖽺𖾑 𖼄𖽔 𖼷𖽙．
18 𖼳𖽶 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖽃𖽔𖾐 𖼞𖽶𖾑 𖼳𖽶𖾐 𖼦𖽑𖽙𖾐．𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖽃𖽔𖾐 𖼞𖽶𖾑 𖼳𖽶𖾐 𖼦𖽑𖽙𖾐 𖼞𖽑𖽶𖾑 𖼀𖽦𖾐 𖼽𖽻 𖼖𖽙𖾐 𖼊𖽑𖽧 𖼄𖽔 𖼂𖽡𖾑，𖼞𖽪𖾐 𖼮𖽡𖽺𖾐 𖼽𖽻 𖼈𖽳𖾐 𖼀𖽦𖾐：“𖼐𖽦𖾐 𖼄𖽺！𖽃𖽔𖾐 𖼞𖽶𖾑 𖼮𖽻𖾐 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐，𖽃𖽔 𖼐𖽺𖾑 𖼽𖽻 𖼊𖽑𖽺 𖼞𖽑𖽜𖾑，𖼽𖽻 𖽃𖽔 𖼐𖽺𖾑 𖼊𖽻 𖼂𖽪𖾑 𖼊𖽻 𖼐𖽙𖾐 𖼄𖽔 𖼦𖽶𖾐．𖽃𖽔𖾑 𖼄𖽳𖾐 𖽃𖽔𖾐 𖼞𖽶𖾑 𖼳𖽶𖾐 𖼦𖽑𖽙𖾐 𖼞𖽑𖽶𖾑 𖼦𖽑𖽺 𖼽𖽻 𖼊𖽑𖽺 𖼰𖽨𖾐 𖼊𖽑𖽡𖾑 𖼣𖽻𖾐，𖼽𖽻 𖼠𖽳𖾐 𖼠𖽳𖾐 𖼈𖽶 𖼮𖽡𖾐 𖼐𖽑𖽧𖾐 𖼮𖽑𖽸 𖼊𖽻𖾐．”
19 𖼍𖽕𖾑 𖼈𖽪𖽺𖾑 𖼽𖽻 𖼞𖽳𖾐 𖼮𖽜𖾐 𖼀𖽑𖽙 𖼷𖽙𖾐 𖼖𖽙𖾐 𖼮𖽑𖽻𖾐 𖼞𖽑𖽶𖾐 𖼞𖽑𖽶𖾐 𖼊𖽻 𖼊𖽑𖽜𖾐 𖼞𖽳𖾐 𖼄𖽡𖽻𖾐 𖼺𖽺𖾑，𖽃𖽔𖾐 𖼞𖽶𖾑 𖼳𖽶𖾐 𖼦𖽑𖽙𖾐 𖼞𖽑𖽶𖾑 𖼺𖽝𖾑．𖼽𖽻 𖼮𖽜𖾐 𖼀𖽑𖽙 𖼖𖽙𖾐 𖼊𖽻 𖼐𖽙𖾐：“𖽃𖽔𖾐 𖼞𖽶𖾑 𖼳𖽶𖾐 𖼦𖽑𖽙𖾐 𖼖𖽔？”
𖼽𖽻 𖼈𖽳𖾐 𖼊𖽻 𖼞𖽑𖽚：“𖼳𖽶𖾐 𖼦𖽑𖽙𖾐．”
20 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼄𖽡𖾑 𖼐𖽦𖾐 𖼀𖽙 𖼮𖽑𖽻𖾐 𖼍𖽪𖾐 𖼖𖽻𖾐，𖼞𖽶𖾐 𖼮𖽑𖽶𖾐 𖼷𖽑𖽡，𖼳𖽡𖽻𖾐 𖼷𖽑𖽳𖾐 𖼄𖽺𖾑，𖼀𖽑𖽡𖽻𖾐 𖼷𖽑𖽶 𖼖𖽳𖾑 𖼈𖽦，𖼽𖽺𖾐 𖼦𖽴 𖼦𖽫 𖼞𖽳𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽴，𖼠𖽙𖾑 𖼍𖽻𖾐 𖼀𖽑𖽚𖾐 𖼽𖽻 𖼮𖽻𖾐 𖼞𖽳𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐，𖼷𖽑𖽻𖾐 𖼹𖽡𖾐 𖼷𖽙𖾐 𖼦𖽙𖾐 𖼽𖽻𖾐 𖼞𖽜 𖼖𖽻𖾐 𖼺𖽺𖾑，𖼽𖽻 𖼷𖽙𖾐 𖼷𖽙．
21 𖼮𖽜𖾐 𖼀𖽑𖽙 𖼍𖽕𖾑 𖼈𖽪𖽺𖾑 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼐𖽺𖾑？ 𖽃𖽔𖾐 𖼞𖽶𖾑 𖼮𖽻𖾐 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼽𖽻 𖼖𖽙𖾐 𖼀𖽙𖾐 𖼷𖽙𖾐 𖼷𖽜𖾐 𖼮𖽑𖽧𖾐 𖼞𖽪 𖼣𖽶𖾐，𖽃𖽔𖾐 𖼞𖽶𖾑 𖼳𖽶𖾐 𖼦𖽑𖽙𖾐 𖼍𖽺𖾑 𖼺𖽺 𖼐𖽑𖽡𖾐 𖼞𖽑𖽚 𖼀𖽑𖽚𖾐 𖼍𖽪𖾐 𖼖𖽻𖾐 𖼷𖽙𖾐 𖼷𖽙！”
22 𖼽𖽻 𖼊𖽻 𖼞𖽑𖽚：“𖽃𖽔𖾐 𖼞𖽶𖾑 𖼮𖽻𖾐 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐，𖼣𖽙𖾐 𖼷𖽙𖾐 𖼷𖽜𖾐 𖼮𖽑𖽧𖾐 𖼞𖽪 𖼣𖽶𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼊𖽡 𖼮𖽑𖽻，𖼽𖽺𖾐 𖼦𖽴 𖼦𖽫 𖼣𖽙𖾐 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼺𖽺𖾑，𖽃𖽔𖾐 𖼞𖽶𖾑 𖼞𖽜 𖼄𖽔 𖼳𖽶𖾐 𖼊𖽻𖾐 𖼖𖽡𖾐 𖼷𖽻． 23 𖽃𖽔𖾑 𖼄𖽳𖾐 𖽃𖽔𖾐 𖼞𖽶𖾑 𖼳𖽶𖾐 𖼦𖽑𖽙𖾐，𖼣𖽙𖾐 𖼹𖽦𖾑 𖼷𖽙𖾐 𖼷𖽜𖾐 𖽃𖽔 𖼊𖽺𖾑 𖼂𖽺𖾐 𖼐𖽺𖾑？ 𖼣𖽙𖾐 𖼹𖽦𖾑 𖼽𖽻 𖼞𖽜 𖼠𖽙𖾑 𖼞𖽑𖽚 𖼖𖽻𖾐 𖼠𖽸𖾑 𖼍𖽳𖾐 𖼺𖽺 𖼖𖽔𖾑？ 𖼣𖽙𖾐 𖼽𖽻 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐 𖼊𖽻𖾐，𖼦𖽑𖽻𖾐 𖼊𖽑𖽻𖾐 𖼽𖽻 𖼀𖽑𖽚𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼞𖽚 𖼖𖽻𖾐 𖼄𖽔 𖼠𖽸𖾑．”
𖼺𖽙 𖼖𖽚 𖼄𖽴 𖼊𖽑𖽺 𖼽𖽚𖾐
24 𖼍𖽕𖾑 𖼈𖽪𖽺𖾑 𖼽𖽻 𖼄𖽳 𖼻𖽙 𖼂𖽕 𖼳𖽶𖾑 𖼂𖽔𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐，𖼽𖽻 𖼊𖽑𖽺 𖼐𖽑𖽧𖾐 𖼍𖽡𖾐，𖼽𖽻 𖼖𖽙𖾐 𖼮𖽑𖽻𖾐 𖼦𖽑𖽦．𖼂𖽕 𖼳𖽶𖾑 𖼂𖽔𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐，𖼍𖽕𖾑 𖼈𖽪𖽺𖾑 𖽃𖽔𖾐 𖼞𖽶𖾑 𖼊𖽑𖽺 𖼺𖽙 𖼖𖽚 𖼄𖽴 𖼄𖽡𖾐．𖼽𖽺𖾐 𖼦𖽴 𖼦𖽫 𖼖𖽺𖾑 𖽃𖽔𖾐 𖼞𖽶𖾑 𖼊𖽑𖽺 𖼐𖽑𖽧𖾐 𖼺𖽳 𖼺𖽺𖾑， 25 𖼺𖽡𖾐 𖼻𖽙 𖼐𖽕 𖼍𖽔𖾐 𖼊𖽑𖽺 𖼹𖽡𖾐 𖼂𖽡𖾐 𖼽𖽡𖾐，𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐，𖼽𖽻 𖼊𖽑𖽺 𖼽𖽺𖾐 𖼍𖽡 𖼍𖽡 𖼽𖽕𖾑 𖼄𖽡𖾐．
𖼽𖽱𖾐 𖼽𖽔𖾐 𖼖𖽔𖾐 𖼂𖽔𖾐 𖼖𖽪𖾐 𖼊𖽑𖽺 𖼊𖽝 𖽂𖽙𖾐 (𖼍𖽦𖾑 𖼳𖽕𖾑 20：1-3)
26 𖼞𖽑𖽶𖾑 𖼮𖽶𖾐，𖼽𖽱𖾐 𖼽𖽔𖾐 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼮𖽻𖾐 𖼺𖽪𖾐 𖼖𖽔𖾐 𖼂𖽔𖾐 𖼖𖽪𖾐 𖼊𖽑𖽺 𖼊𖽝，𖼖𖽪𖾐 𖼊𖽑𖽺 𖼊𖽝 𖽂𖽙𖾐． 27 𖼽𖽱𖾐 𖼽𖽔𖾐 𖼹𖽡𖾐 𖼖𖽦 𖼹𖽡𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼄𖽡𖽻𖾐 𖼽𖽡𖾐 𖼀𖽦𖾐：“𖼣𖽙𖾐 𖼖𖽔𖾐 𖼂𖽔𖾐 𖼖𖽪𖾐 𖼊𖽑𖽺 𖼊𖽝 𖼺𖽺𖾑，𖼈𖽡𖾐 𖼊𖽚𖾐 𖼊𖽑𖽺 𖼐𖽻𖾑 𖽂𖽙𖾐 𖼦𖽑𖽻𖾐． 28 𖽃𖽔𖾑 𖼄𖽳𖾐 𖼐𖽑𖽡𖾐 𖼷𖽺 𖼷𖽺𖾐 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐，𖼄𖽦 𖼀𖽑𖽙 𖼦𖽳 𖼖𖽪𖾐 𖼊𖽑𖽺 𖼰𖽻𖾑 𖼍𖽡，𖼖𖽪𖾐 𖼊𖽑𖽺 𖼊𖽝 𖽂𖽙𖾐 𖼖𖽡𖾐．𖼣𖽙𖾐 𖼽𖽡𖾐 𖼖𖽪𖾐 𖼦𖽑𖽺𖾑 𖼊𖽑𖽺 𖼊𖽝 𖽂𖽙𖾐 𖼊𖽑𖽡𖾑 𖼣𖽻𖾐，𖽃𖽔𖾑 𖼽𖽪𖾐 𖼷𖽑𖽻𖾐 𖼣𖽙𖾐 𖼄𖽡𖾐 𖼻𖽜 𖼖𖽪𖾐 𖼦𖽑𖽺𖾑 𖼊𖽑𖽺 𖼄𖽡𖾐 𖼊𖽻𖾐．”
29 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼀𖽺 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐，𖼄𖽦 𖼀𖽑𖽙 𖼦𖽳 𖼖𖽔𖾐 𖼂𖽔𖾐 𖼖𖽪𖾐 𖼊𖽑𖽺 𖼊𖽝 𖼽𖽡𖾐，𖼖𖽪𖾐 𖼦𖽑𖽺𖾑 𖼊𖽑𖽺 𖼊𖽝 𖽂𖽙𖾐．
30 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼊𖽴 𖼺𖽪𖾐 𖼍𖽕 𖼰𖽡𖾐，𖼍𖽕𖾑 𖼈𖽪𖽺𖾑 𖼮𖽑𖽢𖾑 𖼐𖽻𖾑 𖽂𖽙𖾐．𖼍𖽕 𖼰𖽡𖾐 𖼞𖽳𖾐 𖼳𖽳𖾐 𖼺𖽙𖾐 𖼷𖽑𖽡𖾐 𖼣𖽙 𖼰𖽡𖾐 𖼮𖽻𖾐，𖼍𖽕 𖼰𖽡𖾐 𖼊𖽑𖽺 𖼀𖽑𖽶 𖼊𖽴 𖼖𖽚𖾐 𖼊𖽑𖽡 𖼀𖽑𖽡 𖼂𖽚𖾐 𖼍𖽦𖾐，𖼷𖽑𖽻𖾐 𖼍𖽕 𖼰𖽡𖾐 𖼦𖽑𖽺𖾑 𖼈𖽺𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼍𖽴𖾑．𖼍𖽕𖾑 𖼈𖽪𖽺𖾑 𖼹𖽦𖾑 𖼖𖽪𖾐 𖼞𖽑𖽶𖾐 𖼮𖽑𖽻𖾐 𖼄𖽡𖽻 𖼐𖽑𖽡 𖼊𖽑𖽡 𖼂𖽜𖾐 𖼄𖽙𖾐 𖼈𖽺𖾐 𖼂𖽡𖾐 𖼽𖽡𖾐 𖼦𖽑𖽙𖾐． 31 𖼹𖽦𖾑 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼀𖽺 𖼊𖽑𖽺 𖼦𖽳 𖼂𖽡𖾐 𖼽𖽡𖾐，𖼊𖽑𖽡 𖼹𖽻𖾐 𖼞𖽜 𖼈𖽡 𖼹𖽶𖾐、𖼖𖽦 𖼰𖽡𖽦𖾐、𖽃𖽔𖾑 𖼷𖽑𖽚𖾐 𖼻𖽜 𖼄𖽡𖽻 𖼄𖽪𖾐，𖼊𖽑𖽡 𖼹𖽻𖾐 𖼞𖽜 𖼣𖽡𖽳 𖼊𖽪 𖼞𖽳𖾐 𖼄𖽡𖽻 𖼄𖽪𖾐．𖼍𖽕𖾑 𖼈𖽪𖽺𖾑 𖼽𖽕𖾑 𖼄𖽜𖾐 𖼄𖽡𖾐 𖼊𖽺𖾐 𖼞𖽳𖾐 𖼖𖽪𖾐 𖼞𖽑𖽙𖾐 𖼣𖽻𖾐 𖼞𖽑𖽶𖾐 𖼷𖽑𖽻𖾐 𖼀𖽺 𖼊𖽑𖽺 𖼦𖽑𖽺𖾑 𖼻𖽻𖾐 𖼂𖽺𖾐．𖼠𖽙𖾑 𖼍𖽻𖾐，𖼍𖽕𖾑 𖼈𖽪𖽺𖾑 𖼐𖽺𖾐 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼀𖽑𖽚𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼞𖽚 𖼽𖽡𖾐 𖼦𖽑𖽙𖾐．