Limanniok cĩk ẽẽn volongnyiak
2
Ĩthõng thĩ, aatĩ balna eeta cĩk ẽẽn volongnyiak cĩk athĩ ne, õthõõth nẽẽgẽ molook cĩ Nyekuco buu eetĩnẽy ĩcĩk Ĩthraĩlĩ, õgõõn thẽk kĩcĩ katĩ aatĩ limanniowa cĩk ẽẽn volongnyiak kõrgẽna cunung. Ẽtẽrẽhanĩ katĩ nẽẽgẽ ngatĩ alimanĩ thoothonniok cĩk gerthek cĩk ẽẽn võlõng labak, ĩthõng ẽpẽkanit Makayyioit cobbi wũ balna ũũta ĩnõõgõ biyyietĩy cĩgĩnĩk, ĩthõng amaryiak eleeti cĩgĩk daaĩth tamanoko. 2 Mẽẽlĩ katĩ eeta cĩk õwõb ĩnõõgõ, ĩthõng eyeheththia thoothonniok cĩgĩk cĩk ẽẽn ngawani, ĩthõng amaryiak gõõnõgĩ kuduktia thoothonniok cĩk ẽẽn võlõng limana cĩ ẽẽn dĩdĩ. 3 Ẽẽn katĩ nẽẽgẽ lavlavyiak cĩk adiimnyung agiitia owobit ĩnõõgõ, ĩthõng ĩgoollung thoothiowẽy cĩk ẽmmẽdẽ. Ĩthõng thĩ, baa lõõla idiim Nyekuci ngĩ uuk ĩnõõgõ, ĩthõng uuk katĩ nẽ ĩnõõgõ dĩdĩ.4 Ma ngĩ athii balna cĩ amanni Nyekuci anjĩlẽt wũk balna ẽgẽrẽthan thõõth,a ĩthõng thĩ, utdukeek ĩnõõgõ muwuratõ loowa ĩcĩ wuuni, ĩthõng ẽcẽb ĩnõõgõ kũdũt, gii ngĩ õdõlan kõr cĩ katĩ ẽtẽẽdĩ nẽ thoothonniok cĩgĩk, 5 ma ngĩ athii balna cĩ amanni Nyekuci eet cĩk abũrĩ ĩnõõnõ loota ngato, ĩthõng thĩ, ẽẽla nẽ Nõõwab kĩ eet tũrgẽrẽm õlõõtõtõ cĩnnĩ tõwõna, nyatarka ẽẽn balna Nõõwa et cĩ irion thõõth cĩ edeemothi, 6 ma ngĩ uuk balna Nyekuci eet cĩk korookjiok cĩk gaalawu cĩk obbitik cĩk Thõdõmĩ kĩ Gõmõra,c ngatĩ atũũthĩ ĩnõõgõ kĩĩtõ tithet, ĩthõng aanyĩk ĩnõõgõ kĩĩtõ yelinit cĩ gii cĩ katĩ adĩmanothi eet vẽlẽk cĩk athii cĩ ongollie Nyekuc, 7 ĩthõng ma ngĩ ẽẽla balna Nyekuci Lõõt buu Thõdõma, nyatarka ẽẽn balna nẽ et cĩ abũnna cĩ balna ẽhẽcĩ thoothiowa cĩk gerthek cĩk atican eeta cĩk abũrĩ Nyekuc, cĩk balna arũmẽ kĩ ĩnõõnõ, 8 ẽẽn dĩdĩ balna thẽk Lõõtĩ et cĩ abũnna, cĩ balna eheccie thĩnĩna cĩnnĩ, nyatarka thoothonniok cĩk gerthek cĩk acĩn nẽ, ĩthõng ĩthĩrar wathinniok vẽlẽk, 9 ĩthõng thĩ, mĩ õgõõn thõõth noko, aga Nyekuci ngatĩ ẽẽlanẽ eet cĩk athĩrar thõõth cĩnnĩ thoothiowẽy cĩk atĩmanini nẽẽgẽ, kõdẽ woyyia ngaanĩ anyi nẽ eet cĩk ẽẽn gẽrẽthanniok kaavutõ ukwẽẽnta, gii katĩ ngĩ õdõlan kõr cĩ katĩ etedinie thoothiowa. 10 Ẽẽn thõõth coo thõõth cĩ ẽẽn dĩdĩ, eetĩnẽy cĩk õwõb thoothonniok cĩk abarriteei nẽẽgẽ cĩk gerthek, ĩthõng adaaccitõ eet cĩk ẽẽn makayyiok cĩgĩk.
Tiirti nẽẽgẽ, ĩthõng ẽngẽrẽnĩ, ĩthõng athii cĩ ongollie ngatĩ adaacĩ kaal cĩk arũgĩ cĩk aatĩ tammuatiddina, 11 kõdẽ woyyia kĩĩ tiirti õrrõt anjĩlẽta kijiaritõ eet cĩkkõ cĩk ẽẽn limanniok cĩk ẽẽn volongnyiak wo, athii woccia nẽẽgẽ cĩ ũũlĩ ngatĩ õvõlõngĩ ĩnõõgõ ĩcĩ Makayyiokto. 12 Ĩthõng thĩ, õgõõn volongnyiaha cĩkkõ, kĩ kẽlẽgẽ cĩk bõõnak cĩk athii muwẽẽnĩtĩ tõ, cĩk arittiay, kĩĩ katĩ kagamtẽ, ĩthõng uruktie thõng. Aruwue katĩ volongnyiaha cĩkkõ kĩ kẽlẽgẽ cĩk bõõnak.
13 Etedothi katĩ ĩnõõgõ thõõth, nyatarka thoothonniok cĩk gerthek cĩk atican nẽẽgẽ wo. Adĩman nẽẽgẽ thoothonniok cĩk ẽẽn riiriny waath cĩk abarriteei eleeti cĩgĩk. Ẽẽn nẽẽgẽ eet cĩk ayahacung agiit thoothonniok cĩk gerthek kõrgẽna cunung katĩ ngĩ aduwenu kĩ ĩnõõgõ. 14 Acĩn nẽẽgẽ ngaay kẽbẽrẽnĩy cĩgĩk, ĩthõng ahad nẽẽgẽ, adiim ngĩ oogin kĩ ĩnõõgõ. Athii nẽẽgẽ cĩ uungni gerthetin kũdũt. Alabeei nẽẽgẽ eet cĩk agiithi kẽgẽrẽthantõy, ĩthõng abbĩththĩ ooti cĩgĩk muwẽẽnĩtĩ cĩ athĩ ngam ngam dõ, ĩthõng thĩ, ĩcĩĩn Nyekuci ĩnõõgõ vẽlẽk. 15 Ũtũngtek balna nẽẽgẽ gõõl cĩ abũnna, ĩthõng itihit gõõl cĩ gerthe cĩ õwõbĩ liman cĩ Balaamĩd ngẽrtĩ Beorĩ, wũ balna amĩnan kaal cĩk arũba nẽ gõõla cĩ gerthe. 16 Ĩthõng thĩ, balna egerenyek thigiriecĩ cĩnnẽ ĩnõõnõ kũtũngek thõõth cĩnnĩ cĩ gerthe ẽẽ. Aduwaai balna thigiriecĩ ĩnõõnõ thõõth moloowa cĩ eeto, ĩthõng aanyĩk ĩnõõnõ kĩbĩlĩ giithakthẽt cĩnnĩ ẽẽ, nyatarka ẽẽn balna nẽ et cĩ õthõõth molook cĩ Nyekuco.
17 Õgõõn eeta cĩkkõ kĩ kẽbẽrẽ cĩk duwwak cĩk odoitõ vẽr, ĩthõng naboo aavutõ kĩ diithiowa cĩk avungan ngõõtĩ. Ĩdĩmanek balna Nyekuci ĩnõõgõ ngĩtĩ muwuri. 18 Ẽngẽrẽn nẽẽgẽ, nyatarka kaal cĩk ẽẽn giithakthẽt cĩk aduwa nẽẽgẽ ẽẽ. Ĩthõng alabtẽk nẽẽgẽ eet cĩk ngaanĩ jõr uungni thoothonniok cĩk gerthek, kĩdĩmanit thoothonniok cĩk ẽẽn riiriny naboo. 19 Aduwaai nẽẽgẽ ĩnõõgõ ethei ne, kõõganung aavut jurrung, ĩthõng ẽẽn nẽnnẽ nẽẽgẽ nyakapanak cĩk gerthetinak, nyatarka ẽẽn eeta nyakapanak cĩk kaal cĩk agam ĩnõõgõ. 20 Ĩthõng mĩ ilittia eeta gerthetin cĩ loocu gõõla, cĩ agawĩ nẽẽgẽ Makayyioit cĩnac Ellioit Yesu Kiristo, ĩthõng ĩĩtõ nyakapanak cĩk gerthetinak naboo, avvu katĩ gẽrthẽ nẽẽgẽ kijiaritõ avuthit cĩnĩng wũ balna ĩcĩ owu. 21 Mayya woyyia ĩcĩnĩng ngatĩ athii cĩ aga gõõl cĩ bũnnatino, kijiar ngatĩ avvu aga gõõl cĩ ẽẽn dĩdĩ, ĩthõng ma vurtia ivitia ũtũngĩt tĩrĩthẽnĩt cĩ dĩhĩmĩ wũ balna alimanothi ĩnõõgõ. 22 Aku katĩ edenyiay thõõth coo ĩcĩnĩng cĩ ẽẽn dĩdĩ cĩ athĩ ne, “Aduk kũrũth tathak cĩgĩnĩk naboo,”e ĩthõng, athĩ naboo thõõth ĩmma ne, “Apurpuranni kiborongĩ cĩ ũtũũnyẽ vẽlẽk loroboca.”