𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽡 𖼀𖽑𖽦𖾐 𖼞𖽳𖾐 𖼄𖽡𖾐 𖼳𖽡𖽪
17
1 𖼽𖽱𖾐 𖼺𖽴𖾑 𖼞𖽳𖾐 𖼻𖽙 𖼈𖽳 𖼞𖽑𖽶𖾑 𖼄𖽔 𖼐𖽕 𖼳𖽡𖾐 𖼣𖽻𖾐，𖼽𖽻 𖼞𖽳𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼷𖽑𖽺𖾐 𖼞𖽻𖾐 𖼞𖽑𖽙𖾐 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼳𖽡𖽪 𖼞𖽑𖽶𖾑 𖼈𖽝 𖼍𖽕𖾑 𖽂𖽚 𖼍𖽙𖾑，𖼄𖽔 𖼐𖽕 𖼳𖽡𖾐 𖼞𖽳𖾐 𖼻𖽙 𖼈𖽳 𖼞𖽑𖽶𖾑 𖼰𖽡𖾐 𖼖𖽡𖽦𖾑 𖼽𖽻 𖼀𖽙 𖼄𖽔 𖼰𖽧 𖼣𖽻𖾐，𖼄𖽔 𖼰𖽧 𖼦𖽑𖽺𖾑 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼣𖽻𖾐 𖼺𖽺𖾑，𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼐𖽺𖾐 𖼂𖽔𖾐 𖼳𖽔𖾐 𖼄𖽡𖾐 𖼊𖽺𖾐 𖼀𖽜𖾐 𖽂𖽙𖾐． 2 𖼄𖽔 𖼐𖽕 𖼳𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼠𖽳𖾐 𖼖𖽪𖾐 𖼞𖽑𖽶𖾑 𖼹𖽻𖾐 𖼷𖽑𖽺𖾐 𖼞𖽻𖾐 𖼺𖽺𖾑 𖼄𖽡𖾐 𖼳𖽡𖽪 𖼀𖽜𖾐 𖽂𖽙𖾐，𖼞𖽑𖽶𖾑 𖼽𖽕𖾑 𖼂𖽡 𖼽𖽡 𖼳𖽡𖽦𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐、 𖼳𖽡𖾐 𖼖𖽴𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐、 𖼽𖽕𖾑 𖼺𖽶𖾐 𖼖𖽡𖽦𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐、 𖼳𖽶𖾑 𖼰𖽡𖽦𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐、 𖼳𖽡𖾐 𖼇𖽮 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼐𖽺𖾐 𖼳𖽶𖾑 𖼄𖽡 𖼍𖽕𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼣𖽻𖾐，𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼖𖽺𖾑 𖼽𖽱𖾐 𖼺𖽴𖾑 𖼞𖽳𖾐 𖼻𖽙 𖼄𖽔 𖼐𖽕 𖼳𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼽𖽻 𖼄𖽳𖾑 𖼈𖽴 𖼮𖽑𖽪𖾐 𖼞𖽑𖽶𖾐 𖼞𖽳𖾐 𖼻𖽙 𖼐𖽜𖾐 𖼣𖽻𖾐．3 𖼄𖽔 𖼐𖽕 𖼳𖽡𖾐 𖼞𖽳𖾐 𖼊𖽡 𖼻𖽙，𖼄𖽔 𖼰𖽧 𖼞𖽳𖾐 𖼖𖽦𖾐 𖼻𖽙，𖼰𖽡𖾐 𖼖𖽡𖽦𖾑 𖼞𖽳𖾐 𖼖𖽡𖾑 𖼂𖽙𖾑，𖼳𖽡𖾐 𖼇𖽮 𖼞𖽳𖾐 𖼻𖽙 𖼳𖽡𖾐 𖼖𖽚 𖼇𖽺𖾐 𖼦𖽔𖾐 𖼻𖽙 𖼄𖽔 𖼮𖽻𖾐，𖼻𖽙 𖼄𖽳 𖼍𖽺𖾑 𖼮𖽻𖾐，𖼽𖽻 𖼻𖽙 𖼄𖽳 𖼞𖽑𖽶𖾑 𖼄𖽔 𖼖𖽔𖾐、 𖼐𖽚 𖽃𖽔𖾐、 𖼦𖽴 𖼖𖽔𖾐、 𖼄𖽧𖾑 𖼰𖽡𖽔𖾐 𖼐𖽺𖾐 𖼍𖽴 𖼺𖽔 𖼣𖽻𖾐． 4 𖼽𖽻 𖼈𖽳𖾐 𖼖𖽻𖾐 𖼍𖽡𖾐 𖼄𖽻 𖼽𖽡 𖼖𖽡𖾑 𖼽𖽕𖾑 𖼺𖽔、 𖼐𖽜𖾑 𖼞𖽳𖾐 𖼻𖽙 𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼈𖽪𖾑 𖼷𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽡𖾐 𖼖𖽻𖾐，𖼀𖽦𖾐： “𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼹𖽦𖾐 𖼄𖽚 𖼳𖽡𖾐 𖼊𖽑𖽺 𖼄𖽪𖾑 𖼍𖽴𖾑 𖼠𖽚，𖼣𖽙𖾐 𖼈𖽳𖾐 𖼈𖽧 𖼐𖽑𖽳𖾐 𖼠𖽻𖾐 𖼞𖽑𖽶𖾐 𖼄𖽡𖾐 𖼳𖽡𖽪 𖼀𖽜𖾐 𖽂𖽙𖾐 𖼷𖽻．” 𖽃𖽔𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼽𖽻 𖼈𖽳𖾐 𖼀𖽑𖽙 𖼈𖽳 𖼀𖽑𖽙 𖼽𖽳𖾐 𖼞𖽳𖾐 𖼮𖽑𖽻𖾐 𖼄𖽡𖾐 𖼳𖽡𖽪 𖼀𖽜𖾐 𖼽𖽻 𖼈𖽳𖾐 𖼊𖽑𖽺 𖼞𖽜． 5 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑， 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼞𖽳𖾐 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼐𖽺𖾐 𖼂𖽔𖾐 𖼳𖽔𖾐 𖼄𖽡𖾐 𖼊𖽺𖾐 𖼄𖽔 𖼈𖽜𖾐 𖼮𖽑𖽻𖾐 𖼖𖽺𖾑，𖼠𖽳𖾐 𖼖𖽪𖾐 𖼄𖽡𖾐 𖼳𖽡𖽪 𖼷𖽑𖽡𖾐 𖼀𖽜𖾐，𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼞𖽜． 6 𖼞𖽪𖾐 𖼮𖽡𖽺𖾐，𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼞𖽳𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼖𖽺𖾑，𖼻𖽙 𖼐𖽜𖾐 𖼠𖽻𖾐 𖼞𖽑𖽶𖾐 𖼄𖽡𖾐 𖼳𖽡𖽪 𖼀𖽜𖾐 𖽂𖽙𖾐．𖼦𖽑𖽻𖾐 𖼊𖽑𖽻𖾐，𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼞𖽑𖽶𖾑 𖼄𖽔 𖼐𖽕 𖼳𖽡𖾐 𖼠𖽳𖾐 𖼖𖽪𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽳𖾐 𖼄𖽡𖾐 𖼳𖽡𖽪 𖼣𖽻𖾐．
7 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼊𖽺𖾐，𖼞𖽑𖽶𖾑 𖼽𖽕𖾑 𖼳𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼍𖽪𖾐 𖼺𖽺𖾑，𖼳𖽶𖾑 𖼰𖽡𖽦𖾑 𖼄𖽡𖾐 𖼊𖽺𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼞𖽳𖾐 𖼄𖽧𖾑 𖼄𖽡 𖼊𖽑𖽔𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖼹𖽦𖾑 𖼠𖽳𖾐 𖼻𖽸 𖼄𖽡𖾐 𖼀𖽳 𖼽𖽡𖾐 𖼺𖽺𖾑，𖼽𖽺 𖼊𖽑𖽔𖾐 𖼀𖽑𖽪 𖼽𖽕𖾑 𖼺𖽪𖾐 𖼷𖽑𖽻𖾐 𖼮𖽻𖾐 𖼞𖽳𖾐 𖼮𖽑𖽡𖾐． 8 𖼊𖽑𖽔𖾐 𖼀𖽑𖽪 𖼽𖽕𖾑 𖼖𖽪𖾐 𖼞𖽕 𖼰𖽡𖽺𖾐 𖼞𖽳𖾐 𖼄𖽡𖾐 𖼊𖽺𖾐 𖼞𖽑𖽶𖾑 𖼄𖽔 𖼐𖽕 𖼳𖽡𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽳𖾐 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖼊𖽑𖽔𖾐 𖼀𖽑𖽪 𖼽𖽕𖾑 𖼖𖽪𖾐 𖼞𖽑𖽶𖾑，𖼽𖽡 𖼇𖽕 𖼖𖽡𖽦 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽳𖾐 𖼄𖽡𖾐 𖼳𖽡𖽪 𖼣𖽻𖾐． 9 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐，𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼹𖽺𖾐 𖼽𖽡𖾐 𖼺𖽺𖾑 𖼞𖽑𖽔 𖼐𖽕 𖼖𖽻𖾐 𖼮𖽻 𖼮𖽑𖽻𖾐 𖼍𖽪𖾐，𖼞𖽑𖽔 𖼐𖽕 𖼖𖽻𖾐 𖼮𖽻 𖼞𖽳𖾐 𖼠𖽳𖾐 𖼻𖽸 𖼄𖽡𖾐 𖼀𖽳，𖼞𖽑𖽶𖾑 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼞𖽑𖽶𖾐 𖼮𖽻𖾐 𖼊𖽑𖽻𖾐，𖼞𖽑𖽶𖾑 𖼽𖽡 𖼇𖽕 𖼖𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼳𖽡𖽪 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖼞𖽑𖽔 𖼐𖽕 𖼖𖽻𖾐 𖼮𖽻 𖼞𖽳𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼮𖽑𖽻𖾐 𖼦𖽜𖾐 𖼄𖽙𖾐 𖼞𖽳𖾐 𖼮𖽑𖽡𖾐，𖼞𖽑𖽶𖾑 𖼺𖽺𖾑 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼳𖽡𖽪 𖼣𖽻𖾐， 10 𖼠𖽳𖾐 𖼻𖽸 𖼄𖽡𖾐 𖼀𖽳 𖼞𖽑𖽶𖾑 𖼽𖽡 𖼇𖽕 𖼖𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼣𖽻𖾐，𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼞𖽑𖽶𖾑 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼣𖽻𖾐．𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐，𖼮𖽡𖾐 𖼖𖽻𖾑 𖼄𖽡𖾐 𖼀𖽳𖼦𖽜𖾐 𖼄𖽙𖾐 𖼞𖽳𖾐 𖼮𖽑𖽡𖾐，𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼽𖽕𖾑 𖼳𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽡𖾐，𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼽𖽡 𖼺𖽕𖾑 𖼰𖽡𖽔𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽡𖾐．
11 𖼽𖽡 𖼺𖽕𖾑 𖼰𖽡𖽔𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼐𖽺𖾐 𖼽𖽕𖾑 𖼳𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼠𖽻𖾐 𖼞𖽑𖽶𖾐，𖼂𖽚 𖼳𖽕𖾑 𖼖𖽪𖾐、 𖼽𖽡 𖼂𖽚 𖼖𖽡𖽦 𖼖𖽪𖾐、 𖼍𖽙𖾐 𖽃𖽳 𖼖𖽪𖾐 𖼐𖽺𖾐 𖼖𖽪𖾐 𖼦𖽑𖽺𖾑 𖼹𖽻𖾐 𖼖𖽙𖾐 𖼞𖽑𖽙𖾐 𖼊𖽴 𖼺𖽪𖾐 𖼮𖽑𖽡𖽦𖾐 𖼠𖽻𖾐，𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼳𖽡𖽪 𖼣𖽻𖾐．𖼦𖽑𖽔𖾐 𖼖𖽺𖾑 𖼊𖽴𖾐 𖼺𖽺𖾑 𖽂𖽙 𖼰𖽡𖽺𖾐 𖼺𖽙𖾐 𖼄𖽦𖾐 𖼊𖽑𖽺 𖼍𖽙𖾑 𖼺𖽪𖾐，𖼞𖽑𖽶𖾑 𖼽𖽺 𖼍𖽙𖾐 𖽃𖽳 𖼖𖽪𖾐、 𖼊𖽑𖽔𖾐 𖼐𖽕𖾑 𖼖𖽪𖾐、 𖼄𖽡 𖼰𖽧 𖼍𖽙𖾐 𖼖𖽪𖾐 𖼐𖽺𖾐 𖼖𖽪𖾐 𖼦𖽑𖽺𖾑 𖼹𖽻𖾐 𖼖𖽙𖾐 𖼞𖽑𖽙𖾐 𖼊𖽴 𖼺𖽪𖾐 𖼮𖽑𖽡𖽦𖾐 𖼠𖽻𖾐 𖼣𖽻𖾐．
12 𖼦𖽑𖽻𖾐 𖼊𖽑𖽻𖾐，𖼄𖽔 𖼐𖽕 𖼳𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽶𖾑 𖼄𖽡𖾐 𖼊𖽺𖾐 𖼰𖽡𖽔𖾐 𖼐𖽕 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼄𖽔 𖼠𖽸𖾑 𖼺𖽺𖾑， 𖼰𖽡𖽔𖾐 𖼐𖽕 𖼺𖽪𖾐 𖼷𖽑𖽻𖾐 𖼦𖽑𖽔𖾐 𖼖𖽺𖾑 𖼞𖽑𖽶𖾑 𖼠𖽻𖾐 𖼮𖽻𖾐 𖼍𖽳𖾐． 13 𖽃𖽔𖾐 𖼺𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽂𖽙 𖼊𖽙𖾐 𖼮𖽑𖽪𖾐 𖼮𖽑𖽻 𖼞𖽑𖽶𖾑 𖼮𖽶𖾐，𖼰𖽡𖽔𖾐 𖼐𖽕 𖼺𖽪𖾐 𖼷𖽑𖽻𖾐 𖼞𖽜 𖼳𖽚𖾑 𖼞𖽑𖽪 𖼄𖽡𖽻 𖼄𖽪𖾐．𖼦𖽑𖽻𖾐 𖼊𖽑𖽻𖾐，𖼽𖽻 𖼈𖽳𖾐 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼄𖽔 𖼦𖽑𖽻𖾐．
𖼽𖽱𖾐 𖼺𖽴𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼄𖽡𖾐 𖼳𖽡𖽪 𖼐𖽑𖽡 𖼀𖽜𖾐 𖽂𖽙𖾐
14 𖼽𖽱𖾐 𖼺𖽴𖾑 𖼞𖽳𖾐 𖼻𖽙 𖼮𖽑𖽡𖾐 𖼖𖽡𖾑 𖼖𖽦𖾐 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐： “𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼖𖽙𖾐 𖼺𖽶𖾑 𖼄𖽢 𖼖𖽪 𖼣𖽙𖾐 𖼈𖽳𖾐 𖼊𖽑𖽺 𖼞𖽜 𖼺𖽺𖾑，𖼣𖽙𖾐 𖼈𖽳𖾐 𖼮𖽑𖽪𖾐 𖼮𖽑𖽻 𖼷𖽑𖽻𖾐 𖼄𖽨，𖼐𖽑𖽡𖾐 𖽃𖽔𖾐 𖼹𖽻𖾐 𖼣𖽙𖾐 𖼈𖽳𖾐 𖼞𖽜 𖼷𖽑𖽺𖾐 𖼊𖽑𖽡 𖼷𖽑𖽺𖾐 𖼍𖽺𖾑 𖼞𖽻𖾐？ 𖼄𖽡𖾐 𖼳𖽡𖽪 𖼊𖽑𖽡 𖼀𖽜𖾐 𖼍𖽺𖾑 𖼀𖽜𖾐 𖼣𖽙𖾐 𖼈𖽳𖾐 𖼞𖽜 𖼐𖽺𖾑？”
15 𖼽𖽱𖾐 𖼳𖽪𖾐 𖼽𖽕𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽡 𖼮𖽑𖽻 𖼐𖽑𖽡𖾐 𖼈𖽳𖾐 𖼮𖽑𖽪𖾐 𖼮𖽑𖽻 𖼷𖽑𖽻𖾐 𖼄𖽨，𖼽𖽡 𖼇𖽕 𖼖𖽡𖽦 𖼄𖽡𖾐 𖼊𖽺𖾐 𖼦𖽑𖽔𖾐 𖼮𖽶𖾐 𖼽𖽳𖾐 𖼀𖽦𖾐 𖼊𖽑𖽡𖾑 𖼣𖽻𖾐，𖼊𖽦𖾐 𖼽𖽡𖾐 𖼺𖽺𖾑 𖼂𖽡 𖼖𖽡𖾑 𖼳𖽡 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼖𖽡𖾑 𖼇𖽕 𖼽𖽺𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐，𖼺𖽧𖾐 𖼠𖽶𖾑 𖼖𖽶𖾐 𖼍𖽡𖾐 𖼞𖽑𖽶𖾐 𖼺𖽧𖾐 𖼊𖽑𖽝 𖼄𖽡𖾐 𖼠𖽢𖾑 𖼽𖽡𖾐 𖼊𖽙𖾐．”
16 𖼽𖽻 𖼈𖽳𖾐 𖼊𖽻 𖼞𖽑𖽚： “𖽂𖽙 𖼰𖽡𖽺𖾐 𖼄𖽡𖾐 𖼊𖽺𖾐 𖼞𖽑𖽶𖾑 𖼣𖽙𖾐 𖼈𖽳𖾐 𖼮𖽻𖾐 𖼹𖽺𖾐 𖼽𖽡𖾐 𖼄𖽔 𖼺𖽙𖾐，𖼹𖽦𖾑 𖼀𖽦𖾐 𖼖𖽻𖾐 𖼞𖽑𖽪 𖼞𖽳𖾐 𖼮𖽻𖾐 𖼺𖽪𖾐 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐，𖼞𖽑𖽶𖾑 𖼂𖽚 𖼳𖽕𖾑 𖼖𖽪𖾐 𖼐𖽺𖾐 𖼖𖽪𖾐 𖼖𖽙𖾐 𖼊𖽴 𖼺𖽪𖾐 𖼮𖽑𖽡𖽦𖾐 𖼠𖽻𖾐 𖼞𖽳𖾐 𖼷𖽑𖽻𖾐，𖼹𖽦𖾑 𖼽𖽺𖾐 𖼺𖽶𖾐 𖼖𖽡𖽦𖾑 𖼖𖽻𖾐 𖼞𖽑𖽪 𖼞𖽳𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼣𖽻𖾐，𖼽𖽻 𖼈𖽳𖾐 𖼄𖽳𖾑 𖼄𖽳 𖼰𖽕𖾑 𖼊𖽝 𖼖𖽚𖾐 𖼂𖽚𖾐 𖼮𖽑𖽜𖾐 𖼮𖽻𖾐．”
17 𖼽𖽱𖾐 𖼳𖽪𖾐 𖼽𖽕𖾑 𖼞𖽑𖽻𖾑 𖼽𖽱𖾐 𖼺𖽴𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼽𖽡 𖼇𖽕 𖼖𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼮𖽑𖽪𖾐 𖼮𖽑𖽻 𖼷𖽑𖽻𖾐 𖼄𖽨，𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼮𖽻𖾐，𖼄𖽡𖾐 𖼳𖽡𖽪 𖼊𖽑𖽡 𖼀𖽜𖾐 𖼍𖽺𖾑 𖼄𖽔 𖼖𖽚 𖼊𖽑𖽡𖾑 𖼣𖽻𖾐， 18 𖽂𖽙 𖼰𖽡𖽺𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼊𖽻𖾐，𖼞𖽑𖽶𖾑 𖼠𖽻𖾐 𖼺𖽧𖾐 𖼠𖽶𖾑 𖼖𖽶𖾐 𖼍𖽡𖾐 𖼣𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼺𖽧𖾐 𖼊𖽑𖽝 𖼄𖽡𖾐 𖼠𖽢𖾑 𖼊𖽙𖾐，𖼞𖽑𖽙𖾐 𖼠𖽢𖾑 𖼊𖽑𖽧 𖼖𖽻𖾐 𖼺𖽪𖾐 𖼄𖽡𖾐 𖼮𖽑𖽙𖾐 𖼐𖽺𖾐 𖼞𖽑𖽶𖾑 𖼞𖽕 𖼰𖽡𖽺𖾐 𖼄𖽡𖾐 𖼊𖽺𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜．𖼰𖽡𖽔𖾐 𖼐𖽕 𖼺𖽪𖾐 𖼷𖽑𖽻𖾐 𖼰𖽕𖾑 𖼊𖽝 𖼖𖽚𖾐 𖼂𖽚𖾐 𖼮𖽑𖽜𖾐 𖼮𖽻𖾐，𖼦𖽑𖽔𖾐 𖼮𖽶𖾐 𖽂𖽙 𖼊𖽙𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼊𖽙𖾐 𖼊𖽻𖾐．”