𖼈𖽪𖾐 𖼍𖽦 𖼣𖽙 𖼽𖽚𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼺𖽺𖾑 𖼰𖽡𖾐 𖼂𖽡𖽦𖾑 𖼖𖽪𖾐 𖼊𖽑𖽺 𖼊𖽝
10
1 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼽𖽕𖾑 𖼍𖽙𖾐 𖼐𖽑𖽧 𖼳𖽡 𖼍𖽴 𖼊𖽻 𖼮𖽨，𖼽𖽱𖾐 𖼳𖽪𖾐 𖼽𖽕𖾑 𖽃𖽦𖾑 𖼖𖽪𖾐 𖼊𖽑𖽺 𖼐𖽻𖾑 𖽂𖽙𖾐，𖼦𖽑𖽔𖾐 𖼖𖽺𖾑 𖼖𖽪𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼦𖽑𖽻𖾐．𖼽𖽱𖾐 𖼳𖽪𖾐 𖼽𖽕𖾑 𖽃𖽔 𖼊𖽺𖾐 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼐𖽺𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐，𖽃𖽦𖾑 𖼖𖽪𖾐 𖼐𖽺𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼖𖽺𖾑 𖼞𖽑𖽶𖾑 𖼖𖽙𖾐 𖼺𖽶𖾑 𖼄𖽳 𖼮𖽡𖽦 𖼦𖽑𖽙𖾐．𖼽𖽕𖾑 𖼍𖽙𖾐 𖼐𖽑𖽧 𖼳𖽡 𖼍𖽴 𖼈𖽪𖾐 𖼍𖽦 𖼦𖽑𖽔𖾐 𖼖𖽺𖾑 𖼊𖽻 𖼮𖽨 𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼞𖽙𖾐 𖼮𖽑𖽻 𖼊𖽑𖽪 𖼦𖽑𖽻𖾐，𖼹𖽦𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖽂𖽙𖾐 𖼮𖽻𖾐 𖼊𖽙𖾐． 2 𖽃𖽔𖾐 𖼺𖽺𖾑，𖼽𖽺𖾐 𖼖𖽪𖾑 𖼺𖽔 𖼖𖽜 𖼺𖽪𖾐 𖼷𖽑𖽻𖾐 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼞𖽴𖾐．𖼞𖽪𖾐 𖼮𖽡𖽺𖾐，𖼰𖽡𖾐 𖼂𖽡𖽦𖾑 𖼖𖽪𖾐 𖼞𖽑𖽶𖾑 𖼖𖽪𖾐 𖼈𖽳 𖼄𖽙𖾐 𖼣𖽻𖾐，𖼈𖽪𖾐 𖼍𖽦 𖼮𖽻𖾐 𖼞𖽳𖾐 𖼖𖽪𖾐 𖼖𖽙𖾐 𖼺𖽶𖾑，𖼦𖽑𖽔𖾐 𖼖𖽺𖾑 𖽃𖽦𖾑 𖼖𖽪𖾐 𖼖𖽺𖾐 𖼄𖽔 𖼷𖽑𖽶𖾐，𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼞𖽑𖽙𖾐 𖼣𖽻𖾐 𖼖𖽺𖾑 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼣𖽻𖾐．3 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼽𖽕𖾑 𖼍𖽙𖾐 𖼐𖽑𖽧 𖼳𖽡 𖼍𖽴 ，𖼷𖽑𖽻𖾐 𖼹𖽡𖾐 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼦𖽴 𖼳𖽡𖽦、 𖼽𖽺𖾐 𖼄𖽚𖾑 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼀𖽑𖽧 𖼖𖽕、 𖼖𖽔𖾐 𖼰𖽧 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼽𖽔 𖼇𖽺𖾐 𖼽𖽕𖾑 𖼐𖽺𖾐 𖼽𖽡𖾐 𖼰𖽡𖾐 𖼖𖽪𖽦 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼍𖽡 𖼂𖽧𖾑 𖼞𖽳𖾐 𖼽𖽡𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐：
4 “𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼊𖽦𖾐 𖼖𖽻𖾐 𖼣𖽙𖾐 𖼊𖽑𖽺 𖼂𖽻𖾐 𖼮𖽨𖾐 ，𖽃𖽔 𖼐𖽺𖾑 𖼽𖽡𖾐 𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼽𖽡𖾐，𖼞𖽪𖾐 𖼮𖽡𖽺𖾐 𖼰𖽡𖾐 𖼂𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽑𖽻𖾑 𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼞𖽙𖾐 𖼮𖽑𖽻 𖼊𖽑𖽪 𖼦𖽑𖽻𖾐．” 5 𖽃𖽔𖾐 𖼺𖽺𖾑，𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼣𖽙 𖼽𖽚𖾐，𖼞𖽑𖽶𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼈𖽪𖾐 𖼍𖽦、 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼈𖽪𖾐 𖼍𖽦、 𖼽𖽺𖾐 𖼄𖽚𖾑 𖼖𖽪𖾐 𖼞𖽳𖾐 𖼈𖽪𖾐 𖼍𖽦、 𖼖𖽔𖾐 𖼰𖽧 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼐𖽺𖾐 𖼽𖽡𖾐 𖼰𖽡𖾐 𖼖𖽪𖽦 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼣𖽻𖾐．𖼽𖽻 𖼈𖽳𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼍𖽪𖾐 𖼖𖽻𖾐，𖼄𖽦 𖼀𖽑𖽙 𖼄𖽳𖾑 𖼄𖽳 𖼊𖽑𖽺 𖼦𖽳 𖼺𖽺𖾑，𖼊𖽦𖾐 𖼽𖽡𖾐 𖼰𖽡𖾐 𖼂𖽡𖽦𖾑 𖼖𖽪𖾐 𖽃𖽙𖾑 𖼄𖽺 𖼀𖽳 𖼞𖽳𖾐 𖼮𖽻𖾐，𖼰𖽡𖾐 𖼂𖽡𖽦𖾑 𖼖𖽪𖾐 𖼊𖽑𖽺 𖼊𖽝 𖼊𖽻𖾐．
𖼽𖽱𖾐 𖼳𖽪𖾐 𖼽𖽕𖾑 𖼈𖽪𖾐 𖼍𖽦 𖼣𖽙 𖼽𖽚𖾐 𖼊𖽑𖽺 𖼊𖽝 𖽂𖽙 𖼊𖽙𖾐
6 𖼰𖽡𖾐 𖼂𖽡𖽦𖾑 𖼺𖽪𖾐 𖼹𖽡𖾐 𖼖𖽦 𖼹𖽡𖾐 𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼽𖽱𖾐 𖼳𖽪𖾐 𖼽𖽕𖾑 𖼮𖽻𖾐 𖼞𖽳𖾐 𖼽𖽡𖾐，𖼀𖽦𖾐：“𖼐𖽑𖽡𖾐 𖼮𖽜𖾐 𖼀𖽑𖽙 𖼊𖽑𖽺 𖼊𖽑𖽔 𖼷𖽴𖾐 𖼦𖽑𖽙𖾐 𖼞𖽜，𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼐𖽕 𖼐𖽕𖾐 𖼣𖽙𖾐 𖼈𖽳𖾐 𖼮𖽻𖾐 𖼞𖽳𖾐 𖼊𖽦𖾐 𖼖𖽻𖾐 𖼺𖽺𖾑 𖼣𖽙𖾐 𖼈𖽳𖾐 𖼊𖽑𖽺 𖼰𖽨𖾑 𖼞𖽜、 𖼣𖽙𖾐 𖼈𖽳𖾐 𖼊𖽑𖽺 𖼂𖽻𖾐 𖼮𖽨𖾐 𖼞𖽜．𖼞𖽪𖾐 𖼮𖽡𖽺𖾐，𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐 𖼺𖽪𖾐 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦，𖼄𖽳𖾑 𖼄𖽳 𖼷𖽙𖾐 𖼖𖽙𖾐 𖼮𖽑𖽻𖾐 𖼍𖽪𖾐 𖼖𖽻𖾐 𖼣𖽙𖾐 𖼈𖽳𖾐 𖼊𖽑𖽺 𖼊𖽝 𖼊𖽦 𖼊𖽻𖾐．” 7 𖽃𖽔𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼰𖽕𖾑 𖼞𖽑𖽙𖾐 𖼊𖽝 𖼀𖽑𖽢 𖼊𖽙𖾐 𖼺𖽪𖾐 𖼷𖽑𖽻𖾐，𖼦𖽑𖽔𖾐 𖼖𖽺𖾑 𖽂𖽙 𖼐𖽑𖽡𖾐 𖼐𖽑𖽧𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙， 𖼊𖽑𖽡 𖼊𖽑𖽜 𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼮𖽑𖽻𖾐 𖼰𖽡𖾐 𖼂𖽡𖽦𖾑 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐． 8 𖼽𖽺𖾐 𖼦𖽴 𖼦𖽫 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐： “𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼮𖽡𖽮𖾐 𖼄𖽔 𖼻𖽻𖾐! 𖼞𖽪𖾐 𖼮𖽡𖽺𖾐，𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖼰𖽡𖽻𖾐 𖼺𖽺𖾑 𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼦𖽑𖽻𖾐，𖼽𖽻 𖼈𖽳𖾐 𖼊𖽑𖽡 𖼽𖽚𖾐 𖼖𖽺𖾑 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽡𖽚 𖼻𖽺𖾐 𖼄𖽔 𖼊𖽙𖾐 𖼊𖽻𖾐．”
9 𖽃𖽔𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼄𖽶 𖼮𖽑𖽧 𖼞𖽑𖽶𖾐 𖼹𖽦𖾐 𖼄𖽦 𖼀𖽑𖽙 𖼦𖽳 𖼺𖽺𖾑，𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼮𖽑𖽻𖾐 𖼺𖽜 𖼍𖽪𖾐，𖼐𖽕 𖼊𖽺𖾐 𖼖𖽻𖾐 𖼰𖽕𖾑 𖼊𖽝 𖼞𖽳𖾐 𖼞𖽑𖽻𖾑 𖼮𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼊𖽝 𖼊𖽦． 10 𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼞𖽜 𖼺𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼠𖽻𖾐 𖼄𖽺 𖼮𖽡𖽮𖾐 𖼞𖽴𖾐，𖼽𖽱𖾐 𖼳𖽪𖾐 𖼽𖽕𖾑 𖼰𖽡𖾐 𖼂𖽡𖽦𖾑 𖼄𖽡𖾐 𖼊𖽺𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼺𖽦，𖼂𖽚 𖼦𖽴 𖼖𖽪𖽦 𖼖𖽪𖾐 𖼞𖽳𖾐 𖼍𖽦𖾐 𖼀𖽙 𖼞𖽑𖽶𖾑 𖼠𖽻𖾐 𖼽𖽻 𖼈𖽳𖾐 𖼊𖽑𖽺 𖼞𖽕，𖼽𖽻 𖼈𖽳𖾐 𖼊𖽑𖽺 𖼊𖽝 𖼺𖽺𖾑，𖼽𖽕𖾑 𖼳𖽡𖾐 𖼰𖽡𖽔𖾐 𖼖𖽪𖾐 𖼐𖽺𖾐 𖼄𖽔 𖼰𖽡𖾐 𖼍𖽕𖾑 𖼖𖽪𖾐 𖼞𖽳𖾐 𖼮𖽑𖽡𖾐． 11 𖼽𖽻 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡𖽪 𖼀𖽑𖽻𖾐，𖼂𖽚 𖼦𖽴 𖼖𖽪𖽦 𖼖𖽪𖾐 𖼞𖽳𖾐 𖼍𖽡𖾑 𖼀𖽙 𖼹𖽺𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖽂𖽙 𖼖𖽚𖾐 𖼮𖽨𖾐 𖼹𖽺𖾐 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼊𖽝 𖼺𖽺𖾑，𖼽𖽕𖾑 𖼳𖽡𖾐 𖼰𖽡𖽔𖾐 𖼖𖽪𖾐 𖼞𖽳𖾐 𖼮𖽑𖽡𖾐，𖼽𖽻 𖼈𖽳𖾐 𖼊𖽑𖽺 𖼊𖽝 𖼳𖽶𖾐 𖼦𖽑𖽙𖾐．𖼽𖽻 𖼈𖽳𖾐 𖼊𖽑𖽺 𖽂𖽙 𖼖𖽚𖾐 𖼮𖽑𖽢𖾑 𖼊𖽝 𖼳𖽶𖾐 𖼺𖽪𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽑𖽢𖾑 𖽃𖽔𖾑 𖼊𖽑𖽙 𖼻𖽜 𖼺𖽦 𖼳𖽶𖾐 𖼺𖽪𖾐 𖼄𖽨𖾐 𖼄𖽔 𖼷𖽑𖽶𖾐．
𖽃𖽔𖾑 𖼄𖽶 𖼐𖽑𖽡𖾐 𖼐𖽺𖾐 𖼳𖽨𖾐 𖼀𖽙𖾐 𖼐𖽙 𖼹𖽺𖾐
12 𖼽𖽺𖾐 𖼦𖽴 𖼦𖽫 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼰𖽡𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽜 𖼞𖽑𖽶𖾑 𖼮𖽶𖾐，𖼽𖽱𖾐 𖼳𖽪𖾐 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐，𖼀𖽦𖾐：
“𖽂𖽙 𖼺𖽙𖾐 𖼂𖽙𖾐 𖽃𖽔𖾐! 𖽃𖽔𖾑 𖼄𖽶 𖼐𖽑𖽡𖾐 𖼞𖽜 𖼰𖽡𖾐 𖼂𖽡𖽦𖾑 𖼖𖽪𖾐 𖼞𖽕 𖼂𖽻𖾑 𖼐𖽙!
𖼳𖽨𖾐 𖼀𖽙𖾐 𖼞𖽜 𖼽𖽕𖾑 𖼽𖽔 𖼖𖽪𖽦 𖼖𖽻𖾐 𖼞𖽑𖽪 𖼞𖽕 𖼂𖽻𖾑 𖼐𖽙!”
13 𖽃𖽔𖾐 𖼺𖽺𖾑，𖽃𖽔𖾑 𖼄𖽶 𖼐𖽑𖽡𖾐 𖼐𖽺𖾐 𖼳𖽨𖾐 𖼀𖽙𖾐 𖼞𖽜 𖼄𖽔 𖼺𖽜 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽡𖾐 𖼂𖽦𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼰𖽶𖾐 𖼮𖽑𖽡𖾐．𖼄𖽡𖽻 𖼦𖽑𖽺𖾑 𖼈𖽝 𖼺𖽺𖾑《𖼽𖽔 𖼳𖽕𖾑 𖽃𖽳 𖼺𖽪𖾑》𖼊𖽑𖽺 𖼍𖽦𖾐 𖼍𖽳𖾐 𖼄𖽔 𖼣𖽻𖾐 𖼖𖽔？ 𖽃𖽔𖾑 𖼄𖽶 𖼐𖽑𖽡𖾐 𖼄𖽶 𖼠𖽻𖾐 𖼊𖽑𖽺 𖼐𖽙 𖼄𖽔 𖼖𖽻𖾑 𖼹𖽺𖾐 𖼽𖽡𖾐 𖼺𖽺𖾑，𖽃𖽔 𖼖𖽙𖾐 𖼊𖽑𖽡 𖼐𖽑𖽡𖾐 𖼖𖽚 𖼦𖽑𖽙𖾐． 14 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼞𖽳𖾐 𖽃𖽙𖾑 𖼄𖽺 𖼊𖽑𖽙 𖼣𖽻𖾐 𖼦𖽻，𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼞𖽳𖾐 𖼠𖽙𖾑 𖼍𖽻𖾐 𖼐𖽑𖽡𖾐 𖼦𖽑𖽦 𖼣𖽻𖾐 𖼦𖽻，𖼽𖽺𖾐 𖼦𖽴 𖼦𖽫 𖼷𖽑𖽻𖾐 𖼞𖽳𖾐 𖼮𖽑𖽡 𖼮𖽡𖽺𖾐 𖼊𖽑𖽺 𖼊𖽻 𖼞𖽑𖽚 𖼺𖽪𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼮𖽻𖾐 𖼄𖽔 𖼠𖽚．𖼞𖽪𖾐 𖼮𖽡𖽺𖾐，𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖼰𖽕𖾑 𖼊𖽝．
15 𖼰𖽕𖾑 𖼊𖽝 𖼦𖽑𖽻𖾐 𖼠𖽙𖾑 𖼍𖽻𖾐，𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼰𖽕𖾑 𖼊𖽝 𖼖𖽦 𖼠𖽸𖾑 𖼀𖽑𖽚𖾐 𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼞𖽚 𖼽𖽡𖾐 𖼦𖽑𖽙𖾐．
𖼈𖽪𖾐 𖼍𖽦 𖼣𖽙 𖼽𖽚𖾐 𖼊𖽑𖽺 𖼺𖽦 𖼦𖽑𖽙𖾐
16 𖼰𖽕𖾑 𖼊𖽝 𖼞𖽑𖽶𖾑 𖼮𖽶𖾐 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼞𖽑𖽶𖾑 𖼣𖽙 𖼽𖽚𖾐 𖼮𖽡𖽪 𖼀𖽑𖽻𖾐 𖼺𖽺𖾑，𖼄𖽔 𖼰𖽡𖾐 𖼍𖽕𖾑 𖼖𖽪𖾐 𖼞𖽳𖾐 𖼈𖽦𖾑 𖼳𖽡𖽪𖾐 𖼞𖽑𖽶𖾐 𖼈𖽜．
17 𖼷𖽑𖽻𖾐 𖼽𖽱𖾐 𖼳𖽪𖾐 𖼽𖽕𖾑 𖼊𖽑𖽺 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐： “𖼈𖽪𖾐 𖼍𖽦 𖼞𖽑𖽶𖾑 𖼣𖽙 𖼽𖽚𖾐 𖼊𖽑𖽺 𖼰𖽙𖾐 𖽂𖽙𖾐 𖼦𖽑𖽻𖾐，𖼄𖽳𖾑 𖼄𖽳 𖼄𖽔 𖼰𖽡𖾐 𖼍𖽕𖾑 𖼖𖽪𖾐 𖼞𖽳𖾐 𖼈𖽦𖾑 𖼳𖽡𖽪𖾐 𖼞𖽑𖽶𖾐 𖼀𖽑𖽻𖾐 𖼈𖽜 𖼍𖽳𖾐． 18 𖼽𖽱𖾐 𖼳𖽪𖾐 𖼽𖽕𖾑 𖼀𖽦𖾐： “𖼐𖽑𖽡𖾐 𖼈𖽳𖾐 𖼖𖽚𖾐 𖼄𖽙𖾐 𖼈𖽳 𖼺𖽪𖾐 𖼊𖽑𖽡 𖼹𖽻𖾐 𖼖𖽜𖾐 𖼺𖽺𖾑 𖼈𖽦𖾑 𖼳𖽡𖽪𖾐 𖼮𖽑𖽡𖽺 𖼷𖽑𖽶 𖼍𖽡，𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼹𖽡𖾐 𖼈𖽦𖾑 𖼳𖽡𖽪𖾐 𖼮𖽑𖽡𖽺 𖼽𖽡𖾐 𖼽𖽻 𖼈𖽳 𖼊𖽑𖽺 𖼳𖽪𖾐 𖼍𖽡． 19 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼦𖽑𖽡𖽚 𖼍𖽳𖾐 𖼄𖽔 𖼊𖽙𖾐，𖼮𖽡𖾐 𖼂𖽦𖾐 𖼊𖽑𖽺 𖼞𖽕 𖼽𖽡𖾐 𖼖𖽡𖾐，𖼠𖽙𖾑 𖼍𖽻𖾐 𖼀𖽳 𖼮𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼺𖽦 𖼦𖽑𖽙𖾐，𖼽𖽻 𖼈𖽳𖾐 𖼞𖽜 𖼮𖽡𖽪 𖼽𖽻 𖼄𖽳𖾑 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐 𖼄𖽔 𖼊𖽙𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼊𖽑𖽺 𖼰𖽡𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼦𖽑𖽻𖾐．”
20 𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼺𖽺𖾑，𖼽𖽻 𖼈𖽳𖾐 𖼄𖽳𖾑 𖼄𖽳 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼰𖽶𖾐 𖼮𖽑𖽡𖾐．𖼷𖽑𖽻𖾐 𖼊𖽑𖽡 𖼹𖽻𖾐 𖼍𖽺𖾑 𖽂𖽙𖾐 𖼮𖽡𖽪 𖼊𖽜𖾑，𖼽𖽻 𖼈𖽳𖾐 𖼀𖽑𖽻𖾐 𖼺𖽺𖾑 𖼖𖽪𖾐 𖼰𖽻𖾐 𖼻𖽺𖾑 𖼻𖽺𖾐 𖼊𖽴𖾐 𖼍𖽙𖾑 𖼺𖽪𖾐 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐． 21 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼄𖽳𖾑 𖼄𖽳 𖼺𖽙𖾑 𖼺𖽙𖾐 𖼀𖽑𖽚𖾐 𖼺𖽺𖾑，𖼄𖽔 𖼰𖽡𖾐 𖼍𖽕𖾑 𖼖𖽪𖾐 𖼞𖽳𖾐 𖼽𖽱𖾐 𖼳𖽪𖾐 𖼽𖽕𖾑 𖼮𖽻𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼞𖽚 𖼽𖽡𖾐．𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼽𖽡𖾐 𖼖𖽡𖾐 𖼀𖽦𖾐 𖼂𖽡𖾑 𖼺𖽪𖾐 𖼄𖽔 𖼮𖽻𖾐．
22 𖼽𖽱𖾐 𖼳𖽪𖾐 𖼽𖽕𖾑 𖼀𖽦𖾐：“𖼐𖽑𖽡𖾐 𖼈𖽳𖾐 𖼈𖽦𖾑 𖼳𖽡𖽪𖾐 𖼮𖽑𖽡𖽺 𖼷𖽑𖽶 𖼺𖽪𖾐 𖼖𖽚𖾐 𖼄𖽙𖾐 𖼖𖽜𖾐 𖼦𖽑𖽙𖾐，𖼈𖽪𖾐 𖼍𖽦 𖼞𖽑𖽶𖾑 𖼣𖽙 𖼽𖽚𖾐 𖼊𖽑𖽺 𖼳𖽡𖽺𖾐 𖼊𖽑𖽧 𖼖𖽻𖾐，𖼦𖽳 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐!” 23 𖽃𖽔𖾐 𖼺𖽺𖾑，𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼽𖽻 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼈𖽪𖾐 𖼍𖽦、 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼈𖽪𖾐 𖼍𖽦、 𖼽𖽺𖾐 𖼄𖽚𖾑 𖼖𖽪𖾐 𖼞𖽳𖾐 𖼈𖽪𖾐 𖼍𖽦、 𖼖𖽔𖾐 𖼰𖽧 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼐𖽺𖾐 𖼽𖽡𖾐 𖼰𖽡𖾐 𖼖𖽪𖽦 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼞𖽑𖽶𖾑 𖼣𖽙 𖼽𖽚𖾐 𖼊𖽑𖽺 𖼈𖽦𖾑 𖼳𖽡𖽪𖾐 𖼞𖽑𖽶𖾐 𖼮𖽑𖽻𖾐 𖼳𖽡𖽺𖾐 𖼊𖽑𖽧 𖼖𖽻𖾐，𖼦𖽳 𖼽𖽱𖾐 𖼳𖽪𖾐 𖼽𖽕𖾑 𖼞𖽳𖾐 𖼖𖽻𖾐． 24 𖼷𖽑𖽻𖾐 𖼷𖽪𖾐 𖼈𖽪𖾐 𖼍𖽦 𖼞𖽑𖽶𖾑 𖼣𖽙 𖼽𖽚𖾐 𖼊𖽑𖽺 𖼦𖽳 𖼽𖽱𖾐 𖼳𖽪𖾐 𖼽𖽕𖾑 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼽𖽱𖾐 𖼳𖽪𖾐 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐 𖼺𖽺𖾑，𖼽𖽻 𖼖𖽙𖾐 𖼮𖽑𖽻𖾐 𖼽𖽡𖾐 𖼰𖽕𖾑 𖼊𖽝 𖼺𖽪𖾐 𖼄𖽦 𖼈𖽪𖾑 𖼷𖽪𖾐 𖼞𖽑𖽶𖾑 𖼹𖽻𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼖𖽻𖾐! 𖼮𖽑𖽡𖾐 𖼈𖽶 𖼮𖽑𖽳 𖼺𖽺𖾑 𖼈𖽪𖾐 𖼍𖽦 𖼦𖽑𖽺𖾑 𖼹𖽻𖾐 𖼖𖽺𖾐 𖼀𖽺 𖼊𖽑𖽺 𖼐𖽑𖽕𖾐．” 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼺𖽜 𖼐𖽳 𖼖𖽻𖾐，𖼮𖽑𖽡𖾐 𖼈𖽶 𖼮𖽑𖽳 𖼺𖽺𖾑 𖼈𖽪𖾐 𖼍𖽦 𖼞𖽑𖽶𖾑 𖼣𖽙 𖼽𖽚𖾐 𖼖𖽺𖾐 𖼀𖽺 𖼊𖽑𖽺 𖼐𖽑𖽕𖾐．
25 𖼽𖽱𖾐 𖼳𖽪𖾐 𖼽𖽕𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽑𖽔 𖼮𖽡𖽮𖾐，𖼊𖽑𖽔 𖼠𖽻𖾐 𖼄𖽺，𖼐𖽑𖽧𖾐 𖼈𖽳 𖼐𖽑𖽧𖾐 𖼻𖽺𖾐 𖼮𖽻𖾐 𖼖𖽡𖾐! 𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼊𖽝 𖼊𖽦 𖼊𖽻𖾐 𖼺𖽪𖾐 𖼮𖽡𖾐 𖼂𖽦𖾐 𖼊𖽑𖽺 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼂𖽺𖾐 𖼊𖽻𖾐．” 26 𖼠𖽙𖾑 𖼍𖽻𖾐，𖼽𖽱𖾐 𖼳𖽪𖾐 𖼽𖽕𖾑 𖼈𖽪𖾐 𖼍𖽦 𖼞𖽑𖽶𖾑 𖼣𖽙 𖼽𖽚𖾐 𖼊𖽑𖽺 𖼺𖽦 𖼦𖽑𖽙𖾐，𖼈𖽺𖾐 𖼺𖽧𖾐 𖼷𖽡𖾐 𖼣𖽙 𖼷𖽡𖾐 𖼊𖽑𖽺 𖼠𖽕𖾑，𖼽𖽻 𖼈𖽳𖾐 𖼊𖽑𖽺 𖼈𖽺𖾐 𖼺𖽧𖾐 𖼷𖽡𖾐 𖼊𖽑𖽺 𖼠𖽕𖾑 𖼺𖽺𖾑，𖼄𖽶 𖼮𖽑𖽧 𖼖𖽙𖾐 𖼮𖽑𖽡𖾐．
27 𖽃𖽔𖾑 𖼄𖽶 𖼐𖽑𖽡𖾐 𖼞𖽶𖾐 𖼹𖽺𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼽𖽱𖾐 𖼳𖽪𖾐 𖼽𖽕𖾑 𖼷𖽑𖽻𖾐 𖼹𖽡𖾐 𖼺𖽧𖾐 𖼷𖽡𖾐 𖼊𖽑𖽺 𖼮𖽑𖽻𖾐 𖼷𖽑𖽻𖾐 𖼄𖽻𖾐 𖼈𖽺𖾐 𖼹𖽺𖾐 𖼖𖽻𖾐，𖼦𖽑𖽻 𖼽𖽻 𖼈𖽳𖾐 𖼀𖽑𖽻𖾐 𖼈𖽜 𖼠𖽚 𖼺𖽪𖾐 𖼈𖽦𖾑 𖼳𖽡𖽪𖾐 𖼞𖽑𖽶𖾐 𖼰𖽡𖽺𖾐，𖼖𖽚𖾐 𖼄𖽙𖾐 𖼈𖽳 𖼺𖽪𖾐 𖼊𖽑𖽡 𖼹𖽻𖾐 𖼖𖽜𖾐 𖼈𖽦𖾑 𖼳𖽡𖽪𖾐 𖼮𖽑𖽡𖽺 𖼷𖽑𖽶 𖼍𖽡，𖼖𖽚𖾐 𖼄𖽙𖾐 𖼞𖽑𖽶𖾑 𖼹𖽻𖾐 𖼞𖽑𖽻𖾑 𖼍𖽙𖾑 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐．
𖼽𖽱𖾐 𖼳𖽪𖾐 𖼽𖽕𖾑 𖼠𖽳𖾐 𖼻𖽸 𖼄𖽡𖾐 𖼀𖽳 𖼖𖽪𖾐 𖼊𖽑𖽺 𖼊𖽝 𖽂𖽙𖾐
28 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽱𖾐 𖼳𖽪𖾐 𖼽𖽕𖾑 𖼄𖽔 𖼰𖽡𖾐 𖼍𖽕𖾑 𖼖𖽪𖾐 𖼊𖽑𖽺 𖼊𖽝 𖽂𖽙𖾐，𖽃𖽔𖾑 𖼊𖽑𖽙 𖼻𖽜 𖼺𖽺𖾑 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼐𖽺𖾐 𖼈𖽪𖾐 𖼍𖽦 𖼊𖽑𖽺 𖼺𖽦 𖼦𖽑𖽙𖾐，𖼄𖽳𖾑 𖼄𖽳 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼦𖽑𖽻𖾐，𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖽂𖽙𖾐 𖼮𖽡𖽪 𖼊𖽜𖾑．𖼽𖽻 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼺𖽦 𖼦𖽑𖽙𖾐 𖼖𖽙𖾐 𖼺𖽶𖾑，𖼄𖽔 𖼰𖽡𖾐 𖼍𖽕𖾑 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼖𖽺𖾑 𖼺𖽦 𖼦𖽑𖽙𖾐． 29 𖼠𖽙𖾑 𖼍𖽻𖾐，𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐，𖼊𖽑𖽡 𖼊𖽑𖽜 𖼄𖽔 𖼰𖽡𖾐 𖼍𖽕𖾑 𖼖𖽪𖾐 𖼞𖽳𖾐 𖼮𖽑𖽻𖾐 𖼖𖽧𖾑 𖼐𖽕 𖼖𖽪𖾐 𖼞𖽳𖾐 𖼽𖽡𖾐，𖼖𖽪𖾐 𖼦𖽑𖽺𖾑 𖼊𖽝𖾐 𖼊𖽑𖽺 𖼊𖽝． 30 𖼽𖽺𖾐 𖼦𖽴 𖼦𖽫 𖼖𖽧𖾑 𖼐𖽕 𖼖𖽪𖾐 𖼐𖽺𖾐 𖼖𖽪𖾐 𖼞𖽳𖾐 𖼈𖽪𖾑 𖼍𖽦 𖼊𖽑𖽺 𖼖𖽺𖾑 𖼰𖽡𖽻𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐，𖼽𖽱𖾐 𖼳𖽪𖾐 𖼽𖽕𖾑 𖽃𖽔𖾑 𖼊𖽑𖽙 𖼻𖽜 𖼺𖽺𖾑，𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼞𖽑𖽙𖾐 𖼣𖽻𖾐 𖼄𖽳𖾑 𖼄𖽳 𖼊𖽑𖽺 𖼺𖽦 𖼦𖽑𖽙𖾐，𖼊𖽑𖽡 𖼽𖽚𖾐 𖼞𖽜 𖼖𖽺𖾑 𖼄𖽔 𖽂𖽙𖾐 𖼮𖽡𖽪 𖼊𖽜𖾑 ．𖼽𖽻 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼺𖽦 𖼦𖽑𖽙𖾐 𖼖𖽙𖾐 𖼺𖽶𖾑，𖼖𖽧𖾑 𖼐𖽕 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼖𖽺𖾑 𖼺𖽦 𖼦𖽑𖽙𖾐．
31 𖼠𖽙𖾑 𖼍𖽻𖾐，𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐，𖼊𖽑𖽡 𖼊𖽑𖽜 𖼖𖽧𖾑 𖼐𖽕 𖼖𖽪𖾐 𖼮𖽑𖽻𖾐 𖼖𖽔𖾐 𖼰𖽧 𖼖𖽪𖾐 𖼞𖽳𖾐 𖼽𖽡𖾐，𖼖𖽔𖾐 𖼰𖽧 𖼖𖽪𖾐 𖼞𖽳𖾐 𖽃𖽙𖾑 𖼄𖽺 𖼀𖽳 𖼮𖽑𖽻𖾐 𖼖𖽪𖾐 𖼦𖽑𖽺𖾑 𖼊𖽑𖽺 𖼊𖽝 𖼊𖽦． 32 𖼽𖽺𖾐 𖼦𖽴 𖼦𖽫 𖼖𖽔𖾐 𖼰𖽧𖾐 𖼖𖽪𖾐 𖼊𖽑𖽺 𖼰𖽡𖽻𖾐 𖼺𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐，𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐 𖼽𖽱𖾐 𖼳𖽪𖾐 𖼽𖽕𖾑 𖼖𖽔𖾐 𖼰𖽧 𖼖𖽪𖾐 𖼊𖽑𖽺 𖼊𖽝 𖽂𖽙𖾐，𖽃𖽔𖾑 𖼊𖽑𖽙 𖼻𖽜 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼺𖽦 𖼦𖽑𖽙𖾐，𖼽𖽻 𖼖𖽧𖾑 𖼐𖽕 𖼖𖽪𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼖𖽙𖾐 𖼺𖽶𖾑，𖼖𖽔𖾐 𖼰𖽧 𖼖𖽪𖾐 𖼊𖽑𖽺 𖼖𖽺𖾑 𖼄𖽳 𖼮𖽡𖽦 𖼦𖽑𖽙𖾐． 33 𖼞𖽑𖽶𖾑 𖼮𖽶𖾐，𖼰𖽡𖾐 𖼺𖽴𖾑 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼦𖽴 𖼖𖽕 𖼖𖽻𖾐 𖼖𖽔𖾐 𖼰𖽧 𖼖𖽪𖾐 𖼞𖽳𖾐 𖼷𖽑𖽻𖾐 𖼊𖽑𖽺 𖼂𖽻𖾐 𖼮𖽨𖾐，𖼽𖽱𖾐 𖼳𖽪𖾐 𖼽𖽕𖾑 𖼽𖽡𖾐 𖼺𖽺𖾑 𖼦𖽴 𖼖𖽕 𖼊𖽑𖽺 𖼐𖽺𖾐 𖼽𖽻 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼺𖽦 𖼦𖽑𖽙𖾐 𖼦𖽑𖽻𖾐，𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼷𖽺𖾐．
34 𖼠𖽙𖾑 𖼍𖽻𖾐，𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐，𖼊𖽑𖽡 𖼊𖽑𖽜 𖼖𖽔𖾐 𖼰𖽧 𖼖𖽪𖾐 𖼞𖽳𖾐 𖼮𖽑𖽻𖾐 𖼽𖽡𖾐 𖼰𖽡𖾐 𖼖𖽪𖽦 𖼖𖽪𖾐 𖼞𖽳𖾐 𖼽𖽡𖾐，𖼽𖽡𖾐 𖼰𖽡𖾐 𖼖𖽪𖽦 𖼖𖽪𖾐 𖼞𖽳𖾐 𖽃𖽙𖾑 𖼄𖽺 𖼀𖽳 𖼮𖽑𖽻𖾐，𖼖𖽪𖾐 𖼦𖽑𖽺𖾑 𖼊𖽑𖽺 𖼊𖽝 𖼊𖽦． 35 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽻 𖼈𖽳𖾐 𖼖𖽪𖾐 𖼦𖽑𖽺𖾑 𖼊𖽝𖾐 𖼊𖽑𖽺 𖼊𖽝 𖽂𖽙𖾐，𖽃𖽔𖾑 𖼊𖽑𖽙 𖼻𖽜 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼺𖽦 𖼦𖽑𖽙𖾐，𖼽𖽱𖾐 𖼳𖽪𖾐 𖼽𖽕𖾑 𖼽𖽻 𖼈𖽳𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐．𖼽𖽻 𖼖𖽔𖾐 𖼰𖽧 𖼖𖽪𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼖𖽙𖾐 𖼺𖽶𖾑，𖼽𖽡𖾐 𖼰𖽡𖾐 𖼖𖽪𖽦 𖼖𖽪𖾐 𖼊𖽑𖽺 𖼖𖽺𖾑 𖼄𖽳 𖼮𖽡𖽦 𖼦𖽑𖽙𖾐． 36 𖼠𖽙𖾑 𖼍𖽻𖾐，𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐，𖼊𖽑𖽡 𖼊𖽑𖽜 𖼽𖽡𖾐 𖼰𖽡𖾐 𖼖𖽪𖽦 𖼖𖽪𖾐 𖼞𖽳𖾐 𖼮𖽑𖽻𖾐 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼽𖽡𖾐，𖼖𖽪𖾐 𖼦𖽑𖽺𖾑 𖼊𖽑𖽺 𖼊𖽝 𖼊𖽦． 37 𖼽𖽻 𖼈𖽳𖾐 𖼖𖽪𖾐 𖼦𖽑𖽺𖾑 𖼊𖽑𖽺 𖼊𖽝 𖽂𖽙𖾐 𖼦𖽑𖽻𖾐，𖽃𖽔𖾑 𖼊𖽑𖽙 𖼻𖽜 𖼖𖽪𖾐 𖼞𖽑𖽶𖾐 𖼈𖽪𖾐 𖼍𖽦 𖼊𖽑𖽺 𖼺𖽦 𖼦𖽑𖽙𖾐，𖼖𖽪𖾐 𖼞𖽑𖽶𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼊𖽑𖽺 𖼺𖽦 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼖𖽪𖾐 𖼦𖽑𖽺𖾑 𖼊𖽝𖾐 𖼖𖽙𖾐 𖼞𖽑𖽙𖾐 𖼊𖽴 𖼺𖽪𖾐 𖼄𖽡𖾐 𖼊𖽺𖾐 𖼊𖽑𖽺 𖼊𖽝 𖼊𖽦，𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖽂𖽙𖾐 𖼮𖽡𖽪 𖼊𖽜𖾑 ．𖼽𖽻 𖼽𖽡𖾐 𖼰𖽡𖾐 𖼖𖽪𖽦 𖼖𖽪𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼖𖽙𖾐 𖼺𖽶𖾑，𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼊𖽑𖽺 𖼖𖽺𖾑 𖼄𖽳 𖼮𖽡𖽦 𖼦𖽑𖽙𖾐．𖼖𖽪𖾐 𖼦𖽑𖽺𖾑 𖼊𖽑𖽺 𖼐𖽺𖾐 𖼖𖽪𖾐 𖼞𖽑𖽶𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐．
38 𖼠𖽙𖾑 𖼍𖽻𖾐，𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐，𖼰𖽻𖾐 𖼀𖽑𖽚𖾐 𖼍𖽡 𖼂𖽧𖾑 𖼖𖽪𖾐 𖼞𖽳𖾐 𖼞𖽚 𖼽𖽡𖾐，𖼖𖽪𖾐 𖼦𖽑𖽺𖾑 𖼊𖽝𖾐 𖼊𖽑𖽺 𖼊𖽝 𖼊𖽦． 39 𖼽𖽱𖾐 𖼳𖽪𖾐 𖼽𖽕𖾑 𖼖𖽪𖾐 𖼦𖽑𖽺𖾑 𖼊𖽝𖾐 𖼊𖽑𖽺 𖼊𖽝 𖽂𖽙𖾐，𖼖𖽪𖾐 𖼦𖽑𖽺𖾑 𖼊𖽝𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼵𖽪𖾐 𖽂𖽙𖾐，𖼦𖽑𖽔𖾐 𖼖𖽺𖾑 𖼖𖽪𖾐 𖼦𖽑𖽺𖾑 𖼊𖽝𖾐 𖼖𖽙𖾐 𖼞𖽑𖽙𖾐 𖼊𖽴 𖼺𖽪𖾐 𖼄𖽡𖾐 𖼊𖽺𖾐 𖼖𖽺𖾑 𖼊𖽝 𖽂𖽙𖾐．𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽔𖾑 𖼊𖽑𖽙 𖼻𖽜 𖼽𖽻 𖼈𖽳𖾐 𖼊𖽑𖽺 𖼺𖽦 𖼦𖽑𖽙𖾐，𖼖𖽪𖾐 𖼞𖽑𖽶𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖼖𖽺𖾑 𖼄𖽳 𖼮𖽡𖽦 𖼦𖽑𖽙𖾐．𖼽𖽱𖾐 𖼳𖽪𖾐 𖼽𖽕𖾑 𖼷𖽑𖽻𖾐 𖼊𖽑𖽡 𖼽𖽚𖾐 𖼞𖽜 𖼖𖽺𖾑 𖼄𖽔 𖽂𖽙𖾐 𖼮𖽡𖽪 𖼊𖽜𖾑，𖼽𖽻 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼖𖽙𖾐 𖼺𖽶𖾑，𖼍𖽡 𖼂𖽧𖾑 𖼖𖽪𖾐 𖼐𖽺𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼖𖽺𖾑 𖼄𖽳 𖼮𖽡𖽦 𖼦𖽑𖽙𖾐，𖼞𖽑𖽶𖾑 𖼽𖽻 𖼖𖽧𖾑 𖼐𖽕 𖼖𖽪𖾐 𖼐𖽺𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼞𖽑𖽙𖾐 𖼂𖽺𖾐 𖼖𖽙𖾐 𖼺𖽶𖾑 𖼳𖽶 𖼣𖽻𖾐．
40 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼞𖽑𖽶𖾑 𖼄𖽡𖾐 𖼊𖽺𖾐 𖼞𖽑𖽙𖾐 𖼣𖽻𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼺𖽦 𖼦𖽑𖽙𖾐，𖼞𖽑𖽶𖾑 𖼞𖽕 𖼖𖽦 𖼊𖽑𖽺 𖼮𖽻𖾐 𖼺𖽪𖾐 𖼷𖽑𖽻𖾐、 𖼐𖽑𖽧 𖼠𖽴 𖼇𖽪𖾐 \fr 10．40 \ft “𖼐𖽑𖽧 𖼠𖽴 𖼇𖽪𖾐 ” 𖼦𖽑𖽺𖾑 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼞𖽳𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼮𖽻𖾐． 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼷𖽑𖽻𖾐、 𖼊𖽺𖾐 𖼠𖽻𖾐 𖼄𖽙𖾐 𖼊𖽑𖽺 𖼮𖽻𖾐 𖼺𖽪𖾐 𖼷𖽑𖽻𖾐、 𖽂𖽙 𖼰𖽡𖽺𖾐 𖼀𖽙 𖼮𖽻𖾐 𖼺𖽪𖾐 𖼷𖽑𖽻𖾐 𖼐𖽺𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼞𖽳𖾐 𖼈𖽪𖾐 𖼍𖽦 𖼄𖽳𖾑 𖼄𖽳 𖼣𖽻𖾐，𖼷𖽑𖽻𖾐 𖼊𖽑𖽡 𖼽𖽚𖾐 𖼞𖽜 𖼖𖽺𖾑 𖼄𖽔 𖽂𖽙𖾐 𖼮𖽡𖽪 𖼊𖽜𖾑．𖼽𖽱𖾐 𖼳𖽪𖾐 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼺𖽺𖾑，𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼦𖽑𖽻𖾐． 41 𖼽𖽱𖾐 𖼳𖽪𖾐 𖼽𖽕𖾑 𖼰𖽡𖽔𖾐 𖼍𖽡 𖼺𖽶𖾐 𖼂𖽕𖾐 𖼐𖽑𖽧 𖼽𖽕𖾑 𖼖𖽪𖾐 𖼞𖽳𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼺𖽦 𖼺𖽺𖾑，𖼰𖽡𖽔𖾐 𖼺𖽕𖾑 𖼖𖽪𖾐 𖼞𖽳𖾐 𖼮𖽑𖽡𖾐．𖼦𖽑𖽔𖾐 𖼖𖽺𖾑 𖼠𖽜𖾐 𖼳𖽔𖾐 \fr 10．41 \ft “𖼠𖽜𖾐 𖼳𖽔𖾐 ” 𖼦𖽑𖽺𖾑 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼣𖽻𖾐． 𖼄𖽡𖾐 𖼊𖽺𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼺𖽦 𖼺𖽺𖾑 ，𖼰𖽡𖾐 𖼂𖽡𖽦𖾑 𖼖𖽪𖾐 𖼞𖽳𖾐 𖼮𖽑𖽡𖾐． 42 𖼽𖽱𖾐 𖼳𖽪𖾐 𖼽𖽕𖾑 𖼷𖽙𖾐 𖼖𖽙𖾐 𖼠𖽙𖾑 𖼍𖽻𖾐 𖼄𖽳𖾐 𖼄𖽳𖾐 𖼈𖽪𖾐 𖼍𖽦 𖼦𖽑𖽺𖾑 𖼹𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼺𖽦 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼞𖽳𖾐 𖼄𖽡𖾑 𖼐𖽦𖾐 𖼊𖽑𖽺 𖼐𖽻𖾑 𖽂𖽙𖾐 𖼦𖽑𖽻𖾐．𖼞𖽪𖾐 𖼮𖽡𖽺𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖼰𖽕𖾑 𖼊𖽝．
43 𖽃𖽔𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 ，𖼄𖽳𖾑 𖼄𖽳 𖼀𖽑𖽚𖾐 𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼽𖽻 𖼈𖽳𖾐 𖼮𖽻𖾐 𖼞𖽳𖾐 𖼞𖽚 𖼽𖽡𖾐 𖼦𖽑𖽙𖾐．