𖼍𖽕𖾑 𖼈𖽪𖽺𖾑 𖼄𖽡 𖼇𖽺𖾐 𖼂𖽙𖾐 𖼳𖽴𖾑 𖼊𖽑𖽺 𖼹𖽳𖾑 𖼹𖽳𖾐 𖼠𖽙𖾐 𖼳𖽙𖾐
9
1 𖼍𖽕𖾑 𖼈𖽪𖽺𖾑 𖼊𖽻 𖼐𖽙𖾐：“𖼺𖽻 𖼖𖽚 𖼈𖽴 𖼷𖽺 𖼷𖽺𖾐 𖼺𖽪𖾐 𖼷𖽑𖽻𖾐 𖼮𖽻𖾐 𖼮𖽻𖾐 𖼺𖽺？ 𖼣𖽙𖾐 𖼽𖽱𖾐 𖼐𖽕 𖼍𖽔𖾐 𖼖𖽙𖾐 𖼀𖽙𖾐 𖼺𖽺𖾑，𖼽𖽻 𖼊𖽑𖽺 𖼐𖽙𖾑 𖼣𖽜 𖼊𖽻𖾐．” 2 𖼺𖽻 𖼖𖽚 𖼈𖽴 𖼮𖽜𖾐 𖼀𖽑𖽙 𖼊𖽑𖽡 𖼽𖽚𖾐 𖼮𖽻𖾐，𖼞𖽑𖽶𖾑 𖼳𖽡𖾑 𖼂𖽔𖾐 𖼄𖽡𖾐．𖼷𖽑𖽻𖾐 𖼽𖽻 𖼊𖽑𖽺 𖽃𖽶𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼄𖽡𖽻𖾐 𖼖𖽻𖾐，𖼍𖽕𖾑 𖼈𖽪𖽺𖾑 𖼽𖽻 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼳𖽡𖾑 𖼂𖽔𖾐 𖼣𖽻𖾐 𖼣𖽻𖾐？”𖼽𖽻 𖼊𖽻 𖼞𖽑𖽚：“𖼣𖽙𖾐 𖼣𖽻𖾐 𖼍𖽳𖾐．”
3 𖼈𖽪𖾐 𖼍𖽦 𖼹𖽦𖾑 𖼊𖽻 𖼐𖽙𖾐：“𖼺𖽻 𖼖𖽚 𖼈𖽴 𖼷𖽺 𖼷𖽺𖾐 𖼺𖽪𖾐 𖼷𖽑𖽻𖾐 𖼮𖽻𖾐 𖼮𖽻𖾐 𖼺𖽺？ 𖼣𖽙𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼮𖽡 𖼽𖽡𖾑 𖼖𖽙𖾐 𖼮𖽑𖽻𖾐 𖼽𖽻 𖼊𖽑𖽺 𖼐𖽙𖾑 𖼣𖽜 𖼊𖽻𖾐．”
𖼳𖽡𖾑 𖼂𖽔𖾐 𖼈𖽪𖾐 𖼍𖽦 𖼊𖽑𖽺 𖼊𖽻 𖼞𖽑𖽚：“𖼽𖽱𖾐 𖼐𖽕 𖼍𖽔𖾐 𖼞𖽳𖾐 𖼻𖽙 𖼊𖽑𖽡 𖼽𖽚𖾐 𖼮𖽻𖾐 𖼍𖽳𖾐 𖼺𖽺，𖼽𖽻 𖼞𖽑𖽶𖾑 𖼮𖽑𖽡𖾑 𖼀𖽑𖽦𖾐 𖼐𖽑𖽡 𖼂𖽦𖾐 𖼐𖽺𖾐 𖼮𖽑𖽡𖾐 𖼣𖽝𖾐 𖼺𖽪𖾐 𖼣𖽻𖾐．” 4 𖼈𖽪𖾐 𖼍𖽦 𖼹𖽦𖾑 𖼽𖽻 𖼊𖽑𖽺 𖼊𖽻 𖼐𖽙𖾐：“𖼽𖽻 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼍𖽳𖾐？”
𖼳𖽡𖾑 𖼂𖽔𖾐 𖼊𖽻 𖼞𖽑𖽚：“𖼽𖽻 𖼖𖽚 𖼍𖽡 𖼂𖽔𖾐 𖼄𖽡𖾐 𖼊𖽺𖾐 𖼽𖽕𖾑 𖼄𖽡 𖼖𖽡𖾑 𖼞𖽳𖾐 𖼻𖽙 𖼄𖽔 𖼰𖽧 𖼈𖽴 𖽃𖽔𖾑 𖼞𖽑𖽶𖾐 𖼞𖽳𖾐 𖼮𖽻𖾐．”
5 𖽃𖽔𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼹𖽡𖾐 𖼖𖽚 𖼍𖽡 𖼂𖽔𖾐 𖼄𖽡𖾐 𖼊𖽺𖾐 𖼽𖽕𖾑 𖼄𖽡 𖼖𖽡𖾑 𖼞𖽳𖾐 𖼻𖽙 𖼄𖽔 𖼰𖽧 𖼈𖽴 𖼞𖽳𖾐 𖼮𖽑𖽻𖾐 𖼽𖽱𖾐 𖼐𖽕 𖼍𖽔𖾐 𖼞𖽳𖾐 𖼻𖽙 𖼊𖽑𖽺 𖼹𖽶𖾐 𖼞𖽚 𖼖𖽻𖾐． 6 𖼺𖽻 𖼖𖽚 𖼞𖽳𖾐 𖼖𖽡𖾑 𖼂𖽙𖾑，𖼽𖽱𖾐 𖼐𖽕 𖼍𖽔𖾐 𖼞𖽳𖾐 𖼻𖽙 𖼄𖽡 𖼇𖽺𖾐 𖼂𖽙𖾐 𖼳𖽴𖾑 𖼖𖽻𖾐 𖼍𖽕𖾑 𖼈𖽪𖽺𖾑 𖽃𖽙𖾑 𖼄𖽺 𖼮𖽑𖽡𖾐，𖼂𖽴𖾐 𖼹𖽺𖾐 𖼽𖽻 𖼊𖽑𖽺 𖼊𖽑𖽴．𖼍𖽕𖾑 𖼈𖽪𖽺𖾑 𖼀𖽦𖾐：“𖼄𖽡 𖼇𖽺𖾐 𖼂𖽙𖾐 𖼳𖽴𖾑！”
𖼽𖽻 𖼊𖽻 𖼞𖽑𖽚：“𖼮𖽜𖾐 𖼀𖽑𖽙 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．”
7 𖼍𖽕𖾑 𖼈𖽪𖽺𖾑 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼮𖽡𖽮𖾐 𖼄𖽔 𖼻𖽻𖾐，𖼣𖽙𖾐 𖼐𖽑𖽡𖽻𖾐 𖼀𖽙 𖼽𖽱𖾐 𖼐𖽕 𖼍𖽔𖾐 𖼖𖽙𖾐 𖼀𖽙𖾐 𖼺𖽺𖾑，𖼹𖽳𖾐 𖼄𖽙𖾐 𖼐𖽑𖽡𖾐 𖼊𖽑𖽺 𖼐𖽙𖾑 𖼣𖽜 𖼊𖽻𖾐，𖼣𖽙𖾐 𖼐𖽑𖽡𖽻𖾐 𖼂𖽙𖾐 𖼺𖽻 𖼖𖽚 𖼞𖽳𖾐 𖼄𖽡𖾐 𖼮𖽑𖽙𖾐 𖼞𖽑𖽙𖾐 𖼣𖽻𖾐 𖼀𖽑𖽨 𖼐𖽑𖽡𖾐 𖼊𖽑𖽺 𖼞𖽑𖽚 𖼊𖽻𖾐，𖼐𖽑𖽡𖾐 𖼖𖽺𖾑 𖼄𖽔 𖼐𖽙 𖼣𖽙𖾐 𖼖𖽙𖾐 𖼮𖽑𖽻𖾐 𖼷𖽙𖾐 𖽂𖽙𖾐 𖼷𖽙 𖼊𖽙𖾐．”
8 𖼄𖽡 𖼇𖽺𖾐 𖼂𖽙𖾐 𖼳𖽴𖾑 𖼹𖽦𖾑 𖼽𖽻 𖼊𖽑𖽺 𖼊𖽑𖽴 𖼺𖽺𖾑，𖼀𖽦𖾐：“𖼮𖽜𖾐 𖼀𖽑𖽙 𖽃𖽔 𖼊𖽺𖾑 𖼳𖽶 𖼰𖽕𖾐 𖼖𖽚 𖼐𖽺𖾑？ 𖽃𖽔𖾑 𖼐𖽙 𖼳𖽶𖾐 𖼄𖽻𖾐 𖼊𖽑𖽡 𖼊𖽝𖾐 𖼖𖽙𖾐 𖼺𖽶𖾑 𖼍𖽺𖾑 𖼣𖽻𖾐，𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼦𖽑𖽺𖾑 𖼻𖽻𖾐 𖼣𖽙𖾐 𖼊𖽑𖽺 𖼐𖽦𖾐 𖼳𖽪𖾐！”
9 𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼞𖽳𖾐 𖼮𖽜𖾐 𖼀𖽑𖽙 𖼳𖽡𖾑 𖼂𖽔𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼖𖽙𖾐 𖼀𖽦𖾐：“𖼺𖽻 𖼖𖽚 𖼞𖽳𖾐 𖼞𖽑𖽙𖾐 𖼣𖽻𖾐 𖼺𖽪𖾐 𖼐𖽺𖾐 𖼽𖽻𖾑 𖼈𖽴 𖼞𖽳𖾐 𖼞𖽑𖽙𖾐 𖼣𖽻𖾐 𖼺𖽪𖾐，𖼣𖽙𖾐 𖼄𖽳𖾑 𖼄𖽳 𖼀𖽑𖽨 𖼐𖽑𖽡𖾐 𖼺𖽡 𖼀𖽑𖽙 𖼞𖽳𖾐 𖼖𖽡𖾑 𖼂𖽙𖾑 𖼊𖽑𖽺 𖼞𖽜 𖼦𖽑𖽙𖾐． 10 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼻𖽙，𖼹𖽦𖾑 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙，𖼽𖽻 𖼖𖽙𖾐 𖼀𖽙𖾐 𖼄𖽡𖾐 𖼄𖽙 𖼄𖽡𖾐 𖼳𖽶𖾑 𖼖𖽡𖾐，𖼐𖽑𖽡𖾐 𖼞𖽑𖽙𖾐 𖼠𖽜𖾐 𖽂𖽙𖾐 𖼺𖽪𖾐 𖼈𖽺𖾐 𖼂𖽻𖾐 𖼖𖽻𖾐 𖼽𖽻 𖼞𖽜 𖼷𖽙 𖼖𖽡𖾐．𖼐𖽑𖽡𖾐 𖼺𖽡 𖼀𖽑𖽙 𖼞𖽳𖾐 𖼖𖽡𖾑 𖼂𖽙𖾑 𖼄𖽡 𖼇𖽺𖾐 𖼂𖽙𖾐 𖼳𖽴𖾑 𖼄𖽔 𖼐𖽙 𖼣𖽙𖾐 𖼖𖽙𖾐 𖼮𖽑𖽻𖾐 𖼷𖽙𖾐 𖼷𖽙 𖼊𖽻𖾐．” 𖼳𖽡𖾑 𖼂𖽔𖾐 𖼻𖽙 𖼷𖽑𖽡𖾐 𖼣𖽙 𖼽𖽚𖾐 𖼮𖽻𖾐，𖼮𖽜𖾐 𖼀𖽑𖽙 𖼐𖽑𖽡 𖼷𖽑𖽡𖾐 𖼽𖽚𖾐 𖼮𖽻𖾐．
11 𖼳𖽡𖾑 𖼂𖽔𖾐 𖼈𖽪𖾐 𖼍𖽦 𖼖𖽙𖾐 𖼀𖽦𖾐：“𖼣𖽙𖾐 𖼺𖽡 𖼀𖽑𖽙，𖼣𖽙𖾐 𖼈𖽪𖾐 𖼍𖽦 𖽃𖽔𖾐！𖼐𖽑𖽡𖾐 𖼮𖽜𖾐 𖼀𖽑𖽙 𖼖𖽙𖾐 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐，𖼮𖽜𖾐 𖼀𖽑𖽙 𖼷𖽑𖽜𖾑 𖼷𖽑𖽜𖾐 𖼂𖽺𖾐 𖼽𖽡𖾐 𖼊𖽻𖾐．” 𖽃𖽔𖾐 𖼺𖽺𖾑 𖼄𖽡 𖼇𖽺𖾐 𖼂𖽙𖾐 𖼳𖽴𖾑 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼊𖽡𖾐 𖼷𖽙𖾐 𖼷𖽙，𖼽𖽻 𖼈𖽪𖾐 𖼍𖽦 𖼞𖽳𖾐 𖼻𖽙 𖼊𖽑𖽡 𖼽𖽚𖾐 𖼣𖽻𖾐 𖼖𖽙𖾐 𖼺𖽶𖾑．