𖼺𖽔 𖼄𖽪 𖽃𖽳 𖼐𖽑𖽡 𖼺𖽪𖾑 11

𖼍𖽕𖾑 𖼈𖽪𖽺𖾑 𖼊𖽑𖽙𖾑 𖼄𖽡𖽻 𖼂𖽺𖾐

1 𖼐𖽳𖾐 𖼞𖽑𖽶𖾐 𖼮𖽑𖽡𖾐 𖼖𖽻𖾐，𖼈𖽪𖾐 𖼍𖽦 𖼞𖽑𖽙𖾐 𖼣𖽻𖾐 𖼊𖽚𖾐 𖼽𖽡𖾐 𖼰𖽕𖾑 𖼊𖽝 𖼞𖽑𖽶𖾑 𖼮𖽶𖾐，𖼍𖽕𖾑 𖼈𖽪𖽺𖾑 𖼽𖽱𖾐 𖼽𖽔𖾐 𖼊𖽑𖽺 𖼹𖽡𖾐，𖼽𖽻 𖼞𖽳𖾐 𖼮𖽜𖾐 𖼀𖽑𖽙 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼦𖽳，𖼹𖽦𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖼄𖽦 𖼀𖽑𖽙 𖼊𖽑𖽺 𖼊𖽑𖽡 𖼊𖽑𖽜 𖼹𖽡𖾐 𖼊𖽑𖽧 𖼽𖽡𖾐 𖼰𖽕𖾑 𖼊𖽝．𖼽𖽻 𖼈𖽳𖾐 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼖𖽔𖾐 𖼂𖽔𖾐 𖼖𖽪𖾐 𖼊𖽑𖽺 𖼰𖽻𖾑 𖼍𖽡．𖼦𖽑𖽻𖾐 𖼊𖽑𖽻𖾐，𖼍𖽕𖾑 𖼈𖽪𖽺𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽻𖾐 𖼍𖽧𖾑 𖼦𖽑𖽙𖾐．

2 𖼊𖽑𖽡 𖼐𖽑𖽡𖾐 𖼮𖽻𖾐，𖽃𖽔𖾑 𖼄𖽶 𖼐𖽑𖽡𖾐 𖼖𖽻𖾑 𖼹𖽺𖾐 𖼽𖽡𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼍𖽕𖾑 𖼈𖽪𖽺𖾑 𖼽𖽦 𖼞𖽪𖾐 𖼊𖽑𖽺 𖼮𖽑𖽻𖾐 𖼍𖽪𖾐 𖼖𖽻𖾐，𖼈𖽪𖾐 𖼍𖽦 𖼮𖽻𖾐 𖼞𖽳𖾐 𖼦𖽑𖽺𖾐 𖼀𖽶𖾐 𖼊𖽑𖽺 𖼮𖽨𖾐 𖼺𖽜．𖼽𖽻 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼊𖽑𖽡 𖼽𖽚𖾐 𖼞𖽶𖾐 𖼮𖽑𖽶 𖼷𖽑𖽡 𖼞𖽳𖾐 𖼐𖽦𖾐 𖼄𖽡𖽻𖾐，𖼻𖽙 𖼄𖽳 𖼄𖽡𖾐 𖼐𖽜𖾐 𖼦𖽑𖽺𖾑 𖼽𖽚𖾐 𖼀𖽑𖽡𖽻 𖼷𖽚𖾐 𖼐𖽑𖽧𖾐 𖼐𖽜𖾑． 3 𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼹𖽡𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼦𖽑𖽺𖾑 𖽃𖽔 𖼺𖽺 𖼣𖽻𖾐 𖼐𖽺𖾐 𖼰𖽙𖾐 𖼊𖽻 𖼐𖽙𖾐．𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼀𖽦𖾐：“𖼞𖽑𖽶𖾑 𖼽𖽡 𖼖𖽡𖽦 𖼞𖽳𖾐 𖼻𖽙 𖼄𖽳、𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼈𖽪𖾐 𖼖𖽡𖾑 𖼽𖽕𖾑 𖼞𖽳𖾐 𖼄𖽳 𖼻𖽙 𖼂𖽕 𖼳𖽶𖾑 𖼂𖽔𖾐 𖼣𖽻𖾐．” 4 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼹𖽡𖾐 𖼖𖽦 𖼹𖽡𖾐 𖼂𖽡𖾐 𖼽𖽡𖾐，𖼽𖽻 𖼊𖽑𖽺 𖼹𖽶𖾐 𖼽𖽻 𖼞𖽳𖾐 𖼞𖽑𖽻𖾑 𖼖𖽻𖾐，𖼍𖽕𖾑 𖼈𖽪𖽺𖾑 𖼽𖽻 𖼖𖽙𖾐 𖼮𖽑𖽻𖾐 𖼽𖽦 𖼺𖽺𖾑，𖼽𖽻 𖼀𖽑𖽚𖾐 𖼽𖽻 𖽃𖽔𖾑 𖼞𖽑𖽶𖾐 𖼞𖽚 𖼽𖽡𖾐 𖼦𖽑𖽙𖾐．𖼞𖽑𖽶𖾑 𖼮𖽶𖾐，𖼂𖽕 𖼳𖽶𖾑 𖼂𖽔𖾐 𖼞𖽶𖾐 𖼮𖽑𖽶 𖼖𖽳𖾑 𖼐𖽙 𖼍𖽺𖾑 𖼣𖽻𖾐 𖼺𖽺． 5 𖼠𖽙𖾑 𖼍𖽻𖾐，𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽶𖾑 𖼽𖽚𖾐 𖼄𖽺 𖼊𖽦𖾐 𖼦𖽑𖽙𖾐 𖼺𖽺𖾑，𖼷𖽑𖽻𖾐 𖼹𖽡𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼣𖽙𖾐 𖼄𖽺 𖼊𖽦𖾐 𖼦𖽑𖽙𖾐！”

6 𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼹𖽡𖾐 𖼽𖽱𖾐 𖼽𖽔𖾐 𖼞𖽳𖾐 𖼞𖽑𖽻𖾑 𖼽𖽡𖾐 𖼀𖽦𖾐：“𖼐𖽑𖽡𖾐 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼈𖽪𖾐 𖼖𖽡𖾑 𖼽𖽕𖾑 𖼊𖽑𖽺 𖼹𖽡𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐．” 𖽃𖽔𖾐 𖼺𖽺𖾑，𖼽𖽱𖾐 𖼽𖽔𖾐 𖼈𖽪𖾐 𖼖𖽡𖾑 𖼽𖽕𖾑 𖼊𖽑𖽺 𖼹𖽡𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼄𖽡𖽻𖾐 𖼽𖽡𖾐． 7 𖼈𖽪𖾐 𖼖𖽡𖾑 𖼽𖽕𖾑 𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽑𖽡𖾐 𖼖𖽻𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼽𖽻 𖼊𖽑𖽺 𖼊𖽻 𖼐𖽙𖾐：“𖼽𖽱𖾐 𖼽𖽔𖾐 𖼐𖽺𖾐 𖼄𖽦 𖼀𖽑𖽙 𖼄𖽳𖾑 𖼄𖽳 𖼺𖽙𖾑 𖼺𖽙𖾐 𖼮𖽻𖾐 𖼮𖽻𖾐？𖼰𖽕𖾑 𖼊𖽝 𖼞𖽳𖾐 𖼄𖽡𖽻 𖽃𖽔 𖼊𖽺𖾐 𖼮𖽻𖾐 𖼺𖽺？” 8 𖼍𖽕𖾑 𖼈𖽪𖽺𖾑 𖼈𖽪𖾐 𖼖𖽡𖾑 𖼽𖽕𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼞𖽚 𖼽𖽡𖾐 𖼮𖽑𖽡𖾐 𖼈𖽶 𖼊𖽑𖽡 𖼠𖽙𖾐 𖼷𖽑𖽡 𖼽𖽡𖾐 𖼮𖽑𖽳𖾐．” 𖼈𖽪𖾐 𖼖𖽡𖾑 𖼽𖽕𖾑 𖼈𖽪𖾐 𖼍𖽦 𖼦𖽑𖽺𖾐 𖼞𖽳𖾐 𖼮𖽑𖽻𖾐 𖼊𖽚𖾐 𖼽𖽡𖾐，𖼍𖽕𖾑 𖼈𖽪𖽺𖾑 𖼺𖽙 𖼂𖽪𖾐 𖼄𖽡𖽻 𖼐𖽑𖽡 𖼊𖽑𖽡 𖼹𖽻𖾐 𖼦𖽑𖽙𖾐 𖼽𖽻 𖼞𖽜 𖼽𖽡𖾐． 9 𖼦𖽑𖽻𖾐 𖼊𖽑𖽻𖾐，𖼈𖽪𖾐 𖼖𖽡𖾑 𖼽𖽕𖾑 𖼽𖽻 𖼺𖽡 𖼀𖽑𖽙 𖼞𖽳𖾐 𖼮𖽜𖾐 𖼀𖽑𖽙 𖼖𖽙𖾐 𖼮𖽑𖽻𖾐 𖼈𖽪𖾐 𖼍𖽦 𖼦𖽑𖽺𖾐 𖽃𖽔𖾑 𖼊𖽪 𖼊𖽦 𖼀𖽙 𖼞𖽳𖾐 𖼽𖽦，𖼽𖽻 𖽃𖽔𖾑 𖼞𖽑𖽶𖾐 𖼄𖽔 𖼞𖽚 𖼽𖽡𖾐．

10 𖼷𖽑𖽻𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐 𖼊𖽑𖽧：“𖼈𖽪𖾐 𖼖𖽡𖾑 𖼽𖽕𖾑 𖼽𖽻 𖽃𖽔𖾑 𖼞𖽑𖽶𖾐 𖼄𖽔 𖼹𖽺𖾐 𖼞𖽚 𖼽𖽡𖾐．”𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼈𖽪𖾐 𖼖𖽡𖾑 𖼽𖽕𖾑 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼄𖽡𖾐 𖼈𖽡 𖼄𖽡𖾐 𖼊𖽺𖾐 𖼮𖽑𖽻𖾐 𖼞𖽚 𖼖𖽻𖾐 𖼄𖽔 𖼣𖽻𖾐 𖼖𖽔？ 𖽃𖽔𖾐 𖼹𖽻𖾐 𖼽𖽻 𖼄𖽳𖾑 𖽃𖽔𖾑 𖼞𖽑𖽶𖾐 𖼄𖽔 𖼹𖽺𖾐 𖼞𖽚 𖼽𖽡𖾐 𖼐𖽺𖾑？”

11 𖼈𖽪𖾐 𖼖𖽡𖾑 𖼽𖽕𖾑 𖼍𖽕𖾑 𖼈𖽪𖽺𖾑 𖼊𖽑𖽺 𖼊𖽻 𖼞𖽑𖽚 𖼀𖽦𖾐：“𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺、𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼮𖽻𖾐，𖼣𖽙𖾐 𖼺𖽡 𖼀𖽑𖽙 𖼽𖽱𖾐 𖼽𖽔𖾐 𖼐𖽺𖾐 𖼽𖽻 𖼞𖽳𖾐 𖼮𖽜𖾐 𖼀𖽑𖽙 𖼄𖽳𖾑 𖼄𖽳 𖼄𖽡𖾐 𖼳𖽡𖽻𖾐 𖼀𖽙 𖼮𖽻𖾐，𖼣𖽙𖾐 𖽃𖽔𖾐 𖼹𖽻𖾐 𖼞𖽚 𖼽𖽡𖾐 𖽃𖽔𖾑 𖼞𖽑𖽶𖾐 𖼷𖽙 𖼷𖽙 𖼊𖽻𖾐 𖼊𖽻𖾐，𖼄𖽳 𖼻𖽙 𖼖𖽙𖾐 𖼮𖽑𖽻𖾐 𖼽𖽦 𖼊𖽙𖾐 𖼐𖽺𖾑？ 𖼣𖽙𖾐 𖼈𖽪𖾐 𖼍𖽦 𖼐𖽺𖾐 𖼈𖽪𖾐 𖼍𖽦 𖼞𖽳𖾐 𖼈𖽪𖾑 𖼠𖽻𖾐 𖼖𖽙𖾐 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐，𖼣𖽙𖾐 𖼦𖽑𖽺𖾑 𖼳𖽶 𖼄𖽡𖽻 𖼂𖽺𖾐 𖼄𖽔 𖼂𖽡𖾑．”

12 𖼍𖽕𖾑 𖼈𖽪𖽺𖾑 𖼈𖽪𖾐 𖼖𖽡𖾑 𖼽𖽕𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽙𖾑 𖼐𖽑𖽡𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐，𖽃𖽔𖾑 𖼞𖽶𖾐 𖼐𖽑𖽡𖾐 𖼺𖽺𖾑 𖼐𖽑𖽡𖾐 𖼊𖽑𖽺 𖼹𖽡𖾐 𖼂𖽡𖾐 𖼽𖽡𖾐．” 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼈𖽪𖾐 𖼖𖽡𖾑 𖼽𖽕𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼮𖽻𖾐． 13 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐，𖼍𖽕𖾑 𖼈𖽪𖽺𖾑 𖼈𖽪𖾐 𖼖𖽡𖾑 𖼽𖽕𖾑 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼷𖽙 𖼷𖽙 𖼊𖽻𖾐 𖼊𖽻𖾐，𖼽𖽻 𖼞𖽜 𖼊𖽻𖾐 𖼽𖽦 𖼦𖽑𖽙𖾐．𖼄𖽶 𖼮𖽑𖽧 𖼞𖽑𖽶𖾑 𖼮𖽶𖾐 𖼈𖽪𖾐 𖼖𖽡𖾑 𖼽𖽕𖾑 𖼊𖽚𖾐 𖼽𖽡𖾐，𖼽𖽻 𖼺𖽡 𖼀𖽑𖽙 𖼞𖽳𖾐 𖼮𖽜𖾐 𖼀𖽑𖽙 𖼖𖽙𖾐 𖼮𖽑𖽻𖾐 𖼦𖽑𖽦，𖼦𖽑𖽔𖾐 𖼖𖽺𖾑 𖼽𖽻 𖽃𖽔𖾑 𖼞𖽑𖽶𖾐 𖼄𖽔 𖼹𖽺𖾐 𖼞𖽚 𖼽𖽡𖾐．

𖼍𖽕𖾑 𖼈𖽪𖽺𖾑 𖼈𖽪𖾐 𖼖𖽡𖾑 𖼽𖽕𖾑 𖼊𖽑𖽺 𖼦𖽹𖾑 𖼳𖽶𖾐

14 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐，𖼍𖽕𖾑 𖼈𖽪𖽺𖾑 𖼽𖽱𖾐 𖼽𖽔𖾐 𖼊𖽑𖽺 𖼞𖽜 𖼖𖽚𖾐 𖼂𖽚𖾐 𖼺𖽪𖾑 𖼊𖽑𖽡 𖼮𖽑𖽙𖾐 𖼈𖽝，𖼀𖽑𖽨 𖼈𖽪𖾐 𖼖𖽡𖾑 𖼽𖽕𖾑 𖼞𖽜 𖼦𖽑𖽙𖾐 𖼂𖽡𖾐 𖼽𖽡𖾐． 15 𖼽𖽻 𖼺𖽪𖾑 𖼮𖽑𖽙𖾐 𖼞𖽑𖽶𖾐 𖼈𖽝 𖼍𖽳𖾐 𖼀𖽦𖾐：“𖼈𖽪𖾐 𖼖𖽡𖾑 𖼽𖽕𖾑 𖼊𖽑𖽺 𖼹𖽡𖾐 𖼰𖽕𖾑 𖼦𖽑𖽔𖾐 𖼮𖽶𖾐 𖼊𖽝 𖼰𖽡 𖼞𖽳𖾐 𖼽𖽡𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼰𖽻𖾐 𖼀𖽑𖽚𖾐 𖼽𖽻 𖼠𖽙𖾑 𖼍𖽻𖾐 𖼀𖽳 𖼞𖽚 𖼖𖽻𖾐，𖼽𖽻 𖼊𖽑𖽺 𖼺𖽙𖾐 𖼞𖽜 𖼺𖽦 𖼦𖽑𖽙𖾐 𖼻𖽻𖾐．” 16 𖼞𖽑𖽶𖾑 𖼮𖽶𖾐，𖼽𖽱𖾐 𖼽𖽔𖾐 𖼄𖽦 𖼀𖽑𖽙 𖼦𖽳 𖼖𖽪𖾐 𖼊𖽑𖽺 𖼰𖽻𖾑 𖼍𖽡，𖼽𖽻 𖼺𖽝𖾑 𖽃𖽔 𖼊𖽺𖾑 𖼄𖽦𖾐 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼳𖽪𖾐 𖼍𖽳𖾐 𖼺𖽺𖾑，𖼈𖽪𖾐 𖼖𖽡𖾑 𖼽𖽕𖾑 𖼊𖽑𖽺 𖼹𖽡𖾐 𖼞𖽑𖽶𖾑 𖼄𖽦𖾐 𖼊𖽝 𖼽𖽡𖾐． 17 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼊𖽚𖾐 𖼖𖽻𖾐 𖼽𖽱𖾐 𖼽𖽔𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦．𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼠𖽻𖾐 𖼞𖽑𖽶𖾐 𖼊𖽑𖽡 𖼹𖽻𖾐 𖼳𖽶𖾐 𖼦𖽑𖽙𖾐，𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼈𖽪𖾐 𖼖𖽡𖾑 𖼽𖽕𖾑 𖼖𖽺𖾑 𖼳𖽶𖾐 𖼦𖽑𖽙𖾐．

18 𖽃𖽔𖾐 𖼺𖽺𖾑，𖼽𖽱𖾐 𖼽𖽔𖾐 𖼷𖽑𖽻𖾐 𖼹𖽡𖾐 𖼰𖽕𖾑 𖼊𖽝 𖼞𖽳𖾐 𖼄𖽡𖽻 𖼞𖽑𖽙𖾐 𖼣𖽻𖾐 𖼀𖽦𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼊𖽑𖽧． 19 𖼽𖽱𖾐 𖼽𖽔𖾐 𖼹𖽦𖾑 𖼹𖽡𖾐 𖼖𖽦 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼰𖽕𖾑 𖼊𖽝 𖼞𖽳𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼀𖽦𖾐 𖼦𖽑𖽻𖾐 𖼠𖽙𖾑 𖼍𖽻𖾐， 20 𖼈𖽪𖾐 𖼍𖽦 𖼀𖽶 𖼻𖽶 𖼺𖽺𖾑，𖼀𖽦𖾐：‘ 𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼖𖽪𖾐 𖼖𖽙𖾐 𖼐𖽳 𖼞𖽳𖾐 𖼊𖽝 𖼽𖽡𖾐 𖼐𖽺𖾑？ 𖼮𖽡𖾐 𖼂𖽦𖾐 𖼖𖽪𖾐 𖼰𖽻𖾐 𖼊𖽑𖽺 𖼮𖽑𖽻𖾐 𖼮𖽑𖽡𖽦𖾐 𖼀𖽝𖾐 𖼹𖽺𖾐 𖼖𖽻𖾐 𖼊𖽻𖾐 𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼄𖽔 𖼺𖽝𖾑 𖼖𖽔？ 21 𖽃𖽙𖾑 𖼄𖽺 𖼊𖽑𖽙 𖼽𖽺𖾐 𖼖𖽪𖾑 𖼂𖽡 𖼳𖽴𖾑 𖼞𖽳𖾐 𖼻𖽙 𖼽𖽕𖾑 𖼂𖽡 𖼄𖽡 𖼖𖽴𖾑 𖼊𖽑𖽺 𖼺𖽦 𖼞𖽑𖽶𖾑 𖽃𖽔 𖼺𖽺 𖼣𖽻𖾐 𖼐𖽺𖾑？ 𖼞𖽑𖽶𖾑 𖼻𖽙 𖼄𖽳 𖼄𖽡𖾐 𖼐𖽜𖾐 𖼊𖽑𖽡 𖼽𖽚𖾐 𖼖𖽪𖾐 𖼰𖽻𖾐 𖼊𖽑𖽺 𖼮𖽑𖽻𖾐 𖼐𖽑𖽡 𖼖𖽻 𖼀𖽳𖾐 𖼊𖽑𖽡 𖼀𖽑𖽡 𖼷𖽴𖾐 𖼽𖽻 𖼊𖽑𖽺 𖼍𖽺𖾑 𖼺𖽺𖾑，𖼽𖽻 𖼊𖽑𖽧 𖼂𖽺𖾑 𖼺𖽶𖾐 𖼖𖽪𖾐 𖼞𖽳𖾐 𖼮𖽻𖾐 𖼳𖽶𖾐 𖼦𖽑𖽙𖾐 𖼄𖽔 𖼣𖽻𖾐 𖼖𖽔？ 𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼖𖽪𖾐 𖼰𖽻𖾐 𖼖𖽙𖾐 𖼐𖽳 𖼽𖽡𖾐 𖼐𖽺𖾑？’ 𖼈𖽪𖾐 𖼍𖽦 𖼐𖽑𖽡𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼀𖽦𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼊𖽻 𖼞𖽑𖽚 𖼊𖽙𖾐：‘ 𖼈𖽪𖾐 𖼍𖽦 𖼞𖽳𖾐 𖼮𖽜𖾐 𖼀𖽑𖽙 𖼦𖽴𖾑 𖼮𖽑𖽪𖾐 𖼳𖽶 𖼷𖽻𖾐 𖼈𖽪𖾐 𖼖𖽡𖾑 𖼽𖽕𖾑 𖼖𖽺𖾑 𖼳𖽶𖾐 𖼦𖽑𖽙𖾐．’”

22 𖽃𖽔𖾐 𖼺𖽺𖾑，𖼹𖽡𖾐 𖼖𖽦 𖼞𖽑𖽶𖾑 𖼽𖽚𖾐 𖼽𖽡𖾐 𖼦𖽑𖽙𖾐．𖼽𖽡𖾐 𖼞𖽑𖽻𖾑 𖼮𖽑𖽡𖾐 𖼍𖽺𖾑 𖼺𖽺 𖼽𖽱𖾐 𖼽𖽔𖾐 𖼽𖽻 𖼖𖽙𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼦𖽑𖽺 𖼍𖽕𖾑 𖼈𖽪𖽺𖾑 𖼖𖽙𖾐 𖼰𖽨𖾐． 23 𖼹𖽡𖾐 𖼖𖽦 𖼞𖽑𖽶𖾑 𖼽𖽚𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼣𖽙𖾐 𖼈𖽳𖾐 𖼦𖽶𖾑 𖼄𖽔 𖼷𖽑𖽶𖾐 𖽂𖽙 𖼊𖽙𖾐，𖼽𖽻 𖼈𖽳𖾐 𖼊𖽚𖾐 𖼖𖽻𖾐 𖼄𖽡𖾐 𖼳𖽡𖽻𖾐 𖼀𖽙 𖼣𖽙𖾐 𖼈𖽳𖾐 𖼊𖽑𖽺 𖼊𖽝 𖼊𖽦，𖼣𖽙𖾐 𖼈𖽳𖾐 𖼀𖽑𖽚𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼖𖽪𖾐 𖽃𖽔𖾑 𖼊𖽪 𖼞𖽳𖾐 𖼮𖽑𖽡𖾐． 24 𖼞𖽑𖽶𖾑 𖼮𖽶𖾐，𖼮𖽑𖽡𖽦𖾐 𖼀𖽝𖾐 𖼺𖽪𖾐 𖼖𖽪𖾐 𖼰𖽻𖾐 𖼊𖽑𖽺 𖼮𖽑𖽻𖾐 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽺 𖼀𖽝𖾐，𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽡 𖼹𖽻𖾐 𖼳𖽶𖾐 𖼦𖽑𖽙𖾐，𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼈𖽪𖾐 𖼖𖽡𖾑 𖼽𖽕𖾑 𖼖𖽺𖾑 𖼳𖽶𖾐 𖼦𖽑𖽙𖾐．”

25 𖼍𖽕𖾑 𖼈𖽪𖽺𖾑 𖼹𖽡𖾐 𖼖𖽦 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽱𖾐 𖼽𖽔𖾐 𖼖𖽙𖾐 𖼦𖽑𖽺𖾑 𖼻𖽻𖾐 𖼀𖽦𖾐：‘𖼄𖽡𖽻 𖼦𖽑𖽺𖾑 𖼮𖽨𖾐 𖼖𖽙𖾐 𖼀𖽙𖾐 𖼊𖽑𖽔 𖼠𖽚 𖼳𖽚𖾑，𖼞𖽪𖾐 𖼮𖽡𖽺𖾐 𖽃𖽔𖾑 𖼊𖽑𖽙 𖼊𖽑𖽡 𖼠𖽙𖾐 𖼦𖽑𖽺𖾑 𖼽𖽚𖾐 𖼊𖽑𖽺 𖼺𖽦 𖼦𖽑𖽙𖾐，𖼊𖽑𖽡 𖼠𖽙𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼺𖽦 𖼦𖽑𖽙𖾐．𖼐𖽑𖽡𖾐 𖼐𖽕 𖼐𖽕𖾐 𖽂𖽙 𖼊𖽑𖽧 𖼖𖽪𖾐 𖼦𖽑𖽺𖾑 𖼊𖽑𖽺 𖼊𖽝，𖼖𖽪𖾐 𖼦𖽑𖽺𖾑 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼍𖽺𖾑 𖼻𖽻𖾐．𖼐𖽑𖽡𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼽𖽻 𖼊𖽑𖽺 𖼐𖽑𖽧𖾐 𖼍𖽡𖾐 𖼖𖽡𖾐．”

𖼍𖽕𖾑 𖼈𖽪𖽺𖾑 𖼂𖽕 𖼳𖽶𖾑 𖼂𖽔𖾐 𖼊𖽑𖽺 𖼹𖽶𖾐 𖼄𖽳 𖼻𖽙 𖼰𖽕𖾐

26 𖼈𖽪𖾐 𖼖𖽡𖾑 𖼽𖽕𖾑 𖼞𖽳𖾐 𖼄𖽳 𖼻𖽙 𖼊𖽻 𖼮𖽨，𖼽𖽻 𖼷𖽑𖽻𖾐 𖼀𖽑𖽙 𖼈𖽪𖾐 𖼖𖽡𖾑 𖼽𖽕𖾑 𖼳𖽶𖾐 𖼦𖽑𖽙𖾐 𖼺𖽺𖾑，𖼽𖽻 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪 𖼣𖽶𖾐． 27 𖼳𖽡𖽚𖾐 𖼊𖽴 𖼐𖽑𖽡𖾐 𖼦𖽑𖽦 𖼠𖽚 𖼦𖽑𖽙𖾐 𖼍𖽺𖾑 𖼺𖽺，𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼹𖽡𖾐 𖼂𖽕 𖼳𖽶𖾑 𖼂𖽔𖾐 𖼊𖽑𖽺 𖼹𖽶𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖼖𖽻𖾐，𖼀𖽑𖽨 𖼽𖽻 𖼄𖽳 𖼻𖽙 𖼰𖽕𖾐，𖼽𖽻 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐．𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼦𖽴 𖼦𖽫 𖼐𖽦𖾐 𖼂𖽻𖾐 𖼖𖽻𖾐，𖼍𖽕𖾑 𖼈𖽪𖽺𖾑 𖼂𖽺𖾐 𖼺𖽪𖾐 𖼦𖽑𖽺𖾑 𖼊𖽶𖾐 𖼄𖽡𖽻 𖼣𖽻𖾐．