𖼽𖽱𖾐 𖼳𖽪𖾐 𖼽𖽕𖾑 𖼺𖽪𖾑 4

𖼖𖽚𖾐 𖼻𖽶𖾐 𖼍𖽳𖾐 𖼺𖽺𖾑 𖼮𖽨 𖼄𖽡𖽻𖾐 𖼂𖽺𖾐

1 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽚 𖼽𖽡𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽺𖾐 𖼦𖽴 𖼦𖽫 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐： 2 “𖼐𖽑𖽡𖾐 𖼷𖽑𖽻𖾐 𖼀𖽺 𖼠𖽻𖾐 𖼞𖽑𖽶𖾐 𖼷𖽑𖽻𖾐 𖼷𖽑𖽡𖾐 𖼐𖽑𖽡 𖼽𖽚𖾐 𖼺𖽺𖾐 𖼊𖽑𖽧 𖼖𖽻𖾐 𖼖𖽡𖾐，𖼊𖽑𖽡 𖼮𖽑𖽪𖾐 𖼳𖽶 𖼞𖽑𖽶𖾐 𖼊𖽑𖽡 𖼽𖽚𖾐． 3 𖼽𖽻 𖼈𖽳𖾐 𖼊𖽑𖽺 𖼄𖽪𖾑 𖼍𖽴𖾑 𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼍𖽡𖾐 𖼄𖽻 𖼦𖽑𖽡𖽚 𖼞𖽳𖾐 𖼮𖽑𖽻𖾐 𖼖𖽚𖾐 𖼄𖽙𖾐 𖼷𖽑𖽡𖾐 𖼐𖽑𖽡 𖼊𖽝𖾐 𖼈𖽺𖾐 𖼂𖽻𖾐 𖼖𖽻𖾐 𖼺𖽺𖾑，𖼀𖽑𖽨 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺𖾐 𖼦𖽑𖽦 𖼞𖽳𖾐 𖼄𖽡𖾐 𖼊𖽺𖾐 𖼍𖽙𖾑 𖼖𖽡𖾐．’”

4 𖽃𖽔𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼷𖽑𖽡𖾐 𖼐𖽑𖽡 𖼽𖽚𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐，𖼊𖽑𖽡 𖼮𖽑𖽪𖾐 𖼳𖽶 𖼞𖽑𖽶𖾐 𖼊𖽑𖽡 𖼽𖽚𖾐，𖼽𖽻 𖼈𖽳𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐， 5 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽻𖾐 𖼊𖽑𖽺 𖼽𖽡𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽡𖾐 𖼐𖽑𖽡 𖼮𖽑𖽪𖾐 𖼳𖽶 𖼷𖽑𖽻𖾐 𖼖𖽙𖾐 𖼀𖽙𖾐，𖼊𖽑𖽡 𖼽𖽚𖾐 𖼖𖽚𖾐 𖼄𖽙𖾐 𖼊𖽑𖽡 𖼊𖽝𖾐 𖼈𖽦𖾑 𖼂𖽻𖾐 𖼖𖽻𖾐， 6 𖼖𖽚𖾐 𖼄𖽙𖾐 𖼦𖽑𖽺𖾑 𖼹𖽻𖾐 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼮𖽨 𖼄𖽡𖽻𖾐 𖼂𖽺𖾐 𖼊𖽙𖾐．𖽃𖽔𖾑 𖼞𖽶𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼊𖽻 𖼐𖽙𖾐 𖼀𖽦𖾐：‘ 𖼖𖽚𖾐 𖼄𖽙𖾐 𖼦𖽑𖽺𖾑 𖼂𖽜𖾐 𖽃𖽔 𖼊𖽺𖾑 𖼳𖽶 𖼂𖽺𖾐 𖼖𖽚𖾐 𖼂𖽚𖾐 𖼣𖽻𖾐？’ 7 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼰𖽨𖾐 𖼖𖽡𖾐： ‘ 𖼞𖽪𖾐 𖼮𖽡𖽺𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖽃𖽔𖾐 𖼮𖽡𖽦𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖽃𖽙𖾑 𖼄𖽺 𖼮𖽑𖽡𖽺 𖼷𖽑𖽦𖾐 𖼦𖽑𖽙𖾐；𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼈𖽦𖾑 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽚 𖼽𖽡𖾐 𖼞𖽑𖽶𖾑 𖼮𖽶𖾐，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖽃𖽔𖾐 𖼮𖽡𖽦𖾐 𖼷𖽑𖽦𖾐 𖼦𖽑𖽙𖾐．’ 𖽃𖽔𖾐 𖼺𖽺𖾑，𖼖𖽚𖾐 𖼄𖽙𖾐 𖼦𖽑𖽺𖾑 𖼹𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽨 𖼄𖽡𖽻𖾐 𖼂𖽺𖾐 𖼻𖽳𖾐 𖼹𖽦𖾐 𖼖𖽙𖾐 𖼮𖽑𖽡𖾐 𖼊𖽻𖾐．

8 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼽𖽱𖾐 𖼳𖽪𖾐 𖼽𖽕𖾑 𖼞𖽑𖽙𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐 𖼦𖽑𖽙𖾐，𖼽𖽻 𖼈𖽳𖾐 𖼽𖽺𖾐 𖼦𖽴 𖼦𖽫 𖼽𖽱𖾐 𖼳𖽪𖾐 𖼽𖽕𖾑 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽑𖽡𖾐 𖼐𖽑𖽡 𖼮𖽑𖽪𖾐 𖼳𖽶 𖼖𖽙𖾐 𖼀𖽙𖾐，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽻𖾐 𖼊𖽑𖽺 𖼮𖽑𖽻𖾐 𖼖𖽚𖾐 𖼄𖽙𖾐 𖼷𖽑𖽡𖾐 𖼐𖽑𖽡 𖼊𖽝𖾐 𖼈𖽺𖾐 𖼊𖽚𖾐 𖼖𖽻𖾐，𖼀𖽑𖽨 𖼺𖽺𖾑 𖼽𖽻 𖼈𖽳𖾐 𖼦𖽑𖽦 𖼞𖽳𖾐 𖼞𖽑𖽶𖾑 𖼠𖽻𖾐 𖼍𖽙𖾑．

9 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽻𖾐 𖼊𖽑𖽺 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼈𖽦𖾑 𖼺𖽪𖾐 𖼍𖽡𖾐 𖼄𖽻 𖼦𖽑𖽡𖽚 𖼞𖽳𖾐 𖼞𖽑𖽶𖾑 𖼠𖽻𖾐，𖼽𖽱𖾐 𖼳𖽪𖾐 𖼽𖽕𖾑 𖼹𖽦𖾑 𖼖𖽚𖾐 𖼄𖽙𖾐 𖼷𖽑𖽡𖾐 𖼐𖽑𖽡 𖼊𖽝𖾐 𖼍𖽳𖾐 𖼍𖽪𖾐，𖼖𖽚𖾐 𖼄𖽙𖾐 𖼞𖽑𖽶𖾑 𖼹𖽻𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼞𖽑𖽶𖾑 𖼠𖽻𖾐 𖼮𖽻𖾐 𖼍𖽳𖾐 𖼺𖽺．

𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽚 𖼽𖽡𖾐 𖼦𖽑𖽻𖾐

10 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼈𖽦𖾑 𖼺𖽪𖾐 𖼍𖽡𖾐 𖼄𖽻 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽻𖾐 𖼊𖽑𖽺 𖼦𖽑𖽡𖽚 𖼺𖽺𖾑，𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼄𖽡𖽻 𖼂𖽺𖾐 𖼦𖽑𖽻𖾐 𖼰𖽶𖾐 𖼮𖽑𖽡𖾐，𖼄𖽡𖽻 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼽𖽱𖾐 𖼳𖽪𖾐 𖼽𖽕𖾑 𖼞𖽜 𖼀𖽦𖾐 𖼷𖽑𖽻𖾐 𖼀𖽺 𖼊𖽑𖽺 𖼰𖽨𖾐，𖼄𖽚 𖼳𖽡𖾐 𖼽𖽱𖾐 𖼳𖽪𖾐 𖼽𖽕𖾑 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼄𖽡𖽻 𖼞𖽑𖽶𖾑 𖼣𖽻𖾐．𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼐𖽕 𖼐𖽕𖾐 𖼖𖽻𖾐 𖼮𖽻 𖼠𖽚 𖼽𖽡𖾐 𖼦𖽑𖽙𖾐． 11 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼠𖽚 𖼽𖽡𖾐 𖼦𖽑𖽙𖾐 𖼺𖽺𖾑，𖼍𖽡𖾐 𖼄𖽻 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼈𖽦𖾑 𖼖𖽻𖾐 𖼮𖽻 𖼠𖽚 𖼽𖽡𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽃𖽙𖾑 𖼄𖽺 𖼀𖽳 𖼺𖽜．

12 𖼖𖽡𖽚 𖼂𖽡𖽦𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼰𖽡𖽔𖾐 𖼍𖽴 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽡 𖼀𖽑𖽦𖾐，𖼽𖽻 𖼈𖽳𖾐 𖼄𖽚 𖼳𖽡𖾐 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼖𖽙𖾐 𖼮𖽑𖽻𖾐，𖼊𖽝 𖼊𖽦 𖼖𖽚𖾐 𖼂𖽚𖾐 𖼄𖽡𖽻 𖼐𖽑𖽡 𖼈𖽺𖾐 𖼍𖽪𖾐 𖼖𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼀𖽳 𖼮𖽑𖽻𖾐 𖼖𖽻𖾐 𖼮𖽻 𖼠𖽚 𖼽𖽡𖾐． 13 𖼽𖽻 𖼈𖽳𖾐 𖽃𖽔 𖼖𖽙𖾐 𖼖𖽡𖾐 𖼄𖽺 𖼷𖽑𖽻𖾐 𖼺𖽺𖾑 𖼮𖽻𖾐，𖼽𖽻 𖼈𖽳𖾐 𖼂𖽺𖾐 𖼳𖽡𖽻𖾐 𖼀𖽑𖽢 𖼺𖽺𖾑，𖼰𖽕𖾑 𖼊𖽝 𖼽𖽡𖾐 𖼊𖽻𖾐．𖼽𖽻 𖼈𖽳𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼺𖽜 𖼠𖽚 𖼽𖽡𖾐，𖼖𖽻𖾐 𖼺𖽺𖾑 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼊𖽺𖾐 𖼠𖽻𖾐 𖼄𖽙𖾐 𖼊𖽑𖽺 𖼮𖽑𖽡𖾐，𖼰𖽕𖾑 𖼊𖽝 𖼖𖽙𖾐 𖼳𖽡𖽻𖾐．

14 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽺𖾐 𖼦𖽴 𖼦𖽫 𖼽𖽱𖾐 𖼳𖽪𖾐 𖼽𖽕𖾑 𖼞𖽜 𖼺𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽦𖾐 𖼊𖽪 𖼮𖽑𖽡𖽺 𖼈𖽳 𖼺𖽪𖾐 𖽂𖽙𖾐 𖼰𖽕𖾐，𖼽𖽻 𖼊𖽑𖽡 𖼻𖽳𖾐 𖼐𖽑𖽡𖾐 𖼦𖽑𖽦 𖼠𖽻𖾐 𖼞𖽑𖽶𖾐，𖼷𖽑𖽻𖾐 𖼀𖽺 𖼄𖽚 𖼳𖽡𖾐 𖼊𖽑𖽺 𖼮𖽡𖽮𖾐 𖼮𖽻𖾑 𖼊𖽴 𖼖𖽙𖾐 𖼺𖽶𖾑，𖼽𖽻 𖼊𖽑𖽺 𖼮𖽡𖽮𖾐 𖼮𖽻𖾑 𖼊𖽴．

15 𖼽𖽺𖾐 𖼦𖽴 𖼦𖽫 𖼽𖽱𖾐 𖼳𖽪𖾐 𖼽𖽕𖾑 𖼊𖽑𖽺 𖼄𖽪𖾑 𖼍𖽴𖾑 𖼀𖽦𖾐： 16 “𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼈𖽦𖾑 𖼺𖽪𖾐 𖼍𖽡𖾐 𖼄𖽻 𖼞𖽜 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽻𖾐 𖼊𖽦𖾐 𖼖𖽻𖾐 𖼖𖽡𖾐．” 17 𖽃𖽔𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼍𖽡𖾐 𖼄𖽻 𖼊𖽑𖽺 𖼄𖽪𖾑 𖼍𖽴𖾑 𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽻𖾐 𖼊𖽦𖾐 𖼖𖽻𖾐!” 18 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼊𖽑𖽺 𖼈𖽦𖾑 𖼺𖽪𖾐 𖼍𖽡𖾐 𖼄𖽻 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽻𖾐 𖼊𖽦𖾐 𖼖𖽻𖾐 ，𖼍𖽡𖾐 𖼄𖽻 𖼞𖽳𖾐 𖼮𖽑𖽡𖾐 𖼈𖽶 𖼮𖽑𖽳 𖼍𖽪𖾐 𖼖𖽻𖾐 𖼦𖽡𖽳𖾑 𖼄𖽡𖾐 𖼊𖽑𖽺 𖼊𖽑𖽚 𖼄𖽳𖾐 𖼞𖽑𖽶𖾑 𖼮𖽶𖾐，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼞𖽳𖾐 𖽃𖽔𖾐 𖼮𖽡𖽦𖾐 𖽃𖽙𖾑 𖼄𖽺 𖼖𖽙𖾐 𖼺𖽶𖾑 𖼖𖽻 𖼹𖽺𖾐 𖼽𖽡𖾐，𖼖𖽻𖾐 𖼮𖽻 𖼦𖽜 𖼐𖽑𖽡 𖼀𖽳 𖼀𖽡𖾐 𖼮𖽨𖾐．

𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶

19 𖼞𖽑𖽚 𖼳𖽸 𖼳𖽨𖾐 𖼊𖽦𖾐 𖼷𖽑𖽡𖾐，𖼷𖽑𖽻𖾐 𖼀𖽺 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽻𖾐 𖼊𖽦𖾐 𖼖𖽻𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶． 20 𖼽𖽻 𖼈𖽳𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽻𖾐 𖼈𖽦𖾑 𖼊𖽦𖾐 𖼖𖽻𖾐 𖼺𖽪𖾐 𖼖𖽚𖾐 𖼄𖽙𖾐 𖼞𖽑𖽶𖾑 𖼷𖽑𖽡𖾐 𖼐𖽑𖽡 𖼊𖽝𖾐，𖼽𖽱𖾐 𖼳𖽪𖾐 𖼽𖽕𖾑 𖼮𖽑𖽢𖾑 𖼍𖽳𖾐 𖼺𖽺𖾑 𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼍𖽙𖾑．

21 𖼽𖽱𖾐 𖼳𖽡𖾐 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐：“𖽃𖽔𖾑 𖼞𖽶𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼽𖽻 𖼈𖽳𖾐 𖽃𖽔 𖼀𖽙 𖼊𖽑𖽺 𖼦𖽑𖽺𖾑 𖼻𖽻𖾐 𖼊𖽻 𖼐𖽙𖾐 𖼀𖽦𖾐：‘ 𖼖𖽚𖾐 𖼄𖽙𖾐 𖼦𖽑𖽺𖾑 𖼂𖽜𖾐 𖽃𖽔 𖼊𖽺𖾑 𖼳𖽶 𖼂𖽺𖾐 𖼖𖽚𖾐 𖼂𖽚𖾐 𖼣𖽻𖾐？’ 22 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼰𖽨𖾐 𖼖𖽡𖾐： ‘ 𖽃𖽙𖾑 𖼄𖽺 𖼊𖽑𖽙 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖽃𖽔𖾐 𖼮𖽡𖽦𖾐 𖼷𖽑𖽦𖾐 𖼦𖽑𖽙𖾐 𖼄𖽡𖾐 𖼦𖽡𖽳𖾐 𖼀𖽑𖽢 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼺𖽜 𖼠𖽚 𖼽𖽡𖾐 𖼦𖽑𖽙𖾐．’ 23 𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫，𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼞𖽳𖾐 𖽃𖽔𖾐 𖼮𖽡𖽦𖾐 𖼞𖽜 𖼦𖽡𖽳𖾐 𖼦𖽑𖽙𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼄𖽳𖾑 𖼄𖽳 𖼞𖽜 𖼠𖽚 𖼽𖽡𖾐 𖼦𖽑𖽻𖾐 𖼰𖽶𖾐 𖼮𖽑𖽡𖾐，𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼊𖽑𖽙 𖼦𖽜𖾐 𖼄𖽙𖾐 𖼐𖽑𖽡𖾐 𖼞𖽜 𖼣𖽙𖾐 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼦𖽡𖽳𖾐 𖼦𖽑𖽙𖾐 𖼺𖽺𖾑，𖼣𖽙𖾐 𖼈𖽳𖾐 𖼄𖽳𖾑 𖼄𖽳 𖼞𖽜 𖽂𖽙𖾐 𖼠𖽚 𖼖𖽻𖾐 𖼦𖽑𖽙𖾐 𖼖𖽙𖾐 𖼺𖽶𖾑． 24 𖽃𖽔𖾐 𖼺𖽺𖾑，𖼄𖽡𖾑 𖼐𖽦𖾐 𖼊𖽑𖽺 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼞𖽜 𖼺𖽝𖾑 𖼖𖽡𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼖𖽦 𖼈𖽶 𖼦𖽑𖽺𖾑 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼮𖽻𖾐，𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼞𖽜 𖼺𖽺𖾑 𖼻𖽳𖾐 𖼻𖽳𖾐 𖼹𖽦𖾐 𖼹𖽦𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼍𖽺𖾑 𖼮𖽡𖽮𖾐 𖼠𖽙𖾐 𖼳𖽙𖾐 𖼊𖽻𖾐．”