Ĩtĩmanit Ririwanĩnẽ
4
Gõtõõnõga kĩ ngõõnõga cĩk kamĩnanung na wo, nyĩ elemnyu eet vẽlẽk cĩk athĩ ne, ayak nẽẽgẽ ririwac cĩ aku Nyekuca. Ĩthõng thĩ, ĩtĩmanit ĩnõõgõ vẽlẽk, kĩĩ katĩ umuddia, katĩ ngĩ ayak nẽẽgẽ ririwac cĩ aku Nyekuca dĩdĩ, nyatarka mẽẽlĩ eeta cĩk ẽẽn volongnyiak cĩk athĩ ne, õthõõth nẽẽgẽ molook cĩ Nyekuco cĩk athaantothĩk looc vẽlẽk. 2 Gõõl cĩ woccia agawu niigia Ririwac cĩ Nyekuco wo coo. Ma ngĩ aduwa ririwacĩ ĩmma athĩ ne, aku Yesu Kiristo loota ngato ẽẽn et, aku ririwacĩ neccie ĩcĩ Nyekuco, 3 ĩthõng thĩ, mĩ abũrĩ ririwacĩ ĩmma ngatĩ akuni Yesu ĩcĩ Nyekuco, athii ririwacĩ neccie cĩ aku Nyekuca. Aku ririwacĩ neccie mĩrokta ĩcĩ Kiristo, wũ balna ithiktu niigia ngĩ athĩ ne, aku katĩ loota ngato, ĩthõng dĩdĩ ikiyyia vẽlẽk.4 Niigia doolia cĩk kamĩnanung na wo, eeginnu niigia dõõlĩ cĩk Nyekucak, ĩthõng ijiaryu eet cĩk õthõõth molook cĩ Nyekuco cĩk ẽẽn volongnyiak. Nyatarka ijiar Ririwacĩ cĩ aavĩ ĩcunung wo, ririwac cĩ aavĩ eetĩnẽy ĩcĩk loocu. 5 Ẽẽn eeta cĩk õthõõth molook cĩ Nyekuco cĩk ẽẽn volongnyiak wo, eet cĩk looc coo, ĩthõng õthõõth nẽẽgẽ thoothonniok cĩk looc coo, ĩthõng athĩrar eeta cĩk looc coo ĩnõõgõ. 6 Keeginna naaga eet cĩk Nyekucak, ĩthõng athĩknet katĩ eeta vẽlẽk cĩk aga Nyekuc ageeta. Ĩthõng thĩ, athii woccia cĩ athĩknet eeta cĩk athii cĩ aga Nyekuc. Ẽẽn woccia coo gõõl cĩ kagawĩ naaga Ririwac cĩ aduwa thõõth cĩ ẽẽn dĩdĩ, kĩ ririwac cĩ aduwa võlõng.
Mĩnan cĩ Nyekuco kĩ cĩnac
7 Gõtõõnõga kĩ ngõõnõga cĩk kamĩnanung na wo, adiim thẽk ngĩ kamĩnanõy nyaguana, nyatarka aku mĩnanĩ Nyekuca. Eeti cĩ ayak mĩnan, ẽẽn nẽ doolec cĩ Nyekuco, ĩthõng aga nẽ Nyekuc. 8 Ĩthõng eeti cĩ athii cĩ amĩnan gõõnõgĩ, ngaanĩ kagga Nyekuc, nyatarka amĩnan Nyekuci eeta. 9 Gõõl balna cĩ eyelecet Nyekuci mĩnan cĩnnĩ coo, kõr wũ balna itionanẽ nẽ Ngẽrĩnĩ cĩ odoi kikiyyia loota, kikiyyia kaanyet rũgẽt. 10 Mĩnan cĩ ẽẽn dĩdĩ coo, athii cĩ ẽẽn, nyatarka kamĩnanna naaga Nyekuc, ĩthõng thĩ, amĩnannet balna Nyekuci ageeta, ngatĩ itionanẽ Ngẽrĩnĩ cĩ odoi doo, kikiyyia kĩĩ gii cĩ cavĩto cĩ adĩmẽnĩ gerthetini cĩnac ngatĩvõrĩ. 11 Gõtõõnõga kĩ ngõõnõga cĩk kamĩnanung na wo, nyatarka amĩnannet Nyekuci ageeta, adiim thẽk ngĩ kamĩnanõy naaga nyaguana. 12 Ngaanĩ balna kĩcĩn eeti ĩmma Nyekuc kĩĩ yoko. Ĩthõng thĩ, mĩ kamĩnanõy naaga nyaguana, aavĩ Nyekuci thinnetinẽy ĩcĩgac, ĩthõng edenyiay mĩnanĩ cĩnnẽ gõõla cĩ kamĩnanĩ eet õõgĩ õrrõt.
13 Kagga naaga ngatĩ kaatẽ ĩcĩnnĩ, ĩthõng aavu nẽ ĩcĩnac, nyatarka anyet balna nẽ ageeta Ririwac cĩnnĩ. 14 Kĩcĩnĩt balna naaga, ĩthõng kagaacõ, ngatĩ itionanẽ Nyekuci Ngẽrĩnĩ kikiyyia kĩĩ Ellioit cĩ eet cĩk looc coo. 15 Arũmẽ Nyekuci kĩ eet vẽlẽk kõdõwẽ, cĩk aduwa meelitina athĩ ne, ẽẽn Yesu Ngẽrtĩ Nyekuco. Gõõl cĩ karũmẽnĩ kõdõwẽ kĩ Nyekuc wo neccie, 16 ĩthõng kagga naaga, ĩthõng kelemit dĩdĩ, ngatĩ amĩnannet Nyekuci ageeta.
Ẽẽn Nyekuci mĩnan. Mĩ kalna ngĩ kamĩnan naaga eleeti cĩgaac nyaguana, kalna katĩ karũmẽ naaga thinnetinẽy cĩgaac kõdõwẽ kĩ Nyekuc, ĩthõng katĩ alna nẽ kũrũmtẽ kĩ ageeta. 17 Mĩ kamĩnan naaga eleeti cĩgaac dĩdĩ, ĩthõng kaavutõ kĩ balna ngĩ aavĩ Kiristo loota ngato, õkõmĩ katĩ thinneti cĩgaac katĩ ngĩ eteddi thoothiowa cĩgaac kõrra cĩ ditianẽt cĩ loocu. 18 Kolli tongolinit mĩnana. Ĩthõng thĩ, mĩnanĩ cĩ abũnna õrrõt, ingka tongolinit ngatĩvõrĩ, nyatarka eeti ĩmma cĩ ongollie ukwẽẽnĩt, athii nẽ dĩdĩ cĩ aga mĩnan.
19 Kamĩnanõy naaga, nyatarka balna amĩnannet Nyekuci ĩcĩ owu. 20 Mĩ athĩ eeti ĩmma ne, “Kamĩnani Nyekuc,” ĩthõng athii cĩ amĩnan gõtõnĩ, kõdẽ ngõõnĩ, ẽẽn eeti neccie volongnyiait. Nyatarka eeti cĩ athii cĩ amĩnan gõtõnĩ, kõdẽ ngõõnĩ cĩ acĩn nẽnẽ, athii woccia cĩ amĩnan nẽ Nyekuc cĩ ngaanĩ kĩcĩn nẽnẽ. 21 Ĩthõng anyet Nyekuci balna ageeta tĩrĩthẽnĩt coo. Eeti ĩmma cĩ amĩnan Nyekuc, anycĩk ĩnõõnõ kĩmĩnan gõtõõnõgĩ kĩ ngõõnõgĩ.