𖼍𖽕𖾑 𖼈𖽪𖽺𖾑 𖼞𖽳𖾐 𖼹𖽡𖾐 𖼖𖽦 𖼐𖽑𖽧𖾐 𖼣𖽡𖽳𖾐 𖼷𖽶𖾐 𖼄𖽳𖾐 (𖼍𖽦𖾑 𖼊𖽑𖽡 19：1-5)
10
1 𖼠𖽙𖾑 𖼍𖽻𖾐，𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼐𖽕 𖼳𖽡𖽕 𖼳𖽶𖾐 𖼦𖽑𖽙𖾐 𖼺𖽺𖾑，𖼽𖽻 𖼻𖽙 𖼦𖽔𖾐 𖼐𖽜𖾑 𖼈𖽪𖾐 𖼍𖽦 𖼂𖽺𖾐． 2 𖼍𖽕𖾑 𖼈𖽪𖽺𖾑 𖼀𖽦𖾐：“𖼐𖽕 𖼳𖽡𖽕 𖼣𖽙𖾐 𖼊𖽑𖽺 𖼮𖽡 𖼽𖽡𖾑 𖼞𖽜 𖼖𖽙𖾐 𖼺𖽶𖾑，𖼣𖽙𖾐 𖼖𖽺𖾑 𖼽𖽻 𖼻𖽙 𖼦𖽔𖾐 𖼐𖽜𖾑 𖼊𖽑𖽺 𖼮𖽡 𖼽𖽡𖾑 𖼞𖽜 𖼊𖽻𖾐．” 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼹𖽡𖾐 𖼖𖽦 𖼹𖽡𖾐 𖼂𖽡𖾐 𖼽𖽡𖾐，𖼐𖽕 𖼳𖽡𖽕 𖼳𖽶𖾐 𖼦𖽑𖽙𖾐 𖼖𖽙𖾐 𖼀𖽙𖾐 𖼦𖽔𖾐 𖼐𖽜𖾑 𖼊𖽑𖽺 𖼐𖽑𖽧𖾐 𖼍𖽡𖾐．𖼍𖽕𖾑 𖼈𖽪𖽺𖾑 𖼞𖽳𖾐 𖼹𖽡𖾐 𖼖𖽦 𖼽𖽡𖾐 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐， 3 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖼞𖽑𖽶𖾑 𖼹𖽻𖾐 𖼽𖽻 𖼈𖽳𖾐 𖼞𖽳𖾐 𖼈𖽪𖾐 𖼍𖽦 𖼦𖽔𖾐 𖼐𖽜𖾑 𖼖𖽙𖾐 𖼀𖽦𖾐：“𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼹𖽡𖾐 𖼐𖽑𖽡𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼐𖽑𖽡𖾐 𖼊𖽑𖽺 𖼐𖽑𖽧𖾐 𖼍𖽡𖾐，𖼐𖽑𖽡𖾐 𖼊𖽡 𖼮𖽑𖽻 𖼺𖽪𖾐，𖼽𖽻 𖼐𖽑𖽡𖽻𖾐 𖼀𖽙 𖼊𖽑𖽺 𖼐𖽦𖾐 𖼍𖽪𖾐 𖼺𖽪𖾐 𖼣𖽻𖾐 𖼖𖽔𖾑？ 𖼽𖽻 𖼹𖽡𖾐 𖼖𖽦 𖼹𖽡𖾐 𖼐𖽑𖽡𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐，𖼞𖽑𖽶𖾑 𖼖𖽪𖾐 𖼦𖽑𖽺𖾑 𖼊𖽑𖽺 𖼮𖽑𖽕 𖼐𖽦𖾐，𖼮𖽑𖽕 𖼐𖽦𖾐 𖼄𖽡𖾐 𖼀𖽻𖾐 𖼺𖽺𖾑 𖼖𖽪𖾐 𖼦𖽑𖽺𖾑 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐 𖼄𖽔 𖼣𖽻𖾐 𖼖𖽔？ 4 𖽃𖽔𖾐 𖼺𖽺𖾑，𖼦𖽔𖾐 𖼐𖽜𖾑 𖼍𖽕𖾑 𖼈𖽪𖽺𖾑 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽺 𖼵𖽪𖾐 𖼍𖽡，𖼽𖽻 𖼈𖽳𖾐 𖼞𖽳𖾐 𖼀𖽙 𖽂𖽙𖾐 𖼊𖽑𖽡 𖼀𖽳 𖼮𖽑𖽚𖾐 𖼦𖽑𖽙𖾐，𖼹𖽦𖾑 𖼽𖽻 𖼈𖽳𖾐 𖼞𖽳𖾐 𖼀𖽑𖽡𖽻𖾐 𖼮𖽻 𖼖𖽺𖾑 𖼊𖽑𖽡 𖼊𖽑𖽜𖾐 𖼊𖽝𖾐 𖼦𖽑𖽙𖾐，𖼀𖽪𖾐 𖼍𖽻𖾐 𖼞𖽜 𖼊𖽑𖽦 𖼊𖽚𖾐 𖼊𖽑𖽧 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼀𖽑𖽨 𖼞𖽚 𖼽𖽡𖾐．
5 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐，𖼽𖽻 𖼞𖽳𖾐 𖼹𖽡𖾐 𖼖𖽦 𖼳𖽡𖽦𖾑 𖼍𖽻𖾐 𖼊𖽪𖾐 𖼷𖽶𖾐 𖼄𖽳𖾐 𖼺𖽺𖾑， 𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼹𖽡𖾐 𖼽𖽻 𖼈𖽳𖾐 𖼊𖽑𖽺 𖼄𖽡𖽻𖾐 𖼽𖽡𖾐．𖼍𖽕𖾑 𖼈𖽪𖽺𖾑 𖼈𖽪𖾐 𖼍𖽦 𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼮𖽻𖾐，𖼀𖽙 𖽂𖽙𖾐 𖼐𖽜 𖼊𖽑𖽧 𖼖𖽻𖾐 𖼺𖽺𖾑 𖼞𖽚 𖼖𖽻𖾐 𖼮𖽑𖽳𖾐．”
𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼰𖽕𖾑 𖼊𖽝 𖼞𖽳𖾐 𖼂𖽺𖾐 𖼳𖽡𖽻𖾐 (𖼍𖽦𖾑 𖼊𖽑𖽡 19：6-9)
6 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼺𖽝𖾑，\pn 𖼍𖽕𖾑 𖼈𖽪𖽺𖾑 𖼽𖽻 𖼈𖽳𖾐 𖼊𖽑𖽺 𖼦𖽶𖾑，𖽃𖽔𖾐 𖼺𖽺𖾑 𖼀𖽑𖽶 𖼊𖽚𖾐 𖼂𖽚 𖼖𖽡𖾑 𖼦𖽚 𖼄𖽡𖾐 𖼊𖽺𖾐 𖼞𖽳𖾐 𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼐𖽺𖾐 𖼺𖽙 𖼂𖽔𖾐 𖼖𖽪𖾐 𖼞𖽳𖾐 𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽙𖾐 𖼻𖽶𖾑 𖼖𖽻𖾐，𖼮𖽨𖾐 𖼺𖽜 𖼺𖽪𖾐 𖼄𖽦 𖼀𖽑𖽙 𖼐𖽑𖽡 𖼄𖽺 𖼮𖽻𖾐，𖼹𖽦𖾑 𖼀𖽑𖽶 𖼊𖽚𖾐 𖼄𖽔 𖼰𖽡𖽔𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼷𖽑𖽻𖾐 𖼊𖽑𖽡 𖼍𖽪𖾐 𖼽𖽚𖾐 𖼰𖽙𖾐 𖼻𖽶𖾑 𖼖𖽻𖾐，𖼀𖽑𖽶 𖼊𖽚𖾐 𖼊𖽑𖽚 𖼂𖽚 𖼖𖽪𖾐 𖼞𖽳𖾐 𖼷𖽑𖽻𖾐 𖼊𖽑𖽡 𖼄𖽺 𖼐𖽑𖽡 𖼍𖽪𖾐 𖼽𖽚𖾐 𖼰𖽙𖾐 𖼻𖽶𖾑 𖼖𖽻𖾐． 7 𖼍𖽕𖾑 𖼈𖽪𖽺𖾑 𖼊𖽻 𖼮𖽨 𖼺𖽺𖾑，𖼽𖽱𖾐 𖼽𖽔𖾐 𖼐𖽺𖾐 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼄𖽳𖾑 𖼄𖽳 𖼊𖽑𖽺 𖼹𖽡𖾐 𖼊𖽑𖽧 𖼽𖽡𖾐． 8 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼊𖽚𖾐 𖼖𖽻𖾐 𖼽𖽻 𖼄𖽳𖾑 𖼞𖽳𖾐 𖼖𖽪𖾐 𖽃𖽔𖾑 𖼊𖽪 𖽃𖽙𖾑 𖼄𖽺 𖼀𖽳 𖼮𖽻𖾐 𖼂𖽺𖾐 𖼳𖽡𖽻𖾐 𖼰𖽕𖾑 𖼊𖽝 𖼊𖽻𖾐，𖼺𖽙 𖼂𖽔𖾐 𖼄𖽡𖾐 𖼊𖽺𖾐 𖼐𖽺𖾐 𖼂𖽚 𖼖𖽡𖾑 𖼦𖽚 𖼄𖽡𖾐 𖼊𖽺𖾐 𖼞𖽳𖾐 𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐，𖼊𖽑𖽚 𖼂𖽚 𖼖𖽪𖾐 𖼞𖽳𖾐 𖼷𖽑𖽻𖾐 𖼐𖽺𖾐 𖼄𖽔 𖼰𖽡𖽔𖾐 𖼖𖽪𖾐 𖼞𖽳𖾐 𖼷𖽑𖽻𖾐 𖼖𖽺𖾑 𖼽𖽻 𖼄𖽳𖾑 𖼖𖽪𖾐 𖼦𖽜 𖼄𖽡𖾐 𖼳𖽡𖽻𖾐 𖼀𖽙 𖼞𖽳𖾐 𖼮𖽻𖾐 𖼂𖽺𖾐 𖼳𖽡𖽻𖾐 𖼰𖽕𖾑 𖼊𖽝 𖼊𖽻𖾐．
𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽝 𖽂𖽙 𖼊𖽙𖾐 (𖼍𖽦𖾑 𖼊𖽑𖽡 19：10 -19)
9 𖼽𖽱𖾐 𖼽𖽔𖾐 𖼐𖽦𖾐 𖼄𖽡𖽻𖾐，𖼽𖽻 𖽃𖽙𖾑 𖼄𖽺 𖼠𖽙𖾑 𖼍𖽻𖾐 𖼀𖽳 𖼖𖽺𖾑 𖼮𖽡𖾐 𖼂𖽦𖾐 𖼮𖽻𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼊𖽑𖽡 𖼹𖽻𖾐 𖼺𖽺𖾐 𖼊𖽑𖽧 𖼖𖽻𖾐，𖼽𖽻 𖼈𖽳𖾐 𖼞𖽜 𖼂𖽺𖾐 𖼳𖽡𖽻𖾐 𖼀𖽑𖽢 𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼊𖽦 𖼽𖽡𖾐． 10 𖼷𖽺 𖼷𖽺𖾐 𖼺𖽪𖾐 𖼄𖽦 𖼀𖽑𖽙 𖼀𖽑𖽨 𖼽𖽻 𖼐𖽑𖽳𖾐 𖼄𖽻 𖼽𖽕𖾑 𖼂𖽡 𖼳𖽺𖾐 𖼞𖽜 𖼦𖽳，𖼽𖽻 𖼈𖽳𖾐 𖼞𖽜 𖼂𖽺𖾐 𖼳𖽡𖽻𖾐 𖼀𖽑𖽢 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼊𖽦 𖼊𖽻𖾐． 11 𖼽𖽱𖾐 𖼽𖽔𖾐 𖼽𖽕𖾑 𖼂𖽡 𖼳𖽺𖾐 𖼖𖽙𖾐 𖼀𖽦𖾐：“𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼣𖽙𖾐 𖼊𖽑𖽺 𖽂𖽙 𖼊𖽙𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼖𖽻𖾐 𖼣𖽙𖾐 𖼖𖽙𖾐 𖼂𖽻𖾐；𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼐𖽑𖽡𖾐 𖼊𖽑𖽺 𖽂𖽙 𖼊𖽙𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼖𖽻𖾐 𖼐𖽑𖽡𖾐 𖼖𖽙𖾐 𖼂𖽻𖾐 𖼊𖽻𖾐． 12 𖼐𖽑𖽡𖾐 𖼐𖽑𖽧𖾐 𖼈𖽳 𖼐𖽑𖽧𖾐 𖼻𖽺𖾐 𖼖𖽡𖾐，𖽃𖽔 𖼐𖽺𖾑 𖼞𖽳𖾐 𖼷𖽑𖽻𖾐 𖼀𖽺 𖼐𖽺𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼖𖽪𖾐 𖼞𖽑𖽙𖾐 𖼣𖽻𖾐 𖼖𖽙𖾐 𖼀𖽙𖾐 𖼺𖽺𖾑，𖽃𖽔 𖼐𖽺𖾑 𖼐𖽑𖽧𖾐 𖼈𖽳 𖼐𖽑𖽧𖾐 𖼻𖽺𖾐 𖼖𖽡𖾐！𖼽𖽺𖾐 𖼦𖽴 𖼦𖽫 𖼞𖽜 𖼽𖽻 𖼞𖽑𖽙𖾐 𖼐𖽦𖾐 𖼹𖽳𖾐 𖼺𖽪𖾐 𖼄𖽡𖽻 𖼖𖽙𖾐 𖼮𖽑𖽻𖾐 𖼂𖽺𖾐 𖼀𖽑𖽢 𖼞𖽜．”
13 𖽃𖽔𖾐 𖼺𖽺𖾑，𖼽𖽱𖾐 𖼽𖽔𖾐 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼄𖽦 𖼀𖽑𖽙 𖼺𖽜 𖽃𖽙𖾑 𖼄𖽺 𖼽𖽡𖾐，𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦，𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼽𖽱𖾐 𖼽𖽔𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼮𖽡𖽪 𖼀𖽑𖽻𖾐 𖼍𖽪𖾐． 14 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼐𖽦𖾐 𖼄𖽡𖽻𖾐，𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼮𖽡𖽪 𖼀𖽑𖽻𖾐 𖼍𖽪𖾐 𖼦𖽑𖽙𖾐 𖼺𖽺𖾑，𖼽𖽻 𖼈𖽳𖾐 𖼖𖽺𖾑 𖼽𖽕𖾑 𖼂𖽡 𖼳𖽺𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼮𖽡𖽪 𖼀𖽑𖽻𖾐 𖼍𖽪𖾐，𖼀𖽑𖽻𖾐 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐．𖽃𖽔𖾐 𖼺𖽺𖾑，𖼽𖽱𖾐 𖼽𖽔𖾐 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦 𖼞𖽚 𖼖𖽻𖾐，𖼀𖽑𖽚𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼞𖽚 𖼽𖽡𖾐 𖼦𖽑𖽙𖾐．
15 𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼐𖽦𖾐 𖼄𖽡𖽻𖾐，𖼽𖽻 𖼈𖽳𖾐 𖼊𖽑𖽺 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽢𖾑𖽑 𖼊𖽝 𖼀𖽺 𖼦𖽑𖽙𖾐 𖼺𖽺𖾑，𖼽𖽻 𖼈𖽳𖾐 𖼹𖽦𖾑 𖼷𖽙𖾐 𖼖𖽙𖾐 𖼻𖽶𖾑 𖼖𖽻𖾐． 16 𖼦𖽔𖾐 𖼍𖽕𖾑 𖼍𖽡 𖼳𖽡𖽺𖾑 𖼷𖽑𖽻𖾐 𖼹𖽡𖾐 𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼞𖽑𖽶𖾑 𖼀𖽳 𖼞𖽳𖾐 𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐．𖼽𖽻 𖼈𖽳𖾐 𖼖𖽻𖾐 𖼳𖽡𖾐 𖼖𖽕 𖼄𖽡𖾐 𖼊𖽺𖾐 𖼮𖽑𖽡𖾐，𖼦𖽔𖾐 𖼍𖽕𖾑 𖼍𖽡 𖼳𖽡𖽺𖾑 𖼞𖽳𖾐 𖼄𖽦 𖼈𖽪𖾑 𖼷𖽪𖾐 𖼳𖽚𖾑 𖼇𖽕 𖼽𖽻 𖼈𖽳𖾐 𖼊𖽑𖽺 𖼦𖽳．
17 𖼷𖽑𖽻𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐 𖼺𖽺𖾑，𖼽𖽻 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽚 𖼽𖽡𖾐，𖼖𖽻𖾐 𖼳𖽡𖾐 𖼖𖽕 𖼄𖽡𖾐 𖼊𖽺𖾐 𖼮𖽑𖽡𖾐．𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼂𖽺𖾐 𖼳𖽡𖽻𖾐 𖼀𖽑𖽢 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼊𖽝 𖼊𖽦 𖼊𖽻𖾐． 18 𖼦𖽑𖽻𖾐 𖼊𖽑𖽻𖾐，𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼮𖽡𖽪 𖼀𖽑𖽻𖾐 𖼍𖽪𖾐．𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼮𖽑𖽜𖾐 𖼞𖽕 𖼺𖽪𖾐 𖼄𖽦 𖼀𖽑𖽙 𖼳𖽶 𖼦𖽑𖽙𖾐 𖼽𖽚𖾐 𖼐𖽺𖾐 𖼄𖽪 𖼷𖽳 𖼺𖽪𖾐 𖼄𖽦 𖼀𖽑𖽙 𖼖𖽡𖾐 𖼄𖽺 𖼊𖽑𖽺 𖼍𖽕𖾑 𖼈𖽪𖽺𖾑 𖼮𖽑𖽢𖾑 𖼺𖽦 𖼦𖽑𖽙𖾐，𖼽𖽕𖾑 𖼖𖽕 𖼺𖽪𖾐 𖼄𖽦 𖼈𖽪𖾑 𖼷𖽪𖾐 𖼳𖽚𖾑 𖼇𖽕 𖼊𖽑𖽺 𖼖𖽺𖾑 𖼍𖽕𖾑 𖼈𖽪𖽺𖾑 𖼮𖽢𖾑𖽑 𖼺𖽦 𖼦𖽑𖽙𖾐 𖼺𖽺𖾑，𖼳𖽚𖾑 𖼇𖽕 𖼳𖽶𖾐 𖼞𖽑𖽶𖾑 𖼠𖽻𖾐 𖼀𖽜． 19 𖼞𖽑𖽙𖾐 𖼦𖽔𖾐 𖼍𖽕𖾑 𖼍𖽡 𖼳𖽡𖽺𖾑 𖼖𖽙𖾐 𖼊𖽴 𖼺𖽪𖾐 𖼈𖽪𖾐 𖼍𖽦 𖼞𖽑𖽶𖾑 𖼹𖽻𖾐 𖼐𖽦𖾐 𖼄𖽡𖽻𖾐，𖼽𖽻 𖼈𖽳𖾐 𖼊𖽑𖽺 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽑𖽢𖾑 𖼊𖽝 𖼀𖽺 𖼦𖽑𖽻𖾐 𖼺𖽺𖾑，𖼀𖽑𖽚𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼊𖽑𖽙 𖼊𖽻𖾐 𖼞𖽳𖾐 𖼄𖽡𖽻 𖼷𖽜𖾐 𖼀𖽜𖾐，𖼽𖽻 𖼈𖽳𖾐 𖼖𖽙𖾐 𖼮𖽻𖾑 𖼊𖽴．𖽃𖽔𖾐 𖼺𖽺𖾑，𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼮𖽡𖽮𖾐，𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼖𖽙𖾐 𖼂𖽻𖾐 𖼄𖽔 𖼂𖽡𖾑．