3
Ĩcĩnĩt da nõõnõ ngatĩ amĩnannet Baangietĩ ageeta õrrõt, avvuyyet nẽ ageeta enneccet ne, dõõlĩ cĩgĩnĩk, ĩthõng thẽk keegin naaga dõõlĩ cĩgĩnĩk dĩdĩ! Ĩthõng thĩ, athii eeta cĩk looc coo cĩ aga ngatĩ keeginnie naaga dõõlĩ cĩk Nyekucak, nyatarka athii cĩ aga nẽẽgẽ ĩnõõnõ. 2 Gõtõõnõga kĩ ngõõnõga cĩk kamĩnanung na wo, kĩĩtõ naaga dõõlĩ cĩk Nyekucak vẽlẽk, ĩthõng thĩ kẽnnẽ, nẽ ngaanĩ keyelehet ageeta gõõl cĩ katĩ kaatẽ. Ĩthõng thĩ, katĩ ngĩ iliba Kiristo, kagga naaga kathĩ ne, kaatĩ katĩ naaga kĩ nẽnẽ, nyatarka kacĩn katĩ naaga ĩnõõnõ kir. 3 Eeti cĩ ayak muwẽẽnĩt cĩ abũnna coo, athii nẽ cĩ adĩman gerthetin, kĩ balna ngĩ athii Kiristo cĩ adĩman gerthetin.4 Eeti cĩ atican gerthetin, ẽgẽrẽthan ngiran cĩ Nyekuco, nyatarka aduwõy gerthetini kĩ ngatĩ abũrnĩ eeti ngiran cĩ Nyekuco thõng. 5 Ĩthõng agayyu niigia ngatĩ katĩ akuni Kiristo, kĩĩ katĩ woccia kẽnyẽẽĩ gerthetin cĩnac ngatĩvõrĩ, ĩthõng athii gerthetini ĩcĩnnĩ tõ. 6 Ĩthõng eeti ĩmma cĩ arũmẽ kĩ ĩnõõnõ thĩnĩna cĩnnĩ, athii nẽ gõõ cĩ atican gerthetin. Ĩthõng, eeti cĩ adĩman gerthetin kũdũt, athii cĩ aga ngatĩ ẽnnẽ Kiristo kir ngẽnẽ.
7 Niigia doolia cĩk kamĩnanung na wo, nyĩ anyiccu et ĩmma kĩgoolung thõõtha ĩcoo. Mĩ atican eeti thõõth cĩ edeemothi, ẽyẽla thõõth neccie ngĩ athĩ ne, ẽẽn nẽ et cĩ abũnna kĩyoko Kiristo wo. 8 Eeti cĩ alna atican gerthetin, ẽẽn et cĩ alaan cĩ ririwanĩn cĩk gerthek,a nyatarka ẽgẽrẽthanõy balna Thĩttanĩ baa terehianta. Ĩthõng thĩ, balna aku Ngẽrtĩ Nyekuco, kĩĩ katĩ woccia kikiyyia kõõga eet tiicanẽy vẽlẽk ĩcĩk gerthek ĩcĩk alaan cĩ ririwanĩn cĩk gerthek. 9 Athii woccia doolec cĩ Nyekuco cĩ arki ngĩ atican gerthetin noko, nyatarka aavĩ tiirthẽtĩ cĩ Nyekuco ĩcĩnnĩ, ĩthõng anyi ĩnõõnõ rũgẽt. Ĩthõng anyĩk Nyekuci ĩnõõnõ kĩthĩ doolec cĩnnĩ, kĩĩ katĩ kithii nẽ gõõ cĩ adĩman gerthetin. 10 Gõõl cĩ woccia kagawĩ naaga dõõlĩ cĩk Nyekucak, kĩ dõõlĩ cĩk alaan cĩ ririwanĩn cĩk gerthek coo, katĩ ngĩ athii eeti cĩ atican thoothonniok cĩk edeemothi, athii cĩ ẽẽn nẽ doolec cĩ Nyekuco, ĩthõng eeti cĩ athii cĩ amĩnan gõtõnĩ, athii cĩ ẽẽn nẽ buu doolec cĩ Nyekuco.
Ĩmĩnantõy nyaguana
11 Thõõth wũ balna athĩknu niigia ĩcĩ owu coo. Adiim thẽk ngĩ kamĩnanõy naaga. 12 Nyĩ attiyyu kĩ Keini wũ balna ẽẽn doolec cĩ Thĩttano, ĩthõng uruk gõtõnĩ. Aruk balna nẽ gõtõnĩ nyia? Aruk balna Keini gõtõnĩ, nyatarka atican balna nẽ thoothonniok cĩk gerthek, ĩthõng ĩdĩman gotonia thoothonniok cĩk edeemothi. 13 Gõtõõnõga kĩ ngõõnõga, nyĩ akulecu jien katĩ ngĩ aaburneccung eeta cĩk looc coo. 14 Kagga naaga ma ngĩ kũtũngtek daaĩth, ĩthõng kivitia rũgẽta, nyatarka kamĩnan naaga gotoonogiet kĩ ngoonogiet. Ĩthõng thĩ, eeti cĩ athii cĩ amĩnan gõtõnĩ, kõdẽ ngõõnĩ, ngaanĩ alna nẽ daaĩtha. 15 Eeti ĩmma cĩ aaburneei gõtõnĩ, kõdẽ ngõõnĩ, ẽẽn nẽ rukcioit kir thĩnĩna cĩnnĩ. Ĩthõng agayyu niigia ngĩ athii rukcioiti katĩ cĩ arũba rũgẽt cĩ alna kũdũt.
16 Gõõl cĩ kagawĩ naaga mĩnan coo. Ẽlẽmaaĩ balna Yesu Kiristo ẽlẽ cĩnnĩ, nyatarka ageeta. Ĩthõng adiim woccia ngĩ kẽlẽmanĩ naaga buu eleeti cĩgaac, nyatarka gotoonogiet kĩ ngoonogiet. 17 Mĩ kayak naaga kaal vẽlẽk cĩk kadiim naaga, ĩthõng kĩcĩnĩt eet cĩgaac cĩk apĩrna, adiim thẽk woccia ngĩ kamanni naaga eet nĩĩkẽ, mĩ athii tõ, athii woccia cĩ kathĩ naaga ne, aavĩ mĩnanĩ cĩ Nyekuco ĩcĩnac. 18 Niigia doolia cĩk kamĩnanung na wo, athii woccia naaga cĩ kamĩnanõy nyaguana thõõtha cĩ kõthõõth kutugetinẽy kaganoko, ĩthõng thĩ, kĩmĩnantõy thẽk tiicanẽy kĩ thõõtha cĩ ẽẽn dĩdĩ. 19 Ma ngĩ kamĩnan naaga gotoonogiet kĩ ngoonogiet, kagga naaga ngĩ kathĩ ne, keegin eet cĩk thõõth cĩ ẽẽn dĩdĩ, ĩthõng kaatĩ jurrung nguuma cĩ Nyekuco, 20 kõdẽ woyyia ngĩ anganyet thinneti cĩgaac ageeta. Ijiar Nyekuci thoothonniok cĩk thinneti cĩgaac, ĩthõng aga nẽ kaal vẽlẽk.
21 Gõtõõnõga kĩ ngõõnõga cĩk kamĩnanung na wo, mĩ athii thinneti cĩgaac cĩ anganyet ageeta, õkõmĩ katĩ ageeta thinneti cĩgaac Nyekuca, 22 ĩthõng anyet katĩ nẽ ageeta gii vẽlẽk cĩ kajina naaga ĩcĩnnĩ, nyatarka kathĩrar naaga thoothonniok cĩk tĩrĩthẽnĩt cĩnnĩ, ĩthõng kĩdĩmanit thoothonniok cĩk atarnanĩ nẽnẽ. 23 Ĩthõng tĩrĩthẽnĩt cĩnnĩ coo, adiimnyet Nyekuci ageeta kelemit Ngẽrĩnĩ Yesu Kiristo, ĩthõng kĩmĩnantõy nyaguana kĩ balna ngĩ aduwacet ageeta Yesu kĩdĩmanit. 24 Ma ngĩ kathĩrar naaga thoothonniok cĩk tĩrĩthẽnĩt cĩ Nyekuco, karũmẽ katĩ naaga thinnetinẽy cĩgaac kĩ ĩnõõnõ, ĩthõng katĩ aavu nẽ thinnetinẽy cĩgaac. Eyelecet Ririwacĩ wũ balna anyet nẽ ageeta ngatĩ keeginnie naaga codoi kĩ ĩnõõnõ.