𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼈𖽪𖾐 𖼍𖽦 𖼞𖽑𖽶𖾑 𖼹𖽻𖾐
9
1 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳，𖽂𖽙 𖼰𖽡𖽺𖾐 𖼀𖽙 𖼐𖽺𖾐 𖼊𖽺𖾐 𖼠𖽻𖾐 𖼄𖽙𖾐 𖼮𖽑𖽻𖾐 𖼺𖽺𖾑 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼖𖽧 𖼂𖽔𖾐 𖼐𖽜𖾑 𖽂𖽙 𖼰𖽡𖽺𖾐 𖼍𖽦 𖼠𖽚 𖼀𖽙 𖼦𖽜𖾐 𖼄𖽙𖾐 𖼦𖽜 𖼞𖽳𖾐 𖼮𖽑𖽡𖾐，𖼞𖽑𖽶𖾑 𖼠𖽻𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼈𖽪𖾐 𖼍𖽦，𖼞𖽑𖽶𖾑 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐、 𖼂𖽡 𖼖𖽡𖾑 𖼳𖽡 𖼮𖽑𖽪𖾐 𖼳𖽶 𖼷𖽑𖽻𖾐、 𖼳𖽡𖾐 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼽𖽺𖾐 𖼂𖽪𖾑 𖼺𖽶𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼣𖽻𖾐，𖼽𖽻 𖼈𖽳𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼊𖽻 𖼮𖽨 𖼞𖽑𖽶𖾑 𖼮𖽶𖾐， 2 𖼷𖽙𖾐 𖼖𖽙𖾐 𖼻𖽶𖾑 𖼖𖽻𖾐 𖼺𖽺𖾑，𖼊𖽑𖽡 𖼐𖽑𖽧𖾐 𖼄𖽙𖾐 𖼻𖽜 𖼽𖽱𖾐 𖼳𖽪𖾐 𖼽𖽕𖾑 𖼊𖽑𖽺 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼊𖽦 𖼊𖽻𖾐．𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼇𖽪
3 𖼽𖽱𖾐 𖼳𖽪𖾐 𖼽𖽕𖾑 𖼽𖽺𖾐 𖼖𖽡𖾑 𖼠𖽴𖾐 𖼖𖽪𖾐 𖼊𖽑𖽺 𖼐𖽺𖾐 𖽃𖽦𖾑 𖼖𖽪𖾐 𖼊𖽑𖽺 𖼞𖽑𖽙𖾐 𖼂𖽺𖾐 𖼞𖽳𖾐 𖼄𖽡𖽻，𖼰𖽡𖾐 𖼂𖽡𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼀𖽺 𖼊𖽻 𖼮𖽨 𖼺𖽺𖾑， 4 𖼺𖽙𖾐 𖼇𖽪 𖼄𖽪𖾐 𖼊𖽪𖾐 𖼻𖽜 𖼺𖽺𖾑 𖼷𖽑𖽻𖾐 𖼹𖽡𖾐 𖼂𖽻𖾐 𖼖𖽻𖾐 𖼽𖽡 𖼺𖽴 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼇𖽪，𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼀𖽶 𖼖𖽧𖾑 𖼖𖽡𖾐 𖼐𖽺𖾐 𖼮𖽑𖽡𖽦 𖼺𖽺𖾑 𖼐𖽝 𖼺𖽪𖾐 𖼮𖽶𖾐 𖼖𖽧𖾑 𖼈𖽺𖾐 𖼺𖽺𖾑 𖼊𖽑𖽳 𖼖𖽳𖾐 𖼄𖽪 𖼊𖽑𖽺 𖼰𖽡𖽦𖾐． 5 𖼐𖽝 𖼂𖽜𖾐 𖼠𖽚 𖼺𖽪𖾐 𖼮𖽑𖽡𖾑 𖼐𖽴𖾐 𖼊𖽴，𖼀𖽑𖽡𖽻𖾐 𖼖𖽡𖾐 𖼈𖽦，𖼞𖽑𖽙𖾐 𖼀𖽶 𖼺𖽪𖾐 𖼷𖽙 𖼊𖽪𖾐 𖼖𖽺𖾑 𖼀𖽸 𖼦𖽑𖽻𖾐 𖼦𖽳𖾐 𖼦𖽑𖽻𖾐． 6 𖼽𖽻 𖼈𖽳𖾐 𖼽𖽡𖾐 𖼺𖽺𖾑 𖼰𖽧 𖼰𖽡𖽔 𖼄𖽡𖾐 𖼊𖽺𖾐 𖼽𖽱𖾐 𖼳𖽪𖾐 𖼽𖽕𖾑 𖼮𖽻𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐，𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐： “𖼣𖽙𖾐 𖼈𖽳𖾐 𖼄𖽡𖾐 𖼈𖽡 𖼄𖽡𖾐 𖼊𖽺𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼣𖽻𖾐，𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼞𖽜．”
7 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼳𖽡𖾐 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼖𖽙𖾐 𖼀𖽦𖾐： “𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼣𖽻𖾐 𖼂𖽔𖾑？ 𖼦𖽑𖽺𖾑 𖼻𖽻𖾐 𖼊𖽑𖽡𖾑 𖼣𖽻𖾐，𖼣𖽻𖾐 𖼈𖽳𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼀𖽑𖽢 𖼄𖽔 𖼊𖽙𖾐 ．”
8 𖼽𖽻 𖼈𖽳𖾐 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐：“𖼣𖽙𖾐 𖼈𖽳𖾐 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼣𖽻𖾐．” 𖼽𖽱𖾐 𖼳𖽪𖾐 𖼽𖽕𖾑 𖼽𖽻 𖼈𖽳𖾐 𖼊𖽑𖽺 𖼊𖽻 𖼐𖽙𖾐： “𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾑 𖼳𖽶 𖼀𖽑𖽙 𖼣𖽻𖾐？ 𖽃𖽔 𖼊𖽺𖾑 𖼠𖽻𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼣𖽻𖾐？”
9 𖼽𖽻 𖼈𖽳𖾐 𖼽𖽱𖾐 𖼳𖽪𖾐 𖼽𖽕𖾑 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖼈𖽳𖾐 𖼐𖽑𖽡𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼄𖽡𖾐 𖼊𖽻 𖼈𖽳 𖼊𖽑𖽺 𖼊𖽻 𖼮𖽨 𖼺𖽺𖾑，𖼄𖽡𖾐 𖼈𖽡 𖼄𖽡𖾐 𖼊𖽺𖾐 𖼮𖽑𖽻𖾐 𖼖𖽻𖾐．𖼞𖽪𖾐 𖼮𖽡𖽺𖾐，𖼣𖽙𖾐 𖼈𖽳𖾐 𖼽𖽻 𖼞𖽳𖾐 𖼄𖽡𖾐 𖼊𖽻 𖼐𖽺𖾐 𖼽𖽻 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼂𖽺𖾐 𖼞𖽳𖾐 𖼄𖽡𖽻 𖼊𖽑𖽺 𖼊𖽻 𖼮𖽨 𖼦𖽑𖽻𖾐． 10 𖼣𖽙𖾐 𖼈𖽳𖾐 𖼦𖽑𖽔𖾐 𖼖𖽺𖾑 𖼊𖽻 𖼮𖽨，𖼽𖽺𖾐 𖼦𖽴 𖼦𖽫 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼐𖽑𖽡 𖼽𖽚𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐．𖼽𖽻 𖼈𖽳𖾐 𖼞𖽑𖽶𖾑 𖼳𖽡𖾐 𖼳𖽸 𖼂𖽜 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼳𖽡𖾐 𖼦𖽚 𖼐𖽺𖾐𖼂𖽔𖾐 𖼳𖽔𖾐 𖼄𖽡𖾐 𖼊𖽺𖾐 𖼽𖽕𖾑 𖼺𖽶𖾐 𖼊𖽑𖽔𖾐 𖼖𖽪𖾑 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖽃𖽴𖾑 𖼣𖽻𖾐． 11 𖽃𖽔𖾐 𖼺𖽺𖾑，𖼣𖽙𖾐 𖼈𖽳𖾐 𖼞𖽳𖾐 𖼮𖽳 𖼄𖽻 𖼐𖽺𖾐 𖼣𖽙𖾐 𖼈𖽳𖾐 𖼠𖽚 𖼠𖽻𖾐 𖼞𖽑𖽶𖾐 𖼷𖽑𖽻𖾐 𖼀𖽺 𖼣𖽙𖾐 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼞𖽑𖽙𖾐 𖼷𖽙 𖼖𖽚𖾐 𖼂𖽚𖾐 𖼈𖽺𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽡𖽻𖾐 𖼽𖽡𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐：‘ 𖼣𖽙𖾐 𖼈𖽳𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼮𖽜𖾐𖼀𖽑𖽙 𖼣𖽻𖾐，𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼞𖽜．
12 𖼣𖽙𖾐 𖼈𖽳𖾐 𖽃𖽔𖾑 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖽃𖽔𖾑 𖼂𖽻𖾐 𖼦𖽑𖽺𖾑 𖼹𖽻𖾐 𖼖𖽺𖾑 𖼖𖽜𖾐 𖼄𖽜𖾑 𖼍𖽳𖾐 𖼺𖽺．𖼐𖽦𖾐 𖼄𖽺! 𖽃𖽔𖾑 𖼄𖽳𖾐 𖼀𖽸 𖼦𖽑𖽻𖾐 𖼦𖽡𖽳𖾐 𖼦𖽑𖽻𖾐． 13 𖼮𖽶𖾐 𖼖𖽧𖾑 𖼦𖽑𖽺𖾑 𖼹𖽻𖾐 𖼣𖽙𖾐 𖼈𖽳𖾐 𖼮𖽶𖾐 𖼞𖽑𖽴 𖼰𖽡𖽺𖾐 𖼞𖽑𖽶𖾑 𖼮𖽶𖾐，𖼽𖽻 𖼳𖽸 𖼣𖽻𖾐 𖼺𖽺，𖼐𖽑𖽡𖾐 𖼐𖽦𖾐! 𖽃𖽔𖾑 𖼄𖽳𖾐 𖼖𖽡𖾐 𖼦𖽑𖽻𖾐 𖼮𖽑𖽡𖽦 𖼦𖽑𖽻𖾐，𖼣𖽙𖾐 𖼈𖽳𖾐 𖼞𖽑𖽙𖾐 𖼊𖽴 𖼈𖽦 𖼺𖽪𖾐 𖼮𖽑𖽡𖾑 𖼐𖽴𖾐 𖼐𖽺𖾐 𖼀𖽑𖽡𖽻𖾐 𖼷𖽑𖽶 𖼦𖽑𖽺𖾑 𖼹𖽻𖾐 𖼖𖽺𖾑 𖼮𖽨𖾐 𖼄𖽙𖾐 𖼄𖽡𖾐 𖼈𖽡 𖼺𖽺𖾑，𖼄𖽳𖾑 𖼄𖽳 𖼖𖽡𖾐 𖼦𖽑𖽻𖾐 𖼮𖽑𖽡𖽦 𖼦𖽑𖽻𖾐．”
14 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼞𖽳𖾐 𖼷𖽙 𖼊𖽪𖾐 𖼊𖽑𖽡 𖼹𖽻𖾐 𖼷𖽶𖾐 𖼹𖽺𖾐 𖼖𖽻𖾐．𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼣𖽝 𖼊𖽪𖾐 𖼊𖽑𖽺 𖼄𖽔 𖼰𖽙𖾐 𖼊𖽻 𖼐𖽙𖾐． 15 𖽃𖽔𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼞𖽙𖾐 𖼮𖽑𖽻 𖼊𖽑𖽪，𖼽𖽻 𖼈𖽳𖾐 𖼞𖽜 𖽂𖽙𖾐 𖼠𖽙𖾑 𖼊𖽙𖾐，𖼷𖽑𖽻𖾐 𖼀𖽺 𖼞𖽳𖾐 𖼈𖽪𖾑 𖼷𖽪𖾐 𖼖𖽺𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐．
𖼽𖽱𖾐 𖼳𖽪𖾐 𖼽𖽕𖾑 𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼮𖽜𖾐 𖼀𖽑𖽙 𖼂𖽺𖾐
16 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼺𖽙𖾐 𖼐𖽑𖽡𖾐 𖼠𖽚 𖼦𖽑𖽙𖾐 𖼺𖽺𖾑 𖼺𖽝𖾑，𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼽𖽻 𖼈𖽳𖾐 𖼞𖽕 𖼰𖽡𖾐𖽺𖾐 𖼮𖽻𖾐，𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖼣𖽻𖾐． 17 𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽡𖾐，𖼺𖽙𖾐 𖼐𖽑𖽡𖾐 𖼍𖽺𖾑 𖼺𖽜 𖼺𖽺 𖼽𖽻 𖼈𖽳𖾐 𖼮𖽻𖾐 𖼞𖽳𖾐 𖼖𖽪𖾐 𖼞𖽑𖽶𖾐 𖼮𖽑𖽡𖾐，𖼽𖽻 𖼈𖽳𖾐 𖼞𖽳𖾐 𖼖𖽪𖾐 𖼞𖽑𖽶𖾑 𖼰𖽡𖾐 𖼂𖽡𖽦𖾑、 𖼰𖽡𖾐 𖼇𖽺𖾐 𖼖𖽔𖾐、 𖼂𖽡 𖼖𖽪𖾑 𖼐𖽺𖾐 𖼰𖽡𖾐 𖼖𖽡𖽦𖾑 𖼽𖽺𖾐 𖼖𖽧 𖼣𖽻𖾐． 18 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼄𖽔 𖼺𖽦．𖼞𖽪𖾐 𖼮𖽡𖽺𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖽃𖽙𖾑 𖼄𖽺 𖼞𖽑𖽶𖾑 𖼮𖽶𖾐，𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐．
𖼄𖽡𖽻 𖼦𖽑𖽺𖾑 𖼖𖽙𖾐 𖼀𖽙𖾐 𖼺𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼈𖽪𖾑 𖼷𖽪𖾐 𖼊𖽑𖽺 𖼀𖽶 𖼻𖽶 𖼊𖽻 𖼊𖽑𖽜𖾐． 19 𖼈𖽪𖾑 𖼷𖽪𖾐 𖼞𖽑𖽙𖾐 𖼣𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐： “𖼣𖽙𖾐 𖼈𖽳𖾐 𖽃𖽙𖾑 𖼄𖽺 𖼞𖽑𖽶𖾑 𖼮𖽶𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐，𖽃𖽔𖾐 𖼺𖽺𖾑 𖽃𖽔 𖼐𖽺𖾑 𖼽𖽻 𖼈𖽳𖾐 𖼊𖽑𖽺 𖼦𖽹𖾑 𖼀𖽑𖽧𖾐 𖼄𖽔 𖼊𖽙𖾐． 20 𖽃𖽔 𖼐𖽺𖾑 𖼽𖽻 𖼈𖽳𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼂𖽺𖾐 𖼖𖽡𖾐，𖼽𖽻 𖼈𖽳𖾐 𖼞𖽜 𖼠𖽙𖾑 𖼍𖽳𖾐! 𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖽃𖽔 𖼐𖽺𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼄𖽳𖾐 𖼷𖽑𖽦𖾐 𖼞𖽑𖽶𖾑 𖼖𖽙𖾐 𖼮𖽑𖽻𖾐 𖼺𖽺𖾑，𖼀𖽶 𖼻𖽶 𖼮𖽑𖽡𖾐 𖼀𖽑𖽨 𖽃𖽔 𖼐𖽺𖾑 𖼞𖽶𖾐 𖼮𖽑𖽶 𖼊𖽑𖽺 𖼊𖽦𖾐 𖼊𖽻𖾐． 21 𖼈𖽪𖾑 𖼷𖽪𖾐 𖼹𖽦𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐： “𖼽𖽻 𖼈𖽳𖾐 𖼞𖽜 𖼠𖽙𖾑 𖼍𖽳𖾐 𖼖𖽡𖾐!” 𖽃𖽔𖾐 𖼺𖽺𖾑，𖼈𖽪𖾑 𖼷𖽪𖾐 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐，𖼽𖽻 𖼈𖽳𖾐 𖼷𖽑𖽻𖾐 𖼷𖽪𖾐 𖼠𖽻𖾐 𖼞𖽑𖽶𖾐 𖼺𖽧𖾐 𖼞𖽑𖽳、 𖽃𖽔𖾐 𖼮𖽡𖽦𖾐 𖼈𖽦𖾑 𖼺𖽪𖾐 𖼷𖽑𖽻𖾐 𖼂𖽺𖾐．
22 𖼽𖽱𖾐 𖼳𖽪𖾐 𖼽𖽕𖾑 𖼽𖽻 𖼈𖽳𖾐 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐： “𖼐𖽑𖽡𖾐 𖼈𖽳𖾐 𖼣𖽙𖾐 𖼈𖽳𖾐 𖼊𖽑𖽺 𖼇𖽪 𖼺𖽺𖾑，𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼄𖽡𖾐 𖼈𖽡 𖼺𖽪𖾐 𖼷𖽑𖽻𖾐 𖼣𖽻𖾐 𖼀𖽦𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼍𖽺𖾑 𖼣𖽻𖾐 ． 23 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼮𖽙 𖼰𖽪𖾑 𖼄𖽳𖾐 𖼊𖽻𖾐，𖼐𖽑𖽡𖾐 𖼈𖽳𖾐 𖼻𖽳𖾐 𖼻𖽳𖾐 𖼮𖽜𖾐 𖼀𖽑𖽙 𖼂𖽺𖾐 𖼺𖽺𖾑，𖼣𖽙𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼀𖽙𖾐 𖼍𖽡𖾐 𖼦𖽑𖽺𖾐 𖼞𖽑𖽶𖾐 𖼺𖽧𖾐 𖼞𖽑𖽳、 𖽃𖽔𖾐 𖼮𖽡𖽦𖾐 𖼈𖽦𖾑 𖼺𖽪𖾐 𖼂𖽺𖾐 𖼊𖽻𖾐．
24 𖼽𖽻 𖼈𖽳𖾐 𖼽𖽱𖾐 𖼳𖽪𖾐 𖼽𖽕𖾑 𖼊𖽑𖽺 𖼊𖽻 𖼞𖽑𖽚： “𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼠𖽕𖾐 𖼰𖽶𖾐 𖼊𖽻 𖼮𖽨，𖼐𖽑𖽡𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼊𖽑𖽙 𖼞𖽑𖽶𖾑 𖼮𖽶𖾐，𖼽𖽻 𖼞𖽳𖾐 𖼮𖽜𖾐 𖼀𖽑𖽙 𖼄𖽚 𖼳𖽡𖾐 𖼊𖽑𖽺 𖼄𖽪𖾑 𖼍𖽴𖾑 𖼠𖽚，𖼦𖽑𖽺𖾑 𖼄𖽡𖾐 𖼊𖽺𖾐 𖼄𖽳𖾑 𖼄𖽳 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼊𖽻𖾐，𖼹𖽦𖾑 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐．𖽃𖽔𖾐 𖼺𖽺𖾑，𖼣𖽙𖾐 𖼈𖽳𖾐 𖼈𖽪𖾑 𖼠𖽻𖾐 𖼀𖽑𖽧𖾐 𖼄𖽳𖾐 𖼠𖽸𖾑 𖼮𖽡𖽮𖾐 𖼺𖽺𖾑，𖼦𖽑𖽺𖾑 𖼻𖽻𖾐 𖼂𖽺𖾐 𖼳𖽶 𖼣𖽻𖾐． 25 𖽃𖽔𖾑 𖼄𖽳𖾐，𖼐𖽑𖽡𖾐 𖼐𖽦𖾐 𖼄𖽺! 𖼣𖽙𖾐 𖼈𖽳𖾐 𖼐𖽑𖽡𖾐 𖼖𖽦 𖼠𖽻𖾐 𖼞𖽑𖽶𖾐 𖼮𖽻𖾐，𖼐𖽑𖽡𖾐 𖼣𖽙𖾐 𖼈𖽳𖾐 𖼊𖽑𖽺 𖽃𖽔 𖼊𖽺𖾐 𖼂𖽺𖾐 𖼺𖽺𖾑 𖼹𖽳𖾐，𖽃𖽔 𖼊𖽺𖾐 𖼂𖽺𖾐 𖼺𖽺𖾑 𖼀𖽑𖽢 𖼊𖽡 𖼮𖽑𖽻，𖽃𖽔 𖼊𖽺𖾐 𖼂𖽺𖾐 𖼻𖽻𖾐!”
26 𖼽𖽱𖾐 𖼳𖽪𖾐 𖼽𖽕𖾑 𖼽𖽻 𖼈𖽳𖾐 𖼊𖽑𖽺 𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽦 𖼠𖽻𖾐 𖼞𖽑𖽶𖾐 𖼰𖽨𖾑 𖼊𖽑𖽧 𖼖𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼄𖽔 𖼺𖽦 𖼦𖽑𖽙𖾐． 27 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽻𖾐 𖼍𖽪𖾐，𖼽𖽱𖾐 𖼳𖽪𖾐 𖼽𖽕𖾑 𖼽𖽻 𖼈𖽳𖾐 𖼊𖽑𖽺 𖼹𖽡𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼺𖽺𖾐 𖼊𖽑𖽧 𖼖𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼊𖽑𖽺，𖼷𖽑𖽻𖾐 𖼀𖽺 𖼖𖽙𖾐 𖼀𖽙𖾐 𖼐𖽺𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼍𖽡𖾐 𖼷𖽻𖾐 𖼖𖽙𖾐 𖼀𖽙𖾐 𖼺𖽧𖾐 𖼞𖽑𖽳、 𖽃𖽔𖾐 𖼮𖽡𖽦𖾐 𖼈𖽦𖾑 𖼺𖽪𖾐 𖼷𖽑𖽻𖾐 𖼂𖽺𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐．