𖼽𖽱𖾐 𖼳𖽪𖾐 𖼽𖽕𖾑 𖼺𖽪𖾑 18

𖼠𖽳𖾐 𖼖𖽪𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼳𖽡𖽪

1 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼳𖽶𖾑 𖼖𖽚 𖼖𖽪𖾐 𖼞𖽳𖾐 𖼻𖽶𖾑 𖼖𖽻𖾐，𖼍𖽡𖾐 𖼦𖽑𖽺𖾐 \fr 18．1 \ft 𖼍𖽡𖾐 𖼦𖽑𖽺𖾐 𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽙𖾐 𖼖𖽙𖾐 𖼄𖽡𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼣𖽻𖾐． 𖼍𖽚 𖼞𖽑𖽶𖾑 𖼄𖽡𖾐 𖼊𖽺𖾐 𖼍𖽙𖾑 ，𖼞𖽪𖾐 𖼮𖽡𖽺𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼽𖽻 𖼈𖽳𖾐 𖼮𖽑𖽢𖾑 𖼊𖽝 𖽂𖽙𖾐 𖼦𖽑𖽻𖾐． 2 𖼞𖽑𖽶𖾑 𖼮𖽶𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼳𖽶 𖼮𖽑𖽪𖾐 𖼳𖽶 𖼷𖽑𖽻𖾐 𖼦𖽑𖽔𖾐 𖼖𖽺𖾑 𖼄𖽡𖾐 𖼳𖽡𖽪 𖼀𖽜𖾐 𖼄𖽔 𖽂𖽙𖾐 𖼺𖽺．

3 𖼽𖽱𖾐 𖼳𖽪𖾐 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼺𖽪𖾐 𖼄𖽡𖾐 𖼊𖽺𖾐，𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼄𖽔 𖼊𖽝 𖼽𖽡𖾐 𖼺𖽺𖾑，𖼞𖽑𖽙 𖼊𖽑𖽻𖾐 𖼮𖽑𖽡𖾐 𖼊𖽻𖾐 𖼐𖽺𖾑？ 4 𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼊𖽑𖽡 𖼮𖽑𖽪𖾐 𖼳𖽶 𖼞𖽑𖽶𖾐 𖼺𖽙𖾐 𖼽𖽚𖾐 𖼺𖽺𖾐 𖼊𖽑𖽧 𖼖𖽻𖾐，𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖼹𖽡𖾐 𖼊𖽑𖽧 𖼽𖽡𖾐 𖼺𖽺𖾑，𖼽𖽻 𖼈𖽳𖾐 𖼞𖽜 𖼞𖽑𖽶𖾑 𖼄𖽡𖾐 𖼊𖽺𖾐 𖼄𖽳𖾑 𖼄𖽳 𖼺𖽜 𖼻𖽶𖾐，𖼞𖽑𖽙𖾐 𖼣𖽻𖾐 𖼮𖽑𖽪𖾐 𖼳𖽶 𖽂𖽙𖾐 𖼷𖽻 𖼺𖽪𖾐 𖼄𖽡𖾐 𖼳𖽡𖽪 𖼞𖽳𖾐 𖼄𖽡𖾐 𖼮𖽑𖽡𖽻𖾐 𖼞𖽑𖽶𖾑 𖼀𖽚𖾐 𖼹𖽺𖾐 𖼖𖽻𖾐 𖼺𖽺𖾑，𖼀𖽑𖽚𖾐 𖼣𖽙𖾐 𖼮𖽻𖾐 𖼞𖽳𖾐 𖼞𖽚 𖼖𖽻𖾐 𖼖𖽡𖾐． 5 𖼽𖽻 𖼈𖽳𖾐 𖼄𖽡𖾐 𖼳𖽡𖽪 𖼞𖽑𖽶𖾑 𖼀𖽜𖾐 𖼳𖽶 𖼀𖽜𖾐 𖼂𖽺𖾐 𖼖𖽡𖾐．𖼽𖽚 𖼍𖽕𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼊𖽺𖾐 𖼊𖽑𖽺 𖼮𖽻𖾐，𖼽𖽱𖾐 𖼺𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼊𖽺𖾐 𖼊𖽑𖽺 𖼮𖽻𖾐． 6 𖼐𖽑𖽡𖾐 𖼈𖽳𖾐 𖼄𖽡𖾐 𖼳𖽡𖽪 𖼦𖽑𖽺𖾑 𖼀𖽜𖾐 𖼳𖽶 𖼀𖽜𖾐 𖼂𖽺𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼀𖽚𖾐 𖼹𖽺𖾐 𖼖𖽻𖾐 𖼺𖽪𖾐 𖼄𖽡𖾐 𖼮𖽑𖽡𖽻𖾐 𖼞𖽑𖽶𖾑 𖼈𖽺𖾐 𖼣𖽙𖾐 𖼊𖽑𖽺 𖼞𖽜 𖼺𖽺𖾑，𖼣𖽙𖾐 𖼦𖽑𖽺𖾑 𖼠𖽻𖾐 𖽃𖽔 𖼐𖽺𖾑 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐，𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼷𖽑𖽺𖾐 𖼞𖽻𖾐 𖼊𖽻𖾐．

7 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼞𖽳𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼄𖽡𖾐 𖼳𖽡𖽪 𖼄𖽔 𖼮𖽻𖾐．𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼍𖽡𖾐 𖼄𖽻 𖼂𖽺𖾐 𖼞𖽑𖽶𖾑 𖼽𖽻 𖼈𖽳𖾐 𖼞𖽳𖾐 𖼷𖽻 𖼀𖽜𖾐 𖼣𖽻𖾐．𖼰𖽡𖽔𖾐 𖼍𖽴 𖼮𖽑𖽪𖾐 𖼳𖽶 𖼷𖽑𖽻𖾐、 𖼖𖽡𖽚 𖼂𖽡𖽦𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽡 𖼀𖽑𖽦𖾐，𖼽𖽻 𖼈𖽳𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼄𖽡𖾐 𖼳𖽡𖽪 𖽂𖽙𖾐 𖼦𖽑𖽻𖾐，𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽜𖾐 𖼀𖽑𖽙 𖼄𖽚 𖼳𖽡𖾐 𖼀𖽜𖾐 𖼽𖽻 𖼈𖽳𖾐 𖼊𖽑𖽺 𖼞𖽜 𖼺𖽪𖾐 𖼣𖽻𖾐．”

8 𖼄𖽡𖾐 𖼮𖽑𖽡𖽻𖾐 𖼀𖽚𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼺𖽜 𖼽𖽡𖾐 𖼞𖽑𖽶𖾑 𖼮𖽶𖾐，𖼽𖽱𖾐 𖼳𖽪𖾐 𖼽𖽕𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐： “𖼐𖽑𖽡𖾐 𖼈𖽳𖾐 𖼽𖽡𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼺𖽜 𖼻𖽶𖾐，𖼄𖽡𖾐 𖼊𖽺𖾐 𖼞𖽳𖾐 𖼄𖽡𖾐 𖼮𖽑𖽡𖽻𖾐 𖼀𖽚𖾐 𖼀𖽑𖽢 𖼺𖽺𖾑，𖼀𖽑𖽚𖾐 𖼣𖽙𖾐 𖼮𖽻𖾐 𖼞𖽳𖾐 𖼞𖽚 𖼖𖽻𖾐．𖼣𖽙𖾐 𖼳𖽶𖾑 𖼖𖽚 𖼖𖽪𖾐 𖼦𖽑𖽺𖾑 𖼠𖽻𖾐 𖼞𖽳𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺，𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼷𖽑𖽺𖾐 𖼞𖽻𖾐 𖼊𖽻𖾐．” 9 𖽃𖽔𖾐 𖼺𖽺𖾑，𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼽𖽡𖾐 𖼦𖽑𖽙𖾐，𖼞𖽑𖽶𖾑 𖼄𖽡𖾐 𖼊𖽺𖾐 𖼺𖽜 𖼻𖽶𖾐，𖼦𖽑𖽔𖾐 𖼖𖽺𖾑 𖼄𖽡𖾐 𖼮𖽑𖽡𖽻𖾐 𖼀𖽚𖾐 𖼹𖽺𖾐 𖼖𖽻𖾐，𖼖𖽪𖾐 𖼞𖽑𖽶𖾑 𖼹𖽻𖾐 𖼀𖽜𖾐 𖼳𖽶 𖼀𖽜𖾐 𖼂𖽺𖾐，𖼈𖽝 𖼺𖽪𖾑 𖼮𖽑𖽙𖾐 𖼊𖽑𖽺 𖼍𖽦𖾐 𖼺𖽺𖾑，𖼀𖽑𖽚𖾐 𖼳𖽶𖾑 𖼖𖽚 𖼖𖽪𖾐 𖼽𖽱𖾐 𖼳𖽪𖾐 𖼽𖽕𖾑 𖼮𖽻𖾐 𖼞𖽳𖾐 𖼞𖽚 𖼖𖽻𖾐． 10 𖼽𖽱𖾐 𖼳𖽪𖾐 𖼽𖽕𖾑 𖼳𖽶𖾑 𖼖𖽚 𖼖𖽪𖾐 𖼞𖽳𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼽𖽻 𖼈𖽳𖾐 𖼖𖽙𖾐 𖼀𖽙𖾐 𖼷𖽑𖽺𖾐 𖼞𖽻𖾐，𖼄𖽡𖾐 𖼳𖽡𖽪 𖼀𖽜𖾐 𖼺𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼞𖽜 𖼦𖽑𖽙𖾐．

𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼳𖽡𖽪

11 𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽴 𖼮𖽑𖽪𖾐 𖽃𖽙𖾑 𖼄𖽺 𖼞𖽑𖽶𖾑 𖼊𖽑𖽡 𖼷𖽑𖽺𖾐 𖼞𖽻𖾐 ，𖼽𖽻 𖼈𖽳𖾐 𖼞𖽻𖾐 𖽂𖽙𖾐 𖼺𖽪𖾐 𖼄𖽡𖾐 𖼳𖽡𖽪，𖼞𖽑𖽶𖾑 𖼽𖽚 𖼍𖽕𖾑 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼐𖽺𖾐 𖼽𖽱𖾐 𖼺𖽴𖾑 𖼻𖽙 𖼮𖽑𖽡 𖼖𖽡𖾑 𖼖𖽦𖾑 𖼞𖽳𖾐 𖼄𖽡𖾐 𖼊𖽺𖾐 𖼠𖽻𖾐 𖼊𖽑𖽺 𖼷𖽻．

12 𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼊𖽺𖾐，𖼞𖽑𖽶𖾑 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽻𖾐 𖼍𖽪𖾐，𖼊𖽦𖾐 𖼽𖽡𖾐 𖼺𖽺𖾑 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼮𖽑𖽡𖾐，𖼹𖽦𖾑 𖼀𖽑𖽚𖾐 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖽂𖽙 𖼰𖽡𖽺𖾐 𖼊𖽑𖽺 𖼮𖽑𖽻𖾐 𖼺𖽺𖾑，𖼂𖽚 𖼽𖽕𖾑 𖼈𖽴 𖼖𖽪𖾐 𖼞𖽳𖾐 𖼄𖽡𖾐 𖼳𖽡𖽻𖾐 𖼀𖽙 𖼮𖽑𖽡𖾐． 13 𖼹𖽦𖾑 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼖𖽪𖾑 𖼺𖽶𖾐 𖼖𖽪𖾐 𖼞𖽳𖾐 𖼮𖽑𖽡𖾐，𖼖𖽪𖾑 𖼺𖽶𖾐 𖼞𖽑𖽶𖾑 𖼂𖽚 𖼊𖽑𖽴𖾑 𖼖𖽡𖾑 𖼣𖽻𖾐．𖼹𖽦𖾑 𖼹𖽺𖾐 𖼽𖽡𖾐 𖼽𖽕𖾑 𖼊𖽑𖽔𖾐 𖼖𖽲𖾑 𖼽𖽕𖾑 𖼍𖽕 𖼄𖽡𖾐 𖼊𖽺𖾐 𖼮𖽑𖽻𖾐 𖼺𖽺𖾑 ，𖼍𖽕𖾑 𖽂𖽚 𖼞𖽳𖾐 𖼂𖽚 𖼦𖽴 𖼖𖽪𖽦 𖼖𖽪𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖽂𖽙 𖼰𖽡𖽺𖾐 𖼊𖽑𖽺 𖼮𖽑𖽡𖾐．

14 𖼹𖽦𖾑 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼽𖽡𖾐，𖼹𖽦𖾑 𖼀𖽑𖽚𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼽𖽡𖾐，𖼂𖽚 𖼦𖽴 𖼖𖽪𖽦 𖼖𖽪𖾐 𖼞𖽳𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼍𖽦 𖼠𖽚 𖼀𖽙 𖽂𖽙 𖼰𖽡𖽺𖾐 𖼮𖽑𖽻𖾐 𖼍𖽪𖾐 𖼺𖽺𖾑，𖼽𖽚 𖼍𖽕𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼰𖽡𖾐 𖼖𖽡𖽦𖾑 𖼂𖽔𖾐 𖼖𖽧𖾑 𖼖𖽪𖾐 𖼞𖽳𖾐 𖼮𖽑𖽡𖾐，𖼰𖽡𖾐 𖼖𖽡𖽦𖾑 𖼂𖽔𖾐 𖼖𖽧𖾑 𖼞𖽑𖽶𖾑 𖼰𖽡𖾐 𖼖𖽡𖽦𖾑 𖼽𖽺𖾐 𖼖𖽧 𖼣𖽻𖾐．𖼦𖽑𖽺𖾑 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼞𖽳𖾐 𖼄𖽡𖾐 𖼹𖽸𖾑 𖼣𖽻𖾐．

15 𖼠𖽳𖾐 𖼻𖽸 𖼄𖽡𖾐 𖼀𖽳 𖼞𖽳𖾐 𖼄𖽡𖾐 𖼹𖽸𖾑，𖼞𖽑𖽶𖾑 𖼰𖽡𖾐 𖼖𖽡𖽦𖾑 𖼽𖽺𖾐 𖼖𖽧 𖼖𖽪𖾐 𖼞𖽳𖾐 𖼮𖽑𖽻𖾐 𖼍𖽪𖾐，𖼀𖽑𖽚𖾐 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼽𖽡𖾐 𖼺𖽺𖾑，𖼐𖽑𖽧 𖼇𖽮 𖼍𖽙𖾐 𖼽𖽕𖾑 𖼈𖽡𖾐 𖼊𖽚𖾐 𖼞𖽳𖾐 𖼮𖽑𖽡𖾐． 16 𖼹𖽦𖾑 𖼹𖽺𖾐 𖼽𖽺𖾐 𖼺𖽺𖾑 𖼳𖽡𖽺𖾐 𖼐𖽜𖾑 𖼹𖽶 𖼖𖽻𖾐 𖼞𖽑𖽪 𖽃𖽙𖾑 𖼄𖽺 𖼀𖽳 𖼞𖽳𖾐 𖽂𖽙 𖼰𖽡𖽺𖾐 𖼦𖽜 𖼷𖽜𖾐 𖼮𖽑𖽡𖾐，𖼞𖽑𖽶𖾑 𖼖𖽡𖾑 𖼇𖽕 𖼽𖽺𖾐 𖼖𖽻𖾐 𖼞𖽑𖽪 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼞𖽳𖾐 𖽂𖽙 𖼰𖽡𖽺𖾐 𖼣𖽻𖾐．𖼹𖽦𖾑 𖼹𖽺𖾐 𖼽𖽡𖾐 𖼳𖽡𖽺𖾐 𖼐𖽜𖾑 𖼹𖽶 𖼖𖽻𖾐 𖼞𖽑𖽪 𖼮𖽑𖽡𖾐，𖼽𖽺𖾐 𖼂𖽪𖾑 𖼺𖽶𖾐 𖽂𖽙 𖼰𖽡𖽺𖾐 𖼞𖽳𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼮𖽑𖽡𖾐，𖼹𖽦𖾑 𖼽𖽡𖾐 𖼺𖽺𖾑 𖼽𖽺 𖼖𖽚 𖼰𖽧 𖼈𖽡𖾐 𖼊𖽚𖾐 𖼞𖽳𖾐 𖼮𖽑𖽡𖾐． 17 𖼹𖽦𖾑 𖼰𖽻𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼽𖽡𖾐 𖼺𖽺𖾑，𖼽𖽺 𖼳𖽶𖾑 𖼄𖽦𖾑 𖼄𖽡𖾐 𖼊𖽺𖾐 𖼮𖽑𖽡𖾐，𖼽𖽕𖾑 𖼍𖽪𖾐 𖼄𖽧 𖽂𖽙 𖼖𖽻𖾐 𖼂𖽡𖽻𖾐 𖼍𖽦 𖼠𖽚 𖼀𖽙 𖼞𖽳𖾐 𖼰𖽡𖾐 𖼖𖽡𖾑 𖼖𖽪𖾑 𖼄𖽡𖾐 𖼊𖽺𖾐 𖼮𖽑𖽡𖾐，𖼹𖽦𖾑 𖼹𖽺𖾐 𖼽𖽡𖾐 𖼺𖽺𖾑 𖼖𖽡𖽚 𖼂𖽡𖽦𖾑 𖼻𖽙 𖼂𖽙𖾐 𖼦𖽕 𖼞𖽳𖾐 𖼖𖽚𖾐 𖼳𖽕𖾐 𖼊𖽑𖽺𖾐 𖼞𖽑𖽻𖾑 𖼮𖽑𖽡𖾐． 18 𖼹𖽦𖾑 𖼽𖽕𖾑 𖼖𖽔𖾐 𖼂𖽔𖾐 𖼄𖽡𖾐 𖼊𖽺𖾐 𖼍𖽦 𖼠𖽚 𖼀𖽙 𖽂𖽙 𖼰𖽡𖽺𖾐 𖼞𖽳𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼮𖽑𖽻𖾐 𖼺𖽺𖾑，𖼹𖽺𖾐 𖼽𖽡𖾐 𖼽𖽕𖾑 𖼖𖽔𖾐 𖼂𖽔𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽡𖾐． 19 𖼹𖽦𖾑 𖼂𖽚 𖼦𖽴 𖼖𖽔𖾐 𖼄𖽡𖾐 𖼊𖽺𖾐 𖼞𖽳𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼮𖽑𖽻𖾐 𖼺𖽺𖾑，𖼷𖽑𖽙 𖼈𖽡𖾐 𖼦𖽜𖾐 𖼄𖽙𖾐 𖼖𖽻𖾐 𖼈𖽪𖾑 𖼞𖽳𖾐 𖼮𖽑𖽡𖾐，𖼞𖽑𖽶𖾑 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼞𖽳𖾐 𖼈𖽡𖾐 𖼄𖽳𖾑 𖼣𖽻𖾐，𖼦𖽑𖽺𖾑 𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼞𖽳𖾐 𖼄𖽡𖾐 𖼹𖽸𖾑 𖼣𖽻𖾐．

20 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼞𖽳𖾐 𖼄𖽡𖾐 𖼹𖽸𖾑 𖼞𖽑𖽶𖾑 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼣𖽻𖾐．𖼦𖽑𖽺𖾑 𖼀𖽜𖾐 𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼞𖽜 𖼺𖽪𖾐 𖼄𖽡𖾐 𖼳𖽡𖽪 𖼖𖽡𖾐 𖼣𖽴 𖼞𖽳𖾐 𖼄𖽡𖾐 𖼹𖽸𖾑 𖼣𖽻𖾐．

21 𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽴 𖼮𖽑𖽪𖾐 𖼞𖽑𖽙𖾐 𖼀𖽜𖾐 𖽂𖽙𖾐 𖼺𖽪𖾐 𖼖𖽪𖾐： 𖼞𖽑𖽶𖾑 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐、 𖼂𖽚 𖼦𖽴 𖼖𖽔𖾐 𖼖𖽪𖾐、 𖼽𖽺𖾐 𖼄𖽦𖾑 𖼰𖽡𖾐 𖼳𖽡𖾐 𖼖𖽪𖾐、 22 𖼂𖽚 𖼽𖽕𖾑 𖼖𖽔𖾐 𖼂𖽔𖾐 𖼖𖽪𖾐、 𖼳𖽡 𖼄𖽔 𖼖𖽡𖽦 𖼖𖽪𖾐、 𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐、 23 𖼽𖽕𖾑 𖼈𖽴 𖼖𖽪𖾐、 𖼂𖽔𖾐 𖼖𖽔𖾐 𖼖𖽪𖾐、 𖽃𖽴 𖼇𖽮 𖼖𖽔𖾐 𖼖𖽪𖾐、 24 𖼰𖽡𖾐 𖼇𖽕 𖽃𖽔𖾐 𖼄𖽚 𖼐𖽑𖽧 𖼖𖽪𖾐、 𖽃𖽴 𖼇𖽮 𖼐𖽑𖽧 𖼖𖽪𖾐 𖼐𖽺𖾐 𖼰𖽡𖽔𖾐 𖼂𖽔𖾐 𖼖𖽪𖾐 𖼣𖽻𖾐，𖼖𖽪𖾐 𖼄𖽳𖾑 𖼄𖽳 𖼷𖽑𖽡𖾐 𖼐𖽑𖽡 𖼊𖽝𖾐 𖼮𖽻𖾐，𖼦𖽑𖽔𖾐 𖼖𖽺𖾑 𖼖𖽪𖾐 𖼦𖽑𖽺𖾑 𖼹𖽻𖾐 𖼖𖽙𖾐 𖼊𖽴 𖼺𖽪𖾐 𖼮𖽑𖽡𖽦𖾐 𖼠𖽻𖾐 𖼖𖽺𖾑 𖼮𖽑𖽻𖾐． 25 𖼹𖽦𖾑 𖼰𖽡𖾐 𖼂𖽡𖽦𖾑 𖼖𖽪𖾐、 𖼖𖽔𖾐 𖼄𖽔 𖼖𖽪𖾐、 𖼂𖽡 𖼖𖽮𖾑 𖼖𖽪𖾐、 26 𖼄𖽡 𖼺𖽶𖾐 𖼂𖽔𖾐 𖼖𖽪𖾐、 𖼰𖽡𖾐 𖼇𖽺𖾐 𖼖𖽔𖾐 𖼖𖽪𖾐、 𖼄𖽚 𖼺𖽔 𖼖𖽪𖾐、 27 𖼖𖽡𖾑 𖼰𖽡𖽺𖾐 𖼖𖽪𖾐、 𖼽𖽡𖾐 𖼖𖽡𖾑 𖼀𖽑𖽧 𖼖𖽴𖾑 𖼖𖽪𖾐、 𖼊𖽑𖽔𖾐 𖼖𖽔𖾐 𖼖𖽔𖾐 𖼖𖽪𖾐、

28 𖼳𖽡 𖼖𖽔𖾐 𖼖𖽪𖾐、 𖼽𖽡 𖼖𖽡𖾑 𖼇𖽮 𖼖𖽪𖾐、 𖼽𖽺𖾐 𖼂𖽪𖾑 𖼺𖽶𖾐 𖼖𖽪𖾐 (𖼽𖽺𖾐𖼂𖽪𖾑 𖼺𖽶𖾐 𖼦𖽑𖽺𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼣𖽻𖾐)、 𖼰𖽡𖾐 𖼂𖽡 𖼽𖽕𖾑 𖼖𖽪𖾐 𖼐𖽺𖾐 𖼰𖽡𖾐 𖼖𖽡𖽦𖾑 𖼖𖽪𖾐 𖼣𖽻𖾐，𖼖𖽪𖾐 𖼄𖽳𖾑 𖼄𖽳 𖼷𖽑𖽡𖾐 𖼖𖽡𖾐 𖼊𖽝𖾐 𖼮𖽻𖾐，𖼦𖽑𖽔𖾐 𖼖𖽺𖾑 𖼖𖽪𖾐 𖼦𖽑𖽺𖾑 𖼹𖽻𖾐 𖼖𖽙𖾐 𖼞𖽑𖽙𖾐 𖼊𖽴 𖼺𖽪𖾐 𖼮𖽑𖽡𖽦𖾐 𖼠𖽻𖾐 𖼖𖽺𖾑 𖼮𖽑𖽻𖾐．𖼦𖽑𖽺𖾑 𖼹𖽻𖾐 𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽴 𖼮𖽑𖽪𖾐 𖼞𖽑𖽙𖾐 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼳𖽡𖽪 𖼣𖽻𖾐．