𖼠𖽶𖾐 𖼮𖽑𖽪𖾐 𖼳𖽶 𖼂𖽕 𖼷𖽑𖽻𖾐 𖼞𖽳𖾐 𖼄𖽡𖾐 𖼳𖽡𖽪
14
1 𖼍𖽕𖾑 𖽂𖽚 𖼦𖽑𖽺𖾑 𖼹𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼞𖽑𖽙𖾐 𖼀𖽜𖾐 𖽂𖽙𖾐 𖼺𖽪𖾐 𖼄𖽡𖾐 𖼳𖽡𖽪 𖼣𖽻𖾐，𖼦𖽑𖽺𖾑 𖼍𖽡𖾐 𖼄𖽻 𖼽𖽡 𖼖𖽡𖾑 𖼽𖽕𖾑 𖼺𖽔、 𖼐𖽜𖾑 𖼞𖽳𖾐 𖼻𖽙 𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼮𖽑𖽪𖾐 𖼳𖽶 𖼈𖽪𖾑 𖼷𖽪𖾐 𖼀𖽜𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽜 𖼺𖽪𖾐 𖼣𖽻𖾐．2 𖼽𖽻 𖼈𖽳𖾐 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼖𖽙𖾐 𖼮𖽑𖽻𖾐 𖼺𖽺𖾑，𖼷𖽑𖽺𖾐 𖼞𖽻𖾐 𖼄𖽡𖾐 𖼳𖽡𖽪 𖼀𖽜𖾐 𖼠𖽶𖾐 𖼮𖽑𖽪𖾐 𖼳𖽶 𖼂𖽕 𖼷𖽑𖽻𖾐 𖼊𖽑𖽺 𖼞𖽜． 3 𖼠𖽳𖾐 𖼖𖽪𖾐 𖼞𖽑𖽶𖾑 𖼐𖽑𖽡 𖼮𖽑𖽪𖾐 𖼳𖽶 𖼂𖽕 𖼷𖽑𖽻𖾐，𖼄𖽚 𖼳𖽡𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼞𖽳𖾐 𖼄𖽡𖾐 𖼊𖽺𖾐，𖼞𖽑𖽶𖾑 𖼀𖽜𖾐 𖼽𖽻 𖼈𖽳𖾐 𖼞𖽜 𖼄𖽡𖾐 𖼳𖽡𖽪 𖼂𖽺𖾐 𖼦𖽑𖽙𖾐．𖼦𖽑𖽻𖾐 𖼊𖽑𖽻𖾐，𖼄𖽡𖾐 𖼳𖽡𖽪 𖼄𖽔 𖼀𖽜𖾐 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼮𖽻𖾐 𖼺𖽪𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼞𖽜． 4 𖼞𖽪𖾐 𖼮𖽡𖽺𖾐，𖼽𖽱𖾐 𖼺𖽴𖾑 𖼞𖽳𖾐 𖼻𖽙 𖼮𖽑𖽡𖾐 𖼖𖽡𖾑 𖼖𖽦𖾐 𖼮𖽑𖽪𖾐 𖼳𖽶 𖼐𖽑𖽡 𖼊𖽝𖾐 𖼀𖽑𖽢 𖼦𖽑𖽙𖾐，𖼞𖽑𖽶𖾑 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼽𖽡 𖼇𖽕 𖼖𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼣𖽻𖾐．𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽡𖾐 𖼳𖽡𖽪 𖼄𖽔 𖼀𖽜𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼞𖽜，𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼞𖽳𖾐 𖼖𖽪𖾐 𖼊𖽑𖽡 𖼹𖽻𖾐 𖼐𖽺𖾐 𖼖𖽪𖾐 𖼞𖽕 𖼰𖽡𖽺𖾐 𖼞𖽳𖾐 𖼄𖽡𖾐 𖼳𖽡𖽻𖾐 𖼀𖽙 𖼍𖽺𖾑 𖼀𖽜𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼞𖽜，𖼽𖽻 𖼈𖽳𖾐 𖼞𖽜 𖼮𖽡𖽺 𖼖𖽚𖾑 𖼄𖽡𖾐 𖼊𖽺𖾐 𖼂𖽺𖾐，𖼞𖽑𖽶𖾑 𖼠𖽻𖾐 𖽂𖽙𖾐 𖼮𖽻𖾐 𖼊𖽙𖾐． 5 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼄𖽪𖾑 𖼍𖽴𖾑 𖼺𖽪𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼺𖽺𖾑，𖼄𖽡𖾐 𖼳𖽡𖽪 𖼊𖽑𖽺 𖼀𖽜𖾐 𖼦𖽑𖽙𖾐 𖼦𖽑𖽻𖾐．
𖼰𖽡𖽔𖾐 𖼖𖽴𖾑 𖼞𖽳𖾐 𖼄𖽡𖾐 𖼳𖽡𖽪
6 𖼽𖽚 𖼍𖽕𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽡 𖼹𖽻𖾐 𖼖𖽻𖾐 𖼺𖽺𖾑 𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼽𖽱𖾐 𖼳𖽪𖾐 𖼽𖽕𖾑 𖼊𖽑𖽺 𖼄𖽡𖽻𖾐．𖼰𖽡𖾐 𖼐𖽑𖽧 𖼳𖽡 𖼈𖽴 𖼮𖽑𖽪𖾐 𖼽𖽺𖾐 𖼇𖽮 𖼐𖽑𖽧 𖼞𖽳𖾐 𖼻𖽙 𖼰𖽡𖽔𖾐 𖼖𖽴𖾑 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐：“𖼰𖽡𖽔𖾐 𖼍𖽡 𖼺𖽶𖾐 𖼂𖽔𖾐 𖼐𖽑𖽧 𖼽𖽕𖾑 𖼄𖽡𖾐 𖼊𖽺𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼽𖽻 𖼞𖽳𖾐 𖼺𖽡𖾐 𖼷𖽑𖽻𖾐 𖼄𖽚 𖼳𖽡𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼊𖽑𖽜𖾐 𖼺𖽪𖾐，𖼐𖽑𖽡𖾐 𖼐𖽺𖾐 𖼣𖽙𖾐 𖼖𖽙𖾐 𖼮𖽡 𖼠𖽳𖾐 𖼺𖽪𖾐 𖼊𖽻 𖼂𖽪𖾑，𖼞𖽑𖽶𖾑 𖼐𖽑𖽡𖾐 𖼖𖽺𖾑 𖼺𖽝𖾑 𖼍𖽳𖾐 𖼳𖽶 𖼣𖽻𖾐． 7 𖼣𖽙𖾐 𖼖𖽡𖾐 𖼷𖽑𖽡𖾐 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽜𖾐 𖼀𖽑𖽙 𖼄𖽚 𖼳𖽡𖾐 ，𖼰𖽡𖽔𖾐 𖼍𖽡 𖼺𖽶𖾐 𖼂𖽕𖾐 𖼐𖽑𖽧 𖼽𖽕𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼣𖽙𖾐 𖼊𖽑𖽺 𖼹𖽡𖾐 𖼺𖽺𖾑，𖼦𖽑𖽺𖾑 𖼄𖽡𖾐 𖼊𖽺𖾐 𖼞𖽑𖽶 𖼮𖽑𖽕 𖼐𖽦𖾐．𖼀𖽑𖽚𖾐 𖼞𖽚 𖼽𖽡𖾐 𖼽𖽻 𖼖𖽙𖾐 𖼀𖽦𖾐 𖼊𖽑𖽧 𖼞𖽑𖽶𖾑 𖼮𖽶𖾐，𖼣𖽙𖾐 𖼍𖽪𖾑 𖼍𖽪𖾑 𖼀𖽦𖾐 𖼺𖽪𖾐 𖼣𖽻𖾐． 8 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼦𖽑𖽺𖾑 𖼄𖽡𖾑 𖼐𖽦𖾐 𖼊𖽑𖽺 𖼞𖽑𖽶 𖼮𖽑𖽕 𖼐𖽦𖾐 𖼺𖽪𖾐 𖼈𖽧 𖼐𖽑𖽳𖾐 𖼞𖽑𖽶𖾑 𖼹𖽻𖾐，𖼷𖽑𖽻𖾐 𖼀𖽺 𖼞𖽜 𖼠𖽻𖾐 𖼄𖽺，𖼣𖽙𖾐 𖼍𖽺𖾑 𖼊𖽑𖽡 𖼐𖽑𖽧𖾐 𖼄𖽙𖾐 𖼣𖽙𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽻𖾑 𖼊𖽴． 9 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼄𖽚 𖼳𖽡𖾐 𖼄𖽳𖾐 𖼷𖽑𖽦𖾐 𖼀𖽦𖾐：‘ 𖼐𖽑𖽡𖾐 𖼞𖽳𖾐 𖼮𖽑𖽡𖾐 𖼈𖽶 𖼞𖽑𖽙𖾐 𖼊𖽑𖽚 𖼠𖽚 𖼺𖽪𖾐 𖼄𖽡𖾐 𖼊𖽺𖾐，𖼄𖽳𖾑 𖼄𖽳 𖼈𖽺𖾐 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼞𖽜 𖼄𖽡𖾐 𖼳𖽡𖽪 𖼂𖽺𖾐 𖼺𖽺𖾑，𖼻𖽳𖾐 𖼹𖽦𖾐 𖼖𖽙𖾐 𖼮𖽑𖽡𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼊𖽑𖽡 𖼐𖽑𖽧𖾐 𖼄𖽙𖾐 𖼣𖽙𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽻𖾑 𖼊𖽴．’ 10 𖽃𖽔𖾑 𖼄𖽳𖾐 𖼐𖽑𖽡𖾐 𖼐𖽦𖾐 𖼄𖽺! 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼮𖽑𖽻𖾐 𖼊𖽻 𖼂𖽪𖾑 𖼦𖽑𖽺𖾑 𖼊𖽑𖽜𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽺𖾐 𖼦𖽴 𖼦𖽫 𖼽𖽻 𖼞𖽑𖽙𖾐 𖼞𖽜 𖼮𖽙𖾐 𖼖𖽙𖾐 𖼮𖽑𖽻𖾐 𖼺𖽺𖾑，𖼣𖽙𖾐 𖼞𖽜 𖼹𖽦𖾑 𖼖𖽡𖾐 𖼷𖽑𖽡𖾐 𖼣𖽙 𖼞𖽑𖽚 𖽂𖽙𖾐 𖼠𖽙𖾑，𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼦𖽳 𖼰𖽡𖽺𖾐 𖼄𖽡𖾐 𖼊𖽺𖾐 𖼞𖽑𖽙𖾐 𖼺𖽜 𖼞𖽳𖾐 𖼐𖽑𖽡𖾐 𖼦𖽑𖽦 𖼣𖽻𖾐．𖼐𖽦𖾐 𖼄𖽺! 𖼣𖽙𖾐 𖽃𖽔𖾑 𖼄𖽳𖾐 𖼦𖽑𖽦 𖼷𖽑𖽡𖾐 𖼣𖽙 𖼞𖽑𖽚 𖼖𖽚 𖼦𖽑𖽻𖾐， 11 𖼦𖽑𖽔𖾐 𖼖𖽺𖾑 𖽂𖽙 𖼐𖽑𖽡𖾐 𖼮𖽻𖾐 𖼺𖽺，𖼄𖽚 𖼳𖽡𖾐 𖼣𖽙𖾐 𖼊𖽑𖽺 𖼹𖽡𖾐 𖼊𖽑𖽧 𖼽𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼖𖽙𖾐 𖼺𖽶𖾑．𖼰𖽕𖾑 𖼊𖽝 𖼣𖽻𖾐 𖼦𖽻，𖼊𖽡 𖼊𖽚𖾐 𖼣𖽻𖾐 𖼦𖽻，𖼞𖽑𖽶𖾑 𖼮𖽶𖾐 𖼣𖽙𖾐 𖽂𖽙 𖼐𖽑𖽡𖾐 𖽃𖽔 𖼊𖽺𖾐 𖼮𖽻𖾐，𖽃𖽔𖾑 𖼄𖽳𖾐 𖼖𖽺𖾑 𖼞𖽑𖽶𖾑 𖼖𖽙𖾐 𖼺𖽶𖾑 𖽂𖽙 𖼐𖽑𖽡𖾐 𖼺𖽺． 12 𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼣𖽙𖾐 𖼊𖽑𖽺 𖼞𖽜 𖼮𖽙𖾐 𖼺𖽪𖾐 𖽂𖽙 𖼰𖽡𖽺𖾐 𖼄𖽡𖾐 𖼊𖽺𖾐，𖼞𖽑𖽶𖾑 𖼐𖽑𖽡𖾐 𖼖𖽪 𖼣𖽙𖾐 𖼊𖽑𖽺 𖼞𖽜 𖼖𖽻𖾐．𖼞𖽪𖾐 𖼮𖽡𖽺𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼐𖽑𖽡𖾐 𖼖𖽺𖾑 𖼊𖽻 𖼮𖽨，𖼞𖽑𖽶𖾑 𖼠𖽻𖾐 𖼽𖽕𖾑 𖼐𖽕𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼮𖽻𖾐，𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼞𖽳𖾐 𖼖𖽪𖾐 𖼞𖽑𖽶𖾑 𖼻𖽺𖾑 𖼻𖽺𖾐 𖼊𖽴𖾐 𖼍𖽙𖾑 𖼺𖽪𖾐 𖼖𖽪𖾐 𖼈𖽳 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼦𖽴 𖼦𖽫 𖼣𖽙𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼊𖽑𖽡𖾑 𖼣𖽻𖾐，𖼽𖽻 𖼞𖽑𖽙𖾐 𖼞𖽜 𖼮𖽙𖾐 𖼖𖽙𖾐 𖼮𖽑𖽻𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼦𖽑𖽙𖾐 𖼊𖽻𖾐．”
13 𖽃𖽔𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼄𖽢 𖼦𖽙𖾐 𖼽𖽺𖾐 𖼇𖽮 𖼐𖽑𖽧 𖼞𖽳𖾐 𖼻𖽙 𖼰𖽡𖽔𖾐 𖼖𖽴𖾑 𖼊𖽑𖽺 𖼞𖽜，𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼀𖽑𖽨 𖼽𖽻 𖼊𖽑𖽺 𖼞𖽜 𖼄𖽡𖾐 𖼳𖽡𖽪 𖼂𖽺𖾐 𖼦𖽑𖽙𖾐．
14 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼦𖽑𖽺𖾑 𖼽𖽺𖾐 𖼇𖽮 𖼐𖽑𖽧 𖼞𖽳𖾐 𖼻𖽙 𖼰𖽡𖽔𖾐 𖼖𖽴𖾑 𖼄𖽡𖾐 𖼳𖽡𖽪 𖼂𖽺𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐．𖼞𖽪𖾐 𖼮𖽡𖽺𖾐，𖼽𖽻 𖼊𖽑𖽡 𖼐𖽑𖽧𖾐 𖼄𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽻𖾑 𖼊𖽴． 15 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼦𖽑𖽺𖾑 𖽃𖽙𖾑 𖼄𖽺 𖼊𖽑𖽙 𖼞𖽑𖽶𖾑 𖼮𖽶𖾐 𖼰𖽡𖾐 𖼖𖽡𖽦𖾑 𖼽𖽕𖾑 𖼂𖽔𖾐 𖼄𖽡𖾐 𖼺𖽪𖾐 𖼣𖽻𖾐，𖼽𖽕𖾑 𖼂𖽔𖾐 𖼦𖽑𖽺𖾑 𖼽𖽕𖾑 𖼐𖽕𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽑𖽶𖾐 𖼦𖽑𖽔𖾐 𖼮𖽶𖾐 𖼄𖽡𖾐 𖼊𖽻 𖼊𖽚𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼣𖽻𖾐．𖼞𖽑𖽶𖾑 𖼠𖽙𖾑 𖼍𖽻𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼰𖽕𖾑 𖼊𖽝 𖼐𖽙 𖼦𖽑𖽙𖾐，𖼺𖽙𖾑 𖼺𖽙𖾐 𖽂𖽙𖾐 𖼮𖽻𖾐．