Nyaraga cĩ ẽẽn Ramma cĩ ẽhẽẽd
Pẽtũrũ
Thawinet kĩ lawinit cĩ Pẽtũrũ
1
Aku Nyaraga coo ĩcannĩ Thimõnẽ Pẽtũrũ ticciannioit kĩ tionniaita cĩ Yesu Kiristo.b Kẽhẽdacung na agiit Nyaraga coo, eet cĩk kõthõl bũnnathĩt cĩ Yesu Kiristo, cĩ ẽẽn Nyekuc cĩnac kĩ Ellioit cĩnac, kumuddia naaga leminit cĩ kõthõl naaga kĩ agiitia wo.2 Kalayyie na, kĩĩ katĩ kithimatiwung Nyekuci agiitia, ĩthõng anyung aavut ganõna kĩ bũnnathĩta cĩ obbi õrrõt! Aavut agaac Nyekuc kĩ Makayyioit cĩnac Yesu dõõkĩthĩ õrrõt.
Gõõl woccia cĩ aatẽ wobjiaha cĩk Makayyioktak
3 Anyet Nyekuci ageeta tiirthẽta cĩnnĩ, kaal vẽlẽk cĩk kadiim naaga, kĩĩ katĩ kaavut rũgẽta cĩ anyi Nyekuc kẽbẽlbẽl. Karũba naaga kaal cĩkkõ vẽlẽk ngatĩ kavvunni kagawĩ ĩnõõnõ, wũ balna avuyyet nẽ ageeta kivitia ĩcĩnnĩ, bulẽnta cĩnnĩ, kĩ bũnnathĩt cĩnnĩ. 4 Ĩthõng nyatarka bulẽnĩt kĩ bũnnathĩt cĩnnĩ wo, ikiyyia balna uduwaet nẽ ageeta bũtan cĩ thoothonniok cĩk obbitik cĩk tiirtik. Aduwuay thoothiowa cĩkkõ, kĩĩ katĩ kaanycung agiit otholit avuthit cĩnnĩ, ĩthõng ilittiawu thoothonniok cĩk gerthek cĩk looc coo, cĩk ĩkõtha thoothiowa cĩk gerthek cĩk abarriteei eeta.
5 Nyatarka thoothonniok cĩk ĩdĩmanehet Nyekuci ageeta vẽlẽk wo, ĩtĩmanit õrrõt ngatĩ athĩknu thoothonniok cĩk aduwa Nyekuci. Ĩtooryik leminit cunung bũnnathĩt, ĩthõng ĩtooryiwu bũnnathĩt gẽẽnyĩth, 6 ĩthõng ĩtooryiwu gẽẽnyĩth avuthit cĩ athunnu eleeti cuguk jurrung, ĩthõng ĩtooryiwu avuthit cĩ athunnu eleeti moginit, ĩthõng ĩtooryiwu moginit bũnnathĩt gõõla ĩcĩ anyiccu Nyekuc kẽbẽlbẽl, 7 ĩthõng ĩtooryiwu gõõl cĩ anyiccu Nyekuc kẽbẽlbẽl gõõla cĩ eeginnu thimattiak kĩ gotoonogu kĩ ngoonogu, ĩthõng ĩtooryiwu gõõl cĩ eeginnu thimattiak kĩ gotoonogu kĩ ngoonogu, mĩnan cĩ eet vẽlẽk. 8 Mĩ ngaanĩ alinnu niigia goolliowẽy ĩcĩkkõ, ẽyẽla katĩ ngĩ athĩ ne, agayyu katĩ niigia Makayyioit cĩnac Yesu Kiristo, ngatĩ anyĩcẽ nẽ rũgẽt cunung kĩdĩhĩmẽ dĩdĩ. 9 Ĩthõng thĩ, mĩ athii cĩ aliththu niigia goolliowẽy ĩcĩkkõ ĩcĩk attiyyu jurrung, attiyyu katĩ kiggia kĩ eeta cĩk rubentĩk, ĩthõng erehewung ngĩ athĩ ne, ũtũũnycẽ thoothonniowa cĩk gerthek wuguk wũk balna rẽẽntĩk.
10 Ĩthõng thĩna, yoko gõtõõnõga kĩ ngõõnõga, ĩtĩmanit õrrõt ngatĩ ẽyẽlanu ngĩ attiyyu niigia kõrgẽna cĩ eet wũk balna avva Nyekuci, ĩthõng ẽbẽra ĩnõõgõ. Mĩ ngaanĩ adĩmannu thõõth coo, athii katĩ cĩ uungniccu leminit cunung. 11 Ĩthõng katĩ elemung Yesu Kiristo agiit Makayyioiti kĩ Ellioit cĩnac bulẽnta, ĩthõng anyung itioth kabicoc cĩnnĩ cĩ aavĩ kũdũt.
Thõõth cĩ kathĩknĩ Nyaraga cĩ Nyekuco
12 Ĩthõng thĩna, kahadacung katĩ gõõ na agiit thoothonniok cĩkkõ, kõdẽ woyyia ngĩ agayyu niigia ĩnõõgõ vẽlẽk, ĩthõng okomtu thõõtha cĩ ẽẽn dĩdĩ, wũ balna alimanothicung agiitia. 13 Ĩthõng dĩdĩ, kamui abũnna woccia ngatĩ kahadacung agiit thoothonniok cĩkkõ, ma ngaanĩ karugi na wo, 14 nyatarka eyeleea aneeta Makayyioiti cĩnac Yesu Kiristo vẽlẽk, ngatĩ katĩ thẽk kũtũngea na rũgẽt cĩ looc coo tamanoko. 15 Ĩthõng katĩmani katĩ õrrõt ngatĩ kaanyung agiit ahaddia thoothonniok cĩkkõ dõõkĩthĩ, vurtia cĩ kadaaẽ nana.
Bulẽnĩt cĩ Kiristo
16 Athii balna cĩ kaduwaccung naaga iyiaintiok cĩk kẽbẽrana thõng, balna ngĩ kaduwaccung makathĩt cĩ õbõdanĩ Makayyioiti cĩnac Yesu Kiristo, ĩthõng ageeta cĩk keeginna kẽbẽrẽ cĩk bulẽnĩt cĩnnĩ wo. 17 Ma balna ngĩ aanyĩk Nyekuci Baatĩnnẽ ĩnõõnõ dĩhĩthẽnĩt kĩ bulẽnĩt, ikiyyia õthõõth moloowĩ cobbi cĩ bulẽnĩt cĩ Nyekuco ĩthĩ ne, “Ngẽrnanĩ cĩ kamĩnani coo, katali na õrrõt, nyatarka ĩnõõnõ.”cd 18 Kĩthĩraryia naaga kir molook cĩ aku tammuatiddina, wũ balna karũmẽna kĩ ĩnõõnõ thiira cĩ angiranni.
19 Ĩthõng thĩna, anyet kaala cĩkkõ vẽlẽk ageeta kagaac jurrung õrrõt, ngatĩ thõõth wũ balna irion eeta cĩk õthõõth molook cĩ Nyekuce ngĩ ẽẽn dĩdĩ. Aavĩ thõõth coo kĩ gii cĩ tũkũlẽnto cĩ atũkũlĩ muwuratõ, alanyĩt kuumuc gii ngĩ aal lõõcĩ, ĩthõng atũkũlĩ lanyĩtĩ cĩ Kiristo thinnetinẽy cuguk, kaavu kĩcĩ atũkũl coobocĩ cĩ ngerethetino looc. 20 Ĩthõng gõõla cĩ tiiri vẽlẽk, adiim woccia ngĩ agayyu niigia jurrung ngĩ athĩ ne, athii eeti cĩ õthõõth molook cĩ Nyekuco cĩ õkõban thõõth cĩ Nyaraga cĩ Nyekucof mĩn tõ. 21 Athii balna cĩ ẽbẽra eeta cĩk õthõõth molook cĩ Nyekuco thoothonniok cĩkkõ mĩn, eyeleei balna ĩnõõgõ Ririwacĩ cĩ Dĩhĩmĩ.g