Ellet Kiristo ageeta
2
Dõõlĩ cĩganĩk cĩk kamĩnani na wo, kẽhẽdacung na agiit Nyaraga coo, kĩĩ katĩ kithii cĩ adĩmannu gerthetin. Ĩthõng thĩ, mĩ ĩdĩmantu gerthetin, kayak naaga Et cĩ aduwaai Baangiet kũtũngek gerthetin cĩnac, ĩnõõnõ Yesu Kiristo Et cĩ adĩman thõõth cĩ edeemothi. 2 Ẽẽn nẽ gii cĩ cavĩto cĩ adĩm gerthetin cĩnac ngatĩvõrĩ, ĩthõng thĩ, athii nẽ cĩ adĩm gerthetin cĩnac dõ, adĩm gerthetin cĩ eet cĩk loocu vẽlẽk.3 Ma ngĩ kathĩrar naaga tĩrĩthẽntiok cĩk Nyekucak jurrung, kagga naaga ngatĩ kagawĩ ĩnõõnõ dĩdĩ. 4 Ĩthõng eeti cĩ õthõõth athĩ ne, “Kagga na ĩnõõnõ,” ĩthõng athii cĩ athĩrar tĩrĩthẽntiok cĩgĩnĩk, aduwa nẽ võlõng, ĩthõng athii thõõth cĩ ẽẽn dĩdĩ thĩnĩna cĩnnĩ tõ. 5 Ĩthõng thĩ, mĩ athũnnĩ eeti ĩmma thõõth cĩ Nyekuco, aku edenyiay mĩnanĩ cĩ Nyekuco ngatĩ ẽẽn dĩdĩ ĩcĩnnĩ. Thõõth thĩ cĩ kagawĩ naaga ngatĩ kaatẽ naaga ĩcĩnnĩ coo. 6 Mĩ kõthõõth naaga kathĩ ne, kayak rũmẽnĩt kĩ Nyekuc, abũnna thẽk ngĩ kõwõb yelinit cĩ Yesu Kiristo.
Tĩrĩthẽnĩt cĩ jõr
7 Gõtõõnõga kĩ ngõõnõga cĩk kamĩnani na wo, athii cĩ kẽhẽdacung na tĩrĩthẽnĩt cĩ jõr wo. Ĩthõng thĩ, kẽtẽhẽẽdawung tĩrĩthẽnĩt wũ balna rẽẽnĩ wũ balna ilimanothiwung agiitia, ĩthõng ẽẽn tĩrĩthẽntĩ coo thõõth wũ balna ithiktu niigia vẽlẽk. 8 Ĩthõng thĩ, kẽhẽdacung na agiitia tĩrĩthẽnĩt cĩ jõr, ĩthõng agayyu niigia tĩrĩthẽnĩt coo ngĩ ẽẽn dĩdĩ kaavu kĩ balna ngĩ aga Kiristo, nyatarka ithii muwuri, ĩthõng ũtũkũlõy lanyĩtĩ cĩ ẽẽn dĩdĩ vẽlẽk.
9 Mĩ athĩ eeti ĩmma ne, aavĩ nẽ lanyĩta, ĩthõng aaburneei gõtõnĩ, ngaanĩ aavĩ nẽ muwuratõ. 10 Ĩthõng eeti cĩ amĩnan gõtõnĩ, aavĩ nẽ lanyĩta, ĩthõng athii thõõth ĩmma ĩcĩnnĩ tõ, cĩ anyi ĩnõõnõ kittia. 11 Mĩ aaburneei eeti ĩmma gõtõnĩ, kõdẽ ngõõnĩ, aavĩ nẽ muwuratõ, ĩthõng athii cĩ aga gõõl cĩ õkõyyĩ, nyatarka anyi muwuri ĩnõõnõ kithii cĩ acĩnẽ.
12 Kẽhẽdacung na agiit dõõlĩ cĩk kamĩnani na wo, Nyaraga coo,
nyatarka ẽnyẽktẽ balna thoothonniowa
cĩk gerthek cuguk, nyatarka Kiristo.
13 Kẽhẽdacung na agiitia õõ baangĩ Nyaraga coo,
nyatarka agayyu balna niigia Kiristo
wũ balna aavĩ balna ngaanĩ ketengenyiay lõõcĩ.
Ĩthõng naboo, kẽtẽhẽẽdawung na agiit ngĩthõrõk Nyaraga coo,
nyatarka ijiaryu balna niigia Thĩttan.
Kẽhẽdacung na agiit dõõlĩ cĩk kamĩnani Nyaraga coo,
nyatarka agayyu balna niigia Baangiet.
14 Kẽhẽdacung na agiit õõ baangĩ Nyaraga coo,
nyatarka ivitiawu agayyu balna niigia Kiristo,
balna ngĩ aavĩ nẽ balna ngaanĩ ketengenyiay lõõcĩ.
Kẽhẽdacung agiit ngĩthõrõk,
nyatarka eeginnu tiirti niigia,
ĩthõng aavĩ thõõth cĩ Nyekuco thinnetinẽy cuguk,
ĩthõng ijiaryu balna niigia Thĩttan.
Nyĩ amĩnannu looc coo
15 Ĩthõng thĩna, nyĩ amĩnannu looc coo, kõdẽ kaal cĩk looc coo. Nyatarka mĩ amĩnan eeti ĩmma looc coo, athii woccia kẽnnẽ cĩ amĩnan nẽ Nyekuc Baangiet. 16 Nyatarka aku ngẽrẽn cĩ giithakthẽto looca coo, ĩthõng aku muruthẽtĩ cĩ abarriteei eeti kaal cĩk acĩn nẽ wo buu looca coo, ĩthõng thĩ, athii kaala cĩkkõ vẽlẽk cĩ avvu ĩcĩ Baangietĩ. 17 Athii katĩ lõõcĩ coo kõdõwẽ, kĩ thoothonniok vẽlẽk cĩk abarriteei eeta. Ĩthõng thĩ, eeti cĩ atican thõõth cĩ atarnanĩ Nyekuci, arũgĩ katĩ nẽ kũdũt.
Mĩrõk cĩk Kiristo
18 Niigia doolia cĩganniek cĩk kamĩnanung na wo, ẽẽn cĩkkõ wathinniok cĩk aturna. Ithiktu balna niigia ngĩ athĩ ne, aku katĩ miroiti cĩ Kiristo, kõdẽ woyyia yoko, ilibtia mĩrõwa cĩk Kiristo cĩk meelĩk vẽlẽk. Ĩthõng gõõl coo cĩ kagawĩ ngatĩ athĩnnĩ ne, wathinniok cĩk aturna wo cĩkkõ. 19 Ũtũngtek balna eeta cĩkkõ kelethianya cĩgaac, ĩthõng thĩ, kẽnnẽ balna athii nẽẽgẽ cĩ ẽẽn eet cĩgaac dĩdĩ. Mĩ da kĩĩtõ nẽẽgẽ eet cĩgaac, alna woyyia balna nẽẽgẽ ĩcĩnac. Ĩthõng kẽnnẽ, balna ũtũngtehet nẽẽgẽ ageeta, ĩnõõnõ thĩ cĩ kavunna naaga kagawua ngĩ kathĩnna ne, athii cĩ ẽẽn nẽẽgẽ eet cĩk meelitin cĩ lemnyiok cĩgaac.
20 Ĩthõng thĩ, agatannung balna Kiristo agiitia, Eeti cĩ Callĩ, ĩthõng ivitiawu agayyu niigia vẽlẽk thõõth cĩ ẽẽn dĩdĩ. 21 Ĩthõng yoko athii cĩ kẽhẽdacung na agiit Nyaraga coo, nyatarka athii cĩ agayyu niigia thõõth cĩ ẽẽn dĩdĩ. Ĩthõng thĩ, kẽhẽdacung, nyatarka agayyu thõõth cĩ ẽẽn dĩdĩ, kĩ cĩ ẽẽn võlõng, ĩthõng naboo, agayyu ngatĩ athii cĩ akuni thõõth, cĩ ẽẽn dĩdĩ thõõtha cĩ ẽẽn võlõng. 22 Ngẽnẽ cĩ ẽẽn volongnyiait? Ẽẽn volongnyiaiti et ĩmma cĩ õthõõth athĩ ne, athii Yesu cĩ ẽẽn Kiristo dĩdĩ. Ĩthõng abũrĩ nẽ Baangiet kĩ Ngẽrĩnĩ, ĩthõng ẽẽn nẽ miroit cĩ Kiristo. 23 Eeti cĩ abũrĩ Ngẽrtĩ Nyekuco, abũrĩ nẽ Baatĩnnĩ buu. Ĩthõng thĩ, eeti cĩ ẽlẽmĩ Ngẽrtĩ Nyekuco, ẽlẽmĩ nẽ Baatĩnnĩ buu.
24 Ahadit thõõth wũ balna athĩknu ĩcĩ owu. Ĩthõng katĩ ngĩ ĩdĩmantu noko, arumenu katĩ kõdõwẽ dõõkĩthĩ thinnetinẽy tõõ kĩ Ngẽrĩnĩ kĩ Baatĩnnĩ buu. 25 Ĩthõng thĩ, yoko ũbũtanehet Ngẽrĩnẽ ageeta rũgẽt cĩ alna kũdũt.
26 Kẽhẽdacung na agiit thoothonniok cĩkkõ, kĩĩ katĩ kitirithung agaac eet cĩk katĩ adiim ngĩ athiinung agiitia. 27 Ĩthõng agatannung Kiristo agiit Ririwaca cĩ Dĩhĩmĩ. Ĩthõng thĩ, yoko aavu Ririwacĩ ĩcunung, ĩthõng athii woccia cĩ adiimnyu limanniok õõgĩ naboo. Nyatarka athii Ririwacĩ cĩ õvõlõngĩ, alimannung gii vẽlẽk. Ĩthõng thĩna, aavut ũrũmĩt thinneti kĩ Kiristo, kĩ balna ngĩ illimanewung Ririwacĩ agiit ĩdĩmanit.
Dõõlĩ cĩk Nyekucak
28 Niigia doolia cĩk kamĩnanung na wo, aavut ũrũmtẽ kĩ Kiristo thinnetinẽy cuguk, kĩĩ katĩ mĩ õbõda nẽ, õkõmĩ katĩ thinneti cĩgaak, ĩthõng ĩthĩnga katĩ naaga kangawanna katĩ ngĩ ikiyyia nẽ.
29 Ma ngĩ agayyu niigia ngatĩ aticanĩ Kiristo thoothonniok cĩk edeemothi, agayyu niigia buu ngĩ athĩ ne, eeta vẽlẽk cĩk atican thõõth cĩ edeemothi, ẽẽn dõõlĩ cĩk Nyekucak.