𖽃𖽕𖾑 𖼐𖽜𖾑 𖼊𖽑𖽔𖾐 𖼄𖽔 𖼊𖽑𖽺 𖼮𖽑𖽡𖾐 𖼻𖽸 𖼊𖽑𖽙𖾑 𖼄𖽡𖽻 𖼂𖽺𖾐
13
1 𖼍𖽕𖾑 𖼈𖽪𖽺𖾑 𖼞𖽳𖾐 𖼻𖽙 𖼽𖽔𖾐 𖼳𖽔𖾐 𖼖𖽚 𖼦𖽑𖽔𖾐 𖼮𖽶𖾐 𖼽𖽚𖾐 𖼐𖽑𖽧𖾐 𖼐𖽜𖾑 𖼺𖽪𖾐 𖼐𖽜𖾑 𖼄𖽙𖾐 𖼊𖽑𖽡 𖼽𖽚𖾐 𖼮𖽻𖾐，𖼊𖽑𖽔𖾐 𖼄𖽔 𖼄𖽡𖾐，𖼍𖽕𖾑 𖼈𖽪𖽺𖾑 𖼞𖽳𖾐 𖼻𖽙 𖽃𖽕𖾑 𖼐𖽜𖾑 𖼽𖽻 𖼊𖽑𖽺 𖼐𖽦𖾐 𖼊𖽑𖽝𖾐． 2 𖽃𖽕𖾑 𖼐𖽜𖾑 𖼽𖽻 𖼐𖽜𖾑 𖼄𖽙𖾐 𖼊𖽑𖽔𖾐 𖼄𖽔 𖼊𖽑𖽺 𖼦𖽑𖽻𖾑 𖼖𖽙𖾐 𖼀𖽙𖾐 𖼺𖽺𖾑 𖼐𖽙𖾐 𖼄𖽳𖾐．𖼞𖽪𖾐 𖼮𖽡𖽺𖾐 𖼊𖽑𖽔𖾐 𖼄𖽔 𖼦𖽑𖽺𖾑 𖼻𖽙 𖼄𖽳 𖼐𖽜𖾐 𖼐𖽑𖽡𖾐 𖼣𖽻𖾐 𖼺𖽺𖾑，𖽃𖽕𖾑 𖼐𖽜𖾑 𖼽𖽻 𖼖𖽙𖾐 𖼐𖽳 𖼽𖽡 𖼞𖽳𖾐 𖼄𖽪𖾐 𖼊𖽪𖾐 𖼄𖽔 𖼮𖽻𖾐．3 𖽃𖽕𖾑 𖼐𖽜𖾑 𖼞𖽙𖾐 𖼮𖽑𖽻 𖼊𖽑𖽡 𖼽𖽚𖾐 𖼮𖽻𖾐，𖼽𖽱𖾐 𖼐𖽕 𖼍𖽕 𖼄𖽡𖾐，𖼞𖽑𖽶𖾑 𖼍𖽕𖾑 𖼈𖽪𖽺𖾑 𖼽𖽻 𖼍𖽕𖾑 𖼳𖽶𖾑 𖼄𖽡 𖼽𖽕𖾑 𖼞𖽳𖾐 𖼻𖽙 𖼣𖽻𖾐．𖼽𖽱𖾐 𖼐𖽕 𖼍𖽕 𖼞𖽑𖽶𖾑 𖼦𖽑𖽔𖾐 𖼮𖽶𖾐 𖼊𖽝𖾑 𖼞𖽚 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼣𖽻𖾐． 4 𖼽𖽻 𖽃𖽕𖾑 𖼐𖽜𖾑 𖼊𖽑𖽺 𖼊𖽻 𖼐𖽙𖾐 𖼀𖽦𖾐：“𖼈𖽪𖾐 𖼍𖽦 𖼞𖽳𖾐 𖼻𖽙 𖽃𖽔𖾐！𖼐𖽑𖽡𖾐 𖼀𖽦𖾐 𖼣𖽙𖾐 𖼖𖽙𖾐 𖼊𖽑𖽧 𖼖𖽻𖾐，𖼐𖽑𖽡𖾐 𖽃𖽔𖾐 𖼹𖽻𖾐 𖽂𖽙𖾐 𖼮𖽻𖾐 𖽂𖽙𖾐 𖼠𖽴𖾐 𖼐𖽺𖾑？”
𖽃𖽕𖾑 𖼐𖽜𖾑 𖼀𖽦𖾐：“𖼣𖽙𖾐 𖼣𖽙𖾐 𖼐𖽑𖽳𖾐 𖼄𖽻 𖼽𖽔𖾐 𖼳𖽔𖾐 𖼖𖽚 𖼞𖽳𖾐 𖼐𖽜𖾑 𖼄𖽙𖾐 𖼊𖽑𖽔𖾐 𖼄𖽔 𖼊𖽑𖽺 𖼦𖽑𖽻𖾑．”
5 𖼽𖽱𖾐 𖼐𖽕 𖼍𖽕 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽦 𖼞𖽪𖾐 𖼊𖽑𖽺 𖼽𖽦 𖼺𖽺𖾑 𖼐𖽙𖾐 𖼖𖽙𖾐 𖼖𖽝𖾑 𖼮𖽑𖽳𖾐．𖼐𖽑𖽡𖽻𖾐 𖼀𖽙 𖼖𖽻𖾐 𖼐𖽑𖽡𖾐 𖼊𖽑𖽺 𖼐𖽦𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼽𖽻 𖼖𖽙𖾐 𖼮𖽑𖽻𖾐 𖼀𖽦𖾐：‘ 𖼐𖽑𖽡𖾐 𖼣𖽙𖾐 𖼐𖽜𖾑 𖼄𖽙𖾐 𖼊𖽑𖽔𖾐 𖼄𖽔 𖼊𖽑𖽺 𖼀𖽦𖾐 𖼺𖽺𖾑，𖼷𖽙 𖼊𖽪𖾐 𖼈𖽺𖾐 𖼣𖽙𖾐 𖼞𖽜 𖼷𖽙 𖼖𖽻𖾐，𖼽𖽻 𖼞𖽜 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼷𖽙 𖼊𖽪𖾐 𖼂𖽺𖾐 𖼳𖽡𖽻𖾐 𖼺𖽺𖾑，𖼣𖽙𖾐 𖼞𖽜 𖽂𖽙𖾐 𖼐𖽦𖾐 𖼄𖽡𖽻𖾐 𖼊𖽙𖾐，𖼽𖽻 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼷𖽙 𖼊𖽪𖾐 𖼷𖽶𖾐 𖽂𖽙𖾐 𖼷𖽙 𖼊𖽙𖾐．’”
6 𖽃𖽔𖾐 𖼺𖽺𖾑，𖽃𖽕𖾑 𖼐𖽜𖾑 𖼐𖽙𖾐 𖼖𖽙𖾐 𖼖𖽝𖾑 𖼞𖽑𖽻𖾑 𖼽𖽦．𖼈𖽪𖾐 𖼍𖽦 𖼖𖽻𖾐 𖼽𖽻 𖼊𖽑𖽺 𖼐𖽦𖾐，𖼽𖽻 𖼈𖽪𖾐 𖼍𖽦 𖼖𖽙𖾐 𖼀𖽦𖾐：“𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼣𖽙𖾐 𖼐𖽜𖾑 𖼄𖽙𖾐 𖼊𖽑𖽔𖾐 𖼄𖽔 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼞𖽜 𖼣𖽙𖾐 𖼄𖽦𖾐 𖼊𖽪 𖼮𖽑𖽡𖽺 𖼮𖽻𖾐 𖽃𖽔𖾑 𖼂𖽻𖾐 𖼐𖽑𖽡 𖼊𖽝𖾐 𖼂𖽺𖾐，𖼣𖽙𖾐 𖼽𖽻 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼷𖽶𖾐 𖼂𖽻𖾐 𖼖𖽻𖾐 𖽂𖽙𖾐 𖼷𖽙 𖼊𖽙𖾐．” 7 𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼹𖽡𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖼽𖽡𖾐 𖼊𖽑𖽔𖾐 𖼄𖽔 𖼖𖽙𖾐 𖼀𖽦𖾐：“𖼐𖽑𖽡𖾐 𖼐𖽑𖽡𖽻𖾐 𖼍𖽕𖾑 𖽃𖽕𖾑 𖼐𖽜𖾑 𖼦𖽑𖽺𖾐 𖼞𖽑𖽶𖾐 𖼽𖽡𖾐，𖼽𖽻 𖼖𖽙𖾐 𖼀𖽙𖾐 𖼷𖽙 𖼊𖽪𖾐 𖼂𖽺𖾐 𖼳𖽡𖽻𖾐．”
8 𖼊𖽑𖽔𖾐 𖼄𖽔 𖼽𖽡𖾐 𖼽𖽻 𖼍𖽕𖾑 𖽃𖽕𖾑 𖼐𖽜𖾑 𖼞𖽳𖾐 𖽃𖽔𖾑 𖼞𖽑𖽶𖾐 𖼽𖽡𖾐，𖽃𖽕𖾑 𖼐𖽜𖾑 𖼞𖽑𖽻𖾑 𖼽𖽦 𖼍𖽳𖾐．𖼊𖽑𖽔𖾐 𖼄𖽔 𖼷𖽙𖾐 𖼄𖽶𖾐 𖼊𖽑𖽡 𖼀𖽧𖾑 𖼈𖽺𖾐 𖼂𖽻𖾐 𖼖𖽻𖾐 𖼻𖽸 𖼀𖽑𖽢 𖼺𖽺𖾑，𖽃𖽕𖾑 𖼐𖽜𖾑 𖼄𖽦𖾐 𖼊𖽪 𖼮𖽑𖽡𖽺 𖼮𖽻𖾐 𖽃𖽔𖾑 𖼂𖽻𖾐 𖼂𖽺𖾐，𖼦𖽑𖽔𖾐 𖼖𖽺𖾑 𖽃𖽔𖾑 𖼂𖽻𖾐 𖼣𖽴𖾑 𖼄𖽡𖾐 𖼦𖽑𖽙𖾐． 9 𖼊𖽑𖽔𖾐 𖼄𖽔 𖽃𖽕𖾑 𖼐𖽜𖾑 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖽃𖽔𖾐 𖼮𖽑𖽳𖾐 𖼠𖽻𖾐 𖼞𖽑𖽶𖾐 𖽃𖽔𖾑 𖼂𖽻𖾐 𖼈𖽺𖾐 𖼊𖽚𖾐 𖼖𖽻𖾐，𖼦𖽑𖽻𖾐 𖼊𖽑𖽻𖾐 𖽃𖽕𖾑 𖼐𖽜𖾑 𖼷𖽙 𖼄𖽔 𖼦𖽶𖾐，𖼽𖽻 𖼀𖽦𖾐：“𖼷𖽑𖽻𖾐 𖼷𖽪𖾐 𖼞𖽜 𖼦𖽑𖽺𖾑 𖼠𖽻𖾐 𖼰𖽡𖾑 𖼦𖽑𖽙𖾐 𖼊𖽚𖾐 𖼽𖽡𖾐！” 𖽃𖽔𖾐 𖼺𖽺𖾑，𖼷𖽑𖽻𖾐 𖼷𖽪𖾐 𖼽𖽻 𖼊𖽑𖽺 𖼰𖽡𖾑 𖼦𖽑𖽙𖾐 𖼊𖽚𖾐 𖼽𖽡𖾐 𖼦𖽑𖽻𖾐．
10 𖽃𖽕𖾑 𖼐𖽜𖾑 𖼊𖽑𖽔𖾐 𖼄𖽔 𖼖𖽙𖾐 𖼀𖽦𖾐：“𖼷𖽙 𖼊𖽪𖾐 𖼈𖽺𖾐 𖼽𖽦 𖼦𖽑𖽺𖾐 𖼞𖽑𖽶𖾐 𖼊𖽡 𖼖𖽻𖾐，𖼣𖽙𖾐 𖼞𖽜 𖼐𖽑𖽡𖾐 𖼖𖽦 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼷𖽶𖾐 𖼂𖽻𖾐 𖼖𖽻𖾐 𖽂𖽙𖾐 𖼷𖽙 𖼊𖽙𖾐．” 𖼊𖽑𖽔𖾐 𖼄𖽔 𖼽𖽻 𖼂𖽺𖾐 𖼀𖽑𖽢 𖼺𖽪𖾐 𖽃𖽔𖾑 𖼂𖽻𖾐 𖼈𖽺𖾐 𖼽𖽦 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐，𖼽𖽻 𖼍𖽕𖾑 𖽃𖽕𖾑 𖼐𖽜𖾑 𖼞𖽳𖾐 𖼞𖽑𖽻𖾑 𖼽𖽡𖾐． 11 𖼊𖽑𖽔𖾐 𖼄𖽔 𖼽𖽡𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽡𖾐，𖼈𖽺𖾐 𖼽𖽻 𖼞𖽜 𖼷𖽙 𖼞𖽑𖽶𖾑 𖼮𖽶𖾐，𖽃𖽕𖾑 𖼐𖽜𖾑 𖼽𖽻 𖼖𖽦 𖼀𖽑𖽦𖾐 𖼊𖽑𖽺 𖼺𖽶𖾐 𖼍𖽡 𖼺𖽺𖾑，𖼀𖽦𖾐：“𖼐𖽜𖾑 𖼐𖽜𖾑 𖼐𖽑𖽡𖾐 𖼖𖽻𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼽𖽦 𖼖𖽻𖾐 𖼄𖽺！”
12 𖼊𖽑𖽔𖾐 𖼄𖽔 𖼽𖽻 𖼖𖽙𖾐 𖼀𖽦𖾐：“𖼣𖽙𖾐 𖽃𖽔 𖼍𖽕𖾑！𖼦𖽑𖽺𖾑 𖼻𖽻𖾐 𖼊𖽑𖽔 𖼂𖽺𖾐，𖼣𖽙𖾐 𖼊𖽑𖽺 𖼊𖽑𖽔 𖼐𖽑𖽧𖾐 𖼣𖽡𖽳𖾐 𖼞𖽜．𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼦𖽑𖽺𖾑 𖼳𖽶 𖼄𖽡𖽻 𖼂𖽺𖾐 𖼄𖽔 𖼊𖽙𖾐，𖼐𖽑𖽡𖾐 𖼳𖽡𖽦𖾑 𖼍𖽻𖾐 𖼄𖽡𖽻 𖼦𖽑𖽺𖾑 𖼊𖽑𖽔 𖼂𖽺𖾐． 13 𖼐𖽑𖽡𖾐 𖼣𖽙𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖽃𖽔 𖼊𖽺𖾐 𖼣𖽙𖾐 𖼞𖽳𖾐 𖼳𖽡𖽦𖾑 𖼍𖽻𖾐 𖼊𖽪𖾐 𖼊𖽑𖽺 𖽂𖽙𖾐 𖼂𖽡𖾑 𖼍𖽡 𖼊𖽙𖾐 𖼐𖽺𖾑？ 𖼐𖽑𖽡𖾐 𖼖𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼷𖽑𖽻𖾐 𖼣𖽡𖽳𖾐 𖼀𖽑𖽢 𖼦𖽑𖽻𖾐．𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼽𖽡𖾐 𖼈𖽪𖾐 𖼍𖽦 𖼖𖽙𖾐 𖼀𖽦𖾐，𖼽𖽻 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼊𖽑𖽺 𖼀𖽑𖽨 𖼐𖽑𖽡𖾐 𖼖𖽙𖾐 𖼞𖽜 𖼊𖽻𖾐．”
14 𖼦𖽑𖽻𖾐 𖼊𖽑𖽻𖾐 𖽃𖽕𖾑 𖼐𖽜𖾑 𖼊𖽻 𖼐𖽙𖾐 𖼄𖽔 𖼦𖽶𖾐，𖼽𖽻 𖼊𖽑𖽔𖾐 𖼄𖽔 𖼦𖽶𖾑 𖼄𖽔 𖼷𖽑𖽶𖾐 𖽂𖽙 𖼐𖽑𖽡𖾐 𖼺𖽺𖾑，𖼊𖽑𖽔𖾐 𖼄𖽔 𖼊𖽑𖽺 𖼮𖽑𖽡𖾐 𖼻𖽸 𖼊𖽑𖽙𖾑 𖼄𖽡𖽻 𖼂𖽺𖾐，𖼽𖽻 𖼖𖽙𖾐 𖼮𖽑𖽻𖾐 𖼽𖽦．
15 𖼄𖽡𖽻 𖼦𖽑𖽺𖾑 𖼠𖽙𖾑 𖼍𖽻𖾐，𖽃𖽕𖾑 𖼐𖽜𖾑 𖼦𖽑𖽔𖾐 𖼮𖽶𖾐 𖼊𖽑𖽔𖾐 𖼄𖽔 𖼊𖽑𖽺 𖼦𖽶𖾑，𖽃𖽔𖾑 𖼄𖽳𖾐 𖼽𖽻 𖽃𖽙𖾑 𖼄𖽺 𖼊𖽑𖽙 𖼊𖽑𖽔𖾐 𖼄𖽔 𖼊𖽑𖽺 𖼦𖽑𖽻𖾑 𖼞𖽑𖽶𖾑 𖼦𖽶𖾑 𖼷𖽑𖽶𖾐 𖼊𖽑𖽔𖾐 𖼄𖽔 𖼊𖽑𖽺 𖼦𖽶𖾑．𖽃𖽔𖾐 𖼺𖽺𖾑，𖽃𖽕𖾑 𖼐𖽜𖾑 𖼊𖽑𖽔𖾐 𖼄𖽔 𖼖𖽙𖾐 𖼀𖽦𖾐：“𖼐𖽑𖽡𖾐 𖼍𖽪𖾐 𖼖𖽻𖾐，𖼺𖽜 𖼽𖽡𖾐 𖼦𖽻！”
16 𖼊𖽑𖽔𖾐 𖼄𖽔 𖼹𖽦𖾑 𖼽𖽻 𖼖𖽙𖾐 𖼀𖽦𖾐：“𖼣𖽙𖾐 𖽃𖽔𖾐 𖼍𖽕𖾑 𖽃𖽔𖾐！𖼦𖽑𖽺𖾑 𖼻𖽻𖾐 𖼊𖽑𖽔 𖼂𖽺𖾐，𖼐𖽑𖽡𖾐 𖼣𖽙𖾐 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼞𖽑𖽶𖾑 𖼐𖽑𖽡𖾐 𖼣𖽙𖾐 𖼊𖽑𖽺 𖼮𖽑𖽡𖾐 𖼻𖽸 𖼊𖽑𖽙𖾑 𖼄𖽡𖽻 𖼂𖽺𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼦𖽶𖾑 𖼄𖽔 𖼷𖽑𖽶𖾐 𖼈𖽳 𖼺𖽺．”
𖼦𖽑𖽻𖾐 𖼊𖽑𖽻𖾐，𖽃𖽕𖾑 𖼐𖽜𖾑 𖼽𖽻 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼄𖽔 𖼦𖽶𖾐 𖼺𖽺𖾑， 17 𖼮𖽜𖾐 𖼀𖽑𖽙 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼀𖽦𖾐：“𖼻𖽙 𖼄𖽳 𖼦𖽑𖽺𖾑 𖼽𖽚𖾐 𖼊𖽑𖽺 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼞𖽕 𖼊𖽦 𖼀𖽙 𖼊𖽑𖽧 𖼺𖽺𖾑，𖽃𖽔𖾑 𖼊𖽪 𖼰𖽡𖽻𖾑 𖼍𖽡 𖼖𖽡𖾐．”
18 𖼞𖽑𖽶𖾑 𖼮𖽶𖾐，𖼊𖽑𖽔𖾐 𖼄𖽔 𖼖𖽦 𖼊𖽧 𖼳𖽶𖾐 𖼺𖽪𖾐 𖼀𖽑𖽡𖽻𖾐 𖼮𖽻 𖼹𖽳𖾐 𖼈𖽦 𖼍𖽳𖾐，𖼞𖽪𖾐 𖼮𖽡𖽺𖾐 𖼺𖽙𖾐 𖼖𖽙𖾐 𖼄𖽔 𖼇𖽪𖾐 𖼺𖽺 𖼺𖽪𖾐 𖼈𖽪𖾐 𖼍𖽦 𖼞𖽳𖾐 𖼻𖽙 𖼄𖽳 𖼞𖽑𖽙𖾐 𖼣𖽻𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼈𖽦 𖼺𖽪𖾐 𖼣𖽻𖾐．𖽃𖽕𖾑 𖼐𖽜𖾑 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽔𖾐 𖼄𖽔 𖼊𖽑𖽺 𖼞𖽕 𖼊𖽦 𖼀𖽙 𖼊𖽑𖽧 𖼺𖽺𖾑，𖽃𖽔𖾑 𖼊𖽪 𖼰𖽡𖽻𖾑 𖼍𖽡 𖼦𖽑𖽙𖾐． 19 𖼊𖽑𖽔𖾐 𖼄𖽔 𖼐𖽑𖽡𖾑 𖼄𖽶𖾐 𖼰𖽡𖽕𖾐 𖼈𖽪𖾑 𖼊𖽡𖾐 𖼊𖽑𖽺 𖼍𖽦𖾐，𖼖𖽦 𖼊𖽧 𖼳𖽶𖾐 𖼺𖽪𖾐 𖼀𖽑𖽡𖽻𖾐 𖼮𖽻 𖼹𖽳𖾐 𖼰𖽸𖾐 𖼮𖽑𖽡𖽦 𖼦𖽑𖽙𖾐，𖼹𖽦𖾑 𖼖𖽦 𖼀𖽑𖽦𖾐 𖼊𖽑𖽡 𖼂𖽦𖾐 𖼀𖽑𖽨 𖼈𖽪𖾑 𖼊𖽡𖾐 𖼊𖽑𖽺 𖼮𖽑𖽨𖾑 𖼍𖽡，𖽂𖽙𖾐 𖼺𖽜 𖽂𖽙𖾐 𖼣𖽶𖾐 𖼮𖽸．
20 𖼽𖽻 𖼍𖽕𖾑 𖼽𖽔𖾐 𖼳𖽔𖾐 𖼖𖽚 𖼽𖽻 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖽃𖽔 𖼍𖽕𖾑 𖽃𖽕𖾑 𖼐𖽜𖾑 𖼐𖽑𖽡𖾐 𖼖𖽙𖾐 𖼐𖽳 𖼍𖽳𖾐 𖼦𖽑𖽻𖾐 𖼣𖽻𖾐 𖼣𖽻𖾐？ 𖼣𖽙𖾐 𖼐𖽜𖾑 𖼐𖽜𖾑 𖽃𖽔𖾐！𖼐𖽑𖽡𖾐 𖽃𖽔𖾑 𖼄𖽳𖾐 𖼮𖽑𖽡𖽪 𖼊𖽑𖽔 𖼊𖽑𖽧，𖼽𖽻 𖼞𖽑𖽶𖾑 𖼐𖽑𖽡𖾐 𖽃𖽔 𖼍𖽕𖾑 𖼣𖽻𖾐，𖼐𖽑𖽡𖾐 𖼄𖽡𖽻 𖼦𖽑𖽺𖾑 𖼊𖽑𖽔 𖼀𖽑𖽨 𖼐𖽑𖽧𖾐 𖼄𖽙𖾐 𖼊𖽑𖽺 𖼍𖽙𖾑．” 𖽃𖽔𖾐 𖼺𖽺𖾑，𖼊𖽑𖽔𖾐 𖼄𖽔 𖼮𖽑𖽻 𖼂𖽦𖾐 𖼄𖽔 𖼮𖽻𖾐，𖼮𖽑𖽧𖾐 𖼞𖽪 𖼠𖽚 𖼳𖽚𖾑 𖼄𖽙𖾐 𖼽𖽔𖾐 𖼳𖽔𖾐 𖼖𖽚 𖽃𖽔𖾑 𖼞𖽑𖽶𖾐 𖼞𖽳𖾐 𖼮𖽻𖾐．
21 𖼍𖽕𖾑 𖼈𖽪𖽺𖾑 𖼈𖽪𖾐 𖼍𖽦 𖼄𖽡𖽻 𖼦𖽑𖽺𖾑 𖼊𖽻 𖼮𖽨 𖼺𖽺𖾑，𖼦𖽑𖽔𖾐 𖼮𖽶𖾐 𖼦𖽑𖽦 𖼞𖽑𖽴． 22 𖼽𖽔𖾐 𖼳𖽔𖾐 𖼖𖽚 𖽃𖽕𖾑 𖼐𖽜𖾑 𖼊𖽑𖽺 𖼊𖽑𖽡 𖼳𖽶 𖼖𖽺𖾑 𖼄𖽔 𖼀𖽦𖾐．𖼽𖽔𖾐 𖼳𖽔𖾐 𖼖𖽚 𖽃𖽕𖾑 𖼐𖽜𖾑 𖼊𖽑𖽺 𖼦𖽶𖾑，𖼞𖽪𖾐 𖼮𖽡𖽺𖾐 𖽃𖽕𖾑 𖼐𖽜𖾑 𖼊𖽑𖽔𖾐 𖼄𖽔 𖼊𖽑𖽺 𖼮𖽑𖽡𖾐 𖼻𖽸 𖼊𖽑𖽙𖾑 𖼄𖽡𖽻 𖼂𖽺𖾐 𖼦𖽑𖽙𖾐．
𖼽𖽔𖾐 𖼳𖽔𖾐 𖼖𖽚 𖼽𖽻 𖼐𖽜𖾑 𖼄𖽙𖾐 𖼖𖽙𖾐 𖼀𖽙𖾐 𖽃𖽕𖾑 𖼐𖽜𖾑 𖼊𖽑𖽺 𖼺𖽦 𖼦𖽑𖽙𖾐
23 𖼐𖽑𖽡 𖼞𖽑𖽚 𖼠𖽚 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽡 𖼇𖽕 𖼖𖽡𖽦 𖼄𖽡𖾐 𖼊𖽺𖾐 𖼦𖽜 𖼷𖽜𖾐 𖼞𖽳𖾐 𖼂𖽔𖾐 𖼖𖽧𖾑 𖼳𖽡𖽕𖾑 𖼺𖽙 𖼄𖽡𖾐 𖼊𖽺𖾐 𖼞𖽑𖽶𖾑 𖼠𖽻𖾐，𖼽𖽔𖾐 𖼳𖽔𖾐 𖼖𖽚 𖼷𖽑𖽻𖾐 𖼰𖽙𖾐 𖼽𖽻 𖼖𖽙𖾐 𖼀𖽙𖾐 𖼽𖽻𖾐 𖼳𖽡𖽦𖾐 𖼷𖽑𖽳，𖼽𖽻 𖼈𖽪𖾐 𖼍𖽦 𖼞𖽳𖾐 𖼻𖽙 𖼞𖽑𖽙𖾐 𖼣𖽻𖾐 𖼊𖽑𖽺 𖽃𖽶𖾐 𖼽𖽻 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐． 24 𖼽𖽔𖾐 𖼳𖽔𖾐 𖼖𖽚 𖼽𖽡𖾐 𖼈𖽪𖾐 𖼍𖽦 𖼖𖽙𖾐 𖼄𖽡𖽻𖾐 𖼺𖽺𖾑，𖼀𖽦𖾐：“𖼐𖽦𖾐 𖼄𖽺！𖽃𖽔𖾑 𖼄𖽳𖾐 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼷𖽑𖽻𖾐 𖼰𖽙𖾐 𖼽𖽻𖾐 𖼳𖽡𖽦𖾐 𖼷𖽑𖽳，𖼈𖽪𖾐 𖼍𖽦 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼽𖽡𖾐 𖼞𖽜．”
25 𖼈𖽪𖾐 𖼍𖽦 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼀𖽦𖾐：“𖼣𖽙𖾐 𖼻𖽙 𖽃𖽔𖾐！𖼣𖽙𖾐 𖼈𖽳𖾐 𖼄𖽳𖾑 𖼄𖽳 𖼽𖽡𖾐 𖼊𖽡𖾑𖽑 𖼣𖽻𖾐，𖼐𖽑𖽡𖾐 𖼞𖽳𖾐 𖼈𖽺𖾐 𖼖𖽡 𖼀𖽑𖽢 𖼠𖽸𖾑．” 𖼽𖽔𖾐 𖼳𖽔𖾐 𖼖𖽚 𖼞𖽑𖽙𖾐 𖼊𖽙𖾐 𖼊𖽙𖾐 𖼈𖽪𖾐 𖼍𖽦 𖼊𖽑𖽺 𖼮𖽑𖽡 𖼮𖽡𖽺𖾐 𖼖𖽺𖾑，𖼈𖽪𖾐 𖼍𖽦 𖼽𖽡𖾐 𖼄𖽔 𖼦𖽶𖾐，𖼄𖽢 𖼦𖽙𖾐 𖼽𖽻 𖼊𖽑𖽺 𖼞𖽜 𖼍𖽺𖾑 𖼣𖽻𖾐．
26 𖼽𖽔𖾐 𖼳𖽔𖾐 𖼖𖽚 𖼀𖽦𖾐：“𖼈𖽪𖾐 𖼍𖽦 𖼐𖽑𖽡𖾐 𖼄𖽔 𖼽𖽡𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽻𖾐 𖼍𖽕𖾑 𖽃𖽕𖾑 𖼐𖽜𖾑 𖼞𖽜 𖼣𖽙𖾐 𖼖𖽙𖾐 𖼮𖽑𖽻𖾐 𖼽𖽡𖾐．”
𖼈𖽪𖾐 𖼍𖽦 𖼽𖽻 𖼊𖽑𖽺 𖼊𖽻 𖼐𖽙𖾐：“𖽃𖽔𖾐 𖼹𖽻𖾐 𖼽𖽻 𖼞𖽜 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼖𖽡𖾐 𖼐𖽺𖾑？” 27 𖼽𖽔𖾐 𖼳𖽔𖾐 𖼖𖽚 𖼞𖽑𖽙𖾐 𖼊𖽙𖾐 𖼊𖽙𖾐 𖼈𖽪𖾐 𖼍𖽦 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖼈𖽪𖾐 𖼍𖽦 𖼽𖽻 𖼀𖽦𖾐 𖼖𖽙𖾐 𖼮𖽑𖽻𖾐 𖽃𖽕𖾑 𖼐𖽜𖾑 𖼐𖽺𖾐 𖼈𖽪𖾐 𖼍𖽦 𖼞𖽳𖾐 𖼻𖽙 𖼞𖽑𖽶𖾑 𖼹𖽻𖾐 𖼞𖽜 𖼽𖽔𖾐 𖼳𖽔𖾐 𖼖𖽚 𖼖𖽙𖾐 𖼮𖽑𖽻𖾐 𖼽𖽡𖾐．
28 𖼽𖽔𖾐 𖼳𖽔𖾐 𖼖𖽚 𖼽𖽻 𖼞𖽳𖾐 𖼮𖽜𖾐 𖼀𖽑𖽙 𖼖𖽙𖾐 𖼀𖽦𖾐 𖼄𖽪𖾑：“𖼐𖽑𖽡𖾐 𖼈𖽳𖾐 𖼐𖽦𖾐 𖼍𖽳𖾐 𖼖𖽡𖾐！𖽃𖽕𖾑 𖼐𖽜𖾑 𖼮𖽶𖾐 𖼊𖽻𖾐 𖼞𖽜𖾐 𖼺𖽜𖾐 𖼺𖽺𖾑，𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 ‘ 𖽃𖽕𖾑 𖼐𖽜𖾑 𖼊𖽑𖽺 𖼺𖽦 ’ 𖼀𖽦𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼽𖽻 𖼊𖽑𖽺 𖼺𖽦 𖼖𖽡𖾐．𖼮𖽡𖽮𖾐 𖼄𖽔 𖼻𖽻𖾐，𖼦𖽑𖽺𖾑 𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼀𖽦𖾐 𖼄𖽪𖾑 𖼺𖽪𖾐 𖼄𖽔 𖼣𖽻𖾐 𖼖𖽔？ 𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼈𖽳 𖼺𖽪𖾐 𖼷𖽑𖽻𖾐 𖼂𖽺𖾐 𖼖𖽡𖾐．” 29 𖽃𖽔𖾐 𖼺𖽺𖾑，𖼽𖽔𖾐 𖼳𖽔𖾐 𖼖𖽚 𖼞𖽳𖾐 𖼮𖽜𖾐 𖼀𖽑𖽙 𖼽𖽻 𖼞𖽑𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖽃𖽕𖾑 𖼐𖽜𖾑 𖼊𖽑𖽺 𖼺𖽦 𖼦𖽑𖽙𖾐．𖼈𖽪𖾐 𖼍𖽦 𖼞𖽳𖾐 𖼻𖽙 𖼄𖽳𖾑 𖼄𖽳 𖼍𖽪𖾐 𖼖𖽻𖾐，𖼽𖽻 𖼄𖽳𖾑 𖼞𖽳𖾐 𖼖𖽙𖾐 𖼹𖽶𖾐 𖼷𖽳 𖼺𖽺𖾑 𖼮𖽡𖽪 𖼀𖽑𖽻𖾐 𖼍𖽪𖾐 𖼦𖽑𖽙𖾐．
30 𖼽𖽻 𖼈𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼮𖽻𖾐 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐 𖼹𖽦𖾐，𖼄𖽡𖽻 𖼦𖽑𖽺𖾑 𖼀𖽦𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼊𖽑𖽧 𖼺𖽪𖾐 𖼮𖽻𖾐：“𖼈𖽪𖾐 𖼍𖽦 𖼞𖽳𖾐 𖼻𖽙 𖼄𖽳𖾑 𖼄𖽳 𖼊𖽑𖽺 𖼽𖽔𖾐 𖼳𖽔𖾐 𖼖𖽚 𖼮𖽑𖽢𖾑 𖼺𖽦 𖼦𖽑𖽙𖾐 𖼦𖽑𖽻𖾐，𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼷𖽺𖾐．” 31 𖼈𖽪𖾐 𖼍𖽦 𖼍𖽪𖾐 𖼖𖽻𖾐 𖼺𖽺𖾑，𖼀𖽑𖽡𖽻𖾐 𖼷𖽑𖽶 𖼰𖽸𖾐 𖼮𖽑𖽡𖽦，𖼄𖽡𖾑 𖼐𖽦𖾐 𖼀𖽙 𖼽𖽦．𖼽𖽻 𖼀𖽙 𖼮𖽑𖽶𖾐 𖼮𖽻𖾐 𖼺𖽪𖾐 𖼮𖽜𖾐 𖼀𖽑𖽙 𖼖𖽺𖾑 𖼄𖽳𖾑 𖼄𖽳 𖼀𖽑𖽡𖽻𖾐 𖼷𖽑𖽶 𖼰𖽸𖾐 𖼮𖽑𖽡𖽦．
32 𖼍𖽕𖾑 𖼈𖽪𖽺𖾑 𖼽𖽻 𖼍𖽕𖾑 𖼳𖽶𖾑 𖼄𖽡 𖼽𖽕𖾑 𖼞𖽳𖾐 𖼻𖽙 𖼽𖽱𖾐 𖼐𖽕 𖼍𖽕 𖼀𖽦𖾐：“𖼣𖽙𖾐 𖼺𖽡 𖼀𖽑𖽙，𖼣𖽙𖾐 𖼈𖽪𖾐 𖼍𖽦 𖽃𖽔𖾐！𖼐𖽑𖽡𖾐 𖼻𖽙 𖼄𖽳𖾑 𖼄𖽳 𖼊𖽑𖽺 𖼺𖽦 𖼦𖽑𖽙𖾐 𖼦𖽑𖽻𖾐 𖼐𖽺𖾐 𖼊𖽑𖽔 𖼊𖽡 𖼮𖽑𖽻，𖼳𖽶𖾐 𖼦𖽑𖽙𖾐 𖼺𖽪𖾐 𖼞𖽑𖽶𖾑 𖽃𖽕𖾑 𖼐𖽜𖾑 𖼊𖽑𖽡 𖼽𖽚𖾐 𖼍𖽺𖾑 𖼣𖽻𖾐，𖽃𖽕𖾑 𖼐𖽜𖾑 𖼽𖽔𖾐 𖼳𖽔𖾐 𖼖𖽚 𖼞𖽳𖾐 𖼐𖽜𖾑 𖼄𖽙𖾐 𖼊𖽑𖽔𖾐 𖼄𖽔 𖼊𖽑𖽺 𖼮𖽑𖽡𖾐 𖼻𖽸 𖼊𖽑𖽙𖾑 𖼄𖽡𖽻 𖼂𖽺𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽻𖾐 𖼍𖽪𖾐 𖼹𖽦𖾐，𖼽𖽔𖾐 𖼳𖽔𖾐 𖼖𖽚 𖼣𖽝 𖼷𖽑𖽦𖾐 𖼽𖽻 𖼊𖽑𖽺 𖼺𖽦 𖼦𖽑𖽙𖾐 𖼊𖽻𖾐． 33 𖼣𖽙𖾐 𖼺𖽡 𖼀𖽑𖽙，𖼣𖽙𖾐 𖼈𖽪𖾐 𖼍𖽦 𖽃𖽔𖾐！𖽃𖽔𖾑 𖼄𖽳𖾐 𖼐𖽑𖽡𖾐 𖼄𖽡𖽻 𖼦𖽑𖽺𖾑 𖼮𖽨𖾐 𖼀𖽑𖽨 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼊𖽑𖽔 𖼰𖽡𖽺𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼻𖽙 𖼄𖽳𖾑 𖼄𖽳 𖼊𖽑𖽺 𖼺𖽦 𖼦𖽑𖽙𖾐 𖼦𖽑𖽻𖾐 𖼐𖽺𖾐 𖼊𖽑𖽔 𖼊𖽡 𖼮𖽑𖽻，𖼳𖽶𖾐 𖼦𖽑𖽙𖾐 𖼺𖽪𖾐 𖼞𖽑𖽶𖾑 𖽃𖽕𖾑 𖼐𖽜𖾑 𖼊𖽑𖽡 𖼽𖽚𖾐 𖼍𖽺𖾑 𖼣𖽻𖾐．” 34 𖼽𖽔𖾐 𖼳𖽔𖾐 𖼖𖽚 𖼮𖽡𖽪 𖼀𖽑𖽻𖾐 𖼠𖽳𖾐 𖼖𖽪𖾐 𖼄𖽡𖾐 𖼊𖽺𖾐 𖼽𖽡𖾐 𖼦𖽑𖽙𖾐．
𖼽𖽔𖾐 𖼳𖽔𖾐 𖼖𖽚 𖼮𖽡𖽪 𖼀𖽑𖽻𖾐 𖼰𖽡𖾐 𖼳𖽪𖾑 𖼄𖽡𖾐 𖼊𖽺𖾐 𖼽𖽡𖾐
𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽙𖾐 𖼐𖽦𖾐 𖼳𖽪𖾐 𖼺𖽪𖾐 𖼷𖽑𖽻𖾐 𖼖𖽦𖾑 𖼻𖽙 𖼐𖽦𖾐 𖼄𖽡𖽻𖾐，𖼷𖽑𖽻𖾐 𖼊𖽑𖽡 𖼷𖽪𖾐 𖼄𖽙𖾐 𖽂𖽙 𖼖𖽻𖾐 𖼂𖽡𖽻𖾐 𖼀𖽙 𖼮𖽑𖽶𖾐 𖼞𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼮𖽑𖽻𖾐 𖼖𖽻𖾐．
35 𖼽𖽱𖾐 𖼐𖽕 𖼍𖽕 𖼈𖽪𖾐 𖼍𖽦 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！𖼈𖽪𖾐 𖼍𖽦 𖼞𖽳𖾐 𖼻𖽙 𖼄𖽳𖾑 𖼄𖽳 𖼞𖽚 𖼖𖽻𖾐 𖼦𖽑𖽻𖾐．𖼐𖽑𖽡𖾐 𖼮𖽜𖾐 𖼀𖽑𖽙 𖼞𖽑𖽙𖾐 𖼀𖽦𖾐 𖼖𖽙𖾐 𖼺𖽶𖾑，𖼄𖽡𖽻 𖼠𖽕𖾐 𖼰𖽶𖾐 𖼦𖽑𖽺𖾑 𖼻𖽻𖾐 𖼀𖽑𖽢 𖼦𖽑𖽙𖾐．”