𖼽𖽱𖾐 𖼳𖽪𖾐 𖼽𖽕𖾑 𖼺𖽪𖾑 3

𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽚 𖼽𖽡𖾐

1 𖼽𖽱𖾐 𖼳𖽪𖾐 𖼽𖽕𖾑 𖼷𖽑𖽶𖾐 𖼐𖽦 𖼍𖽪𖾐 𖼖𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼖𖽙𖾐 𖼮𖽑𖽻𖾐 𖼳𖽸 𖼊𖽑𖽧 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽡𖾐，𖼦𖽑𖽺𖾐 𖼞𖽴𖾐 𖼍𖽚 𖼞𖽑𖽶𖾑 𖼠𖽻𖾐 𖼦𖽑𖽦 𖼺𖽺𖾑，𖼖𖽻𖾐 𖼮𖽻 𖼠𖽚 𖼖𖽙𖾐 𖼳𖽡𖽻𖾐． 2 𖼺𖽙𖾐 𖼐𖽑𖽡𖾐 𖼠𖽙𖾑 𖼍𖽻𖾐，𖼈𖽪𖾑 𖼷𖽪𖾐 𖼞𖽑𖽶𖾑 𖼹𖽻𖾐 𖼷𖽑𖽻𖾐 𖼀𖽺 𖼞𖽑𖽙𖾐 𖼮𖽻𖾐 𖼞𖽳𖾐 𖼄𖽳𖾑 𖼄𖽳 𖼺𖽜 𖼻𖽶𖾐 𖼺𖽺𖾑， 3 𖼷𖽑𖽻𖾐 𖼀𖽺 𖼖𖽙𖾐 𖼄𖽪𖾑 𖼍𖽴𖾑 𖼀𖽦𖾐：“𖼐𖽑𖽡𖾐 𖼈𖽳𖾐 𖼐𖽦𖾐 𖼄𖽡𖽻𖾐，𖼍𖽡𖾐 𖼄𖽻 𖼂𖽺𖾐 𖼺𖽪𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 \fr 3．3 \ft 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼦𖽑𖽺𖾑 𖽂𖽙 𖼺𖽙𖾐 𖼀𖽙𖾐 𖼽𖽻 𖼷𖽑𖽻𖾐 𖼀𖽺 𖼖𖽙𖾐 𖼮𖽑𖽻𖾐 𖼮𖽻𖾐 𖼞𖽳𖾐 𖼮𖽨 𖼄𖽡𖽻𖾐 𖼣𖽻𖾐，𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽑𖽶𖾐 𖼷𖽑𖽦𖾐 𖼮𖽡𖽺𖾐 𖼀𖽑𖽡、 𖼄𖽔 𖼐𖽕 𖼐𖽺𖾐 𖼽𖽕𖾑 𖼖𖽪𖽦 𖼞𖽳𖾐 𖼍𖽚𖾐 𖼖𖽜 𖼞𖽑𖽻𖾑 𖼰𖽡𖽺𖾐． 𖼊𖽑𖽺 𖼈𖽦𖾑 𖼍𖽪𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼮𖽻𖾐 𖼞𖽳𖾐 𖼮𖽑𖽻𖾐 𖼺𖽜 𖼍𖽪𖾐，𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼠𖽙𖾑 𖼍𖽻𖾐 𖼽𖽡𖾐 𖼖𖽡𖾐． 4 𖽃𖽔𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼞𖽜 𖼞𖽑𖽙𖾐 𖼺𖽜 𖼖𖽡𖾐 𖼞𖽳𖾐 𖼮𖽨𖾐 𖼄𖽙𖾐 𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼞𖽜 𖼺𖽝𖾑 𖼊𖽻𖾐．𖼞𖽪𖾐 𖼮𖽡𖽺𖾐，𖼮𖽨𖾐 𖼄𖽙𖾐 𖼦𖽑𖽺𖾑 𖼰𖽴𖾐 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼺𖽜 𖼄𖽔 𖼠𖽚．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼊𖽑𖽺 𖼊𖽑𖽡 𖼊𖽑𖽜𖾐 𖼰𖽨𖾑 𖼖𖽡𖾐，𖽃𖽔 𖼖𖽙𖾐 𖼊𖽑𖽡 𖽃𖽶𖾐 𖼮𖽨 𖼄𖽡𖾐 \fr 3．4 \ft “𖽃𖽶𖾐 𖼮𖽨 𖼄𖽡𖾐 ” 𖼦𖽑𖽺𖾑 𖼐𖽑𖽡 𖼽𖽚𖾐 𖼷𖽙𖾐 𖼖𖽙𖾐 𖽃𖽶𖾐 𖼊𖽻 𖼮𖽨 𖼊𖽙𖾐 𖼈𖽡𖾐 𖼮𖽻𖾐，𖼳𖽡𖽦𖾑 𖼈𖽪𖾐 “𖼠𖽙𖾐 𖼖𖽡𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼺𖽺𖾑 𖼰𖽨𖾑 𖼖𖽡𖾐，𖼺𖽜 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼖𖽙𖾐 𖽂𖽙𖾐 𖼐𖽳 𖼽𖽡𖾐 𖼄𖽔 𖼊𖽙𖾐．”

5 𖼽𖽱𖾐 𖼳𖽪𖾐 𖼽𖽕𖾑 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐： “𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼷𖽺𖾐 𖼺𖽡 𖼮𖽡𖾐 𖼖𖽡𖾐! 𖼞𖽪𖾐 𖼮𖽡𖽺𖾐，𖽃𖽔𖾑 𖼞𖽶𖾐 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼞𖽑𖽙 𖼣𖽝 𖼄𖽡𖽻 𖼂𖽺𖾐 𖼊𖽻𖾐．”

6 𖼽𖽱𖾐 𖼳𖽪𖾐 𖼽𖽕𖾑 𖼹𖽦𖾑 𖼍𖽡𖾐 𖼄𖽻 𖼖𖽙𖾐 𖼄𖽪𖾑 𖼍𖽴𖾑 𖼀𖽦𖾐：“𖼐𖽑𖽡𖾐 𖼈𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼈𖽦𖾑 𖼍𖽪𖾐 𖼖𖽻𖾐 𖼺𖽺𖾑，𖼷𖽑𖽻𖾐 𖼀𖽺 𖼞𖽳𖾐 𖽃𖽙𖾑 𖼄𖽺 𖼮𖽑𖽻𖾐 𖼺𖽜．” 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼈𖽦𖾑 𖼍𖽪𖾐 𖼖𖽻𖾐，𖼷𖽑𖽻𖾐 𖼀𖽺 𖼞𖽳𖾐 𖽃𖽙𖾑 𖼄𖽺 𖼮𖽑𖽻𖾐 𖼺𖽜．

7 𖼽𖽺𖾐 𖼦𖽴 𖼦𖽫 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐： “𖽃𖽙𖾑 𖼐𖽑𖽡𖾐 𖼮𖽑𖽻𖾐 𖼍𖽪𖾐，𖼣𖽙𖾐 𖼐𖽑𖽡𖾐 𖼞𖽜 𖼺𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽦𖾐 𖼊𖽪 𖼮𖽑𖽡𖽺 𖼈𖽳 𖼺𖽪𖾐 𖼰𖽕𖾐 𖼊𖽻𖾐，𖼽𖽻 𖼈𖽳𖾐 𖼞𖽜 𖼺𖽝𖾑 𖼄𖽶𖾑，𖼣𖽙𖾐 𖽃𖽔 𖼊𖽺𖾐 𖼄𖽚 𖼳𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐，𖼦𖽑𖽔𖾐 𖼖𖽺𖾑 𖼞𖽑𖽶𖾑 𖼖𖽙𖾐 𖼺𖽶𖾑 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼊𖽻𖾐． 8 𖼐𖽑𖽡𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼈𖽦𖾑 𖼺𖽪𖾐 𖼍𖽡𖾐 𖼄𖽻 𖼊𖽑𖽺 𖼦𖽑𖽺𖾑 𖼻𖽻𖾐 𖼄𖽪𖾑 𖼍𖽴𖾑 𖼖𖽡𖾐：‘ 𖼐𖽑𖽡𖾐 𖼈𖽳𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼞𖽑𖽶𖾐 𖼦𖽑𖽡𖽚 𖼖𖽡𖾐．’”

9 𖼽𖽱𖾐 𖼳𖽪𖾐 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐： “𖼐𖽑𖽡𖾐 𖼈𖽳𖾐 𖼺𖽜 𖼦𖽑𖽺𖾑 𖼠𖽻𖾐 𖼐𖽳 𖼖𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼖𖽡𖾐!” 10-11 𖼽𖽱𖾐 𖼳𖽪𖾐 𖼽𖽕𖾑 𖼀𖽦𖾐：“𖼐𖽦𖾐 𖼄𖽺! 𖼄𖽶 𖼊𖽑𖽡 𖽂𖽚 𖼞𖽑𖽶𖾐 𖼺𖽡 𖼀𖽑𖽙 𖼞𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽚 𖼽𖽡𖾐 𖼊𖽻𖾐．𖼄𖽡𖽻 𖼦𖽑𖽺𖾑 𖼖𖽙𖾐 𖼮𖽑𖽻𖾐 𖼐𖽑𖽡𖾐 𖼈𖽳𖾐 𖼺𖽝𖾑 𖼊𖽻𖾐： 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼮𖽻𖾐 𖼍𖽳𖾐．𖼽𖽻 𖼷𖽑𖽜𖾑 𖼷𖽑𖽜𖾐 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐、 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼳𖽡𖾐 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼂𖽡 𖼖𖽡𖾑 𖼳𖽡 𖼮𖽑𖽪𖾐 𖼳𖽶 𖼷𖽑𖽻𖾐、 𖼠𖽴 𖼰𖽡𖽔𖾐 𖼺𖽔 𖼮𖽑𖽪𖾐 𖼳𖽶 𖼷𖽑𖽻𖾐、 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼽𖽺𖾐 𖼂𖽪𖾑 𖼺𖽶𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼞𖽕 𖼊𖽑𖽧 𖼽𖽡𖾐 𖼊𖽻𖾐．

12 𖽃𖽔𖾑 𖼄𖽳𖾐，𖼐𖽑𖽡𖾐 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽑𖽡𖾐 𖼐𖽑𖽡 𖼽𖽚𖾐 𖼺𖽺𖾐 𖼊𖽑𖽧 𖼖𖽻𖾐 𖼖𖽡𖾐，𖼊𖽑𖽡 𖼮𖽑𖽪𖾐 𖼳𖽶 𖼞𖽑𖽶𖾐 𖼊𖽑𖽡 𖼽𖽚𖾐． 13 𖼄𖽶 𖼊𖽑𖽡 𖽂𖽚 𖼞𖽑𖽶𖾐 𖼺𖽡 𖼀𖽑𖽙 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼊𖽑𖽺 𖼈𖽦𖾑 𖼺𖽪𖾐 𖼍𖽡𖾐 𖼄𖽻 𖼞𖽳𖾐 𖼮𖽑𖽡𖾐 𖼈𖽶 𖼊𖽑𖽚 𖼺𖽺𖾑，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼞𖽑𖽶𖾐 𖼊𖽡 𖼽𖽡𖾐 𖼞𖽑𖽶𖾑 𖼮𖽶𖾐，𖼖𖽻𖾐 𖼮𖽻 𖽃𖽔𖾐 𖼮𖽡𖽦𖾐 𖼷𖽑𖽜𖾑 𖼷𖽑𖽜𖾐 𖼷𖽑𖽦𖾐 𖼐𖽑𖽡 𖼊𖽑𖽜𖾐 𖼀𖽑𖽢 𖼊𖽻𖾐，𖼞𖽕 𖼂𖽻𖾑 𖼮𖽑𖽻𖾐 𖼹𖽺𖾐 𖼖𖽻𖾐 𖼺𖽪𖾐 𖽃𖽔𖾐 𖼮𖽡𖽦𖾐 𖼷𖽑𖽜𖾑 𖼷𖽑𖽜𖾐 𖼈𖽡𖾐 𖼊𖽡𖾐 𖼂𖽶𖾑 𖼀𖽑𖽢 𖼊𖽻𖾐．”

14 𖼷𖽑𖽻𖾐 𖼀𖽺 𖼦𖽑𖽺𖾐 𖼠𖽴𖾐 𖼮𖽻𖾐 𖼊𖽪 𖼰𖽡𖾑 𖼦𖽑𖽙𖾐 𖼺𖽜 𖼍𖽪𖾐，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽚 𖼊𖽻𖾐 𖼞𖽑𖽶𖾑 𖼮𖽶𖾐，𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼈𖽦𖾑 𖼺𖽪𖾐 𖼍𖽡𖾐 𖼄𖽻 𖼷𖽑𖽻𖾐 𖼀𖽺 𖽃𖽙𖾑 𖼄𖽺 𖼀𖽳 𖼮𖽻𖾐． 15 𖼞𖽑𖽶𖾑 𖼮𖽶𖾐 𖼖𖽚𖾑 𖼄𖽚 𖼠𖽜𖾐 𖼐𖽑𖽡𖾐 𖼦𖽑𖽦 𖼣𖽻𖾐，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖽃𖽔𖾐 𖼮𖽡𖽦𖾐 𖼀𖽡𖾐 𖼐𖽑𖽡 𖼀𖽳 𖼀𖽙 𖼖𖽙𖾐 𖼊𖽦𖾐 𖼽𖽡𖾐．𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼈𖽦𖾑 𖼺𖽪𖾐 𖼍𖽡𖾐 𖼄𖽻 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽑𖽡𖾐 𖼖𖽻𖾐，𖼽𖽻 𖼈𖽳𖾐 𖼞𖽳𖾐 𖼮𖽑𖽡𖾐 𖼈𖽶 𖽃𖽔𖾐 𖼮𖽡𖽦𖾐 𖼊𖽑𖽺 𖼊𖽑𖽚 𖼄𖽳𖾐 𖼞𖽑𖽶𖾑 𖼮𖽶𖾐， 16 𖽃𖽔𖾐 𖼮𖽡𖽦𖾐 𖼐𖽙 𖼹𖽺𖾐 𖼦𖽑𖽙𖾐，𖼄𖽳𖾑 𖼄𖽳 𖼷𖽑𖽦𖾐 𖼦𖽑𖽻𖾐，𖼞𖽕 𖼂𖽻𖾑 𖼮𖽑𖽻𖾐 𖼹𖽺𖾐 𖼖𖽻𖾐 𖼺𖽪𖾐 𖽃𖽔𖾐 𖼮𖽡𖽦𖾐，𖼞𖽑𖽻𖾑 𖼄𖽡𖾐 𖼈𖽡 𖼄𖽡𖾐 𖼊𖽺𖾐 𖼺𖽔 𖼖𖽔𖾐 𖼍𖽕𖾑 𖼖𖽪𖾐 𖼞𖽕 𖼰𖽡𖽺𖾐 𖼽𖽕𖾑 𖼍𖽗𖾐 𖼖𖽪𖾐 𖼞𖽳𖾐 𖼈𖽡𖾐 𖼊𖽡𖾐 𖼂𖽶𖾑 𖼀𖽑𖽢，𖼍𖽕𖾑 𖽂𖽚 𖼞𖽳𖾐 𖽃𖽔𖾐 𖼮𖽡𖽦𖾐 𖼖𖽻 𖼽𖽕𖾑 𖼖𖽔𖾐 𖼂𖽔𖾐 𖼦𖽜𖾐 𖼄𖽙𖾐 𖼊𖽡 𖼽𖽡𖾐，𖼞𖽑𖽶𖾑 𖼷𖽑𖽙 𖼈𖽡𖾐 𖼦𖽜𖾐 𖼄𖽙𖾐 𖼣𖽻𖾐．𖽃𖽔𖾐 𖼺𖽺𖾑，𖼷𖽑𖽻𖾐 𖼀𖽺 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖽃𖽙𖾑 𖼄𖽺 𖼀𖽳 𖼞𖽳𖾐 𖼞𖽑𖽶𖾑 𖼠𖽻𖾐 𖼖𖽻𖾐 𖼮𖽻 𖼠𖽚 𖼽𖽡𖾐．

17 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼊𖽑𖽺 𖼈𖽦𖾑 𖼺𖽪𖾐 𖼍𖽡𖾐 𖼄𖽻，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽻𖾐 𖼞𖽑𖽶𖾐 𖼞𖽳𖾐 𖼄𖽡𖾐 𖼦𖽡𖽳𖾐 𖼊𖽑𖽺 𖼦𖽑𖽡𖽚 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼖𖽻𖾐 𖼮𖽻 𖼞𖽑𖽶𖾐 𖼄𖽡𖾐 𖼦𖽡𖽳𖾐 𖼊𖽑𖽺 𖼺𖽜 𖼠𖽚 𖼽𖽡𖾐，𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽚 𖼽𖽡𖾐 𖼦𖽑𖽻𖾐 𖼰𖽶𖾐 𖼮𖽑𖽡𖾐．