𖼽𖽱𖾐 𖼳𖽪𖾐 𖼽𖽕𖾑 𖼺𖽪𖾑 16

𖼽𖽱𖾐 𖼺𖽴𖾑 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽳𖾐 𖼄𖽡𖾐 𖼳𖽡𖽪

1 𖼽𖽱𖾐 𖼺𖽴𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼷𖽑𖽺𖾐 𖼞𖽻𖾐 𖼺𖽺𖾑 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼳𖽡𖽪，𖼞𖽑𖽶𖾑 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼖𖽙𖾐 𖼐𖽳 𖼞𖽳𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽻𖾐 𖼍𖽪𖾐 𖼺𖽺𖾑，𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼈𖽡𖾐 𖼊𖽚𖾐 𖼞𖽳𖾐 𖼮𖽑𖽡𖾐，𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼠𖽚 𖼽𖽡𖾐，𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐 𖼺𖽺𖾑，𖽂𖽙 𖼰𖽡𖽺𖾐 𖼀𖽙 𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼞𖽳𖾐 𖼮𖽑𖽡𖾐． 2 𖼹𖽦𖾑 𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼞𖽳𖾐 𖼮𖽑𖽻𖾐 𖼺𖽺𖾑 𖼖𖽪𖾑 𖼺𖽶𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖼽𖽕𖾑 𖼰𖽡𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼺𖽺𖾑 𖼽𖽕𖾑 𖼊𖽑𖽔𖾐 𖼖𖽲𖾑 𖼖𖽪𖾐 𖼞𖽳𖾐 𖼮𖽑𖽡𖾐．

3 𖼹𖽦𖾑 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼮𖽑𖽻𖾐 𖼹𖽺𖾐 𖼽𖽡𖾐，𖼽𖽔𖾐 𖼖𖽡𖾑 𖼊𖽑𖽧 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼖𖽙𖾐 𖼮𖽑𖽡𖾐，𖼍𖽕𖾑 𖽂𖽚 𖼂𖽚 𖼦𖽴 𖼖𖽪𖽦 𖼖𖽪𖾐 𖼐𖽺𖾐 𖼰𖽡𖾐 𖼺𖽴𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼺𖽺𖾑，𖼦𖽜𖾐 𖼄𖽙𖾐 𖼞𖽳𖾐 𖼮𖽑𖽡𖾐． 4 𖼦𖽑𖽺𖾑 𖼽𖽱𖾐 𖼺𖽴𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼽𖽡 𖼇𖽕 𖼖𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼳𖽡𖽪 𖼣𖽻𖾐．

𖼽𖽡 𖼇𖽕 𖼖𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼳𖽡𖽪

5 𖼍𖽕𖾑 𖽂𖽚 𖼦𖽑𖽺𖾑 𖼽𖽡 𖼇𖽕 𖼖𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽴 𖼮𖽑𖽪𖾐 𖼞𖽑𖽙𖾐 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼳𖽡𖽪 𖼣𖽻𖾐： 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼽𖽕𖾑 𖼊𖽑𖽔𖾐 𖼖𖽲𖾑 𖼽𖽕𖾑 𖼍𖽕 𖼄𖽡𖾐 𖼊𖽺𖾐 𖼮𖽑𖽻𖾐 𖼺𖽺𖾑，𖼞𖽕 𖼂𖽻𖾑 𖼂𖽚 𖼦𖽴 𖼖𖽪𖽦 𖼖𖽪𖾐 𖼞𖽳𖾐 𖼮𖽑𖽡𖾐， 6 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼮𖽡𖾐 𖼖𖽻𖾑 𖼄𖽡𖾐 𖼀𖽳𖼦𖽜𖾐 𖼄𖽙𖾐 𖼖𖽙𖾐 𖼮𖽑𖽡𖾐．𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼄𖽧𖾑 𖼄𖽡 𖼊𖽑𖽔𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖼦𖽑𖽔𖾐 𖼖𖽺𖾑 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼰𖽻𖾐 𖼺𖽺𖾑 𖼊𖽑𖽔𖾐 𖼐𖽕𖾑 𖼳𖽶𖾑 𖼖𖽚 𖼄𖽡𖾐 𖼊𖽺𖾐 𖼮𖽑𖽡𖾐，𖼽𖽔 𖼐𖽚 𖼦𖽔𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼮𖽑𖽡𖾐．

7 𖼽𖽔 𖼐𖽚 𖼦𖽔𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼹𖽺𖾐 𖼽𖽡𖾐 𖼺𖽺𖾑，𖼽𖽕𖾑 𖼊𖽑𖽔𖾐 𖼖𖽲𖾑 𖼄𖽡𖾐 𖼊𖽺𖾐 𖼐𖽺𖾐 𖼐𖽕 𖼖𖽔𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼖𖽙𖾐 𖼐𖽳 𖼞𖽳𖾐 𖼮𖽑𖽻𖾐 𖼺𖽺𖾑， 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼖𖽙𖾐 𖼮𖽑𖽡𖾐． 8 𖼹𖽦𖾑 𖼊𖽑𖽔𖾐 𖼀𖽑𖽪 𖼽𖽕𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼽𖽡𖾐，𖼞𖽑𖽔 𖼐𖽕 𖼖𖽻𖾐 𖼮𖽻 𖼮𖽑𖽻𖾐 𖼺𖽺𖾑，𖼦𖽜𖾐 𖼄𖽙𖾐 𖼞𖽳𖾐 𖼮𖽑𖽡𖾐．𖼦𖽑𖽺𖾑 𖼽𖽡 𖼇𖽕 𖼖𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽴 𖼮𖽑𖽪𖾐 𖼞𖽑𖽙𖾐 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼳𖽡𖽪 𖼣𖽻𖾐． 9 𖼠𖽳𖾐 𖼖𖽪𖾐 𖼹𖽦𖾑 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼳𖽡𖽪 𖼠𖽻𖾐 𖼊𖽑𖽺 𖼮𖽑𖽻𖾐，𖼖𖽪𖾐 𖼊𖽑𖽡 𖼹𖽻𖾐 𖼀𖽜𖾐 𖼺𖽺𖾑 𖼽𖽡 𖼇𖽕 𖼖𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼞𖽜，𖼖𖽪𖾐 𖼦𖽑𖽺𖾑 𖼹𖽻𖾐 𖼖𖽙𖾐 𖼞𖽑𖽙𖾐 𖼊𖽴 𖼺𖽪𖾐 𖼮𖽑𖽡𖽦𖾐 𖼠𖽻𖾐 𖼖𖽺𖾑 𖼮𖽑𖽻𖾐． 10 𖼦𖽑𖽻𖾐 𖼊𖽑𖽻𖾐，𖼽𖽻 𖼈𖽳𖾐 𖼰𖽡𖾐 𖼺𖽴𖾑 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼄𖽔 𖼞𖽕 𖼊𖽑𖽧 𖼽𖽡𖾐，𖽃𖽔𖾐 𖼺𖽺𖾑，𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽡 𖼇𖽕 𖼖𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼠𖽻𖾐 𖼊𖽑𖽺 𖼮𖽻𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐，𖼽𖽻 𖼈𖽳𖾐 𖼖𖽙𖾐 𖼀𖽙𖾐 𖼄𖽡𖽻 𖼄𖽪𖾐 𖼺𖽪𖾐 𖼮𖽜𖾐 𖼀𖽑𖽙 𖼂𖽺𖾐．