Elemit Ngẽrtĩ Nyekuco
5
Eeti ĩmma cĩ ẽlẽmĩ Yesu dĩdĩ, ngatĩ ẽnnẽ nẽ Kiristo, ẽẽn eeti neccie doolec cĩ Nyekuco, ĩthõng eeti cĩ amĩnan Baatĩnnĩ, amĩnan nẽ doolec cĩnnĩ buu. 2 Gõõl woccia cĩ kagawĩ ngĩ kamĩnan naaga dõõlĩ cĩk Nyekucak coo, katĩ ngĩ kamĩnan naaga Nyekuc, ĩthõng kĩthĩraritõ tĩrĩthẽntiok cĩgĩnĩk. 3 Mĩnan cĩ Nyekuco coo, kĩthĩrarit tĩrĩthẽntiok cĩgĩnĩk, ĩthõng athii cĩ õkõmĩ tĩrĩthẽntiowa cĩgĩnnẽk ngatĩ kõwõbĩ. 4 Eeti ĩmma cĩ ẽẽn doolec cĩ Nyekuco, ijiar nẽ thoothonniok vẽlẽk cĩk gerthek cĩk adĩman eeta cĩk looc coo, ĩthõng karũba naaga jiariniet coo lemintia cĩnac. 5 Ngẽnẽ woccia ĩmma cĩ ijiar thoothonniok cĩk gerthek cĩk loocak? Ĩnõõnõ dõ et cĩ ẽlẽmĩ ngĩ athĩ ne, ẽẽn Yesu Ngẽrtĩ Nyekuco.6 Eyeliay balna Yesu Kiristo ngatĩ ẽnnẽ Ngẽrtĩ Nyekuco gõõla cĩ agamĩ batithimo maamĩy, kĩ ngatĩ ẽrẽnnanĩ biyyieta cĩgĩnnẽk kurucea. Athii balna cĩ ẽẽn maam dõ, ĩthõng thĩ, ẽẽn balna maam kĩ biyyie. Aduwa balna Ririwacĩ cĩ Dĩhĩmĩ thõõth coo, ngĩ ẽẽn dĩdĩ, nyatarka õthõõth nẽ thõõth cĩ ẽẽn dĩdĩ. 7 Ẽẽn kaala iyyio cĩk aduwa thõõth coo wo, 8 Ririwac cĩ Dĩhĩmĩ kĩ maam kĩ biyyie, ĩthõng ẽlẽmõy nẽẽgẽ vẽlẽk. 9 Kẽlẽmĩ naaga thõõth cĩ aduwacet eeta, ĩthõng thĩ, tiir thõõth cĩ aduwacet Nyekuci õrrõt, nyatarka õthõõth Nyekuci thõõth cĩ Ngẽrĩnĩ wo. 10 Mĩ ẽlẽmĩ eeti ĩmma Ngẽrtĩ Nyekuco, ẽlẽmĩ nẽ thĩnĩna cĩnnĩ thõõth cĩ aduwa Nyekuci, nyatarka Ngẽrĩnĩ. Ĩthõng mĩ athii cĩ ẽlẽmĩ eeti ĩmma thõõth cĩ aduwa Nyekuci, nyatarka Ngẽrĩnĩ, aduwõy woccia kĩ ngatĩ athĩnnĩ nẽ ne, ẽẽn Nyekuci volongnyiait.
11 Thõõth cĩ aduwa Nyekuci coo, athĩ ne, anyet nẽ ageeta rũgẽt cĩ alna kũdũt, ĩthõng Ngẽrĩnĩ cĩ ayahacet rũgẽt coo wo. 12 Ĩthõng thĩ, eeti cĩ ẽlẽmĩ Ngẽrtĩ Nyekuco, ayak nẽ rũgẽt. Ĩthõng eeti cĩ athii cĩ ẽlẽmĩ Ngẽrtĩ Nyekuco, athii cĩ ayak rũgẽt.
Thoothonniok cĩk aturna
13 Kẽhẽdacung na agiit eet cĩk elemtu thar cĩk Ngẽrtĩ Nyekuco, thoothonniok cĩkkõ, kĩĩ katĩ agaac ngatĩ ayawu niigia rũgẽt cĩ alna kũdũt. 14 Thõõth cĩ kaari naaga thinneti cĩgaac kokomit katĩ ngĩ kala Nyekuc coo, mĩ ngĩ kala naaga dimẽnta cĩnnĩ, athĩrar katĩ nẽ lawinit cĩnac. 15 Ĩthõng mĩ kagga naaga ngĩ kathĩ ne, athĩknet Nyekuci ngĩ kala ĩnõõnõ, kagga naaga jurrung kathĩ ne, ẽdẽcĩ katĩ nẽ lawinit cĩnac vẽlẽk.
16 Mĩ acĩn eeti ĩmma lemnyioit cĩ atican gerthetin cĩ woccia athii cĩ ayaha daaĩth, anycĩk niigia ĩnõõnõ kalawõy, kĩĩ katĩ kaanyĩk Nyekuci lemnyioit nĩcẽ rũgẽt cĩ alna kũdũt. Ĩthõng thĩ, aavĩ gerthetini cĩ ayaha daaĩth, ĩthõng athii cĩ kathĩ na ne, anycĩk ĩnõõnõ kalawõõĩ gerthetin cĩ et nĩcẽ. 17 Ẽẽn thoothonniowa cĩk gerthek vẽlẽk gerthetin, ĩthõng thĩ, athii cĩ ayaha gerthetini vẽlẽk daaĩth.
18 Kagga naaga jurrung ngĩ athĩ ne, athii cĩ alna doolia cĩk Nyekucak ẽgẽrẽthan thoothonniok. Nyatarka ẽẽla Ngẽrtĩ Nyekuco ĩnõõgõ, ĩthõng athii woccia cĩ adĩman Thĩttanĩ ĩnõõgõ buth. 19 Kagga naaga jurrung ngĩ kathĩ ne, keegin naaga dõõlĩ cĩk Nyekucak, ĩthõng agam Thĩttanĩ eet vẽlẽk cĩk gerthek cĩk looc coo. 20 Kagaacõ naaga buu ngĩ athĩ ne, ikiyyia balna Ngẽrtĩ Nyekuco, ĩthõng eyelehet ageeta ngĩ ẽẽn nẽ dĩdĩ Ngẽrtĩ Nyekuco. Ĩthõng kaatĩ naaga dĩdĩ ĩcĩ Nyekuco, ĩthõng naboo, kũrũmtẽ kĩ Ngẽrĩnĩ Yesu Kiristo cĩ ẽẽn Nyekuc dĩdĩ, ĩthõng anyet nẽ ageeta rũgẽt cĩ alna kũdũt.
21 Niigia doolia cĩk kamĩnanung na wo, ũtũbũrĩt kaal cĩk aar eeta kĩĩtõ nyekucnya.