𖼽𖽱𖾐 𖼳𖽪𖾐 𖼽𖽕𖾑 𖼺𖽪𖾑 13

𖼊𖽝 𖼄𖽔 𖽂𖽙𖾐 𖼺𖽺 𖼞𖽳𖾐 𖼄𖽡𖾐 𖼊𖽺𖾐

1 𖼽𖽱𖾐 𖼳𖽪𖾐 𖼽𖽕𖾑 𖼞𖽑𖽚 𖼊𖽑𖽙 𖼄𖽻 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐，𖼦𖽑𖽔𖾐 𖼖𖽺𖾑 𖼊𖽝 𖼽𖽡𖾐 𖼖𖽡𖾐 𖼞𖽳𖾐 𖼄𖽡𖾐 𖼊𖽺𖾐 𖼊𖽑𖽡 𖼂𖽜𖾐 𖼄𖽙𖾐 𖼮𖽻𖾐 𖼍𖽳𖾐 𖼺𖽺， 2 𖼞𖽑𖽶𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼐𖽺𖾐 𖼰𖽡𖾐 𖼳𖽪𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼣𖽻𖾐． 3 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼞𖽳𖾐 𖼳𖽡𖾐 𖼦𖽴 𖼖𖽻𖾐 𖼮𖽻 𖼮𖽑𖽻𖾐 𖼺𖽺𖾑，𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼽𖽡 𖼠𖽴 𖼖𖽪𖽦 𖼖𖽪𖾐 𖼞𖽳𖾐 𖼮𖽑𖽡𖾐(𖼦𖽑𖽺𖾑 𖽃𖽙𖾑 𖼄𖽺 𖼊𖽑𖽙 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼣𖽻𖾐)，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼣𖽙 𖼽𖽚𖾐，𖼞𖽑𖽶𖾑 𖼄𖽡𖾐 𖼊𖽺𖾐 𖼞𖽳𖾐 𖼰𖽡𖽔𖾐 𖼺𖽕𖾑 𖼖𖽪𖾐、 𖼽𖽕𖾑 𖼳𖽸 𖼊𖽑𖽪𖾐 𖼖𖽪𖾐、 𖼽𖽕𖾑 𖼳𖽸 𖼰𖽡𖾐 𖼖𖽪𖽦 𖼖𖽪𖾐、 𖼰𖽡𖽔𖾐 𖼊𖽑𖽴𖾑 𖼖𖽪𖾐 𖼐𖽺𖾐 𖼽𖽡 𖼠𖽴 𖼖𖽪𖽦 𖼖𖽪𖾐 𖼊𖽑𖽺 𖼠𖽕．𖼹𖽦𖾑 𖼠𖽳𖾐 𖼻𖽸 𖼄𖽡𖾐 𖼀𖽳 𖼽𖽕𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼖𖽺𖾑 𖼮𖽑𖽻𖾐． 4 𖼹𖽦𖾑 𖼰𖽡𖽔𖾐 𖼐𖽕 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼐𖽺𖾐 𖼳𖽡𖾐 𖼍𖽪𖽺𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡 𖼽𖽕𖾑 𖼖𖽔𖾐 𖼖𖽪𖾐 𖼞𖽳𖾐 𖼮𖽑𖽻𖾐 𖼺𖽺𖾑，𖼽𖽕𖾑 𖼇𖽮 𖼖𖽪𖾐 𖼐𖽺𖾐 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼖𖽙𖾐 𖼮𖽑𖽡𖾐．

5 𖼹𖽦𖾑 𖼰𖽡𖽔𖾐 𖼂𖽔𖾐 𖼖𖽴𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼐𖽺𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼞𖽳𖾐 𖼖𖽧 𖼂𖽔𖾐 𖼐𖽜𖾑 𖽂𖽙 𖼰𖽡𖽺𖾐 𖼀𖽙 𖼖𖽺𖾑 𖼮𖽑𖽻𖾐，𖼹𖽦𖾑 𖼦𖽺𖾐 𖼄𖽴 𖽂𖽙 𖼰𖽡𖽺𖾐 𖼞𖽑𖽶𖾐 𖼞𖽳𖾐 𖼂𖽔𖾐 𖼖𖽧𖾑 𖼰𖽡𖽔𖾐 𖼍𖽴 𖼖𖽪𖾐 𖼞𖽳𖾐 𖼮𖽑𖽻𖾐 𖼺𖽺𖾑，𖼦𖽔𖾐 𖼄𖽔 𖽂𖽙 𖼖𖽦 𖼞𖽑𖽝 𖼞𖽳𖾐 𖼮𖽑𖽡𖾐． 6 𖼖𖽧 𖼂𖽔𖾐 𖼐𖽜𖾑 𖽂𖽙 𖼰𖽡𖽺𖾐 𖼮𖽑𖽻𖾐 𖼺𖽺𖾑，𖼄𖽡 𖼺𖽶𖾐 𖼖𖽡𖾑 𖼇𖽮 𖼄𖽔 𖼽𖽺𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖽂𖽙 𖼰𖽡𖽺𖾐 𖼀𖽙 𖼮𖽻𖾐 𖼺𖽪𖾐 𖼞𖽑𖽶𖾑 𖼳𖽡𖾐 𖼍𖽪𖽺𖾑 𖼺𖽪𖾐 𖼷𖽑𖽻𖾐 𖼣𖽻𖾐．𖼦𖽑𖽺𖾑 𖼹𖽻𖾐 𖼊𖽝 𖼄𖽔 𖽂𖽙𖾐 𖼺𖽺 𖼺𖽪𖾐 𖼄𖽡𖾐 𖼊𖽺𖾐 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼈𖽳𖾐 𖼊𖽑𖽺 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼞𖽕 𖼊𖽑𖽧 𖼽𖽡𖾐 𖼊𖽻𖾐．𖼐𖽑𖽡𖾐 𖼣𖽙𖾐 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐，𖼷𖽑𖽺𖾐 𖼞𖽻𖾐 𖼺𖽺𖾑 𖼄𖽡𖾐 𖼊𖽺𖾐 𖼦𖽑𖽺𖾑 𖼹𖽻𖾐 𖼀𖽜𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼄𖽡𖾐 𖼳𖽡𖽪 𖼂𖽺𖾐 𖼻𖽻𖾐． 7 𖽃𖽔𖾑 𖼄𖽳𖾐，𖼐𖽑𖽡𖾐 𖼄𖽡𖾐 𖼊𖽺𖾐 𖼦𖽑𖽺𖾑 𖼹𖽻𖾐 𖼀𖽜𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖼠𖽶𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼠𖽳𖾐 𖼖𖽪𖾐 𖼞𖽑𖽶𖾑 𖼊𖽑𖽡 𖼀𖽑𖽦𖾐 𖼊𖽑𖽺 𖼞𖽜 𖼖𖽡𖾐．

𖼐𖽑𖽡 𖼮𖽑𖽪𖾐 𖼳𖽶 𖼂𖽕 𖼞𖽳𖾐 𖼄𖽡𖾐 𖼳𖽡𖽪

8 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽡 𖼀𖽑𖽦𖾐，𖼖𖽡𖽚 𖼂𖽡𖽦𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼰𖽡𖽔𖾐 𖼍𖽴 𖼮𖽑𖽪𖾐 𖼳𖽶 𖼷𖽑𖽻𖾐，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼞𖽳𖾐 𖼄𖽚 𖼳𖽡𖾐 𖼀𖽜𖾐 𖼽𖽻 𖼈𖽳𖾐 𖼊𖽑𖽺 𖼞𖽜 𖼺𖽪𖾐 𖼄𖽡𖾐 𖼳𖽡𖽪 𖽂𖽙𖾐 𖼍𖽳𖾐 𖼦𖽑𖽻𖾐，𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽜𖾐 𖼀𖽑𖽙 𖼄𖽚 𖼳𖽡𖾐 𖼀𖽜𖾐 𖼽𖽻 𖼈𖽳𖾐 𖼞𖽜 𖼺𖽪𖾐 𖼣𖽻𖾐． 9 𖼽𖽻 𖼈𖽳𖾐 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼊𖽺𖾐，𖼞𖽑𖽶𖾑 𖼽𖽕𖾑 𖼐𖽜𖾑 𖼖𖽻𖾐 𖼞𖽑𖽪 𖼀𖽙 𖼮𖽑𖽶𖾐 𖼞𖽳𖾐 𖼽𖽕𖾑 𖼖𖽚 𖽃𖽳 𖼖𖽪𖾐，𖼖𖽻𖾐 𖼞𖽑𖽪 𖼠𖽻𖾐 𖼊𖽑𖽺 𖼞𖽳𖾐 𖼖𖽪𖾐 𖼐𖽺𖾐 𖼄𖽡 𖼍𖽡 𖼂𖽔𖾐 𖼄𖽡𖾐 𖼊𖽺𖾐 𖼞𖽳𖾐 𖼊𖽺𖾐 𖼠𖽻𖾐 𖼄𖽙𖾐 𖼮𖽑𖽻𖾐 𖼺𖽺𖾑 𖼍𖽡 𖼂𖽜 𖼖𖽪𖾐 𖼞𖽳𖾐 𖼮𖽑𖽡𖾐． 10 𖼦𖽑𖽔𖾐 𖼖𖽺𖾑 𖼳𖽡𖾐 𖼳𖽸 𖼂𖽜 𖼖𖽪𖾐 𖼞𖽑𖽶𖾐 𖼈𖽪𖾐 𖼍𖽦 𖼂𖽺𖾐 𖼺𖽪𖾐 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼳𖽡𖾐 𖼦𖽚𖼈𖽪𖾐 𖼍𖽦 𖼞𖽑𖽙𖾐 𖼠𖽕 𖼺𖽪𖾐 𖼖𖽪𖾐 𖼞𖽳𖾐 𖼮𖽑𖽻𖾐 𖼺𖽺𖾑，𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼮𖽑𖽡𖾐． 11 𖼦𖽑𖽔𖾐 𖼖𖽺𖾑 𖼰𖽡𖾐 𖼖𖽡𖽦𖾑𖼄𖽡𖾐 𖼊𖽺𖾐，𖼰𖽡𖾐 𖼳𖽪𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼄𖽔 𖼰𖽡𖽔𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐．𖼦𖽑𖽔𖾐 𖼖𖽺𖾑 𖼦𖽺𖾐 𖼄𖽴 𖽂𖽙 𖼰𖽡𖽺𖾐、 𖼂𖽔𖾐 𖼳𖽔𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼺𖽺𖾑 𖼺𖽔 𖼰𖽡𖽔𖾐 𖼖𖽪𖾐 𖼞𖽳𖾐 𖼮𖽑𖽡𖾐． 12 𖼦𖽑𖽔𖾐 𖼖𖽺𖾑 𖼂𖽔𖾐 𖼳𖽔𖾐 𖼄𖽡𖾐 𖼊𖽺𖾐 𖼈𖽪𖾐 𖼍𖽦 𖽃𖽴𖾑 𖼞𖽑𖽙𖾐 𖼠𖽕 𖼞𖽳𖾐 𖼄𖽡𖾐 𖼊𖽺𖾐 𖼖𖽺𖾑 𖼮𖽑𖽻𖾐，𖼽𖽻 𖼽𖽕𖾑 𖼺𖽶𖾐 𖼊𖽑𖽔𖾐 𖼖𖽮𖾑 𖼖𖽪𖾐 𖼐𖽺𖾐 𖼽𖽡 𖼍𖽴 𖼖𖽦 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐，𖼖𖽡𖾑 𖼇𖽕 𖼽𖽺𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽻 𖼊𖽑𖽡 𖼽𖽚𖾐 𖼍𖽺𖾑 𖼷𖽺𖾐，𖼄𖽚 𖼳𖽡𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐，𖼽𖽻 𖼈𖽳𖾐 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼦𖽑𖽙𖾐． 13 𖼦𖽑𖽻𖾐 𖼊𖽑𖽻𖾐，𖼰𖽡𖾐 𖼳𖽪𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼄𖽔 𖼰𖽡𖽔𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽔 𖽂𖽙𖾐 𖼞𖽕 𖼊𖽑𖽧 𖼽𖽡𖾐 𖼺𖽺𖾑，𖼽𖽻 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼮𖽻𖾐 𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐．

14 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼍𖽺𖾑 𖼄𖽚 𖼳𖽡𖾐 𖼄𖽡𖾐 𖼳𖽡𖽪 𖼄𖽔 𖼀𖽜𖾐 𖼞𖽜．𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼺𖽺𖾑，𖼦𖽑𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽙𖾐 𖼞𖽜 𖼺𖽪𖾐 𖼍𖽡𖾐 𖼊𖽪𖾐，𖼞𖽑𖽶𖾑 𖼽𖽻 𖼈𖽳𖾐 𖼞𖽳𖾐 𖼷𖽻 𖼀𖽜𖾐 𖼣𖽻𖾐．

𖼖𖽡𖽚 𖼂𖽡𖽦𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼳𖽡𖽪

15 𖼄𖽚 𖼳𖽡𖾐 𖼄𖽡𖾐 𖼳𖽡𖽪 𖼀𖽜𖾐 𖼺𖽺𖾑，𖼖𖽡𖽚 𖼂𖽡𖽦𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽴 𖼮𖽑𖽪𖾐 𖼞𖽑𖽙𖾐 𖼣𖽻𖾐 𖼊𖽑𖽺 𖼞𖽜 𖼦𖽑𖽙𖾐． 16 𖼽𖽻 𖼈𖽳𖾐 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼊𖽺𖾐，𖼞𖽑𖽶𖾑 𖼽𖽕𖾑 𖼐𖽜𖾑 𖼖𖽻𖾐 𖼞𖽑𖽪 𖼀𖽙 𖼮𖽑𖽶𖾐 𖼞𖽳𖾐 𖼽𖽕𖾑 𖼖𖽚 𖽃𖽳 𖼖𖽪𖾐，𖼖𖽻𖾐 𖼞𖽑𖽪 𖼠𖽻𖾐 𖼊𖽑𖽺 𖼞𖽳𖾐 𖼖𖽪𖾐，𖼄𖽡 𖼍𖽡 𖼂𖽔𖾐 𖼄𖽡𖾐 𖼊𖽺𖾐 𖼖𖽙𖾐 𖼐𖽳 𖼺𖽪𖾐 𖼊𖽺𖾐 𖼠𖽻𖾐 𖼄𖽙𖾐， 17 𖼳𖽡𖾐 𖼳𖽸 𖼂𖽜 𖼖𖽪𖾐 𖼐𖽺𖾐𖼳𖽡𖾐 𖼳𖽸 𖼂𖽜 𖼊𖽺𖾐 𖼠𖽻𖾐 𖼄𖽙𖾐 𖼊𖽑𖽺 𖼮𖽻𖾐 𖼺𖽪𖾐 𖼖𖽪𖾐： 𖼞𖽑𖽶𖾑 𖼍𖽡 𖼂𖽜 𖼖𖽪𖾐、 𖼂𖽔𖾐 𖼄𖽚𖾑 𖼂𖽔𖾐 𖼖𖽡𖾑 𖼖𖽪𖾐、 𖼂𖽚 𖼂𖽔𖾐 𖼖𖽧𖾑 𖼄𖽡𖽺 𖼖𖽪𖾐、 18 𖼽𖽔 𖼹𖽕 𖼖𖽪𖾐、 𖼰𖽡𖾐 𖼍𖽡 𖼄𖽚𖾑 𖼖𖽪𖾐、 𖼄𖽡 𖼇𖽕 𖼽𖽔𖾐 𖼖𖽪𖾐、 19 𖼰𖽡𖾐 𖼖𖽡𖽦𖾑 𖼊𖽑𖽧 𖼖𖽪𖾐、 𖼳𖽡𖾐 𖼂𖽡 𖼄𖽔 𖼖𖽪𖾐、 𖼖𖽻𖾐 𖼞𖽑𖽪 𖼠𖽻𖾐 𖼞𖽑𖽶𖾐 𖽂𖽙 𖼰𖽡𖽺𖾐 𖼞𖽳𖾐 𖼳𖽡𖾑 𖼖𖽡𖽦𖾑 𖼦𖽔𖾐 𖼳𖽔𖾐 𖼳𖽡𖽕 𖼖𖽪𖾐、 20 𖼂𖽚 𖼀𖽑𖽧 𖽃𖽳 𖼖𖽪𖾐、 𖼀𖽑𖽧 𖼺𖽶𖾐 𖼰𖽡𖽔𖾐 𖽂𖽙 𖼖𖽻𖾐 𖼂𖽡𖽻𖾐，𖼂𖽚 𖼽𖽺𖾐 𖼳𖽡𖾐 𖼄𖽚𖾑 𖼖𖽪𖾐 𖼣𖽻𖾐．

21 𖼦𖽑𖽔𖾐 𖼖𖽺𖾑 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼳𖽡𖾐 𖼦𖽚 𖼈𖽪𖾐 𖼍𖽦 𖼞𖽳𖾐 𖼄𖽡𖾐 𖼊𖽺𖾐 𖼐𖽺𖾐 𖼊𖽺𖾐 𖼠𖽻𖾐 𖼄𖽙𖾐 𖼊𖽑𖽺 𖼖𖽪𖾐 𖼞𖽑𖽙𖾐 𖼣𖽻𖾐 𖼖𖽺𖾑 𖼮𖽑𖽻𖾐．𖼳𖽡𖾐 𖼦𖽚 𖼦𖽑𖽺𖾑 𖽃𖽙𖾑 𖼄𖽺 𖼊𖽑𖽙 𖼞𖽑𖽶𖾑 𖼮𖽶𖾐 𖼳𖽡𖾐 𖼳𖽸 𖼂𖽜 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐．𖼄𖽚 𖼳𖽡𖾐 𖼽𖽻 𖼊𖽑𖽺 𖼐𖽺𖾐 𖼄𖽡 𖼍𖽡𖽦𖾑 𖼄𖽡𖾐 𖼊𖽺𖾐 𖼞𖽳𖾐 𖼈𖽪𖾑 𖼷𖽪𖾐 𖼽𖽡 𖼈𖽪𖽺𖾑、 𖼖𖽡𖾑 𖼰𖽡𖽺𖾐、 𖼺𖽪𖾐 𖽃𖽳、 𖼦𖽪𖾑 𖽃𖽳 𖼐𖽺𖾐 𖼖𖽡𖾑 𖼂𖽔𖾐 𖼊𖽑𖽺 𖼺𖽦 𖼦𖽑𖽙𖾐．𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼳𖽡𖾐 𖼦𖽚 𖼈𖽪𖾐 𖼍𖽦 𖼞𖽑𖽙𖾐 𖼠𖽕 𖼺𖽪𖾐 𖼈𖽪𖾑 𖼷𖽪𖾐 𖼣𖽻𖾐．

22 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽑𖽢𖾑 𖼺𖽦 𖼦𖽑𖽙𖾐 𖼺𖽪𖾐 𖼷𖽑𖽻𖾐 𖼠𖽻𖾐 𖼞𖽑𖽶𖾐，𖼠𖽕𖾐 𖼄𖽔 𖼰𖽶𖾐 𖼺𖽪𖾐 𖼺𖽡𖾐 𖼻𖽙 𖼂𖽔𖾐 𖼖𖽕 \fr 13．22 \ft 𖼈𖽜𖾐 𖼮𖽑𖽡𖽺 𖼺𖽪𖾑 22-24 𖼰𖽪𖾑，31：8 𖼖𖽙𖾐 𖼐𖽦𖾐． 𖼖𖽺𖾑 𖼞𖽑𖽻𖾑 𖼮𖽑𖽻𖾐，𖼂𖽔𖾐 𖼖𖽕 𖼦𖽑𖽺𖾑 𖼂𖽡 𖽃𖽳 𖼞𖽳𖾐 𖼻𖽙 𖼣𖽻𖾐． 23 𖼖𖽡𖽚 𖼂𖽡𖽦𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽑𖽙𖾐 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼊𖽺𖾐，𖼞𖽑𖽶𖾑 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽡𖾐，𖼖𖽪𖾐 𖼦𖽑𖽺𖾑 𖼹𖽻𖾐 𖼀𖽜𖾐 𖼺𖽺𖾑 𖼖𖽡𖽚 𖼂𖽡𖽦𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽴 𖼮𖽑𖽪𖾐 𖼊𖽑𖽺 𖼞𖽜 𖼺𖽪𖾐 𖼄𖽡𖾐 𖼳𖽡𖽪 𖼣𖽻𖾐，𖼦𖽑𖽔𖾐 𖼖𖽺𖾑 𖼖𖽪𖾐 𖼦𖽑𖽺𖾑 𖼹𖽻𖾐 𖼖𖽙𖾐 𖼞𖽑𖽙𖾐 𖼊𖽴 𖼺𖽪𖾐 𖼮𖽑𖽡𖽦𖾐 𖼠𖽻𖾐 𖼖𖽺𖾑 𖼮𖽑𖽻𖾐．

𖼰𖽡𖽔𖾐 𖼍𖽴 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼳𖽡𖽪

24 𖼄𖽚 𖼳𖽡𖾐 𖼄𖽡𖾐 𖼳𖽡𖽪 𖼀𖽜𖾐 𖼺𖽺𖾑，𖼰𖽡𖽔𖾐 𖼍𖽴 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽴 𖼮𖽑𖽪𖾐 𖼞𖽑𖽙𖾐 𖼣𖽻𖾐 𖼊𖽑𖽺 𖼞𖽜． 25 𖼽𖽻 𖼈𖽳𖾐 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼊𖽺𖾐，𖼞𖽑𖽶𖾑 𖼽𖽔 𖼳𖽡𖽺𖾑 𖼄𖽡𖾐 𖼊𖽺𖾐 𖼐𖽺𖾐 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼖𖽪𖾐 𖼞𖽑𖽙𖾐 𖼣𖽻𖾐 𖼞𖽳𖾐 𖼮𖽑𖽻𖾐 𖼺𖽺𖾑，𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼊𖽑𖽡 𖼀𖽑𖽦𖾐，𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼖𖽔𖾐 𖼂𖽔𖾐 𖼖𖽪𖾐 𖼞𖽕 𖼰𖽡𖽺𖾐 𖼽𖽕𖾑 𖼖𖽚 𖽃𖽳 𖼖𖽪𖾐 𖼞𖽳𖾐 𖼮𖽑𖽡𖾐； 26 𖼹𖽦𖾑 𖼳𖽡𖾐 𖼳𖽸 𖼂𖽜 𖼖𖽪𖾐 𖼮𖽑𖽻𖾐 𖼺𖽺𖾑，𖼖𖽔𖾐 𖼄𖽚𖾑 𖼄𖽡 𖼺𖽶𖾐 𖼂𖽔𖾐 𖼖𖽪𖾐 𖼐𖽺𖾐 𖼂𖽡 𖼍𖽙𖾐 𖼐𖽑𖽧 𖼖𖽪𖾐 𖼞𖽳𖾐 𖼮𖽑𖽡𖾐．𖼦𖽑𖽔𖾐 𖼖𖽺𖾑 𖼄𖽔 𖼦𖽔𖾐 𖼐𖽑𖽡𖽦𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼺𖽺𖾑，𖼍𖽡 𖼂𖽧𖾑 𖼖𖽪𖾐 𖼞𖽳𖾐 𖼮𖽑𖽡𖾐； 27 𖼹𖽦𖾑 𖼖𖽻𖾐 𖼞𖽑𖽪 𖼠𖽻𖾐 𖼞𖽑𖽶𖾐 𖼞𖽳𖾐 𖼂𖽚 𖼽𖽕𖾑 𖼖𖽕 𖼖𖽪𖾐、 𖼂𖽚 𖼐𖽑𖽧 𖼖𖽔𖾐 𖼖𖽪𖾐、 𖼳𖽪𖾐 𖼠𖽜𖾐 𖼖𖽪𖾐 𖼐𖽺𖾐 𖼺𖽔 𖼇𖽜𖾐 𖼖𖽪𖾐 𖼖𖽺𖾑 𖼮𖽑𖽻𖾐，𖼦𖽑𖽺𖾑 𖼹𖽻𖾐 𖼳𖽡𖾐 𖼦𖽚 𖼈𖽪𖾐 𖼍𖽦 𖼞𖽑𖽙𖾐 𖼠𖽕 𖼺𖽪𖾐 𖼠𖽳𖾐 𖼖𖽪𖾐 𖼄𖽡𖾐 𖼊𖽺𖾐 𖼣𖽻𖾐，𖼄𖽳𖾑 𖼄𖽳 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼮𖽻𖾐．𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼊𖽺𖾐 𖼞𖽑𖽶𖾑 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽻𖾐 𖼺𖽺𖾑，𖼰𖽡𖽔𖾐 𖼖𖽡𖾑 𖼖𖽡𖾑 𖼦𖽜𖾐 𖼀𖽜𖾐 𖼖𖽻𖾐 𖼄𖽳𖾑 𖼮𖽑𖽡𖾐． 28 𖼖𖽪𖾐 𖼦𖽑𖽺𖾑 𖼹𖽻𖾐 𖼀𖽜𖾐 𖼺𖽺𖾑 𖼰𖽡𖽔𖾐 𖼍𖽴 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽴 𖼮𖽑𖽪𖾐 𖼊𖽑𖽺 𖼞𖽜 𖼺𖽪𖾐 𖼄𖽡𖾐 𖼳𖽡𖽪 𖼣𖽻𖾐，𖼦𖽑𖽔𖾐 𖼖𖽺𖾑 𖼖𖽪𖾐 𖼦𖽑𖽺𖾑 𖼹𖽻𖾐 𖼖𖽙𖾐 𖼞𖽑𖽙𖾐 𖼊𖽴 𖼺𖽪𖾐 𖼮𖽑𖽡𖽦𖾐 𖼠𖽻𖾐 𖼖𖽺𖾑 𖼮𖽑𖽻𖾐．

𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽡 𖼀𖽑𖽦𖾐 𖼞𖽳𖾐 𖼄𖽡𖾐 𖼳𖽡𖽪

29 𖼄𖽚 𖼳𖽡𖾐 𖼄𖽡𖾐 𖼳𖽡𖽪 𖼀𖽜𖾐 𖼺𖽺𖾑，𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽡 𖼀𖽑𖽦𖾐 𖼞𖽳𖾐 𖼈𖽴 𖼮𖽑𖽪𖾐 𖼞𖽑𖽙𖾐 𖼣𖽻𖾐 𖼊𖽑𖽺 𖼞𖽜． 30 𖼽𖽻 𖼈𖽳𖾐 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼊𖽺𖾐，𖼞𖽑𖽶𖾑 𖼄𖽔 𖼦𖽔𖾐 𖼐𖽑𖽡𖽦𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼺𖽺𖾑，𖼂𖽔𖾐 𖼳𖽔𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖼂𖽔𖾐 𖼳𖽔𖾐 𖼞𖽑𖽶𖾑 𖼈𖽪𖾐 𖼍𖽦 𖽃𖽴𖾑 𖼞𖽑𖽙𖾐 𖼠𖽕 𖼺𖽪𖾐 𖼄𖽡𖾐 𖼊𖽺𖾐 𖼣𖽻𖾐．𖼹𖽦𖾑 𖼂𖽔𖾐 𖼳𖽔𖾐 𖼄𖽡𖾐 𖼊𖽺𖾐 𖼠𖽻𖾐 𖼞𖽑𖽶𖾐 𖼽𖽕 𖽃𖽳 𖼞𖽳𖾐 𖼖𖽪𖾐 𖼮𖽑𖽡𖽚 𖼷𖽑𖽡𖾐 𖼊𖽝𖾐 𖼮𖽻𖾐． 31 𖼹𖽦𖾑 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼞𖽳𖾐 𖼊𖽑𖽡 𖼀𖽑𖽦𖾐 𖼐𖽺𖾐 𖼽𖽕𖾑 𖼺𖽶𖾐 𖼊𖽑𖽔𖾐 𖼖𖽮𖾑 𖼖𖽪𖾐、 𖼽𖽡 𖼍𖽴 𖼖𖽦 𖼖𖽪𖾐，𖼖𖽪𖾐 𖼦𖽑𖽺𖾑 𖼐𖽑𖽡 𖼊𖽝𖾐 𖽃𖽙𖾑 𖼄𖽺 𖼊𖽑𖽙 𖼞𖽑𖽶𖾑 𖼮𖽶𖾐 𖼂𖽔𖾐 𖼳𖽔𖾐 𖼄𖽡𖾐 𖼊𖽺𖾐 𖼈𖽪𖾐 𖼍𖽦 𖽃𖽴𖾑 𖼞𖽳𖾐 𖼣𖽻𖾐，𖼦𖽑𖽺𖾑 𖼹𖽻𖾐 𖼀𖽜𖾐 𖼺𖽺𖾑 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼄𖽔 𖼰𖽧 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽡 𖼀𖽑𖽦𖾐 𖼞𖽳𖾐 𖼈𖽴 𖼮𖽑𖽪𖾐 𖼊𖽑𖽺 𖼞𖽜 𖼺𖽪𖾐 𖼣𖽻𖾐．

32 𖼞𖽕 𖼂𖽻𖾑 𖼄𖽡𖾐 𖼊𖽺𖾐 𖼦𖽑𖽺𖾑 𖼹𖽻𖾐 𖼄𖽚 𖼳𖽡𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽡𖾐 𖼊𖽚𖾐 𖼄𖽡𖾐 𖼀𖽳，𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼍𖽦 𖼠𖽚 𖼀𖽙 𖼞𖽳𖾐 𖼄𖽚 𖼽𖽔𖾐 𖼊𖽺𖾐 𖼠𖽻𖾐 𖼄𖽙𖾐 𖼊𖽑𖽺 𖼮𖽻𖾐 𖼺𖽺𖾑，𖼀𖽜𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽜 𖼺𖽪𖾐 𖼄𖽡𖾐 𖼳𖽡𖽪 𖼣𖽻𖾐． 33 𖼦𖽑𖽻𖾐 𖼊𖽑𖽻𖾐，𖼄𖽚 𖼳𖽡𖾐 𖼄𖽡𖾐 𖼳𖽡𖽪 𖼄𖽔 𖼀𖽜𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼞𖽜．𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼊𖽑𖽺 𖼞𖽑𖽙𖾐 𖼀𖽦𖾐 𖼖𖽙𖾐 𖼺𖽶𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐，𖼞𖽑𖽶𖾑 𖼽𖽻 𖼈𖽳𖾐 𖼞𖽳𖾐 𖼷𖽻 𖼀𖽜𖾐 𖼣𖽻𖾐 \fr 13．33 \ft 𖼳𖽪𖾐 𖼮𖽨𖾐 𖼄𖽪𖾑 𖼂𖽚𖾐 𖼺𖽪𖾑 18：1-2 𖼖𖽙𖾐 𖼐𖽦𖾐 ．