Nyaraga cĩ ẽẽn Codoi cĩ ẽhẽẽd
Yoanẽ
Thõõth cĩ rũgẽtõ
1
Kaduwaccung naaga agiit Thõõth cĩ balna aavĩ thiananta cĩ loocu. Ĩthõng keeginna naaga eet cĩk balna kĩthĩkta ĩnõõnõ, ĩthõng kĩcĩnta kẽbẽrẽnĩy cĩgaak, ĩthõng kuwumta ĩnõõnõ athĩnẽy cĩgaak kir. Ẽẽn nẽ Thõõth cĩ rũgẽt cĩ kirionna naaga wo. 2 Iliba balna Thõõth cĩ ẽẽn rũgẽt wo, ĩthõng kĩcĩnta ĩnõõnõ. Ĩthõng yoko, kiittia naaga kẽbẽrẽ cĩgĩnĩk cĩk ketheccung ne, ẽẽn nẽ rũgẽt cĩ alna kũdũt. Arũmẽ balna nẽ kĩ Baatĩnnĩ, ĩthõng ilibaet ageeta. 3 Kaduwaccung naaga agiitia thõõth cĩ kĩcĩnta balna, ĩthõng kĩthĩraryia, kĩĩ katĩ ivitia kũrũmtẽ kĩ ageeta kõdõwẽ. Ĩthõng aavu rũmẽnĩtĩ cĩnac kõdõwẽ, kĩ Baangiet, kĩ Ngẽrĩnĩ Yesu Kiristo.a 4 Kẽhẽdaccung naaga thõõth coo, kĩĩ katĩ kebelbellia naaga dĩdĩ.Ẽẽn Nyekuci lanyĩt
5 Thõõth wũ balna kathĩkna naaga ĩcĩ Yesu coo, ĩthõng yoko kuduktiawung agiit kentewung ne, ẽẽn Nyekuci lanyĩt, ĩthõng ĩcĩnnĩ athii muwuri tõ kũdũt. 6 Mĩ kathĩ naaga ne, kõthõl rũgẽt kĩ Nyekuc, ĩthõng alna ngaanĩ kaatĩ muwuratõ noko, kõvõlõng naaga thõng, ĩthõng athii cĩ kaatĩ thõõtha cĩ ẽẽn dĩdĩ. 7 Ĩthõng thĩ, mĩ kaatĩ naaga lanyĩta kĩcĩ aavĩ Nyekuci, kõthõl naaga rũmẽnĩt kĩ goonogiet thõng. Ĩthõng ũtũũnyĩtõ biyyieta cĩk Yesu Ngẽrtĩ Nyekuco gerthetin cĩnac vẽlẽk.
8 Mĩ kathĩ naaga ne, ngaanĩ kẽgẽrẽthantõy, kĩgõõl naaga eleeti cĩgaac thõng, ĩthõng athii thõõth cĩ ẽẽn dĩdĩ thinnetinẽy cĩgaac tõ. 9 Ĩthõng mĩ kaduwai gerthetin cĩnac Nyekuc, kagga naaga ngatĩ athũnnĩ nẽ thoothonniok cĩgĩnĩk, ĩthõng adĩman nẽ thoothonniok cĩk edeemothi, ĩthõng amannĩcet katĩ nẽ ageeta gerthetina ĩcĩnac, ĩthõng ũtũũny thoothonniok cĩgaac cĩk gerthek vẽlẽk. 10 Mĩ kathĩ naaga ne, ngaanĩ kẽgẽrẽthantõy, kaanyi naaga Nyekuc kaavu kĩ volongnyiaiti, ĩthõng athii thõõth cĩnnẽ thinnetinẽy cĩgaac tõ.