𖼹𖽦𖾑 𖼊𖽑𖽡 𖼂𖽦𖾑 𖽃𖽦𖾑 𖼖𖽪𖾐 𖼊𖽑𖽺 𖼊𖽝
8
1 𖼽𖽺𖾐 𖼦𖽴 𖼦𖽫 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼊𖽑𖽔 𖼮𖽡𖽮𖾐，𖼦𖽑𖽔𖾐 𖼖𖽺𖾑 𖼊𖽑𖽔 𖼠𖽻𖾐 𖼄𖽺! 𖼐𖽑𖽡𖾐 𖼰𖽕𖾑 𖼞𖽑𖽙𖾐 𖼊𖽝 𖼀𖽑𖽢 𖼊𖽙𖾐 𖼺𖽪𖾐 𖼊𖽑𖽺 𖼦𖽳 𖽃𖽦𖾑 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐 𖼍𖽺𖾑 𖼻𖽻𖾐，𖼣𖽙𖾐 𖽃𖽦𖾑 𖼖𖽪𖾐 𖼐𖽺𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦、 𖼷𖽑𖽻𖾐 𖼀𖽺 𖼻𖽙 𖼐𖽺𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼄𖽳𖾑 𖼄𖽳 𖼰𖽡𖽻𖾐 𖼺𖽺𖾑，𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼦𖽑𖽻𖾐． 2 𖼐𖽑𖽡𖾐 𖽃𖽔 𖼊𖽺𖾑 𖼻𖽻𖾐 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼐𖽺𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼄𖽳 𖼮𖽡𖽦，𖽃𖽦𖾑 𖼖𖽪𖾐 𖼐𖽺𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼖𖽺𖾑 𖼞𖽑𖽶𖾑 𖼖𖽙𖾐 𖼺𖽶𖾑 𖼄𖽳 𖼮𖽡𖽦 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼖𖽪𖾐 𖼞𖽑𖽶𖾐 𖼞𖽑𖽙𖾐 𖼊𖽝 𖼊𖽦 𖽂𖽙𖾐 𖼺𖽪𖾐 𖼄𖽡𖽻 𖼐𖽑𖽡 𖼐𖽺𖾐 𖼮𖽡𖽺 𖼷𖽪𖾐，𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼷𖽺𖾐 𖽂𖽙𖾐 𖼂𖽺𖾐 𖼊𖽙𖾐．𖼐𖽑𖽡𖾐 𖼦𖽳 𖼖𖽪𖾐 𖼊𖽑𖽺 𖼊𖽝 𖼺𖽪𖾐 𖼄𖽦 𖼀𖽑𖽙 𖼞𖽜 𖼺𖽺𖾑，𖽃𖽦𖾑 𖼖𖽪𖾐 𖼠𖽙𖾑 𖼍𖽻𖾐 𖼀𖽳 𖼞𖽳𖾐 𖼂𖽡𖽚𖾐 𖼖𖽡𖾐．”3 𖽃𖽔𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼰𖽕𖾑 𖼊𖽝 𖼊𖽻𖾐 𖼺𖽪𖾐 𖼄𖽦 𖼀𖽑𖽙 𖽃𖽦𖾑 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐．𖼽𖽱𖾐 𖼳𖽪𖾐 𖼽𖽕𖾑 𖽂𖽙 𖼐𖽑𖽡𖾐 𖼐𖽑𖽧𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼺𖽙𖾐 𖼄𖽺 𖼺𖽺𖾐 𖼊𖽑𖽧 𖼖𖽻𖾐，𖼄𖽶 𖼮𖽑𖽧 𖼞𖽑𖽶𖾐 𖼹𖽦𖾐 𖼽𖽻 𖼈𖽳𖾐 𖼊𖽑𖽺 𖼹𖽡𖾐 𖼊𖽚𖾐 𖼽𖽡𖾐， 4 𖼽𖽻 𖼈𖽳𖾐 𖼊𖽑𖽺 𖼄𖽪𖾑 𖼍𖽴𖾑 𖼀𖽦𖾐：“𖼐𖽑𖽡𖾐 𖼈𖽳𖾐 𖼷𖽜𖾐 𖼍𖽳𖾐，𖼐𖽑𖽡𖾐 𖼈𖽳𖾐 𖼽𖽡𖾐 𖼖𖽪𖾐 𖼠𖽙𖾑 𖼍𖽻𖾐 𖼀𖽳 𖼂𖽡𖽚𖾐 𖼖𖽡𖾐，𖼖𖽪𖾐 𖼊𖽑𖽺 𖼰𖽡𖾑 𖼄𖽡𖾐 𖼈𖽡 𖼄𖽔 𖼊𖽙𖾐，𖼷𖽑𖽻𖾐 𖼄𖽳𖾑 𖼄𖽳 𖼹𖽳𖾐 𖼄𖽙𖾐 𖼂𖽺𖾐 𖼳𖽡𖽻𖾐 𖼀𖽑𖽢 𖼖𖽡𖾐． 5 𖼣𖽙𖾐 𖼐𖽺𖾐 𖼣𖽙𖾐 𖼖𖽙𖾐 𖼞𖽑𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐，𖼖𖽪𖾐 𖽃𖽙𖾑 𖼄𖽺 𖼀𖽳 𖼞𖽳𖾐 𖼐𖽳 𖼽𖽡𖾐 𖼊𖽻𖾐，𖼖𖽪𖾐 𖼞𖽑𖽶𖾐 𖼷𖽑𖽻𖾐 𖽃𖽙𖾑 𖼄𖽺 𖼞𖽑𖽶𖾑 𖼊𖽑𖽡 𖼂𖽦𖾑 𖼖𖽙𖾐 𖼺𖽶𖾑 𖼊𖽚𖾐 𖼖𖽻𖾐 𖼣𖽙𖾐 𖼈𖽳𖾐 𖼊𖽑𖽺 𖼞𖽕 𖼖𖽻𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼈𖽳𖾐 𖼽𖽻 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼀𖽑𖽻𖾐 𖼍𖽪𖾐 𖼊𖽻𖾐． 6 𖼽𖽻 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼊𖽚𖾐 𖼖𖽻𖾐 𖼣𖽙𖾐 𖼈𖽳𖾐 𖼊𖽑𖽺 𖼞𖽕 𖼖𖽻𖾐 𖼊𖽻𖾐，𖼣𖽙𖾐 𖼈𖽳𖾐 𖼖𖽪𖾐 𖼞𖽑𖽶𖾐 𖼮𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼇𖽪 𖼊𖽑𖽧 𖼖𖽻𖾐 𖼊𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖼈𖽳𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼊𖽻𖾐：‘ 𖼷𖽑𖽻𖾐 𖼦𖽑𖽺𖾑 𖼹𖽻𖾐 𖽃𖽙𖾑 𖼄𖽺 𖼞𖽑𖽶𖾑 𖼊𖽑𖽡 𖼂𖽦𖾑 𖼖𖽙𖾐 𖼺𖽶𖾑 𖽃𖽔 𖼐𖽺𖾑 𖽃𖽙𖾑 𖼄𖽺 𖼮𖽑𖽡𖽺 𖼮𖽡𖽪 𖼀𖽑𖽻𖾐 𖼽𖽡𖾐 𖼦𖽑𖽙𖾐．’ 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼣𖽙𖾐 𖼈𖽳𖾐 𖼽𖽻 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼀𖽑𖽻𖾐 𖼍𖽪𖾐 𖼊𖽻𖾐． 7 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼮𖽡𖽪 𖼂𖽡𖽚𖾐 𖼞𖽳𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼍𖽪𖾐 𖼖𖽻𖾐，𖼖𖽪𖾐 𖼞𖽑𖽶𖾑 𖼊𖽑𖽺 𖼊𖽝 𖼽𖽡𖾐 𖼖𖽡𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼖𖽪𖾐 𖼦𖽑𖽺𖾑 𖼊𖽝𖾐 𖼰𖽡𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼊𖽻𖾐． 8 𖼐𖽑𖽡𖾐 𖼈𖽳𖾐 𖼖𖽪𖾐 𖼦𖽑𖽺𖾑 𖼊𖽝𖾐 𖼊𖽑𖽺 𖼊𖽝 𖽂𖽙𖾐 𖼦𖽑𖽻𖾐 𖼠𖽙𖾑 𖼍𖽻𖾐，𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖽃𖽔𖾐 𖼍𖽚𖾑 𖼻𖽜 𖼖𖽪𖾐 𖼊𖽑𖽺 𖼮𖽑𖽡𖽪𖾐 𖼦𖽑𖽙𖾐 𖼖𖽡𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽪𖾑 𖼍𖽴𖾑 𖼦𖽑𖽙𖾐 𖼦𖽑𖽻𖾐．”
9 𖼽𖽱𖾐 𖼳𖽪𖾐 𖼽𖽕𖾑 𖼽𖽻 𖼈𖽳𖾐 𖼊𖽑𖽺 𖼹𖽡𖾐 𖼊𖽚𖾐 𖼽𖽡𖾐 𖼺𖽺𖾑，𖼽𖽻 𖼈𖽳𖾐 𖼮𖽡𖽪 𖼂𖽡𖽚𖾐 𖼊𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼽𖽡𖾐，𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼐𖽺𖾐 𖽃𖽦𖾑 𖼖𖽪𖾐 𖼞𖽳𖾐 𖼠𖽻𖾐 𖼊𖽑𖽺 𖼮𖽻𖾐，𖼞𖽑𖽶𖾑 𖽃𖽦𖾑 𖼖𖽪𖾐 𖼞𖽳𖾐 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼣𖽻𖾐．𖼞𖽑𖽶𖾑 𖼊𖽑𖽡 𖼦𖽑𖽦，𖼽𖽱𖾐 𖼳𖽪𖾐 𖼽𖽕𖾑 𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼀𖽺 𖼠𖽻𖾐 𖼊𖽑𖽺 𖼦𖽑𖽦． 10 𖼽𖽱𖾐 𖼳𖽪𖾐 𖼽𖽕𖾑 𖼷𖽑𖽶𖾐 𖼐𖽦 𖼍𖽪𖾐 𖼖𖽻𖾐，𖼄𖽦 𖼀𖽑𖽙 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐，𖼽𖽻 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽦 𖼈𖽪𖾑 𖼷𖽪𖾐，𖼄𖽦 𖼀𖽑𖽙 𖼦𖽳 𖽃𖽦𖾑 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐． 11 𖼽𖽻 𖼖𖽙𖾐 𖼞𖽑𖽙𖾐 𖼮𖽑𖽻𖾐 𖼺𖽪𖾐 𖼄𖽦 𖼀𖽑𖽙 𖼄𖽳𖾑 𖼄𖽳 𖽂𖽙 𖼰𖽡𖽺𖾐 𖼊𖽑𖽺 𖼊𖽦𖾐 𖼽𖽡𖾐，𖽃𖽦𖾑 𖼖𖽪𖾐 𖼞𖽳𖾐 𖼐𖽳 𖼽𖽡𖾐，𖽃𖽦𖾑 𖼖𖽪𖾐 𖼞𖽳𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼮𖽻𖾐，𖼽𖽻 𖼈𖽳𖾐 𖼮𖽻𖾐 𖼞𖽳𖾐 𖼐𖽺𖾐 𖽃𖽦𖾑 𖼖𖽪𖾐 𖼞𖽑𖽶𖾑 𖼖𖽻𖾐 𖼞𖽑𖽪 𖼊𖽑𖽡 𖼊𖽝𖾐 𖼰𖽨𖾑． 12 𖼽𖽱𖾐 𖼳𖽪𖾐 𖼽𖽕𖾑 𖼷𖽑𖽻𖾐 𖽃𖽔 𖼖𖽙𖾐 𖼣𖽙 𖼍𖽪𖾐 𖼽𖽚𖾐 𖼺𖽺𖾑 𖼺𖽺𖾐 𖼊𖽑𖽧 𖼖𖽻𖾐，𖼽𖽻 𖼈𖽳𖾐 𖼞𖽜 𖽃𖽦𖾑 𖼖𖽪𖾐 𖼐𖽺𖾐𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼠𖽻𖾐 𖼊𖽑𖽺 𖼞𖽳𖾐 𖼮𖽡𖽪 𖼂𖽡𖽚𖾐，𖼞𖽑𖽶𖾑 𖽃𖽦𖾑 𖼖𖽪𖾐 𖼞𖽳𖾐 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼣𖽻𖾐． 13 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼖𖽪𖾐 𖼞𖽳𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼐𖽺𖾐 𖼖𖽪𖾐 𖼞𖽳𖾐 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼮𖽡𖽪 𖼂𖽡𖽚𖾐 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼂𖽺𖾐 𖼍𖽙𖾑 𖼀𖽑𖽢 𖼦𖽑𖽻𖾐．𖼞𖽑𖽶𖾑 𖼊𖽑𖽡 𖼦𖽑𖽦，𖼽𖽱𖾐 𖼳𖽪𖾐 𖼽𖽕𖾑 𖼖𖽻𖾐 𖼞𖽑𖽪 𖼞𖽑𖽶𖾐 𖼺𖽜 𖼊𖽡 𖼽𖽡𖾐，𖼞𖽑𖽶𖾑 𖼠𖽻𖾐 𖼦𖽑𖽦．
14 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐，𖽃𖽦𖾑 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼄𖽡𖽻 𖼦𖽑𖽺𖾑 𖼹𖽻𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖽃𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼐𖽕 𖼐𖽕𖾐 𖼍𖽪𖾐 𖼖𖽻𖾐，𖼞𖽑𖽙𖾐 𖼀𖽦𖾐 𖼷𖽑𖽦𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼖𖽙𖾐 𖼮𖽑𖽻𖾐 𖼊𖽚𖾐 𖼽𖽡𖾐 𖼽𖽕𖾑 𖼖𖽔𖾐 𖼂𖽔𖾐 𖼄𖽡𖾐 𖼊𖽺𖾐 𖼽𖽡𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼽𖽻 𖼈𖽳𖾐 𖼊𖽑𖽺 𖼊𖽝 𖼊𖽻𖾐 𖼺𖽪𖾐 𖼄𖽦 𖼀𖽑𖽙 𖼖𖽪𖾐 𖼠𖽙𖾑 𖼍𖽻𖾐 𖼀𖽳 𖼮𖽡𖽪 𖼂𖽡𖽚𖾐 𖼍𖽳𖾐，𖼞𖽑𖽶𖾑 𖽃𖽦𖾑 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼄𖽔 𖼺𖽝𖾑．
15 𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 ，𖼊𖽝 𖼽𖽻 𖼈𖽳𖾐 𖼖𖽙𖾐 𖼄𖽔 𖼊𖽙𖾐 𖼖𖽙𖾐 𖼺𖽶𖾑 𖼂𖽺𖾐 𖼺𖽺𖾑，𖼀𖽑𖽻𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼀𖽳 𖼮𖽨𖾐 𖼄𖽙𖾐 𖼊𖽑𖽺 𖼽𖽡𖾐． 16 𖽃𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼄𖽳𖾑 𖼄𖽳 𖽃𖽶𖾐 𖼻𖽺𖾑 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼞𖽕 𖼽𖽡𖾐．𖽃𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼽𖽡𖾐 𖼞𖽑𖽶𖾑 𖼮𖽶𖾐，𖼇𖽪 𖼄𖽳𖾐 𖼺𖽺𖾑 𖼄𖽦 𖼀𖽑𖽙 𖼄𖽳𖾑 𖼄𖽳 𖼖𖽪𖾐 𖼞𖽑𖽶𖾐 𖼊𖽚𖾐 𖼽𖽡𖾐 𖼦𖽑𖽙𖾐．
17 𖽃𖽦𖾑 𖼖𖽪𖾐 𖼐𖽺𖾐 𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼞𖽳𖾐 𖼄𖽦 𖼀𖽑𖽙 𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼷𖽺𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽕 𖼽𖽡𖾐．𖼽𖽻 𖼈𖽳𖾐 𖼖𖽪𖾐 𖽃𖽔𖾑 𖼊𖽪 𖼖𖽺𖾑 𖼄𖽔 𖼳𖽪𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽕 𖼽𖽡𖾐．
𖽃𖽦𖾑 𖼖𖽪𖾐 𖼊𖽑𖽺 𖼊𖽝 𖽂𖽙𖾐
18 𖼽𖽺𖾐 𖼦𖽴 𖼦𖽫 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼀𖽑𖽡𖽻 𖼰𖽻𖾐 𖽃𖽦𖾑 𖼖𖽪𖾐 𖼞𖽳𖾐 𖼀𖽳 𖼠𖽚 𖼺𖽺𖾑，𖼖𖽦 𖼀𖽑𖽦𖾐 𖼞𖽑𖽶𖾐 𖼞𖽳𖾐 𖼂𖽨𖾐 𖼹𖽶 𖼈𖽺𖾐 𖼊𖽑𖽧 𖼖𖽻𖾐 𖼖𖽪𖾐 𖼊𖽑𖽺 𖼊𖽑𖽪! 𖼞𖽪𖾐 𖼮𖽡𖽺𖾐 𖼣𖽙𖾐 𖼖𖽪𖾐 𖼞𖽑𖽶𖾑 𖼊𖽝𖾐 𖼰𖽡𖽻𖾐 𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼦𖽑𖽻𖾐．” 𖽃𖽔𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼀𖽑𖽡𖽻 𖼰𖽻𖾐 𖽃𖽦𖾑 𖼖𖽪𖾐 𖼞𖽳𖾐 𖼀𖽳 𖼠𖽚 𖼺𖽺𖾑，𖼖𖽦 𖼀𖽑𖽦𖾐 𖼞𖽑𖽶𖾐 𖼞𖽳𖾐 𖼂𖽨𖾐 𖼹𖽶 𖼈𖽺𖾐
𖼊𖽑𖽧 𖼖𖽻𖾐 𖼖𖽪𖾐 𖼊𖽑𖽺 𖼊𖽑𖽪． 19 𖼽𖽻 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼊𖽑𖽧 𖼖𖽻𖾐 𖼞𖽑𖽶𖾑 𖼮𖽶𖾐，𖼮𖽡𖽪 𖼂𖽡𖽚𖾐 𖼺𖽪𖾐 𖼄𖽦 𖼀𖽑𖽙 𖼐𖽕 𖼊𖽺𖾐 𖼽𖽻 𖼈𖽳𖾐 𖼂𖽡𖽚𖾐 𖼞𖽳𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼍𖽪𖾐 𖼖𖽻𖾐，𖼰𖽡𖽴 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐，𖼖𖽪𖾐 𖼊𖽑𖽺 𖼐𖽻𖾑 𖽂𖽙𖾐，𖼦𖽑𖽔𖾐 𖼖𖽺𖾑 𖼐𖽕 𖼐𖽕𖾐 𖼖𖽪𖾐 𖼞𖽑𖽶𖾐 𖽃𖽔 𖼍𖽚𖾑 𖼍𖽴𖾑 𖼍𖽪𖾐．
20 𖽃𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼀𖽑𖽚𖾐 𖼰𖽻𖾐 𖼞𖽑𖽚 𖼖𖽻𖾐 𖼘𖽜𖾑 𖼐𖽦𖾐，𖼖𖽪𖾐 𖼞𖽑𖽶𖾐 𖽃𖽔𖾑 𖼞𖽑𖽶 𖼺𖽶𖾑 𖼍𖽪𖾐 𖼖𖽻𖾐 𖼞𖽳𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼮𖽡𖽮𖾐 𖼮𖽡𖽮𖾐 𖼞𖽴𖾐 𖼞𖽴𖾐，𖼮𖽡𖽪 𖼂𖽡𖾐 𖼽𖽡𖾐 𖼄𖽔 𖼠𖽸𖾑 ．𖼞𖽑𖽶𖾑 𖼮𖽶𖾐，𖼰𖽡𖽴 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼽𖽡𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽑𖽚𖾐 𖼰𖽻𖾐 𖼞𖽑𖽚 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼞𖽕 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽕 𖼊𖽝． 21 𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽦𖾐 𖼄𖽡𖽻𖾐，𖼮𖽡𖽪 𖼂𖽡𖽚𖾐 𖼺𖽪𖾐 𖼄𖽦 𖼀𖽑𖽙 𖼖𖽪𖾐 𖼊𖽑𖽺 𖼐𖽻𖾑 𖽂𖽙𖾐 𖼦𖽑𖽻𖾐，𖼖𖽪𖾐 𖼞𖽑𖽶𖾐 𖽃𖽔𖾑 𖼞𖽑𖽶 𖼺𖽶𖾑 𖼍𖽪𖾐 𖼖𖽻𖾐 ，𖽃𖽔𖾐 𖼺𖽺𖾑 𖼀𖽑𖽚𖾐 𖼰𖽻𖾐 𖼞𖽑𖽚 𖼖𖽻𖾐 ，𖽃𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼊𖽑𖽺 𖼺𖽦． 22 𖼮𖽡𖽪 𖼂𖽡𖽚𖾐 𖼺𖽪𖾐 𖼄𖽦 𖼀𖽑𖽙 𖼖𖽺𖾑 𖼖𖽪𖾐 𖼞𖽑𖽶𖾐 𖼊𖽚𖾐 𖼖𖽻𖾐 𖼺𖽺𖾑，𖽃𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼊𖽑𖽺 𖼊𖽝 𖼊𖽦 𖼖𖽻𖾐，𖽃𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼊𖽑𖽺 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽑𖽢𖾑 𖼰𖽻𖾑 𖼍𖽡，𖼊𖽑𖽡 𖼰𖽻𖾐 𖼖𖽡𖾐 𖼊𖽝 𖼊𖽦 𖼄𖽳𖾐．𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽑𖽢𖾑 𖼽𖽻 𖼈𖽳𖾐 𖼊𖽑𖽺 𖼄𖽳𖾑 𖼄𖽳 𖼺𖽦 𖼦𖽑𖽙𖾐，𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼷𖽺𖾐，𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼮𖽡𖽪 𖼊𖽜𖾑． 23 𖽃𖽦𖾑 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼠𖽙𖾑 𖼠𖽙𖾑 𖼄𖽙𖾐 𖼽𖽻 𖼈𖽳𖾐 𖼮𖽑𖽢𖾑 𖼵𖽪𖾐 𖽂𖽙𖾐，𖼽𖽻 𖼊𖽑𖽺 𖼵𖽪𖾐 𖼺𖽺𖾑 𖼽𖽱𖾐 𖼳𖽪𖾐 𖼽𖽕𖾑𖼞𖽳𖾐 𖼽𖽡𖾐．
24 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽡𖾐 𖼠𖽻𖾐 𖼞𖽑𖽶𖾐 𖼐𖽺𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼠𖽻𖾐 𖼞𖽑𖽶𖾐，𖼽𖽻 𖼈𖽳𖾐 𖼊𖽑𖽺 𖼞𖽑𖽙𖾐 𖼞𖽕 𖼖𖽻𖾐 𖼺𖽪𖾐 𖽃𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼄𖽳𖾑 𖼄𖽳 𖼺𖽦 𖼦𖽑𖽙𖾐 𖼦𖽑𖽻𖾐．𖽃𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼄𖽳𖾑 𖼄𖽳 𖽃𖽔𖾑 𖼊𖽑𖽙 𖽂𖽚 𖼞𖽑𖽶𖾐 𖼀𖽜 𖼹𖽺𖾐 𖼺𖽺𖾑，𖼄𖽳𖾑 𖼄𖽳 𖼳𖽶𖾐 𖼦𖽑𖽻𖾐．𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼹𖽦𖾑 𖼀𖽑𖽚𖾐 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐，𖽃𖽔𖾑 𖼊𖽑𖽙 𖼻𖽜 𖼖𖽪𖾐 𖼞𖽑𖽶𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼺𖽦 𖼦𖽑𖽙𖾐． 25 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼺𖽦 𖼦𖽑𖽙𖾐 𖼺𖽪𖾐 𖼷𖽑𖽻𖾐，𖼻𖽙 𖼐𖽜𖾐 𖼻𖽙 𖼄𖽳 𖼊𖽑𖽡 𖼄𖽺 𖼐𖽑𖽡 𖼍𖽪𖾐 𖼮𖽻𖾐，𖼞𖽑𖽶𖾑 𖽃𖽦𖾑 𖼖𖽪𖾐 𖼞𖽑𖽶𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖼣𖽻𖾐． 26 𖼽𖽱𖾐 𖼳𖽪𖾐 𖼽𖽕𖾑 𖼂𖽨𖾐 𖼹𖽶 𖼈𖽺𖾐 𖼖𖽪𖾐 𖼊𖽑𖽺 𖼊𖽑𖽪，𖼖𖽦 𖼀𖽑𖽦𖾐 𖼄𖽔 𖼮𖽑𖽡𖽺𖾐 𖼀𖽑𖽚𖾐 𖼞𖽚 𖼖𖽻𖾐 𖼺𖽺𖾑，𖽃𖽦𖾑 𖼖𖽪𖾐 𖼞𖽳𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼰𖽶𖾐 𖼮𖽑𖽡𖾐． 27 𖼦𖽑𖽻𖾐 𖼊𖽑𖽻𖾐，𖼖𖽪𖾐 𖼞𖽑𖽶𖾐 𖼮𖽻𖾐 𖼺𖽪𖾐 𖼮𖽡𖽺 𖼐𖽺𖾐 𖼄𖽡𖽻 𖼐𖽑𖽡 𖼞𖽑𖽙𖾐 𖼣𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽺𖾐 𖼦𖽴 𖼦𖽫 𖼽𖽱𖾐 𖼳𖽪𖾐 𖼽𖽕𖾑 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐，𖼈𖽺𖾐 𖼽𖽻 𖼄𖽳𖾑 𖼞𖽳𖾐 𖼄𖽡𖽻 𖼐𖽑𖽡 𖼂𖽺𖾐 𖼦𖽑𖽙𖾐． 28 𖼽𖽱𖾐 𖼳𖽪𖾐 𖼽𖽕𖾑 𖽃𖽦𖾑 𖼖𖽪𖾐 𖼊𖽑𖽺 𖼮𖽑𖽡𖽪𖾐 𖼦𖽑𖽙𖾐，𖼖𖽪𖾐 𖼞𖽜 𖼺𖽺𖾑 𖼻𖽳𖾐 𖼹𖽦𖾐 𖼄𖽡𖾐 𖼮𖽡𖽦𖾐 𖼀𖽑𖽢 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐．
29 𖼽𖽻 𖼦𖽑𖽔𖾐 𖼖𖽺𖾑 𖽃𖽦𖾑 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼈𖽺𖾐 𖼺𖽧𖾐 𖼷𖽡𖾐 𖼊𖽑𖽺 𖼠𖽕𖾑 𖼺𖽺𖾑，𖼄𖽶 𖼮𖽑𖽧 𖼖𖽙𖾐 𖼮𖽑𖽡𖾐．𖽃𖽔𖾑 𖼄𖽶 𖼐𖽑𖽡𖾐 𖼞𖽶𖾐 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼽𖽱𖾐 𖼳𖽪𖾐 𖼽𖽕𖾑 𖼷𖽑𖽻𖾐 𖼹𖽡𖾐 𖼺𖽺𖾑 𖼺𖽧𖾐 𖼷𖽡𖾐 𖼊𖽑𖽺 𖼮𖽑𖽻𖾐 𖼷𖽑𖽻𖾐 𖼄𖽻𖾐 𖼈𖽺𖾐 𖼹𖽺𖾐 𖼖𖽻𖾐，𖼷𖽴𖾐 𖼖𖽪𖾐 𖽃𖽔𖾑 𖼊𖽪 𖼞𖽳𖾐 𖼞𖽑𖽶𖾑 𖼠𖽻𖾐 𖼍𖽙𖾑，𖼹𖽦𖾑 𖼷𖽑𖽻𖾐 𖼄𖽻𖾐 𖼊𖽑𖽺 𖼖𖽚𖾐 𖼄𖽙𖾐 𖼊𖽑𖽡 𖼂𖽜𖾐 𖼂𖽜𖾐 𖼍𖽪𖾐，𖼖𖽚𖾐 𖼄𖽙𖾐 𖼦𖽑𖽺𖾑 𖼂𖽜𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼮𖽻𖾐 𖼍𖽳𖾐 𖼺𖽺．
𖼽𖽡 𖼂𖽔𖾐 𖼖𖽪𖾑 𖽂𖽙 𖼰𖽡𖽺𖾐 𖼊𖽑𖽺 𖼍𖽡𖾐 𖼷𖽻𖾐 𖼷𖽑𖽧𖾐 𖼳𖽪𖾐 𖼮𖽨𖾐 𖼺𖽪𖾑 𖼷𖽻𖾐
30 𖼞𖽑𖽶𖾑 𖼮𖽶𖾐，𖼽𖽱𖾐 𖼳𖽪𖾐 𖼽𖽕𖾑 𖼽𖽡 𖼂𖽔𖾐 𖼖𖽪𖾑 𖽂𖽙 𖼰𖽡𖽺𖾐 𖼊𖽑𖽺 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐． 31 𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽜𖾐 𖼀𖽑𖽙 𖼄𖽚 𖼳𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼖𖽙𖾐 𖼮𖽑𖽻𖾐 𖼳𖽶 𖼣𖽻𖾐，𖼽𖽻 𖼈𖽳𖾐 𖼄𖽚 𖼳𖽡𖾐 𖼳𖽪𖾐 𖼮𖽨𖾐 𖼺𖽪𖾑 𖼊𖽑𖽺 𖼞𖽑𖽙𖾐 𖼈𖽝 𖼖𖽙𖾐 𖼮𖽑𖽻𖾐 𖼺𖽺𖾑 ，𖼦𖽜𖾐 𖼻𖽜 𖼊𖽝 𖼄𖽔 𖼠𖽚 𖼺𖽪𖾐 𖼖𖽚𖾐 𖼄𖽙𖾐 𖼈𖽺𖾐 𖼍𖽡𖾐 𖼷𖽻𖾐 𖼷𖽑𖽧𖾐．𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼍𖽡𖾐 𖼷𖽻𖾐 𖼊𖽑𖽺 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜，𖼦𖽑𖽔𖾐 𖼖𖽺𖾑 𖼺𖽙𖾑 𖼺𖽙𖾐 𖼍𖽡𖾐 𖼮𖽡𖽺𖾐𖼂𖽺𖾐． 32 𖼽𖽱𖾐 𖼳𖽪𖾐 𖼽𖽕𖾑 𖼞𖽑𖽶𖾑 𖼠𖽻𖾐 𖼮𖽻𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖽃𖽙𖾑 𖼄𖽺 𖼮𖽑𖽡𖽺 𖼄𖽚 𖼳𖽡𖾐 𖼞𖽳𖾐 𖼳𖽪𖾐 𖼮𖽨𖾐 𖼺𖽪𖾑 𖼈𖽝 𖼖𖽚𖾐 𖼄𖽙𖾐 𖼊𖽑𖽺 𖼍𖽦𖾐．
33 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼮𖽳 𖼄𖽻、 𖼈𖽪𖾑 𖼷𖽪𖾐 𖼐𖽺𖾐 𖼄𖽡𖽻𖼦𖽑𖽺 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼐𖽑𖽡 𖼀𖽳 𖼦𖽑𖽡𖽚，𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼊𖽑𖽺 𖼈𖽦𖾑 𖼺𖽪𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼍𖽡𖾐 𖼄𖽻 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐．𖼣𖽙𖾑 𖼮𖽻𖾐 𖼺𖽪𖾐 𖼷𖽑𖽻𖾐 𖼣𖽻𖾐 𖼦𖽻，𖼦𖽑𖽺𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼣𖽻𖾐 𖼦𖽻，𖼊𖽑𖽡 𖼀𖽑𖽦𖾐 𖼮𖽑𖽻 𖼄𖽦𖾐 𖼰𖽻𖾐 𖼰𖽡𖾐 𖼖𖽡𖾑 𖼳𖽡𖽺𖾐 𖽂𖽙 𖼰𖽡𖽺𖾐 𖼀𖽳 𖼠𖽚，𖼊𖽑𖽡 𖼀𖽑𖽦𖾐 𖼮𖽑𖽻 𖼄𖽦𖾐 𖼰𖽻𖾐 𖼽𖽡 𖼂𖽔𖾐 𖼖𖽪𖾑 𖽂𖽙 𖼰𖽡𖽺𖾐 𖼀𖽳 𖼠𖽚．𖼽𖽻 𖼈𖽳𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽜𖾐 𖼀𖽑𖽙 𖼄𖽚 𖼳𖽡𖾐 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼺𖽺𖾑，𖼄𖽢 𖼀𖽜𖾐 𖼦𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖼞𖽜．
34 𖽃𖽔𖾐 𖼺𖽺𖾑， 𖼽𖽱𖾐 𖼳𖽪𖾐 𖼽𖽕𖾑 𖼳𖽪𖾐 𖼮𖽨𖾐 𖼺𖽪𖾑 𖼊𖽑𖽺 𖼞𖽑𖽙𖾐 𖼈𖽝 𖼺𖽪𖾐 𖼄𖽢 𖼖𖽪 𖼊𖽻 𖼮𖽑𖽡𖽺 𖼐𖽺𖾐 𖼮𖽙 𖼰𖽪𖾑 𖼊𖽻 𖼮𖽑𖽡𖽺 𖼷𖽻𖾐，𖼄𖽳𖾑 𖼄𖽳 𖼊𖽑𖽡 𖼂𖽦𖾑 𖼷𖽻𖾐 𖼦𖽑𖽻𖾐，𖼦𖽑𖽺𖾑 𖼄𖽳𖾑 𖼄𖽳 𖼳𖽪𖾐 𖼮𖽨𖾐 𖼺𖽪𖾐 𖼊𖽑𖽺 𖼞𖽑𖽙𖾐 𖼈𖽝 𖼺𖽪𖾐 𖼖𖽙𖾐 𖼮𖽑𖽻𖾐 𖼳𖽶 𖼣𖽻𖾐． 35 𖼄𖽚 𖼳𖽡𖾐 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼊𖽻 𖼂𖽪𖾑， 𖼽𖽱𖾐 𖼳𖽪𖾐 𖼽𖽕𖾑 𖼷𖽻𖾐 𖼺𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐、 𖼻𖽙 𖼄𖽳 𖼄𖽡𖾐 𖼐𖽜𖾐 𖼐𖽺𖾐 𖽃𖽔𖾐 𖼞𖽶𖾑，𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼣𖽙𖾑 𖼮𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽨𖾐，𖼄𖽔 𖼷𖽻𖾐 𖼊𖽑𖽧 𖼖𖽻𖾐 𖼺𖽪𖾐 𖼊𖽑𖽡 𖼮𖽑𖽡𖽺 𖼖𖽺𖾑 𖼄𖽔 𖼮𖽻𖾐．