𖼰𖽡𖽔𖾐 𖼐𖽕 𖼺𖽪𖾐 𖼷𖽑𖽻𖾐 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼞𖽴𖾐
5
1 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼞𖽳𖾐 𖼮𖽻𖾐 𖼺𖽪𖾐，𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼞𖽑𖽶𖾑 𖼹𖽻𖾐 𖼐𖽺𖾐 𖼦𖽜𖾐 𖼄𖽙𖾐 𖼦𖽜 𖼞𖽳𖾐 𖼐𖽳 𖼺𖽪𖾐 𖼰𖽡𖽔𖾐 𖼐𖽕 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼞𖽑𖽶𖾑 𖼹𖽻𖾐 𖼊𖽻 𖼮𖽨，𖼽𖽺𖾐 𖼦𖽴 𖼦𖽫 𖽃𖽔 𖼊𖽺𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼞𖽳𖾐 𖽃𖽔𖾐 𖼮𖽡𖽦𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼦𖽡𖽳𖾐 𖼦𖽑𖽙𖾐 𖼺𖽺𖾑，𖼽𖽻 𖼈𖽳𖾐 𖼄𖽳𖾑 𖼄𖽳 𖼞𖽜 𖼠𖽚 𖼖𖽻𖾐 𖼦𖽑𖽙𖾐． 𖽃𖽔𖾐 𖼺𖽺𖾑 ，𖼽𖽻 𖼈𖽳𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼮𖽡𖽮𖾐 𖼞𖽴𖾐．𖼞𖽪𖾐 𖼮𖽡𖽺𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖽻 𖼊𖽻 𖼮𖽨 𖼺𖽺𖾑，𖼊𖽝 𖼊𖽦 𖽂𖽙 𖼐𖽑𖽡𖾐 𖼖𖽺𖾑 𖼄𖽔 𖼮𖽻𖾐．𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐
2 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼮𖽝 𖼖𖽚𖾐 𖼻𖽜 𖽃𖽔𖾑 𖼊𖽑𖽙 𖼂𖽺𖾐 𖼺𖽺𖾑，𖼹𖽦𖾑 𖼊𖽑𖽡 𖼂𖽦𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼻𖽙 𖼐𖽜𖾐 𖼖𖽙𖾐 𖼀𖽙𖾐 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼖𖽡𖾐．” 3 𖽃𖽔𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼮𖽝 𖼖𖽚𖾐 𖼻𖽜 𖽃𖽔𖾑 𖼊𖽑𖽙 𖼂𖽺𖾐，𖼮𖽡𖾐 𖼷𖽑𖽳 𖽂𖽙 𖼰𖽡𖽺𖾐 𖼊𖽑𖽺 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐．
4 𖼽𖽱𖾐 𖼳𖽪𖾐 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼻𖽙 𖼐𖽜𖾐 𖼖𖽙𖾐 𖼀𖽙𖾐 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼦𖽑𖽙𖾐．𖼞𖽪𖾐 𖼮𖽡𖽺𖾐，𖼞𖽑𖽙𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼊𖽚𖾐 𖼖𖽻𖾐 𖼺𖽺𖾑 𖼰𖽕𖾑 𖼊𖽝 𖼀𖽑𖽢 𖼊𖽙𖾐 𖼺𖽪𖾐 𖼻𖽙 𖼐𖽜𖾐 ，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼊𖽚𖾐 𖼖𖽻𖾐 𖼠𖽙𖾑 𖼍𖽻𖾐，𖼄𖽳𖾑 𖼄𖽳 𖼦𖽡𖽳 𖼰𖽡𖽺𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼳𖽶𖾐 𖼦𖽑𖽙𖾐， 5 𖼻𖽙 𖼐𖽜𖾐 𖼞𖽑𖽶𖾑 𖼹𖽻𖾐 𖼄𖽳𖾑 𖼄𖽳 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼷𖽶𖾐 𖼠𖽚．𖼦𖽑𖽻𖾐 𖼊𖽑𖽻𖾐，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼠𖽙𖾑 𖼍𖽻𖾐 𖼺𖽺𖾑，𖼦𖽡𖽳 𖼰𖽡𖽺𖾐 𖼄𖽡𖾐 𖼊𖽺𖾐 𖼮𖽻𖾐 𖼽𖽚𖾐 𖼺𖽪𖾐 𖼻𖽙 𖼐𖽜𖾐 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼷𖽶𖾐 𖼄𖽔 𖼠𖽚． 6 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼦𖽡𖽳 𖼰𖽡𖽺𖾐 𖼄𖽡𖾐 𖼊𖽺𖾐 𖼞𖽑𖽶𖾐 𖼖𖽡𖾐 𖼷𖽑𖽡𖾐 𖼞𖽑𖽚 𖼮𖽨𖾐 𖼺𖽜 𖼦𖽑𖽙𖾐，𖼳𖽡𖽻𖾐 𖼺𖽺𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽚𖾐 𖼖𖽻𖾐，𖼞𖽑𖽙𖾐 𖼰𖽕𖾑 𖼊𖽝 𖼀𖽑𖽢 𖼊𖽙𖾐 𖼺𖽪𖾐 𖼻𖽙 𖼐𖽜𖾐 𖼄𖽳𖾑 𖼄𖽳 𖼳𖽶𖾐 𖼮𖽡𖽦 𖼦𖽑𖽻𖾐 𖼰𖽶𖾐 𖼮𖽑𖽡𖾐．𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼊𖽑𖽙 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼊𖽻 𖼊𖽑𖽜𖾐 𖼠𖽚 𖼊𖽑𖽻𖾐，𖼽𖽻 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽻 𖼂𖽪𖾑 𖼊𖽑𖽺 𖼄𖽔 𖼊𖽻 𖼐𖽙𖾐．𖽃𖽔𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼺𖽺𖾑，𖼖𖽪 𖼽𖽻 𖼈𖽳𖾐 𖼊𖽑𖽺 𖼞𖽜 𖼊𖽻𖾐 𖼺𖽪𖾐 𖼀𖽕𖾑 𖼮𖽸𖾐 𖼐𖽺𖾐 𖼀𖽨 𖼈𖽡𖾐 𖼊𖽚𖾐 𖼄𖽡𖾐 𖼊𖽺𖾐 \fr 5．6 \ft 𖼞𖽑𖽶𖾑 𖼮𖽡𖽺 𖼖𖽚𖾑 𖼀𖽑𖽢 𖼊𖽙𖾐 𖼖𖽚𖾑 𖼄𖽚 𖼖𖽺𖾑 𖼹𖽚 𖼀𖽑𖽢 𖼊𖽙𖾐 𖼞𖽳𖾐 𖼄𖽡𖾐 𖼊𖽺𖾐 𖼣𖽻𖾐．，𖼦𖽑𖽺𖾑 𖼽𖽻 𖼈𖽳𖾐 𖼞𖽜 𖽂𖽙𖾐 𖼄𖽡𖽻𖾐 𖼄𖽔 𖼊𖽙𖾐 𖼳𖽶 𖼣𖽻𖾐． 7 𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼞𖽪𖾐 𖼹𖽪𖾐 𖼍𖽪𖾐 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽡𖾑 𖼮𖽪 𖼞𖽜 𖼮𖽙𖾐 𖼄𖽡𖾐 𖼊𖽺𖾐 𖼽𖽡𖾐．𖼽𖽻 𖼈𖽳𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼦𖽑𖽺𖾑 𖼹𖽻𖾐 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼄𖽔 𖼠𖽚 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼽𖽻 𖼈𖽳𖾐 𖼊𖽑𖽺 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼞𖽜 𖼦𖽑𖽙𖾐．𖼞𖽪𖾐 𖼮𖽡𖽺𖾐，𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼮𖽨𖾐 𖼄𖽙𖾐 𖼊𖽑𖽺 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼷𖽶𖾐 𖼄𖽔 𖼠𖽚 𖼳𖽶 𖼣𖽻𖾐． 8 𖼻𖽙 𖼐𖽜𖾐 𖼄𖽳𖾑 𖼄𖽳 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼷𖽶𖾐 𖼦𖽑𖽻𖾐 𖼠𖽙𖾑 𖼍𖽻𖾐，𖼽𖽻 𖼄𖽳𖾑 𖼮𖽻𖾐 𖼞𖽳𖾐 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼮𖽻𖾐 𖼺𖽺𖾑，𖼄𖽳𖾑 𖼄𖽳 𖼞𖽑𖽙 𖼦𖽑𖽻𖾐 𖼰𖽶𖾐 𖼮𖽑𖽡𖾐．
9 𖼽𖽺𖾐 𖼦𖽴 𖼦𖽫 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐：“𖼣𖽙𖾐 𖽃𖽙𖾑 𖼐𖽑𖽡𖾐 𖼐𖽑𖽡𖾐 𖼈𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖼮𖽑𖽻𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽜𖾐 𖼀𖽑𖽙 𖼂𖽺𖾐 𖼞𖽳𖾐 𖼳𖽡𖽦𖾑 𖼍𖽻𖾐 𖼊𖽪𖾐 𖼄𖽳𖾑 𖼄𖽳 𖼖𖽧 𖼦𖽑𖽙𖾐 \fr 5．9 \ft “𖼖𖽧 𖼦𖽑𖽙𖾐 ” 𖼦𖽑𖽺𖾑 𖼳𖽡𖾐 𖼂𖽚 𖼖𖽦 𖼊𖽻𖾐 𖼈𖽪𖾐 “𖼖𖽜𖾐 𖼦𖽑𖽙𖾐 ” 𖼀𖽦𖾐 𖼺𖽪𖾐 𖼣𖽻𖾐． 𖼦𖽑𖽻𖾐 ．” 𖽃𖽔𖾐 𖼺𖽺𖾑，𖼄𖽡𖾐 𖼊𖽺𖾐 𖼦𖽑𖽺𖾑 𖼊𖽑𖽺 𖼰𖽧 𖼰𖽡𖽕 \fr 5．9 \ft “𖼰𖽧 𖼰𖽡𖽕 ” 𖼦𖽑𖽺𖾑 “𖼖𖽜𖾐 𖼦𖽑𖽙𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐 𖽃𖽙𖾑 𖼐𖽡𖾐 𖼖𖽙𖾐 𖼮𖽑𖽡𖾐．
𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼳𖽪𖾐
10 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼮𖽻𖾐．𖼞𖽑𖽚 𖼳𖽸 𖼳𖽨𖾐 𖼷𖽑𖽡𖾐 𖼖𖽡𖾐 𖼞𖽑𖽶𖾑 𖼊𖽑𖽡 𖼦𖽑𖽦，𖼽𖽻 𖼈𖽳𖾐 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼊𖽺𖾐 𖼠𖽻𖾐 𖼄𖽙𖾐 𖼊𖽑𖽺 𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼳𖽪𖾐． 11 𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐，𖼽𖽻 𖼈𖽳𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼊𖽚𖾐 𖼺𖽪𖾐 𖼷𖽙 𖼊𖽪𖾐 𖼊𖽑𖽺 𖽂𖽙𖾐 𖼷𖽙．𖼹𖽦𖾑 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼽𖽻 𖼈𖽳𖾐 𖼇𖽝𖾐 𖼄𖽔 𖼠𖽚 𖼺𖽪𖾐 𖽃𖽔𖾑 𖼂𖽻𖾐 𖼐𖽺𖾐 𖼠𖽻𖾐 𖼺𖽪𖾐 𖼷𖽙𖾐 𖼺𖽳 𖼊𖽑𖽺 𖽂𖽙𖾐 𖼷𖽙 𖼦𖽑𖽻𖾐． 12 𖼽𖽻 𖼈𖽳𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼊𖽚𖾐 𖼺𖽪𖾐 𖼷𖽙 𖼊𖽪𖾐 𖼊𖽑𖽺 𖽂𖽙𖾐 𖼷𖽙 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐，𖼄𖽔 𖼐𖽕 𖼄𖽔 𖼀𖽑𖽨 𖼹𖽺𖾐 𖼖𖽻𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽔 𖼐𖽕 𖼄𖽔 𖽂𖽙𖾐 𖼷𖽙．𖼦𖽑𖽻𖾐 𖼊𖽑𖽻𖾐，𖼞𖽑𖽶𖾑 𖼊𖽑𖽡 𖼞𖽑𖽚 𖼽𖽻 𖼈𖽳𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼞𖽑𖽙𖾐 𖼊𖽚𖾐 𖼺𖽪𖾐 𖼷𖽙 𖼊𖽪𖾐 𖼊𖽑𖽺 𖽂𖽙𖾐 𖼷𖽙．
𖼽𖽱𖾐 𖼳𖽪𖾐 𖼽𖽕𖾑 𖼐𖽺𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽦 𖼈𖽪𖾑 𖼄𖽙𖾐
13 𖼽𖽱𖾐 𖼳𖽪𖾐 𖼽𖽕𖾑 𖼺𖽜 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼐𖽳 𖼽𖽡𖾐 𖼞𖽑𖽶𖾑 𖼮𖽶𖾐，𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼘𖽜𖾑 𖼐𖽦𖾐，𖼽𖽻 𖽃𖽙𖾑 𖼄𖽺 𖼀𖽳 𖼷𖽑𖽻𖾐 𖼊𖽑𖽡 𖼽𖽚𖾐 𖼞𖽑𖽻𖾑 𖼦𖽑𖽡𖽚 𖼞𖽳𖾐 𖼄𖽡𖽻𖾐，𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽕𖾑 𖼊𖽝 𖼖𖽚𖾐 𖼂𖽚𖾐 𖽃𖽔𖾑 𖼊𖽑𖽙 𖼈𖽺𖾐 𖼍𖽳𖾐．𖼽𖽱𖾐 𖼳𖽪𖾐 𖼽𖽕𖾑 𖼺𖽜 𖼽𖽻 𖼞𖽳𖾐 𖼞𖽑𖽻𖾑 𖼮𖽑𖽡𖾐，𖼽𖽻 𖼖𖽙𖾐 𖼊𖽻 𖼐𖽙𖾐：“𖼐𖽑𖽡𖾐 𖼣𖽙𖾐 𖼈𖽳𖾐 𖼖𖽙𖾐 𖼂𖽻𖾐 𖼺𖽪𖾐 𖼣𖽻𖾐 𖼐𖽺𖾑？ 𖼣𖽙𖾐 𖼈𖽳𖾐 𖼞𖽳𖾐 𖼮𖽡𖾐 𖼂𖽦𖾐 𖼖𖽙𖾐 𖼂𖽻𖾐 𖼺𖽪𖾐 𖼣𖽻𖾐？”
14 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽻 𖼞𖽑𖽚：“𖼦𖽑𖽺𖾑 𖼻𖽻𖾐 𖼄𖽔 𖼣𖽻𖾐! 𖼣𖽙𖾐 𖽃𖽔𖾑 𖼄𖽳𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽦 𖼈𖽪𖾑 𖼄𖽙𖾐 𖼂𖽺𖾐 𖼖𖽻𖾐 𖼺𖽪𖾐 𖼣𖽻𖾐．” 𖼽𖽱𖾐 𖼳𖽪𖾐 𖼽𖽕𖾑 𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐 𖼽𖽻 𖼊𖽑𖽺 𖼊𖽑𖽴 𖼽𖽻 𖼖𖽙𖾐 𖼀𖽦𖾐：“𖼣𖽙𖾐 𖼺𖽡 𖼀𖽑𖽙 𖽃𖽔𖾐! 𖼣𖽙𖾐 𖼊𖽑𖽺 𖽃𖽔 𖼊𖽺𖾑 𖼳𖽶 𖼄𖽪𖾑 𖼍𖽴𖾑 𖼊𖽪 𖼮𖽻𖾐 𖼐𖽺𖾑？”
15 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽦 𖼈𖽪𖾑 𖼄𖽙𖾐 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼮𖽑𖽡𖾐 𖼈𖽶 𖼊𖽑𖽺 𖼊𖽴 𖼺𖽪𖾐 𖼮𖽑𖽡𖾑 𖼐𖽴𖾐 𖼖𖽧 𖼹𖽺𖾐 𖼖𖽻𖾐! 𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼞𖽑𖽙𖾐 𖼦𖽑𖽡𖽚 𖼞𖽳𖾐 𖼄𖽡𖾐 𖼊𖽺𖾐 𖼦𖽑𖽺𖾑 𖼺𖽡 𖼮𖽡𖾐 𖼄𖽡𖾐 𖼊𖽺𖾐 𖼣𖽻𖾐．” 𖽃𖽔𖾐 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼽𖽻 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼦𖽑𖽙𖾐．